’Alliartussutsit tamanut malunnarsili’

’Meeraajunnaarama meerarpaluttut atorunnaarpakka.’ — 1 KORINTUMIUT 13:11.

1. Alliartortarneq sooq pinngortitarsuup tupinnartortaanut ilaava?

MANNIMMIT mikisuarsuarmit allisitsiutit aatsaat atorlugit takuneqarsinnaasumit arfeq alliartortarpoq angisoorsuanngorluni 30 meterit sinnerlugit takissuseqalersinnaalluni 80 tonsinillu oqimaassuseqalersinnaalluni. Taamatuttaaq inerittussat minnerpaat ilaannit orpissuit ilaat alliartortarput, 90 meterisut takissuseqalersinnaasarlutik. Ilumummi alliartortarneq inuunerup tupinnartortaasa ilagaat. Apustili Paulusip oqarneratut ikkussuisinnaavugut imerteralutalu, ’naajartortitsisorli tassaavoq Guuti’. — 1 Korintumiut 3:7.

2. Alliartorneq, imaluunniit amerliartorneq, suna Biibilimi siulittuutigineqarsimava?

² Allatulli ittumik aamma taama tupinnartigisumik ineriartortaaseqarpoq. Tamanna pruffiiti Esajasimit siulittuutigineqarsimavoq: „Minnersaat tusindilinngussaaq nukarlersaallu inuiassuanngussalluni. Uanga tassa [Jehova]; piffissanngorpat pilertortumik tamanna naammassissavara.“ (Jesaja 60:22) Siulittuutaavoq Guutip innuttaasa amerliartornissaannut tunngassuteqartoq, ullumikkullu pingaarnerusumik eqquuppoq.

3. 1991-imi oqaluussinermik nalunaarummi qanoq ililluni erserpa Jehovap innuttami sulinerat pilertortikkaa?

³ Ukiumi oqaluussiffiusumi 1991-imi Jehovap Nalunaajaasuisa nunarsuarmi tamarmi oqaluussisimanerminnik nalunaarusiaatigut erserpoq Naalagaaffimmik oqaluussissutiginnittartut amerlanerpaaffitsik qaangeqqillugu 4.278.820-nik amerlassuseqalersimasut, ukiullu tamatuma ingerlanerani inuit 300.945-t kuisissimasut. Amerliartornerup tamatuma kingunerisaanik ilagiit 3191-it pilersinneqarsimapput, taamaalillunilu immikkoortut nutaat pilersiortorneqarsimallutik. Tassa ullormut ilagiit nutaat arfineq-pingasunit amerlanerusut pilersinneqartarsimapput, ilagiit eqimattaqatigiit ataasingajaat ulloq ataaseq allortarlugu. Amerliartorneq tupinnartoq! Ersarippoq suliaq tamanna Jehovap pilertortikkaa innuttanilu pilluaqqusaatikkai. — Tussiaat 127:1.

Imminut misissoqqissaarnissamut piffissaq

4. Siunissaq neriunartoq eqqarsaatigalugu apeqqutit suut isumaliutigisariaqarpavut?

⁴ Pilluaqqusaaneq tamanna misigalugu nuanneraluaqisoq taamaattoq aamma akisussaaffimmik nassataqarpoq. Tamatta immikkut naammattumik inersimassuseqarlutalu piumassuseqarnerpugut nutaarpassuit tamakku anersaakkut pisariaqartitaannik eqqumaffiginninnissatsinnut? Pionerit, ilagiinni kiffartuuteqartut, utoqqaanertat angalallutillu nakkutilliisut nutaarpassuarnik isumassuisussat, taamatuttaarlu kajumissutsiminnik sulisut suliamut tamatumunnga tapersersuillutik allaffissuarni immikkoortortaqarfiusuni Betelinilu sulisussat siunissami pisariaqartinneqartussat amerlassusii eqqarsaatigalugit tupaallannarpoq. Sulisussarpassuit tamakku sumit pissarsiarineqassappat? Qularutissaanngilaq, katersugassat amerlaqaat. Ullumikkulli kikkut sulisussanik katersuisussanik pissarsisinnaassappat? — Matîuse 9:37, 38.

