Inuusuttut — kia ajoqersuutaa malippisiuk?
’Ilaat uppernermik tunussiumaarput . . . anersaapiluit ajoqersuineri najoqqutariniarlugit.’ — 1 TIMÛTIUSE 4:1.
1. (a) Inuusuttut sunik qinigassaqarpat? (b) Jehova qanoq ililluni ajoqersuisarpa?
INUUSUTTUT ima aperiniarpavut: Kia ajoqersuutaa malippisiuk? Tassuuna erserpoq inuusuttut ilissi qinigassaqartusi. Qinigassasi marluupput, tassa Guutimit ajoqersorneqarneq qisuariarfigissanerlugu imaluunniit anersaapiluit ajoqersuineri malissanerlugit. Jehova oqaatsini, Biibili, kiisalu kiffani nunarsuarmi imminut sinniisuutitani aqqutigalugit ajoqersuisarpoq. (Jesaja 54:13; apustilit suliait 8:26-39; Matîuse 24:45-47) Tupaallatigaasiulli aamma anersaapiluit ajoqersuisarnerat?
2. Sooq anersaapiluit ajoqersuineri ingammik ullumikkut mianersuutiginissaat pingaartigaa?
2 Apustili Paulus ima allassimavoq: ’Ullussani kingullerni ilaat uppernermik tunussiumaarput anersaat tammartitsisut anersaapiluillu ajoqersuineri najoqqutariniarlugit.’ (1 Timûtiuse 4:1) ’Ullussani kingullerni’ Satanip anersaapiluisalu ulappuseruttorfianni inuugatta sooq ima aperisugut paasisinnaavisiuk: Kia ajoqersuutaa tusaaniarpisiuk? (2 Timûtiuse 3:1-5; sarĸúmersitat 12:7-12) Satan anersaapiloqataalu periaatsimikkut peqqusersuujullutillu nakkutitsiniallaqqeqimmata apeqqutip tamatuma eqqarsaatigieqqissaarnissaa pingaartorujussuvoq. — 2 Korintumiut 11:14, 15.
Anersaapiluit ajoqersuinerilu
3. Anersaapiluit kikkorpiaappat, suna siunertaraat tamannalu anguniarlugu qanoq iliortarpat?
3 Anersaapiluit Jehovamut inngiliusimagaluarput, Pinngortitsisuminnulli pikitsitsisimapput Satanimillu tapersersuisunngorsimallutik. (Matîuse 12:24) Taakkua siunertaraat inuit ajortunngortinnissaat Guutimullu kiffartorunnaarsinnissaat. Tamanna anguniarlugu inuit ajoqersuisui atorlugit inooriaatsimik namminissarsiortumik kanngunartumillu Jehovap ajorisaanik siuarsaasarput. (Naleqqiuguk 2 Pîtruse 2:1, 12-15.) Aalajaallutik inngiliusimagaluartut qanoq ilillutik anersaapilunngorsimanerat misissorukku ajoqersuutaat inooriaaserlu ajoqersuutinik tamakkuninnga siuarsarneqartoq suussusersisinnaanerulissavatit.
4. (a) Sooq inngilit naalanngitsut Noap nalaani nunarsuarmut pisimappat? (b) Inngilit ajortut kinguaavilu ulersuarmi qanoq pippat?
4 Noap nalaani inngilit ilaat inuit paniinik pinnersunik ajuutiginnileramik qilammi inissartik qimallugu nunamut pisimapput. Arnaniik kinguaassiuutitigut atoqaramik akusanik Nefiliminik taaneqartunik meerartaarput. Pinngortitat anersaajususut inunnik aappaqarnerat pissusissamisuunngimmat inngilit taakku arnat ilagalugit naalannginnerat kingorna Sodomami angutit nukappiaqqallu atoqatigiittarsimanerattulli ajortigaaq. (1 Moses 6:1-4; 19:4-11; Jûtarse 6, 7) Inngilinik aappaqarneq kinguaajusut akusat ilanngullugit ulersuarmi suujunnaarsinneqaraluartoq inngilit ajortut inuttut timitik qimaannarlugit qilammut uterput tassani anersaapilunngorlutik Satan Diaavulumut malinnittaasut. — 2 Pîtruse 2:4.
