Guutimik mianerinninneq ineriartortiguk
„[Jehova] mianeruuk ajortorlu nigorsimallugu.” — USSATIT 3:7.
1. Ussatit kikkunnut allataappat?
BIIBILIP atuagartaasa ilaat Ussatit anersaakkut unnersuussutinik ulikkaarpoq. Atuagaq ilitsersuut tamanna Jehovap siullermik inuiannut pigisaminut Israelikkunnut najoqqutassatut pilersissimavaa. Ullumikkut inuiannut illernartunut pigisaanut kristumiuusunut, ’ullunik kingullernik angumerinnittunut’, silatuumik oqaassisuuvoq.” — 1 Korintumiut 10:11; Ussatit 1:1-5; 1 Pîtruse 2:9.
2. Sooq Ussatit 3:7-imi mianersuqqussut ullumikkumut naleqquppa?
2 Ussatit 3:7-imi ima allassimavoq: „Silatuutut imminut isigeqinak, [Jehova] mianeruuk ajortorlu nigorsimallugu.“ Siuaasatta siulliit nalaanniilli, pulateriaarsuup Eva ’ajunngitsumik ajortumillu nalujunnaarnissaanik’ neriorsorlugu ussermaguli, inuit ilisimassusiata imaqanngitsup inuiaat pisariaqartitaat matussutississinnaasimanngilai. (1 Moses 3:4, 5; 1 Korintumiut 3:19, 20) Tamanna ukiuni 1900-kkunni makkunani aatsaat taama malunnartigilersimavoq — ukiut tamakku tassaapput ’ullut kingulliit’ inuiaat guuteqannginneraassutsip pinngoriartorsimaneraanermillu ajoqersuutip kingunerisaanik assigiinngisitsinermik, nakuusernermik kanngunartulianillu tamanik naalliuuteqarfigisaat. (2 Timûtiuse 3:1-5, 13; 2 Pîtruse 3:3, 4) Tamanna tassaavoq ’silarsuaq nutaaq aaqqissuussaanngiffiusoq’ FN-ip upperisarsioqatigiilluunniit avissaartuussimasut aaqqiissutississinnaanngisaat.
3. Ullumikkumut suut siulittuutigineqarsimappat?
3 Guutip oqaasiisa siulittuutaasut paasitippaatigut anersaapiluit ’inuit najugaata tamarmi kunngiinut aallarsimasut sorsunnissamut Guutip ajugaqanngitsup ullussarsuani piumaartumut katersorumallugit . . . najukkamut hebriiarit oqaasiinik Harmagedonimik taaguuteqartumut’. (sarĸúmersitat 16:14, 16) Jehovap sorsunnissaata tamatuma kunngit, imaluunniit naalakkersuisut, taakku qanittukkut eqqussavai. Kana’animiut imminnut eqqartuussut Josuap Israelikkullu naammassimmassuk ersiornerattut ersiussapput. (Josua 2:9-11) Ullumikkulli Josuamut assersuutaasup Jesus Kristusip — ’kunngit kunngiata naalakkallu naalagaata’ — ’inuiaqatigiit panassavai’ Guutip ajugaqanngitsup kamanneranut ersiutaasumik. — sarĸúmersitat 19:15, 16.
4, 5. Kikkut annaanneqassappat, sooq?
4 Taamanikkussamut kikkut annassappat? Aniguisinneqartussat tassaassanngillat ersinermit naalliuuteqartut, tassaassappulli Jehovamut mianerinninnermik ataqqinnittumik ineriartortitsisimasut. Taakku namminneq isiminnit sianisuujunissaminnut taarsiullugu ’ajortoq nigorpaat’. Maniguullutik ajortut pinnagit ajunngitsut eqqarsaatiginiartarpaat. Naalakkamut kisimi oqartussaasumut Jehovamut, Sodomamiunik ajortunngorluinnarsimasunik suujunnaarsitsisimanermisut ullumikkut ajortumut nipunngajuartunik qanittukkut eqqartuussisussamut, ataqqinninnermik peqqinnartumik ineriartortitsisimapput. (1 Moses 18:25) Tassami Guutip nammineq innuttaanut ’Jehovamik mianerinninneq puilasuuvoq inuunartoq, tamatumuuna toqup napiaaniutai ingalassimasarpaat’. — Ussatit 14:27.
