INTERNETIKKUT ATUAGAATEQARFIK Watchtower
INTERNETIKKUT ATUAGAATEQARFIK
Watchtower
Kalaallisut
  • BIIBILI
  • BIIBILILERSAARUTIT
  • ATAATSIMIINNERIT
  • w90 1/3 qupp. 8-13
  • Angerutsit Guutip pilersitai iluaqutigissavigit?

Immikkoortumi matumani isiginnaagassiaqanngilaq.

Ajoraluartumik isiginnaagassiap aanerani ajutoortoqarpoq.

  • Angerutsit Guutip pilersitai iluaqutigissavigit?
  • Napasuliaq Alapernaarsuiffik — 1990
  • Qulequtaaqqat
  • Tamatumunnga assingusut
  • Qilammi palasimik angeruseq
  • Angerusisaaq kinguaassarlu pingaannginnerusoq
  • Jesusip naalagaaffik pillugu angerusia
  • Angerutsit Guutip siunertarisaanut naassaanngitsuusumut tunngasut
    Napasuliaq Alapernaarsuiffik — 1990
  • ‘Tassaalissaasi kunngeqarfik palaseqatigiinnik innuttalik’
    Napasuliaq Alapernaarsuiffik — 2014
  • Naalagaaffik upperilluinnaruk
    Napasuliaq Alapernaarsuiffik — 2014
Napasuliaq Alapernaarsuiffik — 1990
w90 1/3 qupp. 8-13

Angerutsit Guutip pilersitai iluaqutigissavigit?

’„Ilikkut inuiaqatigiit tamarmik pilluaqqunarsissapput.“ Taamaammat uppersuseqartut Abrahamimut uppertumut ilagitillugit pilluaqquneqarput.’ — GALÂSIAMIUT 3:8, 9.

1. Oqaluttuarisaanermi inuit naalakkersueriaasii sumut ersiutaappat?

„KISERMAASSILLUTIK naalakkersuisut qaammarsagaasut“ — ukiut 1800-ssaanni Europami naalakkersuisuusut ilaat taama taagorneqarsimapput. ’Ataatarpaluttumik isumassuillutik innuttatik aqunniarsarigaluarpaat, pilersaarusiaalli iluatsinngitsoortarput, iluarsaanerilu ajutoortarlutik.’a (The Encyclopedia Americana) Tamanna Europami nunarpassuarni mumisitsinernut pissutaanerusunut ilaavoq.

2, 3. Jehovap kunnginit inuusunit suut allaanerussutigai?

2 Jehova naalakkersuisunit nunamiusunit nalunartumik periartartuusunit allaanerulluinnarpoq. Inuiaat allannguutissamik naggataatigut naapertuilluanngissutsimik naalliunnartunillu peersitsisinnaasumik pisariaqartitsilluinnartuunerat ersareqaaq. Isumakulussanngilagulli, Guutip akuliunnissaa iluatsitsinerinnakkut pinavianngilaq. Inuiannut uppertunut, inuiaassutsikkut, innuttaassutsikkut, naggueqatigiissutsikkut ilinniarsimassutsikkullu qanorluunniit tunuliaqutaqaraluartunut pilluaqqussutissanik ataavartuusunik atuutilersitsiumaarnissaminik neriorsuutini atuakkat silarsuarmi siammarsimanerpaartaanni uppernarsarsimavaa. (Galâsiamiut 3:28) Tamannali qularinnginneqarsinnaava?

3 Guutip Abrahamimut neriorsuutaa apustili Paulusip ilaanni issuaaffigaa: ’Ilumut pilluaqqungaarumaarpakkit.’ Paulus nangilluni oqarpoq Guuti sallusuitsuummat ’uagut qimaaffissarsisugut neriugisassaq saqqangiussaq aalajangiullugu’. (Eprîarit 6:13-18) Tamatuminnga naammassinninniarnissaminut Guutip aaqqissuussaalluartumik tunngaviliiartuaarnera misissorutsigu neriorsuutinik tamakkuninnga qularinninnginnerput suli aalajaallisinnaassaaq.

