Kangiani kitaanilu Jehovap innuttani nakussatsittarpai
SUMIIFFINNI oqaluussinerup inerteqqutaaffigisaani, nunani nakuuserneqarfioqisuni nunanilu oqaluussinerup qanittukkut inerteqqutaajunnaarfigisaani — ilami nunarsuaq tamakkerlugu oqaluussiffiusuni tamani — Jehovap nalunaajaasuni nakussatsittuartarpai ’pissaanermik angingaartumik’. — 2 Korintumiut 4:7.
Inerteqquteqarfinni siumukarneq
Qeqertaqatigiinni Kangianiittuni oqaluussineq maannakkut ukiuni 17-ini inerteqqutaasimavoq. Nalunaajaasut tamaani najugaqartut tamanna sapiissuseerussutigisimavaat? Naaggaluunniit! Ukioq manna maajimi oqaluussisartut amerlanerpaaffitsik qaangerlugu 10.756-inngorsimapput, taakkunannga 1297-it piffissaq tamaat oqaluussisartuullutik. Silarsuarmi pissutsit ajorsiartuinnartillugit qeqertani najugaqartut sallusuissummik tusarumaneruleriartorsimapput. Taamaattumik soqutiginnittunik angerlarsimaffiini Biibilimik atuaqqissaaqatiginninnerit 15.654-it nalunaarutigineqarsimapput. Siusinnerusukkut Jesusip toqua nipaatsumik eqqaaniarneqarmat inuit 25.397-it najuussimapput.
Ataatsimeersuarnermi „Guutimit ajoqersorneqartut“-mi — aamma tamaani pissutsit eqqarsaatigalugit nipaatsumik ingerlanneqartumi — qatanngutit nuannaaqaat atuagassiat namminneq oqaatsiminnut saqqummersinneqarmata. Nutserisut, kukkunersiuisartut kajumissutsiminnillu suleqataasut allat saqqummersinneqartut pingaarnersaat quppernerpassualik nalunaaquttap akunnerpassuini piareersarsimavaat. Naqiterisitsisarfiup suleqataajumassuseqartup suliap kusanartup naqiterlugulu qalilersornissaa nuannaarutigisimavaa. Atuagassiaq qalipaatigissaaqisunik assiliartalik ataatsimeersuartut tigugamikku nuannaartupilussuupput. Pisortaqarfinnit amerlasuunit Jehovap nalunaajaasui ataqqineqarput, akerlilersuinerlu kristumiuunerartut palasiinit pinerusarpoq. Neriuutigineqarpoq inerteqqutiginninneq qanittukkut atorunnaarsinneqassasoq.
Amerikammi nunataani?
Jehovap naluanaajaasuisa nunani killerniittut ajornartorsiutitik qatanngutimittut kangianiittutut sapiillutik aaqqinniartarpaat, Jehovallu anersaavata pissutsinik ajornakusoortunik qaangiiniarneranni ikiortarpai. Assersuutigalugu tigoriartigu nunamit Latin-Amerikamiittumit, ikiaroornartunik tuniniaanerup nalinginnaaffigisaani, nalunaarut.
Nalunaajaasorpaaluit busserlutik avinngarusimasumukarput. Bussimit niugamik malugaat aqqusineeraq illoqarfeeqqap avataanut sammisoq. Qatanngutit angutit tallimat aqqusineeqqakkut ipertuukkut tassuuna aallarput sumut ingerlanersoq takuniarlugu, qatanngutit arnat meeqqallu illoqarfeeqqami oqaluussiartortut. Qatanngutit ilaat oqaluttuarpoq:
„Aqqutaani nalunaaquttap-akunnerini marlunni ingerlanitsinni illut ikittuinnannguit naammattoorpavut. Tassanngaannarli angutit arfineq-pingasut nasallit sakkullillu orpinnit takkuteriataarput. Ilaat eqqarasuartaateqarput, ilaat takisuunik savissuaqarlutik. Sumununa pisimasugut? Sumik kissaateqarnersut aperaavut, nipangeqquneqarpugulli siumuinnarlu ingerlaqquneqarluta. Taamaaliorpugullu! Nalunaaquttap-akunnerini aamma marlunni orpippassuit akulloqquallugit ingerlareerluta qaamanermut appakaalluta sakkutuut tammaarfiannut pivugut. Sumi tamaani aallaasisartunik sissuertoqarpoq. Illumut kusanartumut qeqqaniittumut ingerlanneqarpugut.
