Sooq naammagittaalliorumatooq pilluanngitsoq

SAPAATIP-AKUNNERI marlussuinnaat ingerlaneranni nuannaarneq ernumaninnguussimavoq. Israelikkut Egyptenimi inussiaajunnaarsitaanerminnik tipaatsuutiginninnerat nerisaminnik orullutiginninnerannit taarserneqariartuaarsimavoq. Egyptenimit aallarnerminnit qaammatit aappassaanni Israelikkut naammagittaalliorlutik oqarsimapput puilasuitsumi inuuniarnermut ajornakusoortumut taarsiullugu inussiatut atukkatik attatiinnarsimasariaqaraluarlugit. Qaammatini tulliuttuni Israelikkut naammagittaalliungaaramik Jehovamut naalannissartik tunullinngortippaat kinguaariillu nunamut neriorsuutigisamut isersinnaanerigaluat akornuserlugu. — 2 Moses 16:1-3; 4 Moses 14:26-30.

Soorunami kinguaariit ataasiinnaanngitsut imaluunniit inuiaat ataasiinnnaanngitsut orulullutillu naammagittaalliortarsimapput. Kinami suliffimminik, nerisaminik, silamik, meeqqanik, saniliminik inuuniarnerulluunniit akisunersuanik orulluteqarsimanngila? Inuit naammalluinnanngitsut naammagittaalliorneq pissuserivinnguatsiarpaat. — Rûmamiut 5:12; Jâko 3:2.

Sooq taama naammagittaalliupallattartigaagut? Immaqa ilaannikkut nikallunganerput imaluunniit pakatsisimanerput napparsimanerpulluunniit pissutaasarpoq. Naammagittaalliornitsigut isumatsassimanerput aniatittarparput, toqqaannartumilluunniit ima oqarluta: „Uanga pitsaanerusumik suliarisinnaasimagaluarpara!“ Ilaatigut inuttut assigiinngissuseq orulunermut pissutaasarpoq. Aammali assuarlernissamut allatulluunniit naammagittaalliornissamut ilumoortumik patsisissaqartarpoq.

Israelikkunnik pisimasup ersersippaa naammagittaalliortuaannarneq, qanorluunniit patsiseqaraluaruni, aserorsaataasartoq. Inuk naammagittaattuaannalersinnaavoq, allaallu naggataatigut Jehovap ilioriaasiinik isornartorsiuilersinnaalluni. Tamanna sooq taama ulorianartigaa? Naammagittaalliornissamullu pissutissaqavikkaanni qanoq iliortoqarsinnaava?

Unnerluutit pissutissallit

Uumitsaassinerput ingasarujussuanngitsumik patsiseqarpat imminut aperisinnaavugut asannilluta puiuinnassannginnerlugu. Immaqa pissutissaqarluarluta allap, immaqalumi allaat uppeqatitta, iliuusaanut ajuallappugut. Immaqa inussiarniitsumik naapertuilluanngitsumilluunniit pisimavaatigut. Ajornartorsiulli aaqqinneqarsinnaava qanoq iluanngitsigisumik pineqarsimaneq kikkunnut tamanut oqaluttuareqattaaraanni? Qanoq qisuariassasugut Biibilimi qanoq siunnersorneqarpugut? Kulorsamiunut agdlagkat 3:13-imi ima allassimavoq: ’Immissinnut unnerluutissaqaraluarussi kamageqatigiillusilu isumakkeerfigeqatigiigitsi; soorlu Jehovap isumakkeerfigigaasi, taamattaaq ilissi pigitsi.’ Tassa arlaannik uparuaanissamut pissutissaqaraluarpalluunniit Biibilimi siunnersorneqarpugut naammagittaalliorfigeqatigiinnissatsinnut taarsiullugu isumakkeerfigeqatigiissasugut. — Matîuse 18:21, 22.

Ajornartorsiulli qaangiinnarneqarnissaminut ingasappallaarpat qanoq iliussavit? Iliuuseqarfiginissaa tulluassaaq. Sodomamiit Gomorramiillu ’maalaarneq’ imminut anngummat Jehova illoqarfinni ajortunngorsimasuni taakkunani pissutsinut kanngunartunut akuliussimavoq. (1 Moses 18:20, 21) Ukiumi 33-mi piinsip kingorna aamma naammagittaalliornissamut pissutissaqarsimavoq. Taamanikkummi uillarnernut pissakilliortunut inuussutissanik agguaanermi arnat hebriiarisut oqaluttut salliutinneqarsimapput. Tupinnanngitsumik uillarnerit griikerisut oqaluttut tamanna kamassutigisimavaat. Tamanna apustilinit ilisimaneqalerpoq, angutinillu akisussaasunik ajornartorsiummik aaqqiiniartussanik katersortitsipallapput. — apustilit suliait 6:1-6.

