Jehovap savaataanik erlinnartunik qajassuussilluni paarsineq

UTOQQAANERTAT tusarnaaqqissaarput. Efesusimit Miletimut kilometerit 30-t missaat angalasimavaat apustili Paulusimit unnersuunneqarumallutik. Kingullermik ilagissagamikku aliasuutigaat. Taamaattumillu nalunngilaat oqaatsit uku naalannissaat pingaarutilerujussuusoq: ’Immissinnik taava misissoritsi savarpaallu iluunngaasa misissorlugit, taakkununnga anersaap illernartup ivertikkaasi takusaasartooqqullusi, Guutip ilagiissai nammineq [ernermi aavanik, NV] pissarsiai paareqqullugit.’ — apustilit suliait 20:25, 28, 38.

Paulusip savanik paarsisunik assersuusiornera utoqqaanertanut Efesusimeersunut paasissutissiilluarsimassaaq. Savanik paarsisuuneq nalunngilluarpaat, najukkaminni savanik paarsisorpassuaqarmat. Aamattaaq allakkani heriiarisuuni nersutaatinik paarsinernik allaatigisat nalunngilaat. Jehovallu imminut savanik paarsisumut assersuunnera nalunngilaat. — Jesaja 40:10, 11.

Paulusip ’savarpannik takusaasartutut’ ’ilagiinnillu paarsisutut’ taavai. ’Takusaasartutut’, imaluunniit nakkutilliisutut, taaneqarnerata ersersippaa sulerisassanersut, ’paarsisutullu’ taaneqarnerata takutippaa nakkutilliinertik qanoq ingerlatissagaat. Aap, takusaasartut ilagiinni ilaasortaasut tamaasa paarisussavaat soorlu savanik paarsisup savaatini asanittumik paarisarai.

Ullumikkut utoqqaanertat ikittuinnaat savavinnik paarsineq misilissimavaat. Biibilili savanik paarsisuinillu, ingammik assersuutitut atorlugit, eqqartugarpassuaqarmat Paulusip oqaasii atorneqartuarsinnaapput. Ilinniarfigilluarsinnaavavullu itsaq savanik paarsisut Guutimik pilluaqqusaasimasut. Maligassiuilluarsimanerat ullumikkut utoqqaanertat ilinniarfigisinnaavaat Guutip ilagiissaanik paarsinerminni piginnaassutsit suut ineriartortittariaqarnerlugit takusinnaagamikkik.

Savanik paarsisoq qunusuitsoq David

Biibilip nalaani savanik paarsisut eqqarsaatigigaangatsigik, qularnanngitsumik David nukappiaraalluni, savanik paarsisuusimasoq eqqaasarparput. Davidip inuuneranik ilikkaqqaakkatta ilagaat savanik paarsisuuneq atorfiusoq nuimasuunngitsoq. Pruffiitimi Samuelip Isajip ernerisa ilaannik Israelip kunngissaanik tanitsiartorluni tikiummat, David inuusuttoq arajutsineqavikkaluarpoq. Jehovap angajui arfineq-marluk akueriumanngereermagit aatsaat David eqqaaneqarpoq, narsaammi ’savanik paarsisoq’. (1 Samuel 16:10, 11) Taamaakkaluartoq Davidip ukiut savanik paarsissuuffini Israelikkunnut paarsisuunissaminut tamaviaarnartumut piareersaatigai. „[Jehovap] qinerpaa Daavi kiffassamisut, tigullugulu savaatit inaannit . . . paareqqullugit Jaakukkut innuttani,“ Tussiaat 78:70, 71-imi allassimavoq. Tussiaat 23 nuannersoq nalunnginneqarluartorlu tulluartumik allassimavaa, imatut aallartittoq: „[Jehova] paarsisigaara“.

Daviditut kristumiut ilagiivini utoqqaanertat makitajuitsuullutik nuimaniartuunatillu paarsisooqataasutut kiffartortariaqarput. Soorlu Paulus Timoteusimut allattoq paarsisunngorusuttut ’suliaq pingaartoq’ anguniarpaat, atorfik nuimasoq pinnagu. — 1 Timûtiuse 3:1.

