Allat unnersuukkaangakkit ataqqinnittumik iliortarpit?
ATAQQINNITTUMIK unnersuunneqarluni ila nuannerlunilu iluaqutissarsinartassusia! „Inussiarnersumik, pingaartitsisumik isumassuisumillu unnersuussineq attaveqatigiillualersitsisarpoq,“ Edward oqarpoq. „Misigigaanni unnersuussisumit tusarnaarumassuseqarnermigut ataqqinnittumik pineqarluni unnersuussutip ilassinissaa ajornannginnerusarpoq,“ Warren ilaliivoq. „Unnersuussisup ataqqinnittumik iliorfigigaanganga saaffigeqqinnissaa siunersioqqinnissaalu ajornannginnerutittarpara,“ Norman unnersiorpoq.
Inuup ataqqineqartariaqarnera tunngaviusoq
Qanilaartumik, ikinngutinnersumik asannittumillu unnersuunneqarnissaq assut tikilluaqqunartarpoq. Taamaattumik allanit pineqarusussutsitut unnersuussisariaqarpoq. (Matîuse 7:12) Unnersuussillaqqissoq tassa tusarnaarusussuseqartoq unnersuussaminillu — eqqarsaataasigut, qanoq issusiatigut misigissusiisigullu — paasinninnissaminik ujartuisoq. — Ussatit 18:13.
Ullumikkut unnersuussisartut, ilaatigut kristumiut utoqqaanertat, unnersuussigaangamik ataqqinnittumik oqaaseqartarnissartik eqqumaffigisariaqarpaat. Sooq? Ullumikkut inuit allanut iliuuseqarnerminni ataqqinninngitsumik pissuseqartarnerat nalinginnaaqaaq, tamannalu tuniluuttarpoq. Inunnit ataqqinnittumik iliorfigineqarfissatut ilimagisanit pakatsisinneqarnerit qaqutigoortuunngillat, soorlu atorfilinnit, upperisarsiornikkut pisortanit allanilluunniit. Assersuutigalugu soraarsitsineq sulisitsisumut sulisumullu nuanniillunilu nammakkersuutaasarpoq. Soraarsitaasup imminut ataqqineranut ajoqutaasinnaasorujussuuvoq, ingammik soraarsitaanermini ataqqinninngitsumik iliorfigineqarsimappat. Taamaattoqartillugu nakkutilliisuusut ilinniartariaqarpaat „ersarissumik, eqqorluartumik suliaminnillu ilisimannilluartutut tusarliinissartik, tusarlerneqartup imminut ataqqinini pigiinnarsinnaaniassammgu,“ atuagassiami The Vancouver Sun-imi taama allassimasoqarpoq. Aap, inuit tamarmik ataqqinnittumik iliorfigineqartussaapput.
FN-ip Generalforsamlingia ima nalunaaruteqartoqarsimavoq: „Inuit tamarmik ataqqinassutsikkut pisinnaatitaaffitsigullu naligiillutik inunngorsimapput. Sianissusiligaallutillu nalunngeqatiginnissusiligaapput, qatanngutigiittullu iliorfigeqatigiittariaqarlutik.“ Inuup ataqqinassusia navianartorsiortinneqarmat pissutissaqarluarpoq Naalagaaffit Peqatigiit Isumaqatigiissutaanni aamma Inuit Pisinnaatitaaffii Pillugit Silarsuaq Tamakkerlugu Nalunaarusiami tamanna pingaartinneqarmat. Taamaalillutik „inuit pisinnaatitaaffiinut tunngaviusunut, inuup ataqqinassusianut naleqassusianullu upperinninnertik“ uppernarsarpaat.
Jehovap inuk ataqqinassusilerlugu pinngortippaa
Jehova Guutiuvoq ataqqinartoq. Oqaasiani isumassarsiarititaasumi ilumoortumik ima allassimasoqarpoq: „Alutornassusermik naalannassusermillu iluneqarsimavoq,“ aamma: „[Jehova] Guuterput, naalannangaarpoq aqqit nunarsuarmi tamarmi!“ — 1 Israelikkut 16:27; Tussiaat 8:2.
