Messiasip najuunnera naalakkersuineralu

’Jesus taanna ilissinnit qilammut pavunnartitaasoq taamaalluni tikiukkumaarpoq, soorlu qilammut aallartoq takugissi.’ — APUSTILIT SULIAIT 1:11.

1, 2. (a) Jesus qilaliarmat inngilit marluk taassuma apustiliinik qanoq tuppallersaappat? (b) Kristusip tikiuteqqinnissaa qanoq apeqquteqarfigineqarsinnaava?

ANGUTIT aqqanillit Uuliap qaqqaata sivingarnani kangillermi nikorfapput qilammut nakkussillutik. Aatsaannguummat Jesus Kristus akornannit qangattartitaasimavoq nuissamullu aanngariartuaarsimalluni. Angutit taakkua ukiuni Jesusimik najuiffimminni taassuma Messiasiuneranut nalunaajaatissarpassuarnik takusaqartarsimapput. Toqunera aliasuutigisimavaat makinneralu qiimmattaatigisimallugu. Maannali peeruppoq.

² Tassanngaannaq inngilit saqqummerput, imalu tuppallersarlugit: ’Angutit ukorsii Galiliiamiuususi, sooq qeqarpisi qilammullu aarlungallusi? Jesus taanna ilissinnit qilammut pavunnartitaasoq taamaalluni tikiukkumaarpoq, soorlu qilammut aallartoq takugissi.’ (apustilit suliait 1:11) Eqqissiallassutigisaminnik paasivaat Jesusip qilammiileruni nunarsuaq inuillu puiornavianngikkai, tikiuteqqikkumaarlunilu. Oqaatsit taakkua apustilinik qularnanngitsumik neriulersitsipput. Ullumikkuttaaq inuit millionilikkuutaat Kristusip tikiuteqqinnissaanik neriorsuut assut pingaartippaat. Tikiuteqqinnissaa tamanna inuit ilaasa taasarpaat „aappassaanik tikiunneq“-mik imaluunniit „adventi“-mik. Amerlanerilli Kristusip tikiuteqqinnissaa qanorpiaq paasisariaqarnersoq nalornissutigigunarpaat. Qanoq ililluni Kristus tikiutissava? Qaqugu? Ullumikkullu inuunitsinnut qanoq sunniuteqassava?

Kristus qanoq ililluni tikiuteqqissasoq

3. Kristusip tikiuteqqinnissaa pillugu inuppassuit qanoq isumaqarpat?

³ Atuagaq An Evangelical Christology naapertussagaanni „Kristusip aappassaanik tikiunnerani imaluunniit tikiuteqqinnerani (pa·rou·siʹa) Guutip naalagaaffia allanngortitassaanngitsumik pilersinneqassaaq, takussaasumik ataavartussamillu“. Kristusip tikiuteqqinnissaa takussaasumik nunarsuarmiittunillu tamanit takuneqarsinnaasumik pissasoq nalinginnaasumik upperineqarpoq. sarĸúmersitat 1:7 tamatumunnga tapersersuutitut amerlasuunit atorneqarniartarpoq. Tassani allassimagami: ’Ata, nuiatigut aggerpoq, tamarmillu isaasa takujumaarpaat, taakkuattaaq taassuminnga kapisisut.’

4, 5. (a) Qanoq ililluta nalunngissinnaavarput sarĸúmersitat 1:7 assersuutaasoq? (b) Jesusip nammineq oqaasiisigut tamanna qanoq ililluni uppernarsarneqarpa?

⁴ Eqqaamajulli sarĸúmersitat ’takorluukkersaarutaammata’. (sarĸúmersitat 1:3) Taamaattumik allassimaffik taanna assersuutitut saqqummiussaavoq. Aap, ’taassuminngami kapisisut’ qanoq ilillutik Kristusip tikiuteqqinnera takusinnaassagamikku? Ukiummi 2000-ingajaat matuma siornagulli toqoreersimapput. Aammalu inngili oqarpoq aallarnermisut ’taamaalluni’ tikiuteqqikkumaartoq. Qanoq ililluni aallarami? Inuit millionilikkuutaat isigisut? Naamik, apustiliisa aalajaatsut ilaannamininngui kisimik qilaliarneranik takunnipput. Inngilit imminnut oqalutsillugit Kristus qilammut apuunnissaa tikivillugu isiginnaarpaat? Naamik, Jesus nuissamut pulammat takusinnaajunnaarpaat. Kinguningaatsiaa pinngortitatut anersaajusutut, inuillu isaannit takuneqarsinnaanani, anersaat qilaannut isersimassaaq. (1 Korintumiut 15:50) Tassa apustilit annerpaamik Jesusip qilaliarnerata aallaqqaataannaa takusimavaat. Qilaliarnerata sinnera imaluunniit Ataataminik qilammiusumik, Jehovamik, tikitsinera takusinnaasimanngilaat. Taamaallaat uppernerup isaanik takusinnaasimavaat. — Juánase 20:17.

