Naalagaaffimmik oqaluussissutiginninnermit nutaarsiassat
Tamanut oqaluussineq pingaartippiuk?
ILLUMIT ILLUMUT oqaluussineq Bibelimit pissuteqarpoq, silarsuarlu tamakkerlugu Jehovamut Nalunaajaasut guutisiornerminnut atatillugu taamaaliortartutut ilisimaneqarput. (apustilit suliait 20:20, 21) Jesus ajoqersukkaminut ima oqarsimavoq: ’Anersaap illernartup ilissinnut piumaartup pissaanera pigilerumaarparsi, nalunaajaasigiumaarpassilu Jerusalemimi Judæamilu tamarsuarmi Samariamilu nunallu isuanut allaat.’ (apustilit suliait 1:8) Aamma apustilit suliáinik agdlagkane 5:42-mi (NW) atuarparput kristumiut ’soraarnatik illumit illumut angalaartartut’.
Haitimi Jehovap Nalunaajaasuisa illumit illumut angalaarlutik oqaluussisarnerat patsisigalugu isumaqatigiinngissuteqalerpoq. Pionerip atorfinitsitaasup arnaq naaggaartunut ilaasortaalluartoq naapippaa. Oqaloqatigiinnermi ingerlaneranni qatanngutitta erseqqissarpaa Jehovamut Nalunaajaasut kisimik Bibelimi inassutigineqartutut illumiit illumut nalunaajaasartut. Arnallu akivaa aamma nammineq uppeqatini illumiit illumut angalaarsinnaalluartut, ilaannikkullumigooq taamaaliortareersimapput. Aarimmi — arfininngornerugaa nalunaajaasup naapilerpai inuit ataatsimoortut arnamit taassumannga siulersorneqarlutik illumiit illumut angalaartut. Inuit taakku hundredit missaanniipput. Arnaq, sapiitsuliornerminit tamatumannga tulluusimaarutiginneqisup qatannguterput kalerrippaa tamanna maluginiassammagu.
Sapaatip akunnera qaangiuttoq arnap taassuma inuit allat siulersorpai, nuannaarutigalugulu qatanngutitsinnit takutinnini. Qatanngutittali malugaa inuit kingullermernit affaannarmik amerlassuseqartut. Arfininngornerit sisamassaanni inuit 20-innanngorsimapput, tallimassaannilu arnaq kisimiippoq. Maniguulluni qatanngutitsinnut orniguppoq oqarlunilu: „Jehovamut Nalunaajaasunuku sallusuissummik pigisaqartut, tassami taakku kisimik qasusuillutik sapaatip akunneri tamaasa nalunaajaajuarsinnaapput.“
Pionerip atorfinitsitaasup arnaq taanna Bibelimik atuaqqissaaqatigiumallugu neqeroorfigaa paasiniassammagu sooq Jehovamut Nalunaajaasut qasusuillutik illumiit illumut nalunaajaajuarsinnaanersut, naak allat saperaluartut. Neqeroorut tamanna arnap akueraa. Taanna uialu Bibelimik atuaqqissaaqatigineqartalerput siumukarluarlutillu. Marluullutillu maannakkut Jehovamut Nalunaajaasunut ilanngussimapput Naalagaaffimmillu illumiit illumut nalunaajaanermik aallussilluarlutik!
Illumiit illumut nalunaajaaneq, nalunaajaanertut allatuulli, Jehovap asanningaarluni aaqqissuussaraa nuanningaartoq, taamaalilluni inuit unneqqarissumik uummatillit nanisinnaajumallugit, aammalu ikiorusullugit inuuneq naassaanngitsoq anguniaraanni suut piumasarineqarnersut ilikkarnissaanut. Taamaattumik Jehovamut Nalunaajaasut nuannaarlutik suliassaq tamanna oqaluuseriaatsillu allat Guutimut kiffartornerminni iluartumi suliarisarpaat. Tamarmik apustilip Paulusip oqaaserisimasai isumaqatigaat: ’Qutsavigaaralu Kristus Jesus Naalagarput nakussatsitsisiga, imminut ilumuussasorimmanga, kiffartuussinermullu ivertimmanga.’ — 1 Timûtiuse 1:12. (wD 1/10 86)