Asasavut toqusimasut takoqqissavavut?
JOHN qulingiluaannarnik ukioqartoq anaanaa toqusimavoq. Ilisaasimanera kingorna ima oqaluttuaraa: „Titartaassuppara qilammilu tamatta utaqqeqqulluta allaffigalugu. Ataatannut tunniuppara illerfianut ikeqqullugu, naak toqungagaluartoq, naggammik nalunaarfigigakku eqqarsaatikkut iluarusuppunga.“ — How It Feels When a Parent Dies, Jill Krementzimit.
Qularutissaanngilaq Johnip anaanani qamannga pisumik asasimagaa. Pissusii ajunngitsut taagoriarlugit, oqarpoq: „Immaqa nuanniitsut eqqaamajumanngiinnarpakka, ajortuusinnaasunilli eqqaasaqarfigisinnaanngilara. Arnaavoq arnanit takusimasannit tamanit pinnernerpaaq.“
Amerlasuut Johnitut asasaminnik toqusimasunik eqqaamasaqarput nassuerutigalugulu takoqqinnissaat misigissutsikkut pisariaqartikkaluarlugu. Edith, 26-inik ukioqarluni kræftimik toqquteqarsimasumik ernilik, oqarpoq: „Ernerma sumi arlaanni, kisianni naluara sumi, piunera upperissallugu pisariaqartippara. Takoqqissanerpara? Naluara, neriuutigaarali.“
Qularnanngivippoq inuit Pinngortitsisaata asannittup inuit kissaataannik pissusissamisoortumik tamatuminnga misiginneqatigigai. Taamaattumik neriorsuisimavoq millionilikkuutaat asasaminnik toqusimasunik najorteqaleqqikkumaartut. Guutip oqaasiani amerlasoorpassuarni neriorsuuteqarpoq toqusunit makittoqarumaartoq. — Jesaja 26:19; Daniel 12:2, 13; Hosea 13:14; Juánase 5:28, 29; sarĸúmersitat 20:12, 13.
Kikkut qilammut makititaassappat?
Johnip neriuutaa, anaanami qilammi utaqqissagaani, eqqaaqqeriartigu. Naalagiartartorpassuit taama neriugisaqarput upperisaqarlutilluunniit. Upperisaq tamanna tapersersorniarlugu palasit inunnillu isumaginnittut ilaasa Biibili atornerluttarpaat.
Assersuutigalugu, qimagaasunik ikiuisartoq, Dr. Elisabeth Kübler-Ross atuakkiamini On Children and Death-imi allappoq: „Toqu isumaqaannarpoq timimik qimatsineq soorlu kavaajaq nutaanngitsoq nungullarnikorlu atorunnaartaripput, inimilluunniit inimut allamut isertartugut. Nalunaajaasup oqaasii 12:7-mi allasimavoq: ’Pujualaat nunamut utissaaq anersaarlu Guutimut tunniussisiminut utissaaq.’ Jesus oqarsimavoq: ’Inissioriartoreerussi kingumut tikiukkumaarpunga, uannullu pisikkumaarpassi najukkanneeqqullusi.’ Pinerluttumullu kikiattugaqatiminut oqarsimavoq: ’Ullumi paratiisimeeqatigiumaarpakkit.’“
Qulaani allassimasut ilumut takutippaat asasavut toqusimasut uumasut qilammilu utaqqigaatigut? Allassimaffiit misissorluariartigik, Nalunaajaasup oqaasii 12:7 aallarniutigalugu. Nalunanngitsumik angutip silatuup oqaatsinik tamakkuninnga allattup Biibilip atuagartaani allareersimasani akerlilernianngilai: „Uumassuseqartummi nalunngilaat toqusussaagamik, toqungasulli sunnguamilluunniit ilisimasaqanngillat.“ (Nalunaajaasup oqaasii 9:5) Inuit toqusimasut ataatsimut allaatigai. Inuit Guuteqarneranik upperumanngivissut pinerluttuliortuaannartullu toqugaangamik Guutimut uternissaat upperissallugu tulluarpa? Naagga. Oqarsinnaanngilagummi arlaannarpulluunniit ajunngitsuugaluaruni ajortuugaluarunilluunniit taama piumaartoq. Arlaannattaluunniimmi Guuti qilammi najorsimanngilaa, taava qanoq ililluta oqarsinnaavugut tassunga uterumaarluta?
