Oqartussaasunut qulliunerusunut killeqartumik naalagarsiortariaqarnerput
’Tamanna pillugu naalattariaqarput.’ — RÛMAMIUT 13:5.
1. Jehovap nalunaajaasui oqartussaasunit nazistiusunit sunik ajornartorsiortinneqarsimappat, tamannalu ’ajortuliorsimanerannik’ pissuteqarpa?
1940-MI januarip ulluisa 7-ianni Franz Reiter Østrigimiullu inuusuttut allat tallimat niaquiissussuarmik toqutaapput. Taakku Bibelimik atuaqqissaartartuupput (Jehovap nalunaajaasui), nalunngeqatiginnissusertillu tunngavigalugu Hitlerip „Naalagaaffiata pingajusaa“ pillugu sorsussinnaannginnamik toqutaallutik. Franz Reiter Jehovap nalunaajaasuisa tuusintillit sorsunnersuup aappaata nalaani upperisartik pissutigalugu toqutaasut ilagaat. Suli amerlanerusut ukiorpassuarni parnaarussivimmi naalliutsitsiviusumi inuuneq naammagittarlutik atortariaqarsimavaat. Taakkua tamarmik naalakkersuisut nazistiusut ’panaat’ atortariaqarsimanerpaat ’ajortuliorsimagamik’? (Rûmamiut 13:4) Naamerluinnaq! Paulusip nangilluni oqaaserisaasa takutippaat kristumiut taakkua Guutip inatsisai Rûmamiunut agdlagkat-ni allassimasut maleruaraat, naak tamatumuuna naalakkersuisunit naalliutsitaagaluarlutik.
2. Sooq oqartussaasut qulliunerusut naalanneqartariaqarpat?
2 Rûmamiunut agdlagkat 13:5-imi apustili ima allappoq: ’Tamanna pillugu naalattariaqarput kamanneq kisiat pissutiginagu tarnilli nalunngissusiattaaq pissutigalugu.’ Siuliini Paulusip eqqartorsimavaa naalakkersuisut ’panaligaanerat’ naalannissaannut pissutissaalluartoq. Maannali pissutissaq pingaarnerusoq eqqaavaa, tassalu tarnip nalunngissusia. Guuti ’ilerasuutigisaqarnata’ kiffartuunniarparput. (2 Timûtiuse 1:3) Bibelimi peqquneqarpugut oqartussaasunut qulliunerusunut naalattarnissatsinnik, peqqussullu tamanna maleruarparput Guutip isaani eqqortuliorusukkatta. (Eprîarit 5:14) Nalunngeqatiginnissuserput Bibelimit ilinniarsimasarput killinneqaatigalugu oqartussaasut naalattarpavut, aamma kisimiikkaluaraangatta. — Naleqqiuguk Nalunaajaasup oqaasii 10:20.
’Tamanna pillugu aamma akileraarutit tunniuttarpasi’
3, 4. Jehovap nalunaajaasuisa suna tusaamasaassutigaat, sunalu pillugu kristumiut akileraartarnerat naleqquttuua?
3 Ukiorpaaluit matuma siornagut Nigeriami perulluliortoqalerpoq inuit akileraartartussanngortitaanerat pissutigalugu. Arlallit toqutaapput, oqartussaasullu sakkutuut akuliutitippaat. Ilaatigut sakkutuut rigssalimi ataatsimiinneqartillugu isaapput, susoqarnera paasiniarlugu. Paasileramikku Bibeli tunngavigalugu Jehovap Nalunaajaasui ataatsimiinnerigaat, sakkutuut naalagaanersaata sakkutuut illumit aneqquai oqarluni: „Jehovap Nalunaajaasui akileraarnissamut akerliuniartuunngillat.“
4 Jehovap nalunaajaasuisa Nigeriamiuusut Paulusip oqaasiinik ukuninnga maleruaasuunertik tusaamasaassutigaat: ’Tamanna pillugu aamma akileraarutit tunniuttarpasi tamannarpiaq isumageqqullugu Guutip kiffartortigimmagit.’ (Rûmamiut 13:6) Jesus oqarami: ’Kaasari tunisiuk kaasarip pissaanik’, akileraartarneq pivaa. (Matîuse 22:21) Silarsuarmi oqartussaasut isumagisarpaat aqqusernit, politiinit illersorneqarnissaq, atuagaateqarfiit, tamanit angallassissutit, atuarfiit, allakkerisarfiit kiffartuunneqarnerillu allarpassuit. Tamakku atortuaannangajappavut. Akileraartarnitsigut tamakkua akilerneqartarnissaat naleqqutiinnarpoq.
