Illit isumaqatigiinngissutit qanoq aaqqinniartarpigit?
Pikeriarnikkut pikkorliorneq — nagguaatsullu Kinamiut marriaasa erlinnartut tallimat ilaat ataaseq ilisivimmit nakkarpoq. Marriap aseqqua iluarsineqartariaqarpoq, taamaanngippat nagguaatsut tallimat immminnut naapertuunnerat amigaateqassammat. Iluarsiniarnissaali pussukumiarnassaqaaq, taamaaliornissannullu sapiupputit. Siunnersorneqartariaqarputit immaqaluunniit immmikkut ilisimasalimmik ikiortissarsiortariaqarputit.
ANERSAAKKUT qatanngutigiit aaqqiageeqatigiinnerat pinnersaatinit erlinnartunit erlinnarneroqaaq. Tussiaasiortoq naleqqulluartumik ima allassimavoq: „Iluarlunilu nuannillaaraaq qatanngutigiit isumaqatigiillutik najortigiileraangata!“ (Tussiaat 133:1) Kristumioqatigiit isumaqatigiinngissutaasa aaqqinniarnerat ilaannikkut artornarsinnaasarpoq. Ilaallu aaqqiiniaraluarlutik kukkusumik aallartittoortarput. ’lluarsaaniarneq’ pisariaqanngitsumik annernarsinnaallunilu kikinernik takussunartunik kinguneqarsinnaavoq.
Kristumiut ilaasa namminneerlutik aaqqinniartariaqaraluakkaminnut pisariaqanngikkaluamik utoqqaanertat akuliutitinniartarpaat. Immaqa taamaaliortarput qanoq iliornissartik nalornigamikku. „Qatanngutitta ilarpassuisa naluaat qanoq ilillutik unnersuussutit Biibilimeersut isumaqatigiinngissutiminnut tunngatillugu atussallugit,“ qatanngut angut Biibili tunngavigalugu siunnersuinermi misilittagaqarluartoq taama oqarpoq. Imalu nangippoq: „Jesusip ilioriaatsimigut maligassiaanik maleruaanngitsooqqajaasarput.“ Kristumiup qatanngutiminut isumaqatigiinngissutiminik qanoq ililluni iluarsiiniartarnissaa pillugu Jesus qanoq oqarsimava? Unnersuussutit tamakku ilisimmalluarnissaat qanorlu atussallugit ilinniarnissaat sooq pingaaruteqarpa?
Isumaqatigiinngissutit minnerit
„Taamaattumik tunissutissat tunisivimmi pilliutigiartorukku, tassanilu eqqaaleruit qatannguppit sumik patsiseqarfigigaatit, taava tunissutissat tunisiviup saanut qimallugu qatanngutit saammarsariartoqqaarallaak, kingornalu tunissutissat pilliutigiartoruk.“ — Matîuse 5:23, 24.
Taamanikkut Jesusip taama oqarnerata nalaani juutit Jerusalemimi naalaffiup tunisiviani tunissutinik pilliuteqartarneq ileqqoraat. Juutit ilaat Israelikkoqatini eqqunngitsuliorfigisimaguniuk ikikkagassamik imaluunniit ajortaaruteqqussummik pilliuteqarsinnaavoq. Assersuutip Jesusip eqqartugaata piffissaq pingaarnerpaaq pivaa. Inuup tunisivimmi Guutimut pilliuteqalerluni eqqaalerpaa qatanngummi arlaannik akerleriissuteqarfigigaani. Aap, Israelikkuusup paasisariaqarpaa qatanngutiminik saammaateqatiginninnissaq pilliuteqarnermit pingaarnerusoq.