⁵ Biibilimi ajoqersuutigineqarpoq Jesus annerusutigut taamatut uterumaartoq. Jesus toqunngitsiarnermini nammineq ima oqarsimavoq: ’[Erniinnaq] silamiut takussaassavaannga.’ (Juánase 14:19) Aamma ima oqarsimavoq: ’Guutip naalagaaffia alapernaarsugassaalluni tikiutissanngilaq.’ (Lúkarse 17:20) Qanormi ililluni ’tamarmik isaasa takujumaarpaat’? Tamanna akisinnaajumallugu oqaaseq Jesusip tikiuteqqinnissaa pillugu taassuma ajoqersugaasalu atortarsimasaat paasilluaqqaartariaqarparput.

6. (a) Sooq oqaatsit „tikiuteqqinneq“, „advent“ aamma „tikiunneq“ oqaatsimut griikerisuumut pa·rou·siʹa-mut nassuiaatigissallugit naammanngillat? (b) Sukkut erserpa Jesusip pa·rou·siʹa-a imaluunniit „najuunnera“ sivikitsuinnaanngitsoq?

⁶ Kristusimi tikiuteqqiinnassanngilaq. Oqaatsit „tikiunneq“ imaluunniit „advent“ ataasiaannarluni iliuutsimut qaangiutipallattumut atorneqartarput. Oqaaserli griikerisooq Jesusip ajoqersugaasalu atortarsimasaat imaqarnerujussuuvoq. Oqaaseq taanna tassaavoq pa·rou·siʹa, isumaqavillunilu „eqqaaniinneq“, tassa „najuunneq“ imaluunniit „najuineq“. Ilisimatuut amerlanerit isumaqatigiipput oqaaseq taanna isumaqaannanngitsoq tikiunneq aammali tikiutereerluni najuunnermik imaqartoq — kunngikkormiup tikeraarneratut. Najuunneq tamanna imaaliallannerinnaanngilaq piffissamilli aalajangersimasumik sivisussuseqarluni. Matîuse 24:37-39 naapertussagaanni Jesus oqarsimavoq ’Inuup ernerata tikiuffissaa’ imaluunniit „najuunnissaa“ [pa·rou·siʹa] Ulersuarmik naggateqartutut ’Noap ulluinisut’ ikkumaartoq. Noa umiarsualiorsimavoq ulersuullu nalliulluni silarsuup aaqqissuussaaneranik ajortunngorsimasumik suujunnaarsitsinnginnerani ukiuni qulikkaani inunnik ajortunik mianersoqqusisarsimalluni. Taamatuttaaq Kristusip takussaanngitsumik najuunnera aseruinersuarmik naggaserneqartinnagu ukiut qulikkaat ingerlaqqaassapput.

7. (a) Suup ersersippaa Jesusip pa·rou·siʹa-a inuit isaannut takussaanngitsuusoq? (b) Kristusip najuunnerata ’tamarmik isaannut’ takuneqarsinnaalernissaanik siulittuut qaqugu eqquutissava?

⁷ Jesusip pa·rou·siʹa-a inuit isiviinut takussaanngilaq. Takusaasussaasimagaluarpammi sooq Jesusip ajoqersukkani najuunnissaminut nalunaaqutassaannik paasissutissinniarlugit ilungersorsimassava?a Kristus Satanip silarsuarmik aaqqissuussaa aseroriartorlugu tikiuppat najuunnera tamanut ersarissaaq. Tassa taamanikkussamut ’tamarmik isaasa takujumaarpaat’. Allaat Jesusimut akerliusut annilaarutigeqisaminnik Kristusip naalakkersuinerata piviusuunera nassuerutigiumaarpaat. — Takuuk Matîuse 24:30; Tásalûníkamiunut agdlagkat áipait 2:8; sarĸúmersitat 1:5, 6.

Qanga aallartippa?