4. Siunertarisaminik naammassinninnermigut Jehovap angerutsit assigiinngitsut qanoq atorsimavai?

4 Atuagassiap matuma siuliani takoreersimavarput kinguaassaq ’inuiaqatigiit tamarmik pilluaqqunarsissutigisassaat’ pillugu Guutip Abraham angerfigeqatigisimagaa. (1 Môrsase 22:17, 18) Israelikkut uinikkut kinguaassanngorsimapput, pingaaruteqarnerusumilli anersaakkut ittumik Jesus Kristus tassaalersimavoq Abrahamip kinguaassaata ilaa pingaarneq. Jesus tassaavortaaq Abrahamip annerup, Jehovap, ernera imaluunniit kinguaava. Kristumiut ’Kristusip pigisai’ tassaapput Abrahamip kinguaassaata ilaanut pingaannginnerusumut ilaasut. (Galâsiamiut 3:16, 29) Abrahamimik angeruseq pilersereerlugulu Guutip Inatsisinik angeruseq Israelikkut angerfigeqatigalugit utaqqiisaannaa ilanngussimavaa. Angerutsip tamatuma uppernarsarpaa Israelikkut ajortuliortuusut palasimik ataavartumik pilliummillu naammalluinnartumik atorfissaqartitsisut. Angeruseq kinguaassap kinguaariissortaanut sernissuutaavoq taassumalu kinaassusiata ilisariniarnissaanut ikiuutaalluni. Aammattaaq Inatsisinik angerutsip ersersippaa Guutip sukkut arlaatigut inuiaat kunngiullutillu palasiusut pilersikkumaarai. Inatsisit Mosesikkut tunniussat suli atortuutillugit Israelikkunni kunnginik kinguaariissoqarnissamik Guutip David angerfigeqatigaa. Naalagaaffik pillugu Davidimik angerutsip tamatuma aammattaaq nunamut naassaanngitsumik kunngiujumaartussaq tikkuarpaa.

5. Apeqqutit suut suli akineqartariaqarpat?

5 Angerutsinulli tamakkununnga tunngasoqarpoq siunertaqarlunilu amigaateqarpaluttunik imaluunniit erseqqinnerusumik nassuiarneqartariaqartunik. Assersuutigalugu, kinguaassaq Davidikkut kinguaariissortaanni kunngiussaguni, qanormi taava soraajuitsumik palasiusinnaassava palasit siornagut inuusimasut naammassisinnaasimasaannit annertunerusunik naammassinnissinnaalluni? (Eprîarit 5:1; 7:13, 14) Kunngip taassuma nunamik aalajangersimasumiinnaanngitsoq annertunerusumilli naalagaaffiginnissinnaassanerpaa? Kinguaassap ilaanut pingaannginnerusumut ilaasut Abrahamip annerup eqqarleriissortaanut qanoq ilillutik ilaasinnaatitaassanerpat? Ilaasinnaatitaassagaluarunillu sumut naalagaasinnaassanerpat, amerlanersatik Davidip kinguaarinngimmagit? Misissoriartigu qanoq ililluni — angerutsinik nutaanik apeqqutinut tamakkununnga aaqqiissutissaasunik uagutsinnullu naassaanngitsumik pilluaqqussutissaasunik pilersitsinermigut — Guuti inatsisinut naapertuuttumik pisariaqartumik iliuuseqarsimasoq tamanna naammassiumallugu.

Qilammi palasimik angeruseq

6, 7. (a) Tussiaat 110:4 naapertorlugu angeruseq aamma suna Guutip pilersippaa? (b) Tunuliaqutaasunut paasissutissat suut iluaqutigalugit angeruseq tamanna paasilersinnaavarput?