Ullumikkuttaaq utoqqaanertat toqqakkat kristumiut ajortoqartoq paasigunikku iliuuseqarnissaminnut tunuarsimaartariaqanngillat. Ussatit 21:13-imi ima allassimavoq: „Piitsut nillianerannik tusaajumanngitsoq nammineq suaartaraluaruni akineqassanngilaq.“ Naammagittaalliuut pissutissaqartoq sumiginnarnagu utoqqaanertat paasinnillutik tusarnaartariaqarput. Taamatuttaarlu uagut suleqataasinnaavugut arlaannik ingasattumik uparuagassaqarpat utoqqaanertanukartarnitsigut, naammagittaalliuutivullu kikkunnut tamanut siaruarternaveersarlugit.

Ilumuuillutali oqassagutta amerlanersatta nassuerutigisariaqassavaat inuttut naammalluinnanngissuserput pissutigalugu ilaannikkut pissutissaqanngitsumik naammagittaalliortarlutik. Israelikkut puilasuitsumiitillutik pissuserisimasaat paasiniaqqissaarutsigu paasilissavarput orulullattaartuarneq naammagittaalliortuaannalernermik kinguneqarsinnaasoq.

Naammagittaattuartunut Guutip isiginninnera

Israelikkut nerisassaminnik maalaarutiginninneratigut erserpoq naammagittaanneq marlunnik navianaateqartoq. Siullermik isornartorsiuerpalussuseq tuniluuttarpoq. Oqaluttuarineqarpoq ’Israelikkut tamarmik inoqajuitsumiitillutik naammagittaalliorlutik Mosesimut Aronimullu oqaloqarujulersimasut’. (2 Moses 16:2) Qularnanngitsumik ikittuinnaat nerisassakilliornertik oqalorujuutigilersimavaat, sivitsunngitsorlu tamarmik naammagittaalliornermut ilaaqqussimallutik.

Aappassaanillu ajornartorsiut ingasattajaarunneqaqqajaasarpoq. Israelikkut inoqajuitsumiinnerminni naammagittaalliorsimapput oqarlutik Egyptenimi atugarissaarnerussagaluarlutik, piumasaminnik iffianik neqinillu nerisinnaagamik. Nimaarput oqarlutik perlerlutik toqusussanngorlutik inoqajuitsumukaanneqarsimallutik. — 2 Moses 16:3.

Ilumulli Israelikkut taama ajornartorsiortigippat? Imaassinnaavormi nerisassamaataat nungoqqajaalersimasut, Jehovalli tamanna siumut eqqarsaatigisimavaa timikkullu pisariaqartitaat matussutissinniarlugit siusinaarluni mannamik isumagisimallugit. Ingasattajaarlutik nimaarnermikkut takutippaat Guutimut tatiginninnermik amigaateqarluinnarlutik. Egyptenimiikkallaramik atukkatik artornartut pissutissaqarluarlutik naammagittaalliutigisimasinnaagaluarpaat. (2 Moses 2:23) Jehovalli inussiaanerminnit aniguisimmatik nerisassatik orullutigilerpaat. Taamaaliornerat pissutissaqanngitsumik naammagittaanneruvoq. „Jehova-una naammagittaalliorfigigissi, uagut pinnata,“ Moses mianersoqqusilluni oqarsimavoq. — 2 Moses 16:8.

