Bibelimit atuagassani pingaarnersaasut Tussiaatit 42-miit 72 ilanngullugu

Jehova neriuffiguuk

Jehovap kiffaasa uppernermikkut misilinneqartarnitik qasusuillutik atorsinnaavaat Guuti qimarravigigamikku aniguisitsisigalugulu. Tussiaatit immikkoortortaasa aappaanni tamanna ersersinneqarluarpoq! Aap, Tussiaatini 42-miit 72 ilanngullugu takutinneqarpoq ataavarsinnaasugut qinusarluta Jehovap uagut pilluta akuliunnissaa utaqqigutsigu.

„Guuti neriuffiguuk“

Atuakkit Tussiaatit 42-miit 45 ilanngullugu. Levikkuusoq nunaminit qimaasimasoq qimaatitaasorluunniit aliasuppoq Jehovap illernartuutaanukarsinnaannginnami, naammagiinnarpaali ’Guuti neriuffigalugu’, aniguisitsisutut iliuuseqalernissaa utaqqillugu. (Tussiaat 42, 43) Taava inuiaqatigiit aarlerinartorsiungaartut pillugit qinnuteqaateqarpoq; immaqa kunngip Ezekiasip nalaani Assyriamiut Judamut isaanerat pineqarpoq. (Tussiaat 44) Taava erinarsuutip kunngikkormiuni katittorsiutaasup Messias, Jesus Kristus, siumut tikkuarpaa. — Tussiaat 45.

◆ 42:2 — Tussiaasiortup qanoq ililluni „tuttu kuunnut imilinnut kajungertoq“ assigaa?

Suna pissutigisimanerlugu Levikkuusoq taanna nunaminit qimaasimasuuvoq. Jehovap illernartuutaani guutisiortarneq ima maqaasitigigamiuk misigivoq soorlu tuttu arnaviaq malersugaq nunami naggorluttumi kuugaatsumiittoq qilalersoq. Jehovamut illernartuutaanilu Guutimik pallorfiginninnermi siulliusussaatitaanermut „kajungerpoq“. — Versi 3.

◆ 45:2 — Suna pillugu ’oqaatsit tusaruminartut’ tussiaasiortup uummataata killinneqaatigai?

Tussiaatip tamatuma ilaa Jesus Kristusimut tunngatinneqarpoq. (Tussiaat 45:7, 8; Eprîarit 1:8, 9) Taamaattumik tussiaasiortup uummataata siunissami piumaartussaq — Messiasikkut naalagaaffiup 1914-imi pilersinneqarumaarnissaa — killinneqaatigaa. Aamma Jehovap Nalunaajaasuisa uummataat „oqaatsinik tusaruminartunik“ tamakkuninnga ulikkaarput.

Tamanna sumik ilinniarfigisinnaavarput: Tussiaasiortup nunaminit qimaasimalluni misigisimasai eqqarsaatigalugit killinneqassaagut Jehovap innuttaanik maannakkut ilagisartagaqarsinnaanermik pingaartitsingaarneq nittassallugu. Malersugaalluta mattussaaneq pissutigalugu Guutip innuttaanik najuitsaaliorneqarallarutta, kiffartuussinitsinni illernartumi siornatigut nuannaarutigisimasavut eqqarsaatigisinnaassavavut, qinusariaqarpugullu qasusuissinnaaqqulluta ’Guuti neriuffigalugu’, pallorfiginneqatitsinnut ilannguteqqissitaanissarput utaqqillugu. — Tussiaat 42:4, 5, 11; 43:3-5.

Qimarravipput naakkinnittoq

Atuakkit Tussiaatit 46-miit 51 ilanngullugu. Jehovap, qimarravigisatta, sorsunnerit soraarsikkumaarpai. (Tussiaat 46) Taanna ’nunap tamarmi kunngigaa’, sernissuisorlu ajugaaffigineqarsinnaanngitsoq taanna naassaanngitsumik Guutigaarput. (Tussiaatit 47, 48) Qunutitaasut Jehova neriuffigisariaqarpaat, kisiannili ’qujaniutinik pilliisut’ tamarmik „Guutip annaassinera“ takussavaat. (Tussiaatit 49, 50) Kukkusoorutta peqqissimillutali, soorlu Davidip Batsebamik ajortuliani peqqissimissutigigaa, Guutip aammik kuiseqataanermut pillaatisiassaarutissavaatigut „uummat peqqissimisoq artorsaateqangaartorlu itigartittarinngi“nnamiuk. — Tussiaat 51.