Angutip tammaarfimmi naalagaagunartup ingereeratta saaffigaatigut. Atisarissaarpoq, ilinniarluarsimarpasissuulluni inuuserillunilu. Ilarput ataaseq tikkuarpaa nikueqqullugulu. Taava aperaa: ’Qanoq isumaqarfigivisigut?’ Kikkunniinnerput ilisimalluaramiuk qatanngut akivoq: ’Nalunngilatsigit kikkuususi, kisianni ilissi imaluunniit politikkikkut suliniaqatigiiffiit suulluunniit soqutigisaqarfiginngilavut. Maaniinnitsinnut pissutituarput tassaavoq Jehova Guutip Jesus Kristus aqqutigalugu naalagaaffianik oqaluussissutiginninnissaq. Qanittukkut naalagaaffiup tamatuma pissutsit aaqqissuussaaneranni matumani politikkikkut naalakkersuisut tamaasa suujunnaarsissavai nunamilu maani pissutsini paratiiserpalaartuni inunnut nuanningaartunik pilluaqqussutissaqartitsissalluni, inuup kialuunniit suliniaqatigiiffiulluunnit suulluunniit sapigaannik.’
Angutip pissusia allanngorpoq. Apersulerpoq. ’Tamakku tamaasa sumi ilinniarakkit? Taamatut oqalunnissat qanoq ilillutit piareersimaffigisinnaagakku?’ Nalunaaquttap akunnerani ataatsimi affarmilu silarsuarmi pissutsit pillugit nalunaajaaffigilluarparput takutillugu inuiaat neriuutissatuaat Biibilimi saqqummiunneqartoq. Aamma Rûmamiunut agdlagkat, kapitali 13, nassuiarparput — oqartussaasut pissaaneqartut ataqqigivut, taakkuali piumasaat Jehovallu oqaasiata piumasaa akerleriikkaangata siullerpaamik Guuterput Jehova naalattaripput. Naggataatigut atuakkanik nassatatsinnik neqeroorfigaarput. Atuakkat pingasut biibililu tiguai, tupaallaatigisatsinnillu akisilluni aningaasanik tunissuteqarfigaatigut. Atuarumallugit oqarpoq.
Taava naalagaasoq taanna angutit ilaannut peqqusivoq tammaarfimminnit siulersussagaatigut. Utimut aqqutaani Jehova qutsaviginasuarparput oqaluussiffimmi allaanerusumi tamatumani ajugaatimmatigut.“
Afrikami sorsuuffioqisumi
Kangiata ungasissup Kitaatalu ungasissup akornanni ippoq Afrikap nunataa. Naggueqatigiit sorsuuttarnerisa Afrikap nunataasa ilai nakuuserfissuanngortissimavaat. Liberiami inuinnaat sorsuuteqqilernerannit Jehovap innuttai annertuumik attorneqarsimapput. Siullermik 1992-imi oktobarip novembarillu ingerlaneranni illoqarfiit pingaarnersaanni avataanilu akersuunneqarsimavoq. Sorsunneq nunami siaruaakkiartortillugu ilagiit siammartarput, qatanngutit innuttaasut allat ilagalugit orpigaqarfissuarnut qimarngusarmata. Taamaakkaluartorli ilungersuussissusiat annikillinngilaq. Qimaanerminni oqaluussisarput, tamatumalu kinguneraa avinngarusimanerpaanut allaat nalunaajaaneq.
Ilagiit qatanngutinik qimaasimasunik ilaasortallit rigssaliugallartussamik gummissanik naatitsiviup qeqqani sanasimapput. Illoqarfiup sorsuuffiup qanittuaniittup inui qaartartumeerisaqattaartunit qimaallutik ullukkut gummissanik naatitsivimmut qimarngusarput. Qatanngutit tamaani najugaqartut (oqaluussisartut illoqarfiit pingaarnersaannit Monroviamit qimaasimasut ilagalugit) oqaluussisarnermik aaqqissuussisimapput orpiillu gummissallit ataanni toqqorfissarseqqasunut oqaluussisarlutik. Timmisartumik aggersoqaleraangat qatanngutit angutit arnallu itersaliamut qaninnermut aqqapallattarput, ulorianartuerukkaangallu oqaluusseqqileraraat.
Tupinnaqaarlu ilagiinni oqaluussisartut tuusintinit amerlanerusut, naak innuttaasut akornanni sorsunneqaraluartoq nalunaarusiaminnik Peqatigiiffimmut nassiussisimasut, qaammammut agguaqatigiissillugu nalunaaquttap akunneri 18,1-it oqaluussinermut atorsimammatigik, Biibilimillu atuaqqissaaqatiginninnerit 3111-it nalunaarutigisimallugit.