Naak Davidip savanik paarsisutut suliaa pingaartuunngikkaluartoq, qunusuitsuunissaq pisariaqarpoq. Assersuutigalugu ataatsimik ataatami savaataasa ilaat liivimit allalu nannumit aallarunneqarmata qunusuilluni aallarussisut ornillugit toquppai. (1 Samuel 17:34-36) Liivit uumasunik imminit annerujussuarnik toqutsisinnaanerat eqqarsaatigalugu tamanna qunusuinnermik nittaaneruvoq angisooq. Syriamiut nanuat allarsuaq Palæstinami uumasimagaluartoq, kilonik 140-nik oqimaassuseqalersinnaavoq, uumasorlu tuttuusatut atsigisoq ataaseerlugu patillugu toqussinnaavaa.

Davidip ataatami savaatai isumagiumallugit qunusuitsuunera kristumiut ilagiivini paarsisunut maligassaalluarpoq. Apustilip Paulusip utoqqaanertat Efesisimeersut ’amaqqut sualuttut savarpannik qajussussisanngitsunit’ mianersoqquvai. (apustilit suliait 20:29) Ullumikkuttaaq kristumiut nakkutilliisuisa Jehovap savaataasa anersaakkut peqqissuunerat illersorniaraangamikku qunusuinnermik takutitsisinnaasarput.

Savaatit qunusuitsumik illersorneqassappata qajassuusseqqissaassapput, savanik paarsisoq asannittoq David ’paarsisorlu ajunngitsoq’, Jesus Kristus, malinniaqqissaarlugit. (Juánase 10:11) Savat Jehovap pigigai nalunnginnamikkik, utoqqaanertat savanik sukannersumik ’naalagaaniartutulluunniit’ pinnatik Guutip savaataanik paarsipput. — 1 Pîtruse 5:2, 3; Matîuse 11:28-30; 20:25-27.

Akisussaasut

Ataataanerpaaq Jakob aamma savanik paarsisuusimavoq ilisimaneqarluartoq. Savat ataasiakkaat tamaasa imminut paaritinneqartut nammineerluni akisussaaffigai. Sakimi, Labanip, nersutaatai ima aalajaatsigisumik paarisimavai ukiullu 20-t kiffartorfigereerlugu Jakob ima oqarsinnaasimavoq: „Savaatitit savaasaatitillu erninerlunngillat, savaatitit angutiviartaat nerisarineq ajorpakka, nersutit kiisortut alittorlugit toqutaat ilinnukaanneq ajorpakka taama pisoqarsimaneranut uppernarsaatissatut, namminerli taarsertarpakka. Ullukkut tillitat piinnarnagit allaat unnuakkut tillitat uannut taarsertittarpatit.“ — 1 Moses 31:38, 39.

Nakkutilliisut kristumiut tarnitta Paarsisaata, Jehova Guutip, savaataanik ’ernermi aavanik pisiaanik’ soqutiginninermik annertunerusumik nittaapput. (apustilit suliait 20:28, NV; 1 Pîtruse 2:25; 5:4) Paulusip hebriiarit kristumiut akisussaaffimmik tamatuminnga eqqaasikkamigit erseqqissarpaa angutit ilagiinni siulersuisut ’tarnivut piggakkaat aperineqarunik akisussaagamik’. — Eprîarit 13:17.

Jakobip oqaluttuarineqarnerani aamma takuneqarsinnaavoq nersutaatinik paarsisuuneq piffissami aalajangersimasuinnarmi suliaanngitsoq. Ulloq unnuarlu suliassaavoq amerlasuutigut imminut pilliutigeriaannaassutsimik piumasaqartoq. Jakobip Laban oqarfigaa: „Ulluutillugu kiassuaq unnuaatillugulu nilleq erloqissutigisarpakka; sinissaaruttarpungalu.“ — 1 Moses 31:40.

Ullumikkuttaaq kristumiut utoqqaanertarpassui asannittut taamaapput, soorlu assersuutip matuma ersersikkaa. Qatanngut angut qaratsamigut kræftimik misissugassamik ilanngarsivigineqareernermi kingorna perululerami napparsimmavimmut immikkut nakkutigineqartariaqartut inaannut unitsinneqarsimavoq. Ilaqutaasa napparsimavimmi ulloq unnuarlu nakkutigisarpaat. Ileqqussatigut nakussatsinneqarneq kaammattorneqarnerlu pisariaqartitaat isumaginiarlugit, utoqqaanertap ataatsip napparsimasoq ilaqutaalu ullut tamaasa pulaarsinnaaniarlugit pilersaarusiarisimasaraluani allanngortissimavai. Napparsimmavimmi passussisarnerit pissutigalugit ulluunerani pulaarnissaa ajornanngittuaannarsimanngilaq. Taamaattumillu unnukkut kingusissukkut aatsaat napparsimmaviliartariaqartarsimavoq. Nuannaarutigaluguli unnukkut pulaartarpoq. „Paasisimavara piffissakkut napparsimmaviup napparsimasullu ajunnginnerutitaatigut, uanga ajunnginnerutitakkuunngitsoq, pulaartariaqarlunga,“ utoqqaanertaq oqarpoq. Qatanngut napparsimmavimmi nuunneqarnissaminut ajunnginnerulermat, ullut tamaasa pulaartarnini kaammattornartut ingerlatiinnarpaa.