5. Amerliartupallanneq pissutaalluni sumiiffiit ilaanni pissutsit qanoq ittut atuuppat?

⁵ Assersuutigalugu, nunat ilaannit nalunaarutigineqarsimavoq ilagiit hundredelikkaanik oqaluussisartullit ilaat ataasiinnarmik utoqqaanertartaqartut ataasiinnarmillu marluinnarnilluunniit ilagiinni kiffartuuteqartortaqarlutik. Ilaatigut utoqqaanertap ataatsip ilagiit marluk utoqqaanertaaffigisarsimavai. Sumiiffiit ilaanni kristumiutut kiffartortut naammattumik pisinnaassusillit ima atorfissaqartinneqartigaat allaat Biibilimik atuaqqissaaqatigineqarusuttorpassuit tulleriiaarlugit allattorneqartariaqartarlutik, atuaqqissaaqatigineqarnissaminnut utaqqisut. Allanilu ilagiit ima amerliartupallattartigipput ilagiit pingasut, sisamat allaalluunniit tallimat ataatsimiittarfik ataaseq aveqatigiittarlugu. Immaqa aamma illit najukkanni taama siumukarneqarpoq.

6. Sooq imminut misissornissaq pisariaqarpa?

⁶ Siuliani eqqartorneqartut sumik paasitippaatigut? Piffissaq eqqarsaatigalugu, tamatta immikkut pissutsit atukkavut misissoqqissaartariaqarivut paasiniarlugu piffissarput pitsaanerpaamik atornerlugu pisariaqartitsinerlu naapertorlugu suliniuteqarnerluta. (Evfisumiut 5:15-17) Ukiuni hundredelinni siullerni apustilip Paulusip kristumiut hebriiariusut ima allaffigisimavai: ’Qangali ajoqersuisunngorunnarsissagaluarlusi Guutip oqaasiisa ilinniaqqaariaqartortaannik kingumut ajoqersoriaqalerpusi immummillu pisariaqalerlusi, nerisassaq mattusooq sapilerassiuk.’ (Eprîarit 5:12) Soorlu oqaatsit taakkua ersersikkaat kristumiut tamarmik immikkut ineriartortariaqarput. Kristumiutut inersimasunngoriartornani anersaakkut merlertuujuaannarneq navianaateqarluinnartuuvoq. Taamaattumik Paulusip ilungersorluni ima kajumissaarpaatigut: ’Immissinnik misiligitsi upperlusi pisarnersusi; immissinnik misilinniaritsi.’ (2 Korintumiut 13:5) Imminut misilittarpit, imaluunniit misissortarpit, paasiniarlugu kuisinnerniilli anersaakkut ineriartorsimanerlutit? Imaluunniit uninngaannarsimavit? Sumi inissisimanerluni qanoq ililluni paasiniarneqarsinnaava?

’Meerarpaluttut’

7. Alliartornerput, imaluunniit siumukarnerput, malugineqarsinnaassappat qanoq iliortariaqarpugut?

⁷ ’Meeraagallarama meeqqatut oqaluttarpunga meeqqatullu isumaliorlunga meeqqatullu eqqarsarlunga, meeraajunnaaramali meerarpaluttut atorunnaarpakka,’ apustili Paulus taama oqarsimavoq. (1 Korintumiut 13:11) Anersaakkut ineriartorneq eqqarsaatigalugu tamatta eqqarsaatitsigut iliuutsitsigullu meeqqatut issimagaluarpugut. Siumukassaguttali ’meerarpaluttut’ atorunnaartariaqarpavut, Paulusip oqarneratut. Meerarpaluttut tamakku suuppat?

8. Eprîarinut agdlagkat 5:13, 14-imi Paulusip oqaasii naapertussagaanni anersaakkut meerarpalussutsip suut ilisarnaatigai?