Guutitut ataqqinartutut Kisimilu Oqartussaasutut pinngortitani tamaasa, qilammiittut nunamiittullu, ataqqinassuseqartippai. Pinngortitaanit taakkunannga tamanit ataqqinartinneqarnerpaaq tassaavoq Ernera nersugaasoq Kunngitullu naalakkersuisuusoq, Jesus Kristus. „Naalannassutsimik alutornaammillu pilersorpat,“ David siulittuutaasumik allassimavoq. — Tussiaat 21:6; Daniel 7:14.
Ajoraluartumilli inuit tunngaviusumik pisinnaatitaaffiat tamanna oqaluttuarisaanerup ingerlanerani atornerlunneqartarsimavoq. Inngilip pissaaneqaqisup, iliuutsimigut Satan Diaavulunngortittup, Guutip kisimi oqartussaassusiata eqqortuunera apeqqusersimavaa. Taamaaliornermigut Jehovamut ataqqinninngitsuliorpoq aqqalu ataqqinartoq nalinginnaatillugu Taassumalu naalakkersuisussaanera unammillerlugu. Anersaap ajortup taassuma ataqqinassuseq pisassarinngisani tiguniarsarisimavaa. Diaavulutut iliorlutik nunami naalakkersuisuusarsimasut pissaanillit, soorlu Nebukadnezarip Biibilimi eqqartorneqartup, ’pissaanerminnik kunngiussutsiminnillu’ pingaarniakujuutiginnittuusimapput. Pisassartik sinneqalugu ataqqinartinnermikkut Jehovap ataqqinassusia narrunarsarsimavaat. (Daniel 4:30) Taamatuttaaq Satanip naqisimannittumik naalagaanerata inuit ataqqinassusiat narrunarsarsimavaa sulilu taamaaliorluni.
Illit ataqqinassutsikkut narrunarsarneqarnikuuit? Unnersuunneqarnikuuit pisuusutut misigititaarujussuarlutit, kanngutsisitaarujussuarlutit ataqqinaataajagaarussuarlutit naleqanngitsutullu misigititaarujussuarlutit? Taamatut misigisaqarsimanini Andrép ima oqaluttuaraa: „Isumatusaarnermik, isumassuinermik ataqqinninnermilluunniit misigitinneqanngilanga. Naleqanngitsutut misigaanga. Pakatseqaanga isumakuluttorujussuanngorlunga, aap, allaat isumatsattorujussuanngorlunga.“ „Uannut ajunngitsussamik eqqarsarpasinngitsumit unnersuunneqarnissara ilassiuminaatsippara.“
Taamaattuminguna kristumiut nakkutilliisut Guutip savaataanik ataqqinnittumik iliorfiginnittarnissaminnik kajumissaarneqartut. (1 Pîtruse 5:2, 3) Allanik unnersuussisariaqalerfimmi qanoq ililluni qulakkeerneqarsinnaava silamiutut eqqarsaqqaarnatik inoqatiminnik ataqqinninngitsuliortartutut eqqarsannginnissaq pissusilersunnginnissarlu? Suut ikiortigalugit nammineq uppeqatillu ataqqinassusiat sernissorneqarsinnaappat? — Ussatit 27:6; Galâsiamiut 6:1.
Najoqqutassat ataqqinassutsimik illersuisut
Guutip oqaasiani tamanna nipangiunneqanngilaq. Siunnersuisullu pikkorissup Guutip oqaasia, silamiut ilisimassutaat pinnagu, tunaartarilluinnarumassavaa. Allakkat Illernartut siunnersuutinik naleqaqisunik imaqarput. Tamakku maleruaraanni unnersuussisumut unnersuutsittumullu iluaqutaasarpoq. Paulusip nakkutilliisoq kristumiu Timoteus ima peqqusimavaa: ’Angut utoqqaq appisaluussanngilat, kisianni oqaanniassavat ataatattut ilillugu, inuusuttullu qatanngutittut ilillugit, arnallu utoqqaat anaanattut ilillugit, arnallu inuusuttut qatanngutittut ilillugit tamatigut minguillutit.’ (1 Timûtiuse 5:1, 2) Aliasunneq annertooq, misigissutsikkut anniaatissinneqanerpassuit peqqusiileqinerpassuillu pinngitsoortinneqarsinnaapput najoqqutassaq tamanna maleruaraanni!
