Sooq kukkuneq nassuerutigisariaqarpa?

SAKKUTOOQARNIKKUT oqaluttuarisaanermi akiuunnerit nalinginnaanngitsut ilagaat. Sakkutuullammassuit 400-t ajuallatsitaanermik akiniussiniartut aallartitanit sakkulisanngitsunit uniinnartinneqarput. Arnap sapiitsup ataasiinnaap ilungersortumik qinnutai tusareerlugit sakkutuut naalagaanerata saassussinissaraluaq taamaatitiinnarpaa.

Sakkutuut naalagaanerat tassaavoq David, kingorna Israelimi kunngiulersoq. Guutimit iluarisaanissani kissaatigigamiuk arnap Abigajilip oqaasii tusarnaarpai. Pissuserissumik paasitimmani uiminut, Nabalimut, akiniaaneq aammik kuisinikkut pillagassaalernerminik kinguneqassasoq, David nillerpoq: „Qujanarsili [Jehova] Israelikkut Guutiat, ullumi uannukartikkamisit. Qujanarlu silatusaallaqqissuugavit; illimmi qujanarsigit ullumi aammik kuisinissaraluara imminullu akiniunnissaralua pinngitsoortikkakkit.“ David qujamasoqaaq kukkuluttorujussuarnissaraluani Guutip Abigajil atorlugu pinngitsoortimmagu. — 1 Samuel 25:9-35.

Tussiaasiamini David aperaaq: „Kialli piaarinani kukkunini malugisarnerpai?“ (Tussiaat 19:13) Taamatuttaaq uagut kukkunivut uparuarneqanngippata sianiginngitsoorsinnaasarpavut. Kingunipilutsitsigaangattalu allatut ajornartumik paasilertarparput kukkusimalluta, sianiilliorsimalluta imaluunniit asanninngitsuliorsimalluta.

Isumatsassutissaanngilaq

Tamavitta kukkusaratta kukkunitta isumatsassutiginissaannut pissutissaqanngilagut. Naalagaaffimmit aallartitaq John Phelps ima oqarsimavoq: „Inuk kukkuneq ajortoq tassaagajuppoq inuk suneq ajortoq.“ Ajoqersugarlu kristumiu Jakob ima oqarsimavoq: ’Tamatta qassiinik naakkiuttarpugut.’ (Jâko 3:2) Meeraaraq pisunnialerlaaq naakkiutinngivilluni pisuttalersinnaava? Naamik, meeqqammi orlunini ilinniutigisarpai napasinnaalernissanilu tikillugu misiliiuartarluni.

Uagullu inuunitsinni ’napalluarsinnaalerumagutta’ uagut nammineq kukkussutivut allallu kukkussutaat ilinniarfigisariaqarpavut. Uagut atukkatsinnut assingusunik atugallit misilittagarpassui Biibilimi oqaluttuarineqarmata kukkussutaasa assingisa ingalassimaniarnissaannut iluaqutigisinnaavarput. Kukkussutigisimasaat qanoq ililluta ilinniarfigisinnaagatsigik?

Maniguunneq pingaaruteqaqaaq

Ilikkagassat ilaat tassa kukkuluttortut tamakkernagit Guutip avoqqaarimmagit, kukkunerminnilli aaqqiiniarnissaminnut periarfissaqaraluarlutik aaqqiinianngitsut kisiisa avoqqaarimmagit. Israelip kunngiata Saulip Amalekikkunnik suujunnaarsitsinissaq pillugu Jehovap peqqussutai unioqqutissimavai. Pruffiitimit Samuelimit attaveqarfigineqarami pissutsit ilungersornassusiat suusupaginiarsareqqaaraluariarlugu allanik pisuutitsiniarsarilerpoq. Angutitami takkuanni kanngutsisitaannginnissani eqqunngitsup aaqqinnissaaninngarnit pingaartinneruaa. Taamaattumik Jehovap kunngitut tunuartippaa. — 1 Samuel 15:20-23, 30.

Saulilli kingoraartaa, David, annertuumik kukkuluttoraluarluni isumakkeerfigineqarpoq unnersuunneqarnini perorsaartissinneqarninilu maniguulluni akuerigamigit. Davidip maniguussutsiminit killinneqarluni Abigajilip oqaasii maleruarpai. Angutitami sorsunnissamut piareeqqasut saavanni nassuerutigaa tuaviupiluttumik aalajangiisimagaluarluni. Inuunini tamaat Davidip maniguussuseq taama ittoq iluaqutigalugu isumakkeerfigineqarnissani ujartortarpaa kukkuninilu iluarsiniartarlugit.