Ukiut kingulliit sisamat ingerlaneranni Afrikami Jehovap Nalunaajaasuisa suliaannik killilersuinerit nunani 18-ini atorunnaarsinneqarsimapput. Nuannaarnartullu tulleriiaatiinnarput! Malawimilu Nalunaajaasunik inerteqqutiginninneq oktobarilimi, 1967-imi, atulersinneqarsimasoq aggustip 12-ani atorunnaarsinneqarpoq. Isertortumik oqaluussineq iluatsittumik ingerlajuaannarsimavoq, maannali kiffaanngissuseqarlutik saqqumisumik oqaluussisinnaalerput. Uppeqatimilli asasamik akerlilersuisunit toqutaasimasorpassuit inuunermut tikilluaqqoqqinnissaannut makititaanissap tungaanut utaqqisariaqarput.
Mozambiquemi eqqissinissamik isumaqatigiissut oktobarip 4-ani 1992-imi atuutilerpoq. Maanna sumiifiit ukiuni 16-ini sorsunneq pissutigalugu tikinneqarsinnaasimanngitsut anguneqarsinnaalerput. Assersuutigalugu Cariocomi qatanngutit angutit arnallu ukiuni arfineq-marlunni siuliiniittuni peqatigiiffimmut attaveqarsimanngitsut attaveqarfigineqaqqilerput. Illoqarfiit pingaarnersaanni Milangemi, Jehovap nalunaajaasuinik ’allamik ajoqersueqqiffiusumik’ tigusanut katersuutsitsiveqarsimasumi, immikkut ittumik ataatsimeersuarneqarpoq. Tupaallaataasumik 2915-it aggiapput, ilaatigut illoqarfiup siuttua, Jehovap Nalunaajaasuinik tikilluaqqusisoq. Taamaalilluni ’allamik ajoqersueqqiffiusimagaluartoq’ Guutimit ajoqersorneqarnermut qitiusutut atorneqarpoq.
Ajoqersuiartortitaq allappoq: „Qatanngutivut qimaasut inaanni Tetemiittumiittut eqqarsaatigalugit UNHCR-mit (FN-ip qimaasunut qullersaqarfia) aallartitaq maluginiagaqarsimavoq soqutiginartumik. Oqaluttuarpoq Jehovap Nalunaajaasui immikkoorlutik najugaqarfiliorsimasut. ’Taakkua ineqarfiat kisimi ajunngitsumik aaqqissuussaavoq,’ oqarsimavoq oqaatsinilu ilallugit: ’Jehovap nalunaajaasui ipeersaartuupput, aaqqissuulluagaallutik ilinniarluarsimasuullutillu.’ Timmisartumik angalaaqataanissannik neqeroorfigaanga qimaasut ineqarfiat nammineq isinnik takuniassagakku. Timmisartortartup silaannarmit najugaqarfilianut marlunnut tikkuuppaanga. Siulleq nakkaassimarpasippoq ipertullunilu, marrarmik illuikkiaqarluni sumi tamaaniittunik. Aappaa iluarsaalluagaarpasippoq tulleriiaanik aqqusinernik akunnequsersukkanik illoqarluni. Illut takujuminarput, eqqaallu torerlutik. Allaat ilaat nammineq qalipaasiamit qalipagaapput. ’Eqqoriaruk sorleq ilissi pigigissi,’ timmisartortartoq oqarpoq. Najugaqarfiliami tassani qatanngutit naapikkakkit nuannaaqaanga. Nunaannarmi illoqarfimmi tamaani Jehovamut nalunaajaasuinnarnik inoqartumi, ullumikkut arfineq-pingasunik ilageeqarpoq.
