Bibelimik atuarnermi pingaarnersat: Malakia 1:1–4:6

Naalagaq ilumoortoq eqqartuussiartorluni aggerpoq

’GUUTI kiffartuukkaluarlugu asuleernarpoq.’ (Malakia 3:14) Ukiut hundredellit tallimassaanni u.n.a.s. Malakiasip siulittuinerani Guutip nammineq innuttai taamatut qularpasillutik oqaaseqarput. Sooq? Pissutaasoq tassaavoq Judami, ingammik palasit akornanni, pissutsit assuarnaqisut atuunnerat. Taakku namminiinnaq iluanaarnissartik pingaarnerutippaat. Upperisarsiornikkut siulersuisut taakku ilumoortuusaarniartut Malakiasip toqqaannartumik kimittuumillu qulaarpai Naalakkallu ilumoortup eqqartuussiartorluni aggernissaanik sioorasaarlugit. — Malakia 1:6-8; 2:6-9; 3:1.

Malakiasip siulittuutaa aammattaaq ullumikkut eqquuppoq. Taamaattumik silatusaassaagut tamatuma sumik ilinniarfigisinnaanera eqqarsaatigigutsigu.

Guutip aqqa asissorneqartoq

Piminnik pitsaanerpaanik innuttami imminut pilliuteqarnissaat Jehovap naatsorsuutigaa. Siullermik innuttaminut asanninnini Guutip oqaatigaa. Taamaakkaluartorli palasit nersutinik tappiitsunik, napparsimasunik tusiattunillu inuit pilliutissamissut aggiussaannik tigusisarnermikkut Guutip aqqanik asissuinermik ersersitsisarput. Palasit namminissarsiortut imaluunniit imminut pilliutipalaavi Jehovap iluarinngilai. Qanorluunniilli ilioraluarpata Jehovap aqqa ’inuiaat akornanni mianernarsiumaarpoq’. — 1:1-14.

Ajoqersuisut annertuumik akisussaaffeqarput. (Jâko 3:1) Palasinit ’amerlasuut naakkiutsinneqartarsimapput inatsisitigut’. Qanoq ilillutik? Inuit Guutip inatsisaanik ilinniartinngitsoornerisigut, aammalu inunnik nakerisarsiortuunermikkut. Jehovap eqqortumik pilluni kamaappai, tassami ’palasip qarluisa inuit ilisarsisuerutsaalisussaagaluarmagit, inatsisillu apeqqutigineqartussaagaluarmata taassuma qarnanit’. — 2:1-9.

Aappariinnermik aaqqissuussaanermik ilaginnaasut Jehovap saamasumik isiginngilai. Guutip inatsisaanut akerliusumik Judap angutitai takornartanik nuliarsimapput. (5 Môrsase 7:3, 4) Inuusuttuunerminni nuliarilikkamik avinnerisigut taakkununnga ilumuunngitsuliorsimapput. Jehovap ’avinneq uumigaa’, (v. 16, NV) Malakias mianersoqqusivoq. — 2:10-17.

Eqqartuussineq akuiaanerlu

Ajortuliortut Jehovap naassaanngitsumik akaarinavianngilai. „Angeruseq pillugu aallartitaq“ (NV) ingiallortigalugu „Naalagaq ilumoortoq“ naalaffimminut tikiukkumaarpoq. Levip erneri akuiarlugillu minguiarumaarpai. Jehova angakkunut, arnaaneqartunut, sallullutik uppernarsaasunut, salloqittaasunut qunutitsisunullu pinasuartumik ilisimannittuujumaarpoq. — 3:1-5.

Jehovamut pilliuteqanngitsoortut imminnut piitsunngortipput. Jehova allanngorneq ajorpoq. Inuit uteriitsut imminut saaqqikkaluarpata naakkinnilluni uterfigeqqissagaluarpai. Katersukkamik qulinginik tunissutinillu tunisinngitsoornermikkut Guutimit tillissimapput. Jehovalli neriorsorpai katersukkamik qulinginik qimatulivissuarmut ilisisaleqqippata ’pilluaqqungaarumaarlugit’. Katersuilluartarumaarput. — 3:6-12.

Jehovap innuttani nakkutigai. Guutip imminut sukannersumik oqaluttut avoqqaarai. Tamatuma akerlianik imminik mianerinnittut tusarnaartarpai. ’Mappersakkat puiornaveeqqutit’ allanneqassapput ’aqqanik eqqaamasut pillugit’. Innuttai naapertuilluartunik guutiitsunillu immikkoortitsisinnaassapput. — 3:13-18.

Jehovap ullussaa nalliutissaaq!

Jehovap ullussaa tassaassaaq guutiitsunik piuneerutitsilluinnarfissaq. Jehovap ullussaa nalliutissaaq, guutiitsullu karriiarnikutut uutsivimmiittutut piuneerunneqassapput. ’Tunngavimmilluunniit avaleqummilluunniit amiakkuerullugit’ nungunneqassapput. Jehovalli aqqanik mianerinnittut ’seqernup iluarsuseqarfissap’ sunniutai iluarsinartut iluaqutigisinnaassavaat. Ullussarsuup tamatuma mianernartup nalliutinnginnerani Jehovap pruffiitini Elias aallartissavaa atulersitseqqinnermik suliaqartikkiartorlugu. — 4:1-6.