Malugiuk kinguneqarluartumik unnersuussissagaanni pingaartoq tassaammat unnersuussamik taassumalu ataqqinnittumik isumassuisumillu iliorfigineqarnissaminut pisinnaatitaaffianik naleqquttumik ataqqinninneq. Kristumiut utoqqaanertat, ilaatigut nakkutilliisut angalasartut, unnersuussutip tamatuma malinnissaa ilungersuutigaat. Paasiniartarpaat unnersuussartik qanoq eqqarsarnersoq soorlu taamatut eqqarsarlunilu iliuuseqarnersoq. Isumaa tusarnaarumasarpaat, sapinngisaminnillu kanngutsisinnaveersaarlugulu nikanarsarnaveersaarlugulu ajuallatsinnaveersaartarpaat.
Utoqqaanertatut qatanngutitit paasitittariaqarpatit isumassoritit ajornartorsiutaannillu ikiorusullugit. Nakorsaq misissuiniaraangami aamma taamaaliortarpoq. Inimi nillerlunilu bakteeriaajakkami atisaqarnani innanganeq nikanarsagaasutut misiginarsinnaasarpoq. Taamaattumik qujamasuutigineqartaqaaq imminut ataqqineq ataqqinassuserlu nakorsap eqqarsaatigigaangagit pisariaqartumik misissuilinnginnermini ulissuinermigut. Taamatuttaaq kristumiu unnersuussisoq unnersuussaminut inussiarnisaarlunilu ilakkuminartuujumassaaq, tamannalu ilutigalugu unnersuussani ataqqinassutsip ulianik ulillugu. (sarĸúmersitat 2:13, 14, 19, 20) Akerlianik unnersuussisoq sukannerlunilu misigittaallunilu misiginneqataassuseqanngippat unnersuussaa atisaajarneqartutut misigissaaq kanngusulluni, narrunarsagaasutut ataqqinaataajarneqartutullu misigaluni.
Ingammik Teokratiimik Ilinniarfimmi nakkutilliisut allanik ataqqinnittumik unnersuussinissartik peqqissaaruttariaqarpaat. Utoqqasaanik unnersuussigaangamik angajoqqaamissut ilillugit asaniittumik iliorfigisariaqarpaat. Misiginneqataasuusariaqarput, inussiarnersuullutik asannittuullutillu. Taamatut isumassuisuuneq pisariaqarpoq. Aatsaat taamatut isumassuineqarpat eqqortumik anersaaqarluni unnersuussisoqassaaq unnersuunneqartullu unnersuunneqarnini ilassilluarsinnaanerussavaa.
Ilissi utoqqaanertat, eqqaamasiuk unnersuussut atoriaannaasoq iluaqutaallunilu qiimmassaataallunilu ineriartuutaallunilu pitsaasuummat. Evfisumiunut agdlagkat 4:29-imi ima allassimasoqarpoq: ’Oqaatsinik mikiaasunik qanissinnit anisitseqinasi, kisianni ineriartornissamut pisariaqartumut ajunngitsut oqaaserisigik tusartut saammaannermik pineqaqqullugit.’
Tunngavissaqanngilaq oqaatsit sukannersut atussallugit peqqarniitsumilluunniit tunngavilersussalluni. Illuatungerisamik ataqqinninneq namminerlu naleqassutsiminik ataqqinassutsiminillu misiginerata atatiinnarnissaanik kissaateqarneq ajunngitsunik kinguneqarluartussanillu oqaaseqarnissamut iluaqutaassaaq. Oqaloqatigiinneq aallarnertaruk oqaloqatigisat pissusiinik ajunngitsunik ilumoorlutit nersualaarlugu, pakatsissutigisaanik naleqanngitsutullu misigilissutigisaanik oqaaseqarnaveersaarlutit. Utoqqaanertaaguit ’oqartussaassutsit ineriartuutissamik aserorterneqaatissaanngitsumik’ atoruk. — 2 Korintumiut 10:8.
Aap, kristumiup nakkutilliisup unnersuussutai tamarmik qiimmassaataasariaqarput, oqaaserisaallutik ilorraallaataasut. Oqaaserineqartut nikallortitsisuusariaqanngillat imaluunniit ’siooralersitsisuunatik’. (2 Korintumiut 10:9) Allaat ingasattumik ajortuliorsimasoq imminut ataqqineranik ataqqinassusianillu arsaarniarneqartariaqanngilaq. Unnersuussineq imaluunniit ilungersortumik oqaassineq oqimaaqatigiissuusariaqarpoq, inussiarnersumik aalajangersimasumilli tunniussaalluni, unioqqutitsisup isumataarnissaanik siunertaqartoq. — Tussiaat 44:16; 1 Korintumiut 15:34.
