Qanoq ililluni inuk Guuti assilillugu pinngortitaava?
„Guutip inuk pinngortippaa imminik assililluni pinngortippaa; imminik assililluni pinngortippaa. Pinngortippai tassaatillugit angut arnarlu.“ Oqaluttuaq isumassarsiarititaasoq taama nipeqarpoq, qanorli paasisariaqarpa? Qanoq ilillutik angut arnarlu siulliit Guuti assilillugu pinngortitaappat? — 1 Moses 1:27.
Timikkut Guuti assigaat? Naagga, inuupput uiniusut nunammiittussatullu pinngortitaasut. Guuti anersaajuvoq qilaallu naalannassusianiippoq takorloorsinnaanngisatsinni inuillu qanillisinnaanngisaanni. (2 Moses 33:18-20; 1 Korintumiut 15:50) Qanormi ilillutik inuit Guuti assilillugu pinngortitaappat? Guutip pissusiinik pingaarnerpaanik, soorlu asanninnermik, naapertuilluassusermik, ilisimassusermik pissaanermillu, ersersitsisinnaanngorlugit pinngortitaagamik.
Jehovap pissusii
Jehova Guutip pissusii pinngortitaani tamani takuneqarsinnaapput. Pissutsillu tamakkua ingammik erserput inuit siullit, Adam Evalu, pinngortimmagit. (Rûmamiut 1:20) Asannissusia erserpoq nunarsuaq inuit angerlarsimaffissaattut pitsaalluinnartutut pinngortimmagu. Jehovap angut naammalluinnartumik nuliassiuuppaa ikinngutissaanik; meerassaannut anaanaasussaq. Inuit siulliit marluk naatsiivimmut nuannersumut inissippai pilluarnissamullu pisariaqartitaannik tamanik pilersorlugit. Naassaanngitsumillu inuusinnaaneq tunissutisiaraat annerpaaq. — 1 Moses 2:7-9, 15-24.
Guutip ilisimassusia erserpoq inuit siulliit misilinneqartikkamigit. Jehovap qilammi nunamilu ilaqutariissortaanut ilaajuaannassagunik, inuiaallu angajoqqaavisut naassaanngitsumik inuussagunik, aalajaassutsikkut ilumoortumillu pallorfiginninnikkut maligassaasariaqarput. Taamaatumik Jehovap naleqquttumik misilippai takuniarlugu uummataat qanoq ittuunersut. Orpimmit ajunngitsumik ajortumillu nalujunnaarutaasumit nereqqunngilai. Jehova silatusaarluarpoq inuit immikkut pisinnaatitaaffissaannik nuanningaartunik tunitinnagit imminut naalattuunersut asannittuunersullu qulakkeerniaqqaaramiuk!
Guutip naapertuilluassusia erserpoq pinngortitami qutsissunik najoqqutassaqarnerat aalajangiusimagamiuk najoqqutassiallu taakku sumiginnannginnamigit. Naapertuilluassusialu erserportaaq Adamikkkut Evallu eqqortuliornissaannut periarfissaqartilluaramigit. Pikitsitsillutilli taamaaliunngimmata naapertuilluassusia erserpoq oqareernermisut pillarmagit.
Jehovap pissaanera erserpoq pillaatissiinini naammassigamiuk. Satanip, pikitsitsisuunerpaap, Jehova sallunerarsimavaa Evalu Guutimut naalanngippat annertuunik neriorsorsimallugu. (1 Moses 3:1-7) Satanilli neriorsuutini eqqortissinnaasimanngilai. Jehovap Adamimik Evamillu Edenip naatsiivianit anisitsinera pinngitsoortissinnaasimanngilaa Jehovalluunniit Adamimut oqaasii uku eqquutitinngitsoortissinnaasimanagit: „Issumimmi pivutit, issunngussaatillu.“ (1 Moses 3:19) Jehovalli asanninnini takutissimavaa pillaatisiaq ingerlaannaq naammassinnginnamiuk. Adam Evalu meeqqiortippai, taamaalilluni inuit pillugit aallaqqaammulli siunertani piviusunngortikkumaarlugu. — 1 Moses 1:28.