⁸ Siullermik malugeriakkit Eprîarit 5:13-imi Paulusip oqaasii: ’Immummik pisariaqartoq oqaatsinik iluartunik siuneqanngilaq, merlertunnguugami. Inersimasulli nerisassamik mattusuumik pisariaqarput, tassa misigisaqartarnermit sungiusagaasunik sianissusillit ajunngitsorlu ajortorlu immikkoorsusiisigut ilisarisinnaallugit.’ Illit ’oqaatsinik iluartunik siuneqarpit’? Guutip oqaasia, Biibili, naammattumik ilisimaviuk ’ajunngitsup ajortullu immikkoortinnissaannut’ atorsinnaallugu? Paulus oqarpoq inuit inersimasut taamaaliorsinnaasut ’nerisassanik mattusuunik’ pisaramik. Anersaakkut nerisassanik mattusuunik kajumissuserput imaluunniit illigisaqassuserput anersaakkut ineriartornissatsinnut apeqqutaasorujussuuvoq, taamaanngippammi meeraajuaannassagtta.

9. Anersaakkut illigisaqassuseq anersaakkut siumukarnermut qanoq takussutissaava?

⁹ Anersaakkut illigisaqassutsit qanoq ippa? Atuagassiat Biibililersaarutaasut aammalu kristumiut ataatsimiittarneri ataatsimeersuartarnerilu aqqutigalugit Jehovap anersaakkut nerisassanik naammattorsuarmik pilersuinera qanoq isigaajuk? (Jesaja 65:13) Qularnanngitsumik ataatsimeersuarnerni atuakkanik atuagassianilluunniit nutaanik saqqummertoqaraangat nuannaartaqaatit. Angerlaakkaangakkilli qanoq pisarpigit? Napasuliaq Alapernaarsuiffik-up imaluunniit Iteritsi!-p normui nutaat tigugaangakkit susarpigit? Atuarnissaannut piffissaqarniartarpit, imaluunniit nuannerunartitaannatit takuinnariarlugit atuakkanut ilisivinnut iliinnartarpigit? Taamatuttaaq kristumiut ataatsimiittarneri pillugu aperisoqarsinnaavoq. Ataatsimiinnerit tamaasa najuuffiginiartarpigit? Piareersartarpit sapinngisamik peqataajumallutit? Ajoraluartumik ilaat anersaakkut nerrerluttunngorsimapput, qarsupittumik atuartarlutik tuaviusukaaginnarlusooq nerisarlutik. Tussiaasiortorli allatorluinnaq issimavoq, soorlu oqarsimasoq: „Ilami inatsisitit nuannareqaakka, eqqarsaatinniitittuarpakka.“ Aammalu kunngi David ima oqarsimavoq: „Taava qutsavigissavakkit katisimasorpassuarni, unnersiutigalutit inuppassuit akornanni.“ (Tussiaat 35:18; 119:97) Qularutissaanngilaq, anersaakkut pilersuinermik pingaartitsineq anersaakkut siumukarnissamut aalajangiisuusorujussuuvoq.

10. Anersaakkut meeraaraanermut ilisarnaatit suut Paulusip Evfisumiunut agdlagkat 4:14-imi tikkuarpai?

¹⁰ Paulusip anersaakkut meerarpaluut alla tikkuarsimavaa ima mianersoqqusigami: ’Meeraajunnaaqqulluta, mallisut aalateqqunata angalateqqunatalu ajoqersuummit nalinginnarmit anorlersumit, inuit immeraattarnerinit, qoqassiisut tammartitsisut peqqusersuunerannit.’ (Evfisumiut 4:14) Soorlu angajoqqaat nalunngikkaat meeqqat sunut tamanut alapernaatsupilussuupput. Pissuseq tamanna ajunngitsuusinnaavoq, taamaalillutimmi meeqqat paasisaqartarput ilikkagaqartarlutillu inuttullu inersimasunngoriartuaartarlutik. Navianaataali tassa allamiit allamut sangoqattaartarnerat. Ajornerusumillu, misilittagakinnertik pissutigalugu alapernaassutsiminnit annertuumik ajornartorsiortilerneqarsinnaapput, allaallu imminnut allanillu navianartorsiortitsilersinnaallutik. Anersaakkuttaaq meeqqat taamaapput.

