Paratiisi pilerseqqinneqartussaq aqqutissiuunneqartoq
„[Jesusip oqarfigaa]: ’Ilumut, ullumi oqarfigaakkit: Paratiisimeeqatigiumaarparma.’“ — LÚKARSE 23:43, NV.
1, 2. (a) Oqaaseq „paratiisi“ qanoq isumaqarpa, Edenillu naatsiivia qanoq ittuusimassava? (b) Oqaaseq hebræerisooq „naatsiivik“-mik isumaqartoq Kristumiut Allagaataanni Grækerisuuni qanoq nutsigaava?
INUIAAT Paratiisimi aallartissimapput. Inuup pinngortinneqarnera pillugu Allakkat Illernartut atuagartaasa siullianni ima atuarpugut: „Jehovallu Guutip inuk issumit nunap ilaanit sanavaa sulluarlugulu sorluisigut anersaarnermik uumassutaasumik, inullu tarninngorpoq uumasoq. Aammalu Jehova Guuti Edenimi, kangia tungaani, naatsiiviliorpoq, tassungalu ilivaa inuk sanaani.“ (1 Môrsase 2:7, 8, NV) Taaguut Eden isumaqarpoq „nuannaarneq“, Edenillu naatsiivia naatsiivissaarsuusimavoq annertooq nuannaarfiusoq, assigiinngitsorpassuarnik alianaassuteqartoq.
2 Oqaatsip „paratiisi“-p grækerit oqaasiat paraʹdeisos, „naatsiivik naatsiivissaarsuartut ittoq“-mik isumaqartoq, nagguigaa. Tamatuma naligaa oqaaseq hebræerisooq gan. Bibelimi allakkat Matîuse aallarnerfigalugu sarĸúmersitat ilanngullugit grækerisut allanneqarsimapput, Naalakkallu Jesus Kristusip ukiumi 33-mi nisanip ulluisa 14-ianni Golgatami qisummi naalliutsitsiviusumi toqunneqarnissi sioqqutitsiarlugu oqaaserisimasaasa allanneqarneranni grækerit oqaasiat tamanna atorneqarsimavoq.
Jesusip pinerluttumut paratiisimik neriorsuutaa
3. (a) Pinerluttup misiginneqataasup Jesus sumik qinnuigaa? (b) Pinerluttup qinnutaa Jesusimik upperfiginninneranut sumik ersiutaava?
3 Taamanikkut aamma pinerluttut marluk Jesusip saniani qisunnut kikiattorneqarput. Aappaata Jesus mitaatilleerpalulluni oqaluffigiunnaarpaa, aappaatali taamaaliornini ingerlatiinnarlugu. Pinerluttoq misiginneqataasoq Jesus saaffigalugu oqarpoq: „Jesus, naalagaaffinni tikiukkuit eqqaaginga.“ Taama oqarnermigut — naak qisummi nivingagaluarluni — Jesusip naalagaaffimmi naalagaalerumaarnissaanik uppernini ersersippaa. (Lúkarse 23:42, NV; Mákorse 15:32) Oqaasii tamakku Naalakkap Jesusip uummataanut killinnarsimassaqaat! Pinerluttup ikinngutinnersup taassuma Jesus Kristusip pinngitsuunera taamalu peqqarniitsigisumik — tamanut takussaasumi narrunarsagaalluni qisummut kikiattugaalluni — pillarneqartussaannginnera qularinngilaa. (Lúkarse 23:41) Qinnuteqarnermigut ersersippaa upperalugu Jesus toqusunit makitinneqarumaartoq naalagaaffimmilu naalagaassuseqalerumaartoq. Pinerluttup ersersippaattaaq upperalugu nammineq makitinneqarsinnaassalluni, aammalu Jesus toqusunit makititsisorissagini nunamilu inooqqilernissaminik pilluaqqusisorissagini.
4. Pinerluttup qinnutaa Jesusip qanoq akivaa, tassuunalu sumik takutitsilluni?
4 Jesus pinerluttumut oqarami: „Ilumut, ullumi oqarfigaakkit: Paratiisimeeqatigiumaarparma,“ misiginneqataasup taassuma makitinneqarumaarnissaanik tikkuartuivoq. Pinerluttup uppernerminik ersersitsisup tamanna tuppalliutigilluinnarsimassavaa. Angut taanna makitinneqarsinnaassappat Jesus makitinneqaqqaartariaqassaaq. Taava makititsisinnaassutsi Guutimit pisani atorlugu ullormi inuiaat makiffissaanni Jesusip pinerluttoq taanna toqusunit utertikkumaarpaa. — Lúkarse 23:43, NV; Juánase 5:28, 29; 1 Korintumiut 15:20, 23; Eprîarit 9:15.