5 Ullormi Guutip eqqartuussiffissaani tamatumani Jehovap iluarinngisaanik iliornaveersaarlutik mianerinnillutik taassumunnga tunniulluinnarsimasut tamarmik Ussatit 3:8-p ilumuussusia paasilissavaat: „[Jehovamik mianerinninneq] timinnut peqqissaatigissavat nukittorsaatigalugulu qasugaangavit.“
Jehova ataqqinartiguk
6. Ussatit 3:9-p maleruarnissaanut suup kajumissisittariaqarpaatigut?
6 Qujamasulluta Jehovamik mianerinninnitta, taassuminnga tamakkiisumik asanninnermik ilallip, oqaatsinut Ussatit 3:9-miittunut qisuariarnissatsinnut kajumissisissavaatigut: „[Jehova] ataqqinaaseruk pigisannik, naatitavit tamarmik inereqqaataannik.“ Tunissuteqarnikkut Jehovamik ataqqinninnissatsinnut pinngitsaalineqanngilagut. Taamaaliornissaq nammineq kajumissutsimit pisussaavoq, soorlu 2 Moses 35:29-miit 5 Moses 23:23-mut itsaq Israelikkunni pilliuteqartarnermut atatillugu aqqaneq-marloriarluni ersersinneqartoq. Naatitatta tamarmik inereqqaataat tamakku tassaasariaqarput pilliutigisinnaasatta pitsaanerpaartaat, taassuma uagutsinnut ajunngitsuliai asannittumillu tunniusimanera nuannaarutigisimasavut qujamasuutigalugit. (Tussiaat 23:6) Pilliutivut ’Guutip naalagaaffianik iluarnermillu taassuma pianik’ salliutitsinitsinnut ersiutaasariaqarput. (Matîuse 6:33) Pigissaarutitsinnik Jehovamik ataqqinninnerput qanoq kinguneqassava? „Taava quitit imaqalerumaarput naammattorsuarnik, tunguiaaffitillu utsersorumaarput paarnat isserannik.“ — Ussatit 3:10.
7. „Naatitatta inereqqaataat“ suut Jehovamut tunissutigisussaavavut, qanorlu kinguneqassava?
7 Jehovap pilluaqqussutai pingaarnerpaamik anersaakkut ittuusarput. (Malaki 3:10) Taamaattumik naatitatta tamarmik inereqqaataat taassumunnga tunniussavut pingaarnerpaamik anersaakkut ittuusariaqarput. Piffissarput, nukivut iluunngarluta taassuma piumasaanik iliornermut atortariaqarpavut. Soorlu suliat taama ittut Jesusimut ’neqissaasimasut’ nakussatsinnartut, taamatuttaaq uagutsinnut inuussutaassapput. (Juánase 4:34) Anersaakkut ’quivut’ ulikkaassapput, nuannaarnerpullu, paarnat isserannut assersuunneqartoq, utsersorumaarpoq. Nunarsuarlu tamakkerlugu oqaluussinermut tunisiumatulluta tapersersuisinnaavugut, ullormut inuussutissanik isumassorneqarnissarput tatiginnilluta qinnutigisaatigalugu. (Matîuse 6:11) Pigisavut tamarmik, aamma atortutigut pigissaarutivut, Ataatatsinnit asannittumit qilammiusumit pipput. Ataqqinaatissaminut pigissaarutitsinnik tamakkuninnga atuinerput naapertorlugu pilluaqqussutinik kueraaffigissavaatigut. — Ussatit 11:4; 1 Korintumiut 4:7.
Asannittumik perorsaatissinneqarneq
8, 9. Naveerneqarneq perorsaatissinneqarnerlu qanoq isigisariaqarpavut?
