Sinnattugaq Guutip piffissarititaanik nalunarunnaarsitsisoq

’JEHOVA Guutiuvoq uumasoq, isuanut kunngiusoq.’ (Jerimia 10:10) Qilammut nunamullu naalagaassutsi allamut tunniussimanngisaannarpaa, tamannali itsarsuaq Babylonip kunngiata Nebukadnezarip arajutsivaa. Kunngi guutipilussiortoq taanna erseqqilluinnartumik paasitinniarlugu ’Qutsinnerussaartup pisartaraa inuit naalagaaffiat’, Guutip taanna sinnattortippaa kiffanilu Daniel sukuiaatissaanik nassuersinnaanngortillugu. — Dâniale 4:17, 18.

Sinnattugaraa orpissuaq angeqisoq. ’Portussusia qilammut apissippoq, ersipporlu nunami tamarsuarmi.’ Guutip naalakkiineratigut orpissuaq kipineqarpoq, kippakuali soqqartanik saviusunik kanngussaasunillu pilersorsimalluni. Taakku ataannarsimasussaapput ’ullut kaajallanneri arfineq-marluk’ kippakuanut qaangiutillugit, taavalu orpik naaqqissinnaassasoq. — Dâniale 4:10-17.

Danielip sinnattugaq sukuiarpaa oqarluni: ’Orpissuaq taanna takorluukkat . . . tassa illit, kunngi-aa, . . . naalagaassutsillu.’ Nebukadnezar kipineqartussaavoq. Naalagaassuseerutissaaq, allaallu silaarutissalluni, ’ullut kaajallanneri arfineq-marluk’ nersutitut narsani angalaartussaalluni. Piffissarititaq qaangiuppat aatsaat soqqartat assersuutaasut peertussaapput, taavalu kunngip silani naalagaassutsilu peqqissinnaassavai. — Dâniale 4:20-27.

Soorlu siulittuutigineqarsimasoq, ’tamakku tamarmik kunngimut Nebukadnezarimut nalliupput’. (Dâniale 4:28) Lexicon Linguae Aramaicae Veteris Testamenti-p nutsernera naapertorlugu ’ullut kaajallanneri arfineq-marluk’ Nebukadnezarip sinnattugarisai ukiuupput arfineq-marluk. Nebukadnezar ukiut 43-t kunngitut naalagaammat (624-581 u.n.a.s.), isumaliut tamanna naleqqulluarpoq.

Tamanna uatsinnut sumik pingaaruteqarpa?

Jehovap qilammut nunamullu kisimi oqartussaassutsi naleqqulluartuutitani naapertorlugu ingerlatittaannarpaa. Naalagaassutsi nunami qanga ingerlatikkallarpaa inuiaqatigiit Israelikkut aqqutigalugit, Israelikkunnimi kunngit nunamiut eqqortumik oqaatigalugit ’Jehovap issiaffiutaani qilaalimmi issiapput’. (1 nalunaerssûtigdlit 29:23) Israelikkulli tunussimmata Jehovap kunngit kunngi Davidip kinguaavi kinguaariit siulimik naalagaassusiannik kingornussisartut uppitinneqartippai.

Taava naleqqulluarpoq tamatuma pisimanerata kinguninnguatigut Guutip kunngi Nebukadnezar — Guutip kunngeqarfiutitaa assersuutaasoq uppitissallugu akuerineqartoq — ilaatigut ilisimatissimammagu tassaanngitsoq Guutip kisimi eqqortumik oqartussaanera taamaatissimasoq. Ila pisariaqassusia kunngi Nebukadnezar erseqqissaatissallugu, inuiaqatigiillu juutiunngitsut tamatuma kingornatigut Guutip naalagaaffianik sinniisuusumik tullaarinnittut tamaasa erseqqissaatissallugit, tamanna utaqqiisaannaasumik pissusiussasoq!

Kunngip sinnattortitaanerata piffiata, sinnattortitap kinaassusiata, aammalu Guutip kisimi oqartussaanerata sinnattukkami pingaarnerutinneqarnerata takutilluinnarpaat sinnattukkap pingaaruteqarnera Nebukadnezarimut pingaaruteqarneranit annertunerungaartumik. Tamakkua takutitsiarpaat, orpittut kipisatut soqqartanik pilersorsimasutut, Guutip naalagaassusia Jerusalemimi kunngeqarfikkut ersersinneqartuusimasoq, maanna uppititaasoq, ’ullut kaajallannerisa arfineq-marluusut’ qaangiunnerisigut soqqartat naaqqinnaveeqqutaasut taakku peerneqarpata aatsaat pilersinneqaqqikkumaartoq. Taamanikkut, Guutip Naalakkersuisuutitaa, ’inunni nikanarnerpaaq’, tassa Messias neriorsuutigisaq, naalagaaffimmini ivertinneqartussaavoq. Guutip taamaaliornissaanut Jesusip ajoqersugai nalunaaqqummik qinnuteqarput. — Dâniale 4:17, NW; Matîuse 24:3.