6 Soorlu takoreersimagipput Inatsisinik angeruseq suli atortuutillugu Guutip David angerfigeqatigaa taassuma kinguaassaasa ilaata nunamut naalagaaffeqarluni soraajuitsumik kunngiujumaarnissaanik. Aammattaarli palasip soraajuitsup tikiunnissaanik Jehovap David nalujunnaarsippaa. David ima allappoq: „[Jehova] uppernarsaavoq peqqissimissananilu: ’Palasiuvutit naassaanngitsumik Melkizedek assigalugu.’“ (Tussiaat 110:4) Guutip uppernarsaalluni oqaasiinut tamakkununnga, Jehovap nammineerluni palasimik tikiukkumaartussamik angerusianut, suna tunuliaqutaava?

7 Melkizedek itsarsuaq Salemimi, kingusinnerusukkut illoqarfiup Jerusalemip (aqqip Salem-imik ilaqartup) inissisimaffigiligaani, kunngiusimavoq. Abrahamip taassuminnga naapitsinera pillugu oqaluttuami erseqqissarneqarpoq taanna kunngiusoq ’Guutimik qutsinnerussaartumik’ pallorfiginnittoq. (1 Môrsase 14:17-20) Guutilli Tussiaat 110:4-mi oqaasiata takutippaa Melkizedek aammattaaq palasiusoq, tamannalu taassuma nalinginnaanngissutigaa. Taanna kunngiullunilu palasiuvoq, kiffartorlunilu najukkami kingusinnerusukkut kunngit Davidikkuusut palasillu Levikkuusut Guutip aaqqissuussineratigut suliassaminnik kiffartorfigisaanni.

8. Melkizedekitut palasiussuseq pillugu angeruseq kimik angerfigeqatiginnissutaava, angeruserlu tamanna sunik kinguneqassava?

8 Melkizedekitut palasiussutsimik angeruseq pillugu Paulusip allamik ilisimasaqartippaatigut. Assersuutigalugu, oqarpoq Jesus Kristus ’Melkizedekip ileqquatut palasiunermik Guutimit taaneqartuusoq’. (Eprîarit 5:4-10; 6:20; 7:17, 21, 22) Naak Melkizedek soorunami inuttut angajoqqaaqarsimagaluartoq, siuaasaasa kikkuuneri nalunaarsorneqarsimanngillat. Melkizedekimik siuaasaqarneq nalunaarsugaasoq tunngavigalugu palasitut atorfik Jesusip kingornutinngilaa, toqqaannartumilli Guutimit palasinngortitaavoq. Jesus palasitut allamit kingoraarneqarnavianngilaq, tassami ’taanna palasiuttuinnarpoq’. Taamaattumik palasitut kiffartornerata iluaqutissartai naassaanngitsumik ataannassapput. Pilluaqqusaangaarpugut palaseqaratta ’aqqutigaluni Guutimut pisut naalluinnarsimasumik annaassisinnaasumik’ aalajaatsumillu naassaanngitsumik ajoqersuillunilu siulersuisinnaasumik. — Eprîarit 7:1-3, 15-17, 23-25.

9, 10. Angerutsit tallimaannik ilisimanninneq qanoq ililluni Guutip siunertarisaata naammassineqarnissaanut paasinnissutaava?

9 Aammattaaq malugisariaqarpoq Jesus nunamuinnaanngitsoq kunngiullunilu palasiummat. Melkizedekitut palasiussuseq pillugu angeruseq eqqartoramiuk, David ima allappoq: „[Jehovap] naalakkannut oqaasia: ’Talerpimma tungaanut inginniarit akeqqatit isikkannut illit tummarfiliuunniassagakkit!’“ Tassuuna paasitinneqarpugut Jesus — Davidip Naalagaa — Jehova ilagalugu qilammi inissisimaffeqalissasoq, tamannalu qilaliarneragut pisimavoq. Qilamminngaanniit Kristus, Ataatani peqatigalugu piginnaanini atorlugu, akeqqanik naalatsigititsisinnaassaaq eqqartuussutiminillu naammassinnissinnaassalluni. — Tussiaat 110:1, 2; apustilit suliait 2:33-36; Eprîarit 1:3; 8:1; 12:2.

