Guutimik mianerinnilluni aammik ataqqinninneq
’Ullormi matumani nalunaajaaffigaassi tamarmik aavinut pinngitsuusunga.’ — apustilit suliait 20:26.
1. Paulusip oqaasiisa apustilit suliáinik agdlagkane 20:26-imi allassimasut Jehovap aak pillugu isumaa qanoq ersersippaat?
TAAMATUT oqaaseqarnermigut apustili Paulusip kristumiutut aammik, imerpalasumik inuussutaasumik, ataqqinningaarnini ersersippaa. Atuagassami uani kingusinnerusukkut paasiniassavarput Paulusip taamatut oqaaserisani qanorpiaq isumaqartikkaa. Siullermilli tarninik uumasunik inuusunillu Pinngortitsisup aak pillugu oqaaserisimasai misissoriartigik. Ilikkareerparput Jehovap Guutip aak illernartutut isigigaa, aak tassaammat inuussut. Inuit isumaatsumik soqutigittaatsumilluunniit aammik, ingammillu inuit aavinik, kuisisut Guutip isaani pillartariaqarput. Kisiannili aak sukkut arlaatigut atorfissaqannginnerpa inuiaat iluaqutissaannik?
2. (a) Suna pillugu Israelimi aattortut toqumik pillarneqartarpat? (b) Israelikkut inatsimmik tamatuminnga maleruaanertik qanoq iluaqutigaat?
2 Guutip Israelikkunnut aak pillugu inatsisaa erseqqilluinnarpoq: ’Suup uinillup aavanik nerissanngilasi, uinillup nalinginnaap tarnaa [inuussutaa, Buhl] aavaniimmat. Nalinginnaq tamatuminnga nerisoq piiarneqassaaq.’ Israelikkut nunani allamiulluunniit Israelikkut akornanni najugaqavissut aattussagunik, kaannermilluunniit aattussagaluarunik, toqumik pillartariaqarput. Uumasup neqaanik neritinnatik, uumasoq aaviartariaqarpaat aavalu issup sequnnerinik matoorlugu, taamaalillutik inuussut Guutimut utertillugu. (3 Môrsase 17:13, 14) Guutip tamanna inatsiliaraa. Inatsit tamanna maleruarunikku Israelikkut Jehovamut, Inuunerup Pilerfianut, anersaakkut peqqissumik pissuseqartuarsinnaassapput. Inatsisinik maleruaanerat allamuttaaq, timikkut peqqissuujuarniarnissaannut, iluaqutissiivoq.
Kristusip aava
3. (a) Suna pillugu Jesusip aava naleganngitsumik ’akisuua’? (b) Allakkat hebræerisuut Jesusip pilliutissaanut qanoq ilillutik siumut tikkuartuippat?
3 Kisiannili aap immikkut atorneqarumaarnissaa Jehovap pilersaarutigisaraa. Kristusip Jesusip ’aava akisooq’ sakkugalugu inuiaat ajortimit toqumillu utertinneqarnissaat Guutip siunertaraa. ’Silarsuup [Adamikkut Evallu ajortillit utertitassaasumik kinguaassiorneratigut] tunngavilerneqanngikkallarnerani’ allaat, Jehovap ilisimareersimavaa qanoq periaaseqarluni inuiaat aniguisikkumaarini. (1 Pîtruse 1:18-20; Rûmamiut 6:22, 23) ’Ernerata Jesusip aavata tamanik ajortaajarpaatigut.’ (1 Juánase 1:7) Aap tamatumuuna atornissaa ima pingaaruteqartigimmat, assiliaasut tarraasullu Jesusip naammalluinnartup pilliutigineqarnissaanut siumut tikkuartuisut arlaqartut Guutip Allakkani hebræerisuuni allaatigineqartippai. — Eprîarit 8:1, 4, 5; Rûmamiut 15:4.
4. Pisimasumi pissanganartumi Môrsasip agdlagaine sujugdlerne, kapitali 22-mi, allassimasut sunik siumut uparuartuippat?
4 Inatsisit Israelikkunnut tunniunneqarnerisa ukiut arlalinnik hundredillit siornatigut, Jehovap Abraham peqquaa Isak Morijap qaqqaani pilliutigiartoqqullugu. Tamatumuuna Guutip takutinniarpaa qanoq ilillugu nammineq ernituani, Jesus, pilliutigissamaarini. Pisimasumi pissanganartumi tamatumani Isakip piumalluni naalatsigitinnera siumut assersuutaavoq Jesusip piumalluni Ataataminut naalatsigitinneranut, piumaffigimmani aani inuussutaasoq pilliutitut kueqqullugu. — 1 Môrsase 22:1-3, 9-14; Eprîarit 11:17-19; Filípimiut 2:8.
