Jehova neriuffiguuk
Jehova „neriuffiguuk aqqutigeqqusaalu atuarlugu, taava nunamik kingornussisussanngortikkumaarpaatit, takujumaarpallu guutiitsut piiagaanerat“. — TUSSIAAT 37:34.
1, 2. Inuiaat sumut killissorinarpat, pissutsimullu tamatumunnga FN qanoq ililluni sunneeqataasimava?
SILASSORISSUTSIKKUT, ilaqutariit inuiaat aatsaat ima ineriartorsimatigilerput. Ilungersorsimangaaramik ukiut atominik sakkussaqarfiusut nukissiorfeqarfiusullu tikissimavaat. Atomip nukinga atorlugu nukissiortorujussuusoqarsinnaavoq, tamatumuunalu nunarsuarmi tamarmi tupinnaqisut naammassineqarsinnaanngorput. Akerlianilli atomip nukinganik atuisinnaanerup inuiaat tamaasa ajoqusingaagaanissaat aqqutissiorsimavaa.
2 Suup inuiaat tamarmik atomip nukinga atorlugu sorsunnerujussuarmi imminnut nungunnissaat pitsaaliorsinnaavaa? Ilimagineqarsinnaagaluarpoq FN, tassa Naalagaaffiit Peqatigiit, naalagaaffinnik 159-inik assigiinngitsorpassuarnik naalakkersueriaasiliusunik ilaasortaqartoq, taamaaliorsinnaassasoq. Naalakkersueriaaseq eqqarsaatigalugu naalakkersuisut taakku isumaqatigiinngillat, tamarmik immikkut isumaqaramik namminneq naalakkersueriaasertik allanit ajunnginnerusoq, pitsaanerpaasoq. Taamaattumik FN peqatigiiffiuvoq isumaqatigiinngitsoq. Tamarmik immikkut inuiaqatigiissutsiminnik pingaartitsiniarpallaarnerat allamullu atajumanngissusiat tamatigut malunnarput. Aammattaaq naalagaaffiit ilarpassui Guutimut uppertuujumajunnaarput, guutiitsunngorlutik.
3. Kristumiuunerartut tamarmik Guutimik isumaqarfiginninnerata Guutip imminut paasitinneranit suna allaassutigaa?
3 Ilaalli inuiaqatigiiupput guutiitsuunerarneqarumanngitsut sulili Jesus Kristusimut uppertuunerarlutik, „Guuti Ataataq“ taavalu „anersaaq iluartoq“ inuttut pissusiligaasoq ilanngullugit ataasiullunilu pingasuusumut uppernerarlutik. Guutimut ataasiullunilu pingasuusumut ilaasut naligiinnerarneqarput. Kisiannili Jesusip Ataataata pruffiiti Esajas oqaatsinik kinaassutsimik paasissutissiisunik ukuninnga allatsippaa: ’Uanga Jehova, tassa atera; naalannarsusera allamut tunniutissanngilara, unnersiutigisaaneraluunniit inuusalianut qiperukkanut.’ (Isaia 42:8) Jehova taanna pisimaviusut oqaluttuaralugit naleqanngitsumik tusaamasanngortippoq.
4. FN-ip inuiaat suminngaanniit sumut allamut saatsinniarpai?
4 Ataqqinaatiginngilluinnakkaminik FN-ip Guutip aqqa tulluartumik ataqqinngitsoorpaa mianerinngitsoorlugulu. Inuiaat, aatsaat taama annikilliortigilersut, kajumissaanngitsoorpai taama atilik neriuffigeqqullugu. Taannaavorli eqqortumik taaneqartoq ’Guuti neriutsitsisoq’, neriuummut inuiaat maannakkut tutsuiginartumik neriuutigisinnaasatuaannut tunngaviliisuugami. (Rûmamiut 15:13) Taassuma neriuutissarititaa anguterpassuit arnarpassuillu pissatsissutigisimavaat.