8 Ussatit kapitali 3, versini 11-mi 12-imilu, eqqartorneqarpoq ilaqutariinni Guutimik mianerinnittuni ataatap ernerullu nuannersumik attaveqatigiinnerat, kiisalu Jehovap nunarsuarmilu anersaakkut qitornaasa akornanni attaveqarneq. Allassimavoq: „Ernera, [Jehovap perorsaatissiinera, NV] asiginnaqinagu, avoqqaarinninneri nikalluutiginiaqinagit. [Jehovammi] asasani [perorsaatissittarpaa] soorlu ataatap ernini asasani taama iliorfigisaraa.“ Inuit silamiut perorsaatissinneqassallutik uumigisaqaat. Jehovap innuttaasa perorsaatissinneqarnissartik tikilluaqqusariaqarpaat. Apustili Paulusip oqaatsit Ussatit-niittut uku issuarsimavai: ’Erninnguara, Jehovap perorsaanera asiginnarnaveeriuk, nikallornallu pillaraangatit, asasani Jehovap perorsartarmagit . . . Perorsaammilli pineqarneq atortillugu nuannertarinngilaq, qiimanaatsuullunili; kingornali eqqissinartumik iluarnissamik tassuuna sungiusagaasut pissaannik kingunissaqararaaq.“ — Eprîarit 12:5, 6, 11.
9 Aap, perorsaatissinneqarneq naveerneqarnerlu ineriartornitsinni tamavitta pisariaqartippavut, angajoqqaatsinneersuugaluarpata, ilagiinnit kristumiuneersuugaluarpata imaluunniit nammineq Biibilimik atuaqqissaarnitsinneersuugaluarpata. Naveerneqarnermik imaluunniit oqaaqqissaarneqarnermik akuerinninneq inuuinnarnissamut aalajangiisuuvoq, soorlu Ussatit 4:1, 13-imilu takutinneqartoq: „Qitornakka! Ataatassi oqaaqqissaarutai tusaaniarsigit, tusarnaarniaritsi paasisaqalersinnaaqqullusi. Ilinniakkatit tamatigut aalajangiusimaniakkit, annaanaveersaarniakkit ilinnut inuussutaammata.“
Pilluarneq annerpaaq
10, 11. Ussatit 3:13-18-imi oqaatsit kusanartut kusanartortarsiukkit.
10 Tulliuttut oqaatsinik tusarnersunik allataapput, aap, ’oqaatsinik kusanartunik, oqaatsinik eqqortunik sallusuitsunillu’. (Nalunaajaasup oqaasii 12:10) Oqaatsit isumassarsiaritaasut taakku pilluarnermik piviusumik ersersitsipput. Tassaapput oqaatsit uummatitsigut aalajangiuttariaqakkavut. Allassimavoq:
11 „Pilluarpoq ilisimassummik nassaartoq, inuk siuneqarluarnermik pissarsiaqartoq. Ilisimassutsip pissarsiarinissaa sølvip pissarsiarinissaanit pingaarneruvoq, iluarnaarutissartaalu kuultimit anneruvoq. Ilisimassut sapanngarissunit erlinnarneruvoq, pilerinartitavillu suugaluartulluunnit allat nallersinnaanngilaat. Tigumiarai talerpimmini inuunertussuseq, saamimminilu pisuussutit ataqqinaallu. Ilisimassutsip aqqutai aqqutaapput alianaatsut, ingerlavii tamarmik eqqissinermut sammipput. Aalajangiussisiminut tamanut orpiuvoq inuunartoq, pilluarput taassuminnga iperaanaveersaartut. — Ussatit 3:13-18.
12. Ilisimassuseq siuneqassuserlu qanoq iluaqutigisariaqarpavut?
12 Ilisimassut — qasseriarlunimitaava Ussatit-ni taaneqarpa — ataatsimut 46-riarluni! „[Jehovamik] mianerinninneq ilisimassusermut aallarniutaavoq.“ Tassaavoq Guutimik mianerinnilluni iliuutsikkullu ilisimassuseq Guutip oqaasianik ilisimasaqarnermik tunngaveqartoq, Satanip silarsuaani anorersuarmi pitoraattumi ingerlavikkut eqqortukkut Guutip innuttaanik ingerlatitsisoq. (Ussatit 9:10) Siuneqassuseq, Ussatit-ni 19-eriarluni eqqaaneqartoq, ilisimassutsip kiffaraa, Satanip peqqusersusaarutaanut akiuunniarnitsinni ikiuisartoq. ’Mikinngitsunik killinnartuliornermini’ Diaavulu tuusintilippassuarnik misilittagaqarpoq. Misilittagaqarnerli immini naammanngilaq. Pingaarnerungaartoq tassa siuneqarsuseqarnissaq, tassa eqqortumik eqqunngitsumillu immikkortitsisinnaassuseqarnissaq — eqqortorlu qinerlugu. Jehovap oqaatsini aqqutigalugit tamatuminnga ilinniartippaatigut. — Ussatit 2:10-13; Evfisumiut 6:11.