10 Angerutsit tallimaata ilisimaneratigut Jehovap siunertarisaminik aaqqissuussilluartumik peqqissaartumillu naammassinnikkiartuaarnera takulluarsinnaalerparput. Angerutsip tamatuma aalajangersarpaa kinguaassap ilaa pingaarnerusoq aammattaaq qilammi palasiussasoq kiisalu kunngiullunilu palasitut piginnaanera qilammullu nunamullu attuumassuteqalissasoq. — 1 Pîtruse 3:22.

Angerusisaaq kinguaassarlu pingaannginnerusoq

11. Kinguaassap ilaanut pingaannginnerusumut ilaasut eqqarsaatigalugit suna ajornartorsiutaalerpa?

11 Tamatuma siuliani Abrahamimik angeruseq misissoratsigu ilisimatinneqarpugut Jesus uinikkut siuaasani pissutigalugit tassaalersimasoq „kinguaassaq“ pingaarnerusoq. Ataataanerpaaq Abraham toqqaannartumik siuaasaraa, aammattaaq inuttut naammalluinnartuugami Abrahamimit annermit iluarisaalluni ernerineqarpoq. Inuimmi immikkut pisinnaatitaaffigalugu Abrahamip kinguaassaata ilaanut pingaannginnerusumut ilaasussat, tassa ’unnersuut naapertorlugu kingornussisussaasut’? (Galâsiamiut 3:29) Naammalluinnartuunnginnamik, ajortuliortoq Adam siuaasarigamikku, Jehovap, tassa Abrahamip annerup, ilaqutariissortaanut ilaasinnaatitaanngillat. Naammalluinnartuunngissusiat akornutaasoq qanoq anigorniarneqarsinnaava? Tamanna inunnut ajornaqaaq, Guutimulli ajornartuunngilaq. — Matîuse 19:25, 26.

12, 13. (a) Angerutsip suli allap pilersinneqarnissaa qanoq ililluni Guutip siulittuutigisimavaa? (b) Angerutsip tamatuma suna malunnartortaraa?

12 Inatsisit suli atortuutillugit Guuti pruffiitini aqqutigalugu ima siulittuivoq: „Israelikkunnik Judakkunnillu nutaamik angerfigeqatiginni[kkumaarpunga]; taama pissanngitsumik soorlu siuaasaat angerfigigikkit . . . ’angerusiga taanna uniortippaat’ . . . Inatsisikka iluinut tunniukkumaarpakka, uummataannullu allallugit. Guutigissavaanngalu, uangalu taakku innuttariumaarpakka. Kingornalu . . . ajoqersuisoqassanngilaq, ima oqartumik: ’Jehova ilisaruuk!’ tamarmimmi ilisarissavaannga . . . Ajortuliaat isumakkeerumaarakkit, ajortuliaasiaallu eqqaaqqissanagu.“ — Jerimia 31:31-34, NV.

13 Malugeriaruk angerusisaap malunnartortaa tassaammat ajortinik isumakkeerfiginninnissaq, qularnanngitsumik Inatsisinik angeruseq naapertorlugu uumasunik pilliutiginninnermik aaqqissuussakkut anguneqarsinnaanngitsoq. Jesusip ullormi toquffimmini tamanna paasinarsisippaa. Mosesip inatsisaani piumasarineqartut malillugit ajoqersukkani poorskisioqatigereeramigit Naalakkap unnukkorsiortitsinera Kristusip pilersippaa. Tamatuminnga ukiumoortumik nalliuttorsiornermi tamarmik ermuseq ataaseq viinnisorfigisassavaat, tamannalu pillugu Jesus ima oqarsimavoq: ’Ermuseq manna tassa angerusisaaq aakkut pillusi kuisukkut.’ — Lúkarse 22:14-20.

