Nutaarsiassaq nuannersoq oqaluussissutigineqarallassaaq
„Nutaarsiassaq nuannersoq inuianni tamani oqaluussissutigineqarallartariaqarpoq.“ — MÁKORSE 13:10, NV.
1, 2. Nalunaajaasut suna ilisarnaatigaat aamma sooq?
SOOQ Jehovap nalunaajaasui taama kipisuitsigisumik oqaluussisarpat? Silarsuaq tamakkerlugu illumiit-illumut, aqqusinermi allamilu oqaluussisarnerput ilisimaneqarluarpoq. Periarfissaqaraangatta nalunaajaasutut ilisaritittarpugut periaaserillutalu nutaarsiassaq nuannersoq pingaartitarput oqaluussissutiginiartarlugu. Aap, oqaluussinerput ilisarnaatigaarput! — Kulorsamiut 4:6.
2 Angutit, arnat meeqqallu atisarissaartut pooqattalisartut takugaangamikkik inuit qanoq eqqarsartarpat? ’Aasimmiaasit lutherikkut (katuullilluunniit) pulaaqattaaleqaat!’ imaluunniit ’Piinsisiortunaasiit aggeqqileqaat!’ Naamik. Inuit nalunngilaat upperisarsiortut tamakku ilaqutariittut ataasiakkaatulluunniit illumiit-illumut oqaluussineq ajortut. Upperisarsioqatigiit ilaasa „ajoqersuiartortitat“ aallartittaraluarpaat sumiiffinni aalajangersimasuni ukiualunni suleqqullugit, ilaasortalli amerlanersaat taama kiffartuussineq ajorput. Jehovap nalunaajaasui kisimik sukkulluunniit ilungersuussillutik allanut oqaluussinertik pissutigalugu silarsuaq tamakkerlugu ilisarisimaneqarluarput. Atuagassiaatitillu, Napasuliaq Alapernaarsuiffik aamma Iteritsi! tusaamasaassutigaat. — Jesaja 43:10-12; apustilit suliait 1:8.
Kristumiuuneraqatigiit palaseqatigiivinit allaanerusut
3, 4. Kristumiuuneraqatigiit palasii nutaarsiassatigut qanoq allaatigineqartarpat?
3 Tamatumunnga akerliusumik nutarsiassani arlaleriarluni qulaarneqartarsimavoq nunat ilaanni palasit ilarpassui nukappiaqqanik atornerluisartut, kanngunartuliortarlutik peqquserluttuliortarlutik salloqqittaasarlutillu. Ersarippoq taakkua ilarpassui uinngup suliaanik iliortuusut piisaarlutillu inuusut. Erinarsuutinik allattartup tusaamasaasup tamanna allaaserilluarsimavaa erinarsuummini ima qulequtalimmi: „Jesus tv-mi saqqummertuuguni Roleximik nalunaaqutaaraqassagaluarnerpa?“ Erinarsuusiamini ima aperivoq: „Jesus nunarsuarmut uteraluaruni naalakkersuinermut peqataassagaluarnerpa? Palm Springsimi [Californiami pisoorsuit najugaqarfigisaanni] saniatiguumik illoqassagaluarnerpa, pigisarpassuanilu toqqortorniarsarissagaluarnerpai?“ Oqaatsit Jakobip allassimasai eqqorluaqaat: ’Nunami mamartortorniaannarlusilu inuulluapiluppusi uummatisi qaarsillaatissarsiorlugit soorlu ullormi toqoraaffimmi.’ — Jâko 5:5; Galâsiamiut 5:19-21.
4 Palasit naalakkersuisunut qujanarniarfiginnittaramik ilaallu allaat naalakkersuisussatut qinigassanngortittarlutik ersarippoq taakku tassaasut ullutsinni allakkanik ilisimasut farisiiarillu. Aammalu USA-mi, Canadami nunanilu allani upperisarsioqatigiit aningaasarpassuit atortariaqarsimavaat palasit meeqqanut inersimasunullu kanngunartuliorsimanertik pissutigalugu unnerluutigineqarlutik eqqartuunneqarneranni. — Matîuse 23:1-3.