5, 6. (a) Jesusip qisummut kikiattugaasup qulaanut ivertitassamik sumik nunasiamut naalagarsuaatitaq Pilatus allatsitsiva? (b) Inuiaat kikkut oqaasii atorlugit Jesusip pinerluttumut oqalussimanissaa ilimanarpa?
5 Inuiaat kikkut oqaasii atorlugit Jesus taama neriorsuiva? Taamanikkut oqaatsit arlaqartut atorneqartarput. Tamanna paasineqarsinnaavoq oqaatsinit qisummut kikiattugaasup Jesus Kristusip niaquata qulaanut ivertitassanit, kinaassusia saneqquttunit tamanit ilisimaneqarniassammat Romamiut nunasiaannut naalagarsuaatitap Pontius Pilatusip allanneqartitaanit. Oqaluttuaq Juánase 19:19, 20-mi allassimasoq imaappoq: ’Allakkat qulaanut ivertitassat Pilatusip aamma allassimavai sanningasulimmullu [qisummullu, NV] ivertillugit, tassa ima allassimasut: „Jesus Nazaretimiu juutit kunngiat.“ Allakkallu taakku qulaanut ivertitat juutit ilarpassuisa atuarpaat, Jesusip qisummut kikiattorneqarfia illorpassualimmit qaneqimmat; taakkulu hebræerit, grækerit latinerillu oqaasiinik allassimapput.’
6 Maria, angummit attorneqarsimanngitsoq, anaanagalugu Jesus Betlehemimi inunngornermigut juutiuvoq, imaluunniit hebræeriulluni. Taamaattumik nunami inunngorfigisamini ukiut pingasut affarlu oqaluussinermini juutit, imaluunniit hebræerit, oqaasii atortarsimassavai. Taamaattumik pinerluttoq misiginneqataasoq neriorsoqqissaarlugu oqaaseqarfigigamiuk hebræerisut oqalussimassaaq. Paratiisimik eqqartuinermigut oqaaseq hebræerisooq gan — Môrsasip agdlagai sujugdlît 2:8-miittoq — atorsimassavaa. Tassani grækerisuunngortitami Septuaginta-mi oqaaseq paraʹdeisos hebræerisuumit gan-imit nutsigaavoq.
7. Makitinneqarami Jesus qanoq naalannarsisinneqarpa?
7 Qisummut kikiattorneqarnermi kingornagut ullut pingajussaanni, hebræerit qaammatisiutaat malillugit nisanip ulluisa 16-ianni, Jesus toqusunit makitinneqarpoq. Ullut 40-ssaanni qilammut, angerlarsimaffivimminut, qutsissisitaasimalluni uterpoq. (apustilit suliait 5:30, 31; Filípimiut 2:9) Taava toqusuissutsimik, Ataatami qilammiusup pissuserisaanik, atisivoq. Sapaammi nisanip ulluisa 16-ianni Jesusip toqusunit makitinneqarnera tikillugu Jehova Guuti toqusuissuseqartutuaasimavoq. — Rûmamiut 6:9; 1 Timûtiuse 6:15, 16.
Utertitsissut aqqutissiuivoq
8. Jehovap nuna qanoq aallaqqaataaniilli siunertarisimavaa, taamalu suli siunertarisaqartuarneranut suna ersiutaava?
8 Tamakku tamarmik Guutip siunertarisaata — nunarsuup tamarmiusup paratiisitut alianaassuseqaleqqissitaanissaata, tamarmi paratiisinngortitaanissaata — naammassiartuaarnerani alloriarnerupput. (1 Môrsase 1:28; Isaia 55:10, 11) Korintumiunut agdlagkat sujugdlît 15:45-mi apustili Paulusip Jesus taavaa ’Adam kingulleq’. Tamatuma takutitsiarpaa Guutip nuna eqqarsaatigalugu aallaqqaammut siunertarisani aalajangiusimajuaraa, siunertarisamillu Adamip siulliup naammassinngitsuugaanik naammassinnittoqarumaartoq.