Mosesip paarsisutut suut ilinniarai

Biibilip Moses ’nunarsuarmi inunnit tamanit anneruniajuinnerpaatut’ allaatigaa. (4 Moses 12:3) Taamaakkaluartoq allaatigisat takutippaat taamaattuaannarsimanngitsoq. Inuusuttuaraalluni Egyptenimiu Israelikkumiumik naalliutsitsisoq toqussimavaa. (2 Moses 2:11, 12) Taamanikkut anneruniajuippallaarsimagunanngilaq. Taamaakkaluartoq Guutip Moses inuiaqatigiinnut millionilikkuuttaanut inoqajuitsukkut nunamut neriorsuutigisamut ingerlanneranni siulersuisunngortippaa. Soorunami Moses ilinniartitaasariaqarsimavoq.

Naak Moses silamiunit ’Egyptenimiut ilisimatuussutaannik tamanik ajoqersorneqarsimagaluartoq’ Jehovap savaataanik paarsisussatut suli ilinniartinneqartariaqarpoq. (apustilit suliait 7:22) Ilinniartitaaqqinneq sunik ilaqasinnaava? Aap, Guutip Moses ukiut 40-t Midjanimi nikanartutut savanik paarsisuutippaa. Sakimi, Jetrop, savaatai paaritillugit, Mosesip naammagittarneq, anneruniajuinneq, maniguunneq, kamaginninneq, saamaneq imminullu naalakkersinnaaneq ineriartortissimavai. Jehovamillu utaqqineq ilinniarsimavaa. Aap, savavinnik paarsinerup Moses Israelikkunnik paarsisuunissaanut piukkunnartunngortissimavaa. — 2 Moses 2:15-3:1; apustilit suliait 7:29, 30.

Piginnaassutsit taakku utoqqaanertanit ullumikkut Guutip innuttaanik paarsisunit pigineqartariaqannginnerpat? Aap, Paulusip Timoteus eqqaasippaa ’Naalakkamut kiffaq . . . tamanut inussiarnersuussasoq ajoqersuineq sapinngitsuulluni, ilalaarsinnaalluni naalliukkuni; oqaatseriitsullu qanilaarluni ajoqersorniassagai’. — 2 Timûtiuse 2:24, 25.

Ilaannikkut utoqqaanertaq piginnaassutsinik ineriartortitsiniarnermini pakatsisinnaasarpoq. Taamaakkaluartoq nakkaannaassanngilaq. Mosesitulli paarsisuulluartutut piginnaassutsit ineriartortinnerat sivisusinnaavoq. Piffissap ingerlanerani ilungersorneq pilluaqquneqarumaarpoq. — Naleqqiuguk 1 Pîtruse 5:10.

Immaqa utoqqaanertatut allanit atorneqannginneruvutit. Imaassinnaava, Mosesitulli, piginnaassutsit pingaartut Jehovap ilinni ineriartortinniarai? Puigunngisaannaruk Jehovap ’soqutigigaatit’. Aammattaarli eqqaamasariaqarparput ’tamatta immitsinnut nikanartinnermik assuusertariaqartugut, anneruniartut Guutip akerartormagit, nikanartittulli saammaattarlugit’. (1 Pîtruse 5:5-7) Imminut sulissutigiguit ilinniartinneqarnerillu Jehovamit akuerineqartoq akuerigukku, Mosesitulli, taassuminnga atorneqarnerusinnaavutit.

Jehovap savaatai tamarmik erlinnartuupput

Biibilip nalaani paarsisut tatiginartut asannittullu savat tamaasa immikkut akisussaaffigaat. Anersaakkullu paarsisut aamma taamaattariaqarput. Paulusip oqaasiisigut tamanna nalunaappoq: ’Savarpaallu iluunngaasa . . . paarisigik’. (apustilit suliait 20:28) ’Savarpannut’ kikkut ilaappat?