Israelikkut taama naammagittaalliussusiat ersertuartarsimavoq. Ukioq ataaseq qaangiutinngitsorluunniit allaat manna orulunissaminnut pissutiginiarsimavaat. (4 Moses 11:4-6) Kinguninnguagut israelikkut alapernaarsuisuutitaasa 12-uusut ilaasa 10-t nunamik neriorsuutigisamik tiguaanissamik aarlerisaarillutik nalunaarutaat pissutigalugu orulunersuaqalerpoq. Naammagittaalliungaaramik allaat ima oqarsimapput: „Egyptenimi inoqajuitsumiluunniit maani toquinnarsinnaagaluaruttatoq!“ (4 Moses 14:2) Ilumut pingaartitsinnginnermik ersersitsineq ingasak! Tupinnanngilaq Jehova Mosesimut oqarsimammat: „Inuiaat ukua qanoq sivisutigisumik asiginnassagaminnga? Qanoq sivisutigisumik upperiumassannginnaminnga?“ (4 Moses 14:11) Inuit qujasuitsut naammagittaalliorniaannartullu taakku eqqartuunneqarput ukiuni 40-ni inoqajuitsumi angalaartussanngorlugit kinguaariit nungunnissaasa tungaannut.

Apustilip Paulusip pisimasumik tamatuminnga eqqaasippaatigut. Uppeqatini mianersoqqusimavai israelikkutut naammagittaalliorumatuutut inoqajuitsumi ajunaartutut ilinnginnissaannik. (1 Korintumiut 10:10, 11) Taamatuttaaq pissutissaqanngitsumik upinnersuup naammagittaalliortuaannarnerullu uppernerput aserorsinnaavaa Jehovamillu iluarisaajunnaarnitsinnik kinguneqarsinnaalluni.

Jehovalli kiffani, immaqa pissutsit nikallornartut pissutigalugit ilaannikkut naammagittaalliortartut, naammagittarfigai. Eliasip dronningimit Jesabelimit qinugineqarnini pissutigalugu Horebip Qaqqaanut qimaanermini qularinngilluinnarsimavaa pruffiititut sulinini kipisimasoq. Kukkulluni isumaqarsimagaluarpoq nunami Jehovamut pallorfiginnittuni kiserngorussimalluni. Elias uppernikkut nakussatsinniarlugu Guutip pissaanini tupinnartuliakkut takutippaa. Taava pruffiiti paasitinneqarpoq Israelimi suli 7000-inik Jehovamut kiffaasoqartoq annertuumillu suliassaqartoq. Taamaattumik Eliasip ajornartorsiutini puiorlugit nutaamik nukissaqaqqilerluni suliani ingerlateqqippaa. (1 Kunngit 19:4, 10-12, 15-18) Kristumiut utoqqaanertat naliliisinnaassuseqaramik aamma aalajaatsunik tuppallersaasinnaapput Guutillu siunertaani qanoq inissisimanerannik paasititsiniarsinnaallutik. — 1 Tásalûníkamiut 5:14.

Naammaagittaalliorajunneq ajugaaffigiuk

Naammagittaalliorajunneq qanoq ililluni ajugaaffigineqarsinnaava? Pujortartarnerup ajoqusiisarneranut uppernarsaatinik saqqummiivigineqartut pujortartarunnaarnissaminnut kajuminnerusarput. Taamatuttaaq naammagittaalliorajussutsip navianaataanik paasitinneqarutta isornartorsiueqqajaanitta akiornissaanut kaammattuutigissavarput.

Naammagittaalliorajunneq ajugaaffigigaanni qanoq iluaqutaasarpa? Iluaqutaasoq pingaartoq tassa pissutsit silatusaarnerusumik, Biibili tunngavigalugu, isigisalissavatit. Inuup isornartorsiuiumatuup ajornartorsiut Jehovap isiginnittaasianit isiginiarneq ajorpaa. Israelikkut naammagittaalliorajuttut inussiaataanerminnit Jehova Guutimit aniguisitaasimanertik taassumalu tupinnartuliakkut Immamik Aappalaartumik avissaartitsisimanera puiorsimavaat. Ajortumik eqqarsariaaseqalersimanertik Guutip pissaaneranut tappiillissutigisimavaat nuannaarnerminnillu annaasaqaatigisimallugu. Tamatuma kingunerisaanik Jehovamut tatiginninnertik annaavaat.

Inuup ajornartorsiutiminik silatusaartumik naliliisinnaasup amerlasuutigut nassuerutigisariaqartarpaa nammineq pisuulluni. Assinganik kukkuluttoqqinnissaa ilimanaatikinnerusarpoq. Jeremiasip nunaqqatini Jerusalemip aserugaanerata kingorna pissutsinik ajornakusoortunik atugaqalernissaannik mianersoqqusimavai. Naalliuutaannut namminneq ajortuliaat pissutaapput, peqqissimisinnaassagunillu Jehovamullu saanniaqqissagunik tamanna nassuerutigisariaqarsimavaat. (Upputit 3:39, 40) Taamattaaq ajoqersukkap Judasip ’iluaatsorsuit’ Jehovap siulersuineranik asissuisut ’oqaloqarujuttorsuit atukkaminnik ajorneraasut’ isornartorsiorsimavai. — Jûtarse 3, 4, 16.