5. Pilliutit Mosesip inatsisai malillugit pilliutigineqartartut qanoq ilillutik anersaakkut pingaaruteqavissuuppat?
5 Mosesip inatsisai ’ajunngitsuutit nalliuttussat tarraannaannik peqarput’, inuiaat pillugit Jesusip pilliutissaanut tikkuartuillutik. Inatsisit naapertorlugit aak ataasiinnarmik — uumasut Jehovamut pilliutigineqarnerinik — atorfissaqarpoq. Pilliinerit tamakku upperisarsiornermut malittarisassaannaanngillat. Anersaap piinik pingaarutilissuupput. Inatsisit Jesusip pilliutaanut tamatumuunalu naammassineqarumaartussanut tamanut annikitsualuttaat ilanngullugit siumut assersuutaapput. — Eprîarit 10:1; Kulorsamiut 2:16, 17.
6. Pilliutit ullormi saammaannartitsivimmi pilliutigineqartartut immikkoortoqatigiit marluk assigiinngitsut suut utertinneqarumaarnissaannut assersuutaappat? Tamanna qanoq naammassineqassava?
6 Assersuutigalugu, ullormi saammaannartitsivimmi pilliutigineqartunik Aronip iliuuserisartagai assersuutaapput qanoq palasiunerup annerup, Jesusip, nammineq aammi erlinnartup iluaqutissartaa atoraa annassutissiilluni, siullermik ’inoqutini’ palasiusut, tassa kristumiut tanitaasut 144.000-iusut, pillugit, iluarnermut pisitaasinnaaqqullugit qilammi kunngitut palasitullu ilagaluni kingornussaqarsinnaaqqullugit. Tulliullugu tunissut ’inunnut’ atortoq assersuutaavoq Jesusip inuiannik maani nunami inuunermik naassaanngitsumik kingornussaqarumaartussanik tamanik utertitsineranut. Maannakkut allaat taakkua ilaat ’amerlangaartut’ iluarsuseqartitaapput annikilliornartumi nalliukkumaartussami annatsitaanissaminnut. Iluarsuseqartitaapput ’atisatik takisuut savaaqqap aavanik erroramikkik qaqorsarlugillu’, uppersusertillu takutikkamikku Guuti illernartumik kiffartuullugu. — 3 Môrsase 16:6, 15, 18-22; Eprîarit 9:11, 12; sarĸúmersitat 14:1, 4; 7:4, 9, 14, 15.
7. Itsarsuarli maleruagassat siulittuutaasut piviusunngortitaammata suna pillugu uagut tipaatsuutigisinnaavarput?
7 ’Uinillup inuussutaa aavaniippoq.’ Jesusip aava naammalluinnartuummat, taassuma pilliutaa tamatuminnga upperfiginnittut tamarmik naammalluinnartumik inuussuteqartitaanissaannik kinguneqassaaq. Qujanassusia itsarsuarli issuagassat siulittuutaasut Jesusip asannilluni pilliutaani piviusunngortitaammata! — 3 Môrsase 17:14; apustilit suliait 20:28.
Aak ileqqussallu
8, 9. (a) Aap sulissutigisartagaasa ilaannik taasaqarit. (b) Davidip oqaasii atorlugit taamatut ittunngorluta pinngortitaanerput ataqqillugu Guutimik mianerinninnerput qanoq oqaatigissavarput?
8 Aap katitigaanerani ilisimassuseq tupinnaqisoq ersersitaavoq. Nunarsuup uumasuisa naasuisalu imminnit amigarnerusunik naggueqarlutik pinngoriartorsimasorineqarnerannik upperisaqartut, inuunerup pinngorsimaneranik suli paaqartitsisinnaanngitsut, uumassusillit aavat inuussutaasoq qanoq iliornikkulluunniit pinngoriartorsimanerarpaat. Eqqarsaatip ila ingasalluinnassusia!