5. Anersaapiluit suuppat, qanorlu ilillutik Guutip inatsisaanik ajortisaariniarpat?
5 Oqaluttuarisaanikkut tunuliaqutaq tamanna tunngaviglaugu paaisinnaalerpisiuk anersaapiluit sorpiaasut? Tassaapput kinguaassiuutitigut kanngunartuliorumatuut inunnut takussaanngitsut silarsuarmik kinguaassiuutitigut kanngunartuliorfioqisumik sunneeqqasut. Inuttut timeqaleqqissinnaajunnaarsitaasimagaluartik nunarsuarmi ajortunngortissinnaasamik kinguaassiuutitigut kanngunartuliorneri nuannaapiluutigisarpaat. (Evfisumiut 6:11, 12) Anersaapiluit Jehovap minguissuseq ileqqussallugit pillugit inatsisaanik ajortisaariniarsarisarput pisariaqanngitsumik killilersuisutut isikkoqalersinniartarnerisigut. Anersaapiluit ajortut taakkua kinguaassiuutitigut kanngunartuliorneq inooriaatsitut pissusissamisoortutut nuannersutullu isikkoqartinniarpaat.
Anersaapiluit ajoqersuineri siuarsarneqarput
6. Sooq tupaallaatigisariaqanngilaq anersaapiluit malunnanngitsumik periaaseqarlutik ajoqersuisarmata?
6 Anersaapiluit ajoqersuutiminnik peqqusersuumik periaaseqarlutik siuarsaasarnerat tupaallannanngilaq, tassami aamma siuttuat, Satan Diaavulu, Evamik salloqittaagami periaaseqarsimammat. Eqqaamajuk Eva oqaluffigigamiuk ikiuerusuppasissutut nipeqarsimammat. „Ilumununa Guutip naatsiiviup orpiisa arlaannaalluunniit neriffigeqqunngikkaa?“ Satan aperisimavoq. Taava peqqusersulluni Guutip ajoqersuutaa ajortumeerniarpaa Eva oqaluttuullugu orpimmit neriffigeqqusaanngitsumit neriguni iluaqutigiinnassagaa. „Naamik, toqussanngivippusi,“ Diaavulu neriorsuivoq, „Guutiuna taama oqartoq nalunnginnamiuk neriffigigalurussiuk isisi uisitaajumaartut Guutisullu ilerumaartusi ajunngitsoq ajortorlu nalujunnaassallugit.“ (1 Moses 3:1-5) Taamaalilluni Eva usserneqarpoq, aap tammartinneqarpoq, Guutimut naalannginnissaminut. — 2 Korintumiut 11:3; 1 Timûtiuse 2:13, 14.
7. Anersaapiluit peqqusersuumik ajoqersuineri qanoq kinguneqarsimappat, taamaattumillu qanoq mianerasortariaqarpugut?
7 Ullumikkuttaaq amerlasuut tammartitaasarput. Anersaapiluit kinguaassiuutitigut kanngunartuliornermik ima peqqusersuutigisumik siuarsaasimapput allaat tamatuminnga iluarinninngissimagaluartut akuersaartunngortissimallugit. Assersuutigalugu USA-mi aviisit ilaanni siunnersuisartoq ilisimaneqarluartoq allakkat katissimanngitsut atoqatigiittarnerat pillugu apeqqutilliisut akigamigit ima allassimavoq: „Isumaqarsimagaluarpunga apeqqummut tamatumunnga isumaga allanngunngisaannassasoq, isumaqalersimavungali katinnissaminnik eqqarsaateqartut katinnginnerminni marluinnaallutik angalaqatigiillutik misiligaqqaartariaqartut ataasinngorsinnaanertik paasiniarlugu.“ Oqaatsiniilu ima ilavai: „Upperisinnaangilara taamatut allassinnaagama!“ Naak upperisinnaassanngikkaluaraa kanngunartuliornissaq siunnersuutigisimallugu, ilumut taamaalirpoq! Taamaattumik ersarippoq mianersortariaqartugut anersaapiluit ajoqersuineri iliuutsinut Guutip iluarinngisaanut isiginninnitsinnut sunniuteqaqqunagit. — Rûmamiut 1:26, 27; Evfisumiut 5:5, 10-12.
8. (a) Oqaaseq ’silarsuaq’ Biibilimi sunut atorneqartarpa? (b) Silarsuaq kia aquppaa, Jesusimillu malinnittut silarsuaq qanoq isumaqarfigisariaqarpaat?