Neriuutissaq aallaqqaataanit isaassimaneqarpoq
5. Neriorsuut qanga tunngaviliorneqarpa?
5 Neriugisaq tamanna inuiaat oqaluttuarisaanerata aallaqqaataanit tunngaviliorneqarsimavoq. Aap, siuaasatta siulliit angerlarsimaffimminnit naatsiiviusumit Kangiani Qiterlermi Edenimiittumit anisitaanerata siunitsiannguagut suna neriuutissaasoq taaneqaqqaarpoq. Naatsiivik imaluunniit paratiisi taanna pillugu oqaluttuaq hebræerit oqaasiini allagaasoq oqaluttualiaannaanngilaq inuiaat Pinngortitsisiminnut pallorfiginninnermik tunussisimasut oqaluttuatoqaat. — 1 Môrsase 2:7-imiit 3:24 ilanngullugu.
6. Pisimasoq suna pissutigalugu inuiaat neriorsuummik atorfissaqartitsilerpat?
6 Ukiut 4000-t sinnerlugit tamatuma kingornagut apustili kristumiuusoq Paulus Guutip sunniineratigut isumassarsisitaalluni ima allappoq: ’Inukkut ataasiusukkut ajorti silarsuarmut tikiuppoq ajortikkullu toqu tikiulluni, taamalu toqup inuit tamakkerlugit tikippai, tamarmik ajortuliormata.’ (Rûmamiut 5:12) Allakkami ilaanni allani angutip pisuusup kinaassusia taavaa: ’Soorlumi Adamimi tamarmik toqusut, taama Kristusimi tamarmik uummartitaassapput.’ (1 Korintumiut 15:22) Nakorsap Lukasimik atillup iivangkiiliumi allakkamini, kapitalit pingajuanni, Jesusip siuaasai Adam tikivillugu allattorpai. Adamip taassuma Edenimit suli anisitaanngikkallarami Jehovap tusarliussaa neriorsuutaasoq tusarpaa. — Lúkarse 3:23-38.
7. Adam suli inuugallartillugu Guuti kajumissaarutaasumik sumik iliorpa?
7 Soorunami tusarliussaq taanna ilisimajumassavat. Atuartinnaguli malugeriaruk Jehova qangaaniilli neriutsitsisuusoq. Aallaqqaataani Guutip Adam erneraa nunamioq, kinguaassiornissaalu Guutip akueraa. Atoruminaatsumik nalaataqarumaarnissaq takusinnaasimagukku, immaqa kinguaatit kajumissaarumassavatit imaluunniit neriutsikkumassallugit. Guuti taamatungajak iliorpoq. Guutip oqaasii imminut eqqartuussutaasut tusariaramigit, Adamip oqaatsit kinguaassaminut neriorsuutaasut tusarpai.
8. Môrsasip agdlagaine sujugdlerne 3:15-imi allassimasoq sumut neriorsuutaava?
8 Guutip neriutsitsisup suut oqaaserai? „Pulateriaarsuk“ Adamip ajortuliorneranut pisooqataasoq Guutip oqarfigaa: ’Akerariissikkumaarpassi illillu arnarlu, illit kinguaassat taassumalu kinguaassaa; taassuma niaqqut aserortissavaa, illilli kimmia aserorterumaarpat.’ (1 Môrsase 3:14, 15) Immaqa eqqarsaatigaat qanoq oqaatsit taakku neriorsuutaasinnaanersut. Malugeqqaagarput tassa ’pulateriaarsuup’ niaqua aserorterneqassasoq.
9. Kinaava „pulateriaarsuk“ Môrsasip agdlagaine sujugdlerne 3:14, 15-imi eqqartorneqartoq?
9 sarĸúmersitat 12:9-mi ima allassimavoq: ’Igitaavorlu kuukkooriaasarsuaq angisooq, pulateriaarsutoqaq Diaavulumik Satanimillu taaneqartoq, inuit najugaanni nunalinnik tamanik tammartitsiniartoq; nunamut igitaavoq, inngiliilu taassumunnga ilanngullugit igitaapput.’ Aap, „pulateriaarsuk“ Edenip naatsiivianiittoq allaanani tassaavoq pinngortitaq anersaaq ajortoq Satan Diaavulumik taaneqartoq. Pulateriaarsuk assersuutaasoq taanna qilammi inngilit akornanni malitseqaannarani aammattaarli maani nunami „kinguaassaq“arpoq, piffissarlu nallerpat ’kinguaava’ taassumunnga ilanngullugu suujunnaarsitaalluni aserorterneqassaaq.