Taavami Biibilimik allattup oqaatsini toqunermi ’anersaaq Guutimut tunisisiminut utertoq’ qanoq isumaqartippai? Hebriiarit oqaasiat „anersaaq“-mik nutserneqarsimasoq atoramiuk inuup allanit allaanerussutaa pinngilaa. Aamma Nalunaajaasup oqaasii 3:19-mi Biibilimik allattup taassuma inuit uumasullu ’assigiimmik uumassutigisaminnik anersaallit’ allaatigai. Ersarippoq „anersaaq“ isumaqartikkaa inuussut inuit uumasullu timaani cellinik uumatitsisoq. Anersaaq tamanna Guutimit toqqaannartumik pineq ajorparput. Naartugineqaleratta kingornalu inunngoratta angajoqqaavut aqqutigalugit pisimavarput. Aammalu toqusoqaraangat anersaaq tamanna avataarsuatigut ingerlaarluni Guutimut uterneq ajorpoq. ’Anersaap Guutimut utertarnera’ assersuutaavoq isumaqarlunilu toqup kingornatigut inooqqinnissamik neriugisaq Guutimiilersartoq. Taassuma aalajangertarpaa kina eqqaamajumallugu kinalu makitikkumallugu. Nammineerlutit malugeriaruk tamanna qanoq ersaritsigisumik Tussiaat 104:29, 30-mi allaatigineqartoq.
Jehova Guuti neriorsuisimavoq Kristusip malittai aalajaatsut aalajangersimasumik amerlassusillit, katillutik 144.000-innaat, qilammut makititaajumaartut Guutip anersaakkut ernerisut. (sarĸúmersitat 14:1, 3) Taakku inuiannut nunamiittunut pilluaqqussutaasumik qilammiit Kristus naalakkersueqatigissavaat.
Tamatuminnga ajoqersorneqartut siulliit tassaapput Jesusip apustilii aalajaatsut, taakkununngalu ima oqarsimavoq: ’Ataatama illuani inissat amerlaqaat. Taamaanngippat oqarfigisimassagaluarpassi. Inissioriartorpassi. Inissioriartoreerussilu kingumut tikiukkumaarpunga, uannullu pisikkumaarpassi najukkanneeqqullusi.’ (Juánase 14:2, 3) Apustilit taakku kristumiullu siulliit toqusariaqarsimapput ilisimasaqaratillu Jesusimit qilammut makititaanermik akissarsisinneqarnissartik utaqqisariaqarlugu. Taamaattumik uppernini pillugu naalliutsitaalluni toqutaasoq siulleq, Stefanus, ’sinippaartutut’ allaatigineqarpoq. — apustilit suliait 7:60; 1 Tásalûníkamiut 4:13.
Nunami inuunermut makititaaneq
Jesusimmi pinerluttumut sanimini toqusumut neriorsuutaa? Taamani juutit amerlasuut assigalugit angutip taassuma upperaa Guutip Messiasimik aallartitsinissaa, naalagaaffimmik pilersitsisussamik inuiannullu juutiusunut nunami eqqissisitsisussamik toqqissisitsisussamillu. (1 Kunngit 4:20-25 Lúkarse 19:11; 24:21-mut apustilit suliait 1:6-imullu naleqqiutikkit.) Aammattaaq pinerluttup upperaa Jesusip Guutimit Kunngiusussatut toqqagaasimanera. Jesus toqutaalermat tamanna eqquutinngitsuulersutut isikkoqaraluarpoq. Taamaattumik Jesusip pinerluttoq neriorsorpaa oqaatsit uku atorlugit: „Ilumut, ullummi oqarfigaakkit: ’Paratiisimeeqatigiumaarparma.’“ — Lúkarse 23:42, 43, NV.
