Unnersuussutit tatiginartut sumi nassaarineqarsinnaappat?
„[JEHOVA], nalunngilara inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriarnissanilu. Misillertitsigut, [Jehova].“ - Jeremia 10:23, 24.
Biibilimik allattup Jeremiap oqaatsit taakku ukiut 2500-t matuma siorna allappai. Ukiut tuusintillit inuit unnersuussutaannik misiligaareernerup kingorna inuiaat atugarliornerata takutippaa oqaatsit taakku assortugassaanngitsut. Aperisoqarsinnaavorli: ’Unnersuussutit tatiginartut sumi nassaarineqarsinnaappat?’
Allassimaffiup qulaani issuarneqartup tikkuarpaa inunnik qutsinnerusoq tatiginartumik unnersuussisinnaasoq aqutsisinnaasorlu — inuup pinngortitsisua, Jehova Guuti. Inuup pissusiinik pisariaqartitaanillu Pinngortitsisoq tamanit ilisimasaqarnerpaavoq. Guutilli unnersuukkusullutalu aqukkusuppaatigut? Qanoq illilluni taamaaliortarpa? Unnersuussutai ullutsinni atorneqarsinnaappat?
Guutimik siulersorneqartussatut Pinngortitat
Ilisimaneqarluarpoq inuk sananeqaatsikkut, piginnaassutsikkut qaratsallu tungaatigut uumasunik allaanerusoq. Uumasut iliuuserisartagaat tamangajammik misigissutsinit eqqarsaatigeqqaarnagit aqunneqartussatut pinngortinneqarsimapput. Inuit taamaanngillat. — Ussatit 30:24-28.
Uumasut qarasaanit allaasumik, inuup qarasaata annertunersaa immerneqarsimanngilaq. Guutip inuk nammineq piumassuseqartutut, silatussutsikkut aalajangiisinnaasutut pissutsinillu qutsinnerusunik soorlu asanninnermik, tukkussusermik, namminissarsiunnginnermik, naapertuilluassusermik ilisimassusermillu piginnaassusilerlugu pinngortippaa. Ilimanassava Guutip inuk taama piginnaassusileriarlugu qanoq atorluarnerusinnaaneranik unnersuutissanngikkaa? Guutip inuit siulliit toqqaannartumik unnersuuttarpai. (1 Moses 2:15-17, 19; 3:8, 9) Allaat inuit ajortulioreernerata kingorna Jehovap angutit arnallu aalajaatsut unnersuuttarpai, pingaarnerusumik Oqaatsini isumassarsiarititaasut Biibilimiittut aqqutigalugit. (Tussiaat 119:105) Taamaalillutik ulluinnarni inuunerminni ajornartorsiutiminnik pitsaasumik aaqqiisinnaapput.
Biibilip allanneqarnera Guutimik isumagineqartoq
Sooq Biibili unnersussisutut tatiginarpa? Paasissutissanik Guutip kisimi ilisimasaanik imaqarami. Inuup piunngikkallarneranili pisimasut oqaluttuarai. Assersuutigalugu nunarsuup inunnik inuuffigineqarsinnaanngorlugu piareersarneqarnera allaatigaa. (Mosesimik allakkat siulliit kapitali 1, 2) Ukiut 3000-it matuma siornagulli allataagaluarlutik, ullumikkut ilisimatusaatinut naapertuupput.
Inuit nalinginnaasumik nunarsuup ammalortuuneranik akuerinninnerat sioqqullugu, Biibilimi ima allassimavoq: „[Guutip] qilak avannarleq siaarsimavaa soqanngitsup qulaagut, nunarsuarlu nivinngarlugu silaannaannaasup qulaanut.“ (Job 26:7) Aammattaaq Bibilip allaatigaa „nunarsuaq tamaat qulangerlugu [Jehova] issiasoq, inuillu pillertatut ittut.“ (Jesaja 40:22) Guutip, Pinngortitsisup, kisimi tamakku allaatigisinnaavai.
