Kristusip inatsisaassuseq uumigisimavaa — illimmi?
’Iluarneq asavat iluaannerlu uumigalugu; tamanna pillugu Guutip, Guutivit, uuliamik tipaatsuummik peqatigisannit annermik tanippaatit.’ — EPRÎARIT 1:9.
1. Eqqortuliornermik asanninnerup saniatigut Jehovap kiffaanut ilumoortunut tamanut suna piumasarineqarpa?
JEHOVAP kiffaasa ilumoortut uummatimikkut tarnimikkullu iluunngarlutik nukitillu tamakkerlugit taanna asavaat. (Mákorse 12:30) Assuarnaattuarnermikkut Jehovap uummataa nuannaartikkusuppaat. (Ussatit 27:11) Taamaaliorumagunik eqqortuliorneq asasariaqarpaat aammali inatsisaassuseq uumigisariaqarlugu. Maligassaalluartoq Jesus Kristus taamaaliorsimavoq. Taanna pillugu ima allassimasoqarpoq: ’Iluarneq asavat iluaannerlu uumigalugu.’ — Eprîarit 1:9.
2. Inatsisaassuseq qanoq paasisariaqarpa?
2 Inatsisaassuseq sunaava? Ajortuliorneruvoq, soorlu apustili Johannesip tamanna takutikkaa allakkami: ’Kinaluunniit ajortimik ileqqulik inatsisaannermittaaq ileqquliuvoq, ajortilu tassa inatsisaanneq.’ (1 Juánase 3:4) Inuk inatsisaatsoq „inatsisinut naalakkersortinneq killilersortinnerlu ajorpoq.“ (Webster’s Ninth New Collegiate Dictionary) Inatsisaatsuunermut ilaapput suliat ajortut, kanngunartut, ajortunngorsimasut peqquserluttullu tamarmik. Ullumikkut silarsuaq tamakkerlugu inatsisaassuseq aatsaat taama ingasatsigilersimavoq. Nalunanngitsumik ’ullut ajornartut’ Paulusip Timoteusimut allakkami aappaanni, kapitali 3-mi, versini 1-5-imi siulittuutigisimasai inuuffigaavut. Inatisaassuseq tamanna tamaat eqqarsaatigigaanni ajussuseq tamaat uumigeqqullugu peqquneqarnerput assut pitsaavoq! Assersuutigalugu, ima oqarfigineqarpugut: ’Jehovamik asannittusiaa ajortoq uumigisiuk.’ (tugsiaut 97:10) Aamma ima allassimavoq: „Ajortumik iliorneq uumigisiuk ajunngitsumillu iliorneq nuannaralugu.“ — Amos 5:15.
Uumiginninnerit assigiinngitsut pingasut
3-5. Guutip oqaasiani oqaaseq „uumigaa“ qanoq assigiinngitsunik pingasunik isumaqarpa?
3 Uumiginninneq qanoq paasisariaqarpa? Guutip oqaasiani oqaaseq „uumiginninneq“, imaluunniit uumissuineq, pingasunik assigiinngitsunik isumaqarsinnaavoq. Uumissuineqarpoq ajorniarumatussutsimik ajoqusiiumatussutsimillu pissuteqartumik. Uumissuineq taama ittoq kristumiut pinngitsoortariaqarpaat. Taamatut uumissuinini pissutigalugu Kainip qatanngunni eqqortuliortoq Abel toqussimavaa. (1 Juánase 3:12) Upperisarsiornikkut pisortattaaq taamatut ittumik Jesus Kristus uumissorsimavaat. — Matîuse 26:3, 4.
4 Oqaaseq ’uumigaa’ Biibilimi aamma atorneqartarpoq isumaqartillugu ’minnerusumik asavaa’. Assersuutigalugu, Jesus ima oqarsimavoq: ’Uannut pisup angunni arnilu nuliilu qitornanilu qatanngutinilu namminerlu inuunini uumiginngikkuniuk uannut ajoqersugaasinnaanngilaq.’ (Lúkarse 14:26) Soorunami Jesus isumaqarpoq imminit taakku asanerussanngikkivut. Jakobip ’Lea uumigigaa’ ima paasisariaqarpoq Lea Rakelimut asanninnerminit minnerusumik asagaa. — 1 Moses 29:30, 31.