„Nattorallip nunaa“
USA-p nattoralia pineqanngilaq. Kangiata Kitaatalu akornanni ippoq nuna Albania, pisortatigoortumik oqaatsisoorlugu taaguuteqartoq Shqipëria, isumaqartoq „Nattorallip nunaa“. Nunami tamatumani ukiuni 50-ini Jehovap Nalunaajaasuinik inerteqqutiginnissut, sukannersumik atortinneqarsimasoq, qanittukkut atorunnaarsinneqarpoq, maannalu Albaniami Jehovap nalunaajaasui qatanngutitik kangianeersut kitaaneersullu peqatigalugit upperisarsiornikkut kiffaanngissuseqalernerminnik nuannaarutiginnillutik naapeqateqarsinnaalerput. Ilumullu oqartoqarsinnaavoq ’ullunik piginnaaffiusunik asiutitsinaveersaarsimasut’. (Evfisumiut 5:16) Albaniap oqaluttuarisaanerani ataatsimeersuarneq siulleq, ullormi ataatsimi ataatsimeersuarneq, 1993-imi marsip 21-ani illoqarfiit pingaarnersaanni Tiranëmi Nationalteaterimi ingerlanneqarpoq. Arfininngornermi ualikkut Jehovap nalunaajaasuisa 75-it kajumissutsiminnik ataatsimiittarfissuaq nakkaateqqajaasoq ataatsimeersuarfissanngortissimavaat kusanarluinnartoq. Malugisariaqarpoq kajumissutsiminnik sulisut 75-iusut ilaat 20-iinnaat kuisimasuummata.
Silageqaaq. Nunanit allanit tikeraat tikerarmata ilassisaqattaannerit — annerusutigut ussersornikkut eqitaaqattaannikkullu pisut — ullormik ataatsimeersuarfiusumik immikkut ittuutitsipput. Talini qilammut siaarsimallugit qatanngut Nasho Dori aallarniummik qinuvoq. 1930-mi kuisissimavoq maannakkullu tappingingajaqqalluni. Ataatsimeersuarneq Albaniamiusut ingerlanneqarpoq, specialpionerit nunanit allaneersuunerusut oqalugiartuullutik. Qatanngutit angutit arnallu nutaat 41-t kuisikkiartorneranni najuuttut 585-iusut erinarsuut „Kristumiutut tunniulluinnarneq“ erinarsorpaat — erinarsuutit arfinillit tamaani atorneqartut nutserneqarsimasut arfiniliusut ilaat. Allanngornersuaq! Siornatigut biibilimik pigisaqaannaraanni pillakkatut suliartortitaasoqartarpoq, taamaallaalu marlukkuutaarluni pingasukkuutaarluniluunniit ataatsimiittoqartarsimagaluarluni.
Ataatsimeersuarnerup aqaguani Napasuliaq Alapernaarsuiffiup allaffia Teaterip direktørianit sianerfigineqarpoq. Teaterip kikkunnit atorneqarnera soqutigineq ajoraluarpaa; direktørimmi tulliata isumagisassarimmagu. Oqarporli: „Allatut ajornartumik sianerfigisariaqarassi sianerfigaassi qutsaviginiarlusi. Aatsaat taama ipiitsigitillugu takuara. Soorlumi tassa teateri anoraasuap qilammit supisimagaa. Qinnuigiumavassi pisariaqartitsilernisi tamaasa atorniartaqqullugu; salliutittassavassi. Qaammatit pingajussaanni tamani akeqanngitsumik ilissinnut atortittariaqaraluarparput.“
Oqaluussisartut nakussatsissimallutik qujamasullutillu illoqarfimminnut utikaapput Jesusillu toquanik eqqaaniaanissaq piareersalerlugu. Ullut 15-iinnaat qaangiuttut, apriilip 6-iani, kiffaanngissuseqartitaalluni eqqaaniaanerit siullersaat sumiiffinni assigiinngitsuni arfineq-marlunni ingerlanneqarpoq.
Illoqarfimmi Beratimi ataatsimiigiartartut 170-inut amerleriarsimapput, tamaanilu palasi kamattupilussuuvoq. Beratimi oqaluussisartut 33-usut ilaat 21-t ataatsimeersuarnermi kuisissimapput. Tamaani eqqaaniaanermi najuuttut 472-iusimapput. Aamma allani najuussimasut amerlassusiat malugisarialiuvoq, annerusutigut specialpionerit siuttuulluarnerata kingunerisaa.
Albaniami illoqarfimmi katuuleqarfiusumi basilikaqarfisumilu, Shkodërimi, oqaluffimmi ilagiit allakkanik qaammammoortunik naqiterisalersimapput, tamatigullu imarisarsimavaat qanoq ililluni Jehovap Nalunaajaasui ingalanneqarsinnaanersut. Naqitikkami kingullermi ima allassimasoqarpoq: „Jehovap Nalunaajaasuisa Shkodër tiguarsimavaat!” ’Sakkutoorpassuit’ (oqaluussisartut marluk) inunnik perorsagaalluartunik ilumoorullugulu eqqarsartartunik eqqaaniaanermut katersortitsisimapput. Eqqaaniaanermi oqalugiaat tusarnaareerlugu ilaqutariit 15-it Biibilimik atuaqqissaaqatigineqartalerumasimapput. Illoqarfimmi allami Durrësimi, sisamarsuarnik oqaluussisartulimmi, eqqaaniaanermut 79-init ikinnerunngitsut najuussimapput!
