Sooq upperisarsiorneq soqutigisariaqarparput?

NUNARSUAQ tamakkerlugu upperisarsiornermik soqutiginnittoqarpoq. Aammali inuppassuit miserratiginngilaat upperisarsiorneq soqutiginngivillugu. Taamatulli isumaqartuaannarsimanerpat?

Inuk ima pinngortitaavoq timip piisiguinnaq nalerisimaarnivik angusinnaanagu. Inuit aamma anersaakkut pisariaqartitsipput. Ulluinnarnisut inuuginnarnerup timikkut pisariaqartitaannaanerusunik naammassinniffiusup, ilaannikkullu aliikkutaqarfiusartup, inuup pisariaqartitai ilorliunerusut matusinnaanngilai. Uumasut assiginagit inuit makku paaserusuttarpaat: ’Inuuneq sumik siunertaqarpa?’ ’Inuuneq manna sivikitsoq, nuannersunik aammali nuanniitsunik imaqartoq, tassa tamarmi?’ Illit taama aperisimavit?

Ullumikkulli inuit millionilikkuutaat upperisarsiornermik soqutigisaarulluinnartitsisunik avatangiiseqarlutik alliartorsimapput. Angajoqqaaminnit, ilinniartitsisuminnit, kammalaatiminnit imaluunniit allaat naalakkersuisunit taama sunnertissimapput.

Skalabrino, angut inuusuttoq Albaniamiu, nassuiaavoq kommunistit naalakkersuineranni inuit Guuteqannginneranik ilinniartitaasimasut. Allaat upperisarsiornermik oqaluuserinnissalluni navianartorsiornarsimavoq; taamaaliortut parnaarussaasinnaasarsimapput. Kisianni 1991-imi Schweizimi qimaasutut najugaqalerami Skalabrino Biibilimik atuaqqissaarnissamut kajumissaarneqarsimavoq. Tamannalu akuerisimavaa. Sooq?

Albaniamiitilluni tusarsimavaa atuagaqartoq Biibilimik taagutilik, naluilluguli sunaasoq. Taamaattumik aallaqqaataani Biibili pillugu paasisaqarusussuseqanngikkaluarpoq. Oqaluttuunneqarami Guutip inunnik nunarsuarmillu siunertaa pillugu atuaqqissaarsinnaalluni isumaqarportaaq tamaanimiut oqaasiinik ilinniarnissaminut periarfissaasoq. Erniinnarli paasilerpaa ilinniakkami anersaakkut qamuuna pisariaqartitani matugai. Uummatikkut killitseqaaq paasigamiuk Guuti silarsuassamik nutaamik eqqissineqarfiusumik amigaateqanngiffiusumik inuit naassaanngitsumik inuuffigisinnaasaannik neriorsuisoq. Paasileramiullu nammineq ilaquttanilu silarsuassami tamatumani inuulernissaminnut periarfissaqarlutik assut soqutiginnilerpoq. Tusakkani nuannersut tamakku kisimi pigiumanagit ilaquttani Albaniamiittut sianerfigigasuarpai oqaluttuunniarlugit.

Aleksei Ruslandimi najugaqartoq aamma tupigusoqaaq paasileramiuk Biibili pillugu eqqortumik paasisaqarneq inuup inuuneranut qanoq sunniuteqartigisinnaasoq. Ajornartorsiutit artorluinnaleramigit inuunerlu sumik siunertaqarnersoq nassuiaammik naammaginartumik nassaarsinnaannginnami imminornissani pilersaarutigilersimavaa. Taamaaliortinnanili Finlandiliarpoq ikinngutini pulaarniarlugu. Qimuttuitsunut ilaalluni ilaaqatimi ilaat ajornartorsiutiminik oqaluttuuppai. Taakkua ilaasa, Jehovamut nalunaajaasuusup, Biibilimik atuaqqissaarnissaanik kajumissaarpaa tassani ajornartorsiutinut taamaattunut aaqqiissutissaqarmat. Aleksei nalornivoq. Angerlamut uternermini assingusumik misigisaqarpoq. Maanna nalunaajaasut ilaata allap oqaluttuuppaa nammineq taama ajornartorsiuteqarsimagaluarluni Biibilili ikiortigalugu qaangersimallugit. Aamma taassuma kajumissarpaa Biibilimik atuaqqissaarnissaanik. Angerlamut apuummat oqarasuaat sianerpoq. Tassaana ikinngutaasa ilaat nalunaajaasunik atuaqqissaaqateqalersimasoq nuannaaqaluni sianertoq. Alekseip ilimagilerpaa immaqa pisariaqartitani Biibilimi nassaarineqarsinnaasut, nalunngilaali ikiorteqarani paasisinnaanagu. Angerlarsimaffimmini akuttunngitsumik Jehovap nalunaajaasui ilagalugit Biibilimik atuaqqissaarnissani akueraa, nalunaajaasullu ataatsimiinnerinut najuuttalerluni. Erniinnarlu paasivaa sooq inuit inuunerminni Biibilip ajoqersuutaanik tunngaviginnittut pilluartut naak inuttut allatut ajornartorsiuteqartaraluarlutik.

Nalunagu inuit qanoq pinngortitaasut Jesus Kristus ima oqarsimavoq: ’Timiusaannaq inuup inuussutiginngilaa.’ (Matîuse 4:4) Aamma oqarsimavoq. „Pilluarput anersaakkut pisariaqartitaqarnerminnik miserratiginninngitsut.“ (Matîuse 5:3, NV) Pilluarput anersakkut pisariaqartitatik miserratiginngilluinnaramikkik, matussutissinnissaannut iliuuseqaramik Guutimillu pilluaqquneqaramik. Kisianni anersaakkut pisariaqartitavut naalagiartarnerinnakkut matussutississinnaanngilavut. Upperisarsiorneq ileqqulersuutaannarnik imalik immaqa misigissutsikkut sunniuteqarsinnaavoq, inuunermili ajornartorsiutinut piviusorsiortumik aaqqiissutissiisinnaanerpa? Immaqa upperisarsiornerup aalajangersimasup najoqqutassiat iluaqutaasut maleruarnissaat inassutigigaluarpaa, inuunerulli siunertavianik paasisaqalersissinnaanngikkunisigut ilumut anersaakkut pisariaqartitavut matusinnaanerpai? Aamma pingaarnerusumik, upperisarsiorneq taama ittoq maleruarutsigu Guutimut ajunngitsumik attaveqalersinnaanerpugut? Taamaanngippat piviusumik nalerisimaarnarnavianngilaq.

Taamaattumik inuppassuit suli nanisimanngisartik ujarpaat. (wD 1/6 94)

[Qupp. 3-mi assiliartaq]

Naalagiartarnikkut anersaakkut pisariaqartitatit ilumut matussutissinneqartarpat?

[Qupp. 4-mi assiliartaq]

Inuppassuit paasisimavaat Biibili paasilerlugu inuuneq nutaamik siunertaqalertartoq