8 Puigunngisaannassavarput Satan ’silarsuup matuma naalagarimmagu’. Apustilimi Johannes oqarsimavoq ’silarsuaq tamaat ajortup pissaaneqarfigigaa’. (Juánase 12:31; 1 Juánase 5:19, NV) Jesusip oqaaseq ’silarsuaq’ atortarsimavaa inuiaat tamaasa eqqartoraangamigit. (Matîuse 26:13; Juánase 3:16; 12:46) Oqaaserli ’silarsuaq’ atoraangamiuk amerlanertigut pisarpai inuiaqatigiit aaqqissuussaasut kristumiut ilumoortut ilagiivisa avataanniittut. Assersuutigalugu oqarsimavoq malinnitsini ’silarsuup matuma [inuiaqatigiit naapertuilluanngitsut] ilaginngikkai’ aammalu silarsuarmut ilaanngimmata silamiut uumissussagaat. (Juánase 15:19; 17:14-16) Aamma Biibilimi mianersoqqussutigineqarpugut silarsuarmut Satanimit aqunneqartumut ikinngutaanaveersaaqqulluta. — Jâko 4:4.
9, 10. (a) Silarsuarmiittut suut kinguaassiuutitigut eqqunngitsumik perusussuseqalersitsisarpat? (b) Silarsuarmi aliikkutassiatigut ajoqersuinermut tunuliaqutaasut qanoq ililluni kinaassusersineqarsinnaappat?
9 Apustili Johannes ima kajumissaarivoq: ’Silarsuarluunniit silarsuulluunniit pii asaqinasigi.’ Aamma ima oqarpoq: ’Silarsuarmiittummi suut tamarmik, uinimmut pilerinartut isinullu pilerinartut usorsitsaarutillu inuunerup matuma pii, Ataatamit pinngillat.’ (1 Juánase 2:15, 16) Eqqarsaatigieriassagit. Ullumikkut silarsuarmi suut kukkusumik kissaateqalersitsisarpat, soorlu kanngunartuliornissamik? (1 Tásalûníkamiut 4:3-5) Silarsuarmimi nipilersukkat ilarpassui? Californiami politeeq arnaq ima oqarsimavoq: „Nipilersukkat kajumissaarisarput angajoqqaanut naalannginnissamik piumasamillu inuunissamik.“ Nipilersukkani taama ittuni ajoqersuinermut ersersinneqartunmut kina tunuliaqutaanersoq ilisarisinnaasarpiuk?
10 Eqqaamajuk Satanip sunniutilimmik Eva ima kajumissaarsimammagu: ’Arajutsisaqarputit. Piumasannik inuuniarit. Suna ajunngitsuusoq sunalu ajortuusoq nammineq aalajangertarniaruk. Guuti tusarnaartariaqanngilat.’ (1 Moses 3:1-5) Silarsuarmi nipilersukkat taamatorluinnaq kajumissaarisannginnerpat? Anersaapiluilli ajoqersuinerminni nipilersugaannaat atortanngilaat. Aamma tv-kkut isiginnaagassiat, filmit videollu ajoqersuinerminni atortarpaat. Qanoq ilillutik? Silarsuarmi isiginnaagassiatigut tamakkunuunatigut isiginnaaritsisartut Guutip ajoqersuutaata ileqqoreqqusaanik sumiginnaasut takutinneqartarput. Kanngunartuliorneq pingaartinneratigut kajuminnartutullu saqqummiuttarneratigut illersortarpaat.
11. Ileqqussat tungaannit isigissagaanni tv-kkut suut ajoqersuutigineqarajuppat?
11 Atuagassiami U.S.News & World Report-imi ima allassimasoqarpoq: „[USA-mi] 1991-imi aallakaatitsivinni pingasuni atoqatigiinnermut tunngasortallit 10.000-init amerlanerusut nalunaaquttap-akunnerini isiginnaartroqarfiunerpasartuni takutinneqarsimapput; ||wed 14 scenes of sex outside marriage.” Akuerineqarsinnaanngitsumik atoqatigiinnerit 9.000-init amerlanerusut ukiumi ataatsimi takutinnerisigut sumik ajoqersuussisutut tv oqaatigisinnaavarput? Barry S. Sapolsky, nalunaarusiamik „Atoqatigiinneq tv-mik isiginnaarfiunerpaap nalaani: 1979 1989-ilu imminnut sanilliullugit“-mik qulequtalimmik atuakkioqataasoq, ima akivoq: „Inuusuttup ukiorpassuarni tv-kkut isiginnaagaassiat sammerujoornertallit imaluunniit kanngunartuliornertallit isiginnaartarsiguniti assilissat tuusinitilippassuit tamakkut ilinniartissavaat atoqatigiinneq nuannersuusoq kingunipiloqarsinnaangivillunilu.” Manna qularutissaanngilaq: Silarsuarmi aliikkusersuinikkut inuusuttut ilinniartinneqarput najoqqutassaqanngitsoq, kanngunartuliorneq akuerisaasoq Guutillu iluarinngisaanik inooriaseqarneq ajortumik kinguneqarnavianngitsoq. — 1 Korintumiut 6:18; Evfisumiut 5:3-5.