Malugisariaqartuuvoq Guutip Israelikkunnut inatsisai aamma taamaattunik najoqqutassaqarsimammata. Inatsisini ilungersortumik oqaassinissaq allaallu timikkut perorsaatissiinissaq akuerineqarput, tamatigulli inuup ataqqinassusiata pissusissamisoortup innarlerneqannginnissaa eqqarsaatigineqartarsimalluni. Anaalerutip atorneqarnissaa akuerisaasimavoq, pinerluttoq ’pinerluutaanut naleqquttumik amerlassuseqartunik anaalerneqartarsimalluni’, ingasaanneqartussaasimanngilarli. Anaasinerit amerlassuserisinnaasaat killeqarsimavoq, ajortuliortoq ’narrunarsagaasutut isigineqaleqqunagu’. — 5 Moses 25:2, 3.
Aamma Jesus ajortuliortunut peqqissimisut misigissusiinut sianiginnittuusimavoq. Taanna Esajasip ima siulittuutigisimavaa: „Sullortooq naffalik napivissanngilaa iperarlu qamilersoq qamivissanagu. Iluarneq saqqummiutissavaa piviusunngortillugu.“ — Jesaja 42:3; Matîuse 12:17, 20; Lúkarse 7:37, 38, 44-50.
Aamma Jesusip qaqqami oqaluutsimini misiginneqatiginninnermik ersersitsisarnissap pisariaqassusia erseqqissarsimavaa: ’Taamaattumik inunnut qanorluunniit iliorfigeqqugussi ilississaaq taamatut iliorfigisigik.’ (Matîuse 7:12) Najoqqutassaq tamanna attaveqatigiinnitsinni ima qitiutigaaq taaneqarsimalluni ’maleruagassaq atortuujuaannartoq’. Kristumiutut utoqqaanertatut unnersuussigaangavit asannittumik ataqqinnittumillu iliortarnissannut tamanna qanoq iluaqutigisinnaaviuk?
Eqqaamajuk aamma illit kukkusaravit. Soorlu Jakob allassimasoq ’tamatta qassiinik naakkiuttarpugut,’ tassa kukkusarpugut. (Jâko 3:2) Tamanna eqqaamajuaannaraanni allat kukkuneri pillugit oqaloqatigineranni pisariaqaraangat oqaatsit misigissutsillu nununissaannut iluaqutaassaaq. Taakku misigissusii eqqarsaatigisakkit, taava isornartorsiuiniarpallaassanngilatit imaluunniit kukkuluttorneri nammalluinnanngissusiiluunniit samminiarpallaassanagit. Jesusip tamanna erseqqissarsimavaa ima oqarami: ’Eqqartuussinaveeritsi eqqartuunneqaqqunasi. Eqqartuussisigisassinnimmi eqqartuunneqarumaarpusi, uuttuutigisassinnillu uuttuiffigineqarumaarpusi.’ — Matîuse 7:1, 2.
Allat ataqqikkit — Diaavulu assortoruk
Satanip ataqqinassutsitsinnik arsaarniarsaraatigut, atorsinnaanngitsutut misigilersinniarsaraluta nikallortinniarsaralutalu. Malugiuk qanoq ililluni inuit atorlugit Job aalajaatsoq nuanniitsumik misigilersinniarsarisimagaa. Elifas ilumoortuusaarniartoq ima oqarsimavoq: „Guutip allaat nammineq kiffani tatigisinnaannginnamigit allaalluunniimmi inngilini kukkunersisarlugit, atamanna tatigisinnaanngikkai taakku marrarmik illualiani issuinnarmik tunngavilinni najugallit [inuit ajortillit]. Taakku qillaalaanilluunniit sequmikkuminarnerupput.“ (Job 4:18, 19) Tassa Elifasip oqarnera naapertussagaanni Job Guutip isaani qillaalaanilluunniit, imaluunniit oqummilluunniit, naleqarnerunngilaq. Soorunaana Elifasip ikinngutaasalu Jobimut siunnersuutaat ineriartornanngeqillit, allaallu Jobip eqqaamasaanik nuannersunik nungutitsilluinnarsinnaasimallutik. Taakkua isaannit isigalugu aalajaassuseq Jobip ersersissimasaa, ilaquttaminit ajoqersorneqarsimanera, Guutimut attaveqarnera naakkinnissutitullu tunissutigisarsimasai tamarmik naleqanngillat.