Qaqqami illoqarfeeqqaami Kalmetimi Vogelimiittumi katuullit inuusuttut akerliuniat ujaqqanik milloorniarlutik oqaluussisartunik sioorasaarinerat pissutigalugu eqqaaniaaneq qatanngutip angerlarsimaffiani ingerlanneqarpoq, 22-init najuuffigineqarluni. Tamaani tallimanik oqaluussisartoqarpoq, ilaat pingasut Tiranëmi ataatsimeersuarnermi kuisissimasut.
Vlorëmi angutit inuusuttut marluk Napasuliaq Alapernaarsuiffik-mik pissarsisimapput atuareeramikkulu Peqatigiiffimmut allassimallutik: „Sallusuissut Napasuliaq Alapernaarsuiffik-mi nassaarput pissutigalugu immitsinnut Jehovap nalunaajaasuinik taagulerpugut. Ikinngutinnersumik qinnuigaassi ikiortissatsinnik aallartitsivigeqqulluta.“ Specialpionerit marluk aallartinneqarput, angutillu inuusuttup aappaa erniinnaq oqaluussissartunngorsinnaalerpoq. Vlorëmi eqqaaniarnermut najuuttunut 64-inut ilaanini nuannaarutigisimavaa.
Qatanngut Albaniamiu USA-mi sallusuissummik nassaarsimasoq 1950-kkunni inunngorfimminut Gjirokastërimut utersimavoq, toqussanilu tikillugu ajornanngikkaangat tamaani oqaluussisarsimalluni. Sallusuissutip inerittussartaa ernermi uummataanut nakkalatsersimavaa. Inerteqquteqarneq atorunnaarsinneqarmat ernerata Napasuliaq Alapernaarsuiffiup Peqatigiiffia ikiortissaminik qinnuigisimavaa. Soqutinnittoq alla nunaannarmi illoqarfeeqqami Gjirokastërip avannaatungaaniittumi najugalik aamma allassimavoq ikiortissarsiorluni. Specialpionerit sisamat aallartinneqarput. Eqqaaniaanerup aqaguani pingasunngornermi ullaakkut taakkua ilaat Peqatigiiffiup Tiranëmi allaffianut sianersimavoq oqarlunilu: „Oqaluttuutinngitsoorsinnaanngilassi Jehovap anersaava qanoq sulisimatigisoq. Nuannaaqaagut! Eqqaaniaaneq iluatsitsiffiulluaqaaq!“ Oqaluussisartut angalasut ilanngullugit 106-it najuussimapput!
Eqqaaniaanermut najuuttut katillutik qassiusimappat? 1992-imi oqaluussisartut 30-iinnaagallarmata 325-t najuussimapput. 1993-imi oqaluussisartut 131-it eqqaaniaanermi tusarnaartussanik 1318-inik katersuisimapput. Ukiuni marlunni taakkunani tamani tusarnaartut oqaluussisartunit quleriaammik amerlanerusarsimapput. Pissanganaqaaq takullugu piffissap taama sivikitsigisup ingerlanerinnaani ’minnersaat tuusintilinngortoq’! — Jesaja 60:22.
„Tupivit noqarutai tallisikkit“
Jehovap Nalunaajaasuisa oqaluussinerat nunarsuarmi sumut tamaanga siammariartuinnartillugu kajumissaarut manna tutsiuppoq: „Toqqit inittoruk, ineqarfiit qaleralersoruk naammattunik. Tupivit noqarutai tallisikkit paagutaallu aalajangerluarlugit. Siammariartussaatimmi kujammut avannamullu.“ (Jesaja 54:2, 3) Jehovap ineqarfissuata — nunarsuaq tamakkerlugu pallorfiginnittaasa ilagiivisa — siammarsimanera ingammik Europap kangiani, Sovjetunioniusimasumi nunaniinerusoq, ersareqaaq. Kiffani ukiuni qulikkaani naqisimaneqarneranni napatereerlugit maanna Jehovap nalunaajaasuni peqatigiissortaminik allisitsinissaannut pisariaqartumik aningaartumik nakussatsittarpai.