Ullutsinni ilinniagassat: Pallorfiginninneq eqqarsaatigalugu Jehovap piumasaraa innuttami piminnik pitsaanerpaanik tunissagaanni. (Naleqqiuguk Matîuse 22:37, 38.) Guutip oqaasianik ilinniartitsisut akisussaaffigaat ajunngitsumik ilinniartitsinissartik eqqortumillu pallorfiginninnermik siulersuinissartik. Eqqaamasariaqarparput aappariinnermut ataqqinninngitsuliortut eqqunngitsumillu iliortut Guutip naapertuilluartup arajutsisimanngimmagit. ’Jehovap ulluata angeqisup siooranartup nalliunnissaa’ utaqqiitigalugu maniguulluta Naalakkamit ilumoortumit akuiarneqartillutalu minguiarneqartinniarta! (wD 1/7 89)

[Qupp. 16-mi ungalusaq]

ALLASSIMAFFIIT PILLUGIT OQAASEQAATIT

○ 1:10 — Palasit namminissarsiortuullutillu aningaaserituut namminneq iluanaarutissaannartik pillugu naalaffimmi sulisimapput. Naalaffimmi suliassanut annikinnerpaanulluunniit, soorlu matut matoorartarnerinut imaluunniit tunisiviup ikittarneranut, akissarsinissartik piumasarisarsimavaat. Taamaattumik tupinnarpallaanngilaq taakkua ’tunissutaat neqissat assaasa ilisaat Jehovap nuannarinngimmagit’!

○ 1:13 — Pilliisarnerit ileqqulersuutitut qatsunnartutut, nammakkersuutaasutut, palasinit ilumuunngitsunit isigineqalersimapput. Taakkua Jehovap naalaffiutaani iluartuutitat sorlummiffigisarpaat, imaluunniit asissortarlugit. Uagut ’qarlutsinnik ussigit tunissutissat’ tunissutiginissaat ileqqulersuutaannartut isiginaveersaartariaqarparput. — Húsia 14:3; Eprîarit 13:15.

○ 2:13 — Angutit juutiusut amerlasuut inuusuttuutillutik nuliarilikkatik avippaat, immaqa arnanik guutimik nalusuneersunik inuusunnerusunik katikkumallutik. Jehovap tunisiviutaa qullinik ulikkaarpoq — qularnanngitsumik arnat avitaasut Guutimut aliasuffiginnikkiartorlutik illernartuummukarsimasut qulliinik. — Malakia 2:11, 14, 16.

○ 3:1 — „Naalagaq ilumoortoq“ tassaavoq Jehova Guuti, taavalu „angeruseq pillugu aallartitaq“ (NV) tassaalluni Jesus Kristus. Siulittuutip eqquunnera siulleq pivoq Jesusip naalaffik minguiarmagu. (Mákorse 11:15-17) Tamanna pivoq kunngitut toqqakkatut taninneqarneranit ukiut pingasut affarlu qaangiuttullu. Taamatuttaaq Jesusip, 1914-imi ukiakkut kunnginngortinneqarnerminit ukiut pingasut affarlu qaangiuttullu, Jehova anersaakkut naalaffimmut ingiallorpaa paasillugulu Guutip innuttai akuiarneqarnissamik minguiarneqarnissamillu pisariaqartitsisut.

○ 3:2, 3 — Itsaq akuiaaneq sivisuumik pisarsimavoq. Taamaattumik saffiugassamik aatsitsisoq ’issiagajuttarpoq’ saffiugassap aassimasup qaava qillertuinnanngorluni tarrarsorfissaannanngornissaata tungaanut. Taamatorluinnaq Jehovap ullumikkut kiffani akuiartuarpai, ajoqersuutit iliuutsillu minguttuut piiartarlugit. Tamatuma Guutip innuttai ikiorpai Guutimut assingunerulerniarneranni. — Evfisumiut 5:1.

○ 4:2 — Pilluaqqussutissanik Guutip aqqanik mianerinnittut piumaagassaannik tamanna eqqartuineruvoq. Timikkut, isumakkut misigissutsikkullu nappaatit, inunnut naalliuutaasimaqisut, peerneqarpata Guutimit iluarisaanerup seqernanit iluaqutiginnilissapput. — sarĸúmersitat 21:3, 4.

○ 4:5 — Siulittuutip tamatuma saqqummiunneqarnissaa ukiunik 500-nik sioqqullugu pruffiiti Elias inuusimavoq. Ukiuni hundredelinni siullerni u.n.a.k. Johannes Kuisisoq tassaasoq Elias siulittuutaasoq Jesusip nalunaarutigaa. (Matîuse 11:12-14; Mákorse 9:11-13) Kisiannili ’Elias’ ’Jehovap ullua’ sioqqullugu takkuttussaasimavoq, tamatumalu ersersippaa maanna Kristusip ’najuunnerani’ aammalu eqquukkumaartoq. — 2 Tásalûníkamiut 2:1, 2.

[Qupp. 15-mi assiliartaq]

Nunami kiffartornermini Jesusip naalaffik minguiarpaa. 1918-imi Jehova ingiallorlugu anersaakkut naalaffimmut tikiuppoq Guutip innuttai minguiariartorlugit