Ullumikkut unioqqutitsisut peqqissimisut misigissutsinit taama ittunit suli artorsaatissinneqarsinnaanerupput. ’Aliasuppallaanermit ajulersinnaapput.’ Taamaattumik utoqqaanertat taamatut misigisunik unnersuussigaangamik ataqqinninnermik ersersitsinermikkut taakku ’asanninnerminnik aalajangerfigisariaqarpaat’, tassa uppernarsaaffigisariaqarpaat. (2 Korintumiut 2:7, 8) „Ataqqinninngitsumik pineqaraanni unnersuunneqarneq ilassissallugu sapernartaqaaq,“ William oqarpoq. Pingaartorujussuuvoq unnersuunneqartariaqartut nakussatsissallugit qularinagu Guutip isaani naleqartut. Unnersuunneqartut eqqaasittakkit Jehova ’iluaatsuunngimmat [ukiuni aalajaallutik kiffartornerminni] suliaat asanninnerallu aqqa pillugu ileqqorisaat puiussanngimmagit’.— Eprîarit 6:10.
Allat unnersuunniarneranni ataqqinnittumik pissuseqarnissamut suna aamma iluaqutigineqarsinnaava? Eqqarsaatigisassavat inuit tamarmik ataqqineqarnissaminnut tunngaviusumik pisinnaatitaaffeqarmata, Guuti assilillugu pinngortitaagamik. Jehova Guutip Jesus Kristusillu isaanni nalilerujussuupput; tamanna utertitsissutikkut makititaanissamillu neriuutikkut erseqqissarneqarpoq. Jehovallu kristumiut immikkut ataqqinassusilersimavai ’kiffartuussinermut ivertinnerisigut’ kinguaariinnik ajortunik Guutimik eqqisseqateqarnissaannik ilungersorluni kajumissaarinermini atorlugit. — 1 Timûtiuse 1:12.
Ilissi utoqqaanertat, eqqaamassavarsi qatanngutissi angutit arnallu amerlanerpaartaat ataatsimoorlutik nunarsuaq salinneqareerpat inuiaqatigiinnut nutaanut tunngaviusussaammata. Tamaattumik tamarmik immikkut erlinnartorujussuupput naleqaqalutillu, ataqqinnittumillu iliorfigineqartariaqarlutik. Unnersuussigaangassi eqqaamasarsiuk unnersuussasi Jehovap Jesusillu qanoq ilillutik isumassuinermik ersersitsivigisaraat, sapinngisarsilu tamaat iliuuseqartuaritsi uppeqatisi naak Satanimit saassunneqartuaraluarlutik ataqqinassusermik naleqassusermillu misigisaqaannaarnissaannik ikiorniarlugit. — 2 Pîtruse 3:13; naleqqiuguk Pîtrusip agdlagai sujugdlît 3:7.
[Qupp. 27-mi ungalusaq]
Ataqqinnittumik unnersuussineq
(1) Ilumoortumik ajunngitsumillu isumalimmik nersualaarigit. (sarĸúmersitat 2:2, 3)
(2) Tusarnaarluarit. Ajornartorsiut unnersuussinermullu tunuliaqutaasoq ersarissumik inussiarnersumillu eqqartoruk. (2 Samuel 12:1-14; Ussatit 18:13; sarĸúmersitat 2:4)
(3) Unnersuussininni Biibili tunngavigiuk. Ajunngitsumik isumaqarit, ingasaassiniarnak qiimmassaallutillu, misiginneqataagillu. Illuatungerisavit ataqqinassutsiminik imminullu ataqqinerminik pigisaqaannarnissaa isumagiuk. (2 Timûtiuse 3:16; Títuse 3:2; sarĸúmersitat 2:5, 6)
(4) Unnersuunneqartoq ikioruk paasitillugu unnersuunneqarnermik ilassinninneq maleruaanerlu pilluaqqusaanermik kinguneqartartoq. (Eprîarit 12:7, 11; sarĸúmersitat 2:7)
[Qupp. 24-mi assiliartaq]
Kristumiut utoqqaanertat unnersuussigaangamik ataqqinnittumik iliortariaqarput