5. Sooq oqarsinnaavugut kristumiuuneraqatigiit palasii tassaanngitsut ’inussiaq aalajaallunilu silatooq’?
5 Jesusip eqqortumik palasit taamanikkut inuusut ima oqarfigai: ’Eqqanaq ilissi allakkanik ilisimasusi farisiiarillu, ilumoortuusaarniartusi, ilerfit marrartikkat assigigassigik, taakku qaamikkut pinnersuusaaraluarput, ilumikkulli toqusut saarninik mingunnartunillu nalinginnarnik imalissuupput. Taamattaaq ilissi inuit takkuanni qaassigut ilumoortuusaaraluarpusi, ilussigulli ilumoortuusaarniarnernik iluaatsuliornernillu imalissuuvusi.’ Taamaattumik Guutip kristumiuuneraqatigiit palasii, katuuliugaluarpata, naaggaartuugaluarpata upperisarsioqatigiinnulluunniit allanut ilaagaluarpata, nutaarsiassamik nuannersumik oqaluussisussanngortissimanngilai. Taakku tassaanngillat ’inussiaq aalajaallunilu silatooq’ siulittuutigineqartoq. — Matîuse 23:27, 28; 24:45-47.
Sooq nutaarsiassaq nuannersoq oqaluussissutigineqarallassava?
6. Erniinnaq suut piumaarpat?
6 Jesusip inuianni tamani nutaarsiassamik nuannersumik oqaluusseqqussusissutaata eqqartornerani iivangkiiliulersaartuni Markusip kisimi oqaaseq ’-rallassaaq’ atorsimavaa. (Mákorse 13:10; naleqqiuguk Matîuse 24:14.) J. B. Phillipsip nutsigaani ima allassimavoq: „Naggatissaq nalliutsinnagu iivangkiiliu inuiaqatigiinnut tamanut oqaluussissutigineqassaaq.“ Tamatuma takutippaa silarsuaq tamakkerlugu oqaluussinersuup kingorna allanik pisoqarumaartoq. Ilaatigut annikilliornartussaq angisooq siulittuutigineqartoq Kristusillu silarsuarmut nutaamut naapertuilluartumik naalakkersuilernissaa piumaarput. — Matîuse 24:21-31; sarĸúmersitat 16:14-16; 21:1-4.
7. Sooq Guutip kissaatigaa nutaarsiassaq nuannersoq oqaluussissutigineqarallassasoq?
7 Sooq Guutip kissaatigaa nutaarsiassaq nuannersoq oqaluussissutigineqarallassasoq? Pingaartumik Guutiugami asannittoq, naapertuilluartoq, ilisimasoq pissaasorlu. Jesusip Matîuse 24:14 Mákorse 13:10-lu naapertorlugit oqaasiisa eqquukkiartorneranni Jehovap pissusii tamakku erseqqissiartuaarput. Pissutsit tamakku ataasiakkaarlugit misissoriartigik takuniarlugu qanoq nutaarsiassamik nuannersumik oqaluussinermut attuumassuteqarnersut.
Nutaarsiassaq nuannersoq Jehovallu asanninnera
8. Nutaarsiassamik nuannersumik oqaluussineq qanoq ililluni Guutip asanninneranut ersiutaava? (1 Juánase 4:7-16)
8 Nutaarsiassamik nuannersumik oqaluussineq qanoq ililluni Guutip asanninneranut ersiutaava? Pingaartumik tassaannginnami inuiaqatigiinnut ataasiinnarnut tusagassaq. Tassaavoq ’inuiannut tamanut’ nutaarsiassaq nuannersoq. Guutip inuiaat ima asatigai ernitui nunarsuarmut aallartissimallugu naggueqatigiit tamarmik, ilaannaasaanngitsoq, ajortaannut utertitsissutissatut. Apustili Johannes ima allassimavoq: ’Guutip silamiut ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu. Guutip erni silarsuarmut aallartinngilaa silamiut eqqartooqqullugit, kisianni silamiut taassumunnga annaqqullugit.’ (Juánase 3:16, 17) Aap, nutaarsiassaq nuannersoq silarsuassamik nutaamik eqqissineqarfiusumik, aaqqiageeqatigiiffiusumik naapertuilluarfiusumillu neriorsuutaasoq Guutip asanninneranut ersiutaavoq. — 2 Pîtruse 3:13.
Nutaarsiassaq nuannersoq Jehovallu pissaanera
9. Sooq Jehovap kristumiuuneraqatigiit upperisarsioqatigiivi pissaaneqarnerusut nutaarsiassamik nuannersumik oqaluussisussaatinngilai?
9 Nutaarsiassamik nuannersumik oqaluussineq qanoq ililluni Jehovap pissaaneranut ersiutaava? Eqqarsaatigeriaruk oqaluussinermik tamatuminnga kikkut suliassissimagai. Kristumiuuneraqatigiit upperisarsioqatigiivi pissaaneqarnerusut, soorlu Romalerisut naaggaartulluunniit? Naamik, taakkuami naalakkersuinermut akuliunnertik pissutigalugu piukkunnaateqanngivipput. (Juánase 15:19; 17:14; Jâko 4:4) Taakkua pisuussussui pissaanilissuarnullu attaveqarnerat sunniuteqarnerallu Jehova Guutip maluginianngilai, soorluttaaq ajoqersuutaat ileqqutoqqanik tunngaveqartut maluginianngikkai. Inuit pissaanerat Guutip piumasaata naammassineqarnissaanut aalajangiisuunngilaq. — Sakarja 4:6.