8. Pisoq suna Kristusip najuunnerata aallartinneranut takussutissaava, sumilu piva?

⁸ Messiasip najuunnera qilammi Kunngitut niaqoruserneqarneranik aallartippoq, tamannalu Messiasimik siulittuutini uteqattaartuarneqarpoq. (2 Samuel 7:12-16; Jesaja 9:6, 7; Hesekiel 21:26, 27) Jesusip nammineq ersersissimavaa najuunnissani kunngiussutsiminut atassasoq. Assersuusiamini arlalinni imminut assersuuppoq angummut illuni kiffanilu qimallugit kunngiussutsimik piartorluni ’nunamut ungasissumut’ aallartumut. Pa·rou·siʹa-ni qaqugu aallartissanersoq ajoqersukkami apeqqutaannut akissutitut assersuusiaq taama ittoq saqqummiussimavaa. Assersuusiaq alla saqqummiussimavaa ’isumaqarmata Guutip naalagaaffia erniinnannguaq ersersitaassasoq’. (Lúkarse 19:11, 12, 15; Matîuse 24:3; 25:14, 19) Nunamiikkallarmat niaqoruserneqarfissaa siunissami ungasissorsuarmiissimavoq. Qilaap ’nunaani ungasissumi’ pisussaasimavoq. Qaqugu?

9, 10. Suup ersersippaa Kristus massakkut qilammi naalakkersuisoq, qangalu Jesusip naalakkersuinini aallartippaa?

⁹ Jesus ajoqersugaasa ima aperisimavaat: „Suna najuunnissannut pissutsillu aaqqissuussaanerata naggatissaanut nalunaaqutaassava?“ Akissummini Jesusip susoqarnissaa oqaluttuareqqissaarpaa. (Naleqqiuguk Matîuse, kapitali 24 (NV); Mákorse, kapitali 13; Lúkarse, kapitali 21. Takukkittaaq Timûtiusimut agdlagkat áipait 3:1-5; sarĸúmersitat, kapitali 6.) Nalunaaqutit tamakku piffissamik annikilliorfioqisumik sukumiisumik nassuiaataapput. Tassaavoq piffissaq nunarsuaq tamakkerlugu sorsunnertalik, pinerlunniarnerup annertusiartuinnarfigisaa, ilaqutariit avissaartuuffigisaat, nappaalanersuaqarfiusoq, kaannersuaqarfiusoq nunallu sajuttarfigisaa — sukkut tamaanaannaanngitsoq nunarsuarli tamakkerlugu. Tamakku ilisarnanngillat? Jesusip eqqartugaasa ukiut hundredellit 20-ssaannut naleqquttuunerat ullut tamaasa uppernarsarneqartuartarpoq.

¹⁰ Oqaluttuarisaanermik allattartut isumaqatigiissutigaat 1914 inuiaat oqaluttuarisaaneranni allanngornersuaqarfissuusoq, ajornartorsiutit tamakkorpassuit tulleriiaaginnavillutik nunarsuaq tamakkerlugu pisaqattaalerfiat. Aap, silarsuarmi pisartut Biibilimi siulittuutit eqquunnerattut tamarmik 1914 Jesusip Kunngitut qilammi naalakkersuilerfiatut tikkuarpaat. Aammalu pisussat kinguleriiaarlugit Danielimik allakkani kapitali 4-mi siulittuutigineqartut ukioq tamannarpiaq — 1914 — Jehovap Kunngimik ivertitsiffiatut tikkuartorpaat.b

Sooq annikilliorfiussava?

11, 12. (a) Sooq Kristusip qilammi massakkut naalakkersuinera inuit ilaannut upperiuminaappa? (b) Jesusip kunngitut niaqoruserneqarnerata kingorna pisut sumut assersuunneqarsinnaappat?

