Inuit tamarmik nassaarusupput ikinngutinik ilumoortunik

ANGUT inuusuttoq motorcykelimik ajutoornikkut aqqunartiterujussuarsimavoq. Sapaatit-akunneri arlallit ilisimanani nalasimavoq, kingornali arriitsunnguamik ilisimmariartuaarsimalluni. „Ilisarisimasama amerlaqataanik ikinnguteqaraluaruma sukkanerusumik iluarsiartorsimassagaluarpunga,“ oqarpoq. ’Ajutoornerma siornagut ikinngutigisama ilarpassuisa maanna alarpaannga. Ikinngutaalluartut katsorsaataasumik sunniuteqarsinnaasaraluarput.’

Pissuseq taama ittoq ullumikkut silarsuarmi inussiarniiffiusumi nalinginnaaqaaq. Ajunngitsumik ingerlatilluni ’ikinnguterpassuaqarnartarpoq’. Ajutoornermilli nalaanneqaraanni ’ikinngutit’ tassuuguinnaq peeruttarput. Ikinngutinik ilumoortunik nassaarniarneq ajornakusoortorujussuusinnaasarpoq.

Kisiannili ataasiinnaagaluamik marluinnaagaluanilluunniit ikinnguteqarneq pingaaruteqartorujussuuvoq. Tamatumunnga tunngasunik paasiniaaqqissaartartut oqarsimapput: „Inummut allamut qanittumik attaveqarusunneq ullumikkut pingaartinneqartorujussuuvoq.“ Soorlumi ima ussatitoqaqartoq: ’Nalorninartorsiulernermi ikinngutit ilisarisimasariaqarput.’

Qangaanerusoq inuit imminnut soqutigeqatigiinnerupput, aammalu ikinngutiminnut saniliminnullu ikiuiumatunerullutik. Sorsunnersuulli siulliup ingerlanerani pissutsit eqqissiviilliornartut kingunerisimavaat inuit imminnut attaveqatigiinnerata ajornerulernera, massakkullu qujasuissuseq, naakkittaassuseq namminissarsiornerlu amerlanertigut atugaapput.

Pissutsit tamakku avaanngunartut ukiut 1900-t matuma siornagulli siulittuutigineqarsimapput ima nipilimmik: ’Ullussani kingullerni ajornartunik nalliuttoqassaaq. Inuit inuujumaarmata imminuinnaq asasut, aningaaserituut, usorsitsaapiluttut, anneruniartut, mitallersut, angajoqqaaminnut naalanngitsut, qujasuitsut, soqqusaatsut, asanniuitsut, saammajuitsut, mamarliisut, nunujuitsut, qiningasut, ajunngitsumik uumissuisut, killuussisut, isumaatsut ilisimatuuniartut, Guuti kajumiginagu nuannaarutinut kajumittut.’ — 2 Timûtiuse 3:1-4.

Taanna tassaavoq ullumikkut silarsuarmut siulittuut nikallornartoq, kisianni eqqorluartoq! Aammalu ikinngutinik ilumoortunik nassaarnissamut neriuutissaqarpasinngilaq. Kisiannili: Allaat maannakkut, silarsuarmi ajoqisumi, ikinngutinik ilumoortunik nassaartoqarsinnaavoq. Aammalu ajunngitsunik ikinnguteqarneq nuannerluinnartuuvoq, ikinngutinik ikiuisinnaasunik, siunnersuisinnaasunik tuppallersaasinnaasunillu, aammalu ilagalugit nuannaarutigisinnaasanik. Kisianni ikinngutinik ilumoortunik ilumuunngitsunillu immikkoortitsisinnaanissaq pisariaqarpoq.