12. Silarsuarmi aliikkutassiat sooq ingammik kristumiunut inuusuttunut ulorianarpat?
12 Silarsuarmi nipilersukkat, filmit, viseot tv-kkullu isiginnaagassiat inuusuttunut kajumissaarisuupput. Tamakkunuunatigut anersaapiluit ajoqersuineri ajortut siaruarterneqartarput! Tamannali tupaallaatigisariaqarpa? Eqqarsaatigeriassagit. Eqqunngitsumik upperisarsiorneq politikkilu Satanip silarsuaanut ilaasimappata — soorlumi ersareqisumik taamaattoq — taava isumaqartoqarsinnaanerpa aliikkusersuineq silarsuarmit pisoq anersaapilunnit sunnersimaneqassanngitsoq? Ingammik ilissi inuusuttut mianersornerusariaqarpusi ’silap matuma inui ileqqoqatiginaveersaarlugit’.” — Rûmamiut 12:2.
Imminut misissorit
13. Qanoq imminut misissortariaqarpa?
13 Kia ajoqersuutaa malinnerissi oqaatsissiguinnaanngitsoq aammattaarli iliuutsissigut takuneqarsinnaassaaq. (Rûmamiut 6:16) Taamaattumik immissinnut ima apereriaritsi: ’Ileqqukka inooriaaseralu silarsuup isiginnaagassiaasigut ippinnartumik sunnerneqarsimappat? Anersaapiluit ajoqersuineri inuuninni malunnaateqalersimappat?’ Apeqqutit taama ittut akiniarlugit piffissaq Biibilimik atuaqqissaarnermut, kristumiut ataatsimiittarnerinut najuuttarninnut oqaluussisarninnullu atortagarsi piffissamut tv-mik isiginnaarnermut, nipilersukkanik tusarnaarnermut, timersuummut nuannarisannut sammisassanulluunniit tamakku assigisaannut atortakkassinnut sanilliussinnaavarsi. Piffissaq taagorneqartunut atortagarsi annertuppat taava inuunersi tamarmi navianartorsiorsimassaaq, ilumoorlusilu immissinnut aaqqissuuteqqittariaqassaasi. — 2 Korintumiut 13:5.
14. Anersaakkut peqqissuserput sunit sunnerneqarsinnaava, sunalu eqqaamasariaqarparput?
14 Nalunngilluinnarparsi nerisassi timikkut peqqissusersi sunniuteqarfigisaraat. Taamatuttaaq anersaakkut peqqissusersi isumassinnut uummatissinnullu immiussuussassinnit sunnerneqartarpoq. (1 Pîtruse 2:1, 2) Sorpiaat soqutiginerlugit imminut salloqittarsinnaavutit, Eqqartuussisorpulli, Jesus Kristus, salloqittarsinnaanngilat. (Juánase 5:30) Taamaattumik immissinnut apereriaritsi: ’Jesus nunamiittuuppat ininnullu iserluni nipilersukkat tusarnaartakkakka tusaallugit imaluunniit tv-mi isiginnaagara takullugu peqqusiileqissutissaqassalunga?’ Iluamilli oqaatigalugu ilumut Jesusip takusinnaavaatigut iliuutsivullu nalunagit. — sarĸúmersitat 3:15.
Anersaapiluit ajoqersuineri tunuartikkit
15. Sooq anersaapiluit ajoqersuneri tunuartinniarlugitassoroortariaqarpa?
15 Anersaapiluit ajoqersuinerminnik inuusuttunik malinnitsitsilerniarlutik ilungersuutaat annertoorujussuupput. seem to offer a life of immediate gratification — one of fun and pleasure. Guutip iluarisaanik iliorniarniarluni itsaq Mosesip Faraop inoqutaanut ilaasutut ’nuannaarneq naajasoq ajortip pia’ tunuartittarsimavaa. (Eprîarit 11:24-27) Anersaapiluit neqeroorutaannik itigiartitsiniarneq oqitsuunngilaq, taamaattumik eqqortumik iliorniarlutit sakkortuumik akiuuttariaqarputit. Taamaappoq ingammik pissutigalugu ajorti kingornussimagatsigu uummatittalu ajortumik iliortinniartarmatigut. (1 Moses 8:21; Rûmamiut 5:12) Ajortilittut ilioriartarneq pissutaalluni allaat Paulus imminut sukannerfigisarsimavoq timikkut kissaatini ajugaatikkumanagit. — 1 Korintumiut 9:27; Rûmamiut 7:21-23.
