Paratiisimi siunissaq — naak inuit naalanngitsulioraluartut
1. Piffissangaatsiaq ingerlareersorlu inuit aappariit siulliit sumi avatangiisinilu qanoq ittuni ippat?
PIFFISSAQ ingerlareerpoq. Piffissaq angutip arnallu atisaqaratik kanngusunnatik angalaarfiat naavoq. Maanna nersutip amiinik takisuunik atisisimapput. Edenip naatsiiviata naammalluinnartup silatinnguani qeqarput — naatsiivik tunullugu. Siunerminniittoq isiginnaarpaat: Isigisaat tamarmi nunaavoq sanarfineqanngitsoq. Malunnarluarpoq nuna tamanna kakillarnaqutinik naasupilunnillu kapinartunik ulikkaartoq Guutimit pilluaqqusaanngitsoq. Nuna tamanna tassaannginnerpa inunnut naalagaaffigisassanngortinneqarsimasoq? Ilumut, naatsiivilli nunamut sanarfineqanngitsumut alliartortinniarnagu maannakkut naatsiiviup silataani ipput.
2. Sooq Paratiisip naatsiivianut iseqqinniarsarinngillat?
2 Sooq takusartik tamanna nukillaajummernartoq Paratiisip naatsiivianut utissutiginngilaat? Oqaannarluni pineq ajornarmat. Malugikkit tunuanni naatsiiviup isaariaaniittut. Kerubit — pinngortitat naatsiivimmiluunniit takusimanngisaannagaat — panarlu ikumasoq kaavittuartoq. Angut arnarlu taakku saneqqullugit uumallutik naatsiivimmut isersinnaanngilluinnarput! — 1 Môrsase 3:24.
3. Pissutsit inuit aappariit siulliit atugaat sooq taama allanngortigaat?
3 Susoqarsimasoq-una? Tamanna tassaanngilaq paasiuminaatsoq ilisimatuut ukiuni tuusintilippassuarni paasiniaqqissaartariaqagaat, nassuilluinnartumimmi nassuiaatissaqarpoq. Neriorsuutit nuanningaartut inuit aappariit siulliit ullormi katiffimminni Guutimit suliassinneqarnerannut attuumassuteqartut eqquussinnaasimassagaluarput Ataatartik qilammiusoq naalalluinnarsimasuuppassuk. Naalalluinnarnissaat inerteqqutikkut ataasiinnakkut misilinneqarpoq: ’Orpiup ajunngitsumillu ajortumillu sianinartup’ paarnaanik nerissanngillat. (1 Môrsase 2:16, 17) Guutip inerteqqutaata akerlianik iliorunik toqussapput. Adamip, Guutip pruffiitiata, nuliani, inuit pinngortitaasut nukarlersaat, tamatuminnga oqaluttuuppaa. Tupaallannartumilli nachasjʹ, pulateriaarsuk, oqarpoq Guutip Adam ’orpiup ajunngitsumillu ajortumillu sianinartup’ neriffiginissaanik mianersoqqugamiuk oqaasii ilumuunngitsuusut. Pulateriaarsuup arnaq salloqittarlugu uppilersippaa Guutip inatsisaanik unioqqutitsiguni paarnamillu neriffigeqqusaanngitsumik neriguni Guutitut iliumaartoq Guutilu ikiortiginagu suup ajunngitsuunera suullu ajortuunera nammineq aalajangersinnaalissagaa. — 1 Môrsase 3:1-5.
Oqaluttualiatoqaannaanngitsoq
4, 5. Sukkut takuneqarsinnaava pulateriaarsuup arnamik siullermik tammartitsineranik oqaluttuaq Paulusip oqaluttualiaannartut isiginngikkaa?