14. Kinguaassap ilaanut pingaannginnerusumut ilaasut pilersinneqarnerisigut suna pillugu angerusisaaq immikkut pingaaruteqarpa?

14 Angerusisaaq Jesusip aavagut atortuulersinneqartussaavoq. Pilliut naammalluinnartoq tamanna tunngavigalugu Guutip ’ajortuliat ajortuliaasiallu’ isumakkeerfigilluinnassavai. Tamatuma kingunerisinnaasassaa eqqarsaatigeriaruk! Inuit Adamip kinguaavisa tunniusimasut ajortaat isumakkeerfigilluinnarsinnaaleramigit, Guutip taakku ajorteqanngitsutut isigisinnaalissavai, Abrahamip annerup ernerisut qitornarilersinnaallugit, taavalu anersaamik iluartumik tanissinnaallugit. (Rûmamiut 8:14-17) Taamaalilluni angerusisaap, Jesusip pilliutaasigut atortuulersinneqartup, taassuma ajoqersugai Abrahamip kinguaassaata ilaanut pingaannginnerusumut ilaasinnaalersippai. Paulus ima allappoq: ’Toqumigut Jesusip toqumik pissaatilik, tamassa Diaavulu, sapersisissavaa, aniguisissavaalu tamaasa inuunertik tamaat naallugu toqu siooraginermit inussiaatinneqartut. Inngilimmi ikiornianngilai, kisianni Abrahamip kinguai ikiorniarpai.’ — Eprîarit 2:14-16; 9:14.

15. Angerusisaami kikkut angerfigeqatigiippat?

15 Jesus tassaavoq angerusisaami akunnermiliuttoq tassaallunilu pilliut angerusisaamut atortuulissutaasoq. Angerfigeqatigiilli kikkuuppat? Jeremiasip siulittuutigisimavaa Guuti „Israelikkunnik“ angerfigeqatiginnissasoq. Israelikkut kikkut? Uinikkut Israelikkut Inatsisit malillugit timikkut kipineqarsimasut pineqanngillat, tassami angerusisaap angerusitoqaq atortuujunnaarsissimavaa. (Eprîarit 8:7, 13) Maanna Guutip juutit juutiunngitsullu uppernikkut assersuutikkut ’uummatimikkut kipineqarsimasut anersaakkut pisumik’ iliuuseqarfigilersimavai. Tamanna naleqquppoq oqarsimaneranut inatsisai angerusisaamut ilaasut ’isumaannut uummataannullu allanneqassasut’. (Rûmamiut 2:28, 29; Eprîarit 8:10) Juutit taamaattut Paulusip taavai ’Israel Guutip pigisaa’. — Galâsiamiut 6:16; Jâko 1:1.

16. Môrsasip agdlagaisa áipait 19:6-imi tikkuarneqarsimasumik qanoq ililluni angerusisaaq naammassinneqataava?

16 Guutip anersaakkut Israelikkut iliuuseqarfigilersimammagit nutaanik periarfissaqalerpoq. Inatsisinik angeruseq pilersikkamiuk Guuti oqarsimavoq Israelikkut tassaalissasut ’palaseqatigiit kunngiuffiusut, inuiaat illernartut’. (2 Môrsase 19:6) Uinikkut Israelikkut tassaalersinnaanatillu tassaalersimanngillat inuiaat tamarmik kunngiullutillu palasiusut. Kisianni juutit juutiunngitsullu Abrahamip kinguaassaata ilaanut pingaannginnerusumut ilaasinnaatitaasut kunngiullutillu palasiusinnaassapput.b Apustili Peterip tamanna uppernarsaqqippaa taakku oqaluttuukkamigit: ’Ilissili tassaavusi eqqarleriit qinikkat, palaseqatigiit kunngiusut, inuiaat iluartut, innuttarisassarsiat, ilissinnik taartumit qaamasumut tupinnartumut piminut qaaqqusisup ajunngingaarutai nalunaarutigissallugit.’ Aammattaaq allassimavoq ’kingornussassaq aserujuitsoq taakkununnga qilammi toqqorsimasoq’. — 1 Pîtruse 1:4; 2:9, 10.

