Kikkut makititaassappat, qaqugulu?

UKIUMI 32-mi, Betaniami, Lazarusip qatanngutini marluk Martha Marialu ilagalugit najugaqarfiani, pisimavoq. Arnat marluk taakku Lazarusip napparsimaneranik Jesus nalunaarfigisimavaat. Jesusip Lazarus qatanngutaalu asaqigamigit Betaniamut aallarasuarpoq. Aqqutaani Jesusip ajoqersukkani oqarfigai: ’Lazarus ikinnguterput sinippoq, tassa itersariartussavara.’ Ajoqersukkalli isumaqarput Jesusip sinivinneq pigaa. ’Taava Jesusip oqarfigilluaannarpai: „Lazarus toquvoq.“’ — Juánase 11:1-15.

Ullut sisamat Lazarusip toqunerata kingorna apuupput. Maria taassumalu ilai qiasut Jesusip takugamigit, ’qullililerluni’ itisuumik asanninnini tunniusimaninilu takutippai. (Juánase 11:17, 35) Lazarus qaarusummi ilineqarsimavoq. Jesusip ujaqqap qaarusummut matuliunneqarsimasup peerneqarnissaa Jesusip peqqussutigaa. Taava Ataatani qinnuigaa torlorlunilu: ’Lazarus-iaa, aniit!’ Taava Lazarus anivoq. Lazarusip qatanngutai arnat nuannaarsimassaqaat! — Juánase 11:38-45.

Pisimasup tamatuma makinnissamik neriuutigisaqarnissatsinnut pissutissaqarluartippaatigut. Pissutsinili maanna atuuttuni toqu akeraavoq ajortoq asasatsinnik tigusisartoq, Jesusimit makititaagasuarnissaannut periarfissaqanngikkallartillugit. Toqusimasut taakkua ilarpassui inuusimapput ajunngitsut asannittullu. Taamaattumik ima aperinngitsoorfiunngilaq . . .

Sooq toqussaagut?

Tamanna naammaginartumik tutsuiginartumillu akissutissarserusukkutsigu, inuiaat Edenip naatsiiviani pileqqaarnerat qiviartariaqarparput. Adamip naalannera misilinniarlugu orpimmit naatsiivimmiittumit aalajangersimasumit nerinissaa Guutip inerteqqutigaa. Guuti Adamimut oqarpoq taanna nulianilu Eva orpimmit tamatumannga nerigaluarunik ’toqumik toqujumaartut’. (1 Môrsase 2:17) Satanimit ussermiarneqaramik Guutimut naalannginnissartik qinerpaat, taamaalillutillu misilinneqarnertik aalajangiisuusoq aniguiffiginngitsoorlugu. Taamaalillunilu toqu piviusunngorpoq.

Unioqqutitsinerminnut annikippasissumut tamatumunnga sooq taama sakkortutigisumik pillarneqartariaqarpat? Iliuusiat soqutaanngikkaluarpoq, pinerluttuliorneralli toqumik kinguneqartussaasutut ingasattorujussuuvoq. Adam Evalu Pinngortitsisuminnut pikitsitsipput taamaattumillu naammalluinnartuujunnaarlutik. Taamaattumik Guutip toqumik pillarpai. Guutili aaqqissuussisimavoq eqqartuussutip naapertuilluartup tamatuma kinguneri Adamip kinguaassaanut atuukkunnaarsinniarlugit. Qanoq ililluni? Soorlu Paulus allassimasoq: „Kristus Jesus . . . imminik tunniuppoq tamarmik angeqataasumik utertitaassutissaannik“. — 1 Timûtiuse 2:5, 6, NV; Rûmamiut 5:17.

Toqusut qanoq pissuseqarpat?

Lazarus ulluni sisamani toqungasimavoq. Illit toqusimagaluaruit, ullunilu sisamani anersaajullutit qilammiissimallutit taavalu makititaallutit, taava ulluni sisamani taakkunani misigisimasatit allanut oqaluttuarissannginnerpigit? Bibelimili imaattumik paasitinneqarpugut: „Toqungasut sunnguamilluunniit ilisimasaqanngillat.“ — Nalunaajaasup oqaasii 9:5; Tussiaat 146:3, 4.

Tamatuma isumaa eqqarsaatigeriaruk! Inuit millionillit eqqiarfeqarnera upperaat, massa oqaaseq tamanna Bibelimi allanneqarsimanngivissoq. Amerlanerusullu ikumasumik anniarfeqarnera upperaat. Qanorli ililluta, akerarinerpaasatsinnilluunniit innermi naassaanngitsumik anniartitsiumanaviarnata, Pinngortitsiserput asannittoq taama iliorumasorissavarput? Bibelimilu qularnaatsumik oqaaseqaat tupallernartoq issuariigarput eqqarsaatigeriaruk: „Toqungasut sunnguamilluunniit ilisimasaqanngillat.“

Bibeli naapertorlugu ikittuinnaat qilammi Kristusimut naalakkersueqataassapput. Taakku Jesusip ’savarpannguatut’ taavai. (Lúkarse 12:32) Apustili Johannesip takorloornikkut takuai ’savaaraq, Jesus Kristus, Zionip qaqqaani qilammiittumi qeqartoq, ilagigaalu untritilinnik sisamanillu qulilinnik sisamanillu tuusintillit nunamit immikkoortillugit pisiaasut’. (sarĸúmersitat 14:1-3) Tassa inuusimagaluarput, toqusimappulli qilammullu makitinneqarsimallutik Kristus ilagissallugu.