’Tamaasa pisassaannik tunisigik’
5. Oqaaserisaq: ’Tamaasa ilissinnit pisassaannik tunisigik’ qanoq paasisariaqarpa?
5 Paulus nangilluni allappoq: ’Tamaasa ilissinnit pisassaannik tunisigik: akileraarutinik pisussaq akileraarutinik, ilanngaatinik pisussaq ilanngaatinik, ersinermik pisussaq ersinermik, ataqqinninnermik pisussaq ataqqinninnermik.’ (Rûmamiut 13:7) ’Tamaasa’ tassaapput silarsuarmi oqartussaasut ’Guutip kiffarisai’ tamarmik. Pinngitsoqaratik. Naak naalakkersuinikkut aaqqissuussaanermi iluarinngisatsinni inuugaluarluta akileraartarpugut. Nunat ilaanni upperisarsioqatigiit akileraartussaatitaanngikkaangata, ilagiinnit tamanna iluaqutigineqarsinnaavoq. Kristumiut innuttaasutut allatulli inatsisit malillugit akileraartussaatitaannginnerit iluaqutigisinnaavaattaaq. Kristumiulli kikkulluunniit peqquserlullutik akileraanngitsoortariaqanngillat. — Naleqqiuguk Matîuse 5:41; 17:24-27.
6, 7. Akilaraarutit ilaat iluarinngisatsinnut atorneqarpata immaqalu oqartussaasunit malersorneqarutta allaat, sooq akileraartuartariaqarpugut?
6 Akitsuutilli ilaat aalajangersimasoq naapertuilluanngitsuutinneqarpat? Imaluunniit akileraarutit ilaat iluarinngisatsinnut atorneqarpata, soorlu naartuersitsinernut, aammik toqqarsivinnut imaluunniit attaviitsuunitsinnut akerliusunut? Taamaakkaluartorli akileraartarpugut. Oqartussaasut aningaasat isertinneqartartut atorneqartarnerat akisussaaffigaat. Oqartussaasut eqqartuutissallugit piginnaaneqartitaanngilagut. Guuti tassaavoq ’nunarsuup eqqartuussisaa’, piffissanngorpallu naalakkersuisut oqartussaanerminnik qanoq atuisimanersut nassueqqussavai. (Tussiaat 94:2; Jeremia 25:31) Taamanikkussap tunngaanut akileraartuartarniarpugut.
7 Naalakkersuisunimmi malersorneqartilluta? Taamaattoqaraluarpalluunniit ulluinnarni kiffartuunneqarnerit iluaqutigisavut pillugit akileraartarniarpugut. Avisimi Examiner-imi, San Francisco-mi saqqummersartumi, Jehovap nalunaajaasui Afrikami nunat ilaanni malersorneqartut pillugit allassimavoq: „Innuttaasutut maligassaalluartutut isigineqarsinnaapput. Pissusissamisoortumik akileraartarput, napparsimasunik paarsisarlutik, atuarsinnaannginneq allassinnaannginnerlu akiorniarsaraattaaq.“ Aap, Jehovap nalunaajaasui taakku malersorneqartut akileraartarput.
