’Qanoq iliussaanga annakkumallunga?’
APEQQUT tamanna apeqqutigineqarpoq parnaarussat paarsisaannit illoqarfimmi Filippimi Makedoniamiittumi ukiumi 50-imi. Parnaarussiviup paarsisuuffigisaata matuisa ammarneqaatigisaannik nuna sajorujussuaqqammerpoq. Parnaarussat qimaasimanissaat ilimagilerlugu imminik toqunnialeraluartoq, apustili Paulusimit suaarneqarpoq: ’Ajortumik iliorfigeqinak, tamatta tassaavugut!’ — apustilit suliáinik agdlagkat 16:25-30.
Paulus, parnaarussaqataalu Silas, Filippimut pisimapput annannissamik tusarliussaq oqaluussissutigiumallugu, eqqunngitsumilli unnerluutigineqarnertik pillugu parnaarussaasimallutik. Parnaarussat qimaasimannginnerat tuppalliutiginermik qujamasunnermillu, Paulusip Silasillu tusarliussassaat sunaanersoq paaserusutsappaa. Qanoq ililluni annannissaq, ajoqersuiartortitanit kristumiuusunit oqaluussissutigineqartoq, pisinnaavaa?
Nalitsinni inuit, angutitulli taassumatut, annannissamik pisariaqartitsipput. Alianaraluartumilli amerlasuunit annannissamik apeqqut qularutigineqarpoq. Annannissamik oqaluussisut ikinngitsut pingaakujunniartuunerat piumatuunerallu pissutigalugit, iluaaginnillutik kajumissuseerussutigaat. Allat, ilagiit iivangkiiliulersaartut pikkunarsaarumatuallaarnerat maajugaat. Tuluk tusagassiortoq Philip Howard oqarsimavoq eqeersaaniarlutik oqaluussisartunik taaneqartartut „inuit silaqarsusiat pinnagu, misigissusii ajunngitsuliorumassusiallu kisiisa sunnerniartaraat“. — Naleqqiuguk 2 Pîtruse 2:2.
Allallu inuit „annassimallutik“ misigilersimasut allanngoriataarujussuartarnerat quarsaarutigisarpaat. Atuakkami Snapping-imi (Tigusinasuarneq) Flo Conwayip Jim Siegelmanillu eqqartorpaat ukiuni qulikkaani kingullerni upperisarsiornikkut misigisarpassuit — ilaatigut „annatsitaaneq“. Misigisat tamakkua „iluanngitsortaat“ aamma allaaseraat. Oqaluttuaraat inuit „tiguartillutik“ pilertortumik allanngoraluarlutik, nalerisimaarneq siuneqarsuserlu neriorsuutigisaasut pissarsiarineq ajoraat, imminulli salloqitagarinermik, paqumisunnermik piviusullu tunngavigalugit pissutsinut isummersinnaajunnaarnermik kinguneqartartoq. Atuakkiortullu tapiliuppaat: „Oqartoqarsinnaavoq qarasartik suliunnaarsittaraat — tassa eqqarsarunnaartartut.“
Kristumiut siulliit annannissamik ilassinnimmata taama pisoqanngilaq. Filippimi parnaarussat paarsisaata ’qaratsani suliunnaarsinngilaa’ apustili Paulusip apeqqunni akimmagu: „Qanoq iliussaanga annakkumallunga?“ Paulusimit Silasimillu ’misigissusii sunnerniarneqanngillat’ aningaasarpassuarnilluunniit tapiissuteqaqqullugu qinnuigineqarani. Aap, ’Jehovalli oqaasia taassumunnga oqaluutigaat’. Angut taanna tunngavilersuiffigalugu ikiorpaat Guutip annannissamik aaqqissuussinera paasitilluarlugu. — apustilit suliáinik agdlagkat 16:32.
’Naalagaq Jesus Kristus upperfiguuk’
Ajoqersuiartortut kristumiuusut taakku parnaarussanik paarsisoq annannissamik sallusuissutaasup tunngavianik soqutiginnilersippaat. Tamannattaaq Peterip taamani ilagiit kristumiuusut pilersinneqarmata oqaluutigaa. Taamani Peterip annannissamut atatillugu Jesus Kristusip qitiunera tikkuarpaa taagamiuk ’inuunermut siulersuisoq’. Apustili oqarportaaq: ’Allamik annaffissaqanngilaq, atermimmi allamik annassutissatsinnik qilaap ataani inunni tunniussaasoqanngilaq.’ (apustilit suliáinik agdlagkat 3:15; 4:12) Paulusip Silasillu parnaarussat paarsisaat Filippimiu annannissamik aqqutaasumut unnersuuppaat oqaramik: ’Naalagaq Jesus Kristus upperfiguuk, taava annakkumaarputit.’ — apustilit suliáinik agdlagkat 16:31.
Naalakkamulli Jesusimut uppernerup suna nassatarissavaa? Sooq Jesus Kristusip aqqatigut aatsaat annattoqarsinnaava? Naggataatigut kikkut tamarmik annaanneqassappat? Apustilillu upperisimanerpaat ’ataasiarluni annaanneqarsimagaanni qaqugumulluunniit annassimalertarneq’? Pingaartuuvoq apeqqutit tamakku akissutissaqartissallugit, inuimmi upperniartut amerlaqisut oqaatsimikkut iliuutsimikkullu oqaaseq tamanna iluanngitsumik nipeqalersissimagaluaraat, annannissamik suli pisariaqartitsivugut. Naammaginartumik silaqarluartumillu akissuteqarfigineqartariaqarpugut apeqqummut: ’Qanoq iliussaanga annakkumallunga?’