Jehova Guutip naapertuilluassusia, asanninnera, pissaanera ilisimassusialu erserput Satanip piliaanik Guutillu kisimiilluni oqartussaaneranut pikitsitsinerup siulliup nassatarisaanik ajortunik piiaasussamik kinguaamik pilersitsigami. (1 Moses 3:15) Tamakku tamarmik Pinngortitsisutsinnik tupinnangaartumik oqaluttuarput.
Guuti malinniarlugu ilungersorit
Naak inuttut naammalluinnanngitsuugaluarluta pissutsit Guutimeersut ersersissinnaavavut. Paulusip itsaq kristumiut kajumissaarsimavai: ’Guuti qitornatut asanartutut malinniarsiuk.’ (Evfisumiut 5:1) Oqaluttuarisaanerulli takutissimavaa amerlanerit Guutip pissusii sumiginnarluinnarsimagaat. Noap nalaani inuit ajortissimangaarmata Jehova aalajangersimavoq inuit nungutinniarlugit Noa ilaqutaalu kisiisa pinnagit. „Noa angutaavoq iluartoq, naligisami akornanni assuarnaatsumik inuuseqartoq“, Guutimullu asanninnini inassutaanik maleruaanermigut takutippaa. „Noa Guutip peqqusineratorluinnaq iliorpoq.“ (1 Moses 6:9, 22) Noap tullerminut asanninnini takutippaa ’iluarnermik oqaluussinermigut’. (2 Pîtruse 2:5) Ilisimassutsi timikkullu nukeqarnini atorluarsimavai Guutip peqqusineratut umiarsualiorami. Umiarsuarmi tassani peqqumaasiviliussaaq uumasunillu katersuilluni, Jehovalu peqqusippat nammineq umiarsuarmut ikissalluni. Naapertuilluassusermullu asanninnini takutippaa taamanikkut guutiitsut ajussusiannit sunnerneqartinnginnami.
Biibilillu allarpassuit pissutsinik Guutimeersunik nittaasimasut oqaluttuarai. Jesus Kristusilu malunnarnerpaasimavoq, naammalluinnartumik Guuti assigisimagamiuk taamaattumillu oqarsinnaasimalluni: ’Uannik takunnittup Ataataq takuaa.’ (Juánase 14:9) Jesusip pissusiini asanninneq malunnarnerpaasimavoq. Ataataminut inuiannullu asanninnini pissutigalugu qilammi inigisani qimallugu nunami inuttut inuusimavoq. Asanninnermik killinneqarluni naapertuilluartumik inuunermigut Ataatani naalannartissimavaa, annassullu pillugu nutaarsiassaq nuannersoq inunnut oqaluussissutigalugu. (Matîuse 4:23; Juánase 13:31) Asanninnermik killinneqarluni Jesusip inuunini naammalluinnartoq inuiaat annassinnaaqqullugit pilliutigaa, pingaarnerusumillu, Guutip aqqa illernartinniarlugu. (Juánase 13:1) Guuti malinniarlugu allamik pitsaanerusumik Jesus Kristusiunngitsumik maligassaqanngilagut. — 1 Pîtruse 2:21.
Guuti malinniarlugu qanoq iliorsinnaavugut?
Ullumikkut inuusugut qanoq ililluta Guutip pissusii malinniarsinnaavavut taamaalillutalu Guuti assilillugu pissusilersorluta? Pissuseq asanninneq aallarniutigeriartigu. Jesus oqarsimavoq: ’Jehova Guutit asassavat uummatikkut iluunngarlutit tarnikkullu iluunngarlutit isumakkulllu iluunngarlutit.’ Qanoq ililluta asanninnerput Guutimut takutissinnaavarput? Apustili Johannes akissuteqarpoq: ’Guutimimmi asanninneq tassaavoq inassutai maleruarutsigik, inassutaalu artornanngillat.’ — Matîuse 22:37; 1 Juánase 5:3.