Jesus assersuusiorpoq hundredenik savaatilimmik sava ataaseq tammarmat savarpannut utertinniarlugu ingerlaannaq ujarlilersumik. (Matîuse 18:12-14; Lúkarse 15:3-7) Nakkutilliisut ilagiit ilaasortai tamaasa assingusumik pisariaqarpaat. Imaanngilaq oqaluussisarunnaarsimasut kristumiulluunniit ataatsimiinnerinut ilaasarunnaarsimasut savarpannut ilaajunnaarsimasut. ’Savarpannut’ suli ilaasortaapput taakkununngalu utoqqaanertat Jehovamut ’akisussaapput’.

Utoqqaanertat ataatsimiititaat isumaaluttorujussuanngorsimapput ilagiinnut ilaasortaasimasunik unittoortoqarsimammat. Taakku immikkut allattorneqarput, pulaarneqarnissaallu Jehovallu savaataanut uternissaannut ikiornissaat ilungersuutigineqalerluni. Utoqqaanertaat taakku Guutimut qujamasoqaat, ukiut pingaajussaata affaata ingerlanerani, 30-t sinnerlugit Jehovamut kiffartortunngoqqinnissaannut ikiorsinnaagamikkik. Ikiugaat ataaseq ukiut 17-it unittooqqasimagaluarpoq!

Nakkutilliisut akisussaaffiat allivoq ’Guutip ernermi aavanik savat pissarsiarimmagit’. (apustilit suliait 20:28, NV) Savat erlinnartut annerusumik akilerneqarsinnaanngillat. Savatullu ittut nassaariniarnerini ikiornerinilu piffissaq ilungersornerlu atorneqarsimasut eqqarsaatigikkit! Assingusumik ilungersortoqartariaqanngila Guutip savaataanut ilaaginnartinniarlugit? Ilumut, ilagiinni savat tamarmik erlinnartuupput.

Naak savarpannut ilaasortaasoq sualuttumik ajortuliorsimagaluarpat, utoqqaanertat akisussaaffiat allanngunngilaq. Paarsisutut isumakuluutigiuarpaat ajornanngippallu qajassuussisumik saamasumillu ajortuliorsimasoq annaanniarlugu ilungersuutigisarpaat. (Galâsiamiut 6:1, 2) Ajoraluartumik ilagiinni ilaasortaasut ilaasa sualuttumik ajortuliorsimanertik peqqissimissutigineq ajorpaat. Paarsisut asannittut Biibili naapertorlugu akisussaaffeqarput savarpaat sinneri ajortumik sunniisinnaanermut illersussallugit. — 1 Korintumiut 5:3-7, 11-13.

Taamaakkaluartoq Jehova Guuti savanut tammarsimasunut naakkinnissusermik annerpaamik takutitsisimavoq. Paarsiserput naakkinnittoq oqarsimavoq: „Savat tammartut ujassavakka siammartullu katersorlugit, ikiligaasut mattuserlugit, sanngiitsut nakussatsillugit.“ (Hesekiel 34:15, 16; Jeremia 31:10) Maligassaq annerpaaq malillugu ullumikkut anersaakkut paarsisut ilaajunnaarsimasut asannittumik pulaarsimavaat. Savat tammarsimasut naakkinnittuliorfiniarlugit ilungersuutaat kinguneqarluarsimavoq. Qatanngut utersimasoq oqarsimavoq: „Utoqqaanertat pulaarsimanerat kaammattuutaalluarsimavoq pisariaqartitara.“

Qularnanngitsumik Paulusip utoqqaanertanut Efesusimeersut Miletimi oqaasii imaqartupilussuupput — taakkununnga ullumikkullu nakkutilliisunut. Savanik paarsisunik uparuussinera eqqaasitsissutaavoq nakkutilliisut kusanartunik piginnaassuseqarnissaannik — maniguunneq tatitussuserlu, soorlu paarsisoq kunngi David taamaassimasoq; akisussaassutsimik misigineq sernissuisumillu isumassuineq Jakobip ullukkut unnuakkullu kiffartornermigut ersisitai, kiisalu Mosesip ajoqersuunneqarnissamut naammagittarluni piumassuseqassusia tamatumunnga assersuutissaalluarput. Aap, ilagiit utoqqaanertaasa ’Guutip ilagiissai nammineq ernermi aavanik pissarsiai’ qajassuussisumik paarinissaannut piginnaasutsit pisariaqartut ineriartortinnissaanut assersuutit Biibilimeersut iluaqutigissavaat. (wD 15/7 93)