Inuuneq anguniarlugu qanoq arpappit?
’Arpaliuttarfimmi arpattut ilisimanngilisigik tamarmik arpakkaluartut, ajugaasulli pisassaa ataatsip pisaraa? Taama arpagitsi pisaariumallugu.’ — 1 KORINTUMIUT 9:24.
1. Kristumiutut inuunerput Biibilimi sumut assersuunneqarpa?
INUUNEQ anguniarlugu ilungersornerput Biibilimi unammilluni arpaliunnermut assersuunneqarpoq. Paulus toqunissani qanillisoq imminut ima oqaatigisimavoq: ’Sorsunneq ajunngitsoq sorsunnerisimavara, arpaffissaq naavara, upperneq aalajangiuppara.’ Kristumioqatini aamma taamaalioqqullugit kajumissaarpai ima oqarluni: ’Taamaammat, nalunaajaasut taama eqimatigisut avatangermatigut, uaguttaaq oqilaaqutaasut tamaasa ajortilu uatsinnik ninniortitseqqajaaginnartoq iperartigik, nikallujuerlutalu arpanniarta assoruunnitsinni uatsinnut siunertarititaasumi.’ — 2 Timûtiuse 4:7; Eprîarit 12:1.
2. Inuuneq anguniarlugu arpanneq eqqarsaatigalugu suna qiimmaallannarpa?
2 Assersuut tamanna tulluaqaaq, tassami arpaliuttarfik aallartittarfeqarpoq, aalajangersimasumik isorartussuseqarluni apuuffissaqarlunilu. Taamaapportaaq anersaakkut siumukarneq inuunermut sammisoq. Taamatuttaaq ippoq anersaakkut siumukarneq inuunermut sammisoq. Soorlu takusareeripput ukiut tamaasa inuit hundredetuusitilikkuutaat inuuneq anguniarlugu arpallutik aallartilluartarput. Soorlu ukiuni tallimani kingullerni inuit 1.336.429-t pissusissaq eqqorlugu arpalersimapput, tunniulluinnarlutik kuisillutillu. Assut qiimmaallannarpoq taama amerlatigisut aallartilluarsimammata. Pingaarnerpaasorli tassaavoq apuuffissaq angutserlugu qasusuilluni arpannissaq. Illit taamaaliornissat siunniusimaviuk?
Inuuneq anguniarlugu arpanneq
3, 4. (a) Arpannermi qasusuisaarnissap pingaaruteqassusia Paulusip qanoq tikkuarpaa? (b) Paulusip unnersuussutaa ilaasa qanoq maleruanngitsoorsimavaat?
3 Qasusuilluni arpannissap pingaaruteqassusia erseqqissarniarlugu Paulus ima oqarsimavoq: ’Arpaliuttarfimmi arpattut ilisimanngilisigik tamarmik arpakkaluartut, ajugaasulli pisassaa ataatsip pisaraa?’ — 1 Korintumiut 9:24.
4 Itsaq timersornikkut unamminerni ajugaasoq ataasiinnaq akissarsisarsimavoq. Inuunerli anguniarlugu arpannermi arpattut tamarmik ajugaasup akissarsiaanik pissarsisinnaapput. Pisariaqartutuaq tassa angusassaq angutserlugu arpattuarnissaq. Qujanartumillu amerlsuut Paulusitut toqunissartik tikivillugu qasusuillutik arpattuarsimapput. Millionilikkuutaallu suli arpattuarsinnarput. Ilaasali anguniagartik sussakkeersimavaat. Arlaannit akornuserneqaramik uniinnarsimapput, taamaattumik arpakkunnaarsimapput imaluunniit arlaatigut arpannissamut piukkunnarunnaarsimallutik. (Galâsiamiut 5:7) Taamaattumik tamatta inuuneq anguniarlugu arpannermi qanoq arpannerluta immitsinni misissoqqissaartariaqarparput.
5. Paulus isumaqarpa inuuneq anguniarlugu arpannermi ajugaaniulluni arpaliunnertut ataasiinnaq akissarsissasoq? Nassuiaruk.
