Jehova — Ikinngutit imaluunniit ilisarisimaannakkat?
„JAAKU, qaallutit ikinngutiga ilassilaarniaruk. Imaattoq — øh — qanormaannaa ateqarpit?“
Taamatut eqqarsarluaqqaarnani oqartumik tusarsimavit? Taaguut „ikinngut“ ilaannikkut qarsupittumik, immaqa ilisarisimalaaginnakkamut, atorneqakulavallaaluatsiarunarpoq. Sanilimik hr. Andersenimik nalunngisaqarneq allaavoq; taassuminngalu ikinnguteqarneq allaalluinnarpoq.
Oqaatsinik ujarlerfissiami „ilisarisimasaq“ nassuiarneqarpoq „inuk inuttut naapissimasaq, qanimulli attaveqarfiginngisaq“. Oqaaseq tamanna „oqaatsimit IKINNGUT-mit minnerusumik ilaqutariissutsimik misigiffiuvoq, minnerusumik atassuteqarfiulluni, minnerusumik ataqatigiiffiulluni minnerusumillu misiginneqatigiiffiulluni“.
Oqaatsip „ilisarisimasaq“-p isumaata inuttut ataqatigiilluinnarnermik amigaateqarnera nassuiaasooqataavoq sooq ilisarisimaannakkatta qanoq ingerlanerat maluginiarpallaarneq ajoripput, ikinngutittali suneri malinnaaffigeqqissaartarlugit aammalu nuannaarutaannik aliasuutaannillu misigeqatigilluinnartarlutigik. Soorunami taakkua inuttut kisimik susassaqarfii misigissutsinit aqutsiinnarluta akuliuffiginiarnissaat pinngitsoortariaqarparput. — 1 Pîtruse 4:15.
Ikinngutitsinnut qanilluinnarnerput immini nassuiaataavortaaq sooq taakkua iluarisaannik iliornissarput kissaatigisaripput. Ilisarisimaannakkatta iliuusiinit sunnertikulanngilagut, ikinngutitsinnilli atisatsigut, ileqqutsigut isumatsigullu sunnertiasuararsuulluta.
Ikinngutigiinneq ilisarisimaqatigiinnermit annerusumik tatigeqatigiinnermik, tunniusimaqatigiinnermik, ataqqeqatigiinnermik ilumoorfigeqatigiinnermillu akisussaassusermik misigaluni ineriartortitsinissamik piumaffiuneruvoq. Qilersorsimanani ikinnguteqarusuttoq ikinngummik pinnani ilisarisimasaannarmilli kissaateqarpoq. Qanimut ikinngutigiit akisussaaffimminnik, inuttut attaveqatigiilluinnarnermik nassatarisaanik, nuannaarlutik eqqortitsiumasarput. Akisussaaffimminnik eqqortitsinissartik ikinngutigiinnermik ilumuussusianut uppernarsaanissamut periarfissatut isigisarpaat.
Guutimik ikinngutiginninneq
Pinngortitsisutut Jehova inuit Ataatagaat qilammiusoq, taamaattumillu asaneqarnissaq, naalanneqarnissaq ataqqineqarnissarlu pisassarai. Kissaatigaali taamaaliussasugut imminut attaveqarusulluinnarnerput pissutigalugu, imaanngitsoq pisussaaffiinnartut isigigatsigu. (Matîuse 22:37) Aammalu kissaatigaa ikinngutitut asassagitsinni. (Tussiaat 18:2) ’Asaqqaaramisigut’ ikinngutigiinnermut taama ittumut naammalluinnartumik tunngaviliuussisimavoq. — 1 Juánase 4:19.
Siuaasatta siulliit, Adamip Evallu, Jehova ilisarisimasimavaat. Ikinngutigiinnissamilli neqeroorutaa ilassinerpaat? Ajoraluartumik ilassinngilaat. Namminissarsiorlutik Guutimit attaviitsuunissartik qineramikku takutippaat qanitarerusunngikkitsik. Ikinngutigiinnissamik neqeroorutaata pilluaqqussutissartai piumagaluarpaat, akisussaaffilli tamatuma nassataa tigujumanagu. Soorlumi tassa avatangiisiminni paratiiserpalaartuni iluarusuutissat toqqissisimanerlu inuulluutigerusukkaluaraat ’attartornermut akiliinngikkaluarlutik’.