4 Upperiuminaappa? Oqaluttualiatoqaannartut piviusunik tunngaveqanngitsutut taamaattumillu inunnit muteerniullutillu qaammaasaqarluarlutillu inersimasunit akuerineqarsinnaanngitsutut nipeqarpa? Suli amerlasuunit atuarumaneqartunik allattoq, apustili immikkut qinigaasoq allakkaminillu qularnaveeqqusiisinnaasoq, apustili Paulus, taama isumaqanngilaq. Ilagiinnut illoqarfimmi silamiorpaluttumi, Korinthimiittunut, kristumiunik inersimasunik ilaasortaqartumut taanna allappoq: ’Ernumavunga, soorlu pulateriaarsuup peqqusersuulluni Eva salloqittaraa, taamattaaq ilissi eqqarsaatisi aserussasoralugit Kristusimut peqqusersuikkunnaarsillusi.’ — 2 Korintumiut 11:3.
5 Korinthimiut, grækerit upperisaata oqaluttualiaataannik ilisimannilluartut, oqaluttualiaannarmik innersuullugit Paulusip pingaarnerutitaminik erseqqissaaffigiumanavianngilai. Allakkat Hebræerisuut, ’Guutip oqaasiatut’ nalunaarutigisani, issuaaffigalugit Paulusip uppernarsarpaa ’pulateriaarsuup peqqusersuulluni Eva salloqittarsimagaa’. Kristumiumut nakkutilliisuusumut ’oqaatsinik peqqissinartunik’ ajoqersuinissamik akisussaaffeqartumut allakkamini aammattaaq ima allappoq: ’Adam siulliulluni inuliaavoq, Eva tulliulluni. Aammattaaq Adam salloqittagaanngilaq, arnarli salloqittagaalluni unioqqutitsisunngorpoq.’ — 1 Tásalûníkamiut 2:13; 2 Timûtiuse 1:13; 1 Timûtiuse 2:13, 14.
6. (a) Adamip Guutimut unioqqutitsinerata Evap unioqqutitsineranit suna allaassutigaa? (b) Sooq qularutigissanngilarput Eva salluliornani pulateriaarsuk oqaluttuarigaa?
6 Arnap pulateriaarsummit tammartitaanera oqaluttualiaannanngilaq, piviusuullunili, naalanngilluni paarnamit neriffigeqqusaanngitsumit nerinerata kingunerisaatut ersaritsigisumik. Guutip inatsisaa unioqqutereeramiuk aammattaaq uini paarnamik nerinissaanik usserpaa. Uiali taamaaliorami imaanngilaq salloqittarneqartoq. (1 Môrsase 3:6) Kingorna Guutimut nassuiaataat ima oqaluttuarineqarpoq: ’Adamilu oqarpoq: „Arnap uannut aapparititavit tassannga orpimmit tunimmanga nerivunga.“ Taava Guutip Jehovap arnaq oqarfigaa: „Sooq taamaaliorpit?“ Arnarlu oqarpoq: „Pulateriaarsuup salloqittarmanga nerivunga.“’ (1 Môrsase 3:12, 13) Arnaq salluliorluni nachasjʹ-imik, pulateriaarsummik, oqaluttuanngilaq, Jehova Guutilu salloqittarneqartutut qisuarianngilaq. Pulateriaarsummik samminninnerata ersersippaa arnamik salloqittaalluni Imminut, Guutiminut Pinngortitsisiminullu, ajortuliortitsinermi pulateriaarsuk atorneqarsimasoq. Pulateriaarsummik oqaluttualiaannarmik samminninnissaq Guutip ataqqinassusianut naleqqunnavianngikkaluarpoq.
7. (a) Guutip pulateriaarsuk qanoq eqqartuuppaa? (b) Pulateriaarsuup arnamik siullermik salloqittaasup qanoq ililluni uaguttaaq salloqittarsinnaavaatigut? (Ataani ilanngussaq oqaseqarfigiuttaaq.)