10. ’Pulateriaarsuup’ kinaassusia Jesusip qanoq oqarluni uppernarsarpaa?
10 Diaavulup tassaasoq „pulateriaarsuk“ siuaasatsinnik siullernik tammartitseqataasoq ilumut taannaasoq uppernarsarlugu Jesus Kristusip upperisarsiornerup tungaatigut pisortat juutiusut ukiuni hundredilinni siullerni oqarfigai: ’Ataataq nagguigisarsi tassa Diaavulu, ataatassilu pilerigisai suliariniarpasi. Taanna pileqqaarnerminit inunnik toqutsisuuvoq, sallusuissullu aalajangiutinngilaa . . . Sallulluni oqalukkaangami namminerminit oqaluttarpoq, sallutuugami sallunerillu ataatagimmanni.’ (Juánase 8:44) Jesusip upperisarsiornerup tungaatigut pisortat taakku taavaattaaq ’pulateriaarsuit piaraat’. — Matîuse 12:34; 23:33.
Neriunneq tammatsaalineqartoq
11. Neriuutissaq aamma suna Môrsasip agdlagaine sujugdlerne 3:15-imi pilersinneqarpa?
11 Pulateriaarsuup assersuutaasup niaquanik aserorteriumaarnissamik Guutip neriorsuutaata inuiaat inunngorumaartussat tamaasa kajungernaqisumik neriugisassippai. Suna pillugu taamaattoq paasisinnaavarput Môrsasip agdlagaine sujugdlerne 3:15-imi eqqartorneqartut allat misissorutsigik. Arnap „kinguaassaa“ eqqartorneqarpoq. „Kinguaassap“ taassuma kinaassusia ukiorparujussuit paasissaanngitsuutitaavoq. Erseqqipporli Jehova Guutip „kinguaassaq“ taanna kinaassusersinneqanngikkallartoq pulateriaarsullu assersuutaasoq taassumalu „kinguaassaa“ Guutimut akerlilersuisoq akerariissikkumaarai. Arnalli „kinguaassaata“ ajugaanissaa neriorsuutigineqarpoq, tassami qulakkeerneqarluni! Taassuma ajugaanissaa inuiannut neriugisanngortitaavoq. Taamaattumik inuiaat „arnap“ „kinguaassaata“ tikiunnissaa isumalluarlutik neriugisinnaavaat.
12. „Arnap“ „kinguaassaa“ pillugu ukiut ingerlanerisigut suut nalunarunnaarsinneqarpat?
12 Ukiut hundredillit ingerlanerisigut Guutip arriitsumik nalunarunnaarsikkiartorpaa „kinguaassaq“ taanna tassaasoq Ernitui nunamut aallartitaasoq Messiasinngoqqullugu inuussutsilu utertitsissutissatut pilliutitut tunniukkiartoqqullugu. (1 Môrsase 22:17, l8; Galâsiamiut 3:16; l Juánase 2:2; sarĸúmersitat 5:9, 10) Tamanna pissutigalugu Jehovap Nalunaajaasuisa FN neriuutigisarinngilaat. Jesus Kristus uumasoq, Jehova Guutip oqaasissaqartitaa pingaarneq, neriuutigisaraat. Kristus ilumut uumasoq qularinngivipparput, toqusunit makikkami qilammi Jehovap talerpiata tungaanut ingikkiartorluni. Soorlu Paulus oqarsimasoq: ’Maaniinnaq inuutilluta [ukiuni 2000-ssaanni maanna atuuttuni allaat] Kristus neriuffigigutsigu inunnit tamanit naakkinarnerussaagut. Maannali Kristus toqusunit makissimavoq sinippaartunut naaqqaataalerluni.’ (1 Korintumiut 15:19, 20) Soorlu atuagassiami saqqummersartumi uani Bibeli tunngavigalugu uppernarsarneqartarsimasoq, Jesus Kristus ullumikkut qilammi kunngitut ivertitaavoq. — sarĸúmersitat 11:15.
13, 14. Jehovap Nalunaajaasuisa kina neriuffigisaraat, qanorlu iliorlutik?