Aammattaarli pissusiusut allat takutippaat Nebukadnezarip sinnattugaata ungasinnerungaartumut tunngatinniarnissaa eqqortuusoq. Siulittuutip Dâniale 9:24-27-mi allassimasup eqqorluaqqissaartumik takutippaa ukiunik 500-nik kingoqqullugu Messiasip tikiunnissaata ukiua.a Messiasip inuttut tikiuffissaa taama eqqortigisumik siulittuutigineqarsimammat, naleqqulluassannginnerpa ilimagissallugu naalagaassusermik piginnaaneqartitaalluni takussaanani tikiuteqqinnissaata pingaaruteqangaarnerusup piffissaa eqqorluaqatigalugu siulittuutigineqarsimassasoq? Siulittuinissamullu Danielimit naleqqunnerusumik siulittuisoqarpa? Aamma eqqaamaniaruk, takorluukkersaarutiminik sinnattukkatigullu siulittuutiminik, Nebukadnezarip orpissuaq pillugu sinnattugaa ilanngullugu, Daniel oqarfigineqarsimasoq: „Oqaatsit anngigikkit allakkallu naqissuserlugit naggatissap nalaa nalliutserlugu.“ Suna pissutigalugu „naggatissap nalaa nalliutserlugu“? Taamanikkummi ’eqqortumik ilisimasat annertusiumaarmata’. Danielip allagai „naggatissap nalaa nalliutserlugu“ naqissusersimassappata, paasissaanngitsuussappata, nalunannginnerpa allagai „naggatissap nalaa“ni siulittuutitut pingaaruteqartuusut? — Dâniale 12:4, NW.

’Ullut kaajallanneri arfineq-marluk’ — qangamiit qangamut?

Nalunaaqqummik oqaluttuarnermigut Jesusip ’ullut kaajallanneri arfineq-marluk’ eqqartorpai, taallugit „inuiaqatigiit ullussaat aalajangersagaasut“. Oqarpoq: „Jerusalem inuiaqatigiinnit tullaarineqa[rtua]ssaaq, iniuaqatigiit ullussaat aalajangersagaasut naammatsitserlugit.“ (Lúkarse 21:24, NW) Oxford NIV Scofield Study Bible (1984)-imi quppernerup ataani nassuiaasiullugu ilanngussaq naapertorlugu „’Guutimik nalusut ullussaat’ [„inuiaqatigiit ullussaat aalajangersagaasut“ Bibeli kalaallisuunngortitaq atortussaatitaasoq naapertorlugu] aallartipput Juda Nebukadnezarip nalaani tigusarineqarmat. . . . Taamanerniilli Jerusalem, soorlu Kristusip oqaatigigaa, ’Guutimik nalusunit tullaarineqarpoq’“.

’Ullut kaajallanneri arfineq-marluk,’ tassa „inuiaqatigiit ullussaat aalajangersagaasut“, qanoq sivisutigissappat? Soorunami ukiunit arfineq-marlunnit tamarmik 360-inik ullulinnit (soorlu Bibelimi ukiut naatsorsuutigineqartartut), tassa katillutik ullunit 2520-nit, sivisunerussaqaat. Bibelimi pereersut najoqqutassatut atorneqartartut naapertussagaanni ullut tamarmik immikkut ukiumik ataatsimik naleqartinneqassapput. (Takukkit Môrsasip agdlagaisa sisamait 14:34; Hisĩkiale 4:6; naleqqiukkit sarĸúmersitat 12:6, 14.) Taamatut naatsorsuineq naapertorlugu ’ullut kaajallanneri arfineq-marluk’ ukiunik 2520-nik sivisussuseqarsimassapput. Jerusalemip piuneerunneqarnerani ukiumi 607-imi u.n.a.s. aallartissimagunik, ukiumi 1914-imi u.n.a.k. naasimassapput.

Ukiut 30-t sinnerlugit 1914 sioqqullugu Jehovap Nalunaajaasuisa ukiup tamatuma pingaaruteqarnera uparuartorpaat. Tamannali eqqarsaatigalugu soqutiginarpoq atuakkami International Crisis-imi, Eugenia Nomikosimit Robert C. Northimillu (1976), allassimammat „akerleriissutit pissanganartorsiornerillu sakkortusiartuaarnerannik toqqaannartumik sorsunnerup pilerneranik kinguneqarsinnaasumik annikitsuinnarmik malunnaateqarsimasoq, imaluunniit malunnaateqanngivissimasoq“. Akerlianilli, „1913-ip naajartulernerani 1914-illu aallartilernerani . . . naalagaaffiit pissaanilissuit imminnut pissusii ukiuni arlalippassuarni aatsaat taama allanngujaappalutsigisimapput“. Ullumikkulli, ukiut 70-it kingornatigut, inuiaat ingerlaasiannik ilisimatuut oqartarput ukioq 1914 silamiut oqaluttuarisaaneranni allanngulerfiusoq. Assersuutigalugu qinerlerfissiami tyskisuumi Meyers Enzyklopädisches Lexikon-imi allassimavoq „sorsunnersuup siulliup sunniussimaneri allanngortitsilluinnartuu[sut] inuiaallu tamangajammik inuunerinut aningaasatigut aammattaaq innuttaaqatigiiussutsitigut naalakkersuinikkullu sakkortuumik sunniuteqarsimallutik“.