7 Pulateriaarsummik Edenip naatsiivianiittumik Guutip eqqartuussutaa oqaluttuami ima eqqaaneqarpoq: ’Taava Guutip Jehovap pulateriaarsuk oqarfigaa: „Taamaalioravit, perloqqunarsiit nersutaatinit tamanit, narsallu nersutaanit tamanit; nassannik angalassaatit, issortortarlutillu inuunerit tamaat naallugu. Akerariissikkumaarpassilu illillu arnarlu, illit kinguaassat taassumalu kinguaassaa; taassuma niaqqut aserortissavaa, illilli kimmia aserorterumaarpat.“’ (1 Môrsase 3:14, 15) Eqqartuussisut ilumoorussisut kikkulluunniit oqaluttualiat ilumuunngitsut pinnagit pisimasuiilli uppernarsaatissallu piviusut kisiisa sammiumasarpaat. Jehova Guutip pulateriaarsuk oqaluttualiaannaq eqqartuutinngilaa, taamaalioraluarunimi imminut kanngunarsassagaluarami, pulateriaarsulli piviusoq, pinngortitaq piusoq iliuutsiminut akisuussaatinneqarsinnaasoq, eqqartuuppaa. Alianassagaluarpoq pularteriaarsuup tammartilluta uppertilersuuppatigut piusimanngisaannarluni, oqaluttuaq oqaluttualiaannaasoq pulateriaarsullu nunami maani pisunut akisussaatinneqarsinnaanngitsoq.a
8. Guutip arnaq qanoq eqqartuuppaa, kinguaassaanullu arnanut tamanna qanoq kinguneqassava?
8 Pulateriaarsuk pillugu arnap oqaasi ilumoorput, taamaattumillu arnaq pillugu allassimavoq: ’Arnaq oqarfigaa: „Amerlisangaarumaarpakka erloqissutitit naartuleraangavit; anniarlutit ernisarumaarputit; kajungerisallu uinniissavoq, taannalu ilinnut naalagaassavoq.“’ (1 Môrsase 3:16) Pilluaqqussut Adamimut katinnerani Guutip oqaatigisaa taamatut oqaasertaqanngilaq. Guuti oqarsimavoq: ’Kinguaassisarlusi amerliartoritsi nuna tamakkerlugu.’ (1 Môrsase 1:28) Inunnut naammalluinnartunut aappariinnut suliassiissut pilluaqqusaasoq tamanna arnamut naartunerpassuarnik pisariaqanngitsumik anniarnertaqanngitsunik nallisitserujussuarnernilluunniit ilaqanngitsunik kinguneqassagaluarpoq, aammalu uiminit naqisimaneqarneranik kinguneqarnaviarani. Arnamut ajortuliortumut taassumunga eqqartuussut paniinut taakkualu paniinut, kinguaariinnit kinguaariinnut, sunniuteqassaaq.
Adamimut eqqartuussut Guutip inatsisaanut ataqqinaataavoq
9, 10. (a) Guutip Adam toqqaannartumik qanoq mianersoqqusimavaa, Guutillu oqaatsini aalajangiusimaannarpagit qanoq pisoqassava? (b) Guutip Adam qanoq eqqartuuppaa?
9 Arnap angut ajortuliornermigut peqataalersitani ilagalugu atugassai qanoq allanngorpat? Angut taanna Guutip toqqaannartumik oqarfigisimavaa: ’Orpik ajunngitsumillu ajortumillu sianinartoq neriffigissanngilat; massa neriffigigaluarukku toqumik toqujumaarputit.’ (1 Môrsase 2:17) Eqqartuussisup, Guutip, pillaat tamanna sukannersoq aalajangiusimajuaannassanerpaa, naak Adamip eqqunngitsuliaa tassaannaasoq paarnamik ooqattaarineq? Pillaatip kingunerisassaa eqqarsaatigeriaruk! Adamip Evallu katinnerminni siunissamik takorluugaannik aseruissaaq, siunissamik kinguaassaminnik naammalluinnarlutillu inuusuttuujuartunik nunarsuarmilu paratiisiusumi Guutiminnik Ataataminnillu qilammiusumik eqqisseqateqarlutik naassaanngitsumik inuusussanik nunarsuup ulikkaarneqafigisaanik aseruissalluni! Inuiaat siuaasaannik siullernik nunamiusunik sukannersumik Guutip toqumik eqqartuussinermigut inuiannik najugaannillu nunamiittumik nammineq siunertarisani nuanningaartoq maangaannartikkumaneramiuk? Guutilli eqqartuussummik aalajangiinera Bibelimi allassimasoq tusarnaariaruk:
10 ’Adamilu oqarfigaa: „Nuliavit nipaa naalakkakku, nerillutillu orpimmit neriffigeqqunngisannit: nuna perloqqunarsili illit pillutit; naalliullutit inuutissarsiorfigissavat inuunerit tamaat naallugu. Kakillarnaqutinik naasupilunnillu naggorlussavoq ilinnut, nerissavatillu narsami naatsiiat. Kiammiullutit neqissarsiussaatit nunanut uternissat tikillugu, tassannga tigusaagavit; massa issuuvutit, issunngussallutillu kingumut.“’ — 1 Môrsase 3:17-19.
