Bibelimik atuarnermi pingaarnersat: Aamorse 1:1–9:15

Inuiaqatigiit nungunnerat

’PIGINNAANNGORSARIT Guutit naapikkiartussallugu,’ ’Jehova katersaarsuit Guutiat’ inuiaqatigiinnut Israelikkunnut taama oqarpoq. (Aamorse 4:12, 13) Taama oqarneranut suna peqqutaava? Peqqutaasoq tassaavoq pigissaarnertik tappiissutigalugu Israelikkut Guutip inatsisaanik puiuisimanerat taassumalu nunaanik illernartumik guutipilussiornermikkut, kanngunartuliortarnermikkut, aammik kuisisarnermikkut nakuusernermikkullu mingutsitsisimanerat.

Amos Jehovamit pruffiitinngortinneqarpoq nammineq inuiaqatiminik, Judakkuinnaanngitsunik pingaarnerusumilli avannaani naalagaaffimmik, Israelikkut piannik, tusarliussamik mianersoqqussutaasumik tusarliisussatut. Israelip imminut nuannarisumik inooriaasia pillugu pruffiitip avoqqaaraa akeqqaminillu nungutitaajumaarnissaa siulittuutigalugu. Aamorsip agdlagai-sa, 829-p 804-llu u.n.a.s. akornanni allanneqarsimasut, nalunarunnaarsippaat Guutip ajunaarnersuarnik nalliukkumaartussanik siulittuutiginnissinnaasoq, allakkat tamakku aammattaaq mianersoqqussutinik piffissaasukkut naleqquttuusunik imaqarput.

Guutip akeraasa innermik aserorneqarnissaat

Guutip eqqartuussutaanit aniguisoqarsinnaanngilaq. Tamanna erseqqilluinnartumik aalajangiunneqarsimavoq inuiaat Damaskus (imaluunniit Syria), Gaza (imaluunniit Filisterit nunaat), Tyrus, Edom, Ammon, Moab kiisalu Juda pillugit! Jehovap ’uterianngissutigai’, tassa ajortuliorsimaneri pissutigalugit pillanngitsuussanngilai. Inuiannulli taakkununnga ajunaarnissamik sioorasaarinerup erseqqissaannarpaa Israelip Guutimik angeruseqarfiginninnerminik aalajangiussisimannginnini taassumalu inatsisaanik maleruaannginnini pissutigalugit eqqartuunneqarnissaa. — Aamorse 1:1–2:16.

Guutip mianersoqqussutaanik pingaartitsigit. ’Ilissi kisissi ilisarilluarpassi nunami eqqarleriissunit tamanit,’ Jehova Israelikkunnut taama oqarpoq. (Aamorse 3:2) Ajortumilli ileqqoqarnermikkut Guutip aqqanik kisimilu oqartussaaneranik asissuinertik ersersippaat. Ilarpassuisa pisuunngornissartik anguniagaraat, napaannartumik inooriaaseqarusukkamik ’illoqarlutik ukiiviusunik aasiviusunillu’, qatanngutitik iluanaarniapiluffigalugit. (Aamorse 3:15) Oqimaaluttat salloqittaataasut atorlugit namminissarsiorlutik piitsut peqqusersiorfigisarpaat. Eqqortumik pallorfiginninneq taamaatikkamikku Jehovap pillaaneranit eqqorneqartussanngorput. Taamaattorli Jehova ’sumik sulisarinngilaq, kisianni kiffaminut anngiiaqqaaruniuk’. Taamaattumik Jehovap eqqartuussutaata naammassineqarnissaa Amosip siulittuutigaa mianersoqqusillunilu oqarluni: ’Piginnaanngorsarit Guutit naapikkiartussallugu.’ — Aamorse 3:1–4:13.

