’Upperneq aalajangiuppara’

OQALUTTUARTUT: BRUNELLA INCONDITIP IKINNGUTAI

„ARFININNGORNERUVOQ, avaanngunaqaluni kiserliornaqalunilu. Inimi kisimiippunga, neriuutaaruttutut misigalunga. Torsuusarsuakkut ingerlasutut misigaanga. Suut tamarmik ajunngitsumik ingerlasimagaluarput, tassanngaannavilli matu kiinnama saarpiaani matorlunneqarporlusooq, aniffissaarullunga, qanorluunniit aniffissarsiortigigaluaruma.“

Brunella Inconditi 15-inik ukiulik pakatsinerujussuarmik artorsinneqarsimavoq. Ulloq inuunerani pingaarnerpaaq qatangiinnarpoq. Tamanna sioqqullugu Jehovamik Biibilimillu asanninnera alliartorsimavoq, taassumunngalu inuunerminik tunniussilluinnarnissaanut killiisimalluni. 1990-imi juulimi Jehovap Nalunaajaasuisa Montrealimi Canadamiittumi ataatsimeersuarneranni „Oqaatsit minguitsut“-mik qulequtalimmi kuisittussaasimagaluarpoq. Inuunermili sinnerani uppernermigut misilinneqaatigisaminik eqqorneqarpoq.

Tunniulluinnarsimanini ersersinniarlugu kuisinnissani ullunik marlunnik sioqqullugu Brunellap paasivaa aammigut kræfterluni. Meeqqat napparsimmavianni nakorsat ingerlaannaq passutilernissaa kissaatigaat, taamaattumik Brunella napparsimmavimmut unittariaqarpoq.

Nammineq oqaasiisa nakorsat killippaat

Brunellap nalunngilaa aak Jehova Guutip isaani illernartuusoq. (3 Moses 17:11) Angajoqqaavisa Edmondop Nicolettallu piumasaqaatitut saqqummiussimavaat panimmik passunneqarnerani aak atorneqassanngitsoq. „Taama meeraatigigaluarluni Brunellap kissaatigaa nakorsat aamma namminerminit tamanna tusassagaat,“ ataataa oqaluttuarpoq. „Aalajangersimarpalulluinnarluni nakorsat oqarfigai Biibilip ’aammik nerinnginnissamik’ peqqusissutaanut unioqqutitsisumik suliaritikkumanani.“ — apustilit suliait 15:20.

Juulip 10-ani 1990-imi nakorsat pingasut inunnillu isumaginnittoq ataaseq Brunellap angajoqqaavinik Jehovap Nalunaajaasuisalu ilagiivini oqaluussisartunik marlunnik ataatsimeeqatiginnipput. Misissuinerit paasinarsitissimavaat Brunellap aap akuisa qaqortortaanni siaruaatipallattartumik kræftertoq. Nakorsat nappaat akiorniarlugu pilersaarutertik saqqummiuppaat. Peqqissaartumik nassuiaatigaat nakorsarnissaa ajornakusoortorujussuussasoq. „Brunellap pissuserissaarnera Guutimullu naalanniarluni aalajangerluinnarsimanera nakorsat inunnillu isumaginnittut killinneqaatigaat. Angajoqqaaminit asaneqassusia kristumioqatiminillu annertoqqusersorneqarnera maluginiartorujussuuaat. Aamma paasinninnerput inissisimaffimminnillu ataqqinninnerput qujamasuutigaat,“ ilagiinni utoqqaanertat ilaat oqaluttuarpoq.

Brunellap aalersunnginnissaa nakorsat siunniusimavaat. Iisartakkanik nakorsarneqassaaq pisarnermit annikinnerusumik. Taamaalilluni nakorsarneqarneratigut aap celliinik ajoqusiineq annikinnerussaaq. „Brunellap timikkut, misigissutsikkut anersaakkullu pisariaqartitai nakorsat suusupaginngilaat,“ Nicoletta oqaluttuarpoq. „Immikkut ilisimasalimmik meeqqanik aammikkut kræftertunik aalersuinertaqanngitsumik passussinermik misilittagaqartumik siunersiuiumagatta akueraatigut.“ Brunellap napparsimmavimmilu sulisut akornanni ikinngutinnersumik attaveqatigiinneqalerpoq.

Anersaakkut anguniakkat

Naak nakorsarneqarnerata aallaqqaataa ajunngitsumik angusaqarfiugaluartoq taamaattoq Brunellap sakkortuumik misilinneqarnera aatsaat aallartilaarpoq. 1990-imi novembarimiit pitsaanerulerpoq, taamaattumik nangaanani kuisissinnaalerpoq. Qaammatialuit ingerlasimasut kingumut qiviarlugit Brunella oqarpoq: „Artornarsimaqaaq. Nukissanik amerlaqisunik pisariaqartitsinaqaaq, ajunngitsunillu eqqarsarniarsarinaqaluni. . . . Uppernikkut misilinneqarpunga, aalajaattuaannarlungali, sulilu pilersaarutigaara nalinginnaasumik pionerinngornissara [piffissaq tamaat kiffartortoq].“

1991-ip aallartilaarnerani Brunella ajorseqqippoq. Iisartakkanik nakorsarneqartilluni peqqavippoq, tamarmilli tupaallaatigalugulu nuannaarutigisaannik iluarseqqilluni. Aggustimi ima pitsanngortigisimavoq qaammammi tamatumani ikiorti-pioneriusinnaalluni. Taavali ajorseqqippoq, novembarimiillu 1991-imi timaa arlalinni kræfteqalerluni. Napparsimmavimmi allami nakorsat suleqatigiit allat qinnguartaaneq atorlugu suliarilerpaat.