13. Aningaasatigut ajornartorsiorfimmi suut illersorsinnaavaatigut, qanoq ililluni?
13 Ullumikkut silarsuarmi aningaasatigut uiverneq Hesekiel 7:19-imiittup eqquunneranik malitseqassaaq: „Sølviutitik aqqusinermut eqqassavaat kuultiutitillu mingunnartutut isigissallugit. Sølviutitik kuultiutitillu annassutigissanngilaat ullormi [Jehovap] kamaffissaani.“ Nunarsuarmi timikkut pigissaarutit tamarmik ilisimassutip siuneqassutsillu annassutaasinnaanerannut taartaasinnaanngillat. Kunngi Salomon ilisimasoq ilaanni ima oqarsimavoq: „Ilisimassusermik sernissorteqarneq pisuussutinillu sernissorteqarneq assigiiginnarput, ilisimassutsip pitsaaqutigiinnarpaa ilisimassuseqartoq inuutittaramiuk.“ (Nalunaajaasup oqaasii 7:12) Pilluarput ullumikkut Jehovap aqqutigeqqusaani alianaatsuni ingerlasut ilisimassuseqarlutillu ’inuunertussutsimik’, Jesusip utertitsissutitut pilliutaanut uppernermik ersersitsisunut tamanut Guutip tunniussaanik inuunermik naassaanngitsumik, qinersisut tamarmik! — Ussatit 3:16; Juánase 3:16; 17:3.
Ilisimassuseq piviusoq ineriartortiguk
14. Jehova ilisimassusermik maligassaasumik qanoq ililluni ersersitsisarsimava?
14 Uagut inuit, Guuti assilillugu pinngortitaasugut, ilisimassusermik siuneqassusermillu, Jehovap nammineq tupinnartunik pinngortitsinermini ersersissimasaasa assinginik, immitsinni ineriartortitsinissarput naleqquttuuvoq. „[Jehovap] nunarsuaq tunngavilerpaa ilisimassutsimigut, qilak siaarpaa siuneqassutsimigut.“ (Ussatit 3:19, 20) Uumassusilinnik pinngortitaliulersimavoq, pinngoriartuaartitsineq eqqumiitsoq nassuiarneqarsinnaanngitsorlu atornagu, toqqaannartumilli uumassuseqartut „assigiinngitsukkuutaarlugit“ ilisimassuseqarluartumillu siunertalimmik pinngortissimavai. (1 Moses 1:25) Naggataatigut inuk sianissusilerlugu uumasunillu anneroqisumik silassorissusilerlugu pinngortinneqarmat Guutip ernerisa qilmmiusut qiimmattarlutik nillianerat qilammi akisuaqattaarsimassaaq. (Naleqqiuguk Job 38:1, 4, 7.) Jehovap siumut isigisinnaassusia, ilisimassusia asanninneralu nunami pinngortitaani tamani takuneqarsinnaavoq. — Tussiaat 104:24.
15. (a) Sooq ilisimassusiinnaq ineriartortissallugu naammanngila? (b) Ussatit 3:25, 26-miittut qanoq ittumik tatiginnilersittariaqarpaatigut?
15 Jehovap pissusiisa assinginik ilisimassusermik siuneqassusermillu ineriartortitsinissaannarput naammanngilaq, aammali aalajangiulluinnartariaqarpavut, taassuma oqaasiinik atuaqqissaartarnerput suusupagilernaveersaarlugu. Taassuma ima oqaaqqissaarpaatigut: „Silatussuseq isumatussuserlu annaanaveersaarniakkit alartaaserlugillu. Taakku ilinnut inuussutaassapput qungatsinnilu ujamiullutik kusanangaartut.“ (Ussatit 3:21, 22) Taamaaliorutta toqqissimalluta eqqissisimallutalu ingerlasinnaassaagut, aamma allaat taamaassinnaassaagut Satanip silarsuaanut ’perlussaq tassanngaannaq’ tillinniatut tikiuppat. (1 Tásalûníkamiut 5:2, 3) Aamma annikilliornartussarsuarmi „siooragissanngilatit tassanngaannaq annilaartitaanissat anorersuarlu inunnut ajortunut nalliuttussaq, tunaarisassat tassaammat [Jehova]. Taassuma isikkatit paarissavai napititaaqqunak“. — Ussatit 3:23-26.
