Atuartartut apeqqutaat

◼ Jesusip oqaluusianik tusarnaarsimasut maanna toqoreersimanerat eqqarsaatigigaanni taassuma oqarnermini, tassa imminut uppertut ’toqunaviassanngitsut’, suna isumagaa? — Juánase 11:25, 26.

Inuit ilaasa toqunngisaannarnissaat naassaanngitsumillu inuunissaat Jesusip eqqartoramiuk qularnanngitsumik isumaqanngilaq taamanikkut imminut tusarnaartut toqunngitsoorsinnaasut. Erseqqissarusutaa tassaavoq imminut uppernerup inuunermik naassaanngitsumik kinguneqarsinnaanera.

Jesus ilaanni imminut taasimavoq ’neqissaq inuussutaasoq’, imalu nangilluni: ’Tamassa neqissaq qilammit aqqartoq, tassannga nerisut toqunaveeqqullugit. Uanga-una neqissaq uumasoq qilammit aqqartoq; neqissamik tamatumannga nerisoq naassaanngitsumik inuussavoq.’ — Juánase 6:48-51.

Oqaatsit tamakku immikkoortikkaanni isumaqartoqarsinnaavoq Jesusip tusarnaartiminut neriorsuutigisaa tassaasoq toqunngitsoorsinnaanerat. Allassimaffiilli ataqatigisai qimerlooraanni paasinarsissaaq isuma tamanna eqqunngitsuusoq. Tamatuma siuninnguagut Jesus ima oqarsimavoq: ’Uannik aallartitsisup peqqusaa tassa uannut tunniussaasa ilannguannilluunniit tammartitaqassanngitsunga, kisianni ullut naggatissaanni makitissagiga. . . . Ernermik takunnittoq upperfigalugulu, taanna naassaanngitsumik inuussuteqassaaq, taannalu ullut naggatissaanni makitikkumaarpara. . . . Uannut pisoqarsinnaanngilaq Ataatap aallartitsisima kajungersinngippani; taavalu ullut naggatissaanni makitikkumaarpara.’ (Juánase 6:39-44) Kingornalu ima oqarpoq: ’Uininnik nerisoq aannillu imertoq naassaanngitsumik inuussuteqarpoq, taannalu ullut naggatissaanni makitikkumaarpara.’ (Juánase 6:54) Taamaattumik inuunermik naassaanngitsumik Jesusip neriorsuutaa taamani tusarnaartimi toqunngisaannarnissaannik neriorsuutaatut nassuiarneqarsinnaanngilaq.

Taamatuttaaq ippoq Jesusip Martamut neriorsuutaa ilisimaneqarluartoq: ’Uanga makissutaallungalu inuussutaavunga; uannut uppertoq naak toqugaluaruni inuussavoq; inuusorlu uannut uppertoq kinaluunniit toqunaviassanngilaq.’ (Juánase 11:25, 26) Ersarilluinnarpoq Jesus isumaqanngimmat assersuutigalugu apustilit aalajaatsut allatulli toqunavianngitsut. Ukioq ataaseq qaangiutsinnagu anersaaq iluartumik taninneqartussaasimapput qilammilu kunngisut naalagaalernissaminnik neriugisaqalersussaallutik. Taamatut akissarsisinneqarsinnaajumallutik inuttut toqoqqaartariaqarsimapput. (Rûmamiut 8:14-23; 1 Korintumiut 15:36-50) Malugiuttaaq Jesusip oqaasia manna: ’Uannut uppertoq naak toqugaluaruni inuussavoq.’

Jesusip neriorsuutaa Guutimut kiffaalluarlutik inuusimasunut inuillu inuunermik naassaanngitsumik pinissaat sioqqullugu toqusimasunut eqquutissaaq. Kiffat aalajaatsut taakku makititaanissamik neriuuteqarput. Makititaanermik kingorna aalajaattuarunik ’toqup aappaa’, toqu naassaanngitsoq, misiginngisaannassavaat. — sarĸúmersitat 20:15; 21:8; Juánase 8:51.

Bibelimili siulittuutaasuni ersersinneqarpoq uagut ullumikkut inuusugut immikkut ittumik periarfissaqartugut. Pissutsit aaqqissuussaanerata matuma naggatissaani inuugatta ’annikilliornartumi angisuumi’ piumaartussami aniguisinnaassaagut ingerlaannarlutalu silarsuassamut nutaamut isersinnaassalluta. Nunami paratiisiusumi naassaanngitsumik inuunissamik neriugisaqartut Guutimullu ilumoortuartut toqusariaqanngilluinnarput. ’Annikilliornartumi angisuumi’ aniguereerunik ’imermik puilasunut inuunerup piinut’ siulersorneqassapput. — sarĸúmersitat 7:9-17. (wD 15/1 89)

[Qupp. 29-mi assiliartaq]

Martamut aliasuttumut Jesusip oqaasiisa inuunermik naassaanngitsumik neriugisaqalersippaatigut