Inuusuttut Guutimut kiffartortut

ISUMAQARPIT qaqutigoortuusoq inuusuttut ileqqorissut Guuti pillugu oqaloqatigiumallutit akissarsiaqaratik piffissartik atorumassappassuk? Tupaallannarpa meeqqat ukiuni uppinngissuseqarfiusuni Bibelip siunissamik pilluarnartumik neriorsuutaanik nuanningaartunik angajoqqaamik oqaluussinerannut ilaanerat?a

Jehovap Nalunaajaasuisa silarsuarmi tamarmi ilagiivisa 60.000-init amerlanerusut amerlanersaanni inuusuttorpassuaqarpoq. Taakku ilagiit nalinginnaasut sapaatikkut atuarfiinut ilaasanngillat, Jehovap Nalunaajaasuisali ilagiivisa ataatsimiinnerinut ilaasarlutik peqataasarlutillu. Nukarliunerit annikitsunik oqaaseqarnikkut peqataasarput, ilaalu suli 13-inik ukioqalertinnatik „teokratiimik ilinniarfimmut“ ilannguttarput. Inuusuttuaqqat amerlasuut atuanngiffeqarnertik inunnik allanik Guutimik taassumalu siunissamik neriorsuutaanik nuanningaartunik ilinniartitsilluni ikiuinermut atortarpaat.

Tamannali nutaajunngilaq. Bibelimi oqaluttuarineqarput angutit arnallu aammalu inuusuttut meeqqallu mikisut aalajaatsut Guutimik kiffartuussinermik maligassiuilluartut.

Bibelimi Tussiaatini siulittuutigineqarpoq angutit inuusuttut kanernertulli inuummarinnartigalutik amerlatigalutillu, Guuti kiffartuunniarlugu, sassarumaartut. Aamma siulittuutigineqarpoq ’nukappiaqqat niviarsiaqqallu’ Jehovap aqqa unnersiutigissagaat. (Tussiaat 110:3; 148:12, 13) Qularnanngitsumillu ukiumi 33-mi pinsip ulluani Guutip anersaava illernartoq kuineqarmat aamma inuusuttunik najuuttoqarsimassaaq. Ulloq tamanna 3000-it missingisa oqaaseq ilassivaat kuisillutillu. Apustilip Peterip pisimasoq tamanna misinnangaartoq Joelip siulittuutaanik eqquutitsinerunerarpaa: ’Ernisilu panisilu pruffiitisut oqalussapput, inuusuttortasilu takorloornernik takusaqassapput, utoqqartasilu sinnattukkanik sinnattussapput.’ — apustilit suliáinik agdlagkat 2:4-8, 16, 17, 41.

Jehova Guutimik kiffartuussisimasorpassuit akornanni taaneqarsinnaapput inuusuttut Samuel, kunngi naapertuilluartoq David, pruffiitit ilisimaneqarluartut Jeremias Davidilu, aamma Timoteus aalajaatsoq Bibelimi eqqartorneqartut. Bibelimi eqqartorneqartut taakku ilanngutassiap matuma tulliani allaatigineqarput. Ilanngutassiap takutissavaa sooq inuusuttut utoqaanerusullu Guutimik kiffartuussinertik pingaartikkaat, aamma sooq inoqatitik taamaaliornissaannik ikiorniarlugit piffissamik taama annertutigisumik atuisut. (wD 1/8 90)

[Quppernerup ataani ilanngussaq]