Guutip inassutai maleruassagutsigik soorunami ilisimasariaqarpavut. Tamannalu isumaqarpoq Guutip oqaasia, Biibili, atuagassiallu Biibililersaarutit, atuartassagivut, atuaqqissaartarlugit eqqarsaatigeqqissaartarlugillu. Tussiaasiortutut oqarsinnaasariaqarpugut: „Ilami inatsisitit nuannareqaakka, eqqarsaatinniitittuarpakka.“ (Tussiaat 119:97) Guutip oqaasiinik ilikkariartortilluta, Guutip eqqarsariaasia atiartuaassavarput. Naapertuilluassuseq asalissavarput inatsisaatsuliornerlu uumigilerlugu. (Tussiaat 45:7) Tassuunakkut Adam kukkussuteqarsimavoq. Jehovap inatsisaa ilisimasimavaa imali asatigisimanngilaa malikkumasimanagu. Guutip oqaasianik atuaraangatta imminut aperiuartariaqarpugut: ’Tamanna uannut qanoq attuumassuteqarpa? Qanoq ilillunga inuunera Guutip pissusiinut naapertuunnerusunngorlugu aaqqissuussinnaavara?’
Jesus oqarsimavortaaq: ’Tullit ilittut asassavat.’ (Matîuse 22:39) Inuk kinaluunniit peqqissoq imminut asavoq pitsaanerpaanillu imminut kissaattarluni. Tamanna ajortuunngilaq. Tullerpulli asanninnermik taamaattumik nittaavigisarparput? Biibilip inassutaa malipparput: „Ajorsartut ajunngitsuliorfigikkit, sapinngikkuit ikiuiumanngitsooqinak“? — Ussatit 3:27; Galâsiamiut 6:10.
Ilisimassutsimmi tungaatigut qanoq ippa? Pissutsip tamatuma malinniarnerata Biibilimik atuaqqissaartittassavaatigut taannami ilisimassutaavoq Guutimeersoq erlinnartoq. Tussiaat 119:98-100-mi ima allassimavoq: „Peqqussutivit akeqqannit ilisimatuunerulersippaanga uanni ittuinnaramik. Ilinniartitsisinnit tamanit ilisimassuseqarneruvunga eqqarsaatigiuartarakkit inassutitit. Silassorinneruvunga utoqqarnit maleruagassiatit maleruarakkit.“ Ussatit 3:18-mi ilisimassut ’orpittut inuunartutut’ taaneqarpoq. Ilisimassut pigilerutsigu pissuserlu tamanna inuunitsinni ersersillugu, Guutimit iluarisaalissagut inuunermillu naassaanngitsumik akilerneqarluta. — Nalunaajaasup oqaasii 7:12.
Naapertuilluassusermi? Silarsuarmi ajortumi guutiitsumilu naapertuilluassuseq pingaartorujussuuvoq Guutimut iluarisaassagaanni. Jesusip naapertuilluassuseq asavaa inatsisaatsuliornerlu uumigalugu. (Eprîarit 1:9) Ullumikkut kristumiut aamma taamaapput. Naapertuilluassutsip pissutsinik eqqortunik pingaartitsinissaannik kaammattortarpai. Silarsuarmi inooriaatsit naapertuilluanngitsut ingalassimaniartarpaat Guutillu piumasaanik iliornissartik inuunerminni pingaarnertut isigalugu. — 1 Juánase 2:15-17.