Bibelimi ilumoortunik tamakkuninnga inuppassuit paasinninnissaannik taakku ikiuutaasimaqaat; eqqiarfeqannginneranik ikualasumilluunniit anniarfeqannginneranik, toqusulli makititaanissamik neriuutissaqarnerannik. Ikittuinnaalli qilammut makititaassappata taava sinnerinut allanut sumik neriuutissaqarpa?

Nunami inuunermut makititaaneq

Inuit qilammi inuunermut makititaanissaannik aqqutissiuussisimasoq tassaavoq Jesus Kristus. (Eprîarit 9:24; 10:19, 20) Tassa Johannes Kuisisoq Jesusip — toqumigut qilammi inuunissamik periarfissiuussisup — toqunera sioqqullugu toqusimagami qilammut makititaanavianngilaq. Jesus nammineq oqarsimavoq: ’Johannesimit Kuisisumit annerusumik saqqummersoqanngilaq; qilammiulli naalagaaffiani minnerusoq taassumannga anneruvoq.’ (Matîuse 11:11) Angulli taanna aalajaatsoq allallu taassumatut toqusimasut Guutip sumik akissarsiassaqartippai?

Bibelit qupperiaruk, Lúkarsip îvangkîliua kapitali 23 nanillugu, versillu 39-miit 43 ilanngullugu atuarlugit. Pinerluttup Jesusip saniani nappakkamut kikiattugaasup aappaa oqarsimavoq: „Jesus, naalagaaffinni tikiukkuit eqqaaginga,“ (NV). Jesusillu pinerluttoq taanna Paratiisimi inuulerumaarnissaanik neriorsoqqissaarpaa. Paratiisissaq tamanna, paratiisitut siullertut, qilammiinnani nunamili issaaq.

Makinnissamik neriuut — tuppalliutissaq

Neriuut tunngaveqarluartoq Bibelimeersoq tamanna tuppallersaataasariaqarluinnarpoq, tamatumunngalu pissutissaqarluarpugut — Jehova asassutaammat. (1 Juánase 4:8) Guutip ernermi kanngunarsagaalluni toquneranik akuerinninnera eqqortumik oqaatigalugu asanninneranut asseqanngitsumut ersiutaavoq. Jesus ilaanni oqarsimavoq: ’Silamiut Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ — Juánase 3:16.

Jesusissaaq nammineq asanninnermik asseqanngitsumik ersersitsivoq, inuit uppertut utertinneqaatissaannut inuunini tunniukkamiuk. Soorlu imminut oqaatigisimasoq: ’Inuup ernera tikiutinngilaq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik.’ — Matîuse 20:28.

Carolannip, ilanngutassiami siullermi eqqartorneqartup, ajunaarnikkut annilaarnartukkut asasani annaasimavai. Aliasuttorujussuusimavoq. Tuppallersaatigaali nalunnginnamiuk toqusut anniartitaanngitsut. Tatitusaarnissaminut suna alla aamma iluaqutigaa? Jehovap Nalunaajaasuisa akornanni anersaakkut qatanngutimi asanninnerat misiginneqatiginninnerallu piviusoq. — Tussiaat 34:18.

Aammattaaq Jehovamut qinusarnini iluaqutigeqaa. Unnuakkut itikulasaqaaq, isumaqartarlunilu sinnattupiluinnarluni, piviussuussusiali annilaarnartoq paasileqqittarlugu. Ikioqqulluni Jehova torlulaffigigaangamiuk eqqissisarpoq Paulusillu allassimasaata isumaa paasinerulersarlugu: ’Suulluunniit pillugit isumakulunnaveeritsi, nungullugilli kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ — Filípimiut 4:6, 7.