5 Manna apeqqutaalerpoq: Paulusip oqarami ’ajugaasup pisassaa ataatsip pisaraa’ suna eqqarsaatigaa? Soorlu eqqaaneqareersoq isumaqanngilaq inuuneq anguniarlugu arpalersut ilaat ataasiinnaq inuunermik naassaanngitsumik akissarsissasoq. Ersarippoq taamatut paasisariaqanngitsoq, erseqqissartuartareersimavaami inuit kikkulluunniit annannissaat Guutip piumasarigaa. (Rûmamiut 5:18; 1 Timûtiuse 2:3, 4; 4:10; Títuse 2:11) Oqanngilaq inuuneq anguniarlugu arpanneq allat tamaasa ajugaaffiginiarlugit arpannerusoq. Korinthimiut nalunngilluarpaat isthmerit unammersuarnerini, allaat olympiadimi unammersuarnernit nuannarineqarnerunerarneqartartuni, ajugaarusussuseq taama ittoq atuuttaqisoq. Sunarpiarliuna Paulusip eqqarsaatigigaa?
6. Sooq Paulusip arpattoq arpannerlu assersuutigai?
6 Paulusip arpattumik assersuut atorpaa ingammik nammineq annannissamik neriuutini nassuiarniarlugu. Versini siuliiniittuni eqqartorpaa qanoq tamaviaarluni sulisimalluni arlalippassuartigullu ilungersortarsimalluni. (1 Korintumiut 9:19-22) Taava versi 23-mi oqarpoq: ’Iivangkiiliuli pillugu tamaasa suliaraakka tamatumunnga peqataasinnaanngoqqullunga.’ Nalunngilaa apustilitut toqqarneqarsimanini imaluunniit ukiorpassuarni inunnut allanut oqaluussisimanini pissutigiinnarlugu annannissani qulakkeersimanngitsoq. Pilluaqqussutissat tusagassap nuannersup nassatarisai ilangeeqataaffigiumallugit sapinngisannguani tamaat tusagassaq nuannersoq pillugu iliuuseqartarsimavoq. Ajugaanissaminik aalajangiusimanninnerminik ersersitsisumik arpattariaqarsimavoq, ilungersortariaqarsimallunilu isthmerit unammersuarneranni, ’ajugaasup ataasiinnaap akissarsiffigisassaani’, peqataasuuguni ilungersornissaraluamisut atsigisumik. — 1 Korintumiut 9:24a.
7. ’Taama arpanneq akissarsiassaq pisaariumallugu’ qanoq paasisariaqarpa?
7 Assersuut tamanna assut ilinniarfigisinnaavarput. Naak arpaliuteqataasut tamarmik ajugaarusukkaluartut ajugaaniarlutik aalajangiusimannilluinnartut kisimik ajugaanissaat ilimanaateqartarpoq. Taamaattumik arpalluta aallartissimanerput naammagiinnassanngilarput. Ima isumaqartariaqanngilagut ’sallusuissummiilersimagatta’ suut tamarmik ajunngitsumik ingerlassaqqaartut. Immaqa kristumiutut immitsinnut taasarpugut, aammali suliatsigut tamanna takutittarnerparput? Assersuutigalugu, kristumiut iliuuserisariaqagaattut nalunngisavut iliuuserisarnerpavut — kristumiut ataatsimiinnerinut najuuttarneq, oqaluussinermut peqataasarneq, ilaallu ilanngullugit? Taamaappat nersortariaqarpoq, ileqqullu pitsaasup tamatuma ingerlattuaannarnissaa ilungersuutigisariaqarparput. Iliuutsivulli pissarsiffiginerusinnaavavut? Soorlu ataatsimiinnerni tuniseqataaniassagatta tamatigut piareersartarpugut? Ilikkakkatta uagutsinnut atornissaat ilungersuutigisarparput? Oqaluussinitsinni qanorluunniit akerlilerneqaraluaraangatta peqqissaartumik nalunaajaasinnaalernissamut pikkorissarnissarput eqqumaffigaarput? Soqutiginnittut pulaaqqinniartarpavut Biibilimillu atuaqqissaaqatigilerniartarlugit? ’Taama arpagitsi pisaariumallugu,’ Paulus kajumissaarivoq. — 1 Korintumiut 9:24b.