11. Apeqqutit naalassutsimut tunngasut suut ersersippaat Guutip Adamimut eqqartuussutaa tunngavissaqarluartuusoq?
11 Angummut toqumik eqqartuussut tamanna aalajangiunneqarpoq Guutip siunertaanut qanoq sunniuteqarnissaa apeqqutaatinnagu, siunertamut: nunarsuaq paratiisiulissasoq angutinik arnanillu naammalluinnartunik asaqatigiillutik eqqisseqatigiillutillu najugaqatigiittunik nunarsuarlu tamakkerlugu naatsiivimmik naassaanngitsumik sanarfillutillu paaqqutarinnittunik inoqartoq. Angutip nuliami oqaasii naalappai, Guuti ’orpimmik ajunngitsumik ajortumillu sianinartumik’ imminik neriffiginneqqusinngitsoq naalannagu. Aammalu Guutimi Pinngortitsisimilu nipaa nammineq naalannginnamiuk taava ilimanarsinnaanerpa meeqqani Guutimut naalannissaannik ilinniartissinnaassagai? Taassuma maligassiaa Jehova Guutimut naalannissaminnut kajumississutigisinnaassanerpaat? — Naleqqiuguk Sâmualip agdlagai sujugdlît 15:22.
12, 13. (a) Adamip ajortuliornera kinguaavinut qanoq kinguneqassava? (b) Sooq Adam Paratiisimi, imaluunniit nunami, naassaanngitsumik inuusariaqanngila?
12 Adamip naammalluinnartuugallarami iliorsinnaasimaneratut meeraasa Guutip inatsisai naammalluinnartumik maleruarsinnaassanerpaat? Sanngiissutsi Guutillu nipaanut naalanngilluni allanut tusarnaarusunneroriartarnini kinguaariinni pissutsit kingornunneqartarnerannut Guutip inatsisai tunngavigalugit qitornaminut kingornussiaritissannginnerpai? Oqaluttuami tamakku tamarmik akineqarput. — Rûmamiut 5:12.
13 Angut — inuk alla pissutigiinnarlugu — naalalluinnassutsiminik Guutimut asanninnerminut naammalluinnartumut ersiutaasumik taamaatitsisoq paratiisimi, imaluunniit nunarsuup ilaani allami, naassaanngitsumik inuusinnaatitaassanerpa? Nunami naassaanngitsumik inuutissallugu ulorianaateqassannginnerpa? Adam nunami naassaanngitsumik inuuinnartinneqaraluarpat Guutip inatsisaanik ataqqinninneq siuarsarneqassagaluarnerpa naapertuilluarluinnassusianullu ersersitsisuulluni, imaluunniit inuit allat Guutip inatsisaanik ataqqinninnerannik millisitsissannginnerpa Guutillu oqaasiinik ilumuunngitsuunerassutaassalluni?
