Bibelimit atuagassani pingaarnersaasut eríniugagssiat angnerssât 1:1-imiit 8:14 ilanngullugu

Asanninneq ilumoortoq ajugaassaaq!

Asanninneqarpoq pakatsisitsinngisaannartumik. Aalajaatsuuvoq soraajuitsuullunilu, ajugaajuassaarlu. Jesus Kristusip ’nuliassaatalu’, ilagiissaata tanitaasup, akornanni taama ittumik kipititassaanngitsumik asanninneqarpoq. (sarĸúmersitat 21:2, 9; Evfisumiut 5:21-33) Ilalu taassuma asanninnerup eríniugagssiat angnerssât-ni eqqartorneqarnera tusarnermat!

Taanna „eríniugagssiat angnerssât“ (Erin 1:1), kunngimit ilisimasumit Salomonimit ukiut 3000-it matuma siornagut allanneqarsimasoq, oqaluttuarpoq nersutinik paarsisup naasorissaasullu paniata Sjunemimeersup (Sjulemimiup) imminnut asaqatigiinnerannik. Naak kunngip pisoorsuugaluarluni pinningaaraluarlunilu arnap Sjulemimiup asanninnera killissinnaasimanngilaa, tassami nersutinik paarsisuutini asasani ilumoorfigimmagu.

Atuagaq taanna taallatut suliaasoq peqqissaartumik pingaartinneqarlunilu Jehovap kiffaanit katissimasunit katissimanngitsunillu atuarneqaruni kristumiutut aappariinnerup ilisarnaatigisariaqagaanik, tassa minguissusermik, asanningaarsusermik, ilumoorfigeqatigiinnermik asanninnermillu kipisuitsumik, ilinniarfigilluarneqarsinnaavoq. Aap, erinarsuut taanna asanninnerup ilumoortup ajugaaneranut tunngasoq tamatta iluaqutigisinnaavarput.

Sjulemimiu Salomonip tammaarfiani

eríniugagssiat angnerssât 1:1-14 atuaruk. Kunngikkormiut toqqini arnaq Sjulemimiu oqalukkami soorluli tassa asasaa nersutinik paarsisoq najuutiinnassasoq. Salomonip taassuma pinnersusia unnersiutigaa neriorsorlugulu pinnersaatinik kuultinik sølvinillu tuniumaarlugu. Arnalli inuusuttup taassuma kunngip qaninniarnera ilaliinnarfiginngilaa ilisimatillugulu nersutinik paarsisoq kisiat asagamiuk.

◆ 1:2, 3 — Sooq assersuussinermi viinni tarnullu atorneqarpat?

Viinnip uummat qiimmatsittarpaa tarnerlu nanertisimasoq nakussatsittarlugu. (Tussiaat 104:15; ússatit 31: 6) Pulaartut ataqqisaasut tarnummik uuliaasumik tagiartorneqartarsimapput tassa iluaallatsitsinarmat atoruminarlunilu. (Tussiaat 23:5; Lúkarse 7:38) Tassa arnap Sjulemimiup aliasulluni nersutinik paarsisup asanninnera aqqalu eqqartoramigit tuppalliutigaa nakussatsissutigalugulu. Taamatorluinnaq Kristusip ajoqersugaasa tanitaasut sinnerisa, naak suli silarsuarmiikkaluarlutik taassumanngalu avissaaqqagaluarlutik, paarsisimik, Jesus Kristusip, asanninnera neriorsuutaalu eqqarsaatigeqqissaarluartarunikkik qiimmassaatigisinnaavaat.