¹¹ Ilaalli ima aperisarput: ’Sooq Messias qilammi naalakkersuisimappat silarsuaq taama ajornartorsiorfiutigaa? Naalagaakkersuinera iluaqutaannginnami?’ Ima assersuusiortoqarsinnaavoq: Nuna presidentimit ajortumit nakkaalluinnartinneqarsimavoq. Inuiaqatigiit ingerlaasiat paatsiveeruttorsuanngortissimavaa. Taava kiffaanngissusilimmik qinersineqarpoq. Angut pitsaasoq ajugaavoq. Taava susoqassava? Soorlu nunani demokratiskiusuni amerlanerni taamaattoq qaammatialunnguit qaangiuppata aatsaat presidenti nutaaq atorfittaaminut ivertinneqassaaq. Angutit taakkua marluk piffissap tamatuma ingerlanerani qanoq iliussappat? Angutip pitsaasup pissutsit ajortut siulimi pilersissimasai ingerlaannaq piiarnialissavai? Siullermik illoqarfiit pingaarnersaanni iliuuseqassannginnerpa, naalakkersuisunik nutaanik pilersitsilluni, siulimilu nersornittai malittaalu piiarlugit? Taamaalilluni atorfittaani aalajangersassavaa, pissaanermillu minguiarsimasumik sunniisinnaassuseqarluartumillu pigisaqalissalluni. Presidentilu peqquserluttoq pissaanermi annaannginnerani piffissamininnguaq sinneruttoq nunap ilaata sapinngisamik annertuup iluaqutiginiapilullugu atornerlunnissaanut atussannginnerpaa?

¹² Kristusip pa·rou·siʹa-ni aamma taama pisoqarpoq. sarĸúmersitat 12:7-12-imi ersersinneqarpoq Kristusip qilammi kunnginngorami siullermik Satan inngilipiluilu qilammit peersikkai, taamaalilluni qilammi nunamilu tamarmi naalakkersuisoqarfik minguiarlugu. Utaqqisaasimaqisoq taamaalilluni pivoq — Satan ajorsartitaavoq. Kristusip nunarsuarmi oqartussaassutsimik tamakkiisumik tigusinnginnerani ’piffissami sivikitsumi’ sulerisimava? Presidenti peqquserluttoq assigalugu aaqqissuussaanitoqaq sapinngisaminik atornerlunniarpaa. Aningaasanik pinianngilaq, inuilli inuunerannik. Kissaatigaa inuit sapinngisamik amerlanerpaat Jehovamit taassumalu kunngiutitaanit tunutsissallugit.

13. Biibilimi qanoq ililluni ersersinneqarpa Kristusip naalakkersuinerata aallaqqaataa nunarsuarmi annikilliorfiussasoq?

¹³ Taamaattumik tupinnanngilaq Messiasip naalakkersuinerata aallartinnera ’nunamut eqqanartunik’ nassataqarmat. (sarĸúmersitat 12:12) Taamatuttaaq Tussiaat 110:1, 2, 6-imi ersersinneqarpoq Messias ’akeqqami akornanni’ naalakkersuilersimasoq. Aatsaat kingusinnerusukkut ’inuiaat’ Satanillu silarsuaani ajortumi suut tamaasa suujunnaarsissavai.

Messias nunarsuarmut naalakkersuilerpat

14. Messias Satanip aaqqissuussaanera ajortoq aseroreeruniuk qanoq iliorsinnaalissava?

¹⁴ Satanip aaqqissuussaanera taassuminngalu tapersersuisut tamaasa suujunnaarsereerunigit kunngip Messiasiusup, Jesus Kristusip, ukiuni tuusintini naalakkersuinissaminut Biibilimi siulittuutaasut kiisami eqquutsissinnaalissavai. Isaiap agdlagai 11:1-10 ikiortigalugu paasisinnaavarput Messias naalakkersuisutut qanoq ittuussasoq. Versi 2-mi oqaatigineqarpoq ’Jehovap anersaavata, anersaap ilisimanartup siuneqarnartullu, anersaap siunnersuisup pissaasullu’ najussagaa.

15. ’Anersaaq pissaasoq’ Messiasip aqutsineranut qanoq pingaaruteqassava?

¹⁵ Takorlooriaruk ’anersaaq pissaasoq’ Jesusip naalakkersuineranut sunniuteqassasoq. Nunamiikkallarami Jehovamit pissaaneqartitaasimavoq tupinnartuliorsinnaassutigisaminik. Oqaatigisimavaalu inuit qamannga pisumik ikiorusullugit, ima oqarluni: ’Piumavunga.’ (Matîuse 8:3) Tupinnartuliaali qilammit naalakkersuileruni naammassisassarpassuinut takussutissaminiinnannguupput. Nunarsuaq tamakkerlugu tupinnartuliortalerumaarpoq! Napparsimasut, tappiitsut, tusilartut, innarluutillit nukillaarsimasullu naassaanngitsussamut ajorunnaarsinneqarumaarput. (Jesaja 35:5, 6) Nerisassat naammattorsuit naapertuilluartumik agguaanneqartalerpata kaattoqartarunnaavissaaq. (Tussiaat 72:16) Iliverniittummi millionilippassuit Guutip nuannaarluni eqqaamasai? Taakku paratiisimi naassaanngitsumik inuunissaannik periarfissillugit makitinnissaannut aamma Jesus pissaaneqartitaassaaq! (Juánase 5:28,29) Kunngili Messiasiusoq naak pissaaneqaraluaqaluni angigaluaqalunilu maniguuttuaannassaaq, ’kajungerissallugu Jehovamik mianerinninneq’. — Jesaja 11:3.