Lokomotiv-stadionimi Moskvamiittumi ataatsimeersuarnermut nunanit tamalaanit peqataaffigineqartumut, „Guutimit ajoqersorneqartut“-mik qulequtalimmut, inuit 23.743-it najuussimapput. Ukiut marluinnaat siorna kinamitaava isumaqarpa tamanna pisinnaalissasoq! Japanimit Koreamillu 1000-init amerlanerusut takkupput, USA-mit Canadamillu 4000-ingajaat, sinnerilu tuusintilikkuutaat nunanit assigiinngitsunit 30-nit amerlanerusunit Manerassuup kujasinnerusortaaniittunit, Afrikamiittunit Europamiittunit allaninngaanniillu takkupput. Tassani Kangia Kitaalu naapipput. Qatanngutinik angutinik arnanillu russinik 15.000-init amerlanerusunik kiffaanngissuseqarlutik naapeqateqarnertik nuannaarutigeqaat! Nuannaarneq killeqanngilaq.
Oqaluussisartut nutaat tupinnaannartumik amerlasuut, 1489-it, kuisipput. Kuisinneq silarsuarmi sumi tamaani tusagassiuutitigut eqqartorneqarpoq, ilaatigut The New York Times-ip saqqaani assikkut kusanartukkut saqqummiunneqarluni. Ersaartaannersuaqarpoq. Sulili ersaartaannersuaqarneruvoq oqalugiartoq kajumissutsiminnik sulisimasut atorfillillu ataatsimeersuarnerup iluatsilluarneranut pisooqataasimasut qutsavigereerlugit ima oqarmat: „Annermilli qutsavigaarput Jehova!“ Aap, Jehovap anersaava ilagiit ortodoksit sakkortuumik akerlilersuinerannut ajugaasimavoq ataatsimeersuarnerullu piviusunngornissaanut nukissamik pisariaqartumik tunisisimalluni.
Ullunili 5.-8. aggustimi suli allamik pisoqarpoq, tamatumuunakkut Ukrainemi illoqarfiit pingaarnersaanni Kievimi. Aamma tassani kajumissutsiminnik ikiuuttorpassuit arsaattarfissuaq annertuumik iluarsaappaat, ’rigssalipiluunersuarmilu’ tassani najuuttut amerlanerpaagamik 64.714-iupput. Najuuttut aamma tassaapput Jehovap nalunaajaasui kangianeersut kitaaneersullu, aap, nunarsuarmi sumi tamaaneersut. Peqataajartortut 53.000-it missaanniittut timmisartumik, qimuttuitsunik bussinillu tikerartut tikittarfinnut aaneqartariaqarsimapput hotelinilu, atuarfinni umiatsiani kuukkoortaatini inuinnaallu angerlarsimaffiini najugassaminnut ingerlanneqartariaqarsimallutik. Tamakku tamarmik sapinngisamik akikinnerpaamik ajornartorsiutitaqannginnerpaamillu ingerlanniarneqarsimapput, illoqarfimmi politiit tupigusutsillugit aaqqissuulluagaanermillu nersualaarinnitsillugit.
Ataatsimeersuarnerup pissanganartortaa tassa kuisinneq nalunaaquttap-akunnerini marlunni affarmilu sivisussuseqartoq. Ersaartaanneq arsaattarfissuarmi akisuatillugu 7402-t Jehovamut tunniulluinnarsimanertik kuisinnermikkut takutippaat. 1958-imi New Yorkimi ataatsimeersuarnermi 253.922-init najuuffigineqartumi kuisittut amerlanerpaaffiat, 7136, taamaalilluni qaangerneqarpoq.
Eqqartuussaaffiup matuma naggatissaa qanilliartortillugu inuit savatut pissusillit kangianeersut kitaaneersullu, aap, allaat ’nunap isuineersut’, katersorneqartuassapput, ataasiussusermillu inuiaat oqaluttuarisaaneranni nallerneqanngitsumik misigisaqassallutik. ’Amerlangaartut inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat’ anersaakkut Israelimut ilanngussorput Jesusillu utertitsissutitut pilliutaanut naleqangaartumut — pilliummut Jehovap kisimi oqartussaanera akitsisinniarlugu ullumikkut suliarineqartunut tamanut tunngaviusumut — uppernerminnik nalunaarutiginnillutik.— apustilit suliait 1:8; sarĸúmersitat 7:4, 9, 10.
[Qupp. 8, 9-mi assiliartat]
Moskvami Kievimilu Kangiata Kitaa naapippaa