Jehova annassutaavoq

Guutip allamik isumataartut naakkinnittuliorfigissavai. ’Ujarsinga, taava inuujumaarpusi,’ Jehovap Israelikkut kimittusaarluni oqarfigai. (Aamorse 5:4) ’Ajortoq uumigisiuk, ajunngitsoq asasiuk.’ (Aamorse 5:15) Oqaatsilli tamakku sumiginnarneqarput. Tunussisimasut Betelimut Gilgalimullu, guutipilussiorfiusunut, majuartarumanerupput, guutipilunnut pilliiartorlutik. (Aamorse 5:26; 1 kúngit 12:28-30) Israelikkut inuulluarumatuut ileqqorluttullu naparliinnarlutik nalaasaarfinni nagguaatsup tuugaanik pinnersagaasuni nalasarput pitsaaqisunik viinnisorsuataajutigalutik nerisassanik pitsaaqisunik nerersuataajutigalutik uuliamillu pitsaanersiukkamik tanillutik. (Aamorse 5:11; 6:4-6) ’Jehovap ullua’ qanillivoq, ’imminillu [tarnerminik, NV] naqqissigaluni’ Guuti uppernarsaasimavoq Israel piuneerukkumaarlugu. (Aamorse 5:18; 6:8) Jehovap inuiaat Israelimik naqisimannikkumaartussat aallarussiumaartussallu makitissavai. — Aamorse 5:1–6:14.

Jehova mianerisiuk, naqisimannittut ersiginagit. Israelip piuneerunneqarnissaa pillertarpassuarnit atugarliortitaanikkut imaluunniit innermik nungutsilluinnartumik naammassineqarsinnaagaluarpoq. Amosilli Israel qinnummagu Jehovap eqqartuussunni ’peqqissimissutigaa’, tamakkulu atorlugit naammassinagu. Soorluli illuliortup illuliami qarmaa makittarinnersoq makittarissaat atorlugu misissortaraa, taamatut Jehovap Israelikkut ’qaangiinnarumajunnaassavai’. (Aamorse 7:1-8) Inuiaqatigiit taakku piuneerunneqartariaqarput. Pruffiitip tusarliussaa kamaatigingaaramiuk, Amazjap, nersussuaaqqamut guutipilussiornermik palasiusup, Amos sallulluni killuussisuunerarpaa ’peeqqullugulu Judap nunaanut qimaaqqullugu’ Betelimilu siulittuiunnaaqqullugu. (Aamorse 7:12, 13) Tamatumannga Amos qunutinneqarpa? Naagga! Amazjap toqunissaa taassumalu ilaqutaasa ajunaarnissaat qunusuilluni siulittuutigai. Soorlu paarnat katersuiffiup nalaani katersorneqartartut, aammattaaq Jehovap Israel nassueqqusariaqalerpaa. Aniguisoqassanngilaq. — Aamorse 7:1–8:14.

Jehovamik tunaarinnittut neriuutissaqarput. ’Taamaattoq Jakobikkut nungulluinnassanngilakka,’ Jehova oqarpoq. Jakobip kinguaavisa ilaannut suli neriuutissaqarpoq, ajortuliortartunuunngitsorli. Taakkua nungunnissaat ingalanneqarsinnaanngilaq. Jehovalli ’innuttami Israelikkut aallarussartaat utersarumaarpai’. — Aamorse 9:1-15.

Ullutsinnut ilinniagassat: Guutimut akerartuisut toqumut pillagassanngortinneqarumaarput. Guutilli tusarliuteqqusaanik mianersoqqussutaasumik ilassinnittut allamillu isumataartut Jehovamit naakkinnittuliorfigineqassapput inuuginnassallutillu. Guuti mianerigutsigu, assortuisut taassuma piumasaanik iliorniarnitsinnik akornusissanngilaatigut. (wD 1/4 89)

[Qupp. 7-mi ungalusaq]

ALLASSIMAFFIIT PILLUGIT OQAASEQAATIT

○ 1:5 — Itsarsuaq illorpassuaqarfiit portusuunik qarmaqartarput angisoorujussuarnillu isaaffeqarlutik. Isaaffiit sannerutinik takisuunik saviminiusunik kanngussaasaasunilluunniit parnaarsaateqartarput. ’Damaskusip matuisa sannerussui nallorneqassasut’ tassaavoq Aramæerit illoqarfiisa pingaarnersaat, Damaskus, Assyriamiut sakkutuuinit artorsartinneqassasoq. Sannerussuisa aserorsimaneri pissutigalugit illoqarfiup isaaffii parnaarneqarsinnaanngitsutut issapput. — 2 kúngit 16:8, 9.