Inuit siulittuisinnaasutut pinngortitaanngillat. Pinngortitsisulli Biibili aqqutigalugu siunissaq oqaluttuaraa. Guutip pruffiiti Jesaja isumassarsitillugu imminut pilluni ima allatsippaa: „Uanga Guutiugama, uanga kisima, ilumut Guutiugama, uattut ittoqanngilaq, tassaagama qangarsuarli nalunaarutiginnittoq qanoq pisoqarnissaanik, itsaanilli oqaatiginnittoq suli pinngitsunik.“ — Jesaja 46:9, 10.
Biibilip takutissimavaa suli pinngitsunik eqqorluaqqissaartumik siulittuisinnaanini. Assersuutigalugu inuiaat oqaluttuarisaaneranni ukiuni tusindilikkuutaani silarsuarmi pissaanillit pilertarneri uppittarnerilu siumut oqaluttuarineqarput. Siulittuutit maluginiarnartut taakku eqquunnissaat ukiunik hundredilikkuutaanik ilaatigullu ukiunik tuusintilikkuutaanik sioqqullugit allanneqarsimapput. Taamatullu eqqorluartigisumik ullutsinni pisut qanorlu kinguneqarumarneri siumut allaatigai. Biibilillu immikkut ittuussutigaattaaq inuit naammalluinnanngitsut naalakkersuisui Harmagedonimi, ’sorsunnissami Guutip ajugaqanngitsup ullussarsuani’ piiarneqalerpata aniguiffissamik tikkuussigami. Guutip Naalagaaffiata Erneranit, Jesus Kristusimit, aqunneqartup pisussat tamakku naammassissavai. — sarĸúmersitat 16:14,16; 17:9-18; Daniel kapitalit 2, 8.
Iluaqutaajuaannartoq — ajoqutaanngisaannartoq
Inuup ilisimassutaa naammalluinnartuunngilaq; taamaattumik siunnersuutai iluaqutaajuaannartuunngillat, naak ajunngitsumik siunertaqarsinnaagaluartut. Biibili taamaanngilaq. Guuti nammineerluni oqarpoq: „Uanga tassa [Jehova], Guutit, iluaqutaasunik ilinnik ajoqersuisoq, ingerlavissakkut ingerlatitsisoq. Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.“ — Jesaja 48:17, 18.
Inuunermi pingaarnerusunik salliutitsiniartuarnitsinni unnersuussutit Guutimeersut ikiortarpaatigut. Ullutsinni nunap piinik pingaartitsiffioqisuni anguniagaqartoqarfioqisunilu, Biibilip oqaappaatigut ’takussaasut pinnagit takussaanngitsut isigeqqullugit, takussaasummi naassaammata, takussaanngitsulli naassaanngimmata’. (2 Korintumiut 4:18) Taamaalilluta kusanarnerpaamik anguniagaqaqqulluta kajumissaarneqarpugut, ingammik anersaakkut, Guutip piumasaanik iliornitsinni anguniagaqarnissatsinnik, aaqqissuussinissamilu nutaassami inuuneq naassaanngitsoq pingaarnerpaatut anguniagaralugu. Kristumiup anguniagaq qutsissoq tamanna anguniagariguniuk, Biibilip unnersuussutaasa pissutsit aaqqissuussaaneranni ajortumi pitsaanerpaamik inuunissaanut ikiussavaa. Ullutsinni inuit ilisimassutaata inuit annikinnerpaamik sulinissaannik annertunerpaamillu pissarsinisssaannik kajumissaartarpaat. Akerlianilli Biibilimi allassimavoq: „Suliamini eqiasuttoq piitsunngortussaavoq, assaalli eqiasuitsut pisuunngortitsisarput.“ Apustilip Paulusip Epriiarimiut allaffigai: ’Isumalluarpugummi sumik ilerasuutigisaqarnata, tamatigut assuarnaatsutut iliorniaratta.’ — Ussatit 10:4; Eprîarit 13:18.