◆ 46:2 — (NW, kalaallisut v. 3) — Qanoq ililluni ’nuna allanngorsinnaava’?

Nunap pissusissamisoortumik apparneratigut qaqqat immap iternganut kivissagaluarpata, Guutimut neriulluartut ersissutissaqassanngillat. Qanorluunniit pisoqassagaluarpat, Jehova qimarravigigamikku taanna tatigilluinnarsinnaavaat.

◆ 51:7 — Ajorti suna Davidip pivaa?

Isumaqanngilaq katissimasut atoqatigiinnerat, naartulerneq erninerlu ajortuliornerusut; pinngilaaluunniit anaanami ajortuliaasa ilaat aalajangersimasoq. Taamali oqarnermigut Adamip kinguaarimmani nammineq ajortiliussutsi pivaa. (Jûpe 14:4; Rûmamiut 5:12) Jehovap David saammaappaa, naalagaaffik pillugu angeruseq pissutigiinnarnagu, aammattaarli Davidip peqqissiminera pissutigalugu. — 2 Sâmuale 7:12-16.

Tamanna sumik ilinniarfigisinnaavarput: Tussiaat 46 allanneqarsinnaasimavoq piffimmi Jerusalemip Assyriamiunit aarlerinartorsiortinneqarfiani. Nalunnginnamiuk „Guuti tassa qimarravipput . . . isumannaatsumik ikiuiserput annikilliornartuni tamani“, kunngip Ezekiasip Jehova qinnuigaa, illoqarfillu tupinnartuliornikkut aniguisinneqarpoq. (2 kúngit, kapitali 19) Annikillioraangatta uaguttaaq Guuti qimarravigisariaqarparput. Qanoq ililluta? Taanna tatigalugu, oqaasia attavigalugu, peqatigiissortaalu atassuteqarfigiuarlugit.

Aniguisitaanissarput qularnaappoq

Atuakkit Tussiaatit 52-imiit 57 ilanngullugu. Guutip ajortoq ’sorlallu ilanngullugu inuusut nunaannit nusussavaa’ innuttaminillu assortuisut ’saarni katagartissallugit’. (Tussiaatit 52, 53) Saulimit malersorneqarami Guutip aniguisissagaani Davidip qularinngilaa, killuutigineqaramilu nanertuutigisani Jehovamut peqquaa. (Tussiaatit 54, 55) Tussiaasiortup naammagiinnarlugu utaqqivaa Guutip annikilliuutiminik kipititsinissaa. — Tussiaatit 56, 57.

◆ 52:9 — Iluartoq qanoq ililluni orpittut uuliaqutilittut ippa?

Orpik uuliaqutilik inerititaqarluarnermut, kusanassusermut ataqqinassusermullu assersuutaasinnaavoq. (Jerimia 11:16; Húsia 14:7) Tussiaammi tassani perulluliortitsisoq ajortoq tammartussaq iluartumut sernisugaasumut orpittullu uuliaqutilittut inerititaqarluartartutut ingerlalluartumut sanilliunneqarpoq.

◆ 54:3 — Suna pillugu David oqarpa: „Annaannga atikkut“?

Guutip aqqa paasissaanngitsunik pissaanertaqanngilaq. Taaneqarneratigulli Guuti nammineq pineqarsinnaavoq. Taamaattumik taama qinnuteqarnermigut Jehovap innuttaminik annaassisinnaanissaa Davidip miserratiginngilaa. (2 Môrsase 6:1-8) Naak Zifikkut kunngi Saulimut Davidip sumiinnera nalunaarutigigaluaraat, Filisterit Israelimut isaanerat pissutigalugu Saulip Davidimik malersuinini taamaatikkallartariaqarpaa. (1 Sâmuale 23:13-imiit 24:1 ilanngullugu; Tussiaat 54:2) Tassuuna Jehovap David annatsippaa.

Tamanna sumik ilinniarfigisinnaavarput: Davidip akeraasa naakkiuffissiorsimavaat. (Tussiaat 57:7) Inuit nakkarfissaat tassaasinnaapput pissutsit navianaqisut imaluunniit peqqusersusaarnerit Jehovap kiffaanik aarlerinartorsiortitsisut. Guutilli innuttaanik assortuisut namminneq uumissuillutik pilersaarutigisatik naakkiuffigisinnaavaat. Taamaattumik Jehova tatigigutsigu mianersoqqissaarlutalu aniguisinneqarumaarpugut. — ússatit 11:21; 26:27.

