Naassaanngitsumik anniartitaaneq — Sooq eqqarsaat amiilaarnarpa?

„Tusarpara palasersi soraarsissimagissi. Sooruna?“

„Oqaluttuaannarami anniarfimmut piumaartugut.“

„Palasertaarsimi qanoq oqaluttarpa?“

„Aamma taanna oqaluttarpoq anniarfimmut piumaartugut.“

„Taavami suna assigiinngissutaava?“

„Assigiinngissut tassaavoq palasip siulliup anniarfik eqqartoraangamiuk nuannaarpaluttarami; nutaalli eqqartoraangamiuk aliasuppaluttaqaluni.“

OQALUTTUAAQQAP tamatuma ersersippaa palaseqartoq naalagiartartoqarlunilu anniarfimmik ajoqersuut pillugu ilungersuanartumik isumalinnik. Teologi Canadamiu Clark H. Pinnock ima paasisaqarsimavoq: „Upperisarsiornikkut ajoqersuutinit ukiut hundredelikkuutaat ingerlaneranni inunnik ilerasutsitsisarsimasunit tamanit anniarfiup tarnermik timimillu naassaanngitsumik naalliutsitsiviuneranik nassuiaat siooratitsinerpaasimagunarpoq.“

Ileqqussatigut kingunerit

Sooq kristumiuuneraqatigiit anniarfimmik ajoqersuutaat inuppassuit eqqissiunnaarutigisarpaat? (Sinaakkusigaq takuuk.) Professori Pinnock oqarsimavoq: „Pinngortitap ilisimasup timikkut isumakkullu naassaanngitsumik anniartitaanissaanik eqqarsaat eqqissiunnaarnarluinnarpoq, Guutillu peqqusineratigut anniartitaanerannik eqqarsaat Guutip asanninneranik paasinninninnut akerliulluinnarpoq.“

Aap, anniarfimmi naassaanngitsumik anniartitaanissamik ajoqersuut ileqqussatigut nalornisoornermik pilersitsivoq. Kristumiorpassuit ilumoorusuttut katuullit teologiattut Hans Küngitut imminut aperisarput: „Asanninnerup Guutia . . . neriuutaarunnartumik naassaanngitsumik, naakkittaatsumik, asannissuseqanngitsumik peqqarniitsumillu pinngortitaminik timikkut isumakkullu naalliutsitsinermut ilumut naassaanngitsumik isiginnaartuuginnassanerpa?“ Hans Küng nangippoq: „Ilumut Guuti akiitsugaqarfiua taama naakkittaatsigisoq? . . . Inuk taama akeqqersimatigisumik killeqanngitsigisumillu akiniaarusussutsiminik naammassinnittoq qanoq isumaqarfigissagaluarparput?“a Qanoq ililluni Guutip akeqqatsinnik asanneqqusilluni Biibilimi inatsisup kissaatigisinnaavaa nammineq akeqqami naassaanngitsumik anniartinnissaat? (1 Juánase 4:8-10) Tupinnanngitsumik inuit ilaat isumaqarput anniarfiup pissusia Guutip pissusianut kattutitinneqarsinnaanngitsoq, ileqqussatigut isumaqanngitsoq.

Uppertorpassuit allat apeqqutit toqqissisimananngitsut tamakku ungavarterniartarpaat, soorlu qitsuup nerisassat kissartut ungavartertarai. Nalorninerli puiuiniarsarinikkut peersinnaanngilaq. Atagu misissueriarta. Ajoqersuut tamanna ileqqussatigut qanoq kinguneqarpa? Criswell Theological Review-mi Professori Pinnock allassimavoq: „Naassaanngitsumik anniartitaanissamik eqqarsaat ileqqussatigut isigalugu akuerineqarsinnaanngilaq, Guutimi tassaalersippaa toqutsiumatoorsuaq anniartitaminut allaat toqutinnaveersaakkaminut Auschwitzimik naassaanngitsumik ataavartitsisoq.“ Aperivoq: „Qanoq ililluni inuttut qajassuusserusussuseqalaaginnartulluunniit eqqarsaat taamaattoq [anniarfimmik ajoqersuut nalinginnaasoq] eqqarsaatigissallugu sapissanngilaa? . . . Qanoq ilillutik kristumiut Guutiussuseqartumik taama peqqarniitsigisumik akiniaarusussuseqartigisumillu saqqummiussisinnaappat?“

Ajoqersuutip tamatuma inuit ileqquinut qanoq ajortigisumik sunniisinnaanera Pinnockip oqaatigaa: „Inuit Guutimik akeqqaminik anniartitsisumik upperisaqartut iliuuserisarsimasaat ingasalluinnartut eqqarsaatiginngitsoorsinnaanngilakka.“ Aperivorlu: „Tassaannginnerpa paasinninneq amiilaarnartoq isumaliutigeqqinneqartariaqartoq?“ Aap, Guuti taama naakkittaatsigisutut saqqummiunneqartarpat tupinnarpallaanngilaq naalagiartartut ilumooqqissaarusuttut anniarfik upperissallugu nalornimmata. Aammali anniarfimmik ajoqersuut allamik nalorninartoqarpoq.