Naak pilliutit taamaattut Mosesip Inatsisaani peqqussutigineqaraluartut Guutip isaani pingaarnerpaanngillat. Pruffiitip Samueliep kunngi ilumuunngitsoq Saul ima oqarfigisimavaa: „Jehovap pilliutissat ikikkagassat toqutassallu naalanneqarnissamisut pingaartitsiginerpai? Naaggali, naalanneq pilliutinit pitsaanernit pingaarnerungaarpoq, Jehovamullu naalaarneq pingaarneruvoq savat angutivissat tunnuannit.“ — 1 Samuel 15:22.
Qaqqami oqaluutsimini Jesusip tamatuma pingaaruteqassusia eqqaaqqippaa ajoqersukkanilu takutillugit pilliuteqartinnatik isumaqatigiinngissutitik aaqqinniaqqaartariaqaraat. Ullumikkut kristumiunut pilliutigeqqusaasut anersaakkut ittuupput — ’pilliutit qujaniutit, tamassa qarlut taassuma aqqanik nassuerutiginnittut anitaat.’ (Eprîarit 13:15) Najoqqutassiarli tamanna suli atuuppoq. Tamatumunnga assingusumik apustili Johannesip eqqaavaa qatanngumminik uumisuisoq oqaraluaruni Guuti asallugu tamanna asuliinnassasoq. — 1 Juánase 4:20, 21.
Soqutiginarpoq inuup qatanngutimi arlaannik akerleriissuteqarfigigaani eqqaaleruniuk siulliulluni iliuuseqartussaasoq. Qularnanngitsumik maniguunneq taamaaliornerani ersertoq sunniuteqarluassaaq. Aamma eqqunngitsuliortoq kukkunini nassuerutiginiarlugu aggerpat eqqunngitsuliorfigineqartup amerlanertigut ilassilluartarpaa. Mosesip Inatsisaasa takutippaat piginngisaminik tigusisoqarpat taava tamanna utertinneqassasoq nalingata tallimararterutaanik ilallugu. (3 Moses 5:23, 24) Taamatuttaaq piuminarnerussaaq ajortuliortoq eqqisseqatigeeqqinnissaq anguniarlugu ajortulianilu iluarsiniarlugu pisariaqartumit annerusumik iliuuseqarnissaminut piumassuseqarpat.
Eqqisseqatigiinnissamilli pilersitseqqinniarnerugaluaq tamatigut iluatsittanngilaq. Biibilimi Ussatit eqqaasippaatigut isumaqatigiinngissutit aaqqinniarnissaat sapernartartoq ajuallatsitsineq pineqaraangat. Ussatit 18:19-imi ima allassimavoq: „Qatanngutaasup ajuallatsinneqartup assigaa pallittaalisaq tiguarniaruminaatsoq; saqitsaassisup saammarsarneqarnissaa pallittaalisap matorsuisa sannerutsikkat iserfiginiarnerattut ajornartigaaq.“ Maniguuttumilli ilungersornerit qularnanngitsumik iluatsissapput saammaateqatigiinniartussat tassaappata uppeqatigiit Guutimut iluarisaarusuttut. Ajortuliorsimanerli anneruppat Jesusip unnersuussutai Matîuse kapitali 18-imi allanneqarsimasut maleruarneqartariaqarput.
Isumaqatigiinngissutit ilungersornarnerusut aaqqinniarnissaat
’Qatannguppilli ajortuliorfigippatit, orniguk kisimiitillusilu oqaanniaruk. Tusarumappatit qatanngutit utertissavat. Tusarumanngippatilli ataatsimik marlunnilluunniit ilaqarlutit orniguk, siunersiutigisaq qanoq-ittorluunniit nalunaajaasut marlulluunniit pingasulluunniit oqaasiannik aalajangersarneqaqqullugu. Taakkualu tusarumanngippagit ilagiinnut oqaatiguuk; ilagiilli tusarumanngippagit Guutimik nalusutut ilanngaaserisutullu isumaqarfigissavat.’ — Matîuse 18:15-17.