9. Qanoq ililluni Jesusip Paratiisi pilerseqqinneqartussaq aqqutissiuuppaa?
9 Paulusip oqaasia naapertorlugu Jesus ’angeqataasumik utertitsissutaavoq’. (1 Timûtiuse 2:6, NV) Jesus nammineq ima oqarsimavoq: ’Soorlu inuup ernera tikiutinngitsoq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik.’ Tamatuma Jesus Kristusimik upperfiginnittut inuunermik naassaanngitsumik angusisinnaanngortippai. — Matîuse 20:28; Juánase 3:16.
10. (a) Inuit immikkut iluarisaasut killilimmik amerlassusillit pillugit Guuti sumik aalajangigaqarpa? (b) ’Savarpannguit’ qinerneqarnerat qanga aallartippa, kinalu qinersisuua?
10 Toqusunit makitinneqarnermi kingorna qilaliarami Jesusip pilliutimi utertitsissutaasup nalinga inuiaat iluaqutissaannik Guutimut sassaassinnaasimavaa. Ataataatali qilammiusup, Jehova Guutip, siunertaraa inuiaat nunamiusut ’aterminut ilannguttunik innuttassarsiviginissaat’. (apustilit suliait 15:14) sarĸúmersitat 7:4 aamma 14:1-4 naapertussagaanni taakku 144.000-iinnarnik amerlassuseqartussaapput, tassa ’savarpannguit’ Guutip naalagaaffianut qilammiittumut qaaqqusat. (Lúkarse 12:32) Jehova Guutimit immikkut iluarisaasut taakkua qinerneqarnerat Jesus Kristusip apustiliisa aqqaneq-marluusut qinerneqarneratigut aallartissimavoq. (Matîuse 10:2-4; apustilit suliait 1:23-26) Ilagiissiminut ilaasortaasut tunngavii Jesusip ima oqarfigai: ’Ilissi qinigarinngilassinga, uangali qinigaraassi.’ (Juánase 15:16) Naalagaaffiup aqutsinerata ataani nunarsuaq tamakkerlugu Paratiiseqalerumaarnissaanik tusagassamik tusarliussineq taakkua siulersuisuuffigaat.
Naalagaaffik qaqugu tikiutissava?
11. Naalagaaffik Messiasikkoortoq qanga pilersinneqartussaasimava?
11 Jesus Kristusip aqqa tunaaralugu ullumikkut uagut Jehova qinnuigiuarparput naalagaaffiata tikiunnissaanik. (Matîuse 6:9, 10; Juánase 14:13, 14) Naalagaaffik Messiasikkoortoq ’inuiaat ullussaasa aalajangersagaasut naammatsinneratigut’ pilersinneqartussaavoq. (Lúkarse 21:24, NV) ’Inuiaat ullussaat,’ imaluunniit Guutimik nalusut ullussaat, tamakku 1914-imi naammatsipput.
12. Pisunik malugisariaqartunik Jesusip takussaanngitsumik najuunnerminut ilisarnaataasunik siulittuutaanut naapertuuttumik 1914-imi sunik pisoqarpa?
12 Ukiumi tamatumani oqaluttuarisaanermi aatsaat silarsuaq tamakkerlugu sorsunneqalerpoq. Pisunik malugisariaqartunik Jesusip naalagaaffimmi nunamut piginnaaneqalerluni takussaanngitsumik najuunnerminut ilisarnaataasussanik siulittuutaanut tamanna naapertuuppoq. Ajoqersugaasa ima aperisimavaat: „Qaqugu tamakku taamaalissappat, sunalu najuunnissannut pissutsillu aaqqissuussaanerata naggatissaanut nalunaaqqutaassava?“ (NV) Akilluni Jesus ima oqarpoq: ’Inuiaat pikitsitsiumaarput inuiaqatiminnut, naalagaaffillu naalagaaffeqatiminut; kaannersuarlu nalliuttarumaarpoq nunalu tamatigut tamaana sajuttarluni. Tamakkuli tamaasa eqqanaarnartup aatsaat aallaqqaatigai.’ „Naalagaaffimmillu tusagassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq; taavalu naggatissaq nalliutissaaq.“ (NV) — Matîuse 24:3, 7, 8, 14; Mákorse 13:10.
