Inuunermik tunissummik erlinnartumik pingaartitsineq

INUUNEQ — pigisaq erlinnartoq! Inuuneqanngikkutta susinnaangilagut. Annaagutsigu, inuit utertissinnaanngilaat. Inuunerput navianartorsiuleraangat periarfissaasinnaasut tamaasa atorlugit illersortarparput. Allaammi inuit ilaat navianartorsiuleraangamik anersaanik ikiortissarsiortarput.

Umiarsuarmik immami pitoraassaasumik Biibilimi eqqaasinneqarpugut. Umiulermat ”umiartortut siooralerput tamarmillu immikkut guutiminnut qinullutik ikioqqullutik.” Kingusinnerusukkut tamarmik Guutimut ilumoortumut qinupput: [”Jehova-aa], angutip uuma toqusussaaneratigut ajunaarteqinatigut.” Biibilimi oqaluttuarineqarportaaq: ”Umiarsuullu usii tamaasa imaanut eqqarpaat puttalanerulersinniarlugu.” — Jona 1:4, 6, 14; naleqqiuguk apustilit suliait 27:18, 19.

Umiartortut taakku annakkusungaaramik pigisamik nuannarisamik pilliutiginissaat erliginngilaalluunniit. Nunap pii pigisavut taartissarsisinnaavavut — inuunerpulli taartissarsisinnaanngilarput. Eqqarsaqqaarnatalu inuunerput illersortaratsigu navianartut qimassimaniartarpavut. Nerisarpugut, atisalersortarpugut timerpullu inuussuteqartittarlugu. Napparsimagaangatta nakorsiartarpugut.

Taamaattoq inuunermik Tunisisup eqqarsaqqaarnata imminut illersornissatsinnit annertunerusumik piumaffigaatigut. Inuunermi tunissutaavoq nalissaqanngitsoq, silarsuarmilu tamarmi Kinaassulimmit pingaarnerpaamit pilerfeqarpoq. Tunisisumik tunissummillu ilumoorluta pingaartitsigutta, inuuneq asattuutissannginnerparput? Tamannalu allat inuunerannik qajassuussinermik ilaqassannginnerpa?

Jehova Guutip Inatsisit israelikkunnut tunniussai inoqatit inuunerannik peqqissusiannillu sernissuinissamik ilaqarmata tupaallaatiginngilarput. (2 Moses 21:29; 5 Moses 22:8) Ullumikkut kristumiut taamatut timikkut isumannaassuseq eqqumaffigisariaqarpaat. Assersuutigalugu meeqqanik mikisunik angerlarsimaffinniittoqarpat, sapanngat, meqqutit ipittulluunniit allat meeqqat pinnguaralugit iisoorsinnaasaat allatulluunniit ajutoorutigisinnaasaat soqutiginagit inunngisaanniitittarpigit? Kemikaliat ulorianartut nakorsaatillu meeqqat inugaanniitittarpigit? Imeq natermut userarneqarsimappat ajutoortoqannginnissaa pillugu allartipallattarpiuk? Atortut aserornikut ingerlaannaq iluarsaattarpigit? Angallatitit akulikitsumik aserfallatsaalisarpigit? Biileraangavit mianersortarpit? Ilumoorlutit inuuneq erlinnartoq pingaartikkukku, silatusaartunik isumannaallisaateqarumassaatit.

Ajoraluartumik ilaasa inuunertik taamaattussaannartut isigisarpaat. Assersuutigalugu kia ullumikkut naluaa pujortarneq peqqinnanngitsuusoq? Taamaakkaluartoq, millionilikkuutaat pujortagassanik pinngitsuuisinnaajunnaarsimapput, pujumik ulorianartumik millussinerit tamaasa peqqiinnerulissutigisaminnik. Allat nakorsaatinik atornerluisarput, allallu imigassamik, tamarmik ajoqutigisaminnik. AIDS nappaataavoq toqussutaasartoq katsorsarneqarsinnaanngitsoq. Amerlasuulli aallaqqaamulli tunillatsinngitsoorsimasinnaassagaluarput kinguaasiuutitigut kanngunartuliornerit, nakorsaatinik aalajangersimasunik atornerluinerit, aalersortinnerillu ingalassimasimagaluarunikkik. Ila inuunermik pingaartitsinninnginneq kingunipiloqarsinnaaq! — Rûmamiut 1:26, 27; 2 Korintumiut 7:1.

Allannguineq ajornanngilaq!