11. (a) ’Ajoqersuut nalinginnaq anorlersoq’ Paulusip eqqartoramiuk suna pivaa? (b) ’Anorinit’ sunit ullumikkut allamut sangutinniarneqartarpugut?

¹¹ Taavami Paulus suna eqqarsaatigalugu oqarpa anersaakkut meeqqat ’ajoqersuummit nalinginnarmit anorlersumit angalatinneqartartut’? Oqaaseq griikerisooq a’ne-mos tassani ’anorlersoq’-mik nutserneqarsimavoq. International Critical Commentary-mi allassimavoq qularnanngitsumik Paulusip oqaaseq taanna atorsimagaa „allanngorartumut atussallugu tulluarmat“. Tulliullugu Paulusip oqaasiinit, ’inuit immeraattarneri’, tamanna uppernarsarneqarpoq. Oqaatsip ’immeraapput’-p nagguippiaa isumaqarpoq „kipparissoq naluttagaq“ imaluunniit „kipparissoq naluttarlugu pinnguarneq“, tassa iluatsitsiniaqattaarluni pinnguarneq, hasardi. Tassami isumassarsianik aliikkutassianillu ajoqutaarpasinnatillu ussernartorsiornarlutillu allaat iluarnaarnarpasissunik pilerisaarneqartuartarpugut. Paulusip oqaatsimini uppernitsigut tammassutigisinnasavut pineruai — upperisarsiornermut, inuit atugarisaannut, naalakkersuinermut assigisaannullu tunngasut. (Naleqqiuguk Juánasip agdlagai sujugdlît 4:1.) Aammali eqqaaneqarsinnaapput silarsuarmi atisatigut, aliikkutassiatigut, nerisatigut, peqqinnissakkut, timersornikkut assigisaasigullu allanngorarnerit. Anersaakkut meeqqat misilittagakinnertik ajunngitsumillu naliliisinnaassuseqannginnertik pissutigalugu tamakkuninnga allamut saatitaaqqajaasinnaasarput, taamaalillutillu anersaakkut siumukarnissaraluartik kristumiutullu pisussaaffinnik pingaartunik naammassinninnissaraluartik pinngitsoortittarlugu. — Matîuse 6:22-25.

12. Akisussaaffiit eqqarsaatigalugit meeqqat qanoq ilillutik inersimasunit allaaneruppat?

¹² Meeqqat ilisarnaataat alla tassa ikiorneqarnissaminnik sammineqarnissaminnillu pisariaqartitsiuartarnerat. Akisussaaffeqassutsimik misigineq ajorput isumakuluuteqassanatillu; meeraanerup nalaani suut tamarmik nuannerlutillu pissanganartarput. Paulusip oqarneratut ’meeqqatut oqaluttarput meeqqatullu isumaliortarlutik meeqqatullu eqqarsartarlutik’. Allat imminnut isumassuinissaat naatsorsuutigiinnartarpaat. Aamma anersaakkut meeqqat taamatut oqaatigineqarsinnaapput. Nutaaq pisassaqaqqaaraangat oqaluussiartoqataaqqaassagaangalluunniit anersaakkut angajoqqaavisa nuannaarlutik sunik tamanik ikiorniartarpaat. Qanorli pisoqassava nutaap taamatut ikiorneqarnini isumalluutiginiinnalerpagu imminullu ikiorsinnaani? Nammineq suliniuteqannginnermut tamanna takussutissaavoq.