13 Soorunami inuiaat neriuffigisaattut Jesus Jehovamut taartaanngilaq. Tussiaat 37:34 suli atortuuvoq: „[Jehova] neriuffiguuk aqqutigeqqusaalu atuarlugu, taava nunamik kingornussisussanngortikkumaarpaatit, takujumaarpallu guutiitsut piiagaanerat.“ Suli pisariaqarpoq inuit tamaasa kajumissaassallugit Jehova neriuffigiuaqqullugu inuillu peqatigiiffiliaat neriuffigiunnaaqqullugit.
14 Tamanna naapertorlugu Jehovap Nalunaajaasui nunani 208-ni sulisarput, Naalagaaffik pillugu tusagassaq nuannersoq oqaluussissutigalugu. Taamaaliornerminni unitsinneqarsinnaanngillat. Politikkikkut peqatigiiffiit, upperisarsiornikkut peqatigiiffiit annertoqqutigalugit tapersersuisoralugillu, Nalunaajaasunik unitsitsiniartussaanngillat. Uagut Jehovamut Nalunaajaasuujuarsinnaavugut taannalu neriuffigiuarsinnaallugu, soorlu David Betlehemimeersoq taamaaliortoq, taannalu ima allappoq:
15. Kunngi Davidip Jehova qanoq ittumik neriuffigaa?
15 „[Jehova] paarsisigaara, sumik ajorsaateqanngilanga. Qasuersaartittaraanga narsani qorsuusuni, tasissersuuttaraanga imeqarfinnut uninngavigisinnaasannut. Kingumut nakussatsittaraanga, ingerlatittaraanga aqqutaalluartut atuartillugit pissutigalugu aqqi. Ingerlagaluarumaluunniit qooqqukkut toqup taartitaatigut siooragisaqanngilanga najoramma, ilitsersuutit ajaappissallu tuppallersaatigigakkit. Nerriviliuupparma akeqqama takkuanni. Niaqora uuliamik tanippat, imertarfiga ulikkaavissimavoq. Tassami ajunngissutsip unneqqarissutsillu malittarissavaannga inuunera tamaat, [Jehovallu] illuani ineqassaanga ullut tamaasa.“ — Tussiaat 23.
16. Suna pillugu oqartoqarsinnaava Jesus Daviditut isumaqartoq?
16 Kunngi David itsarsuaq Israelip naggueqatigiissortaanut Jehovap anersaakkut paarsisuutitaraa. Davidip piareersaanerisigut Jerusalem naalagaaffiup illoqarfiisa pingaarnersarilerpaat, illoqarfimmilu tassani ernera Salomon ukiut 40-t kunngiuvoq. Naleqqulluartumik Jesus Kristus taaneqarpoq ’Davidip ernera’nik. (Lúkarse 1:31; 18:39; 20:41) Davidip Jehova Guuti neriuffigimmagu, nunami kinguaassaata Jesus Kristusip aamma neriuffigisimassavaa. Ilumullu taamaappoq.
17. Sumit paasineqarsinnaava Jesusip Jehova neriuffigigaa?
17 Davidip nunami kinguaassaasa pingaarnersaata, Jesus Kristusip, nappakkami naalliutsitaaffimmi toqulerami kajumissaarut Tussiaat 37:34-mi allassimasoq maleruarini takutikkumallugu, Jesus oqarpoq: ’Ataataq, anersaara assannut pisippara.’ (Lúkarse 23:46) Davidip oqaasii Tussiaat 31:6-imi allassimasut issuaaffigai eqquutillugillu, taanna Guuti saaffigalugu oqarmat: „Inuunera assannut tunniuppara.“ Jesus neriunnermigut pakatsisinneqanngilaq, soorluttaaq kunngi David neriunnermigut pakatsisinneqarsimanngitsoq. Ullut pingajussaani Jesus toqusunit makititaavoq. Ullut 40-t tamatuma kingornagut Ataataminut qilammiittumut uterpoq. Guutimik nalusut ullussaasa naammassineranni 1914-imi Jehovap Ernini ivertippaa nunarsuarmut naalakkersuisunngortillugu.