Juuteq (kingusinnerusukkulluunniit kristumiu) Jehovamik pallorfiginneqatimi ilaannik assut isumaqatigiinngissuteqaleruni qanoq iliussava? Eqqunngitsuliorfigineqarsorisoq siulliulluni iliuuseqartariaqarpoq. Marluinnaatillutik taassuma eqqunngitsuliortoq oqaloqatigisariaqarpaa. Allanik ilassarsiunngikkuni periarfissaqarluassaaq qatanngummi eqqisseqatiginissaanut, ingammik paasinerluinerinnaq aaqqippallanneqarsinnaasoq pineqarpat. Isumaqatigiinngissut piuminarnerusumik aaqqinneqarsinnaassaaq pineqartut kisimik tamatuminnga ilisimannippata.
Immaqali alloriarneq siulleq naammanngilaq. Tamatumunnga tunngatillugu Jesus oqarsimavoq: ’Ataatsimik marlunnilluunniit ilaqarlutit orniguk.’ Taakku tassaasinnaapput pisimasumik ilisimannittut. Immaqa arlaat pillugu mamarliineq tusarsimavaat, immaqaluunniit isumaqatigiinngitsut isumaqatigiissutaata allassimaneqarneranut takunnittuullutik. Imaluunniit aatsaat maanna nalunaajaatit assigiinngitsut ajornartorsiummut pissutaasinnaasut tusarpaat. Ikittuinnaat — ataaseq marlulluunniit — ajornartorsiummik paasitinneqassapput. Taamaappat taava ajornartorsiut paasinerluinerinnaaguni ajorsiartulernavianngilaq.
Eqqunngitsuliorfigineqartup suna siunertarisariaqassavaa? Kristumioqatini nikanarsarniassavaa? Jesusip siunnersuutaa eqqarsaatigissagaanni kristumiut qatanngutitik assuarigasuartariaqanngilaat. Eqqunngitsuliortup kukkunini nassuerutigippagu utoqqatserlunilu iluarsiumallugu taava eqqunngitsuliorfigineqartup qatanngunni ’utertissimavaa’. — Matîuse 18:15.
Ajornartorsiut aaqqinneqarsinnaanngippat ilagiit isumagissavaat. Israelikkut nalaanni tamanna isumaqarpoq Israelikkut akornanni utoqqaanertat isumagissagaat, kingusinnerusukkulli kristumiut ilagiissaanni utoqqaanertat pineqalerput. Eqqunngitsuliortoq peqqissiminngitsoq ilagiinnit anisitaasinnaavoq. Allassimavoq ’Guutimik nalusutut ilanngaaserisutullu isumaqarfigissagaat’, juutit taakkuninnga ingalassimannittarmata. Tamannali ilungersornaqimmat kristumiu ataaseq nammineerluni anisitsisinnaanngilaq. Utoqqaanertat toqqakkat, ilagiit sinnerlugit, kisimik taamaaliorsinnaapput. — Naleqqiuguk 1 Korintumiut 5:13.
Eqqunngitsuliortoq peqqissiminngitsoq ilagiinnut ilaasortaajunnaarsitaasinnaammat ersarippoq Matîuse 18:15-17-imi isumaqatigiinngissutit minnerusut pineqanngitsut. Jesusip isumaqatigiinngissutit annertuut pivai, taamaattorli isumaqatigiinngitsut marluinnaallutik aamma aaqqissinnaasaralui. Assersuutigalugu mamarliineq, inummik tusaamanerlugaalersitsisoq. Imaluunniit aningaasatigut isumaqatigiinngissutit eqqarsaatigineqarsinnaapput, versinimi tulliuttuni Jesusip kiffaq naakkinninngitsoq akiligassaminik isumakkeerfigineqartoq pillugu assersuusiaa eqqartorneqarpoq. (Matîuse 18:23-35) Akiligassat piffissaq eqqorlugu akilerneqanngitsut tassaasinnaagaluarpoq ajornartorsiut inuit marluk ajornanngitsumik aaqqissinnaasaat. Aammali tassaasinnaavoq ajortuliaq sualuttoq, tassa tillinnerulersinnaavoq akiligassalik akiliiumanngivippat.