Kunngi ilisimasoq Salomon itsaq ima oqarsimavoq: „Uummatikkut nuannaarneq peqqinnartuuvoq, nikallunganerli saanernik aseroriartortitsisarpoq.“ (Ussatit 17:22) Naammagittaalliorajunnerup misigissutsikkut nukillaarsartarpaatigut nuannaarnerpullu milliartortittarlugu. Isumalluanngitsuunermut, isumalluartuunermuunngitsoq, takussutissaavoq. Kisianni ’nersornartunik’ eqqarsaateqarnissaminnik ilikkartut uummatimikkut nuannaartarput, iluarusunnerulerlutik. — Filípimiut 4:8.

Qularutissaanngilluinnarpoq inuit pissusii pitsaasut kukkunerinut amigaataannullu taarsiullugit maluginiarnerusarutsigik inuunerput pisuunngussaaq. Pissutsit misilinneqaataasut nikallussutiginagit pitsaanerpaamik atorniartarutsigik qiimmassaatigissavarput. Allaat annikilliuutit nuannaarnissamut pissutissaasinnaapput uppernikkut qasujuissutsikkullu nakussatsissutissatut isigigaanni. — Jâko 1:2, 3.

Aamma pingaaruteqarpoq eqqaamassallugu naammagittaallioraangatta immitsinnuinnaanngitsoq eqqortaratta. Tassami naammagittaalliortuaannarutta allat uppernerat aseruutissiorsinnaavarput. Israelikkut alapernaarsuisuutitaasa ilaasa qulit nalunaarutaat pitsaanngitsoq pisuulluni Israelikkut tamakkiusavillutik isumaqalerput nunamik neriorsuutigisaasumik tiguaanissaq neriuutissaqanngilluinnartoq. (4 Moses 13:25–14:4) Allami Mosesip inuit kappialajuarnerat ima nikallussutigisimavaa toqunissani Jehovamut qinnutigisimallugu. Ineriartornartunilli oqaaseqartarutta allat uppernikkut nakussatsissinnaassavavut nuannaarnerallu ilassallugu. — apustilit suliait 14:21, 22.

Naak immaqa suleqatitta, ikinngutitta, ilaquttatta imaluunniit allaat ilagiinni utoqqaanertat naammagittaalliutiginissaannut ussernartorsiortaraluartugut Jehovap kissaatigaa innuttani ’ilungersorlutik asaqatigiissasut’. Taamatut asannissuseqarutta allat kukkuneri suaartaatiginissaannut taarsiullugu isiginiarpallaassanngilavut. (1 Pîtruse 4:8) Qujanartumik Jehovap pujualaannaanerput eqqaamavaa, kukkunitsinnillu naatsorsuiffigissanata. (Tussiaat 103:13, 14; 130:3) Tassuunakkut Jehova malikkutsigu qularnanngivissumik maalaaqqajaannginnerussaagut.

Inuiaat naammalluinnartunngortinneqarpata inuunermi atukkaminik naammagittaalliortuerutissaaq. Tamanna pitinnagu allanik isornartorsiueqqajaanaveersaartariaqarpugut pissutsinillu atukkatsinnik kappialaatiginneqqajaavallaarnaveersaarluta. Jehovamik tatiginninnerput uppeqatitsinnillu asanninnerput ersersittarniartigik ’oqalorujunnaveersaarluta nakimanaveersaarlutalu’. (Filípimiut 2:14) Taamaaliorutta Jehova nuannaartissavarput namminerlu assut iluaqutigissallugu. Taamaattumik immitsinnut eqqarsaatigaluta allallu eqqarsaatigalugit puiunngisaannassavarput naammagittaalliortuaannartoq pilluanngimmat. (wD 15/3 93)

[Qupp. 28-mi assiliartaq]

Allaat Guutip tupinnartuliorluni mannamik pilersuinera naammagittaalliornissamut pissutigineqarsimavoq