5 Oqaaseq „uumigaa“ aamma allatut isumaqarsinnaavoq, tamannalu immikkut sammissavarput. Isumaata imaraa sumut imaluunniit kimut iluarinninnginneq ajorinnilluinnarnerlu ima ingasatsigisoq uumigisaq nigorsimaniarluinnarlugu. Tussiaat 139-mi tamanna ’uumiginninnertut asseqanngitsutut’ eqqartorneqarpoq. David ima allassimavoq: „[Jehova], uangami akeqqatit uumigaakka maajugalugillu akerartortitit. Uumiginninnermik asseqanngitsumik uumigaakka, uanga akeqqattut isigaakka.“ — Tussiaat 139:21, 22.
Sooq inatsisaassuseq uumigissagipput
6, 7. (a) Sooq inatsisaassuseq uumigisariaqarparput? (b) Sumik allamik pissutissaqarluarpugut inatsisaassuseq uumigissallugu?
6 Sooq inatsisaassuseq uumigisariaqarparput? Ilaatigut imminut ataqqineq ilerasuuteqannginnerlu pigisinnaajumallugit. Aatsaat taamaaliorutta Ataatarput qilammiusoq asannittoq naapertuilluartorlu, Jehova, ajunngitsumik attaveqarfigisinnaavarput. Tamatumuuna David maligassaalluarpoq, soorlu Tussiaat 26-mi atuarsinnaagipput. Assersuutigalugu, ima oqarsimavoq: „Ajortut katisimasarneri uumigaakka, guutiitsullu issiaqatigineq ajorpakka.“ (Tussiaat 26:5) Jehova naapertuilluarnerlu asagatsigik taassuma isaani iluaatsut tamaasa eqqortumik narrutsaatigisariaqarpavut — aap, uumissortariaqarlugit — aamma Jehovamut uumissuisut naalanngitsullu iluaatsuliorneri tamaasa. Ingammillu inatsisaassuseq uumigisariaqarparput Guutip aqqanut kanngunarsaasuunera pissutigalugu.
7 Jehovap innuttaasa inatsisaassutsimik uumissuisariaqarnerannut pissutaasoq alla tassa navianarlunilu ajoqutaanera. Uinimmut siaruarterineq, tassa inatsisaatsuliornermik siuaruarterineq, sumik kinguneqartarpa? Paulus ima mianersoqqusivoq: ’Tammaqinasi, Guuti mitaatigeqqunngilaq, inuk siaruartikkani naapertorlugit katersuiumaarmat. Uinimminummi siaruarterisoq uinimmit aserujassummik katersuiumaarpoq; anersaamulli siaruarterisoq anersaamit inuunermik naassaanngitsumik katersuiumaarpoq.’ (Galâsiamiut 6:7, 8) Taamaattumik inatsisaassuseq attuumassuteqarfigerusunngivipparput. Ilumut, ajunngitsumik ingerlajumagutta ilerasuuteqarumanngikkuttalu inatsisaassuseq tamaat uumigisariaqarparput.
Inatsisaassutsimik uumiginnittut
8. Inatsisaassutsimik uumissuinikkut kina maligassaalluarnerpaava, allassimaffinni suni tamanna takuneqarsinnaava?
8 Inatsisaassutsip uumiginissaa eqqarsaatigalugu Guuti pinngortitanut sianissusilinnut tamanut maligassaalluarnerpaavoq. Inatsisaassueq eqqortumik kamaatigaa, oqaasianilu ima allassimasoqarpoq: „Arfiniliusut [Jehovap] uumigai, arfineq-marluusut qinngarsugarai: Isit makitarpaluttut, oqaq sallutooq, assaat pinngitsup aavanik kuisisut, uummat pilersaarutipiloqartoq, isikkat tuaviinnaq ajortup tungaanut ingerlaniartut, sallullutik nalunaajaasut qatanngutigiinnillu saqitsaatilersitsisut.“ Aamma allassimavoq: „[Jehova] mianerigaanni ajortoq uumigisassaavoq. Uumigaakka makitasaarneq anneruniarnerlu.“ (Ussatit 6:16-19: 8:13) Imalu allassimasoqarpoq: „Uanga, [Jehova] innarluissut nuannaraara ujajaanerlu iluaassuserlu uumigalugit.“ — Jesaja 61:8.