Aamma Jehovap kiffaasa maniguunneq taama ittoq isumaatsumik oqartoornermik naqqiinissamut killinneqaatigisarpaat. Sanhedrinimi killisiuinermi palasiuneq peqqusisimavoq Paulus qarnatigut isanneqassasoq. Apustili akisimavoq: ’Guutip isakkumaarpaatit, qarmaq marrartigaq uumaa.’ (apustilit suliait 23:3) Immaqa isigiarsunnini pissutigalugu kina oqaluunnerlugu takkorliorsimavaa, taamaattumik eqqaaniittut oqarput: ’Guutip palasiunertaa oqarniarpiuk?’ Paulusip kukkunini erniinnaq nassuerutigaa oqarluni: ’Qatanngutikka, palasiunerusoq nalugaluarpara; allassimavormi: „Innuttavit siulersortaat oqaaserluffigissanngilat.“’ (apustilit suliait 23:4, 5; 2 Moses 22:28) Aap, Paulusip kukkunini maniguulluni nassuerutigaa.

Kukkunitik nassuerutigisimavaat

Eqqarsariaatsiminnik kukkusumik allannguisimasut aamma Biibilimi eqqartorneqarput. Tussiaasiortoq Asaf assersuutigisinnaavarput. Inuit ajortut inuulluataarpasigigamigit ima oqarsimavoq: „Uummatiga minguitsuutinniarsimavara asuliinnaasumik.“ Jehovalli illuaneereerluni pallorfiginninnerullu minguitsup iluaqutissartai eqqarsaatigeqqissaareerlugit Asaf silattuaqivoq, kukkuninilu nassuerutigalugit, soorlu Tussiaat 73-imi atuarneqarsinnaasoq.

Aamma Jonasip eqqarsariaatsini kukkusoq isumaatsuliussutigisimavaa. Ninevemi oqaluussereerluni imminut pinngitsuutinnissani illoqarfiup inuisa illersorneqarnissaannit pingaartinneruaa. Ninevemiut peqqissiminerat pissutigalugu Jehovap pillanngimmagit Jonas naammagittaalliorpoq, Guuutimilli naveerneqarluni. Jonasip paasivaa isummani kukkusuusoq, atuakkamimi Biibilimiittumi taassuma aqqanik taaguutilimmi kukkuneri unneqqarissumik oqaluttuarineqarput. — Jona 3:10–4:11.

Angut Jobimik atilik kukkusumik isumaqarsimagaluarpoq Jehova Guuti, Sataniunngitsoq, naalliunnerminut pisuusoq, uppernarsarniarsimagaluarpaalu naapertuilluanngitsumik naalliutsitaalluni. Apeqqut annerpaaq nalusimavaa: Guutip kiffai misilinneqarnerminni aalajaattuaannassappat? (Job 1:9-12) Elihumit Jehovamillu ikiorneqarluni kukkunini paasileramiuk ima nassuerpoq: „Uanga oqaluuserisimavakka paasinngisakka, . . . Taamaattumik oqaaserisimaraluakka tamaasa utertippakka peqqissimineralu takutillugu issumi arsanilu issiallunga.“ — Job 42:3, 6.

Kukkunivut nassuerutigisarutsigik Guutimut pitsaasumik attaveqaannarsinnaassaagut. Soorlu siuliani assersuutitigut ersertoq kukkunivut nassuerutigisarutsigik kukkusumillu eqqarsariaaseq, oqaatsit isumaatsut sianiitsulialluunniit iluarsiniarlugit sapinngisatsinnik iliuuseqartarutta Guutip kukkunitsinnut eqqartuussassaatinnavianngilaatigut. Tamanna pillugu ilisimanninnerput qanoq ililluta atorsinnaavarput?

Kukkunivut qanoq iluarsiniarsinnaagivut

Maniguulluni kukkunermik nassuerutiginninneq iliuuseqarfiginninnerlu ilaqutariit ataqatigiinnerannik nukittuunngortitsisarpoq. Assersuutigalugu angajoqqaat qasoqqariaramik paamisoriaramilluunniit meeqqatik sukannerpallaamik perorsaatissittoorsinnaavaat. Kukkuneq tamanna iluarsinngippassuk ajortumik kinguneqarsinnaavoq. Tamanna pillugu apustili Paulus ima allassimavoq: ’Ilissilu angajoqqaat, qitornasi narrutsatseqinasigit, paariniarsigilli perorsarlugit inertertarlugillu Jehovamit.’ — Evfisumiut 6:4.

Angut inuusuttoq kristumiu Paulimik atilik eqqaamasalikkersaarpoq: „Ataata qisuariapiloorsimasutut misigigaangami tamatigut utoqqatsertarpoq. Taassumunnga ataqqinninnissannut tamanna iluaqutaavoq.“ Pissutsini aalajangersimasuni utoqqatsissanerluni utoqqatsissannginnerluniluunniit inuup nammineq aalajangigassaraa. Utoqqatsernerli kukkussutip assinganik siunissami kukkunaveersaarnermik malitseqartariaqarpoq.

