Bibelimit atuagassani pingaarnersiukkat akugdlîssup oĸausê 1:1-imiit 12:14 ilanngullugu

„Guuti ilumoortoq mianeriuk inassutaalu maleruarlugit“

Ullumikkut Guutimik mianerinninneq Guutimullu naalanneq nalitsinnut naleqquttuunngitsutut isigineqarpoq. Kisiannili akugdlîssup oĸausê-ni (hebræerisoorlugu: qoheʹleth, katersortitsisoq), ukiut 3000-t missaat matuma siornagut kunngi Salomonimit allanneqarsimasuni, inuit Guutip siunertaanik sumiginnaallutik noqqaaniarnerisa asuliinnassusii allaatigineqarput.

Allakkat taakkua pissanganaatigaat allattup assigiinngitsorpassuarnik sammisaqarnera — sammisaasa ilagaat inuit ilisimatussusiat aqutsinerilu, nunap piinik pigissaarneq, nuannaarsaatit, ileqquliuutigiinnarlugu guutisiorneq ilaalu ilanngullugit. Tamakku tamarmik piunngitsuutinneqarput ataavartuunnginnamik. Immikkoortitsillaqqissumilli eqqarsariaaseqartup tamakku eqqarsaatigeqqissaarlugit paasissavaa isumaliut ataasiinnaq inerneqarsinnaasoq, tassa: „Guuti ilumoortoq mianeriuk inassutaalu maleruarlugit. Tassaammat inuup naammassiniagassaa tamarmi.“ — akugdlîssup oĸausê 12:13, NW.

’Suut tamarmik piunngitsut’

Kapitalit 1 2-lu atuakkit. Pinngortitarsuarmi pisartuartunut naleqqiullugit inuit noqqaaniarneri tamarmik sivikillutillu qarsupittuupput (1:4-7). Katersortitsisup suliarsuani kakkaqisut allaat allamut, immaqa naleqqutinnginnerusumut, toqunermigut qimattariaqassavai (2:18, 19). ’Piunngitsoq’ hebræerisoorlugu isumaqarpoq „pujoq“ imaluunniit „anersaartorneq“.

◆ 1:9 — ’Nutaasoqanngitsoq seqernup ataani’ qanoq paasisariaqarpa?

Ulluinnarni pissusissamisoortumik pisartuartuni seqinnerfigisaasuni nutaarluinnaasoqanngilaq. Nassaat ’nutaat’ allaat amerlanertigut pisaatsit Jehovap pinngortitsinermini pisaaserisimasai najoqqutaralugit ingerlasarput. Jehovali ’seqernup ataani’ anersaakkut ittumik nutaamik ineriartortitsivoq inuiannut tamanut sunniuteqartumik. — Takuuk Vagttårnet, 1. martsi 1987, quppernerit 27-29.

◆ 2:2 — Nuannaarniarneq ajorpa?

Naagga. Illarluni imaluunniit quiasaarluni eqqarsaatini ajornartorsiutigisaminit allamut sangutinniarallarsinnaavai, tassuunali ajornartorsiutini anigornavianngilai. Pilluarluinnarneq quiasaarnikkut anguniaraanni sianiitsuliorneruvoq. ’Tipaatsunneq’ inuunerup ajornartorsiutaanik anigortitsineq ajorpoq. Qiimasussuseq nuannaarsaatillu pilluarnermut inuup sulinerminik Jehovap pilluaqqusineratigut pisarneranut illua-tungiliunneqarput. — 2:24.

Tamanna sumik ilinniarfigisinnaavarput: Salomonip siunnersuutaa maleruartariaqarparput, nunap piinik piniarnermik imaluunniit pissanganartorsiornermik tamaviaaruteqarneq kiserluinnaat inuunitsinni anguniarnagu. Kisianni Jehovamut iluarineqarniartariaqarpugut taanna naalallugu. Tassuuna taassuma pilluaqqusinera piumaarparput ’ilisimassummik ilisarsissummillu tipaatsuummillu’ tunineqassalluta. — 2:26.