9 Aak assigiinngitsorpassuarnik katitigaasoq tupinnartorpassuarnik suliaqarpoq. Ilti inuujuartitsisoq inuussutissallu timip pisataanut tamanut ingerlatittuaannarpai. Timip igitassartaanik eqqaasuuvoq. Mikisuaqqanik qaqortunik nappaatinut akiuussutaasunik akoqarpoq, aappaluttunillu ikinik minnerusunik annerusunillu iluarsaasinnaasunik akoqarluni. Timip kissassusianik killileeqataavoq. Inuit tamarmik immikkut aavat inoqataasa tamarmik aavannit allaavoq; Tuluit Nunaanni siuaasanit kingornussanik misissuisartut siunnersuutigaat inuit „DNA-rtaata allaassutaa“ aavannit pilersitaq pinerluttut kinaassusiinik paasiniaanissamut atorneqarsinnaassasoq. Timip pisatarpassui, aak ilanngullugu, eqqarsaatigalugit kunngi David pilerpoq: „[Jehova], illit misissuiffigisimavarma, nalunangalu. Qutsavigissavakkit pinngortitaagama tupinnangaartumik.“ — Tussiaat 139:1, 14.
10. (a) Aap qanoq atorneqarsinnaanissaa kia aalajangissavaa? (b) Guutip Noa Israelikkullu erseqqissumik qanoq ajoqersuuppai? (c) Pisimasup suup takutippaa aak illernartuusoq ajornartoorfikkut allaat?
10 Inuiannik Pinngortitsisoq iluartoq, aammik Katiterisoq, imerpalasup inuussutaasup qanoq atorneqartarnissaanik aalajangiisussaannginnerpa? (Jûpe 36:3) Qularutissaanngivissumik taamaaliorsimavoq. Siuaasatsinnut Noamut nalunaarsimavoq: „Kisianni neqi tarnilik — tassa aak — nerissanngilarsi.“ (1 Môrsase 9:4, NW) Inatsisilianilu Israelikkunnut uteqqikkamiuk oqarsimavoq: ’Manna kisianni aalajangiussavat: Aava nerissanngikkit; aava tassaammat tarnaa, taamaattumik tarnaa nerissanngilat neqaanut ilanngullugu. Nerissanngilat, nunamut kuissavat imertut.’ (5 Môrsase 12:23, 24) Qularnanngitsumik Davidip tamanna eqqarsaatigaa pissarsuutitaasa ilaat pingasut inuunertik annaaratarsinnaagaluarlugu Betlehemip puilasuliartaanit imertariartormata David imermik pajukkumallugu. Imeq ’kuerarpaa Jehovamut pigitillugu’ angutit pingasut taakkua inuunerannik naleqartillugu. (2 Sâmuale 23:15-17) Ajornartoorfikkut allaat aap illernassusia sumiginnarneqartussaanngilaq. — Aamma takuuk Sâmualip agdlagai sujugdlît 14:31-34.
Kristumiut ilagiissaanni
11, 12. (a) Ukiuni hundredilinni siullerni ajoqersuutit pillugit immikkoortoqatigiit Guutip anersaavanit aqunneqartut kikkut aalajangiisussaappat? (b) Siulersuisoqatigiit taakkua aattorneq sunut naligitippaat? (c) Suna pissutigalugu aalersortinnerit qanikkut aattorneq naligaat?
11 Ukiuni hundredilinni siullerni Jerusalemimi inersuaq takorloorsinnaaviuk? Tassani Jesusip apustilii kristumiullu ilagiissaanni utoqqaanertat allat katerisimaarput. Suna oqaloqatigiissutigaat? Paulus Barnabasilu Antiochiaminngaaniit tikiussimapput kipineqarneq pillugu tassani ajornartorsiutigineqalersimasoq taakkununnga saqqummiukkiartorumallugu. Siulersuisoqatigiit taakkua aalajangerpaat kristumiunngorlaat timikkut kipineqartinnissaat pisariaqanngitsoq. — apustilit suliait 15:1, 2, 6, 13, 14, 19, 20.