Ajunngitsuliorumatuneq
16. Oqaluussinermi ilungersuussinerup saniatigut kristumiut qanoq iliuuseqartariaqarpat?
16 Ulluvut makku Naalagaaffik pillugu nutaarsiassamik nuannersumik inuiannut tamanut oqaluussinissamut ilungersorfissaapput. Nalunaajaanerli tamanna kristumiutut iliuutsinik allanik ilaqartariaqarpoq, soorlu Ussatit 3:27, 28-imi allassimasoq: „Ajorsartut ajunngitsuliorfigikkit, sapinngikkuit ikiuiumanngitsooqinak! Ikiuutissannik piareersimasaqaruit inoqatinnut ima oqassanngilatit: ’Angerlaannarallaat, aqagu aggeqqinniarna, taava tuniumaarpakkit.’“ (Naleqqiuguk Jâko 2:14-17.) Silarsuarmi piitsoqarfiullunilu kaannersuaqarfiusumi maani inoqatitsinnik, ingammillu anersaakkut qatanngutitsinnik, ikiunissaq ilaannikkut pisariaqavittarpoq. Jehovap Nalunaajaasui tamanna eqqarsaatigalugu qanoq iliuuseqarsimappat?
17-19. (a) 1993-imi pisariaqartitsilluinnarneq suna matuneqarsimava, qanorlu qisuariarneqarpa? (b) Suup takutippaa qatanngutivut atugarliortut ’ajugaalluarsimaqisut’?
17 Assersuutigalugu: Siorna Jugoslaviaasimasumi ikiorneqarnissamik pisariaqartitsilluinnartoqalersimavoq. Qatanngutit nunani saniliusuniittut qisuariapallassimaqaat. Siorna issip ataani biilit usisaassuit ingerlaaqatigiit sorsuffiusumut appakaassinnaasimapput, nalunaajaasut pisariaqartitsisut atuagassianik nutaanik, atisanik oqortunik nakorsaatinillu pajullugit. Ilaanni qatanngutit qinnuteqaatigisimavaat ikiuutissanik 15 tonsinik eqqussisinnaanissartik, akuersissulli tigugamikku pileriallaaraat 30 tonsinik eqqussisinnaallutik! Jehovap Nalunaajaasui Østrigimiittut biilinik usisaatilinnik pingasunik aallartitsinasuarput. Katillugit 25 tonsit ikiorniakkanut apuunneqarput. Soorunami qatanngutitta ikiorneqartut anersaakkut timikkullu ikiorneqarnertik nuannaarutigeqaat!
18 Qatanngutit pajugutisisut qanoq qisuariarpat? Utoqqaanertaq siorna siusinnerusukkut ima allassimavoq: „Qatanngutit angutit arnallu Sarajevomiittut tamarmik ajunngillat, pingaarnerpaamillu, silanngajaartumik sorsunnerup matuma nikallujuilluta atornissaanut suli anersaakkut nukittuvugut. Nerisassaqarniarneq ajornakusoorsimaqaaq. Qanortoq uagut pilluta ilungersornisinni Jehovap pilluaqqullusilu akilerilisi. Jehovap Nalunaajaasui inooriaatsimikkut maligassaalluarnertik oqartussaasunillu ataqqinninnertik pissutigalugit oqartussaasunit immikkut ataqqisaapput. Aamma anersaakkut inuussutissat tunniussasi qujamasuutigeqaavut.” — Naleqqiuguk Tussiaat 145:19.
19 Qatanngutitta ulorianartumiittut taakku qujamasunnertik aamma oqaluussinermi ilungersuussinermikkut takutippaat. Saniliusut amerlasuut orniguttarput Biibilimillu atuaqqissaaqatigineqarnissartik qinnutigisarlugu. Illoqarfimmi Tuzlami, inuussutissanik pisariaqartinneqartunik 4 tonsinik pajussiffiusimasumi, oqaluussisartut 40-sut qaammammut agguaqatigiissillugu nalunaaquttap-akunneri 25-t oqaluussinermut atorsimavaat, ilagiinni pionerinit tapersersorluarneqarlutik. Jesusip toquanik eqqaaniaanermut 243-t najuussimapput. Ilumut qatanngutivut taakku ’tamakku tamaasa atortaraluarlugit asasitsigut ajugaalluaqaat.’ — Rûmamiut 8:37.