Qujasuissutsip attaveqarusunngissutsillu anersaavat tamanna tamatta, annerusumik minnerusumilluunniit, kingornussimavarput. (1 Moses 8:21) Assersuutigalugu, meeqqat inuusuttullu ilaasa inunnguusaasumik nammineerusussuseqarlutik angajoqqaatik tunuttarpaat. Taamaalillutik ikinngutigiinneq naleqangaartoq, ikinngutigiinneq inuuneq naallugu namminneq angajoqqaamillu akornanni atasariaqaraluartoq, kipitittarpaat. Tamanna ilungersornartorujussuuvoq, sulili ilungersornarneruvoq Ataatatsinnut qilammiusumut ikinngutiginninnerput kipitissallugu. Allaammi inuunitsinnik akeqarsinnaavoq!
Ikinngutigiinnermi pisariaqartut
Guutimut inunnulluunniit attaveqarneq tatigeqatigiiffiunngitsoq sivisuumik atasinnaanngilaq. Tamanna ataataanerpaap Abrahamip paasisimavaa, taamaattumillu Guutimut tatiginnilluinnarnini ersersittuartarsimallugu. Mosesimik allakkat siulliit 12:1-5 aamma 22:1-18 atuarukkit paasissavat qanoq Guutimut tatiginnilluinnartigisimasoq. Aap, ’Abrahamip Guuti upperigamiuk iluarsuseqartitaavoq’, taamaattumillu „Jehovap ikinngutaa“-nik (NV) taaneqarsimalluni. — Jâko 2:23.
Guutimut ikinngutaassagaanni pisariaqartoq alla tassa pisussaaffinnik ikinngutigiinnerup nassatarisaanik naammassinninnissaq. Jehovamit atsinnerujussuarmik inissimaffeqaratta inummut ikinngutaanissatsinnit taassumunnga ikinngutaanissarput tupinnanngitsumik piumasaqarfiuneroqaaq. Immaqa inummut ikinngutaanitsinni iliortarnitsitut ilaatiguinnaq Jehovap iluarisaanik iliortarnissarput naammanngilaq. Kissaatigisariaqarparput sutigut tamatigut Jehovap iluarisaanik iliortarnissarput. Jesusip, Guutip ernerata qaninnerpaamillu ikinngutaata tamanna eqqaasitsissutigaa Jehova pillugu ima oqarami: ’Iluarisaanik pisarsinnarpunga.’ — Juánase 8:29.
Tassa Jehovamut erneranullu ikinngutaaneq pisussaaffeqanngitsumik ingerlanneqarsinnaanngilaq. Ikinngutigiinnissamut piumasarisaat eqqortittariaqarpavut. (Takuuk Tussiaat 15:1-5.) Ilaanni Jesus ajoqersukkaminut toqqaannartumik ima oqarsimavoq: ’Inassutikka malikkussigik ikinngutigissavassi.’ — Juánase 15:14.
Ikinngutigiinnermi pisariaqartoq alla tassa ammasumik nakimaatsumillu oqaloqatigiittarneq. Ullormi toquffissamini Jesus apustiliminut aalajaatsunut ima oqarsimavoq: ’Kiffanik taassaarpassi, kiffap naalakkami suliai nalummagit; kisianni ikinngutinnik taavassi, Ataatannit tusakkannik tamanik nalunaarfigigassi.’ (Juánase 15:15) Jesusip eqqarsaatiminik ikinngutiminut oqaluttuussisarnermigut Ataatani qilammiusoq, Amos 3:7-imi ima oqaatigineqartoq, malippaa: „[Jehovami] qanoq iliortarinngilaq pilersaarutini kiffaminut pruffiitinut saqqummerseqqaartinnagit.“
Nalinginnaasumik ikinngutigiit aamma taamaaliortannginnerpat? Sanilerput hr. Andersen misigisatsinnik oqaluttuukkiartupallanneq ajorparput, ingammillu uummammiutsinnik misigissutsitsinnillu aniatitsiffiginaviarnagu. Taamami ilisarisimatiginngilarput. Ikinngutittali oqaluttuunnissaat utaqqinerluunniit sapingajattarparput.
Guutimik ikinngutiginninnerput aamma taamaappoq. Qinunikkut saaffigalugu pisariaqartitatsinnik, kissaatitsinnik uummammiutsinnillu aniatitsiffiginissaa utaqqisinnaanngingajattarparput. Soorunami ikinngutip aappaannaa oqaluttuusarpat ikinngutigiinneq sivisunavianngilaq. Taamaattumik aamma Guuti uagutsinnut oqalutsittariaqarparput. Taamaaliorsinnaavugut taassuma oqaasiisa allassimasut, Biibilip, paasiniarluaqqissaartarnerisigut, unnersuussutaasa isumaliutigeqqissaartarnerisigut kiisalu sapinngisarput naapertorlugu inuunitsinni atornerisigut.