○ 4:1 — Arnat inuulluataarumatuut Samariami najugaqartut taaneqarput ’ussigit Basanimi puallarsakkat’. Nersutit mangiarfii naggorissut Basanimiittut uumasuutinik pitsaaqisunik kinguaassiortitsiffiulluartarsimapput. (5 Môrsase 32:14; Hisĩkiale 39:18) ’Ussigit Basanimi puallarsakkat’ namminissarsiortut taakkua ’naalakkatik’, imaluunniit uitik, kimigiiserfigisarsimannguatsiarpaat piitsut aningaasaataannik arsaaqqullugit namminneq ’illutik tuugaartalersugaasut’ pequtilersorsinnaajumallugit. (Aamorse 3:15) Taamaaliornerili Guutip akiniaaneranik kinguneqarput.

○ 4:6 — Oqaatsit ’kukkaatsunik kiguteqarneq’ paasineqarsinnaapput oqaatsinit naligisaminnit ’neqissamik ajorsarneq’-mit. Ullut kaannersuaqarfiusut pineqarunarput, nerisassaqannginneq pissutigalugu kigutit kukkaqanngimmata. Jehovap naggueqatigiit qulit naalagaaffiannik iluarinninnginnini ersersissimagunarpaa kaannersuarmik nalliutitsinermigut, soorlorpiaq qangarujussuarli tamanna sioorasaarutigisimagini. (5 Môrsase 28:48) Tamatumaluunniilli imaluunniit Guutip eqqartuussineranik ersersitsinerit allat inuit angerfigeqatiginninnermik unioqqutitsisut uummataat sunnersimanngilaat. — Aamorse 4:6, 8-11.

○ 5:2 — Amosip siulittuumminik oqaluutiginninnerata nalaani inuiaqatigiit Israelikkut imaluunniit taakkua nunaat pissaanilissuarnit allanertanit suli naqisimaneqarsimanatillu ajoquserneqarsimannginnamik niviarsiatut angummit attorneqarsimanngitsutut taaneqarsinnaapput. Ukiorpaalunnguilli qaangiuppata niviarsiaq Israel Assyriamiunit tigusarineqartussaavoq ’Damaskusillu ungataanut aallarunneqassalluni’. (Aamorse 5:27) Israelip ilumuunngitsuliornini pissutigalugu piuneerunneqarnissaa Amosip qularutiginngingaaramiuk pereersimasutut eqqartorpaa.

○ 7:1 — ’Kunngip killuisitai’ tassaannguatsiarput kunngip imminut tunniunneqaqqusai uumasuutimi sakkutuumilu hestiisa nerisassaat. Kunngip pisassai siulliullugit tunniunneqartussaasarput, katersallu sinneri inuit namminneq pisassaraat. Tamannali suli pinngitsoq pillertarpassuit tikiupput iviillu kingoqqutsisut nerillugit.

○ 8:2 — Aasap paarnai katersuiffiup naalernerani katersorneqartarput. Nunaleriffiup ukiuata naalernera assersuutaavoq Israelip nungulerneranut. ’Qaangiinnarumajunnaarpara,’ Jehova oqarsimavoq. Guutip Israelikkunnut eqqartuussutaata naammassineqarnissaanut piffissanngorsimavoq.

○ 9:7 — Siuaasaat ilumoortut pissutigalugit Jehovap Israelikkut qinersimavai, siuaasaat Ægyptenimi inussiaajunnaarsillugit, Kana’anillu nunaani najugaqalersillugit. Tamakkuli usorsisimaarutigisussaanngilaat, iluaatsuliornitik pissutigalugit Kusjikkunnit (Ætiopiamiunit) pitsaanerunnginnamik. (Naleqqiuguk Rûmamiut 2:25.) Israelikkut Ægyptenimit aniguisinneqarsimanerat Guutimit iluarisaajuarnissaannut qulakkeerutaanngilaq, soorluttaaq Filisterit Assyriamiullu nunavigisimasaminni najugaqarunnaarnerat sumulluunniit qulakkeerutaanngitsoq. Ataataanerpaanik ilumoortunik siuaasaqarnertik Israelikkut annaanneqaatigisinnaanngilaat. Guutip piumasaanik naammassinninniaruni aatsaat inuk Guutimut iluarisaalluni attaveqarsinnaavoq. — Aamorse 9:8-10; apustilit suliait 10:34, 35.