Tamanna sumik ilinniarfigisinnaavarput: Salomonip arnaq Sjulemimiu ’kuultinik tullerutinik sølvinik sapangartalinnik’ pinnersaaserumagaluarpaa, timikkulli pisatanik usserniarneqarnini itigartippaa, taamaalillunilu nersutinik paarsisumut asanninnini kipititassaanngitsoq uppernarsarlugu. (1:11-14) Tamanna eqqarsaatigigunikku katersanut nuliassaasunut ilaasortaasut silarsuup timip piinik pilerisaarineranut itigartitsinerminnik aalajangiussisimanerminnut aammalu uissamut qilammiusumut ilumoorfiginninnerminnut nakussatsissutigisinnaavaat. Nunami inuunissamik neriugisaqarutta aappanilersaarlutalu, taava arnap inuusuttup taassuma maligassiuinera malikkumassavarput, tassa timip piisigut soqutigisavut pinnagit anersaalli piinik soqutigisavut inuunitsinni salliutikkutsigik.

Kipisaffigeqatigiinneq

1:15-imiit 3:5 ilanngullugu atuaruk. Nersutinik paarsisoq kunngip tammaarfianut iserpoq arnamullu Sjulemimiumut ileqqorissumut imminillu tamanit pingaarnerutitsisumut asanninnini ersersillugu. Avissaartinneqaramik arnap inuusuttunnguup piffissaq asasanilu nuannaarlutik atorsimasartik eqqarsaatigisarpaa, ilungersortumillu qinnutigisarlugu erniinnaq uterfigisinnaajumaaraani. Unnuakkullu maqaasigisaqaa.

◆ 2:1-3 — Tamanna assersuutaasoq qanoq isumaqarpa?

Arnaq Sjulemimiu imminut taasarpoq ’narsarsuup asorutaa qaallorinnertaq’, pissutigalugu maniguuttuugami anneruniajuitsuullunilu imminullu naasorpassuit nalinginnaasut ilaattut isigaluni. Akerlianilli nersutinik paarsisup ilisimavaa arnaq taanna tassaasoq ’asorut qaallorinnertaq orpitsiaat kiinnarissut akornanni’, tassa pinnersuummat, pikkorilluni Jehovamullu ilumoortuulluni. Arnap Sjulemimiup nersutinik paarsisoq tassaatippaa ’orpik paarmarsuarinneq orpissuartuup orpiisa akornanni’, tassa angut inuusuttoq taanna anersaap piinik aallussilluartuummat aammalu Guutimik pallorfiginnittuummat, kajungernartunillu piginnaaneqarmat pissuseqarlunilu. Kristumiu katissimanngitsoq aappassaminik ujarlileruni kristumioqatiminik ilumoortumik arnatut Sjulemimiutut asasaatullu nersutinik paarsisutut pissusilimmik toqqaaniartariaqarpoq.

◆ 3:5 — Sooq uumasut taakkua eqqaasissutigalugit uppernarsaappat?

Oqinninnguit kulavaallu uumasuupput saamallutillu kusanartuullutillu pinnersut aammattaaq sukkassutsiminnik pangallorissutsiminnillu ilisimaneqartut. Taamaattumik arnap Sjulemimiup kusanartut pinnersullu suulluunniit eqqaasissutigalugit ’Jerusalemip panii’ uppernarsaatippai. Uumasut taakkua eqqaasissutigalugit arnat pisussaatippai nammineq asanninnini angutinut allanut malugitinniaqqunagu taamaallaat nersutinik paarsisumut asasaminut.

Tamanna qanoq ilinniarfigisinnaavarput: Arnap inuusuttup taassuma ’Jerusalemip panii’, arnat kunngikkormiut kunngip saqisui, uppernarsaatippai „asanninneq itersaqqunagu pilerisaaqqunaguluunniit, kisianni piumallerpat“. (2:7, NW; 3:5, NW) Tamatuma ersersippaa inuk kinaagaluartorluunniit misigissutsinik asannippaluttunik takutitsivigisinnaanngikkipput. Arnaq inuusuttoq taanna misigisimanngilaq Salomon kajungeralugu. Taamaattumik kristumiumut suli katissimanngitsumut aappaninnissaminullu eqqarsaateqartumut silatusaarnerussaaq angummik imaluunniit arnamik ilumoorluni Jehovamut kiffartuussisumik asalluinnarsinnaasaminillu nassaarnissami tungaanut utaqqissalluni. — 1 Korintumiut 7:39.