Biiblimi aamma ilaqutariinnut atoriaannaasunik unnersuussuteqarpoq. Aappariit iluanni uiusup nuliaasullu inissisimanerat aalajangersarpaa, taamatuttaarlu meeqqanik perorsaanissamut aqqutissiuussilluni. Allassimavoq: ’Angutit nuliatik asasariaqarpaat soorlu timitik. . . . Arnalli uini mianeriniarliuk. Ilissi meeqqat, angajoqqaasi naalassigik... Ilissilu angajoqqaat, qitornasi narrutsatseqinasigik, paariniarsigilli inertertarlugillu Naalakkami.’ Pinngortitsisup unnersuussutaasa qutsissut maleruarnerisigut ilaqutariittut patajaatsumik pilluarnartumillu inunneq anguneqarsinnaavoq. — Evfisumiut 5:21-6:4.
Guutip unnersuussutaanik maleruaasut toqqissisimasumik siunissaqarput
Guutip oqaasiata takutippaa Guutip inuiaat ajornartorsiutaat tamaasa aaqqiissutissaqartikkai. Qanittukkut Jehova Guutip pissutsit aaqqissuusaanerat maannakkut atuuttoq, anniartitsinerit, naapertuilluanngitsuliornerit naalliutsitsinerillu tamaasa ilanngullugit, peersissavaa, aaqqissuussinermillu naapertuilluartumik taarsissallugit. Tamakkua Biibilip 2 Pîtruse 3:7-10-mi allaatigai, versimilu 13 nangippoq: ’Unnersuutaalu naapertorlugu ilimagisaqarpugut qilassanik nutaanik nunassanillu nutaanik iluarsuseqarfissanik.’ Tamannalu ilaqutariinnut nutaarsiassaavoq nuannernerpaaq. Tamannarpiarlu Biibilip oqariartuutigaa Jehovallu Nalunaajaasuisa nunani qeqertanilu 200-nit amerlanerusuni oqaluussisssutigisaat.
Nunarsuaq tamakkerlugu Guutip piumasaa maleruarneqalerpat, Pinngortitsisup, Jehovap, unnersuussutai pitsaalluinnartut inuiaat iluaqutigilissavaat. Piitsuuneq, pinerluttuliorneq ikiaroorniutillu ajornartorsiutaajunnaassapput. Nappaatinik, utoqqalinermik toqumillu eqqugaasoqartarunnaassaaq. Inuiaat naammalluinnartunngussapput, soorlu siuaavut siulliit Guutip aqutsineranut pikitsitsinngikallaramik taamaassimasut.
Biibilip atuagartaasa kingullersaat Guutip unnersuussutaanik tunaarinnittut pilluassusiat oqaatigaa! sarĸúmersitat 21:4, 5-imi allassimavoq: ’[Guutillu] qullit tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassaaq, siulliit peermata.’ Pinngortitsisorput ima uppernarsaavoq: ’Ata, suut tamaasa nutaanngortippakka.’ Nangipporlu: ’Oqaatsit tamakku sallusuillutillu ilumoorput.’
Pilluaqqussutit tamakku pissagutsigit, Guutip sumik piumasaqarfigaatigut? Apustili Paulusip Guutip piumasaa nassuiarpaa: ’Inuit tamaasa annaqquai sallusuissummillu ilisarsileqqullugit.’ (1 Timûtiuse 2:4) Jehovap Nalunaajaasuisa Biibilimik atuaqqissaarnikkut ilisarsissummik ilinniarnissanut asannittumik kajumissaarpaatsit. Guutip piumasaanik ilinniartuarnikkut uppernarsissavat ilisimassut Guutimeersoq ulluni ajortuni tatigisassatuaasoq. Piffissaq sivikeqimmat maleruarnissaanut aatsaat taama pisariaqartigilersimavoq. (wD 15/4 94)