Edenip naatsiivianit anisitaasut
14. Guutip Adamimut nulianullu akuliunnera Bibelimi qanoq oqaluttuarineqarpa?
14 Apeqqutit tamakku pillugit Guutip qanoq aalajangiinera Bibelimi oqaluttuarineqarpoq: ’Guutillu Jehovap Adamilu nulialu annoraaliorpai amminik, taakkuninngalu atitillugit. Guutilu Jehova oqarpoq: „Tassa Adam arlatsitut ilerpoq, ajunngitsorlu ajortorlu sianigaa. Maannalu isattoqinavoq orpimmit inuunartumittaaq tigusilluni, nerillunilu soraajuitsumik inuulerluni.“ Taava Guutip Jehovap aallartippaa naatsiivimmit nuannersumiittumit, nuna sanarfeqqullugu tassannga tigusaagami. Anisippaalu inuk, naatsiiviullu nuannersumiittup saaniitippai kerubit panallu aalasup ulorianarnera, orpimmut inuunartumut aqqut paareqqullugu.’ — 1 Môrsase 3:21-24.
15. (a) Adamip Evallu tamaqannginnerminnik kanngusuutiginninnerat qanoq ililluni Guutip isiginngitsuusaanngilaa? (b) Inuit aappariit siulliit qanoq Edenip naatsiivianit anisinneqarpat? (c) Adamip Evallu Edenip naatsiiviata avataani pissutsit allat suut atugassarilerpaat?
15 Ajortuliortut Adamip Evallu tamaqannginnerminnik maanna kanngusuutiginnilernerat Eqqartuussisup Guutiusup isiginngitsuusaanngilaa. Makisequtaannut fiigequtip pilutaanik namminneq sanasimasaannut taarsiullugit nassuiarneqarsinnaanngitsumik annoraanik takisuunik amminik sanaasunik tunivai. (1 Môrsase 3:7) Atisaat amiusut sivisunerusumik piusinnaassapput aammalu kapinartunut, naasupilunnut Edenillu naatsiiviata avataani ajoqusiisinnaasunut allanut illersuutaassallutik. Ajortuliorsimanertik ilerasuutigaat, Edenillu naatsiiviani orpiit akornannut Guutimut isertorniarsaralutik. (1 Môrsase 3:8) Imminnut eqqartuussut nalunaarutigineqareermat Guutimit tatineqartutut misigipput, naatsiivimmit silammut ingerlatilermatik. Kangiata-tungaanut ingerlatinneqarput, kingunitsianngualu naatsiiviup silataaniilerput qaqugorsuarmullu tassannga anisitaallutik. Suliassaat tassaajunnaarpoq naatsiivimmik annertusisitsinissaq pissutsinillu paratiiserpaluttunik nunarsuarmik tamakkiinissaq. Maannamiit narsap naasuisa naatsiiassartaannit iffialianik nerisaqartariaqalerput, tamakkuali naassaanngitsumik inuussuteqartissinnaanngilaat. ’Orpimmit inuunartumit’ avissaartitaapput. Piffissaq, sivisussusia ilisimaneqanngitsoq, qaangiuppat toqussapput!
Jehovap aallaqqaammulli siunertaa maangaannartinneqarsinnaanngilaq
16. Qanoq iliorniarnani Guuti aalajangerpa, sooq?
16 Pinngortitat pujoralaasut marluk taakku imminut ajortuliornerat pissutigiinnarlugu maanna Guuti aalajangerpa nunarsuaq, seqineq, qaammat ullorissallu ilanngullugit, ikuallannersuarmi nungutinniarlugu? Taamaaliorsimasuuguni imaassannginnerpa nachasjʹ-ip aallarnigaa pissutigiinnarlugu siunertaa misinnangaartoq maangaannartinneqartoq? Guutip siunertaa pulateriaarsuup maangaannartissinnaanerpaa? Ullormi Adamip Evallu katiffianni siunertani nalunaarutigisimavaa, pilluaqqugamigit piumasanilu pillugu oqaluttuukkamigit, tassa nunarsuaq inunnik naammalluinnartunik ulikkaassagaat, nunarsuaq Edenip naatsiiviatut ilersillugu naalagaaffigissagaat, aammalu pinngortitanut atsinnerusunut nunamiuttanut imarmiunullu eqqissinartumik naalagaaffiginnillutik attaveqassasut. Siunertani tamanna nuanningaartoq ulluni pinngortitsiffiusuni arfinilinni suliffiusuni, ukiunik tuusintilikkuutaanik sivisussuseqartuni, piareersarsimavaa. Pulateriaarsuk inuillu aappariit siulliit ajortunngorsimanerat pissutigiinnarlugu siunertaq tamanna taamaatinneqartariaqarpa? Taamaannavianngilaq! — Naleqqiuguk Isaia 46:9-11.