9, 10. Jesusip qanoq ililluni takutippaa inatsisaassuseq uumigalugu?
9 Jesus Kristusip Ataatani malillugu inatsisaassuseq uumigaa. Ima allassimavoq: ’Iluarneq asavat iluaannerlu uumigalugu; tamanna pillugu Guutip, Guutivit, uuliamik tipaatsuummik peqatigisannit annermik tanippaatit.’ (Eprîarit 1:9) Uumiginninneq taama ittoq eqqarsaatigalugu Jesusip maligassiuussimavaatigut. Inatsisaassutsimik uumiginninnini takutippaa piaaralutik iluaatsuliortut — eqqunngitsumik upperisarsiornermut pisortat — qulaaramigit. Arlaleriarluni ilumoortuusaartuunerarlugit avoqqaarai. (Matîuse kapitali 23) Ilaanni Jesusip ima oqarfigisimavai: ’Ataataq nagguigisarsi tassa Diaavulu, ataatassilu pilerigisai suliariniarpasi.’ (Juánase 8:44) Allaat timikkut nukini atorlugit inatsisaassutsimut uumissuinini ersersissimavaa, marloriarluni naalaffik upperisarsiortunik ilumoortuusaartunik piumatuunik minguiaramiuk. — Matîuse 21:12, 13; Juánase 2:13-17.
10 Jesusip aamma inatsisaassutsimut ajortimullu uumissuinini takutippaa tamakku ingalassimalluinnarnerisigut. Taamaattumik imminut assortuisut ima aperisinnaasimavai: ’Kia arlassi nalujunnaarsissinnaavaanga ajorteqartunga?’ (Juánase 8:46) Jesus ’illernarlunilu, ajortuillunilu, minguillunilu ajortilinnillu immikkoortitaasimavoq’. (Eprîarit 7:26) Peterip tamanna uppernarsarlugu allassimavoq Jesus ’ajortulinngitsoq salloqitaammilluunniit qanermiugisaqarnani’. — 1 Pîtruse 2:22.
11. Biibilimi inuit naammalluinnanngitsut inatsisaassutsimik uumiginnittut kikkut maligassaalluarpat?
11 Jesusili angutaasimavoq naammalluinnartoq. Biibilimi inunnik naammalluinnanngitsunik inatsisaassutsimik uumiginnilluinnartunik eqqartuisoqarpa? Ilaana! Assersuutigalugu, Mosesip peqatigisaasalu Levikkuusut guutipilussiormut uumissuinertik ersersissimavaat Jehovap peqqusineratigut guutipilussiortut 3000-t missaat toqumik pillaramikkik. (2 Moses 32:27, 28) Pinehasip inatsisaassutsimik uumiginningaarnini takutissimavaa kanngunartuliortut marluk qalugiusamik toqukkamigit. — 4 Moses 25:7, 8.
Inatsisaassutsimut uumiginninnermik ersersitsineq
12. (a) Qanoq ililluta takutissinnaavarput inatsisaassuseq uumigalugu? (b) Qanoq ililluta eqqarsaatit iluaatsut ingalassimasinnaavavut?
12 Ullumikkulli qanoq ililluta inatsisaassutsimut uumiginninnerput takutissinnaavarput? Taamaaliorsinnaavugut eqqarsaatitta, oqaatsitta iliuutsittalu aqunniarnerisigut. Suliaqanngiffitsinni anersaakkut ineriartornartunik eqqarsaateqarniarneq ileqqorilerniartariaqarparput. Unnuakkut sininneq ajuleraangatta immaqa eqqarsaatit iluarpallaanngitsut eqqarsaatigilersoorsinnaasarpavut, soorlu ugguaatit imaluunniit atoqatigiinnermut tunngasut. Tamanna pinngitsoorniarsarisaruk ajunngitsunillu eqqarsaateqarniartarit. Assersuutigalugu, allassimaffiit, pilluarneraanerit qulingiluat aamma anersaap inerititai qulingiluat alanngaarniarsarisakkit. (Matîuse 5:3-12; Galâsiamiut 5:22, 23) Apustilit aqqaneq-marluk atii eqqaamasinnaavigit? Inatsisit qulit? Ilagiit arfineq-marluk suut sarĸúmersitat-ni allaffigineqarsimappat? Naalagaaffiup erinarsuutaasa alanngaarniartarnerat aamma iluaqutigalugu ilumoortut, assuarnaatsut, iluartut, minguitsut, asanartut, nersornartut, ileqquulluartut ataqqinartullu eqqarsaatigiuaannarniarsinnaavavut. — Filípimiut 4:8.