’Ersinermik’ ’ataqqinninnermillu’
8. Qanoq ililluta oqartussaasut ’ersigisariaqarpavut’?
8 ’Ersineq’ Rûmamiut 13:7-imi eqqartorneqartoq tassaanngilaq qunutussuseq, tassaallunili silarsuarmi oqartussaasunut ataqqinninneq, inatsisaannik unioqqutitsinissamik mianerinninneq. Oqartussaasut atorfii pillugit, oqartussaasut inuttut pinnagit, ataqqinninneq tamanna takutinneqarpoq. Bibelimi Romamiut kaasariat Tiberius siulittuutaasumik ’inupiluk’-mik [„narrunartoq“-mik, NV] taaneqarpoq. (Daniel 11:21) Kaasariuvorli, taamaattumillu kristumiut mianeralugu ataqqisariaqarsimavaat.
9. Qanoq ililluta oqartussaasut nunamiuusut ataqqisinnaavavut?
9 Allalli ataqqigaangatsigik Jesusip peqqussutaa malillugu upperisarsiornikkut atorfillit taaguutaat atorneq ajorpavut. (Matîuse 23:8-10) Silarsuarmili oqartussaasut pineqartillugit ataqqinninnermik takutitsiviginiarlugit taaguutaasa atornissaat ajorinngilarput. Paulusip Romamiut nunamut naalagaasut saaffigigaangamigit ’pissaaneqangaartutit’-mik taasarpai. (apustilit suliáinik agdlagkat 26:25) Danielip Nebukadnezar „Kunngiaa“-mik imaluunniit ’naalagara’-mik taasarsimavaa. (Daniel 4:19, aamma takuuk nutsigaq nutaanngitsoq.) Ullumikkut kristumiut taaguutit ataqqinaataasut, soorlu „Ataqqinangaartutit“, atorsinnaavaat. Eqqartuussisoq inimut eqqartuusiviusumut iserpat nikuissinnaapput imaluunniit ileqqorineqartoq malillugu ataqqinnillutik naalakkersuisumut sikissinnaallutik.
Killeqartumik naalagarsiorneq
10. Jesusip qanoq ililluni takutippaa oqartussaasut nunamiuusut peqqussutigisinnaasaat killeqartut?
10 Jehovap nalunaajaasui inuit oqartussaassusiannut naalattarmata, suna pillugu Franz Reiter allarpassuillu taama sualutsigisumik naalliuttariaqarsimappat? Naalagarsiornitta killeqarnera pissutigalugu oqartussaasullu ilaatigut paasineq ajormassuk peqqussutigisinnaasatik Bibeli najoqqutaralugu killilerneqartartut. Oqartussaasut kristumiussutsikkut ilinniarneqarsimasumut nalunngeqatiginnissutsimut akerliusumik peqqusippata, Guutimit akuerineqarlutik pisinnaatitaanertik qaangersimassavaat. Jesusip tamanna nassuiarpaa oqarami: ’Kaasari tunisiuk kaasarip pissaanik Guutilu Guutip pissaanik.’ (Matîuse 22:21) Kaasarip Guutip pissaagalua piumasarippagu, Guuti qutsinnerpaasoq akueraarput.
11. Inuit oqartussaasut peqqussutigisinnaasaasa killeqarnerannik najoqqutassiaq suna nalinginnaasumik akuerineqartarpa?
11 Taamatut isumaqarneq inuiaqatigiinnut navianartuua killuusserpaluttuulluniluunniit? Naamerluinnaq. Tamanna tassaagaluarpoq najoqqutassiaq nunat atugartunngorsagaasimasut amerlanersaanni akuerineqartoq. Ukiuni 1400-kkuni Peter von Hagenbach eqqartuussassanngortitaavoq Europap ilaani naalakkersuisuuffigisamini naalakkersueriaaseq naakkittaatsuliungaartuusoq pilersissimagamiuk. Imminut illersorniarluni eqqartorpaa naalakkaminit Burgundimi hertuugiusumit peqquneqarnini malillugu iliuuseqaannarsimalluni. Tamannali tunuartinneqarpoq. Taamanimiilli inuit oqartussaasunit qutsinnerusunit peqquneqarsimanertik malillugu naakkittaatsuliorsimasut amerlasuunit eqqartuussassaannginnerarneqartarsimapput. Tamatumunnga assersuutaasoq tusaamaneqarnerpaasoq tassaavoq Nürnbergimi eqqartuussinermi sorsunnermi pinerluttuliortut nazistiusut tamanna patsisiginiallarmassuk. Eqqartuussisoqatigiilli nunanit tamalaaneersut akipput: „Inuk nammineq inuiaqatigiit akornanni allaassutaasunit pingaarnerusunik akisussaaffeqartarpoq, aamma nunani aalajangersimasuni oqartussaasut taassumunnga naalaqqusinerannittaaq pingaarnerusunik.“
12. Bibelimi maligassiat suut takutippaat Guutip kiffaasa oqartussaasut piumasarisaat sualuppallaartut naalanniarsimanngikkaat?