17. Ullut arfineq-aappaat pillugu Guuti qanoq aalajangersimava, taamaattumillu ulloq tamanna qanoq naassava?
17 Taamanikkut suli ullut arfineq-aapparaat, ulloq Jehova Guutip qasuersaarfia. Aalajangersimavoq ulloq tamanna pilluaqquniarlugu iluartuutinniarlugulu. Ullup tamatuma arlaannit perloqqunartunngortinneqarnissaa akueriumanngilaa, arlaannillu perloqquneqaraluarpat akiuutissaaq ullorlu pilluaqqunarsiseqqillugu, naanissaata tungaanut pilluaqqunartooqqullugu. Ullup qasuersaarfiup tamatuma kingorna nunarsuaq tamarmi iluartuussaaq, Guutillu piumasaa qilammisut nunami naammassineqarsimassalluni — maani nunami inuit kinguaariit naammalluinnartut najugarisaanni. — Naleqqiuguk Matîuse 6:10.
18. Sooq inuit aappariit siulliit ajortuliortut kinguaavi naalliuttut qilanaarsinnaappat?
18 Qanoq ilioriusissani Guutip nalornisiginngilai. Siunertani taamaatiinnanngilaa. Guutitut unneqqarissutut siunertaqartutut, siunertaminillu naammassinnilluinnartartutut ataqqinarsilluinnartartutullu malunnarsisinniarluni aalajangerpoq. (Isaia 45:18) Inuit naammalluinnartuunngitsut naalliuttullu ajortuliortunit kinguaajusut imminnut naassaanngitsumik iluaqutaasumik Guutip aallaqqaammulli siunertaminik aalajaalluni naammassinninnissaa qilanaarisinnaavaat. Ullormi qasuersaarfiani ukiut tuusintillit arlaqartut ingerlareersimapput, ullullu tamatuma naggataa-tungaa, immikkut ittumik taassumannga pilluaqqusaasussaq, qanittuararsuusimassaaq. Ulluata qasuersaarfiup ’unnua’ ingerlavoq, ullullu pinngortitsiffiusut arfinillit tamatuma siulianiittut pisimanerattut, ’ullaava’ takkutingajalissaaq. ’Ullaaq’ tamanna qaalluinnarpat Guutillu siunertaata allanngujuitsup kingunerisaanik suut misinnangaartut naammassineqarsimasut tamanit takuneqarsinnaalerlutik, taava ima allattoqarsinnaassaaq: ’Taava unnunngorpoq ullaanngorlunilu, ullut arfineq-aappaat.’ Siunissami atugassat nuannerunangaarmata! Tamakku tamaasa eqqarsaatigalugit ila pissanganassusaa! (wD 1/8 89)
[Quppernerup ataani ilanngussaq]
a sarĸúmersitat 12:9-mi Satan Diaavulu ’pulateriaarsutoqqatut’ eqqartorneqarpoq, Juánase 8:44-milu Jesus Kristusip taanna taavaa ’sallunerit ataataat’-nik.
Qanoq akissavit?
□ Sooq inuit siulliit angerlarsimaffimminnit, Paratiisimit, anisitaappat?
□ Qanoq ililluta nalunngissinnaavarput Evap pulateriaarsummit salloqittarneqarnera oqaluttualiaannaanngitsoq?
□ Guutip arnaq qanoq eqqartuuppaa?
□ Guutip Adam qanoq eqqartuuppaa, aammalu sooq tamanna Guutip inatsisaanik ataqqinninnermut allisaataava?
□ Sooq Guutip siunertani, nunarsuup inunnik naammalluinnartunik ulikkaarlugu paratiisinngortinnissaa, taamaatinngilaa?