Sjulemimiu Jerusalemimi

3:6-imiit 6:3 ilanngullugu atuaruk. Salomon Jerusalemimut uterpoq alutornassuseqangaarluni. Nersutinik paarsisup taavani arnaq inuusuttoq asasani atassuteqarfigaa tassungalu ungaginninnerminik ersersitsivigineratigut nakussatsillugu. Sinnattornermigut asasami kasuttornera kingusinaarluni tusaavaa, isumatsangaarlunilu ujarniaraluartillugu pigaartunit unatarneqarluni. ’Jerusalemip paniisa’ aperimmanni asasani sutigut immikkut malunnaateqarnersoq, pissusii pingaartorsiutigingaarlugit oqaluttuaraa.

◆ 5:12 — Qanoq paasisariaqarpa nersutinik paarsisup ’isai soorlu tuinnguit kuulimmiittut, immummik eqqiakkat’?

Tamatuma siornagut arnap Sjulemimiup isai tuinnguup isaanut assersuunneqarput, tassa saamasuummata sallaatsuullutillu. (1:15; 4:1) Aammattaaq nersutinik paarsisup niviarsiannguaq taanna ’tuinnguaatimisut’ taasimavaa. (5:2) Uani arnap inuusuttunnguup ajuutiginningaartup nersutinik paarsisup isai tuinnguanut tungujortoq-qasiartunut immummi uffartunut assersuuppai. (5:8, 12) Taamatut oqarami qularnanngitsumik pivai nersutinik paarsisup isaasa ameraasaasa qalipaatai isaasa qaqortortaannik qaalloreqisunik avatangerneqarsimasut.

Tamanna qanoq ilinniarfigisinnaavarput: Arnaq Sjulemimiu ’naatsiivimmut matusamut’ assersuunneqarsinnaavoq. (4:12) Qanga Israelimi naatsiiviit nalinginnaasut allaat naatsiiviliarujussuartut iluarsaanneqartarput, paratiiseeraviusanngorlugit imermik naatitanillu assigiinngitsunik, naasunik orpinnillu naammattunik pilersorneqartarlutik. Naatsiiviit nalinginnaasut orpikkanik ungaluliaasunik imaluunniit qarmanik ungaluneqarsimasarput, taamaallaallu matuagut parnaarsinnaasukkut iserfigineqarsinnaallutik. (Isaia 5:5) Arnap Sjulemimiup pinnersusia aammalu ileqqussatigut minguissusia nersutinik paarsisumut naatsiivittut alianaatsutut qaqutigoortumik kusanassusilittut, erlinnartunik naatitalittut tipigingaartutullu ippoq. Arnap ungaginninnini angummut kimulluunniit tutsinngilaa, ileqqorissuugamimi; naatsiiviuvoq susassaqanngitsunut ’matoqqasoq’ taamaallaallu uiminut piginnitsiminut ammasoq. Arnaq Sjulemimiu ullumikkut arnanut kristumiunut katissimanngitsunut maligassiuivoq ileqqorissuunermigut ilumoortuunermigullu.

„Jah-mit ikuallattoq“

6:4-miit 8:14 ilanngullugu atuaruk. Salomonip arnap Sjulemimiup pinnersusia unnersiutigaa, taassumali tamanna ilassiumanngilaa nalunaarutigaluguli nersutinik paarsisumut nuannarinnilluinnarnini. Arnap uummataa Salomonip killissinnaanngivikkamiuk anisiinnarpaa. ’Asasannguani’ ingiaqatigalugu Sjunemimut uterluni apuuppoq arnatut inersimasutut aalajaatsumik pissuseqarnini uppernarsareersimallugu. Arnap nersutinillu paarsisup asaqatigiinnerat toqutut nukittutigaaq ikualaneralu ’Jah-mit ikuallattutut’ ippoq.

◆ 6:4 — Taaguut ’Tirza’ sumut tunngatinneqarpa?

