Biibili qanoq nalunngitsigaajuk?
’Thomasip iivangkiiliua? Suu, soorunami Biibilimut atavoq. Jonamilli allakkat atanngillat. Kristusip inunngorfia? Eeh, Jerusalemimi — immaqaluunniit Nazaretimi? Jesajap allagai Biibilip immikkoortuanut siullermut aappaanulluunniit atanersut eqqaamarpianngilara. Apustilit qassiusimanersut? Naluippara.’
„APERSUINERMI akissutit tamakku pillugit tupigusuttoqassanngikkaluarpoq apersorneqartut tassaannaagaluarpata kristumiuunngitsut,“ atuagassiami Christianity Today-mi taama allassimavoq. „Tupinnartoq — aamma isumakulunnartoq — tassa kristumiut ’ernioqqissitaanerartut’ Biibili pillugu nalulluinnassusiat.“
Assersuutigalugu aperineqartut ilaasa 22 procentii isumaqarput „Thomasip iivangkiiliua“ Biibilimut atasoq, 13 procentillu akipput: „Naluara.“ Jonamik allakkat eqqarsaatigalugit 27 procentii isumaqarput Biibilimut atasut, 12 procentiisalu naluippaat. Aperineqartut 6 procentiisa sumi Jesusip inunngorsimaneranik eqqoriaanissartik allaat saperpaat; 16 procentiisa Jerusalemimiusoraat 8 procentiisalu Nazaretimiusoraat. 13 procentiisa naluaat Jesajap allagai Biibilimiinnersut, 11 procentiilu isumaqarput Kristumiut Allagaataat Griikerisut-niittut. Naallu amerlanersaasa nalunngikkaluaraat apustilit 12-iusimasut, taamaattoq 12 procentiisa kisitsisit allat eqqartorpaat, marlunnit 20-t sinnerlugit. 10 procentiisa amerlassusiat naluippaat.
Apeqqut nalornisoorutigineqarnerpaasoq tassaavoq oqaariaaseq „Imminnut ikiortut Guutip ikiortarpai“ Biibilimi nassaarineqarsinnaanersoq. Kristumiuunerartut apersuinermi peqataasut 38 procentiisa nalunngilaat tamanna Biibilimi allassimanngitsoq, kisianni amerlanerusut, tassa 42 procentii, isumaqarput tassaasoq Biibilimik issuagaq. Sinneri, 20 procentit, ima akisariaqarput: „Naluara.“
„Sooq Biibili taama ilisimasaqarfigineqanngitsigaa?“ Christianity Today taama aperivoq. „Qularnanngitsumik ikittuinnaat Biibili atuartarmassuk. Amerikamiut affaasa Biibili atuarneq ajorpaat. Kristumiut ’ernioqqissitaanerartut’ amerlanersaat sapaatip-akunneranut ataasiaannarlutik marloriaannarlutilluunniit Biibili atuartarpaat, imaluunniit atuarneq ajorpaat. Aap, tupinnanngilaq kristumiuunerartut taama amerlatigisut Biibili pillugu taama ilisimasakitsigimmata!“ (wD 15/1 91)