Sutigut tamatigut imminut naalakkersinnaagit
8. Sunamitaava pillugu Paulusip kristumioqatini kajumissaarpai ’sutigut tamatigut imminut naalakkersinnaasuseqarnissaannik’?
8 Paulusip takusarsimavai uppertut ilaat ilungersorunnaarlutik tunuartut imaluunniit inuuneq anguniarlugu arpannermut peqataajunnaarluinnartut. (1 Timûtiuse 1:19, 20; Eprîarit 2:1) Tamanna pissutigerpiarlugu kristumioqatini eqqaasittuartarsimavai arpanneq peqataaffigisaat nukinnik qasuisuissutsimillu pisariaqartitsisoq. (Evfisumiut 6:12; 1 Timûtiuse 6:12) Arpattumik assersuusiani ingerlateqqippaa oqarluni: „Timersornikkut unammeqataasoq kinaluunniit sutigut tamatigut imminut naalakkersinnaassutsimik ersersitsisarpoq.“ (1 Korintumiut 9:25a, NV) Taamaalilluni Paulusip kristumiut Korinthimiittut ilisimalluagaannik innersuuppai, tassa isthmerit unammersuarnerannut peqataasut sakkortuumik sungiusartarnerat.
9, 10. (a) Isthmerit unammersuartarsimanerinut peqataasarsimasut qanoq oqaluttuarineqarpat? (b) Tassani suna ingammik malugisariaqarpa?
9 Sungiusarneq timersortartup aalluttariaqartarsimasaa ima torrallallugu oqaluttuarineqarpoq:
„Najoqqutassat killilersuutillu qaammatini qulini sungiusarnermut atasut naammagalugit naammagittaalliornanilu maleruartarpai. Taamatut sungiusarnianngikkuni assigiinnarpaa ilaaniarluni nalunaanngikkuni. . . . Ilungersuaatini pinngitsoortariaqakkanilu tulluusimaarutigisarpai ajugaanissaminullu ilimanaatip millissutigisinnaasai suulluunniit ingalassimaniaqqissaarnissaat ataqqinaatitut isigisarlugu. Nammineq ilungersorsuataarnermini takusinnaasarpai inuit allat nerrillutillu qasuersaarlutillu uffarfimmi eqqissisimaartut piumasaminnillu inuunermi iluatattut; usorinerli ajorpai, akissarsiassanimi kisiat eqqarsaatigigamiuk — akissarsiassarlu tamanna piumagaanni sakkortunerpaamik sungiusarnissaq pisariaqarluinnarpoq. Nalunngilaa sungiusarnermini ilungersorunnaallatsiaruni ajugaanissani ilimataarutissasoq.“ — The Expositor’s Bible, atuagaq V, qupperneq 674.
10 Soqutiginarpoq oqaatigineqarmat taamatut sakkortuumik imminullu naaggaarnartumik sungiusarneq sungiusartup ’ataqqinaatitut isigisaraa’. Inuit allat ilorrisimaarlutik inuusut usorinngilai. Ilumut ilinniarfigilluarsinnaaqaarput.
11. Inuuneq anguniarlugu arpannitsinni avatitsinniittut qanoq isiginaveersaartariaqarpavut?
11 Jesusip oqaasii uku eqqaamakkit: ’Isertarfikkut nerukitsukkut iserniaritsi, isertarfik nerutoqimmat aqqusinerlu sileqimmat aserorsimaffimmut sammisoq, tassuunalu ingerlasut amerlaqaat; isertarfilli nerukippoq, aqqusinerlu ameqaaq inuunartumut sammisoq, taassuminngalu nanisisut ikeqaat.’ (Matîuse 7:13, 14) ’Aqqusinikkut ameqisukkut’ ilungersorlutit ingerlaniartillutit aqqusinikkut sileqisukkut ingerlasut kiffaanngissuseqartut isumalukuluuteqarpasigatillu inuusut usorisarpigit? Misigisarpit inuit allat iliuuserisartagaat, immaqa imminni ajortuunngikkaluartut, ilaaffigisariaqaraluarlugit? Sooq aqqutikkut tassuunakkut ingerlalersimalluta eqqaamajuaannanngikkutsigu taamatut eqqarsaqqajaasinnaavugut. ’Ikku taamaattarput niaqorut aserujasoq piumallugu, uagulli aserujuitsoq piniarparput,’ Paulus allassimavoq. — 1 Korintumiut 9:25b.
