Atuartartut apeqqutaat
Sooq Noap tulugaq siulliullugu taavalu tui umiarsuarmit aallartissimavai?
Biibilimi tamanna sukumiisumik nassuiarneqanngilaq, kisianni Noa taamaaliornerminut pissutissaqarluarsimasorinarpoq.
Ulluni 40-ni unnuanilu 40-ni nuna ima sialussuarfigineqarsimatigaaq allaat qaqqat inngii qaammatini tallimani immamit matuneqarsimallutik. Taava kingorna ’umiarsuaq Araratip qaqqaani tinugussimavoq’. (1 Moses 7:6–8:4) Qaammatialuit kingorna ’qaqqat qaarpiaat puttussimapput’, Noallu ’tulugaq anisissimavaa, taannalu uteqattaartuarsimavoq imersuaq nunami tissorserlugu’. — 1 Moses 8:5, 7.
Sooq Noap tulugaq siulliullugu aallartissimavaa? Aap, timmiaq taanna qasujaatsuuvoq suugaluartunillu nerisaqartarluni, soorlu nersutinik toqungasunik. Noap tulugaq aallartissimavaa immaqa takuniarlugu utissanersoq imaluunniit nuna nuiartortillugu timinik toqungasunik nerisaqalersimalluni utinngitsuuinnassanersoq. Biibilimili oqaatigineqarpoq tulugaq utersimasoq, oqaatigineqarnanili Noamut utersimanersoq. Immaqa utersimavoq umiarsuarmi qasuerserniarluni tingeqqissimallunilu immap suli nunamik matuseqqasup qaavani puttasinnaasunik nerisassarsiorniarluni.
Taava Noa tuimik aallartitsivoq. Ima allassimavoq: „Tuili miffissaminik nassaannginnami Noa umiarsuarmut uterfigaa.“ (1 Moses 8:9) Tamatumuuna erserpoq Noap tui aallartissimagaa imaq apparsimanersoq paasiniarlugu. Tuit inunnik tatiginnipajaartuupput, taamaattumillu Noap ilimagisimassavaa uterumaartoq, umiarsuarmuinnaanngitsoq, namminerminulli.
Oqartoqartarpoq tuit nunamut panertumuinnaq mikkumasartut, qooqqunilu pukkitsukkut timmisartut naasunillu nerisaqartuullutik. (Hesekiel 7:16) Grzimek’s Animal Life Encyclopedia-mi ima paasissutissaqarpoq: „Tuit assigiinngitsut inerittussanik qaqqortarissanillu nerisaqartartut tamarmik nunap qaava, nerisassarsiorfiginerpaasartik, ulloq ataasiinnaq sinnerlugu apummit [imaluunniit imermit] matuneqaraangat nerisassaminnik nassaarnissartik ajornakusoortittarpaat.“ Taamaattumik tui uterpat Noap paasisinnaassavaa nunamik panertumik imaluunniit naasumik naarlaamik nassaarsimanersoq. Tui Noap aallarteqqaarmani umiarsuarmut utiinnarpoq. Aappassaanik uterpoq uuliaqutip pilutaanik kimmiarluni. Pingajussaanik utinngilaq, paasinarsilluni Noakkut nunamut ikaaginnarsinnaalersut. — 1 Moses 8:8-12.
Annikitsualuit tamakku immaqa inuit ilaasa nalaatsornerinnaasutut isigissavaat. Nassuiaarujussuanngikkaluarlunili oqaluttuami annikitsualuit tamakku ilanngunneqarsimanerat Biibilip uppernartuuneranut takussutissaavoq. Aammalu oqaluttuap tamatuma salluliuutaannginneranik imaluunniit oqaluttualiaannaannginneranik upperinninnissatsinnut pissutissippaatigut. Oqaluttuallu paasinassusia eqqarsaatigalugu ilimagineqarsinnaavoq kristumiut aalajaatsut Noa makititaappat apeqqutitillu nammineq akisinnaalerpagit assut soqutiginartunik tusagaqarnerunissaat. — Eprîarit 11:7, 39. (wD 15/1 92)