17. Suna pissutigalugu angerusisaaq Inatsisinik angerutsimit pitsaanerua?

17 Taamaattumik angerusisaap aammalu Abrahamimik angerutsip pilersinneqareersimasup atuunnerisigut kinguaassap ilaanut pingaannginnerusumut ilaasoqarsinnaalerpoq. Jehovap kristumiullu anersaakkut Guutimit qitornarsiarineqartut akornanni angerusisaap Abrahamip annerup eqqarleriissortaasa kunngikkormiut ilaasa kunngiullutik palasiullutillu qilammi inuianngornissaat pisinnaalersippaa. Taamaalilluni paasinarsivoq suna pillugu Paulus oqarsimasoq tamanna tassaasoq ’angeruseq ajunnginnerusoq unnersuutinik ajunnginnerusunik tunngaveqartoq’. (Eprîarit 8:6) Neriorsuutinut tamakkununnga ilaapput Guutip inatsisaasa taassuma kiffaasa tunniusimasut uummataannut allanneqarnissaat, ajortaasa eqqaaneqarunnaarnissaat, kiisalu tamarmik ’minnertaminnit annertaminnut Jehovamik ilisarsinissaat’. — Eprîarit 8:11.

Jesusip naalagaaffik pillugu angerusia

18. Apeqqutit suut suli akineqartariaqarpat?

18 Angerutsit arfiniliusut misissoriikkavut eqqarsaatigalugit isumaqarnarsinnaavoq siunertarisami naammassiniarneqarnissaanut pisariaqartut tamaasa Jehovap inatsisit tunngavigalugit aaqqissoreersimagai. Bibelimili angeruseq suli ataaseq misissoriikkatsinnut naleqquttoq eqqartorneqarpoq, angeruseq pingaaruteqartunut tamakkununnga naammaataasoq. Kristumiut anersaakkut Guutimit qitornarsiarineqartut eqqortumik ilimagaat ’Naalakkap ajortulianit tamanit aniguisikkumaaraatik annatsillutillu naalagaaffimminut qilammiittumut’. (2 Timûtiuse 4:18) Qilammi inuiaassapput kunngiullutillu palasiusut. Sunali naalagaaffigissavaat? Qilammut makitinneqarpata Kristus palasiunertut naammalluinnartutut tassaneeriissaaq. Aammattaaq qilammut nunamullu kunngitut piginnaaneqalereersimassaaq. (Tussiaat 2:6-9; sarĸúmersitat 11:15) Kunngiullutillu palasit allat sunik suliassaqassappat?

19. Angerutsit arfineq-aappaat pingaaruteqartorlu qanga qanorlu ililluni pilersinneqarpa?

19 Ukiumi 33-mi nisanip ulluisa 14-ianni, Naalakkap unnukkorsiortitsinera pilersikkamiuk ’aammigullu angerusisaaq’ eqqartorlugu, Jesusip angeruseq suli alla, matumani misissukkatta arfineq-aappassaat, eqqartorpaa. Apustilini aalajaatsut ima oqarfigai: „Ilissili uanni aalajaatsuuvusi usserneqartillunga; angerfigeqatigaassilu, soorlu Ataatama uanga angerfigeqatigigaanga, naalagaaffik pillugu, nerrivinni nerillusilu imertussanngortippassi uanga naalagaaffinni issiavissaarsuarnilu issiasussanngortillusi Israelip naggueqatigiissortai aqqaneq-marluusut eqqartuussallugit.“ (Lúkarse 22:20, 28-30, NV) Soorlu Jesus Melkizedekitut palasinngornissaminik Ataatap angerfigeqatigisimagaa, taamaalilluni Kristusip ajoqersukkani aalajaatsut angerfigeqatigai.