16. Kanngunartuliortinniarneqarnertik inuusuttut qanoq ilillutik itigartissinnaavaat?
16 ’Amerlanerusutut iliornerannut ajortumut maleruutiinnarnissannut’ usserniarneqarussi Guutip ikiorsinnaavaasi taamaaqatissi ajortumik iliortitsiniarneri naaggaarsinnaaqqullugit. (2 Moses 23:2; 1 Korintumiut 10:13) Guutip ilitsersuussutai tusarnaartariaqarpasi, oqaasii uummatissinni toqqorlugit. (Tussiaat 119:9, 11) Paasisariaqarpat inuusuttuaqqat kisimeeqatigiikkaangamik kinguaassiuutitigut perusussuseqalersinnaasartut taamaalillutillu Guutip inatsisaanik unioqqutitsisinnaallutik. „Peerara kisimeeqatigigaangakku timikkut perusussuseqalertarpunga qaratsama allat iliornissannik oqaluukkaanga,“ inuusuttuaraq niviarsiaraq ataaseq nassuerpoq. Taamaattumik killissarsi ilisimaniarsiuk paasillugulu uummatersi tatigisassaanngitsuusoq. (Jeremia 17:9) Immikkoorniarsarisassanngilasi. (Ussatit 18:1) Set limits on expressions of affection. Aammalu pingaartorujussuuvoq Jehovamik asannittuinnarnik taassumalu inatsisaanik ataqqinnittuinnarnik kammalaateqarnissaq. — Tussiaat 119:63; Ussatits 13:20; 1 Korintumiut 15:33.
17. Anersaapiluit ajoqersuinerinut tunuartitsiniarnerminni inuusuttut kristumiut suut nakussatsissutigisinnaavaat?
17 Kristumiut atuagassiaataannik anersaakkut nukittorsaatissassitut sananeqarsimasunik atuaqqissaartarneq iluaqutigissavarsi. Assersuutigalugit atuagassiami Iteritsi!-mi ilanngutassiat „Inuusuttut aperipput . . .“ atuakkamilu pâratîsime nuname nâgssáungitsumik inûsinauvutit-mi kapitali „erĸortumik iliornigssamut ilungersorneĸ“ atuarsinnaavasi. Biibilimi unnersuussutit isumassigut uummatissigullu aalajangiunniarsigik, nakussatsissutigissavasilu. Aammali puigunngisaannassavarsi silarsuarmi anersaapilunnit aqunneqartumi maani eqqortumik iliorniarneq oqitsuunngimmat. Taamaattumik assoruullusi akiuunniaritsi. (Lúkarse 13:24) Anersaakkut nakussassarniaritsi. Amerlanerit iliuusiinut maleruutiinnartut sanngiitsut qunutuullu malinnaveersigik.
Guutimit ajoqersorneqarneq iluaqutigisiuk
18. Guutip ajoqersuineranik malinninneq qanoq iluaqutaasarpa?
18 Aammalu eqqaamassavarsi Jehovap ajoqersuineranik malinninnissigut silarsuarmi arlaannik nalilinnik arajutsisaqarnavianngivikkassi. Guutimmi asavaasi, taamaattumillu „iluaqutaasunik ilinnik ajoqersuisarpoq’. (Jesaja 48:17) Taamaammat Jehovap ajoqersuinera malinniarsiuk taamaalillusilu ilerasuuteqarnermik anniaateqarnissaraluarsi, imminut ataqqinermik annaasaqarnissaraluarsi, naartulersoornissaraluarsi, kinguaassiuutitigut nappaatinik tunillatsinnissaraluarsi allatulluunniit alianartumik eqqugaanissaraluarsi pinngitsoorlugu. Jehova nuannaartaqaaq kiffani Satanimut akissutissarileraangamigit, taanna oqarsimammat misilinneqarnerminni Guutimut aalajaattuaannarnavianngitsut. (Job 1:6-12) Jehovamut aalajaannikkut taassuma uummataa nuannaartittarukku taava silarsuarmut matumunnga eqqartuussutini naammassippagu, inatsisiminik asissuisut tamaasa suujunnaarsillugit, aniguiumaarputit. — Ussatit 27:11; 1 Korintumiut 6:9, 10; 1 Juánase 2:17.