12. Sooq oqartoqarsinnaava ataqqinaat tusaamasaalernerlu inuit anguniartarsimasaat isthmerit unammersuarneranni ajugaasup niaqorutinnattaavatut aserujasuusoq?
12 Isthmerit unammersuarneranni ajugaasoq orpikkamik niaqorusiamik imaluunniit naasunik allanik niaqorusiamik, ullualunnguit sapaatit-akunnialunnguilluunniit qaangiutiinnartut toqusartumik, pissarsisarsimavoq. Soorunami niaqorusiamik aserujasumik taama ittumik pissarsiniaannarlutik timersortartut ilungersortarsimanngillat, tamatumali kingunerisaanik ataqqisaalernissartik tusaamasaalernissartillu pinerullugit. Oqaluttuarineqarsimavoq ajugaasoq angerlamut apuukkaangami pissartatut sapiitsorsuartut tikilluaqquneqartarsimasoq. Amerlasuutigut illoqarfiup qarmasui isaterneqartarsimapput ingerlaartorsuarnit ingiaqatigineqarluni iseriartorniassammat, ataqqiniarlugulu assinganik inuusaliortoqartarsimalluni. Ataqqinaalli tamanna aserujasuuvoq. Taamaattumik pissarsuusarsimasut tamakku ullumikkut ilisimaneqarpianngillalluunniit, aammami amerlanerit soqutiginngilaalluunniit. Silarsuarmi pissaanermik, tusaamasaanermik pisuussutinillu anguniagaqarlutik piffissaminnik, nukimminnik, peqqissutsiminnik immaqalu ilaqutariittut inuunerminnik pilliutiginnittut Guutimili pisuujunatik, erniinnaq paasilissavaat pigisatigut ’niaqorutertik’ inuunermissulli nungujartortoq. — Matîuse 6:19, 20; Lúkarse 12:16-21.
13. Inuuneq anguniarlugu arpattoq timersornikkut arpattartumit qanoq allaanerussuteqarpa?
13 Timersuutinik ajugaaniunnermut peqataasut sakkortuumik sungiusarnissaminnut qulaani taaneqartutut piumassuseqartarput, piffissamili aalajangersimasuinnarmi. Ajugaaniunneq qaangiukkaangat nalinginnaasumik inooqqilertarput. Immaqa ilungersuuterujussuanngikkaluarlugu timersuinnartarput, aatsaallu tulliani unammeqataaleraangamik imminut naaggaarnartumik najoqqutaqarlutik sungiusaleqqittarlutik. Inuunerli anguniarlugu arpaqataasut allaapput. Taakkununnga sungiusarneq imminullu naaggaarneq inooriaasiusariaqarpoq. — 1 Timûtiuse 6:6-8.
14, 15. Sooq inuuneq anguniarlugu arpaqataasoq imminut naalakkersinnaassuseqartuartariaqarpa?
14 ’Uannik malinnikkumasoq,’ Jesus oqarsimavoq, ’imminik isumakkiissavoq, sanningasulinilu ersullugu [malittuassavaanga, NV].’ (Mákorse 8:34) Kajumissaarut tamanna ilassigutsigu ’malittuarnissaa’ siunniusimasariaqarparput, imaanngitsoq imminut naaggaarneq immikkut iluanaarnarmat, kisianni misissorunnaallatsiarneq siuneqassuseerutitsiarnerlu sanasimasatsinnik tamanik isamisitsisinnaammat allaallu naassaanngitsumik pilluarnissatsinnik navianartortiortitsilersinnaalluni. Anersaakkut siumukarneq amerlanertigut sukkavallaanngitsumik ingerlasarpoq, misissoqqissaartuaannanngikkuttali suut tamaasa pilertortumik asuliinnartoortissinnaavavut.