Anniarfik naapertuilluassuserlu

Anniarfimmik ajoqersuummik nalinginnaasumik misissuisut amerlasuut isummissapput ajoqersuutip Guuti naapertuilluanngitsutut saqqummiukkaa, naapertuilluassutsimik paasinnittaatsiminnik ajoqusiisoq. Qanoq ililluni?

Jehova Guutip naapertuilluassutsimut najoqqutassiaa imaappoq: „Isi isimik, kigut kigummik, assak assammik, isigak isikkamik.“ (2 Moses 21:24) Nalinganik pinninnissaq Guutip itsaq Israelikkunnut inatsisaasa tunngaviusumik najoqqutaraat. Tassa anniarfimmik ajoqersuut ilumoorsimappat taamaallaat ajortuliortut naassaanngitsumik anniartitsisut naassaanngitsumik anniartinneqartussaassagaluarput — naassaanngitsumik anniartitsineq naassaanngitsumik anniartitsinermik. Inuit (qanorluunniit ajortigigaluartut) killilimmiinnaq anniartitsisinnaagamik anniarfimmik naassaanngitsumik pillagaassagunik pillarneqarnerat ajortuliaannut naapertuutinngilluinnassaaq.

Oqaatigilluaannaarlugu, pillarneqarnerat ingasappallaassaaq. Najoqqutaq „isi isimik kigullu kigummik“ unioqqutinneqassaaq. Eqqarsaatigigaannilu Jesusip ajoqersuutai akiniaanissamut sammisuunngitsut, naassaanngitsumik anniartitaanissamik eqqarsaat kristumiup ilumoortup isaanit isigalugu naapertuilluanngitsorujussuussaaq. — Matîuse 5:38, 39; Rûmamiut 12:17.

Ajoqersuut qanoq nassuiarneqartoq

Amerlasuulli anniarfimmik ajoqersuut eqqortuunerarniartarpaat. Qanoq ilillutik? Atuakkiortup tuluup Clive S. Lewisip atuakkiamini The Problem of Pain-imi oqaasii inuit amerlasuut isumaqatigaat: „Sapinngitsuuguma ajoqersuut tamanna allanit tamanit annermik kristumiussutsimit peerumassagaluarpara. Ajoqersuulli Allakkanit tapersersorneqarluinnarpoq, ingammik Naalakkatta nammineq oqaasiinit.“ Anniarfimmut isumaqataasut taamaalillutik nassuerutigaat naassaanngitsumik anniarnissamik eqqarsaat amiilaarnartuusoq, tamannali ilutigalugu ajoqersuut ilumoortuunerarpaat, isumaqarlutik Biibilimi saqqummiunneqartoq. Teologi Pinnock ima oqarsimavoq: „Ajoqersuutip nuannerpallaannginneranik nassuerutiginninnermikkut neriupput namminneq Biibilimik upperinnilluinnarnertik uppernarsassallugu, Allakkanilu saqqummiunneqarnera pissutigiinnarlugu sapiiserlutik upperiniarsaralugu. Nipeqalersitsipput Biibilip kukkuneqanngitsuussusia nalorninartoqartoq. Ilumulli taamaappa?“

Immaqa imminut aperaatit Biibilimut upperneq pissutigalugu allatut ajornartumik ajoqersuut tamanna akuerisariaqarlugu. Biibilimili anniarfik qanorpiaq oqaatigineqarpa? (wD 15/4 93)

[Quppernerup ataani ilanngussaq]

[Qupp. 5-mi ungalusaq]

TAKORLUUKKAT ASSIGIIT PINGASUT

Augsburgimi Nassuerut-mi 1530-meersumi, allakkani ilagiit evangelisk-lutherikkut nassuerutaanni pingaarnerpaani, Iluarsaaqqinnermi ilagiit qallunaat aamma nassuerutigiligaanni, Guuti pillugu ima allassimavoq: „Inuit guutiitsut diaavulullu naaffeqanngitsumik anniartillugit pillassavai.“ (Den Augsburgske Bekendelse, immikkoortoq 17.) Katolsk Katekismus-mi manna atuarneqarsinnaavoq: „Pillagaasut anniarfimmiittut Guuti naalannartoq ajunngitsorlu takunngisaannassavaat . . . Aamma anniarfiup inneranit anniartinneqassapput, ilerasunnerminnik suli naalliuuteqarlutik . . . Pillagaanerat kipinngisaannassaaq.“ Ujarlerfissiami The Encyclopedia of Religion-imi allassimavoq ilagiit græsk-ortodoksit „anniarfiup naassaanngitsumik inneruneranik pillagassaasullu pillaatigisiassaannik ajoqersuut“ isumaqatigigaat. — Atuagaq 6, qupperneq 238-39. (wD 15/4 93)