12 Aalajangigaq tamanna nalunaarutigigamikku, taamani siulersuisoqatigiit piumasarisat suli kristumiunit piumasarineqartuusut pingaarnersiorlugit uteqqippaat. Oqarput: ’Tassa anersaap iluartup uagullu iluaraarput nammagassanik allanik ilisiffigiumanasi, kisianni pisariaqartunik ukuninnga: Guutipilunnut tunissutit ilangeqqunagit, aammillu ipisumillu [tassa, aaversimanngitsumik] nereqqunasi, kanngunartulioqqunasilu. Tamakkununnga mianersorussi iluanaassaasi. Inuulluaritsi.’ (apustilit suliait 15:28, 29) Guutipilussiorneq, aattorneq kanngunartuliornerlu upperisarsiornerup tungaatigut naligiissinneqarput. Anersaakkut peqqilluarlutik iluanaassagunik Guutillu neriorsuutaasa eqquutitaanissaannik pissaqassagunik, kristumiut tamakku tamaasa ingalattariaqarpaat. Aak eqqarsaatigalugu, qanikkut nerinissaa taqqatigullu aalersuutiginissaa assigiipput, periaatsimmi tamarmik assigiissumik siunertaqarput: timip nakussassagaanissaa inuuteqartitaanissaalu. Soorlu siulersuisoqatigiit taakkua erseqqissumik takutikkaat, aammik atuinaviinngitsoorneq Guutip inatsisaanik unioqqutitsineruvoq.
13. (a) Aattorneq aammillu atuineq ajoramik Jehovap Nalunaajaasui aamma sumut illersugaappat? (b) Guutip inatsisai allat qanoq ilillutik innuttaanut illersuutaasarpat?
13 AIDS-ip, tinguup aseruuttoornerata nappaatillu allat aalersuinikkut tunillaattartut ullumikkut nappaalanersuartut ittumik siaruaassimanerisa takutippaat Guutip inatsisaanik maleruaaneq timikkuttaaq peqqinnartuusoq. Bibelip pilerfiata nalaani Guutip Israelikkut nerisassaat, nappaateqarneq pissutigalugu immikkoortitaaneq, peqqinnissamut tunngasutigut sianiginnilluarniarneq nappatsaaliortitsinermullu tunngasut pillugit immikkut inatsisiliuuppai, puilasuitsumi angalanerannut naleqquttuusunik. (3 Môrsase 11:2-8; 13:2-5; 5 Môrsase 23:10-13) Pissusereqqusat tamakku maleruaraangamikkik Israelikkut Guutiminnut anersaakkut ittumik qanittumik pissuseqartuaannaannaratik aammattaarli nappaatinik nunat sanilerisat inuisa naalliuutigisartagaannik timimikkut nappatsaaliorneqartarput. Ukiut 100-t kingulliit ingerlanerinnaanni aatsaat nakorsat paasilersimavaat inatsisit taakkua ilisimatussusii atorluarsinnaasut. Aammattaaq inuppassuit paasilersimavaat Guutip aak pillugu inatsisaanik maleruaanerup silatusaarnerussusia.
14. Israelikkut naalakkaangamik qanoq ilillutik peqqinnissakkut ajunngequtinik pisarpat pilluaqqusaasarlutillu?
14 Israelikkut naalakkaangata, Guutip neriorsuut una taakkununnga eqquutittarpaa: ’Jehovap Guutivit nipaa naalalluarukku iluarisaanillu iliorlutit, siummissaruillu inassutaanut ileqqoreqqusaalu tamaasa maleruarlugit, taava nappaatit Ægyptenimiunut tutsitama ilaalluunniit ilinnut tutsissanngilara, uanga tassaagama Jehova katsorsaasigisat.’ Suli pingaarnerusumik, naalattuaannarnermikkut Israelikkut siunissami Naalagaaffiup ataani pilluaqqussutissanik pissaqarnissartik neriugisariuarsinnaavaat. — 2 Môrsase 15:26; 19:5, 6.
15. Nalitsinni pisimasup suup takutippaa Guutip maleruagassiaanik maleruaanitsinni pilluaqquneqarsinnaasugut?
15 Jehovap Nalunaajaasuisa ilisimatuussutit nutaanerusut nakorsaanermut tunngasut iluaqutigisinnaagamikkik pingaartippaat. Soorlu 1985-imi Australiami Sydneyp eqqaani rigssaliisa ilaat qaartartumeerinikkut aserorneqarmat Nalunaajaasullu 50-it sinneqartut ikiligaasut tuaviinnaq napparsimmavimmukaanneqartariaqaramik, qujamasuutigaat nakorsat aap taartissiaanik naammattumik pissamaateqarmata. Ikiligaasut tamarmik annapput. Jehovap maleruagassiai unioqqutinnagit aap taartissiaanik pilersortissinnaagamik qujamasuutigisinnaavaat. Aamma tamanna iluaqutigalugu nappaatinit aalersuinikkut tunillaattartunit arlaannaataluunniit tunillatsissinnaanissaa aarleqqutiginarsimanngilaq.