Biibilimik nutserisut oqaatsip „ullumi“-p siornagut uniffiliisut Jesusip oqaasiinik paasinnikkusuttunut ajornartorsiortitsipput. Jesus ulloq tamanna paratiisilianngilaq. Ilisimananili ullut pingasut toqungavoq Guutimit makititaanissami tungaanut. Makititaareeraluarluni qilaliareeraluarlunilu, Ataatami talerpiata tungaani issialluni Kunnginngortitaanissani utaqqisariaqarsimavaa. (Eprîarit 10:12, 13) Qanittukkut Jesusip Naalagaaffiata inuiaat aniguisissavai nunarsuarlu tamaat paratiisinngortillugu. (Lúkarse 21:10, 11, 25-31) Taava pinerluttumut neriorsuutini naammassissavaa nunamilu inuunermut makitillugu. Jesusillu angut najulerumaarpaa pisariaqartitaanik tamanik pilersorlugu, Guutip inatsisaanik naapertuilluartunik maleruaasinnaanissaanik aamma ikiorlugu.
Amerlasuut makititaanissaat
Pinerluttup peqqissimisup nunami makititaanissaatut toqusunit makititaasut amerlanersaat nunamut makititaassapput. Tamanna Guutip pinngortitsigami siunertaanut naapertuuppoq. Angut arnarlu siulliit nunami paratiisiusumi pinngortitaapput nunalu imminnut naalatsigitissagaat peqquneqarlutik. Guutimut naalattuaannarsimagaluarunik utoqqalisariaqarsimassanngikkaluarput toqusariaqarsimassanngikkaluarlutillu. Guutip piffissarititaani nunarsuaq tamarmi Adamimut kinguaavinullu naammalluinnartunut naalatsigititaassagaluarpoq paratiisinngorlunilu. — 1 Moses 1:28; 2:8, 9.
Adamili Evalu piaaralutik naalannginnamik, imminnut kinguaassaminnullu toqu pilersippaat. (1 Moses 2:16, 17; 3:17-19) Taamaattumik Biibilimi ima allassimavoq: ’Taamaattumik soorlu inukkut ataasiusukkut ajorti silarsuarmut tikiuttoq ajortikkullu toqu tikiulluni, taamalu toqup inuit tamakkerlugit tikikkai, tamarmik ajortuliormata.’ — Rûmamiut 5:12.
Inuk ajorteqanngitsoq ataasiinnaq inunngorsimavoq. Tassa Guutip ernera naammalluinnartoq, Jesus Kristus, inuunera qilammiit arnap juutiusup, Mariap illiaanut nuunneqarsimasoq. Jesus ajortuliorsimanngilaq toqunneqartariaqassutissaqarnanilu. Taamaattumik toqua utertitsissutaavoq ’silamiut ajortaannik ersuttoq’. (Juánase 1:29; Matîuse 20:28) Taamaattumik Jesus ima oqarsinnaasimavoq: ’Uanga makissutaallungalu inuussutaavunga; uannut uppertoq naak toqugaluaruni inuussaaq.’ — Juánase 11:25.
Asasavit toqusimasut najoqqilernissaat maanna neriugilersinnaanngorpat, taamaassappalli pisariaqarpoq Jesusip utertitsissutitut upperinissaa Guutillu Kunnginngortitaatut naalannissaa. Qanittukkut Guutip naalagaaffiata ajortut tamaasa piiassavai. Naalakkersuisuutitaanullu naalakkumanngitsut tamaasa piuneerutissavai. Guutilli naalagaaffianut naalattut tamarmik annassapput nunarsuullu tamarmi paratiisinngortinnissaanut suleqataassallutik. — Tussiaat 37:10, 11; sarĸúmersitat 21:3-5.
Taava toqusunik makiffissaq pissanganartoq aallartissaaq. Toqusunik tikilluaqqusisunut ilaassavit? Maannakkut qanoq iliornerit apeqqutaavoq. Jehovap naalagaaffianut erneranik Jesus Kristusimik aqunneqartumut naalattut tamarmik nuanningaartunik pilluaqqusaassapput. (wD 15/6 94)