13. Sooq tamatta immikkut akisussaaffeqarnissarput ilinniartariaqarparput?

¹³ Tamatumunnga atatillugu Paulusip oqaaqqissaarinermini eqqaasippaatigut naak ’nanertortigisatsinnik ersoqatigiittussaagaluarluta’ taamaattoq tamatta immikkut ’nammineq nammagassavut nammassagivut’. (Galâsiamiut 6:2, 5) Soorunami kristumiutut pisussaaffinnik naammassinnissinnaalernissamik ilinniarnermi piffissaq nukiillu atortariaqassapput, aammalu arlaatigut pilliuteqartariaqassalluni. Annertuumilli kukkunerussaaq inuunermi aliikkutassat, eqqissisimaarneq, angalaqattaarnerit, atortorissaarutit immaqaluunniit silamiutut sulivallaarneq, piffissaajaatigivallaassallugit taamaalillunilu uninngaannalerluni, oqaluussinerulernissamik kissaateqarpallaarnani anersaakkulluunniit suliassanik anguniagaqarnani. ’Oqaaseq naammassillugu pigitsi tusaaginnarnagulu, ilissinnut salloqittaqinavusi,’ ajoqersugaq Jakob ilungersorluni taama kajumissaarisimavoq. — Jâko 1:22; 1 Korintumiut 16:13.

14. Sooq anersaakkut meerarpaluttuujuaannarnissarput naammagissanngilarput?

¹⁴ Aap, meeraq inersimasumit immikkooruterpassuaqarpoq. Paulusilli oqarneratut pingaaruteqartorujussuuvoq meerarpalussutsitsinnik qimatsiartuaarniassalluta inersimasunngoriartorniassallutalu. (1 Korintumiut 13:11; 14:20) Taamaaliunngikkutta anersaakkut uninngaannassaagut. Qanorli ililluni siumukartoqarsinnaava? Anersaakkut inersimasunngornissamut ineriartorneq sunik nassataqarpa?

Alliartornerit qanoq ililluni tamanut malunnarsissasoq

15. Alliartorneq qanoq ingerlasarpa?

¹⁵ Pinngortitani alliartorneq qanoq pisarpa? „Inuit tamavimmik cellimit ataatsimit aallartittarput,“ The World Book Encyclopedia-mi taama nassuiaasoqarpoq. „Cellip stoffit tigooralersarpai alliartornissaminullu tunngaviliortarluni. Iluminit alliartortarpoq. Celle aggorsinnaavoq, amerlasuunngorluni cellinillu nutaanik pilersitsilluni. Tunngaviliorneq, aggorneq amerlasuunngornerlu tamanna alliartornermik taaneqartarpoq.“ Tassani malugisarialik tassa alliartorneq iluaninngaaniit pisarmat. Inuussutissalersuineq pissusissamisoortumik ingerlalerpat, inuussutissat timip tigooralerpagit atulerpagillu taava alliartorneq pilersarpoq. Naalungiarsummi inoorlaami tamanna ersarittaqaaq. Soorlu nalunngikkipput naalungiarsuk inoorlaaq aalajangersimasumik imminut naleqqussakkamik, tassa anaanap immuanik, orsumik proteinimillu peqarluartumik, nerisaqartinneqartarpoq. Tamatuma suna kingunerisarpaa? Naalungiarsuk ukiumi inuuffigisamini siullermi sukkaqisumik alliartortarpoq inuunermini kingorna misigeqqinnavianngisaminik.

16. Biibilimik atuaqqissaartalerlaat ineriartorneq suna misigisarpaat, ineriartornissamullu tamatumunnga suna pisariaqarpa?

¹⁶ Pinngortitat ineriartortaasiat tamanna anersaakkut ineriartornitsinnut, ajoqersuutinik tunngaviusunik ilikkarnitsinniit anersaakkut inersimasunngornitsinnut, assingussuteqartorujussuuvoq. Siullermik aalajangersimasumik inuussutissalersornissaq pisariaqarpoq. Biibilimik atuaqqissaartaleqqaarnerit kingumut eqqarsaatigeriaruk. Allarpassuit assigalugit qularnanngitsumik Guutip oqaasia ilisimasaqarfiginngivissimagaluarpat. Kisianni sapaatit-akunneri ingerlatillugit atuaqqissaarnissannut piareersartarninni Biibilimillu atuaqqissaaqatigineqartarninni allaat piffissap annertoorsuunngitsup ingerlanerinnaani Biibilimi ajoqersuutit tunngaviunerusortai tamaasa paasilersimavatit. Tamanna tassaavoq takussaasumik ineriartorneq, Guutip oqaasianit aalajangersimasumik inuussutissanik pisarnerup kingunerisaa!