13. (a) Suna eqqarsaatigalugu Guutip naalagaaffianik oqaluussissutiginninneq tusagassaava nuannersoq? (b) Guutip naalagaaffianik tikiuteqqusissutit qangamiilli qinnutigineqartarpat, nalunaajaasuisalu nunamiittut taama qinnuteqartarnertik qatsussimavaat?
13 Jehovap naalagaaffianik tusagassaq nuannersoq tamanna maanna nunani 200-nit amerlanerusuni oqaluussissutigineqarpoq, nunanilu suli allani oqaluussissutigineqalernissaa noqqaassutigineqarpoq. Silarsuarmut tamarmut naalakkersuineq siunissami piumaartussaq pineqanngilaq, pineqartorli tassaavoq naalagaaffik atuutilereersimasoq, maannakkut aqutsisoq. Naalagaaffik tamanna 1914-imi pilersinneqarpoq. Taamaalilluni qinnutip ukiut 1900-nit amerlanerusut matuma siornagut Jesusip najoqqutassiarisaata naammassineqarnissaa tunngavilerneqarpoq. Naalagaaffimmi kunngiujumaartussap ajoqersukkani qinnummik tamatuminnga ajoqersuummagilli qinnut tamanna Naalagaaffimmik Tunngaviliisumut qinnutigineqartuaannalersimavoq. Qinnutigineqarnera Naalagaaffimmik Pilersitsisup ukiorparujussuarni tusarnaartuarsimavaa. Nalunaajaasumi nunamiittut ukiorpassuarni tamakkunani Naalagaaffimmik tikiuteqqusillutik qinnutaat nuannaarutigalugu tusartarsimavaa, taamaaliornerammi tikiukkumaarnissaanik uppernerminnik aalajangiusimanninnerannut takussutaavoq. ’Ataataminnut qilammiusumut’ taamatut qinnuteqartarnertik qatsussimanngilaat; Naalagaaffik neriuutigiunnaarsimanngilaat. — Matîuse 6:9, 10.
14. Suna pissutigalugu Jehovap Nalunaajaasuisa Guutip naalagaaffianik tusagassaq nuannersoq oqaluussissutigiuaannarpaat?
14 Jehovap Nalunaajaasuisa naak upperigaluarlugu Naalagaaffik tamanna 1914-imi qilammi pilersinneqareersimasoq, taamaattoq naalagaaffimmik tamatuminnga tusagassaq nuannersoq oqaluussissutigiuarpaat. Taamaaliorput Naalagaaffiup pilersitap tamatuma nunamut naalagaassutsi suli tamakkiisumik atulersimanngimmagu, silalli matuma naalagaaffii inuiaat naggueqatigiissortaannut eqqarleriissortaannullu pissaanermik oqartussaanermillu atueqqugallarlugit. (Rûmamiut 13:1) Taamaattumik Naalagaaffik tamakkiisumik tikiuttariaqarpoq, nunarsuarmut tamarmut naalagaassuseqarluni naalakkersuisoqarfituaalerluni. — Dâniale 2:44.
15. Suna Israelitoqqami kunngit taninneqartarsimanerannit annertunerusoq ukiumi 33-mi piinsip ulluaniilli suliarineqalersimava?
15 Naak naalagaaffimmi tassani kunnginngortinneqaraluarluni, Jesus naalakkersuisutuaassanngilaq. Guutip naalagaaffiani Messiasikkoortumi kingornusseqataasussatut Ernermi kunngiusup ajoqersugaasa ilaat 144.000-it Jehovap toqqarsimavai. (Dâniale 7:27) Israelitoqqami kunngit uuliamik tarnutaasumik illernartumik palasiunermit taninneqartarsimanerattut, ukiumi 33-mi piinsip ulluaniilli Jesus Kristusip kingornusseqatissai 144.000-iusussat Jehovap anersaaminik iluartumik taninneqartittalerpai, tassuunalu ’kunngit kunngiat naalakkallu naalagaat’ ilagalugu qilammi anersaajussuseqartutut qitornarsiarilerlugit. — sarĸúmersitat 19:16; naleqqiuguk kúnginik agdlagkat sujugdlît 1:39.