’Tamarmik aavinut pinngitsuusoq’
16. Paulusitut kiffartuussinerput illernartoq qanoq isumaqarfigisariaqarparput?
16 Ukiuni hundredilinni siullerni pisimasumut uteriarta. Guutipilussiornermut, aattornermut kanngunartuliornermullu inerteqqut Paulusip Barnabasillu tusarnaagaat siulersuisoqatigiit nalunaarutigimmassulli ukiut arfineq-marluk missaat qaangiussimapput. Piffimmi tamatumani Paulusip marloriarluni Asiaaqqami Europalu Kangillermi ajoqersuiartortitatut angalanerit naammassisimavai. Maanna, angerlamut ingerlanermini Milet aqqusaaramiuk, utoqqaanertat Efesusimeersut naapikkiartorluni Miletimut tikiussimasut oqalugiarfigai. Eqqaasippai taakkunaniiffini naallugu imminut qajassuussimanani, ’Naalagaq kiffartorfigigiga tamatigut nikanartillunga qullilisarlungalu usserneqartarlungalu’. Ullumikkut uagut taassumatut immitsinnut qajassuutinngitigineq ajorpugut, Jehovamik kiffartuussinitsinni tamaviaartuaannarluta? Taamaaliortariaqaraluarpugut. — apustilit suliait 20:17-19.
17. Paulusitut kiffartuuterput qanoq ilillugu naammassisariaqarparput?
17 Qanoq ililluni Paulusip kiffartuutini naammassisimavaa? Periarfissaqaraangami nalunaajaasarpoq, ingammik inuit illuini, upperisarsiornikkullu tunulequtarisaat soqutiginagit. Utoqqaanertanik taakkuninnga ilitsersuinermini iluaqutissamik nipangiussaqanngilaq, qularnanngitsumillu ’inuit tutsaanni illumillu illumut angalaarluni’ ajoqersuinermini ilagisarsimassavai. Paulusip aallussilluartumik kiffartuussineranik iluaqutiginnissimasut taakkuinnaanngillat, ’juutit grækerillu peqqissaartumik nalunaajaaffigimmagit Guutimut allamik isumataarnissamik uppernissamillu Naalakkatsinnut Jesus Kristusimut’. Malugiuk „peqqissaartumik“ nalunaajaaffigigai. Ullumikkut uagut inuit assigiinngitsut tamaasa, inuit naggueqatigiinnit tamaneersut, nalunaajaaffigineqarniarnissaat peqqissaarupparput? — apustilit suliait 20:20, 21; sarĸúmersitat 14:6, 7.
18. (a) Paulusitut Guutimik kiffartuussinitsinni tarnerput tamaat qanoq ililluta tunniutissavarput? (b) Paulusitut ajornartorsiutit sualussiartuinnaraluartut qanoq oqaluussiuassaagut?
18 Oqaaseq „peqqissaartumik“ Paulusip nangilluni oqaaserisaasa ilagaat: ’Inuunerali [tarnigali] erlinnartinngilara arpannera naajumallugu kiffartuullu Naalakkamit Jesusimit pisara, iivangkiiliu Guutip saammaanneranik [peqqissaartumik, NW] nalunaajaassutigissallugu.’ (apustilit suliait 20:24) Inuunera, tassa tarnaa, erlinnartuunavianngilaq kiffartuutini naammassisimanngikkaluaruniuk. Uagut kiffartuuterput taama isumaqarfiginerparput? Uagut Paulusitut isumaqarnerpugut — inuit ’qinngaqqunnanngitsut’ peqqissaartumik ujartuarlugit, silarsuup matuma ullui kingulliit ingerlatillugit, ulapaarnermillu eqqissisinnaannginneq, malersugaanerit, nappaatit utoqqaliartornerlu immaqa sualussiartuinnartumik nukeerussutigitillugit? — Matîuse 10:12, 13; 2 Timûtiuse 2:3, 4; 4:5, 7.