Pinngortitsisorsuarmik Jehovamik pingaartitsisut, inuuneq erlinnartutut isumaqarfigissallugu pissutissaqarluarput. Inuuneq tassaavoq taassuma tunissutaa illernartoq. Taamaattumik pisariaqartunik allannguinissaminnut piareersimmapput taamatut erlinnartutut piumallugu. Kwakup, Ghanami ilinniartitsisup, misigisimasaa eqqarsaatigeriaruk. Imigassamik atornerluisuusimavoq, inuunerminik asuliinnartitsilluni.

Kwaku eqqaamasalikkersaarpoq: ”Nuliannut ataqqitinniartaraluarpunga, tamannali oqqannernik kamaannernillu kinguneqaannartarpoq, ingammik imersimagaangama. Imigassamik atornerluinera pissutaalluni aningaasaataaruttarpunga, ilaquttamalu aningaasanik pilersornissaat isumaginngitsoortarlugu. Tupinnanngitsumik, nuliama tamanna puffassutigisaqaa. Aningaasaataarunnerit tamaasa (aningaasaataarutiaartaqaangalumi), sapinngisara tamaat imigassannik pissarsiniartarpunga. Ataasiarlunga ima ingasatsigaanga aningaasat ilinniartitama soraarummeernissaannut nalunaarutissatut atugassat katersortitakka imminut atorpakka. Imeriarpunga kammalaatikkalu imigassaannik pitsillugit. Ulloq nassuiaasariaqalerfissara nalliutilertorpoq. Ittora akuliutiaarsimanngitsuuppat atorfiga annaasimassagaluarpara.

Inuunera torinngissimaqaaq. Peqqusiileqivunga, tamannali anigulertorpara. Imminornissara eqqarsaatigisalerpara inuuninni iluatsitsinngitsutut misigigama. Sulili imigassamik pinngitsoorsinnaannginnera anigorsinnaanngilara. Ullulli ilaanni imerniartarfimmi imersimallutik paasunut ilannguppunga ikilerneqarlungalu, tupaqalunga paasilerpara imigassamut qilersorsimanera inuuninnik akeqarsinnaasoq.

Taamaannerani Jehovamut nalunaajaasut kasuttorfigisarpaatigut, Biibilimik soqutiginnilersinniarluta. Nuliaralu oqaloqatiginaveersaartarpavut paaminnartutut isigalugit. Ataasiarlungali naakkigiinnarlugit tusarnaarniarlugit aalajangerpunga. Biibilimik atuaqqissaartalernerma Guutip aaqqissuussaani nutaami inuunermik naassaanngitsumik neriugisamik nuanningaartumik paasitilertorpaanga. Jehovap nalunaajaasuisa ikiuinerisigut Biibilimik atuaqqissaartuartillunga, Jehova Inuunermik Tunisisutut inuunermillu tunissutaa pingaartinnerujartulerpakka, Biibilimilu siunnersuutit atorluarsinnaanerat tupigusuutigiartuinnarlugit. Inuuninnik aaqqiinissannut kajumissiartorpunga. Tamanna oqitsuunngilaq, imigassarmi ikinngutigisimasakkalu akiortuagassarilerpakka. Jehovap, qinnutinik Tusaasartup, uummatikkut aalajangernera takuaa tusarlungalu.a

Nuliama, Jehovamut Nalunaajaasuunngikkaluartup, tapersersulerpaanga upperisaralu ataqqilerlugu inuuninni aappariinnittalu iluani allanngorujussuarsimanera pissutigalugu. Sanilivut nuliaralu kamaannitsinnut akuliuttariaarupput, pisariaarummat. Isumakkut eqqissisimalernera paarillualerpara. Qularutissaanngilaq, Jehova Guutimik Inuunermik Tunisisutut pingaartitsineq, inuunermik erlinnartutut isiginninneranik pigiliussineq, maleruaqqusaanillu maleruaaneq inuunermi imminut akilersinnaasutuaavoq.“

Guutip inuunermik naassaanngitsumik neqeroorutaa

Inuit tuusintilikkuutaat Kwakutut ittut Jehovamut nalunaajaasunit ikiorneqarlutik ’inuttaaq Guuti assigalugu pinngortitaq atisimavaat iluartillugu illernartillugulu ilumoornikkut.’ (Evfisumiut 4:24) Maannakkut inuunertik kisiat pinnagu aammattaaq nunami paratiisimi naassaanngitsumik inuunermik neriugisaq pingaartilersimavaat. Biibili neriorsuivoq paratiisimi Guutip aaqqissuussaani, innuttaasunik perlilertoqassanngitsoq allassimammat: ”Katersaarsuit [Jehovaat] . . . inuiannik tamanik neriartortitsissaaq sassarlugit . . . nerisassat patermik orsuarnequtillit.” — Jesaja 25:6.

