Meeqqat atuarfimmi nalunaajaasartut nersualaarneqartut
UPPERISAT pillugu atuaqativit oqaluunnissaannut kisittarpit? Allaaserisani tulliuttuni eqqartorneqarput Jehovamut Nalunaajaasut meerartaat kristumiutut upperisaminnik ersissuteqaratik nassuerutiginnittarsimasut taamaattumillu nersualaarneqartut.
□ Australiami atuarfiit ilaanni atuartut pisassinneqarput juulli pillugu allaaserinninnissaminnut, kisiannili Jehovamut Nalunaajaasumut aqqanilinnik ukiulimmut ilinniartitsisoq oqarpoq: „Nalunngilara Jehovamut Nalunaajaasuusutit, taamaattumillu qanoq juullisiortarneq pillugu allaaserisinnaanngikkit. Taarsiullugu juullip oqaluttuarisaanera allaaserisinnaavat.“ Qatanngutittalu arnap inuusuttunnguup allaaserisat Vagttårnip peqatigiiffiata naqitertitaaneersut ujarlerfissiallu allat najoqqutaralugit allaaserisani suliaraa. Atuaqataasa tupaallaatigisaannik ilinniartitsisup allaaserisaq pitsaalluinnartuunerarpaa oqaluttuarisaanikkullu eqqortumik tunngaveqarnerarlugu. „Atuaqativit allaaserisaannit tamanit allaaserisat pitsaanerpaavoq,“ ilinniartitsisua oqarpoq. Tamatuma kingunerisaanik Jehovamut Nalunaajaasup inuusuttunnguup taassuma atuagaaraq Atuarfeqarfik aamma Jehovap Nalunaajaasui, atuagassiat 15-it, atuagaq Inuusunnerit qanoq pissarsiffigilluarsinnaagit aammalu atuakkat ’inûneĸ nâgssáungitsoĸ’ marluk ilinniartitsisiminut atuaqatiminullu tunniuppai.
□ Atuarfimmi allami Australiamiittumi Jehovap Nalunaajaasuisa meeraasa ilaat arfineq-pingasut ilinniartitsisup taartaanit ukiup sapaatit akunnerisa kingullersaanni pingasuni ualit tamaasa nakkutigineqalerput, pissutigalugu juullimut piareersarnernut ilaajumanngimmata. Kingorna ilinniartitsisup taartaa meeqqat ilaata arnaanut oqarpoq: „Qanoq iliuusissaqangaarsimanngilanga. Ilinniartitsisut ilarpassui isertarput aperiniarlutik qanoq ingerlanersoq. Oqarfigisarpakkalu: ’Taakkua upperisaat aammalu piareersarnernut ilaajumannginnerat qanorluunniit isumaqarfigigaluarissi oqarusuppunga meeqqanik allanik taakkunatut naalatsigisunik suliffigisaqarsimanngisaannarama.’“ Taavalu sapaatit akunneri marlussuit qaangiuttut ilinniartitsisumut taartaasoq illumiit illumut angalaartunit pulaarneqarami oqarpoq: „Meerartasi pillugit atuarfimmi oqaaserisimasara allanut ingerlateqqippisiuk? Kissaatigigaluarparami kikkut tamarmik tamanna tusassagaat.“
□ USA-mi qatannguterput 17-inik ukiulik highschoolimi ukiut pingajussaanni atuartoq ima misigisaqarsimavoq: Nalunaaquttap akunnerani inuiaqatigiinnut tunngasunik ilinniartitsiffiusumi atuartut upperisarsiornermi naqisimaneqannginnissap aammalu naalagaaffiup ilagiillu avissaarsimanissaannut tunngasut inatsisinut tunngasortaat oqallissutigitillugu isumaqatigiinneq sapilerput. Oqallinnerup ilaani Jehovamut Nalunaajaasut aalersortinnermullu tunngasut oqallissutigineqarput. Qatannguterput arnaq inuusuttunnguaq isumaqarpoq Bibelimi aak pillugu allassimasunut tunngatillugu oqaaserineqartut nakerisarsiornerullutillu illuinnaasiorpallaartut, tamannalu ilinniartitsisuminut oqaatigaa. Taamaattumik atuaqatiminut oqalugiarnissaanik akueraa. Tamanna sioqqullugu atuaqatai isumaqarsimagaluarput eqqartuussisut eqqortumik aalajangiisartut Jehovap Nalunaajaasuisa piumasaat akimorlugu aalersortittussanngoraangatigik. Oqalugiaataali Bibelimik tunngaveqartoq tusareerlugu atuaqataasa tamanna akerlerilerpaat. Qatanngutittalu nuannaarutigaa tamatuma kingorna atuaqatimi ornittarmanni aperalunilu Jehovamut Nalunaajaasut upperisaannut tunngasunik oqaluttuunnerusinnaanerini. Maannalu qatannguterput oqartarpoq suli paasilluarnerusinnaalerlugu atuarfik immikkut oqaluussiffigisassarigini.
Aap, meeqqat inuusuttullu ilissi suli atuartuususi pitsavimmik oqaluussiffigisassaqarpusi. Periarfissaqarussi taava inussiarnerlusi atuaqatisi Guutip siunertaanik nuanningaartunik oqaluttuuttarniarsigik. Taamaaliorussi taava inunniinnaanngitsoq nersualaarneqassaasi, aammattaarli Jehova Guutimit! — Jûpe 40:14. (wD 1/1 88)