„Ikinngutit“ tamakkeratik ikinngutaapput ilumoortut

Angut inuusuttoq siuliani eqqartorneqartoq arsartartoqatigiinni arsartartuusimavoq taamaattumillu „ikinngut“erpassuaqarsimalluni. Peqatigiiffinni inuiaqatigiinnguaniluunniit mikisuni ilaasortaasut imminnut attaveqatigiillualersinnaasarput, kisianni „ikinngutigiinnerat“ tamatiguunngitsoq qajannaatsuusarpoq. Soorlu angutip inuusuttup ammattaaq paasileraa „ikinngutinik“ annaasaqarneq nikallornarsinnaasarpoq. Inunnik allanik ilisarisimasaqalerneq ajornanngitsunnguusinnaasarpoq, ikinngutinilli ilumoortunik nassaarniarneq ajornakusoorsinnaasarluni.

Inuit pisuut nuimasullu „ikinngutit“aajasuararsuusarput. Soorlu Bibelimi allassimasoq: ’Pisuumik asannittut amerlallaaraat.’ ’Akimasoq amerlasuut maniguuffigisarpaat, tunisigajuttorlu tamarmik ikinngutigisarpaat.’ (ússatit 14:20; 19:6) Taakkunanngali qassit ’ikinngutitaaminnik’ siunertapiloqarpat? Inuit pisuut aningaasaatitik suliffitsillu annaagaangamikkik amerlanertigut aammattaaq ikinngutitik annaasarpaat.

Aammattaaq inuit isikkumikkut kusanartut „ikinngut“erpassuaqarajuttarput — amerlanertigut kusanassusertik piinnarlugu. Kisiannili „ikinngutigiinnerit“ taama ittut aserujasuararsuusinnaapput aammalu atugarliornerni atasinnaaneq ajorlutik.

Peqqissaartumik ikinngutissarsiortarit

Aap, ilumut ikinngutissarsiornermi ’narrutuneq’ silatusaarneruvoq. Ikinngutaasuusaartut iluareqqusaarnermikkut namminiinnaq iluanaarnissartik anguniarajuttarpaat. ’Tulliminut piutserniartoq qassutinik isuititsisaraaq taassuma tummisassaanut.’ — ússatit 29:5.

Taamaattumik kikkut ilagisarnerlugit eqqarsaatigeqqissaartariaqarpat. Ikinngutitit ajunngitsumik ajortumilluunniit ilinnut sunniuteqarpat? Imminuinnaq eqqarsaatigippat, anneruniarumatuujullutik aammalu pingaakujuttuullutik? Tuaviupiluppallaartumik periartarpat? Immaqalu sapiiserluni navianartorsiorneq nuannariinnartarlugu? Angutaagunik arnat arnaagunillu angutit qanoq isigaat? Inussiarnersuullutillu ataqqinnittuuppat, imaluunniit qaninniarpallaartuuppat, immaqalu allaat ileqqorluttuullutik? Paasinarsisimava inuit ilagisartakkatit ilumoortuunatillu tatiginanngitsuusut? Ikiaroornartunik atornerluisuuppat? Imigassartorpallaarpat? Taamaappat taava illit navianartorsiorputit. Immaqa illit peqqusersuitsuuvutit, ileqqorissuullutit maniguuttuullutillu, kisianni eqqaamajuk: ’Ajortut ikinngutigalugit ileqqut ajunngitsut aserortarput.’ — 1 Korintumiut 15:33.

Ajortunik ikinnguteqarnerup navianaataa tassaavoq pinngitsoorani taakkua ileqqui inummut sunniuttarmata. Arriitsumik immaqalu malunnanngitsumik ileqqulersuutaat isumaallu inummut tunillaattarput. Soorlu Bibeli oqartoq: ’Ilisimatuunik angalaqateqartoq ilisimatuunngussaaq, silaqanngitsunilli ikinnguteqartoq ajortunngussaaq.’ — ússatit 13:20.

Ilumoortunik ikinngutissarsiornermi kukkoqqajaanartarpoq. Nikalloqinalli. Silarsuarmi millionilinnik inoqarpoq pitsaasunik inussiarnersunillu. Kisianni qanoq ililluni taakku ilumoortumik ikinngutigineqalersinnaappat? (wD 15/9 87)

[Qupp. 4-mi assiliartaq]

Inuit ilagisartakkatit sakkortuumik sunniuteqarsinnaapput