Maannakkut inuuneq tunissutaasoq nuanningaaraluartoq ataavartuunngilaq. Inuit tamarmik toqusarput, ilalu toqumik eqqugaaneq alianaqaaq. Asasap ilivermut nipaatsumut peerunnera misigalugu alianaqaaq, ingattarsernani oqassagaanni. Guutilli Naalagaaffiata ataani, Kristusimik aqunneqartumi, Jehovap neriorsuutai eqquutissaapput: ’Toqulu peqarunnaassaaq, aliasuttoqarunnaarlunilu nilliasoqarunnaarlunilu anniartoqarunnaassaaq, siulliit peermata.’ — sarĸúmersitat 21:4.

Taamanikkussamut inuunermik tunissut misinnangaartumik sivitsussaaq. Annikilliornartumili angisuumi annattut kisimiunngitsut, aammali toqusunit makillutik inooqqilersut, Jehova Guutip tunissumminik naleqanngitsumik tuneqqitai, nunami inuunermik naammalluinnartumik tunineqassapput. (Juánase 5:28 29) Tamanna isumaqarpoq asasat itsarlu Guutimik mianerinnittut toqumit utissasut! Tamanna upperissallugu ingasappallaarpa? Naamik, ’Guutimummi sumik ajornartoqanngilaq.’ — Lúkarse 1:37; naleqqiuguk Job 42:2.

Aammalumi Jehova Guutip nammineerluni tamakku tamarmik pinissaannut uppernarsaammik inuiaat tunivai. Qanoq ililluni? Qaniginerpaasaminik, Ernerminik asasaminik, Jesus Kristusimik, pilliuteqarnermigut ajortimik toqumillu annaalluta. Rûmamiut 8:32-mi neriorsorneqarpugut: ’Taassumami erni allaat erliginngilaa, tunniuppaali tamatta pilluta; sooq taava taassumunnga ilanngullugit tamanik tunissannginnerpaatigut?’ Biibilip oqaluttuuppaatigut tamakkununnga ilanngullugit inuiaat ileqqupiluiarneqassasut aammalu naapertuilluanngissuseq, pinerlunniarnerit, nakuusernerillu piiarneqassasut. (Jesaja 11:9) Inuuneq nalikitsutut isigineqaqqinngisaannassaaq.

Massakkullumi naammalluinnanngitsuugaluarluni inuuneq nuannertorujussuusinnaavoq. Kiami nerisassat mamarunartut tikkat, kiattumi anoraasuaq, qaqqarsuit kusanartut, seqinnarik, kuup minguitsup kuualaarnera, naasut qalipaatigissaartut isigineri, nipilersornerup nuannersup nipaa timmissalluunniit qarlorpalunneri tusaassallugit kia nuannaarutigisanngilai? Eqqarsaatigeriaruk, qanormitaava issava tamakku naassaangitsumik nuannaarutigissallugit?

Iuunermik immikkut pisinnaatitaaffik erlinnartoq inuunermi nuannaarniutinik neqeroorutaasinnaasut isumaatsut namminissarsiortullu piinnarlugit annaassallugu sianiitsorpallanneruvoq. (Naleqqiuguk Eprîarit 11:25) Silatusaartumik Biibilip kajumissaarpaatigut ’inuit illigutsannerinik pinnata Guutillu peqqusaanik iliorluta’ inooqqulluta. (1 Pîtruse 4:2) Qamannga pisumik kajumissaarpatsigit, aap qinnuigaatsigit, Guutip Oqaasianik, Biibilimik, atuaqqissaarnikkut taamaalioqqullutit, ilinniakkatillu maleruaqqullugit. (Juánase 13:17) Taava Jehovamut, Guutimut ajunngingaartumut naakkinningaartumullu, inuunermik naassaanngitsumik akissarsisitsinnaasumut, attaveqarlualissaatit. (wD 1/8 92)

[Quppernerup ataani ilanngussaq]

[Qupp. 5-mi assiliartaq]

Inuusaatsivit inuunermik pingaartisinerit ersersippaa?

[Qupp. 8-mi assiliartaq]

Guutip silarsuaani nutaami inuunermi nuannaarutaasut naassaanngitsumik atassapput.