Maanna neriuffiuvoq
18. Suna pillugu naleqqulluarpa inuiaat ullutsinni suna neriugisaraat apeqqutigissallugu?
18 Ullumikkut ukiortaaq 6014 pinngortitsinerup kingornagut iserfigisimagatsigu, ilaqutariit inuiaasut siunissamut suna neriugisarisinnaavaat? Apeqqut tamanna naleqqulluarpoq, ukiummi 1900-ngajaat qaangiussimammata Bibelip allanneqarluni inaarneqarfianiilli. Ukiorparujussuit qaangiussimapput Davidip Tussiaat 37:34-mik allassimaneraniilli.
19. Jehovap Jesus qanoq iliorfigaa, tassuunalu neriuutissamik tunilluta?
19 Jehova Guutip, Guutip Ajugaqanngitsup Jesusimik toqusunit makititsisimasup, taanna atorfinitsissimavaa atorfimmik inuit paasisakitsut takorloorsinnaasaannit naalannangaarnerusumik. Ernituani makitikkamiuk qilammilu talerpimminut akitsisikkamiuk, Jehova Guutip suli aamma pissutissaqartippaatigut taanna tutsuiginarluinnartumik neriuffigeqqullugu, taanna neriuffiginerpaasarigatsigu. Tamanna pilluarluta inuunissatsinnik naassaanngitsumik kinguneqarsinnaavoq, soorlorpiaq Guutip sunniineratigut isumassarsisitaasoq Paulus oqarsimasoq: „Neriugisakkut tamatumuunakkut annatsitaavugut.“ — Rûmamiut 8:24, NW.
20. Suna pillugu suli oqarsinnaavugut Jehova Guutiusoq ’neriutsitsisoq’?
20 Apustili nangilluni oqarpoq: ’Neriugisarli isigisaq neriugisaanngilaq; isigisarmi qanoq isilluni neriugisaassava? Isiginngisarpulli neriugigatsigu nikallujuerluta utaqqissavarput.’ (Rûmamiut 8:24, 25) Taamaattumik neriugisaq aallaqqaataasoq taanna suli neriugisaavoq, aap, inuiannut tamanut alutornangaartumik eqqortinneqarnissaa qanilliartorasuarpoq. (2 Pîtruse 3:13; sarĸúmersitat 21:4, 5) Inuiannut tamanut neriugisaagami, tamanut ilisimatitsissutigineqartariaqarpoq. ’Guutip neriutsitsisup’ tamanna kissaatigaa.
21, 22. Naalagaaffiit ungasinngitsukkut qanoq iliornissaat ilimagisinnaavarput?
21 Kissaatigisaata tamatuma naammassineqarnissaanut piffissaq aatsaat ullumikkut nalliussimavoq. Ullumikkut naalagaaffiit FN-imut ilaasortaasut ilaasa sananeqaatit tamarmik atomiisa tangertaat ilisimatuussutsikkut pissaaneqarfigilersimagamikku, naalakkersuisortaanni pisortat isumaqanngillat ajornartorsiutit aaqqinneqarniarnissaat silassorissuseqarnerusumut suliaritittariaqaritik. — Naleqqiuguk Môrsasip agdlagai sujugdlît 11:6
22 Aatsaat ullumikkut upperisarsiornerit nalinginnaat ima ilioriarfissaqanngitsigaat, pissutsiminnik illersuisariaqarlutik. Immikkoortitsilluni sunniiniapilunnerat taamaatinneqartariaqalerpoq. Bibelimi takutinneqarpoq naalakkersuinermik piginnaanillit upperisarsiornerit allanut miluuttutut ittut, imungarsuaq silarsuarmi matumani pissutsinik aaqqissuussaaneq atornerlullugu sapinngisamik iluaqutiginiarlugu pisartut, piginnaaneqarnerussutsiminnik misigitissagaat avissaarlugillu. Naalakkersuinermik suliaqartut taama iliuuseqassagunik ila tupinnassanngilaq. Upperisarsiornernik tamanik saassussinerminni iluatsitsigunik isumaqartissavaat Guuteqanngitsoq unnersiutigisariaqartumik kiffartorfigisariaqartumillu. Bibelimi siulittuutini takutitsiarneqarpoq taamaaseriarunik Guutimut nalunaajaasut, tassa upperisarsiortut sinneruttutuaasut, saassuttarilissagaat. Guutimut akerliliillutik pitoraannermit pingaarseruttorfiani Jehovap Nalunaajaasuinut imaaliallaannaq ajugaanissartik ilimagissavaat. — sarĸúmersitat 17:12-17; Hisĩkiale 38:10-23.