12 Guutip kiffaasa qanoq annertuutigisumik oqartussaasunut qulliunerusunut ilerasuuteqaratik naalagarsiornissartik killeqartartoq paasiuartarsimavaat. Ægyptenimi Mosesip inunngorfiata nalaani Faraop ernisussiortut marluk hebræeriusut peqquai nukappiaqqat inunngorlaat hebræeriusut tamaasa toquttaqqullugit. Ernisussiortulli nukappiaqqat inuutiinnarpaat. Faraop peqqusaanik sumiginnaagamik eqqunngitsuliorpat? Naamik, nalunngeqatiginnissusertik Guutimit tunniunneqartoq malippaat, tamannalu pillugu Guutip pilluaqquai. (2 Moses 1:15-20) Israelikkut nunagisaminnit Babylonimi qimarngummata Nebukadnezarip naalagaaffimmi atorfillit tamaasa, aammattaaq hebræerit Sjadrak, Mesjak Abed-Negolu, peqquai inuusaliaq narsami Durami napparneqartissimasani pallorfigeqqullugu. Hebræerit pingasut taakkua tamanna akuersaarumanngilaat. Eqqunngitsuliorpat? Naamik, Kunngip peqqusaa maleruaraluarunikku Guutip inatsisaa unioqqutissagaluarpaat. — 2 Moses 20:4, 5; Daniel 3:1-18.
’Guuti naalakkatut naalaguk’
13. Kristumiut siulliit oqartussaasut qulliunerusut killeqartumik naalagarsiorfiginerisigut qanoq ilillutik maligassiuippat?
13 Oqartussaasunit juutiusunit Peter Johannesilu Jesus pillugu oqaluussiunnaaqquneqaramik, ima akipput: ’Nammineq oqartussaagitsi: Guutimi iluassanersoq ilissi Guutimit naalanneqarnerugussi?’ (apustilit suliáinik agdlagkat 4:19; 5:29) Nipangersimasinnaanngillat. Atuagassiami The Christian Century-mi kristumiut siulliit nalunngeqatiginnissusertik malillugu aalajangerfigisaat alla tikkuarneqarpoq: „Kristumiut siulliit sakkutuutut kiffartorneq ajorput. Roland Baintonip eqqartorpaa ’Testamentitaap allanneqarnerata naammassilernerata nalaaniit ukiut 170-180-t tikillugit sakkutuut akornanni kristumioqarsimaneranik takussutissaqanngivissoq’ (Christian Attitudes Toward War and Peace [Abingdon, 1960], quppernerit 67-8). . . . Swift oqarpoq Justinus Martyrip ’kristumiut nakuusernaveersaartussaanertik pissusissaviusutut naatsorsuukkaat’.“
14, 15. Najoqqutassiat Bibelimeersut suut kristumiut siulliit oqartussaasunut qulliunerusunut killeqartumik naalagarsiornissaannut aalajangiisuuppat?