Tamatta pissaanermik imaluunniit nukimmik pigisaqarpugut. Pinngortitaanitsinniit timikkut ilisimassutsikkullu anersaakkut nakuussuseqarpugut, kristumiutullu ineriartornerput ilutigalugu anersaakkut nakuussuserput alliartortarpoq. Jehovap anersaaminik illernartumik tunisinermigut nukipput allisittarpaa, naak sanngiippasikkaluarluta, Jehovap piumasaanik naammassinnissinnaalersilluta. Paulus oqarsimavoq: ’Tamaasa pissatsitsisikkut sapinngilakka.’ (Filípimiut 4:13) Nakuussut tamannarpiaq pisinnaavarput Jehova anersaavanik qinnuigigutsigu.
Nutaarsiassap nuannersup oqaluussissutigineqarnera
Guutip pissusii pingaarnerit sisamat malikkivut ersarissumik ersissaaq inassut una maleruarutsigu: „Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit, ajoqersorsigillu ilissinnut peqqusakka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggatissaanut allaat.“ (Matîuse 28:19, 20, NV) Ajoqersuineq tamanna tusaajumasunut inuunermik naleqassaaq. Nutaarsiassamik nuannersumik oqaluussinerput inoqatitsinnut aallaqqaammut takornartarisimasatsinnut asanninneruvoq angisooq.
Ajoqersuineq tamanna ilisimassutip aqqutigaa. Ataavartussamik kinguneqassaaq. Suliaq suna alla pillugu ima oqartoqarsinnaava: ’Taamaaliorlutit annatsikkumaaravit tusartitillu annatsikkumaarlugit’? (1 Timûtiuse 4:16) Ajoqersuganngortitsiortornermi minnikuusoqarneq ajorpoq. Tusartut ajoqersuisullu naassaanngitsumik pilluaqqusaassapput.
Naapertuilluassuseq pillugu kristumiut ilinniartitatik najoqqutassianik ajunngitsunik naapertuilluartunillu Biibilimeersunik ilinniartittarpaat. Jehovamut, ’Guutimut eqqartuussisumut’ kiffartulernissaannut ikiortarpaat. (Malaki 2:17) Ullumikkut Jehova kiffartorfiginiarlugu inuunerminnik tunniussilluinnarsimasut aalajaattullu, iluartuutitaassapput Harmagedonimilu annallutik. — Rûmamiut 3:24; Jâko 2:24-26.
Nutaarsiassap nuannersup silarsuarmi tamarmi oqaluussissutigineqarnera pissaanermik angisuumik takutitsineruvoq. (Matîuse 24:14) Oqaluussiffinni amerlanerit tusaajumanngiffigisaanni oqaluussiuaannassagaanni qasusuittariaqarpoq. Anersaamigulli illernartukkut Jehovap nukissaqartittuarpaatigut naggatissaq tikillugu qasusuinniassagatta. — Jesaja 40:30,31; Matîuse 24:13; Lúkarse 11:13.
Adamip kinguaavisut naammaalluinnanngitsutut pissutsit tamakku tamakkiisumik ersersissinnaanngilavut. Puiunngisaannartiguli inuk Guuti assilillugu pinngortitaammat. Annerusumik Guuti malinniartuaannarutsigu pinngortitaanitta siunertaa ilaatigut naammassissavarput. (Nalunaajaasup oqaasii 12:13) Sapinngisarput tamaat atorlugu iliuuseqarniarutta ajortulioraangattalu isumakkeerfigineqarnissatsinnik qinusarutta, Guutip silarsuassaani nutaami naapertuilluartumi inuunissarput neriugisinnaavarput — naggataatigullu naammalluinnartunngussalluta. Taamanikkussamut nunami paratiisiusumi Guutip pissusiinik tamakkiisumik malinnittunik inulimmi inuusinnaassaagut. Nuannissusissaa! Naggataatigullu inuit tamakkiisumik ’Guuti assigilissavaat’. (wD 1/4 94)
[Qupp. 24-mi assiliartaq]
Jesusip takutissimavaa qanoq ililluta Jehovap pissusii ineriartortissinnaagivut
[Qupp. 26-mi assiliartaq]
Naggataatigut inuit ’Guuti assigilissavaat’ oqariaatsip tamakkiisumik isumaatut