13. Inatsisaassuseq uumigigutsigu oqalunneq qanoq ittoq aamma maajugissavarput?
13 Aammalu inatsisaassutsimik uumiginninnerput takutittarparput kanngunartunik oqalunnaveersaarnitsigut ingalassimallugu. Silamiut ilarpassuisa quiasaarutipilunnik oqaluttuarneq tusarnaarnerlu nuannaraat, kristumiulli tamakkuninnga tusarnaaginnarnerluunniit ingalassimasariaqarpaat. Qimaguttariaqarpugut oqaloqatigiinnerit taama kusanaatsigisut suulluunniit peqataaffigiumanagit. Qimagussinnaannginngikkutta kiinnatsigut takutissinnaavarput oqalunneq taama ittoq maajugalugu. Siunnersuut pitsaasoq manna maleruartariaqarparput: ’Oqaatsinik mikiaasunik qanissinnit anisitseqinasi, kisianni ineriartornissamut pisariaqartumut ajunngitsut oqaaserisigik tusartut saammaannermik pineqaqqullugit.’ (Evfisumiut 4:29) Mingunnartunik oqalunnikkut tusarnaarnikkulluunniit immitsinnut mingutsittariaqanngilagut.
14. Inatsisaassutsimik uumiginninnerup qanoq illersorsinnaavaatigut niuerneq sulinerlu eqqarsaatigalugit?
14 Iliuutsittaaq ajortilippaluttut tamaasa uumigisariaqarpavut. Inatsisaassuseq uumigigutsigu eqqortuusup akerlianut akuersiinnarnissamut napititaassanngilagut. Kristumiut ilumoortut ajorti ileqqorinngilaat. (Naleqqiuguk Juánasip agdlagai sujugdlît 5:18.) Soorlu, niuernikkut peqquserluttuliornerit suulluunniit uumigisariaqarpavut. Ullumikkut Jehovap nalunaajaasuisa ilarpassui sulisitsisuminnit peqquserluttuliortinniarneqartarsimagaluarput, itigartitsisarsimallutilli. Kristumiut nalunngeqatiginnissutsiminnut Biibilimit ajoqersorneqarsimasumut akerliusumik iliornissamut taarsiullugu allaat soraarsitaanissaminnut piumassuseqarnerusarput. Saniatigullu inatsisaassutsimik uumiginninnerput takutikkusuttarparput angallannermi malittarisassanik unioqqutitsinaveersaarnitsigut aammalu akileraarutitigut ilanngaatitigullu peqquserlunneq ajornitsigut. — apustilit suliáit 23:1; Eprîarit 13:18.
Kinguaassiuutitigut minguttuuneq uumigalugu
15. Guutip inuit atoqateqarusussusilerlugit pinngortikkamigit sunik ajunngitsunik siunertaqarpa?
15 Ingammik kinguaassiuutitigut minguttuuneq Kristumiutut uumigisariaqarparput. Guutip inuit atoqateqarusussusilerlugit pinngortikkamigit marlunnik ajunngitsunik siunertaqarpoq. Inuiaat nungukkiartornissaat pinngitsoortippaa, aamma asannilluni inuit pilluarnissaannut periarfissaqartippai. Allaat inuit piitsut, atuarsinnaanngitsut allatigulluunniit pisinnaatitaaffikikkaluartut aappariinnermi tamanna nuannisaatigisinnaasarpaat. Kisianni tamanna Jehovap killiliussaasa iluinnaanni nuannaarutigineqartussaavoq. Killiliussat tamakku Guutimeersut ataqqineqartariaqarput. — 1 Moses 2:24; Eprîarit 13:4.