16. Kunngi Messiasiusoq eqqartuussisuussava qanoq ittoq, taamaalillunilu inuit eqqartuussisuinit qanoq allaanerussuteqassava?

¹⁶ Kunngi taanna aamma eqqartuussisuussaaq naammalluinnartoq, ’eqqartuussissanani isimi isigisaat najoqqutariinnarlugu, aalajangiissananilu siutimi tusagaat maliinnarlugu’. Inuk eqqartuussisoq, itsaq ullumiluunniit, taamatut eqqaaneqarsinnaava? Angulluunniit naapertuilluarnerpaaq isigisani tusaasaniluunniit najoqqutariinnarlugit eqqartuussisisinnaasarpoq, ilisimassuseq siuneqassuserlu pigisannguani naapertorlugit. Silarsuatoqqami matumani eqqartuussisut aalajangiisussatullu qinikkat salloqittartissinnaasarput imaluunniit inimi eqqartuussivimmi peqqusersiortoqarneranit nalunaajaatinilluunniit imminnut akerleriittunit paatsiveerutsinneqarsinnaallutik. Pisuut pissaanillillu kisimik eqqartuussissuserisumik pikkorissumik ikiorteqarnissaminnut akissaqartarput, taamaalillutillu eqqartuussinermi ajugaanissartik ’pisiarisarlugu’. Eqqartuussisup Messiasip atuunnerani taamatut pisoqartarnavianngilaq! Taanna uummatinik takunnissinnaavoq. Suut tamaasa arajutsineq ajorpai. Eqqortoq asanninnermik naakkinnissusermillu ilalik tuniniarneqarnavianngilaq, atuuttuaannassallunilu. — Jesaja 11:3-5.

Naalakkersuinera qanoq ililluni ilinnut attuumassuteqartoq

17, 18. (a) Inuiaat siunissaat nuanningaartoq Jesaja 11:6-9-mi qanoq allaatigineqarpa? (b) Siulittuut tamanna ingammik kikkunnut tunngava, sooq? (c) Siulittuut taanna aamma qanoq ililluni iluamik oqaatigalugu eqquutissava?

¹⁷ Messiasip naalakkersuinera innuttaanut assut sunniuteqassammat paasinarluarpoq. Inunnik allanngortitsissaaq. Jesaja 11:6-9-mi ersersinneqarpoq allanngorneq qanoq annertutigissasoq. Siulittuummi tamatumani killinnartumik eqqartorneqarput qaasuttut navianartuugaluit — nannut, amaqqut, leopardit, liivit, pulateriaarsuit — uumasuutinik nujuitsunik meeraaqqanillu ataatsimooqateqartut. Uumasulli qaasuttuugaluit ulorianarunnaarsimapput! Sooq? Versimi 9-mi allassimavoq: „Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“

¹⁸ ’Jehovamik ilisarsinerup’ soorunami uumasut sunnersinnaanngilai. Taamaattumik versit taakku pingaartumik inunnut tunngapput. Messiasip naalakkersuinerata nunarsuaq tamakkerlugu ilinniartitsineq aallartissavaa, inuit Jehovamik taassumalu aqqutigeqqusaanik ilinniartinneqassammata, tullimik asannittumik, ataqqinnittumik pingaartitsisumillu iliorfiginissaa ilinniassallugu. Paratiisissami Messiasip inuiaat timikkut ileqqussatigullu naammalluinnartunngoriartuaartissavai. Inuit naammalluinnanngitsut nersutitut qaasoriataartarnerat piumatussusiallu peerneqassapput. Aammalu inuiaat kiisami uumasunik eqqisseqateqassapput! — Naleqqiuguk Mosesimik allakkat siulliit 1:28.