15 Paulusillu aamma erseqqissarpaa „sutigut tamatigut“ imminut naalakkersinnaassutsimik ersersitsissasugut, tassa inuunerup immikkoortuini tamani ataavartumillu. Tamanna siunnersuutaavoq pitsak, timersortartummi sumut iluaqutigissavaa ilungersungaarluni timersornikkut sungiusaatigaluni piumasaminik nerersuataartaruni inuuninilu piumasaannarminik atoruniuk? Tassa inuuneq anguniarlugu arpannermi aamma imminut naalakkersinnaassutsimik „sutigut tamatigut“ ersersitsisariaqarpugut. Ilaat imerpallaannginnissaminnut kanngunartuliunnginnissaminnullu imminnut naalakkersinnaasarput, immaqali makitasuullutillu assortuiumatuujullutik. Immaqa ataaseq inussiarnersuullunilu kamaginnittuuvoq, isertortumilli ajortuliortarluni. „Sutigut tamatigut“ imminut naalakkersinnaasariaqarpoq tamakkiisumik iluaqutissarsiffigerusukkaanni. — Naleqqiuguk Jâkup agdlagai 2:10, 11.
’Maangaannaq’ arpaqinata
16. ’Maangaannaq pinnani’ arpanneq qanoq paasisariaqarpa?
16 Paulusip ilisimavaa inuuneq anguniarlugu arpanniaraanni annertuumik iliuuseqarnissaq pisariaqartoq. Taanna ima oqarsimavoq: ’Taamaattumik uanga arpappunga maangaannaq pinnanga; tilluivunga silaannarmut pinnanga.’ (1 Korintumiut 9:26) Oqaaseq ’maangaannaq’-mik nutserneqarsimasoq isumaqavippoq „erseqqinngitsoq“ (Kingdom Interlinear), „malunnanngitsoq“, ’ersinngitsoq’ (Lange’s Commentary). ’Maangaannaq pinnani’ arpanneq tassa ima paasisariaqarpoq arpattup sumut ingerlanera isiginnittunut tamanut takuneqarsinnaasoq. The Anchor Bible-mi nutserneqarsimavoq „sangujoraarnani“. Sissami sioqqani takugutsigik tumit sangujoraartut, ilaanni kaajallassimariarluni utimut ingerlasarsimasup tumai, isumaqarnavianngilagut arpattartup tumigigai, imaluunniit sumut ingerlanissani nalusimanngikkaa. Tumilli siumuinnaq ungasissumut ingerlasut akuttoqatigiissut takugutsigik isummissaagut inuup aalajangersimasumut ingerlasup tumigigai.
17. (a) Paulusip qanoq ililluni ersersippaa ’maangaannaq pinnani’ arpassimalluni? (b) Tamatumuuna qanoq ililluta Paulus ilaarsinnaavarput?
17 Paulusip inuuneratigut ersarilluarpoq ’maangaannaq’ arpasimanngitsoq. Kristumiutut oqaluussisartuusimaneranut apustiliusimaneranullu takussutissarpassuaqarpoq. Ataasiinnarmik anguniagaqarsimavoq, inuuninilu tamaat tamanna anguniarlugu ilungersorsimavoq. Tusaamasaaneq, pissaaneq, pisuussutit ilorrisimaarutilluunniit immaqa allaat tamaasa angusinnaasimagaluarlugit allamut sangussutiginngisaannarsimavai. (apustilit suliait 20:24; 1 Korintumiut 9:2; 2 Korintumiut 3:2, 3; Filípimiut 3:8, 13, 14) Illit inuunerit kingumut qiviarlugu tumitit misissorukkit qanoq ingerlasimavit? Siumuinnaq ingerlasimavit, imaluunniit aalajangersimasumik anguniagaqarnak ingerlasimavit? Inuuneq anguniarlugu arpannermut peqataaninnut takussutissaqarpa? Eqqaamajuk arpannermut tamatumunnga asuliinnaq peqataannginnatta, anguniagaqarlutali.
18. (a) Qanoq ililluta ’silaannarmut tilluaasoorsinnaavugut’? (b) Sooq tamanna navianaateqarpa?