Suut tamarmik piffissaqarput

Kapitalit 3 4-lu atuakkit. Salomon piumaartussat siumut aalajangeriigaanerannik uppertitsiniartarinngilaq (3:1-9). Erseqqissaannarpaali Guutip ingerlatitai inuit allanngortissinnaanngikkaat (3:14). Tamatumuuna inuit nersutinit sapinngisaqarnerunngillat (3:19-21). Suleqatiginnikkumassuseq (4:9-12) ingiarniussinermit kinguneqarluarnerusarpoq (4:4).

◆ 3:11 — Qanoq ilillugit Guutip suut tamaasa ’pitsassuanngorlugit suliarisarpai taamaaffissaasigut’?

’Pitsassuaq’ isumaqarportaaq „ajunngitsoq, naleqquttoq, tulluartoq“. Taamaaffissamikkut Guutip suliaasa tamarmik immikkut siunertaanut sumorpiaq naleqquttuunerat saqqummersinneqarumaarpoq. Guutip inuiaat iluaqutissaannut assigiinngitsorpassuit ’pitsassuanngorlugit suliarisimavai’. Inuit Edenimi ajunngilluinnartumik aallartilluarpai. Inuit ajortilinngormata Kinguaassap aniguisitsiumaartussap tikiunnissaa siumut oqaatigaa. Taamaaffissaagut Guutip Kinguaassaq taanna aallartippaa. ’Pitsassuillu’ pitsaanersaraat Jehovap Kinguaassaq naalagaaffimmini kunnginngortimmagu.

◆ 4:6 — Salomonip ilatsiinnarluni inuulluataarneq siunnersuutigaa?

Naagga. Salomonilli malugisimavaa iluanaarumatunerinnarmit sulerulukkaanni eqiasuikkaannilu ingiarniunnermik sinnganermillu kinguneqartartoq (4:4). Tamannalu ajornartorsiornermik allaallu toqujaarnermik kinguneqarsinnaavoq. (1 Timûtiuse 6:9, 10) Taava ingasaassinngitsumik qanoq isumaqassaagut? Isertitassakinneq eqqissinermik nassatalik naammagiuk, marloriaammik iluanaaruteqarniarneq erloqinermik akerleriinnermillu ilalik piniarnagu.

Tamanna sumik ilinniarfigisinnaavarput: Piffissanngorsimavoq Guutip naalagaaffia piniaqqaassallugu, angusaqarusunnermit nammineq soqutigisaminik piniarnani (3:1). Kristumioqativut suleqatigalugit sulerusussaagut namminissaannarmik piniarnata (4:9-12). Taamaaliornikkut pisariaqartumik ikiorneqartassaagut kaammattorneqartassallutalu naak annikilliussagaluarutta assortorneqassallutalu.

Eqqortumik guutisiorneq nalerisimaarnarpoq

Kapitalit 5 6-ilu atuakkit. Jehova ajugaqanngitsuummat, Guutimut attaveqarnerput ilungersortumik pigisariaqarparput, silaqanngitsumik iliuuseqarnata tunissutitsinnillu ilassinissaa ilimagalugu (5:1, 2). Guutimik mianerinnittup nunap piinik pisuussutiminik atuinissani nalerisimaarutigisarpaa, tigumatoorli nuannaarneq ajorpoq. — 5:17-19; 6:2, 3-mut naleqqiuguk.

◆ 5:1 — Siunnersuut tamanna qanoq paasineqassava?

Uummatitsinniittut Guutimut aniatittariaqarpavut, Guutilli angissusia naalannangaarsusialu pissutigalugit eqqarsaqqaangaarnata isumaallutalu oqaaseqarnaveersaartariaqarpugut. (Tussiaat 62:9) Oqaatsivut amerlanaarnagit oqaatsit paasiuminartut qamanngavillu pisut atortariaqarpavut. (Matîuse 6:7) Oqaatsit hebræerisuut naatsut tallimaannaat oqaaseralugit Mosesip Mirjam qinnuppaa iluarisaasumillu tusarneqarluni. — 4 Môrsase 12:13.

◆ 6:9 — Tamanna qanoq paasisariaqarpa?