Jehovamik ikinnguteqarnerit qanoq pingaartitsigaajuk?
Apeqqut tamanna isumaliutigeqqissaariaruk aappassarsiorluni ikinngutissarsiorneq assersuutitut atorlugu. Soorunami nalunngilat naammanngitsoq aapparilerumaagassat ilisarisimalaaginnassallugu. Siullermik ilisarisimaqatigiinneq ikinngutigiilernermut ineriartortariaqarpoq, tatigeqatigiinneq alliartorluni taamaalillunilu pilluarluni aappariilernissaq tunngaviliuunneqarluni.
Eqqarsaatigeriaruk ikinngutigiinnermik taama ittumik ineriartortitsiniartut qanoq pilliuteqartigisartut. Piffissaq qanoq annertutigisoq aningaasallu qanoq amerlatigisut ikinngutigiinneq taama ittoq pilersinniarlugu atatiinnarniarlugulu atortannginnerpaat? Piffissap ilaa qanoq annertutigisoq tamatuma eqqarsaatigineranut atortannginnerpaat? Ikinngutigiinneq pitsanngorsarniarlugu atatiinnarniarlugulu qanoq annertutigisumik pilersaarusiortannginnerpat? Pisariaqarpallu, arlaatigut allannguinissaminnut qanoq piumassuseqartigisannginnerpat?
Taava imminut apereriarit: Pinngortitsisumik ikinngutiginninnera ineriartortinniarlugu, annertusiartortinniarlugu nakussassarniarlugulu taama ilungersuuteqartigaanga? Piffissaq qanoq annertutigisoq tamatumunnga pilliutigisarpara? Jehovamik ikinngutiginninnera qanoq annertutigisumik eqqarsaatigisarpara? Attaveqatigiinneq tamanna pitsanngorsarniarlugu atatiinnarniarlugulu qanoq annertutigusumik pilersaarusiortarpunga? Pisariaqaraangallu pilersaarusiama allanngortittarnissaanut qanoq piumassuseqartigaanga?
Kristumiut inuusuttut paasilluinnartariaqarpaat ikinngutigiinnerit allat tamarmik, aamma ikinngutigiinneq katinnermik kinguneqartoq, Pinngortitsisumik ikinngutiginninnermit pingaaruteqannginnerummata. Taamaattumik Nalunaajaasup oqaasii 12:1-imi ima kajumissaarneqarput: „Pinngortitsisit eqqarsaatiginiaruk inuusuttuunerpit ulluini.“ Amerlasuut taamaaliorput oqaluussisartutut kiffartornermikkut — amerliartuinnartullu pioneritut (piffissaq tamaat oqaluussisartutut) kiffartornermikkut.
Naak misigittaanneqarlunilu upperisarsiornermut soqutiginninnginneqartigigaluaqisoq Jehova eqqunngitsumik unnerluutigineqarluni mitaatigineqartoq tusaraangamikku nakimaallutik illersortarpaat. Taamaaliornerlu Jehovap ikinngutiminit eqqortumik naatsorsuutigisassarinnginnerpaa? Tamannalu uagut ikinngutitsinnit naatsorsuutigisannginnerparput? Aammalu paasigutsigu ikinngutitta ilungersorlutik qularatillu illersoraatigut qamuuna uummatitsigut nuannaarutigissannginnerparput? — Naleqqiuguk Ussatit 27:11.
Aap, Guutimik ikinngutiginninnerput, inunnik ikinngutiginninnitsitulli, akisussaaffittaqarpoq ikinngutigiinneq ataannassappat naammassisaqariaqakkatsinnik. Akisussaaffimmik tamatuminnga naammassinnikumanngitsup, imaluunniit Guutimut tunniulluinnarumanngitsup, immaqa Jehova ilisarisimakanneraluarpaa, taassuminngali ikinnguteqarnerup nuannaarutissartai suli misigisimanagit. (wD 1/6 92)
[Qupp. 30-mi assiliartaq]
Abrahamip Jehova tatigaa, taamaattumik Jehovap ikinngutaanik taaneqarsimalluni