Paratiisi ’Adamimit kingullermit’ pilerseqqinneqassaaq
16. Jesusip qisummut kikiattorneqarnerani Naalagaaffimmik pilersitsisoqarnissaa qanoq ilimanaateqartigisimava, aammalu sooq kukkusumik tusarliussaqarsimanngila?
16 Ukiumi 33-mi qisummut kikiattorneqarami Jesusip naalagaaffeqarsinnaalernissaa ilimanaateqarpasissimanngilaq. Guutilli naalagaaffianik oqaluussissutiginninnermigut kukkusumik tusarliineq ajorpoq. Naalakkersuinerup Jesusip ajoqersugaasa qinnutigisartagassaata pinngitsoorani pilersinneqarnissaa Jesusip qisummut kikiattorneqarnerata kingornagut ullut pingajussaanni Naalagaaffimmik Tunngaviliisup qularnarunnaarsippaa. Naalagaaffimmi tikiuteqqusaasumi sinniisigisassani Jehovap makitippaa toqusuissutsimillu atisitillugu.
17, 18. (a) Jesusip ’Adam kingulleq’-mik taaneqarnera qanoq isumaqarpa? (b) 1914-imiilli silarsuarmi pisut sumut takussutaappat?
17 Jesusip nalunngilaa Paratiisimik nunamiittumik siullermik Pinngortitsisup pisussaaffississagaani Paratiisimik nutaamik pilersitsinissaminik nunarsuarlu tamakkerlugu naatsiivimmik inoqalersitsinissaminik. Korintumiunut agdlagkat sujugdlît 15:45, 47-mi ima atuarpugut: ’Taama allassimavoq: „Inuk siulleq, Adam, tarninngorpoq uumasoq;“ Adam kingulleq anersaanngorpoq uummartitsisoq. Inuk siulleq issumit pivoq nunamiulluni; inuup aappaa qilammit pivoq.’ Adamip aappaa qilammit aqqarpoq, taannalu Paratiisip nunami maani pilerseqqinnissaanut Jehovap kiffarissavaa. Tamannarpiarlu tunngavigalugu Jesusip pinerluttoq misiginneqataasoq oqarfigaa: ’Paratiisimeeqatigiumaarpakkit.’ (Lúkarse 23:43) Oqaloqatigiinnermit tamatumannga paasineqarsinnaavoq Paratiisi nunami qilammiup naalagaaffiata ataani Jesus Kristusip naalannarsisitap, ’Adamip kingulliup’, kunngiuneratigut pilersinneqarumaartoq.
18 1914-imiilli silarsuarmi pisimasut Jesus Kristusip siulittuutigisaanut naapertuupput, taamaalillutillu uppernarsarpaat taamanili Jesus pissaaneqalersimasoq. Ukiuni 70-init amerlanerusuni kinguaariit 1914-imiilli inuusut Jesusip siulittuutigisimasaasa Matîuse, kapitali 24-mi, allaatigineqarsimasut piviusunngorsimanerat angumeraat. Taamaattumik ukiut aalajangersimasut tamakku naangajalerput, Paratiisillu pilerseqqinneqarnissaa ungasikkunnaarpoq. — Matîuse 24:32-35; naleqqiuguk Tussiaat 90:10.
Silarsuup nutaassap ukiui pissanganartut nalliutilivipput
19, 20. (a) Harmagedon pereerpat Jehovap asasini sumut ingerlatissavai? (b) Harmagedonip kingunitsiannguagut suna suliarineqartariaqassava?
19 Harmagedonimi akiuunnersuarmi qilammi nunamilu kisimi oqartussaalluni naalagaanini qularutigineqaleqqinngisaannartumik akitsisiteriarlugu pissutsit aaqqissuussaanerat Jehovap asasiminut atugarilersitassaa avaanngunartuunanilu qatsunnartuussanngilaq. Kunngip Messiasiusup, Jesusip, Guutip ernerata, naalagaassusiata naammalluinnartup ataani ukiussat inuiaat atugassaat nutaat pissanganassaqaat. Suliarineqartariaqartut iluaqutaasut ila amerlassusissaat! Jehovap katersaasa qilammiusut ajortullu pissaanilissuisa aaqqissugaasut akornanni nunarsuaq tamakkerlugu akiuunnerup kingunerisaanik qileqqut nunap qaavaniittut tamarmik peerneqassapput. Malunniutaarutivissapput.