Ilalaarluni utaqqivoq

Atuakkit Tussiaatit 58-imiit 64 ilanngullugu. Naapertuilluanngitsuliornerit ernumassutigigamigit, Guutip iluaatsunik akiniaanissaa Davidip qinnutigaa. (Tussiaatit 58, 59) Ajorsarnissaq aarlerinarsimmat, ilungersorluni Guuti qinnuigaa annaateqqulluni, Guutillu akerartuisunik artorsartitsinissaa qularinagu. (Tussiaat 60) Jehovap qimarravissaalluarnera misigereersimagamiuk, Davidip annatsitaanissani ilalaarluni utaqqivaa. (Tussiaatit 61, 62) Inuilaamut qimaatitaagami, immaqa Absalomip pikitsitsinerata nalaani, ’Guutip suluisa alanngigaanni’ David nuannaarneq nanivaa. (Tussiaat 63) Tussiaasiortoq qinnuteqarportaaq „ajortut pilersaarnerannut“ isertoqqulluni, qularinngilaalu iluartup Jehova qimarravigissagaa. — Tussiaat 64.

◆ 58:4-6 — Guutiitsut qanoq ilillutik pulateriaarsuttut ippat?

Soorlu pulateriaarsuup toqunartua toqussutaasinnaasoq, quutiitsut salluliaasa mamarliissutaasut salluliuutigineqartoq tusaamasaanerluttunngortissinnaavaat. (Tussiaat 140:4; Rûmamiut 3:13; Jâko 3:8) Aammalu guutiitsut „pulateriaarsuttut tusilartutut siutaaruttutut“ ipput, unnersuunneqaraangamimmi tusaajumanngillat naalakkumanatillu.

◆ 63:4 — Guutip ilumoorsusia „iluatinnarnerummat inuunermit“ qanoq paasisariaqarpa?

Guutimut atassuteqanngikkaanni inuuneq piviusumik siunertaqarsinnaanngilaq. Jehovalli Davidimut ilumoortumik asanninnerata Davidip inuunera piviusumik siunertaqalersippaa. Guutimut qanittumik atassuteqarunik, Guutip kiffaasa iluarisaasut inuunerat suussuseqangaartuaannassaaq, Guutip ikiuisarnissaa siulersuisarnissaalu naatsorsuutigisinnaassavaat, naassaanngitsumillu pilluarlutik inuutuinnarnissartik qilanaarisinnaassallugu.

Tamanna sumik ilinniarfigisinnaavarput: „Guutimi qasuerfissaqa“rami Guutip pilluni iliuuseqalernissaa Davidip ilalaarluni utaqqivaa. (Tussiaat 62:2-8) Jehovap peqqusaanut tunniulluinnarami, toqqissisimaarpoq Guutilu tatigalugu. Uagut taassumatut Jehova tatigigutsigu, ’eqqissinerup Guutip piata’ uummativut eqqarsaativullu sernigissavai Guutip uatsinnik akeqqatsinnit annikilliornernillu aniguisitsinissaa utaqqitillugu. — Filípimiut 4:6, 7; Tussiaat 33:20.

Aniguisitsiserput unnersiutigisigu

Atuakkit Tussiaatit 65-imiit 72 ilanngullugu. Jehova unnersiutigineqarpoq inerititanik amerlangaartunik, sialummik naammalluartumik, nersutit mangiarfiinik naggorissunik, nersutaaterpassuarnillu pilersuisuugami. (Tussiaat 65) ’Aqqata naalannaatissaanut’ erinalersuutigisariaqarpoq. (Tussiaat 66) Taanna unnersiutigisassaavoq Guutiugami annatsitsisartoq. (Tussiaatit 67, 68) Messiasip naalliunnissai siulittuutigineqarput, Jehovalu naalannarsisinneqarpoq ’aniguisitsisuugami’, taassumalu ikiuinissaa tussiaasiortup utaqqivaa. (Tussiaatit 69-71) Tatiginnilussinnassanngillat, Messiasimmi naalakkersuinissaata pilluaqqusaasup ataani nunarsuaq tamakkerlugu pigissaarneqassaaq naqisimaneqartullu tamarmik aniguisinneqassallutik. — Tussiaat 72.

◆ 68:12 — ’Arnat amerlaqisut’ kikkuuppat?