16. Aliikkutassiat iliuutsillu kanngunartut qanoq isumaqarfigisariaqarpavut?
16 Inatsisaassuseq uumigigutsigu kinguaassiuutitigut iliuutsit minguttuut aliikkutaasiallu kanngunartut tamaasa ingalassimaniaqqissaartariaqarpavut. Taamaattumik atuakkat, atuagassiat aviisillu kanngunarpasissut nigorsimaniassavavut. Inatsisaassuserlu uumissorlugu tv-kkut, videokkut imaluunniit isiginnaartitsissutitigut takusassiat mingunnartut isigerusussanngilavut. Isiginnaagarput kanngunarsorilerutsigu tv-p ingerlaannaq qamittariaqarparput imaluunniit nakimaalluta isiginnaartitsivik qimattariaqarlugu. Taamatuttaarlu inatsisaassuseq uumissorutsigu nipilersukkat taallamikkut erinnamikkulluunniit kinguaassiuutitigut pileritsannartut mianersorfigissavavut. Kanngunartut pillugit paasisaqarusunnata ’ajorsutsikkut merlertuuniarlutalu silaqarsutsikkut inersimasunngorniartariaqarpugut’. — 1 Korintumiut 14:20.
17. Kulorsamiut 3:5-imi siunnersuutip suup ikiorsinnaavaatigut ileqqusatigut minguittuaqqulluta?
17 Naleqqulluartumik ima siunnersorneqarpugut: ’Taamaattumik avatisi nunamiusut toqulersissigik: uersaaneq, mingunnartut, illigunneq.’ (Kulorsamiut 3:5) Ersarippoq aalajangersimalluinnartariaqartugut ileqqussatigut minguitsuujuarniarluta. Kulorsamiut 3:5-imi griikerit oqaasiat ’toqulersissigik’-mik nutserneqarsimasoq pillugu The Expositor’s Bible Commentary ima paasissutissiivoq: „Oqaatsip takutippaa suliat isumallu ajortut nigortiinnassanngikkivut. Nungusartariaqarpavut, tassa inooriaaserisimasatoqaq piiarluinnartariaqarlugu. Oqaaseq ’piuneerulluinnarlugu toquppaa’ oqaatsip kimiatut oqaatigineqarsinnaavoq. . . . Oqaluutsip isumaviata sakkortussusiatalu takutippaat tassaasoq inuup naalliulluni sakkortuumik aalajangersimanera.“ Taamaattumik atuakkat filmillu kanngunartunik imallit navianartutut, tunillannartutut toqunartutullu isigalugit ingalassimasariaqarpavut, anersaakkut ileqqusatigullu taamaammata. Kristus tamatumunnga assingusumik oqarsimavoq oqarami assaap, isikkap allaallu isip aserorsaaqqajarpatigut kipisariaqarivut imaluunniit peertariaqarivut. — Mákorse 9:43-48.
Eqqunngitsumik upperisarsiorneq tunussinerlu uumigalugit
18. Upperisarsiornikkut inatsisaassutsimik uumissuineq qanoq takutissinnaavarput?
18 Soorlu Jesusip upperisarsiortut ilumoortuusaarniartut qulaarnerisigut inatsisaassutsimut uumissuinini ersersissimagaa, ullumikkuttaaq Jehovap nalunaajaasuisa upperisarsiornikkut ilumoortuusaarniarnikkut inatsisaassuseq uumissorpaat. Qanoq ilillutik? Atuagassiat Biibililersaarutaasut Babylon Angisuup sorpiaaneranik, tassaaneranik upperisarsiornikkut arnaq atortittartoq, qulaarisut siaruartertarnerisigut. Upperisarsiornikkut ilumoortuusaarniarneq ilumut uumigigutsigu taava ilumoorluta Babylon Angisooq, eqqunngitsumik upperisarsiornerup silarsuarmi tamarmi naalagaaffissua, qulaarumassavarput. Inuit peqqusersuitsumik uummatillit taassumannga tapiillisitaasimasut anersaakkullu inussiaatigineqartut iluaqutissaannut taamaaliorumassaagut. Babylon Angisuup inatsisaassusia ilumut uumissorutsigu ilungersorluta Naalagaaffimmik kiffartuusseriaatsini assigiinngitsuni peqataajumassaagut. — Títuse 2:13, 14; sarĸúmersitat 18:1-5.