Pissutsit atukkani tamakku ajornakusooraluartut Brunella aalajaattuarpoq imminullu anersaakkut anguniagalertuarluni. Aammigut kræfternerminik paasitinneqarami oqarfigineqarsimavoq qaammatini arfiniliinnarni inuusussanngortoq. Ukioq ataaseq affarlu qaangiuttut Brunella siunissamut suli pilersaarusiortarpoq. „Anguniakkani anguniarlugit sulilluni piffissamik asiutitsineq ajorpoq,“ ilagiinni utoqqaanertaq oqarpoq. „Brunellap Guutip paratiisissamik neriorsuutaanut uppernini sakkortuumik misilinneqarnermini napassutigaa. Ukiukikkaluarluni kristumiutut inersimasunngoriartorsimavoq. Pissusia iluarinartoq ilagiinnut isumassarsinartuusimavoq nalunngisaanullu tamanut, ilaatigut napparsimmavimmi sulisunut, kajungernartuulluni. Anaanaa oqalutuarpoq: „Nimaanngisaannarpoq. Qanoq innerminik aperineqaraangami akisarpoq ’Ajunngilanga’, imaluunniit ’Ajorpianng’, illimmi?’“

Siunissaq toqqissisimanartoq

1992-imi juulimi Jehovap Nalunaajaasuisa ataatsimeersuarnerannut „Qaammaqqusersuisut“-mut najuunnissani Brunellap pilersaarutigisimavaa. Tamannali sioqqullugu napparsimmavimmut unitsinneqarpoq, ajorsiartulerlunilu. Taamaakkaluartoq assakaasulimmik issiaveqarluni ataatsimeersuaqataavoq, isiginnaagassiap Jehovap isaani eqqortumik iliorneq-p takunissaa aalajangiusimallugu.

Ulluni inuuffigisamini kingullerni arlaqanngitsuni angajoqqaamini angerlarsimavoq. „Toqussi tikillugu imminut eqqarsaatiginani allat eqqarsaatiginerusarpai,“ Nicoletta oqarpoq. „Allat Biibilimik atuaqqissaarnissaannik kajumissaartarpai, oqaluttuullugillu ’paratiisimi takoqqikkumaarlugit’.“

Brunella juulip 27-ani 1992-imi toquvoq paratiisimut nunarsuarmiittumut makititaanissaminut uppernermigut aalajaalluni. Anguniakkani aatsaat aallartilaaginnarpai, makititaanermili kingorna tunniulluinnarsimalluni inuunermi nangeqqinnissaa pilersaarutigaa. Toqunissi ullualuinnarnik sioqqullugu Brunella allagaqarsimavoq, taakkulu ilisaanerani atuarneqarput:

„Asasakka ikinngutit:

Qujanaq aggerassi. Najuunnersi ilaquttannut pingaartorujussuuvoq.

Inuit qanimut attaveqarfigisimasakka — sorpassuarnik atugaqartarsimavugut. Ajortorpassuarnik aammali nuannersorpassuarnik atugaqartarsimavugut. Artornartumik sivisuumillu sorsussimavugut, misiginngilangali iluatsitsinngitsoorsimallunga. Soorlumi Biibilimi allassimasoq: ’Sorsunneq ajunngitsoq sorsunnerisimavara, arpaffissaq naavara, upperneq aalajangiuppara.’ — 2 Timûtiuse 4:7.

Ilikkagaqarsimaqaanga aamma ineriartorsimaqaanga, ikinngutimalu qanigisamalu allanngornera takusimavaat. Uannik annertoqqusersuisimasut tamaasa qutsavigiumavakka.

Aaqqissuussaanissamik nutaamik Jehovamillu upperinnittut nalunngilaat Juánase 5:28, 29-mi allassimasutut toqusunik makititsineqarumaartoq. Taamaattumik uppernikkut nukittuniaritsi, taava takoqqikkumaarpugut.

Inuit atorsimasannik ilisimannittut qutsavigiumavakka. Eqitaarujussuarlusilu aparujussuarusuppassi. Tamassi asavassi.“

Brunellap ukiukinnini napparsimaniniluunniit Guutimut tunniulluinnarnissaminut kinguartitsissutigiumasimanngilai. Uppernermigut aalajangersimalluinnarnermigullu maligassiaa inuusuttunut utoqqarnullu assigiimmik kajumissisitsivoq inuuneq anguniarlugu arpannermi akornutissanit sunilluunniit uniinnartinneqannginnissamik. — Eprîarit 12:1. (wD 1/7 94)