1914-imi pisimasut naalakkersuisutigut kinguneri ilisimasaalluarput. Innuttaaqatigiiussutsitigut allannguutit sorsunnerup kingunerisai Virginia Cowlesip atuakkiaani 1913: An End and a Beginning-imi oqaluttuarineqarput. „Ukioq 1913 ukiut ataqatigiit immikoortitat naalerfigaat,“ allappoq. Sorsunnersuup aningaasatigut kinguneri pillugit Ashby Bladen, Amerikami sillimmasiisarfissuarmi pisortaanerusup tullersortarisaa, imannak allappoq: „1914-ip siornatigut aningaasanik aningaasaliinermillu aaqqissuussaanerit imminnut naleqqulluartuupput. . . . 1914 augustip qaammataa avissaarfittut isigigutsigu, ukiut 1900-ssaat 2000-issaallu assigiinngivipput. Niuernermut tunngassuteqartutigut allanngorluinnarneqarsimavoq. . . . Tamatumunnga pingaarnerusumik pissutaavoq aningaasaliinermik aaqqissuussaanerup aningaasat namminneq nalingannit avissaarnera, 1914-imi aallartissimasoq. . . . Aaqqissuussaanerit taakkua avinnerat pisimasuuvoq ajornartorsiutaalluinnartoq. . . . Aaqqissuussaanerup tamatuma annertuumik, kiisalu kingunipiloqartumik, allanngornersua ukiumi 1914-imi pisimavoq.“

Sumut killippugut?

Nalunaaqqutip Jesusip eqqartugaata ukiuni makkunani eqquunneranut uppernarsaatit radiokkut fjernsynikkulluunniit nutaarsiassatut nalunanngitsigaat. Allanngortitassaanngitsumillu uppernarsaatissiipput ukioq 1914 pillugu Nebukadnezarip sinnattugaani tulleriissaarinikkut uppernarsaatit eqqortuunerannut. Tamanna isumaqarpoq maanna, 1987-imi, ’naggatissap nalaata’ ukiuisa ilaat 73-it qaangiutereersimasut. Jesusip neriorsuutigaa eqqarleriit ’naggatissap nalaata’ aallartinnerani pisimasunik takunnissimasut ilaasa annikilliornartup angisuup aallartinneratigut naanissaa angumerissagaat. — Matîuse 24:34.

Tamanna kajumississutigalugu eqqumattuinnartariaqarpugut, piffissap ingerlanerani sumut killinnitsinnik Guutip nalunarunnaarsitsinera nakkutigiuaannarlugu! Ila pisariaqarluinnassusia erinitsannaveernissarput, Guutimmi „nalunaaqutaa“ kinguartinniassagutsigu pakatsinermik kinguneqaannassammat. Aappaatigulli, soqutiginninnginnaveertariaqarpugut, Guutip „nalunaaqutaa“ siuartinniarlugulusooq, taamatummi isumaqarutta inortuissagatta! Eqqaamassavat bussimut, umiarsuarmut timmisartumulluunniit inortuisinnaanissaannaq apeqqutaanngitsoq. Guutip pissutsinik aaqqissuussinissaani nutaassami naassaanngitsumik inuunissamik annaasaqaratarsinnaavugut. Tamannalu erininarpallaaqigami pinngitsuugassaanngivippoq! (wD 1/11 86)

[Quppernerup ataani ilanngussaq]

[Qupp. 6-mi nalunaarsugaq]

(Allassimasut qanoq inissisimanersut naqitami takuneqarsinnaavoq)

„Inuiaqatigiit ullussaat aalajangersagaasut“ arfineq-marluusut (ukiut 2520-t)

607 u.n.a.s. Nunami Jerusalem piuneerunneqartoq

33 u.n.a.k. ’Jerusalem’ suli ’tullaarisaasoq’ (Lúkarse 21:24)

1914 u.n.a.k. „Naggatissap nalaa“ aallartittoq (Dâniale 12:4, NW)

Naggatissap nalaa

1987 u.n.a.k. ’Naggatissap nalaata’ ukiuisa ilaat 73-it qaangiutereersimasut (Matîuse 24:3, 12, 22)

[Qupp. 7-mi assiliartaq]

Nebukadnezarip sinnattugaa pingaaruteqarpoq ungasinnerusumut tunngatinneqartumik ilinnuttaaq sunniuteqartumik!