’Tarnimigut kajungerisaqarpallaarneq’ tassaavoq pilerigisanik angusassaanngitsunik kipisuitsumik naammassinninniarneq. Tamatuma akerleraa ’isiminik isigisaqarneq’, tassa piviussusersiorneq. Nalunnginnatsigu Guutip naalagaaffia piviusumik allanngortitsisinnaasutuaasoq, nalerisimaartariaqarpugut, kissaatigisallu ingasattut inornartulluunniit eqqissiveerussutiginagit.

Tamanna sumik ilinniarfigisinnaavarput: Guutisiorfitsinni tulluartumik pissuserissaartariaqarpugut naalaaqqissaarlutalu (4:17). Aammalu Jehovamut pinngitsoorata naammassisassavut naammassinasuartariaqarpavut. Aappaqarutta tamatuma ilagissavaa katinnitsinni neriorsuuterput eqqortissagipput. — 5:3.

Oqaatsit isumatuut

Kapitalit 7 8-lu atuakkit. Katersortitsisup isumaliutigeqqissaarpaa toqup silatusaarnassusia, (7:1-4) ilisimassutillu naleqangaarsusia (7:11, 12, 16-19); aamma arnaq inuunerluttoq mianersoqqussutigaa (7:26). Siunnersuuteqarpoq naalakkersuisunut silatuumik iliortarnissaq pillugu (8:2-4) naapertuilluanngitsuliornerillu kissaamissutigeqqunagit. — 8:11-14.

◆ 7:28 — Oqaatsit tamakku arnanut nikanarsaataappat?

Taamani inuunerlunneq atugaangaanguatsiarpoq. Taamanikkut angutit arnalluunniit iluartut ikissusii Salomonip eqqartorpai. Inunni tuusintini angummik iluartumik ataatsimik nassaaruminaappoq, arnamillu iluartumik ataatsimik suli nassaaruminaannerulluni. Bibelimili ’arnaq pikkorissoq’ aamma ’nuliassaq pikkorissoq’ eqqartorneqarput. (Rúte 3:11; ússatit 31:10) Immaqali versi taanna siulittuutaavoq arnaqarsimanngimmammi Jehovamut naalalluinnartumik, naalalluinnartumilli anguteqarsimavoq — Jesus Kristusimik.

◆ 8:8 — Katersortitsisup suna eqqartorpaa?

Toqu eqqartorpaa. Kialuunniit inuussut timimi akuinit aninaveersissinnaanngilaa ulloq toquffissaq kinguartinniarlugu. Tamatta akeqqatsinnut toqumut sorsunnermit kinaluunniit pinngitsuutinneqarsinnaanngilaq sinniisoqarsinnaananilu. (Tussiaat 49:8-10) Ajortut peqqusersiortartut allaat toqunngitsoorsinnaanngillat.

Tamanna sumik ilinniarfigisinnaavarput: Naak nunap piinik pisuussuseqangaarniarneq inuppassuit pingaarnerpaatillugu anguniaraluaraat, ilisimassut Guutimik mianerinninnartoq kisimi naassaanngitsumik inuunartuuvoq. (7:12; Lúkarse 12:15) ’Ullunut inuulluarnartunut pereersunut’ erinineq pissutsitta pitsaanerussutiginavianngilaa (7:10). Guutili mianeriuarutsigu aatsaat ’pilluarumaar’pugut. — 8:5, 12.

Inuunermi nalaatsornikkut pisut

Kapitalit 9 10-lu atuakkit. Inuuneq erlinnartuuvoq, Guutillu kissaatigaa nuannaarutigissagipput (9:4, 7). Inuunerup qanoq ingerlanissaa aqussinnaannginnatsigu (9:11, 12), pitsaanerussaaq ilisimassut Guutimik mianerinninnartoq maleruassallugu, naak inuit amerlanerit pingaartinngikkaluaraat (9:17). Inuunermi nalaatsornikkut pisoqartarmat uummaterput paarisariaqarparput (10:2), qanoq iliornitsinni tamani mianersoqqissaartariaqarluta, ilisimassullu iluameertitsissutaasoq maleruarlugu. — 10:8-10.

◆ 9:1 — Iluartut suliaat Guutip assaaniittut qanoq paasisariaqarpa?