Ajortuliat ilaat kristumiut marluinnaallutik iluarsisinnaanngilaat. Mosesip Inatsisaasa nalaanni ajortuliat sualunnerusut nalunaarutigineqartussaasarsimapput. (3 Moses 5:1; Ussatit 29:24) Tamatumunnga assingusumik ajortuliat sualuttut ilagiit minguissusiannut sunniuteqarsinnaasut kristumiunut utoqqaanertanut nalunaarutigineqartussaapput.
Kisianni kristumiut isumaqatigiinngissutigisartagaasa amerlanersaat taamaanngillat.
Isumakkeerfiginniinnarsinnaavit?
Jesusip isumaqatigiinngissutit qanoq aaqqinneqarnissaat nassuiareeramiuk allamik pingaartumik ajoqersuivoq. Ima allassimavoq: ’Taava Peterip ornillugu aperaa: „Naalagaq, qatanngutiga uannut ajortuliortartillugu qassinik isumakkeerfigissavara? Arfineq-marlunnik allaat?“ Jesusip akivaa: „Oqarfigaakkit, arfineq-marlunnik pinnatit, [77-inilli, NV] allaat.“’ (Matîuse 18:21, 22) Ilaanni Jesusip ajoqersukkani kajumissaarsimavai ’ulluinnaq arfineq-marloriarlutik’ isumakkeerfiginnittaqqullugit. (Lúkarse 17:3, 4) Ersarippoq Kristusip malinnittaasa isumaqatigiinngissutit isumakkeerfigeqatigiinnikkut aaqqittassagaat.
Taamaaliussagaanni ilungersortariaqarpoq. „Qatanngutit ilaasa qanoq ilillutik isumakkeerfiginninnissartik naluaat,“ qatanngut angut siuliani issuarneqartoq taama oqarpoq, imalu nangilluni: „Oqaluttuunneqaramik kristumiut ilagiissaanni eqqissineq atatinniarlugu isumakkeerfiginninnissartik qinersinnaagitsik tupaallappasipput.“
Apustili Paulus allassimavoq: ’Immissinnut unnerluutissaqaraluarussi kamageqatigiillusilu isumakkeerfigeqatigiigitsi; soorlu Kristusip isumakkeerfigigaasi, taamattaaq ilissi pigitsi.’ (Kulorsamiut 3:13) Qatanngut isumaqatiginngisarput ornitsinnagu immitsinnut ima aperisinnaavugut: Ajornartorsiut ima ingasatsigaa oqaloqatigiissutiginissaa pisariaqarluni? Kristumiutut eqqarsartaaseqaruma pisimasut puiuinnarnissaat uannut ajornassannginnerpa? Uanga taannaagaluaruma isumakkeerfigineqarnissara kissaatigissannginnerpara? Isumakkeerfigiumanngikkukkulu, ilimagisinnaanerpara Guutip qinnutikka tusassagai isumakkeerfigalungalu? (Matîuse 6:12, 14, 15) Apeqqutit tamakkua isumakkeerfiginninnissatsinnut ikiorsinnaavaatigut.
Kristumiuugatta Jehovap innuttaasa ilagiissaanni eqqissinerup atatinneqarnissaa immikkut akisussaaffigaarput. Taamaattumik Jesusip siunnersuutaa maleruartigu. Taamaalilluta isumakkeerfiginnissinnaavugut. Isumakkeerfiginnikkumassuseq tamanna qatanngutitut asaqatigiinnermut Jesusip ajoqersugaasa ilisarnaatigisariaqagaannut allisaataassaaq. — Juánase 13:34, 35. (wD 15/7 94)
[Qupp. 23-mi assiliartaq]
Jesusip unnersuussutaata maleruarneratigut kristumiut isumaqatigiinngissutitik aaqqinniarsinnaavaat