20. Naalagaaffik pillugu angerutsimi kikkut angerfigeqatigineqarpat, sunalu siunertaralugu? (Dâniale 7:18; 2 Timûtiuse 2:11-13)

20 Apustilit aqqanillit Jesus usserniarneqarnerani aalajaalluinnarlutik najuinnarsimavaat, angerutsillu ersersippaa issiavissaarsuarni issiassasut. Aammalu sarĸúmersitat 3:21-p uppernarsarpaa kristumiut anersaakkut Guutimit qitornarsiarineqartut aalajaatsut tamarmik qilammi issiavissaarsuarni issiajumaartut. Taamaattumik tamatumuuna 144.000-it Jesusip aavatigut pisiarineqartut tamarmik angerfigeqatigineqarput, uppernarsarlugu palasitut qilammukartinneqarumaartut ’nunamullu kunngiujumaartut’. (sarĸúmersitat 1:4-6; 5:9, 10; 20:6) Angeruseq Jesusip ajoqersukkaminut pilersitaa tamatumunnga ilaalissutigaat taassumalu naalagaaffianik naalagaaffeqalissutigalugu. Assersuunneqarsinnaavoq nuliassap akimanernik nagguillip kunngimut naalagaaffilimmut katinneranut. Taamaalilluni naalagaassusianik peqatigilersinnaavaa. — Juánase 3:29; 2 Korintumiut 11:2; sarĸúmersitat 19:7, 8.

21, 22. Angerutsit tamakkua naammassisaat pissutigalugit pilluaqqusinerit suut ilimagineqarsinnaappat?

21 Tamatumuuna inuiaat naalattut suut iluaqutigisinnaalissavaat? Kisermaassillutik naalakkersuisut qaammarsagaasut „tulluartunik aaqqiissutissarsisinnaasimanngi“tsut Jesusip 144.000-illuunniit assigissanngilaat. Akerlianilli qularunnaarsinneqarpugut Jesus palasiunerusoq ’tamatigut uatsitut usserneqartoq ajorteqarnanili’. Taamaattumik paasivarput suna pissutigalugu inuttut qajannarsutsinik naakkinnissinnaasoq sunalu pissutigalugu ’savat allat’, ’kristumiut tanitaasut’ assigalugit, Kristus aqqutigalugu Guutip issiavissaarsuanut siooranatik sassarsinnaasut. Taamaalillutik ’nallittorneqaqqusinnaapput saammaannarseqqusinnaallutillu pisariaqarfiagut ikiorneqaatissaminnik’. — Eprîarit 4:14-16; Juánase 10:16.

22 Angeruseq tunngavigalugu kunngitut palasitullu Jesusip kiffartoqatigisai aammattaaq inuiannik pilluaqquseqataassapput. Soorlu itsaq palasit Levikkuusut inuiaat Israelikkut tamarmik iluaqutissaannik kiffartuuteqarsimasut, taamatut Jesus ilagalugu qilammi issiavissaarsuarni issiallutik kiffartortut nunamiunik tamanik naapertuilluartumik eqqartuussiumaarput. (Lúkarse 22:30) Kunngiullutillu palasiusut taakku siornatigut inuttut inuusimapput, taamaattumik inuit misiginneqatigisinnaassavaat. Kinguaassap ilaanut pingaannginnerusumut ilaasut taakkua Jesus suleqatigalugu ’inuiaqatigiit tamarmik pilluaqqunarsinissaat’ isumagiumaarpaat. — Galâsiamiut 3:8.