19. Tunussisut qanoq isigisariaqarpavut, aamma sooq?
19 Inatsisaatsuliat uumissorneqartariaqartut tassaapputtaaq tunussisut suliaat tamaasa. Daviditut tunussisut ima isumaqarfigisariaqarpavut: „[Jehova], uangami akeqqatit uumigaakka maajugalugillu akerartortitit. Uumiginninnermik asseqanngitsumik uumigaakka, uanga akeqqattut isigaakka.“ (Tussiaat 139:21, 22) Ullumikkut tunussisut ’inummik ajortip pianik’, kristumiuuneraqatigiit palaseqatigiivinik, suleqateqalersimapput. (2 Tásalûníkamiut 2:3) Taamaattumik Jehovamut nalunaajaasutut ilumoortutut taakku peqatigiumanngilluinnarpavut. Naammalluinartuunnginnatta qatanngutivut isornartorsioqqajaasinnaasarpavut. ’Inussiaq aalajaallunilu silatuumut’ ilaasut inuttut ataasiakkaatut naammalluinnartuungillat. (Matîuse 24:45-47) Kisianni aalajaatsuullutillu silatuujupput. Qatanngutit siulersuisut kukkuneri piviusut piviusuusorisalluunniit tunussisut tikkuartorniartarpaat. Isumannaatsumik ingerlaannassagutta tunussisut sunniiniarnerat ingalassimasariaqarparput toqunartutut immat. — Rûmamiut 16:17, 18.
20, 21. Inatsisaassutsimik uumissuinissatsinnut sunik pissutissaqarpugut?
20 Paasivarput qanoq silarsuaq inatsisaassutsimik, tassa ajortimik, ulikkaartoq. Eqqortuliornermik asanninneq naammanngilaq; aamma inatsisaassuseq uumissortariaqarparput. Kristumiut ilagiissaannit anisitaasimasut ilaat isumaqarunarput eqqortuliorneq asallugu, inatsisaassuserli naammattumik uumissorsimanngilaat. Paasivarputtaaq sooq inatsisaassuseq uumigisariaqarlugu. Ilerasuuteqassanngikkutta imminullu ataqqissagutta taamaaliortariaqarpugut. Aammalu inatsisaatsuliorneq tassaavoq Jehova Guutimut ilumuunnginneq. Inatsisaassuserlu sungarnitsunik inerititaqartarpoq — atugarliungaarnermik, ajortunngorsimanermik toqumillu.
21 Paasivarputtaaq qanoq ililluta inatsisaassuseq uumigisinnaallugu. Taamaaliorsinnaavugut peqquserluttuliornerup, kinguaassiuutitigut kanngunartuliornerup tunussinerullu peqataaffigiumanngivinnerisigut. Jehovap ajugaanissaa peqataaffigerusukkatsigu taassumalu uummataa nuannaartikkumallugu eqqortuliorneq asaannarnagu taassumunngalu kiffartornitsinni ulapiinnarnata aamma inatsisaassuseq uumigisariaqarparput, soorlu Siulersuisorput Jesus Kristus iliorsimasoq. (wD 15/7 92)
Qanoq akissavigit?
□ Biibilimi oqaaseq „uumigaa“ qanoq isumaqarpa?
□ Sunik pissutissaqarluarpugut inatsisaassutsimik uumissuinissatsinnut?
□ Kikkut inatsisaassutsimik uumissuinikkut maligassaalluarsimappat?
□ Qanoq ililluta inatsisaassutsimik uumissuinerput takutissinnaavarput?
[Qupp. 9-mi assiliartaq]
Jesusip naalaffik minguiarsimavaa inatsisaassuseq uumigigamiuk
[Qupp. 11-mi assiliartaq]
Inatsisaassuseq uumigigutsigu aliikkutassiat kanngunartut ingalassimaniassavavut