14 Sooq kristumiut siulliit sakkutuutut kiffartorneq ajorpat? Qularnanngitsumik tamarmik peqqissaartumik Guutip oqaasia atuaqqissaartarpaat immikkullu nalunngeqatiginnissusertik Bibelimit ilinniarsimasartik malillugu aalajangiisarlutik. ’Silamiut ilaginngimmatsik’ arlaannaanulluunniit akuliunnianngillat, attaviitsuunertillu pissutigalugu silarsuup matuma akerleriissuteqarnerinut akuliussinnaanatik. (Juánase 17:16; 18:36) Guutimimmi pigineqarput. (2 Timûtiuse 2:19) Naalagaaffik pillugu sorsunnikkut toqutaagaluarunik kaasari Guutip pissaanik tunissavaat. Silarsuaq tamakkerlugu qatanngutigiit asaqatigiinnikkut ataasiussusillit ilagaattaaq. (Juánase 13:34, 35; Kulorsamiut 3:14; 1 Pîtruse 4:8; 5:9) Ilerasuuteqaratik sakkut atorsinnaanngilaat taamaaliorunimmi kristumioqatiminnik toqutsisoorsinnaapput.
15 Tamatumunnga atatillugu upperisarsiornikkut ileqqut nalinginnaasut, soorlu kaasarimik guutisiorfiginninneq, kristumiut peqataaffigisinnaanngilaat. Taamaattumik ’inuttut navianartorujussuusutut’ isigineqartarput, ’inunnillu allanit taamaammat pasineqartarlutik’. (Still the Bible speaks W. A. Smart-imit) Naak kristumiut Paulusimit ’ersinermik pisussamut ersinermik tunisinissaminnut’ kajumissaarneqaraluartut, Jehovap annertuuneroqisumik mianerinninneq ataqqinninnerluunniit pisassarigaa puigorsimanngilaat. (Rûmamiut 13:7; Tussiaat 86:11) Jesus nammineq oqarpoq: ’Ersigissanngilasi timimik toqutsisut, tarnimilli toqutsisinnaanatik; annerusumilli ersigisiuk timimillu tarnimillu [Gehennami, NV] aserortitsisinnaasoq.’ — Matîuse 10:28.
16. (a) Sutigut kristumiut oqartussaasut qulliunerusut naalassanerlugit mianersortariaqarpat? (b) Quppernermi 11-mi ungalusap suna takutippaa?
16 Ullumikkut kristumiuulluta assingusumik eqqumaffigisassaqarpugut. Guutipilussioriaatsit assigiinngitsut maanna atuuttut peqataaffigisinnaanngilavut, soorlu assersuutigalugu assilissanut assersuutaasunulluunniit pallorfiginninnernut. Aammattaaq inuk peqatigiiffilluunniit annaassisuusutut tikkuarsinnaanngilavut. (1 Korintumiut 10:14; 1 Juánase 5:21) Kristumiut siulliit assigalugit kristumiutut attaviitsuunerput eqqarsaatigalugu eqqunngitsunut akuersiinnarsinnaanngilagut. — Naleqqiuguk 2 Korintumiut 10:4.
’Piuaallusi mianerinnillusilu’
17. Nalunngeqatiginnissusertik malillugu naalliuttut Peterimit sumik unnersuunneqarpat?
17 Aalajangersimanerput eqqarsaatigalugu Peter allassimavoq: ’Ukumi saammaannarsissapput nalunngeqatiginnissutsimikkut Guutimut ataneq pillugu iluanngitsumik anniartitaasaraangamik naalliunnartunik naammaginnittartut.’ (1 Pîtruse 2:19) Aap, kristumiut naak malersorneqaraluarlutik naammagalugu atoraangassuk Guutimit iluarineqartarpoq. Taassumuunattaaq kristumiut uppernerat nakussatsinneqartarpoq pitsanngorsarneqartarlunilu. (Jâko 1:2-4; 1 Pîtruse 1:6, 7; 5:8-10) Peter nangilluni allassimavoq: ’Kisianni iluarneq pillugu naalliukkaluarussi pilluarpusi. Taakkuali ersiornerannik ersiornaveeritsi, annilaaqinasilu; Naalagarli Kristus uummatissinni illernartissiuk, piareertuinnarlusi kikkunnulluunniit neriuutissaq ilissinniittoq pillugu ilissinnik nassueqqusisunut illersuutissaqarniarlusi, kisianni piuaallusi mianerinnillusilu.’ (1 Pîtruse 3:14, 15) Unnersuussineq tamanna pitsaalluinnartuuvoq.