Israelikkut sorsuttartut kiffaralugit Jehovap akeqqanik ajugaaffiginninnerisa kingornisigut, Israelikkut arnartaasa ajugaanermik tusagassaq nuannersoq nipilersorlutik, erinarsorlutik qitillutillu nalunaarutigisarpaat. (1 Sâmuale 18:6, 7; naleqqiukkit Môrsasip agdlagaisa áipait 15:20, 21.) Jehovap ’peqqusinera’ naalallugu Israelikkut angutitaasa inuiaqatigiit akeraasut nunami neriorsuutigisami najugaqaraluartut sorsuffigaat artorsartillugillu. Ajugaaneri tusagassaasarput nuannersut Israelikkut arnartaasa ajugaasimaarpaluttumik nalliuttorsiornerminni nalunaarutigisartagaat. Ullumikkut oqaluussisartut arnaasut Guutip naalagaaffianik tusarliussisut amerlangaarput, Jehovap ’peqqusinera’ pillugu tusagassaq nuannersoq oqaluutigisaramikku, aammalu inuiaqatigiit sioorasaarlugit ungasinngitsukkut kunngimit Messiasiusumit, Jesus Kristusimit, suujunnaarsinneqassasut.

◆ 69:23, (NW, kalaallisut v. 24) — Suna pillugu Guuti qinnuigineqarpa ’siffiaat sajuttunngoqqullugit’?

Siffissat nukii nukittuut sukanneqaraangamik, nukittorujussuanngortarput. Kisiannili, immaqa ersinermit, siffissat sajukkaangamik imaluunniit uulikkaangamik, nukeeruttarput. Tamaani aniguisinneqaqqugami, Davidip Guuti qinnuigaa akeqqani nakuussusiannik atornerlugaannik arsaaqqullugit.

◆ 72:16 — Inerititaqangaarneq tamanna qanoq isumaqarpa?

„Inerittui Libanonimisut“ isumaqarsinnaavoq karrit ima eqimatigalutik imalu takitigalutik naasut assigigaat Libanonimi orpippassuit qorsorissut takisuullu. Karrit immaqa salliarnartat quleriiaartut qaqqat kaarfii tikillugit naaffigalugit naalluaramik, ivikkat takisuut silittullu oqimaattunik kaavequtillit Libanonip cederiinut portusuunut assersuunneqarsinnaapput. Tamatuma siumut takutippaa Messiasip naalagaaffissaani inerititaqangaartarnissaq. Oqaaseqatigiillu „illoqarfimmeersullu nunap inerititaasut sikkerluassapput“ (NW) takutitsiarpaat Jesusip innuttai nunamiut amerlangaassasut.

Tamanna sumik ilinniarfigisinnaavarput: Tussiaasiortoq ima qinnuteqarpoq: „Atugaqartissimavarma annikilliornartunik angeqisunik oqimaaqisunillu. Inuunermik kingumut tuninnga.“ (Tussiaat 71:20) Naak Guutip annikilliornerit taamaattut pilersinngikkaluarlugit, misilinneqartarnissarput akuersissutigaa, Mamarliisumut, Diaavulumut, akissutissaqartitseqqulluta. (Jâko 1:13; ússatit 27:11) Jehovap artukkatsinnik ussersinneq ajorpaatigut ikiorsinnaallutalu misilinneqarnivut anigorluaqqullugit sanngisuumik upperluta. (1 Korintumiut 10:13; 1 Pîtruse 1:6, 7) Kristumiut tanitaasut sorsunnersuup siulliup sakkortuseruttorfiani malersorneqaramik „annikilliornartunik angeqisunik oqimaaqisunillu“ atugaqarput. 1919-imili Jehovap „inuunermik kingumut tuni“vai uummarsarlugit, naalagaaffimmillu kiffartuussiuarput, kingornatigut ’amerlangaartut’ ilassutigalugit. (sarĸúmersitat 7:9) Taama ittumik kinguneqarmat aniguisitsisoq angisooq unnersiutigisassaavoq.

Guutip uagut pilluta iliuuseqarnissaa utaqqitillugu upperneq pisariaqartipparput. Immaqa ilalaarluta oqarnatalu utaqqisariaqarpugut atukkavut ajornartorsiornartut allanngortissallugit ilioriarfissaqannginnatta. Aalajaassinnaassaagulli, soorlu tussiaasiortut aalajaassimasut, Jehova neriuffigalugu utaqqisinnaagutta. (wD 15/10 86)