18 Taava Paulusip timersuut alla aamma assersuutigaa: ’Tilluivunga silaannarmut pinnanga.’ (1 Korintumiut 9:26b) Inuuneq anguniarlugu assoruunnitsinni akerarpassuaqarpugut, ilaatigut Satan, silarsuaq namminerlu naammalluinnanngitsuunerput. Itsaq tilluuttartutut akeqqavut tamakku eqqorluaqattaarlugit tilluartariaqarpavut. Jehova Guutip sungiusassavaatigut akiuunnitsinnilu ikiorluta. Oqaatsini, atuagassiat Biibililersaartut kristumiullu ataatsimiittarneri aqqutigalugu ilitsersussavaatigut. Kisianni Biibili atuagassiallu Biibililersaarutaasut atuartaraluarlugit ataatsimigiiartaraluarlutalu ilinniakkavut iliuutsitsigut atunngikkutsigik ’silaannarmut tilluaallutalusooq’ nukivut atulussinnassavavut. Navianartorsiortorujussuanngussaagut, tassami akiuussorissaagut, taamaalillutalu asuliinnaasumik toqqissisimassalluta, akeqqavullu uniortaqattaarlugit. Taamaattuminguna ajoqersugaq Jakob ima allassimasoq: ’Oqaaseq naammassillugu pigitsi tusaaginnarnagulu, ilissinnut salloqittaqivusi.’ Soorlu ’silaannarmut tilluaagutta’ akeqqavut eqqornavianngikkivut, oqaatsimut tusaaginnartuugutta Guutip piumasaanik iliornavianngilagut. — Jâko 1:22; 1 Samuel 15:22; Matîuse 7:24, 25.
19. Qanoq ililluta qulakkeersinnaavarput arlaatigut ’angiluttunnginnissarput’?
19 Paulusip iluatsitsinerminut pissutiviusoq naggataatigut oqaluttuaraa: ’Timiga artorsartippara kiffaasutut ilillugu, allanut oqaluussisartunga nammineq angiluttoqqunanga.’ (1 Korintumiut 9:27) Paulusitut iliorluta timerput naammalluinnanngitsoq artorsartittariaqarparput, tamatumannga artorsartinneqarata. Piumatussuseq timillu kajungerisai sorlaasigut piiartariaqarpavut. (Rûmamiut 8:5-8; Jâko 1:14, 15) Tamanna annernarsinnaavoq, oqaasermi ’artorsartippaa’-mik nutserneqarsimasoq isumaqavippoq ’isip ataatigut tilluppaa’ (Kingdom Interlinear). Pitsaanerunnginnerpa isikkut tilluusaqaraluarluni inuuginnaraanni, timip kajungerisaanut nakkarluni toqunerminngarnit? — Naleqqiuguk Matîuse 5:28, 29; 18:9; Juánasip agdlagai sujugdlît 2:15-17.
20. Sooq ingammik massakkut pisariaqarluinnarpa inuuneq anguniarlugu arpannitsinni qanoq arpannerluta misissussallugu?
20 Apuuffissatsinnut maanna apuulluinnalerpugut. Ajugaasut akissarsiaannik agguaassinissaq qanillivoq. Tanitat akissarsiassaat tassa ’Guutip Kristus Jesusikkut pavannga qaaqqusissutaa’. (Filípimiut 3:14) Amerlangaartunut ilaasunut akissarsiassaq tassa nunami paratiisiumi naassaanngitsumik inuuneq. Qanoq arpannerput aalajangiisuusorujussuummat Paulusitut aalajangiusimalluinnartigu arlaatigut ’angiluttunnginnissarput’. Qanortoq tamatta ajugaasup akissarsiaa ilungersorluta anguniartigu kajumissaarut manna malillugu: ’Taama arpagitsi pisaariumallugu.’ — 1 Korintumiut 9:24, 27. (wD 1/8 92)
Qanoq akissavigit?
□ Sooq kristumiutut inuuneq arpannermut assersuunneqarsinnaava?
□ Inuuneq anguniarlugu arpanneq ajugaaniulluni arpaliunnermit qanoq allaassuteqarpa?
□ Sooq „sutigut tamatigut“ imminut naalakkersinnaassuseqartuartariaqarpugut?
□ ’Maangaannaq’ pilluni arpanneq qanoq pinngitsoorneqarsinnaava?
□ Sooq ’silaannarmut tilluaaneq’ navianarpa?
[Qupp. 19-mi assiliartaq]
Ajugaasup niaqorutaa tusaamasaanerlu erniinnaq nunguttarput