19. Suna pillugu Paulus oqarsinnaasimava ’tamarmik aavinut pinngitsuulluni’?
19 Utoqqaanertat Efesusimeersut takoqqinnissaat Paulusip ilimaginngilaa. Isumalluarluinnarlunili oqarfigisinnaavai: ’Ullormi matumani nalunaajaaffigaassi tamarmik aavinut pinngitsuusunga.’ Qanoq isumaqarpa? Paulus sorsunnermi aammik kuisisimanngilaq. Aattorsimanngilaq. Inuilli allat inuuneri, tassa aavat, soqutigisareqaa. Ullussami Guutip eqqartuussiffissaani peqqissaartumik nalunaajaanngitsoorsimanini pissutigalugu inuunerminnik annaasaqarnissaat Paulusip kissaatiginngilaa. ’Nipangiussaqarnani Guutip siunnersuutaa tamaat’ utoqqaanertanut taakkununnga allanullu oqaatigisarsimavaa. — apustilit suliait 20:26, 27.
20. (a) Jehovap Ezekielimut mianersoqqussutaa uteqattaartoq eqqarsaatigalugu, uagut ullumikkut sumik akisussaaffeqarpugut? (b) Uatsinnut tusartitsinnullu sumik kinguneqassava?
20 ’Annikilliornartussaq’ qanilliartortillugu Guutip siunnersuutaa tamaat tamanut oqaatigissallugu nukinginnarnerujartuinnarpoq. Ukiut 2600-t matuma siornagut Jerusalemip piuneerunneqarnissaata qanilliartornerani pissusiusumut assingusumik ullumikkut pissuseqarpoq. Jehovap oqaasia pruffiitianut Ezekielimut pivoq, oqarluni: ’Inuup qitornaa uumaa, Israelikkunnut alapernaarsuisuutippakkit; qaninnit oqaasissarsillutit inertertassavatit uannit. Iluaatsumut oqaruma: Toqussaatit, illillu inertinngikkukku, iluaatsoq inerterlugu ingerlavimminut iluaatsumut misissoqqullugu inuutikkumallugu oqanngikkuit, iluaatsoq taava toqussaaq ajortulinermini, illilli aavanut pisuutikkumaarpakkit.’ (Hisĩkiale 3:17-21; 33:7-9) Ullumikkut Jehovap kiffai tanitaasut ilagisaallu ’amerlangaartut’ tamatumunnga assingusumik akisussaaffeqarput. Nalunaajaanerput peqqissaaruttariaqarparput. Taava, ullussami Guutip akiniaaffiani annatsikkumaarpugut, tusartivullu annatsikkumaarput. — Isaia 26:20, 21; 1 Timûtiuse 4:16; sarĸúmersitat 7:9, 14, 15.
21. Qanoq iliornitsigut Guutimik mianerinnilluta aammik ataqqinnissinnaavugut, sumillu kinguneqarumaarpa?
21 Silamiut akiuunnerinut ilanngunnaveersaarneq, aattornaveerneq, peqqissaartumik nalunaajaasarniarneq Jesusillu pilliutaanik erlinnartumik upperfiginninneq eqqarsaatigalugit, tamatta immikkut aalajangerta Guutip siunnersuutaa tamaat naalakkumassallugu. Taamaaliorutta aatsaat Tussiaat 33:10-12-ip eqquutitaanissaanik tipaatsunnartumik pissaqarumaarpugut: „[Jehovap] piujunnaarsittarpai inuiaat siunertarisaat, aserortarlugillu pilersaarutaat. [Jehovap] siunertarisai naassaanngitsumut taamaattuassapput . . . Iluanaassapput inuit [Jehovamik] guuteqartut.“ (wD 1/9 86)
Illit qanoq akissavigit?
□ Aap atorneqarnera qanoq ittoq kisimi naassaanngitsumik pilluaqquneqaatissaava?
□ Aattornaveerluta aammillu atuinaveerluta qanoq iluaqutigiumaarparput?
□ Qanoq iliorluta ’inuit tamarmik aavinut pinngitsuu’niarsinnaavugut?
□ Pingaartumik suna peqqissaaruttariaqarparput?