Uiusormi nuliaasorluunniit aapparminut aliasuutaasumik kukkusimappat? Ammasumik nassuerneq qamanngalu pisumik utoqqatserneq, aappaasullu isumakkeerfiginnikkumassusia, asannittumik attaveqatigiinnerannik ataavartitsissapput. (Evfisumiut 5:33; Kulorsamiut 3:13) Angut puffajasoq Spaniamiu, Jesúsimik atilik, nuliaminut Albinamut utoqqatsernissaminut pingaarniarpallaartuunngilaq. „Immitsinnut ajuallatsittooraangatta utoqqatserfigiuaannarpugut,“ nulia oqarpoq. „Tamanna kamagittarfigeqatigiinnissatsinnut iluaqutigaarput.“

Utoqqaanertaq kukkugaangat

Aamma utoqqaanertat kristumiut kukkunerminnik nassuerutiginnittarunik ilumoortumillu utoqqatsertarunik suleqatigiilluarsinnaanerussapput ’ataqqeqatigiillutillu’. (Rûmamiut 12:10) Immaqa utoqqaanertap kukkunini nassuerutigerusunngissinnaavaa ilagiinni oqartussaassutsini annikilleqinammat. Kukkunermilli suunngitsuutitsiniarneq suusupaginninnerlu allanit ataqqineqarunnaassutaasinnaavoq. Qatanngut inersimalluartoq maniguulluni utoqqatsertoq, immaqa oqaatsit isumaatsut pillugit, allanit ataqqineqartarpoq.

Fernandop, utoqqaanertap Spaniamiup, eqqaamavaa nakkutilliisoq angalasartoq ilaanni utoqqaanertat ataatsimiinneranni ataatsimiinnermik qanoq aqutsisariaqarneq pillugu eqqoqqissaanngitsumik paasissutissiisoq. Qatanngutit utoqqaanertaasut ataqqinnillutik naqqimmanni nakkutilliisup angalasartup erniinnaq nassuerutigaa kukkulluni. Fernando oqaluttuarpoq: „Utoqqaanertat tamarmik takkuanni kukkunerminik nassuerutiginninnera maluginiartorujussuuara. Tamatuma kingorna taassumunnga ataqqinninnera annertuseqaaq. Taassuma maligassiaatigut ilikkarpara kukkuluttornerup nassuerutiginissaa qanoq pingaartigisoq.“

Kukkunerit nassuerutiginasuartaruk

Utoqqatserfigineqarneq, ingammik erniinnaq utoqqatserfigineqarneq, iluarineqarajuttarpoq. Kukkuneq nassuerutigiaarlugu pitsaanerusarpoq. Assersuut: Oktoberip 31-ani 1992-imi paavi Johannes Paul II nassuersimavoq upperisamit nalinginnaasumit allaanerusumik ajoqersuuteqartunik killisiuisarsimaneq „kukkusimasoq“ ukiut 360-it matuma siorna Galilei nunarsuatsinnik silaannarsuarmi qitiunnginneraanera pillugu pillarneqarmat. Utoqqatsernerli taama sivisutigisumik utaqqisikkaanni nalinga millisarpoq.

Inuttut pissutsit eqqarsaatigalugit aamma taamaappoq. Oqaatsinit asannippalunngitsunit imaluunniit iliuutsimit asannippalunngitsumit ikilersinneq erniinnaq utoqqatserfigineqarnerup mamitissinnaavaa. Jesusip kajumissaarsimavaatigut erniinnaq eqqisseqatigiinniartaqqulluta: ’Taamaattumik tunissutissat tunisivimmi pilliutigiartorukku, tassanilu eqqaaleruit qatannguppit sumik patsiseqarfigigaatit, taava tunissutissat tunisiviup saanut qimallugu qatanngutit saammarsariartoqqaarallaak, kingornalu tunissutissat pilliutigiartoruk.’ (Matîuse 5:23, 24) Eqqunngitsumik iliorsimanermik nassuerutiginniinnarneq isumakkeerfigeqqunerlu amerlanertigut naammattarput. Taamaaliornissaq kinguarsaraanni ajornarneruleriartortarpoq.

Kukkunermik nassuerutiginninneq pillualersitsisarpoq

Soorlu Saulimik Davidimillu pisimasukkut ersertoq kukkuluttornernik qanoq isiginninneq inuunermik attuisarpoq. Saulip malartitassaanani unnersuunneqarnini ilassiumasimanngilaa, ajortuliaalu sualutsikkiartuinnarsimapput. Naggataatigut toquvoq Guutimit iluarisaanani. Davip kukkusaqattaarsimagaluarluni ajortulioqattaarsimagaluarlunilu naveerneqarnini peqqissimilluni ilassisimavai Jehovamullu aalajaattuarluni. (Naleqqiuguk Tussiaat 32:3-5.) Aamma uagut taamaaliorusunnginnerpugut?

Kukkunernik nassuerutiginnillunilu iluarsiinikkut, imaluunniit ajortuliap peqqissimissutigineratigut, akissarsiaq annerpaaq tassa Guutimit isumakkeerfigineqarsimanermik ilisimanninneq. „Pilluarpoq ajortuliaminik isumakkeerfigineqartoq,“ David oqarsimavoq. „Pilluarpoq inuk [Jehovap] pisuussuteqartutut oqaatiginngisaa.“ (Tussiaat 32:1, 2) Taamaattumik kukkunernik nassuerutiginninneq silatusaarneruvoq! (wD 15/11 93)

[Qupp. 30-mi assiliartaq]

Meeraaraq pisunnialerlaaq orlunngivittarnerpa?