17. Sooq pisariaqarpa anersaakkut inuussutissanik aalajangersimasumik nerisarnissaq?

¹⁷ Massakkummi? Suli aalajangersimasumik inuussutissanik pisarpit? Kukkuneruvoq isumaqassalluni kuisereersimagatta aalajangersimasumik atuaqqissaarnikkut anersaakkut inuussutissalersornissaq pisariaaruttoq. Naak Timoteus kristumiutut nakkutilliisuugaluartoq inersimasoq Paulusip ima oqaaqqissaarsimavaa: ’Tamakku isumaliutigikkit ileqqoralugillu alliartussutsit tamanut malunnarseqqullugu.’ (1 Timûtiuse 4:15) Uaguttaaq taamatut suliniuteqartarnissarput pisariaqartilluinnarparput! Anersaakkut alliartornerit tamanut malunnarseqqugukku taamaaliortarnissat pisariaqarluinnarpoq.

18. Anersaakkut siumukarneq qanoq ililluni malunnartarpa?

¹⁸ Anersaakkut alliartornermik tamanut malunnartitsineq isumaqanngilaq qanoq ilisimasaqartiginermik tupigusutsitsiniaalluni allanut malugeqqusaarneq. Jesus ima oqarsimavoq: ’Silarsuup qaamasoraasi. Illorpalik qaqqap qaaniittoq isertorneqarsinnaagilaq,’ aamma ’uummatip ulikkaarutaanit qaneq oqaluttaraaq’. (Matîuse 5:14; 12:34) Eqqarsaativut uummammiuvullu ajunngitsunik Guutip oqaasianeersunik ulikkaarpata oqaatsitsigut iliuutsitsigullu tamanna ersarilluassaaq.

Taamaattumik manna apeqqutaalerpoq: Biibili aalajangersimasumik atuaqqissaartarpiuk, kristumiut ataatsimiittarneri najuuffigisarpigit inuussutissanik ilukkut anersaakkullu alliartorninnut iluaqutaasunik piumallutit? Tusarnaaginnartuunissat naammageqinagu. Anersaakkut inuussutissat naammattorsuit Jehovap tunniuttagai tamakkiisumik pissarsiffiginerlugit misissoqqissaartaruk. ’Jehovap inatsisai nuannarigukkit inatsisaalu eqqarsaatigisarlugit ullukkullu unnuakkullu’ taava ima oqaatigineqarsinnaalissaatit: „Taassuma assigaa orpik kuunnguup eqqaani ikkunneqarsimasoq inerititaqarfissamigut inerititaqartartoq toqujuitsunillu pilutaqarluni. Qanoq iliornermini tamani iluatsitsisaraaq.“ (Tussiaat 1:2, 3) Anersaakkut siumukartuaannarnerluni qulakkeerniarlugu qanoq iliortoqarsinnaava? Tamanna ilanngutassiami tulliuttumi sammineqassaaq. (wD 1/8 92)

Qanoq akissavigit?

□ Sooq pingaaruteqarpa misissussallugu anersaakkut siuariarsimanerluni?

□ Anersaakkut ineriartorneq anersaakkullu illigisaqassuseq qanoq imminnut ataqatigiippat?

□ ’Ajoqersuut nalinginnaq anorlersoq’ qanoq paasisariaqarpa?

□ Sooq tamatta immikkut akisussaaffipput nammattariaqarparput?

□ Qanoq ililluni anersaakkut siumukartoqarsinnaava?

[Qupp. 12-mi assiliartaq]

Atuagassiat Biibililersaarutaasut atuarnissaannut piffissaqartittarpit?