Ilisimatuut iluartullu ajunaarnermik nalaanneqartaraluarput, tamannali pisinnaavoq Guutip ilaginnarpagu aatsaat, qimannerlu ajorpai. Guutip ’assaatigut’, tassa suliaqarluni pissaaneratigut, iluartut misilinneqarnerminnit aniguisinneqarsinnaapput imaluunniit qasusuillutik misilinneqarnermik atugaqarnerminnut pissatsinneqarsinnaallutik. (1 Korintumiut 10:13) Jehovap kiffaata tamanna eqqaamaguniuk tuppalliutigisinnaassavaa ajornartorsiutit nalliuttaraangata.

◆ 10:2 — Inuup uummataa talerpiata pigigaa qanoq paasisariaqarpa?

’Talerpik’ iluarisamut ilisarnaqutaasarpoq. (Matîuse 25:33) Ilisimatuup uummataa ’talerpiata pigimmagu’ tassaavoq uummammi killittaraani ajunngitsumik, iluartumik iliuuseqartarnissaminut. Silaqanngitsorli ajunngitsumik pissuteqarneq ajorpoq silaatsumillu tulluanngitsumillu iliuuseqartarluni. Taassuma uummataa ’saamiata pigimmagu’ takutitsiarneqarpoq kukkusumik iliuuseqarajuttuusoq.

Tamanna sumik ilinniarfigisinnaavarput: Kinaluunniit tassanngaannaq toqumit nalaanneqarsinnaammat (9:12), inuunerput Jehovamik kiffartuussinermi atortariaqarparput, toqussaguttami suut tamarmik unittuussagaluarput (9:10). Aamma kiffartuussinitsinni pikkorissiartortariaqarpugut, pikkorlunnermi uatsinnut allanullu ajoqusiisinnaavoq, artornanngikkaluartut soorlu itersamik assaaneq imaluunniit qisussanik qulluineq pineqarpata allaat. — 10:8, 9.

Inuusunneq inuunerullu siunertaa

Kapitalit 11 12-ilu atuakkit. Tamatta tunisiumatusariaqarpugut aalajangeriataallaqqissuusariaqarlutalu (11:1-6). Inuusuttut Pinngortitsisertik kiffartorfigalugu piffissaminnik nukissaminnillu atuilluartut inuunerminni kingusinnerusukkut peqqissimissutissaqarnavianngillat (11:9, 10). Tulluusimaarutigissavaalli nalunagu Guutimit iluarisaallutik peqqissuseerutitinnatik nakuussuseerutitinnatillu. — 12:1-7; takuuk Napassuliaĸ Alapernaerssuivfik, 1. novemberi 1985, quppernerit 8, 9-lu.

◆ 11:1 — Neqissat imarsiortissallugit qanoq paasisariaqarpa?

Neqissat inuussutissaapput pingaarnerit. Imarsiortissallugit isumaqarpoq naleqangaartoq tunniutissallugu. Kisiannili ’naniumaarpatit’, tunisiumatuummi ilimaginngisamikkut akilerneqarumaarput. — Lúkarse 6:38.

◆ 12:12 — Suna pillugu atuagassiorneq iluarineqarpasinngitsumik eqqartorneqarpa?

Jehovap oqaasianut naleqqiullugu, silamiut atuagassiaat kisissaanngitsut inuinnaat eqqarsartaasiannik imaqarput. Eqqarsaataasa ilarpassui Satanip isumaanut ersiutaapput. (2 Korintumiut 4:4) Taamaattumik atuakkianik silamiorpaluttunik isumasiuiniarpallaarneq annikitsuinnarmik iluaqutissartaqarpoq.

Tamanna sumik ilinniarfigisinnaavarput: Salomon assigalugu inuuneq pillugu Guutip oqaasiani allassimasut eqqarsaatigeqqissaartariaqarpavut. Tassuuna Guuti mianerissallugu naalassallugulu aalajangernerput aalajangersarsinnaassavarput. Nalunnginnatsigu Jehovap asannittumik soqutigigaatigut (12:13, 14) taassumunnga qaninnerulernissatsinnut tamanna iluaqutissiissaaq.

Taamaattumik ’Guuti ilumoortoq mianerisigu inassutaalu maleruarlugit’. Taamaaliortussaavugummi, soraajuitsumillu pilluaatigissavarput. (wD 15/9 87)