20 Sorsunnermut atortussaagaluit inuiaat qimataat qanoq pineqassappat? Sakkussiat ikuallassinnaasortaasa nungunniarnissaannut piffissap atortariaqartussap assersuutaasup sivisussusissaa eqqarsaatigalugu amerlasorujussuussapput. (Hisĩkiale 39:8-10) Inuiaat sakkussiarisimasaasa amiakkui Harmagedonimit aniguisut immaqa iluaqutissarsiffiginiarsinnaassavaat. — Isaia 2:2-4.
21. Ulersuarmit aniguisimasut misigisaqarnerannut assingusumik Harmagedonimit aniguisut sumik atugaqassappat, sumilli allaassuteqassava?
21 Pilluaqqusaallutik Harmagedonimit aniguisut atugaqassapput Noap ilaqutaasalu, nunarsuaq tamakkerlugu ulersuaqarnermi tupinnartuliornikkut annassimasut, atugarisaannut assingusumik. Satan Diaavululli inngilipiluppassuisalu qilaat takussaanngitsut nunap avatangiisigisai erloqinartorsiortissinnaajunnaassavaat ukiuni tuusintini iliuuseqarsinnaajunnaarsinneqassagamik. (sarĸúmersitat 20:1-3) Harmagedonimit aniguisut imaannaanngeqisumik suliassarissavat nunap ’Guutip ajugaqanngitsup ullussarsuani’ atasimasup, taamani pisimasut nunamut malunniutaat ilanngullugit, imminnut naalatsigitilernissaa. — sarĸúmersitat 16:14.
22. Nunarsuup tamarmi paratiisinngortinneqarnissaanik suliareqqusaq imaannaanngeqisoq Harmagedonimit aniguisut qanoq qisuariarfigissavaat?
22 Nunarsuup angissusianut naleqqiullugu Harmagedonimit aniguisut ikittuinnaassammata nunap paratiisinngorsarneqarnissaanik suliassamik annertoqisumik suliassinneqarunik nikallulersinnaanissaat ilimagineqarsinnaassagaluarpoq. Akerlianilli pissangaqalutik sulerusussuseqassaqaat, tatitusaarlutillu naalallutillu suliassaq aallartissavaat. Paasilluinnassavaat nuna manna assersuutikkut Guutip isigaasa tummarfigigaat, isigaasalu tulluartumik tummarfiginissaannut nunap alianaatsunngorsagaanissaa takujuminarsagaanissaalu kissaatigingaarlugu.
23. Nunarsuup paratiisinngortinnissaanik suliassiissutigineqartup iluatsikkumaarnissaanut qulakkeerutaasumik Harmagedonimit aniguisut kimit tapersersorneqassappat?
23 Guutip nunamut atatillugu suliareqqusaa naammassiniarlugu kiffartuutip nuannersup tamatuma aallunniarnerani immineerneqartussaannginnerat qujanaqaaq. (Naleqqiuguk Isaia 65:17, 21-24.) Taamaaliornerminni tamakkiisumik killeqanngitsumillu tapersersuisorissavaat Paratiisip pilerseqqinneqarnissaanik neriorsuisimasoq ullormilu qilaliarfimmini ima oqarsimasoq: ’Qilammi nunamilu piginnaaneq [pissaaneq] tamarmi uannut tunniussaavoq.’ (Matîuse 28:18) Suli taama pissaaneqarpoq, soorlulu ilanngutassiami tulliuttumi takussagipput aammattaaq pinerluttumut misiginneqataasumut neriorsuunni eqqortissinnaavaa. (wD 15/8 89)
Uteqqiineq
□ Jesusip Golgatami neriorsuutaa inuiaat tamaasa pillugit pinerluttorlu ataaseq pillugu qanoq qulakkeerutaava?
□ Paratiisip pilerseqqinneqartussap aqqutissiuunneqarnissaanut suna pisariaqarluinnarpa?
□ Adam siulleq qanoq iliunngitsoorsimava, kisianni ’Adam kingulleq’ sumik naammassinnissava?
□ Harmagedonip kingornagut aaqqissuussaanermut qanoq ittumut Jehovap asasini ingerlatissavai?
[Qupp. 13-mi assiliartaq]
Ilanngutassiaq „1914-imi naalagaaffiit tamarmik soraarsitaanissaat“ atuagassiami „The World Magazine“-imi 30. augusti 1914-imi saqqummerpoq