19. Jehovap ajoqersuinerata iluaqutaassusianik qujamasuutiginnittunik kammalaateqarneq qanoq iluaqutaasarpa?
19 Inuit Jehovap imminnut iliuuserisimassanik qujamasuutiginnittut qanimut attaveqarfigisarukkit misilittagaat ilinniarfigisinnaavatit. Siornatigut ikiaroornartunik pinngitsoorsinnaasimanngikkaluartoq kanngunartuliortarsimagaluartorlu ima oqarsimavoq: „Jehova tusarnaarsimanngitsuugukku toqoreersimassagaluarpunga. Uigigaluara AIDS-imi toqquteqarpoq. Qanimut ikinngutigisimasakka silamiut tamarmik AIDS-imik toqquteqarnikuupput imaluunniit toqujartorlutik. Ilaannikkut aqqusinerni takusarpakka, ullullu tamaasa Jehoca qutsavigisarpara inatsisai innuttaanik siulersuisut malikkaannilu minguitsuutitsisartut pillugit qutsavigisarpara. Inuuninni aatsaat taama pilluartigalungalu nalerisimaartigalungalu toqqissisimatigaanga.“ Ilumummi Jehovap ajoqersuinera malikkaangatsigu iluaqutigisaqaarput!
Eqqortumik qinersigit
20, 21. (a) Inuusuttut sunik marlunnik qinigassaqarpat? (b) Guutip ajoqersuutaanik malinninneq qanoq kinguneqassava?
20 Inuusuttut ilissi ima kajumissaarumassi: Jehovap kiffartuunneratigut eqqortumik qinersigitsi. Aalajaallusilu aqqutikkut tassuunakkut ingerlajuaannaritsi. (Josua 24:15) Ilumut oqaatigalugu qinigassani marlunni ataasiinnaq qinersinnaavarsi. Jesusip aqqut silittoq inissaqarluartorlu eqqartorsimavaa — nammineq iluarisamik iliornissamik ajornanngitsoq. Aqqut tamanna toqumut, suujunnaarsitaanermut, sammivoq. Aqqutip aappaa amippoq. Aqqutaavoq maani silarsuarmi kanngunartumik inooriaaseqarfiusumi anersaapilunnillu aqunneqartumi aqqutigissallugu ajornakusoortoq. Tassuunali ingerlasut Guutip silarsuassaanut nutaamut nuannersumut naggataatigut isissapput. (Matîuse 7:13, 14) Ilissi aqqutikkut sorlikkut ingerlarusuppisi? Kia ajoqersuutaa malikkusuppisiuk?
21 Jehova namminnissinneq aalajangiisinniarpaasi. Kiffartorfigeqqulluni pingitsaalinianngilaasi. „ilissinnut saqqummiuppakka inuussut toqulu,“ Guuti pruffiitimut Mosesimut oqarsimavoq, imalu kajumissaarilluni: „Inuussut qinerniarsiuk.“ Tamanna qinerneqartarpoq ’Jehova Guutimik asanninnikkut, naalannikkut attavinnittuarnikkullu’. (5 Moses 29:2; 30:19, 20) Qanortoq Guutip ajoqersuutaanik malinninneq silatusaartumik qineruk Guutillu silarsuassaani nuanneqisumi inuujuarnissat angullugu. (wD 15/5 94)
Qanoq akissavit?
□ Anersaapiluit kikkuuppat, sunillu ajoqersuuteqarpat?
□ Anersaapiluit ajoqersuinertik ullumikkut qanoq siuarsarpaat?
□ Anersaapiluit ajoqersuinerinik tunuartitsinissaq qanoq ililluni ajornanngila?
□ Anersaapiluit ajoqersuinerinik itigartitsineq qanoq iluaqutaasarpa?
[Qupp. 16-mi assiliartaq]
Ulersuup siorna inngilit naalanngitsut kinguaavilu nakuusernermik inuunerlunnermillu siuarsaasimapput
[Qupp. 18-mi assiliartaq]
Nipilersukkat nuannarinerpaasatit Jesusip tusartuuppatigut peqqusiileqissutissaqassagaluarpit?