20. Sovjetunioniusimasumi qanoq ’naligiissaarineqarsimava’?
20 Tunisiumatussuseq ikiuutissanik atisanillu oqortunik Sovjetunioniusimasumut nassiussuinikkut ersertoq tamaani qatanngutit ilungersuussinerannit akineqarpoq. Assersuutigalugu Moskvami 1993-imi eqqaaniaanermi 7549-t najuussimapput, siorna 3500-it najuussimasut. Aamma illoqarfimmi tassani ilagiit 12-niit 16-inut amerlisimapput. Sovjetunioniusimasumi tamarmi (nunat baltiskiusut ilanngunnagit) ilagiit 14 procentimik amerleriarsimapput, oqaluussisartut 25 procentimik pionerillu 74 procentimik. Ilungersuussissuseq imminullu pilliutigeriaannaassuseq tupinnartut! Ukiuni hundredelinni siullerni ’naligiissaarisoqarnerani’ pisumut eqqaanarpoq. Taamanikkut kristumiut anersaakkut timikkullu peqarluartut sumiiffinni pigissaanngiffiunerusumiittuniittunik tunisiumatussuseqarlutik nassitsisarsimapput, ikiorneqartullu ilungersuussissusiat tunisisunut nuannaarutaallunilu qiimmassaataasarsimaqaaq.— 2 Korintumiut 8:14.
Ajortoq uumigiuk!
21. Isumatuut isumaatsullu assigiinngissutaat Ussatit kapitali 3-mi qanoq oqaatigineqarpa?
21 Ussatit, kapitali 3, akerleriinnik saqqummiussueriarluni naggattaatigut ima mianersoqqussuteqarpoq: „Nakuusersoq sinngageqinagu iluatsitsisarnera pillugu, tumai atuallanniaqinagit. Tunussisoq [Jehovamut] maajunnartuuvoq, peqqusersuitsulli [Jehova] ilagiiffigaat. [Jerhovap] perloqqusarpaa iluaatsut illuat; pilluaqqusarpaali iluartut inigisaat. Mitaatilliisunut mitaatilliisarpoq, qanilaartunulli saammaassisarpoq. Isumatuut ataqqinaat pisassaraat, isumaatsulli assut kanngunarsisitaassapput.“ — Ussatit 3:29-35.
22. (a) Isumaatsut aqqutaat qanoq ililluta ingalassimassavarput? (b) Sianisuut suna uumigaat, sunalu ineriartortissavaat, qanorlu kingunilimmik?
22 Qanoq ililluta sianiitsut ilaattut naatsorsuussaanaveersaarsinnaavugut? Ajortup uumiginissaa ilinniartariaqarparput, aap, Jehovap maajugisai — silarsuarmi aammik kuisiffiusartumi nakuuserfiusumilu matumani peqquserlunnerit suulluunniit — maajugisariaqarpavut. (Takujuttaaq Ussatit 6:16-19.) Akerlianillu ajunngitsut — assuarnaassuseq, naapertuilluassuseq qanilaassuserlu — ineriartortittariaqarpavut, maniguulluta Jehovamillu mianerinnilluta „pisuussutit, ataqqinaat inuunerlu“ angusinnaajumallugit. (Ussatit 22:4) Tamakku akissarsiassaapput oqqaaqqissaarummik matuminnga maleruaasunut tamanut: „[Jehova] tunaariuk uummatikkut iluunngarlutit.“
Qanoq akissavit?
□ Allassimaffik ilanngutassiap qulequtaa qanoq ililluni ullumikkut atorneqarsinnaava?
□ Qanoq ililluta Jehova ataqqisariaqarparput?
□ Sooq perorsaatissinneqarneq sumiginnartassanngilarput?
□ Pilluarneq annerpaaq sumi nanineqarsinnaava?
□ Qanoq ililluta ajunngitsoq asassavarput ajortorlu uumigalugu?
[Qupp. 18-mi assiliartaq]
Pissarsiamik pitsaanersaannik Jehovamut pilliuteqartut pilluaqquneqangaassapput