18, 19. Oqartussaasut piumasamik upperisarsiorsinnaaneq killilersulerpassuk piuaanneq ataqqinninnerlu qanoq iliuaqutaasinnaappat?
18 Oqartussaasut kristumiut pissusilersornerannik paasinerluinerat imaluunniit kristumiuuneraqatigiit upperisarsiornikkut pisortaasa Jehovap nalunaajaasuinik ajorneraanerat pissutigalugit malersugaaneqalersillugu, oqartussaasut piviusuusunik oqaluttuunneqarunik immaqa assortuineq millisinneqarsinnaassaaq. Kristumiup malersuisuni timip pii atorlugit assortorneq ajorpai, piuaallunili ataqqinnittarpoq. Kisianni inatsisit naapertorlugit atorsinnaasani tamaasa atorlugit upperisani illersorniassavaa. Taamaalioreeruni piumaartussat Jehovap assaanut tunniussavai. — Filípimiut 1:7; Kulorsamiut 4:5, 6.
19 Oqartussaasut ataqqiniarlugit kristumiup sapinngisamik akuersilluni ilerasuuteqaranili naalanniartarpai. Assersuutigalugu, ilagiit ataatsimiittarneri inerteqqutigineqalerpata, kristumiut maluginiarnannginnerusut periaaseralugit Jehovap nerriviani neriuaannarniassapput. Oqartussaasup qutsinnerpaap Jehova Guutip apustili Paulus aqqutigalugu ima oqarfigaatigut: ’Misissoqatigiinniartalu asanninnermut ajunngitsuliornermullu kajumissaaqatigiilluta, katisimasarfippullu qimannaveertigu, ilaat taamaattarmata.’ (Eprîarit 10:24, 25) Malunnaarsaartunik pissuseqarluni ataatsimiinneqarsinnaavoq. Naak najuuttut ikikkaluartut Guutip aaqqissuugaaneq tamanna pilluaqqussagaa qularisariaqanngilarput. — Naleqqiuguk Matîuse 18:20.
20. Tusagassamik nuannersumik tamanut oqaluussineq inerteqqutigineqalerpat kristumiut qanoq iliuuseqartariaqarpat?
20 Oqartussaasut ilaasa aamma inunnut tamanut oqaluussisarneq inerteqqutigisarsimavaat. Kristumiut oqartussaasut taamaattut ataanni inuugunik eqqaamasarpaat Oqartussaasoq qutsinnerpaaq Jesus aqqutigalugu oqarsimasoq: ’Iivangkiiliu inuiaqatigiinnut tamanut oqaluussissutigineqarallassaaq.’ (Mákorse 13:10) Taamaattumik qanoq akeqassagaluarpalluunniit Oqartussaasoq qutsinnerpaaq naalattarpaat. Ajornartinnagu apustilit inuit akornanni illumiillu illumut oqaluussisarput; aammali periaatsit allat atorlugit inuit nalunaajaaffigineqarsinnaapput, soorlu assersuutigalugu sukkulluunniit nalunaajaanikkut. (Juánase 4:7-15; apustilit suliáinik agdlagkat 5:42; 20:20) Amerlanertigut oqartussaasut oqaluussisarneq akuliuffigineq ajorpaat Bibeli kisiat atorneqartaraangat — tamatumalu Jehovap nalunaajaasui tamarmik Allakkat tunngavigalugit tunngaveqartumik eqqarsarsinnaanermik ilinniartitaalluartariaqarnerat erseqqissarpaa. (Naleqqiuguk apustilit suliáinik agdlagkat 17:2, 17.) Nakimaallutik, ataqqinnillutilli, kristumiut Jehova naalanniarlugu qanoq ilioriarfissarsisinnaagajuttarput oqartussaasunit qulliunerusunit kamaanneqaratik. — Títuse 3:1, 2.