23, 24. Inuiaqatigiit innuttaminik saassusseriarpata, Jehova qanoq ilioriataassava?
23 Kisiannili narrunarsaataasumik ajorsarneq Jehovamut katersaarsuit Naalagaannut, akiuunnermi ajorsarsimanngisaannartumut, akiuukkusuttut allatut ajornavissumik misigisariaqagaat naggataatigut misigissavaat. Taamanikkussaq nalunarunnaarluinnassaaq Guutip kisimi ilumoortup akeravissua, tassa „pulateriaarsuk“, Satan, „pissutsit aaqqissuussaanerata matuma guutia“, anguniagaasigut kiffartorfigisimagaat. — 2 Korintumiut 4:4, NW.
24 Ila makitanaveersagaanerup angissusissaa! Paasineqarumaarpoq anguniagarigaluat ajuallatsitsinerusoq angeqisoq, qilaap nunallu Guutianik naapertuilluartumik kamatsitsissasoq. Taanna inunnut pissaanikitsunut oqarsinnaassagaluarpoq: ’Massa eqqarsaatikka ilissi eqqarsaatiginngilasi, aqqutisilu uanga aqqutiginngilakka, oqarpoq Jehova. Soorlu qilak nunamit qutsissoq, taamattaaq aqqutikka qutsipput aqqutissinnit, eqqarsaatikkalu eqqarsaatissinnit. Soorlulu sialuit qaniillu qilammit tuttartut tassunga utissanatik, kisianni nuna matsatsertarpaat kingunissiortillugu naggorissunngorlugulu, naatsiiassanik tunisisillugu siaruartigassanik, neqissanillu nerisassanik, taamaasaaq oqaasera qaninnit anisoq; sunani uannut utissanngilaq, kisianni iluarisakka suliarissavai, naammassilluassavaalu, suna pillugu aallartikkiga.’ — Isaia 55:8-11.
25. Taava suna pillugu maanna pissutissaqarluarpugut Jehova Guutitsitut ’neriutsitsisutut’ neriuffigissallugu?
25 Inummik Pinngortitsisup taassuma malussarissuseq nammineq pigisamisut ittoq inuup uummataanut ikkussimavaa. ’Ima oqarmat Jehova katersaarsuit Guutiat: Naalannarsissutaalerami kingorna aallartippaanga akimanngitsunut ilissinnik ujajaasunut; ilissinnik attuisup taassuma [Guutip] isaata tappiutaa attorsimassammagu.’ (Saggaria 2:12) Taava Jehovap Nalunaajaasuisa Jehova neriuffigisariaqassavaat. Neriuffiginninnerat naapertorluinnarlugu iliorumaarpoq qilammi nunamilu kisimi oqartussaanermi kusanarsagaalluinnartumik akitsisitaanissaanut. Kingornagut qularutissaanngivissumik uppernarsarumaarpaa Guutiulluni qutsinnerussaartoq, ajugaqanngitsoq, naassaanngitsuusoq, qilammi nunamilu pinngortitami neriuffiginninnerat naapertorlugu neriorsuutiminik eqqortitsisartoq. Halleluja! — Tussiaat 150:6. (wD 15/12 87)
Illit qanoq akissavigit?
□ Suna pillugu naalagaaffiit tutsuiginartumik neriuutississinnaanngilaatigut?
□ Môrsasip agdlagaine sujugdlerne 3:15-imi Guuti qanoq ililluni neriunnermut tunngaviliiva?
□ Tussiaat 37:34 eqqarsaatigalugu Jesus qanoq isumaqarpa?
□ Suna pillugu uagut maanna neriunnermut tunngavissaqarpugut?
[Qupp. 3-mi assiliartaq]
Savat paarsisertik malittarpaat. Davidip Jehova utaqqisaraa neriuffigalugulu
[Suminngaanneernera]
Pictorial Archive (Near Eastern History) Est.