19. Messiasip naalakkersuinera ulluni kingullerni makkunani inuit inuunerannut qanoq sunniuteqarpa?

¹⁹ Eqqaamajuk Messias massakkut naalakkersuimmat. Aap, maannangaaq Naalagaaffiup innuttai eqqisseqatigiillutik inuunissartik ilinniarpaat, taamaalilluni Jesaja 11:6-9-mi siulittuut ilaatigut eqquulluni. Aammalu ukiuni 80-ingajanni Jesusip Jesaja 11:10 eqquutsissimavaa: „Ullussami issumani inuiaat ornigukkumaarput Isajip sorlaata naaqqinneranut inuiaqatigiinnut katinngataassalluni napasumut, ineqarfialu alutornangaassaaq.“ Inuit inuiannit tamaneersut Messiasimut ornigupput. Sooq? Naalakkersuilernerminiilli ’katinngatitut napasimammat’. Ilinniartitsineq annertooq qulaani eqqartorneqartoq ikiortigalugu najuunnini nunarsuarmi tamarmi ilisimaneqalersissimavaa. Pissutsit aaqqissuussaanerata pisoqqap naggaserneqannginnerani najuunnerminut nalunaaqutassatut nunarsuaq tamakkerlugu oqaluussinersuaq Jesusip siulittuutigisimavaa. — Matîuse 24:14.

20. Messiasip naalagaaffianut innuttaasut qanoq isumaqarnaveersaartariaqarpat, sooq?

²⁰ Naalagaaffiup pissaanerani Kristusip najuunnera tassaannaanngilaq isumaliutersuut paasiuminaatsoq upperisarsiornermik ilisimatuuinnaat oqallisigisassaat. Esajasip siulittuisimaneratut maani nunami inuppassuit inuunerannik Kristusip naalakkersuinera allanngortitsisimavoq. Jesusip inuit millionilikkuutaat silarsuarmit ajortunngorsimasumit Naalagaaffimminut innuttanngornissaannut siulersorsimavai. Illit innuttaanut ilaavit? Taamaappat angorniorlutit qiimasullutillu Naalagarput pisassaanik kiffartorfiginiaruk! Utaqqikataqqajaanarsinnaasarpoq, silamiullu nimaarutaat manna eqqaaqqajaanarsinnaalluni: ’Naammiuna tikiunnissamik unnersuut?’ (2 Pîtruse 3:4) Kisianni soorlu Jesus oqarsimasoq: ’Naggatissamulli aalajangersoq annakkumaarpoq.’ — Matîuse 24:13.

21. Messiasikkut neriuutitsinnik pingaartitsinerput tamatta qanoq ililluta allisissinnaavarput?

²¹ Ullussarsuaq Jehovap ernermi najuunneranut silarsuarmut tamarmut ersarissisitsilluinnarfissaa ullut tamaasa qanilliartuinnarparput. Ullussamut tamatumunnga neriunnerit toqutinngisaannaruk. Jesusip Messiasitut atorfia Kunngitullu naalakkersuisutut pissusii eqqarsaatigeqqissaartakkit. Aammalu Jehova Guuti, Messiasimik neriuummut misinnangaartumut Biibilimilu nassaassaasumut tunuliaqutaasoq eqqarsaatigisaruk. Taamaaliortaruit qularnanngitsumik apustilip Paulusip oqarsimaneratut misigiartuinnassaatit: ’Ata, Guutip pisuussusiata ilisimaneratalu ilisarsineratalu itissusiat.’ — Rûmamiut 11:33. (wD 1/10 92)

[Quppernerup ataani ilanngussat]

Qanoq akissavit?

□ Qanoq ililluni Kristus tikiuteqqittussaasimava?

□ Qanoq ililluta nalunngissinnaavarput Kristusip pa·rou·siʹa-a takussaanngitsuussasoq piffissamilu sivisungaatsiartumi ingerlassalluni?

□ Kristusip najuunnera qanga aallartippa, qanorlu ililluta tamanna nalunngilarput?

□ Messias Naalakkatut qanoq ittuuva?

□ Kristusip naalakkersuinerata innuttami inuunerat qanoq sunnerpaa?

[Qupp. 17-mi assiliartaq]

Jesusip tikiuteqqinnissaanik neriuutertik apustiliisa aalajaatsut pingaartittorujussuusimavaat

[Qupp. 19-mi assiliartaq]

Jesus qilammit naalakkersuileruni nunarsuaq tamakkerlugu tupinnartuliortassaaq

[Suminngaanneernera]

Earth: Based on NASA photo