Shirleyp misigisimasaatiguttaaq paasineqarsinnaavoq makititaanissamik neriuut qanoq tuppallernartigisoq. 1986-imi januariugaa ernera Riccardo qarmasissiakullassuarmit nakkarfigineqarnermini sakissamigut eqqorneqarami uummatini qaarmat ingerlaannaq toquvoq. „Soorluli tassa sinnattupilulluni,“ kingorna Shirleyp ikinngutini oqaluttuussimavai. Katuullit oqaluffianni ima oqartoqartartoq tusarsimavaa: „Guutip inuusut toqusullu eqqartuutissavai.“ Shirley imminik eqqarsarpoq: ’Guutip inuusut toqusullu eqqartuutissappagit, taava qanoq ililluni paasineqarsinnaava toqusut sumiinnersut? Qilammilu inuulersimagunik, taava suna pillugu kingusinnerusukkut eqqartuunneqassallutik makissappat? Aammalu qanoq ilillutik nunamut makititaasinnaappat qilammi inuugunik?’ Bibelimili inuusut makinnissaat eqqartorneqanngivippoq, toqusut makinnissaat kisimi.

Shirleyp uini tamakku pillugit aperaa, taassuma Bibeli ilisimalluarmagu. Paasigamiuk tamakku pillugit Bibelimi qanorpiaq allanneqartoq oqaluffik uterfiginngilaa. Ilaqutaata Jehovamut Nalunaajaasuusup 1986-imi martsiugaa Shirley uialu Bibelimik atuaqqissaaqatigisalerpai, sivitsunngitsorlu kuisipput. Shirley oqarpoq: „Sallusuissut ilisimallugu nuanneqaaq, makiffissamik neriuut Jehovallu nuannersorsuarmik pissuseqarnera ilisimallugit nuanneqaaq.“

Makititsineq — qaqugu?

Takorluukkami Johannesip takuai ’amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat, issiavissaarsuup saani savaaqqallu saani qeqartut.’ (sarĸúmersitat 7:9) Amerlangaartut ’Guutip issiavissaarsuata saani’ qeqartutut eqqartorneqarmata nunami inuusussaanerat naleqqulluarpoq. (Jesaja 66:1) Kisianni taakkua ilaat maanna toqugunik, qaqugu makititaassappat? Qaqugorpiaq pinissaa Bibelimi eqqartorneqanngilaq, qularutissaanngilarli Guutip sorsunnissaata kingorna pinissaa — najoqqutassiaminik naapertuilluartunik maleruaajumanngitsut nunamit piiareerpagit. (2 Tásalûníkamiut 1:6-9) Akuliunnissap tamatuma ullussaq eqqartuutiffissaq aqqutissiuutissavaa Guutillu nunamut makinnissamut naleqquttuutitaasa tamarmik uummartinneqarnissaat kingunerissallugu. (Juánase 5:28, 29; apustilit suliáinik agdlagkat 24:15) Siulittuutit Bibelimiittut eqquunnerata takutippaa piumaartussat tamakku pissanganartut tupinnartullu qanittukkut piumaartut. — sarĸúmersitat 16:14-16.

Jesusip ajoqersugaasa ilaanni aperaat: „Suna najuunnissannut pissutsillu aaqqissuussaanerata naggatissaanut nalunaaqqutaassava?“ Akilluni Jesusip sorsunnerit, nerisassaaleqinerit, nunap sajunneri nappaatillu, taavalu silarsuarmi tamarmi Naalagaaffik pillugu tusagassap nuannersup oqaluussissutigineqarnissaa taavai. — Matîuse 24:3-14, (NV); Lúkarse 21:7-11.

Siulittuut tamanna malunnartoq 1914-imiit, sorsunnersuup siulliup aallartinneragut, eqquutilerpoq. Sorsunnersuaq tamanna pissutigalugu inuit millionilikkuutaat toqutaasimapput, nunanilu amerlasuuni kaannersuaq nerisassaaleqinerlu kinguneralugit. Sorsunnersuup aappaata nalaani kingornalu pissutsit suli ajorneroqaat.

Nappaatit tuniluuttut eqqarsaatigalugit AIDS ajornerpaatut amerlasuunit isigineqarpoq. „Nappaat tunillaassuuttoq tamanna ima siaruartigalunilu toqussutaatigimmat, Toqumut Qernertumut — nappaammut 1300-kkunni Europamiut aggornerisa sisamaannik toqutsisumut — ilisimatuut naleqqiuppaat .“ — Det Bedste, juni 1987.

Annilaarnartut ullumikkut atuuttut eqqarsaatigalugit, makiffissaq qanoq nuanningaartigissava! Taamanikkussaq nuannaarfiussaaq nalissaqanngitsumik, ilaqutariit toqu pissutigalugu Carolannip Shirleyllu misigisimasaattut avissaartinneqarsimagaluartut kattuteqqippata. Maannakkut tamatta iliuuserisinnaasarput silatusaarnerpaaq tassaavoq inuunitta Guutip piumasaanut naapertuuttunngorsarnissaa. Taamaaliorutta, makititaaffimmi najuunnissatsinnut periarfissaqarumaarpugut. (wD 15/10 89)

[Qupp. 7-mi ungalusaq]

Soorlu orpik kipisaq naaleqqissinnaasoq, Guutip toqusimasut eqqaamasani makitissinnaavai. — Job 14:7-9, 14, 15.