21. Kaasarip malersugaaneq naakkittaatsoq aallartippagu kristumiut qanoq qisuariartariaqarpat?
21 Ilaanneeriarlutilli oqartussaasut malersugaaneq naakkittaatsoq aallartittarpaat. Taamaattoqaraluartoq eqqortuliortuaannarsinnaavugut. Franz Reiter inuusuttoq qinersisariaqarsimavoq: eqqunngitsoq akueriinnassallugu toqutaassallunilluunniit. Guuti pallorfigiunnaarsinnaannginnamiuk sapiilluni toquvoq. Toqunissami aqaguttoq unnukkut anaanani ima allaffigaa: „Aqagu ullaakkut toqutaassaanga. Guutimit nakussatsinneqarpunga, soorlu siornatigut kristumiut ilumoortut tamarmik nakussatsinneqartarsimasut . . . Toqu tikillugu aalajaakkussi tamatta makinnissami naapeqqikkumaarpugut.“
22. Sumik neriugisaqarpugut, tamatumalu piviusunngornissaa tikillugu qanoq iliortariaqarpugut?
22 Siunissami inuiaat tamarmik inatsit ataasiinnaq maligassarilissavaat: inatsit Jehova Guutip pia. Taamanikkussaq tikillugu peqqissaartumik Guutip aaqqissuussineranut naalattariaqarpugut oqartussaasullu qulliunerusut killeqartumik naalagarsiorfigalugit Jehova, Naalagarput kisimiilluni oqartussaasoq, tamatigut naalakkatsigu. — Filípimiut 4:5-7. (wD 1/11 90)
Eqqaamavigit?
□ Sooq oqartussaasut qulliunerusut naalanneqartariaqarpat?
□ Sooq kaasarimut akileraarutissat nangaanata akilertariaqarpavut?
□ Qanoq ililluta oqartussaasut ataqqisariaqarpavut?
□ Kaasarimut naalagarsiornerput sooq killeqarpa?
□ Kaasarip uatsinnit Guutip pissagaluai piumasarimmagit malersorneqalerutta qanoq qisuariartariaqarpugut?
[Qupp. 11-mi ungalusaq]
Ataqqinninneq, pallorfiginninnerunngitsoq
Ullut ilaanni ullup qeqqata siorna Terrap, Jehovap nalunaajaasuisa ilaata inuusuttup Canadamiup, malugaa ilinniartitsisoq atuaqatimi ilaat ilagalugu ini atuarfigisartik sivikitsumik qimatsiaraa. Kinguninngua ilinniartitsisup eqqissilluni Terra atuarfiup naalagaata allaffianut ilageqqulluni qinnuigaa.
Allaffimmi Canadamiut erfalasuat atuarfiup naalagaata allaffiani siaarsimasoq Terrap takuaa. Ilinniartitsisup Terra peqquaa erfalasoq qitseraqqullugu! Oqarpoq Terrap inuiattut erinarsuut erinarsuutigineq ajormagu erfalasorlu ataqqiniarlugu ilassineq ajorlugu, taava erfalasoq qitseraannarsinnaagaa. Terra naaggaarpoq nassuiaallunilu Jehovap nalunaajaasuisa erfalasoq ataqqigaluarlugu pallorfigineq ajoraat.
Inimut atuarfiusumut uteramik ilinniartitsisup atuartut nalunaarfigai aatsaannguaq misiliisimalluni. Atuartut marluk, tamarmik immikkut, atuarfiup naalagaata allaffianukaassimavai, tassanilu erfalasumut qitserarnissaat peqqussutigisimallugu. Naak nunagisamik pingaartitsinermik ileqqorisat peqataaffigisaraluarlugit, atuartoq siulleq peqquneqarami erfalasumut qitserarsimavoq. Tamatumunnga akerliusumik Terrap, inuiattut erinarsuummik erinarsoqataaneq ajortup erfalasorlu ataqqiniarlugu ilassinninneq ajortup, taamaattoq taamaaliornikkut erfalasoq narrunarsarumasimanngivippaa. Ilinniartitsisoq oqarpoq Terra eqqortumik ataqqinnittuusoq. — Jehovap Nalunaajaasuisa ukiumoortumik nalunaarsuiffiat, 1990.
[Qupp. 7-mi suminngaanneernera]
French Embassy Press & Information Division
USSR Mission to the UN