23. Angerutsit tamakku naapertorlugit tamatta immikkut qanoq iliuuseqartariaqarpugut?

23 Guutip angerusiisa iluaqutiginerisigut inuiaat pilluaqqusaanerannut peqataarusuttut tamarmik maannakkut qaaqquneqarput. (sarĸúmersitat 22:17) Tamatumunnga peqataarusunnertik ilaatigut ersersissinnaavaat Naalakkap unnukkorsiortitsineranut, ukioq manna marlunngornermi aprilip ulluisa qulinganni seqernup tarrereernerani piumaartumut, najuunnermikkut. Jehovap Nalunaajaasuisa ilagiissaasa ilaanni nalliuttorsioqataajumaarnissannik maannakkut pilersaarusioriarit! Tassani Guutip angerusiinik suli aamma ilinniaqqissaatit qanorlu ilillutit iluaqutiginiarsinnaanerlugit paasilissallugu. (wD 1/2 89)

[Quppernerup ataani ilanngussat]

a „Allaat iluarsaanerit allannguutaalluinnarnerpaat pereernerisigut naasorissaasut piitsuuissut, akimarnit ingasattumik pisinnaatitaaffillit annikitsumillu akileraartitaasut, kiisalu taakkua akornanniittut naalakkersuinermut innuttaaqatigiinnullu naammanngitsumik suleqataatinneqartut suli taamaaginnarput . . . Kisermaassillutik naalakkersuisut qaammarsagaasut apeqqutit sumiginnarneqarsinnaajunnaalersut sulissutigileraluaraat, politikkikkut aningaasatigullu pissusiviusunut ukiuni tamakkunani atuutilereersimasunut tulluartunik aaqqiissutissarsisinnaasimanngillat.“ — Western Civilization — Its Genesis and Destiny: The Modern Heritage.

b Jesus angerusisaamut angeqataanngilaq. Taanna tamatumani akunnermiliuttuuvoq isumakkeerneqartariaqartunillu ajortuliaqarnani. Aammattaaq angeruseq tamanna iluaqutigalugu kunngiullunilu palasinngussanngilaq, tassami Davidimik angeruseq naapertorlugu kunngiuvoq kiisalu Melkizedekitut palasiussuseqarluni.

Eqqaamavigit?

□ Angeruseq Tussiaat 110:4-mi eqqartorneqartoq suna siunertaralugu pilersinneqarpa, sumillu naammassisaqarluni?

□ Kikkut angerusisaamut ilaappat, qanorlu ililluni inuiannik kunngiullutillu palasiusunik pilersitseqataava?

□ Suna pillugu Jesusip ajoqersukkani nammineerluni angerfigeqatigai?

□ Angerutsit arfineq-marluk suut misissoreerpavut?

[Qupp. 9-mi diagrammi]

(Allassimasut qanoq inissisimanersut naqitami takuneqarsinnaavoq)

Angeruseq Edenimi pilersitaq 1 Môrsase 3:15

Abrahamimik angeruseq

Inatsisinik angeruseq

Naalagaaffik pillugu Davidimik angeruseq

Melkizedekitut palasiussuseq pillugu angeruseq

Kinguaassaq pingaarneq

Kinguaassaq pingaannginnerusoq

Naassaanngitsumik pilluaqqusaanerit

[Qupp. 11-mi diagrammi]

(Allassimasut qanoq inissisimanersut naqitami takuneqarsinnaavoq)

Angeruseq Edenimi pilersitaq 1 Môrsase 3:15

Abrahamimik angeruseq

Inatsisinik angeruseq

Angerusiaaq

Naalagaaffik pillugu Davidimik angeruseq

Melkizedekitut palasiussuseq pillugu angeruseq

Kinguaassaq pingaarneq

Qilammi naalagaaffik pillugu angeruseq

Kinguaassaq pingaannginnerusoq

Naassaanngitsumik pilluaqqusaanerit

    Kalaallisut (1985-2025)
    Aniffissaq
    Iserfissaq
    • Kalaallisut
    • Ingerlateqqiguk
    • Inissiissutit
    • Copyright © 2025 Watch Tower Bible and Tract Society of Pennsylvania
    • Atuinermut piumasaqaatit
    • Paasissutissanik atueriaaseq
    • Nammineq inissitassat
    • JW.ORG
    • Iserfissaq
    Ingerlateqqiguk