Taaguut taanna aamma taaneqarsinnaavoq „illoqarfik alutornangaartoq“, tassa isumaqartoq „alianaangaarsuseq, isornaassuseq“. Illoqarfiup Tirzap alianaassutsi tusaamasaassutigisimavaa Israelillu avannaatungaani illoqarfiit pingaarnersaattut siullersaasimalluni. — 1 kúngit 14:17; 16:5, 6, 8, 15.

◆ 7:4 — Qanoq paasisariaqarpa niviarsissap qungasia soorlu ’qaqiffiliaq tuugaaq’?

Qularnanngitsumik qungasia nagguaatsup tuugaavatut manitsigisimavoq qaqiffiliatullu iluseritsigaluni. Siuliani ’Davidip qaqiffiliaanut’ qungasia assersuunneqarpoq, soorlu immaqa kunngip illussaarsuata Jerusalemip qarmarsuata kangilliup sinaaniittup qaqiffiliartaa taama ittoq. Tassani qaqiffiliami nivingapput ’eqqornaveeqqutit tuusintillit, tamarmik pissarsuit eqqornaveeqqutaat’, tamatumalu ersersippaa arnaq Sjulemimiu ammalortunik pinnersaatitalinnik imaluunniit ujaqqanik erlinnartuutitalinnik ujameqarsimassasoq. — 4:4; Nĩmia 3: 25-27.

◆ 8:6, 7 — Qanoq ililluni asanninneq ’toqutut nukittutigaa’?

Soorlu inuit ajortuliortut inuunerat toqup qulakkeeqqagaa, aammattaaq asanninneq ilumoortoq taama nukittutigaaq. Soorlu Sheol imaluunniit toqusut inaat inuup timaanik pisariaqartitsilluinnartoq, taamattaaq asanninnerup ilumoortup tunniusimalluinnarnermik pisariaqartitsinera killitassaanngitsigaaq. Inuup asanninnermik takutitsisinnaassusia Jehovap ikkussarimmagu taamaattumik piginnaaneq tamanna Jehovamit aallaaveqarpoq, taamaattumillu tulluarpoq ’Jah-mit ikuallattutut’ (NW) taassallugu. Allaat kunngi Salomonip pisoorsuup asanninneq taama ittoq pisiarisinnaasimanngilaa.

Tamanna qanoq ilinniarfigisinnaavarput: Arnap Sjulemimiup kunngi Salomonimik misigisaa misilitsinnertut ippoq, taassumalu kusanavissumik anigorpaa. Matutut pujattunik qiversartulittut susassaqanngitsut ajortulluunniit isinnginniassammata sallilikkamik issusuumik asserneqarsimasutut innani, arnaq taanna assuarnaassutsimigut asanninnermigullu patajaatsuuvoq. Aap, arnap Sjulemimiup kunngip ussiiniarneri ajugaaffigilluinnarpai itigartinnerisigut, tassa qarmatut aalajaatsigaluni silarsuup atortussatigut pilerisaaruterpassui nakkaannarfiginnginnamigit. Guutimik tatiginninnermikkut arnallu Sjulemimiup maligassiuineranik eqqaamanninnermikkut ullumikkut arnat kristumiut najoqqutassanik naapertuilluartunik aalajangiussisimanertik takutissinnaavaat — Jehovap ataqqinaatissaanik. — 8:8-10.

Taassuma „eríniugagssiat angnerssât“a, asanninneq tunngavigalugu allanneqarsimasup, qilerummik, Jesusip ’nuliassaatalu’ qilammiusutut toqqagaasimasut akornanniittumik, pingaartitsinerput allisarpaa. Angutit arnallu inuusuttut aammattaarli uiusut nuliaasullu Jehovamut tunniulluinnarsimasut arnap Sjulemimiup nersutinillu paarsisup misilinneqarnerminni usseriarneqaraluarnerminnilu killissaanngissusiat ilaarunikku iluaqutigisinnaavaat. Guutip oqaasiata immikkoortortaasa ilaata tusarningaartup taassuma Jehovamut, asanninnerup ajugaasup aallaavianut, naassaanngitsumik ilumoorfiginninnissatsinnut kajumissisissavaatigut. (wD 15/11 87)