10. Kikkut Guutip oqaluussisussanngortissimavai?
10 Soorlu apustili Paulusip ilagiinnut Korinthimiittunut allakkamini eqqaagaa: ’Qaaqqusimassusersimi sianiginiarsiuk, qatanngutikka: uinngup piisigut ilisimasut amerlanngitsut, pissaasut amerlanngitsut, pingaartut amerlanngitsut, kisianni silamiuni sianiitsorpallattut Guutip qinerpai ilisimatuut pakatsisarumallugit, silamiunilu sanngiitsut Guutip qinerpai nakuusut pakatsisarumallugit, silamiunilu pingaanngitsut asiginnakkallu suunngitsullu Guutip qinerpai suusut suujunnaarsikkumallugit, uinilimmik Guutip saani usorsitsaartoqaqqunagu.’ — 1 Korintumiut 1:26-29.
11. Qanoq ilillutik nalunaajaasut upperisarsioqatigiinnit allanit allaappat?
11 Jehovap nalunaajaasuisa akornanni ikittuinnaat pisuujupput, ataatsimilluunniillu naalakkersuinikkut sunniuteqartoqanngilaq. Naalakkersuinermut akuliunnaveersaartuaramik naalakkersuinermut sunniuteqarsinnaanngillat. Akerlianilli ukiut makku 1900-kkut ingerlaneranni upperisarsiornikkut naalakkersuinikkullu pisortaasut pilersitsineratigut sualuttumik malersorneqarajuttarput. Taamaattoq nazistinit, fascistinit, kommunistinit, inuiaassutsimik pingaartitsivallaartunit eqqunngitsumillu upperisarsiortunit malersorneqangaaraluarlutik nalunaajaasut silarsuaq tamakkerlugu nutaarsiassamik nuannersumik oqaluussissutiginniinnaratik aamma tupinnartumik amerliartorsimapput. — Jesaja 60:22.
12. Sooq nalunaajaasut iluatsitsippat?
12 Nalunaajaasut amerliartornertik sumik pissuteqarnerarpaat? Jesusip ajoqersukkani ima neriorsorsimavai: ’Anersaap illernartup ilissinnut piumaartup pissaanera pigilerumaarparsi, nalunaajaasigiumaarpassilu Jerusalemimi Judæamilu tamarsuarmi Samariamilu nunallu isuanut allaat.’ Tassa angusaqarluarnerannut anersaap illernartup pissaanera pissutaavoq. Ullumikkuttaaq pissaaneq Guutimeersoq ikiortigalugu, inuit pissaanerat ikiortiginagu, nalunaajaasut nunarsuarmi tamarmi kiffartuussinerminni iluatsitsisarput. Inuit sanngiippasigineqaraluartut atorlugit Guutip inuiaat oqaluttuarisaaneranni ilinniartitsinermik suliassaq aatsaat taama annertutigisoq suliaraa. — apustilit suliait 1:8; Jesaja 54:13.
Nutaarsiassaq nuannersoq Jehovallu ilisimassusia
13. (a) Nalunaajaasut sooq kajumissutsiminnit akilerneqaratillu kiffartuussippat? (b) Jehovap qanoq ililluni Satanip unammillernera akisimavaa?
13 Nutaarsiassaq nuannersoq kajumissutsiminnik kiffartortunit oqaluussissutigineqarpoq. Jesus oqarsimavoq: ’Akeqartinnagu pigassiuk akeqartinnaguttaaq tunniussiuk.’ (Matîuse 10:8) Taamaattumik Jehovap nalunaajaasui tamarmik Guutimut kiffartornerminnut akilerneqarneq ajorput, akilerneqarumanatillu. Aammalu ataatsimiinnerini aningaasanik katersuisitsineqarneq ajorpoq. Namminissarsiornatik tunniusimallutillu kiffartornermikkut Guuti mitallersaanut, Satan Diaavulumut, akisinnaatikkamikku nuannaarutigaat. Guutimut assortuisoq anersaajusoq taanna oqarsimavoq inuit namminissarsiorlutik Guuti kiffartuukkaat. Ilisimatuunermini Jehovap Satanip unammillernera assortugassaanngitsumik akissutissarsisimavaa — nalunaajaasut kristumiuusut ilumoortut millionilikkuutaat illumiit illumut, aqqusinerni allamiluunniit nutaarsiassamik nuannersumik oqaluussisut tamatumunnga takussutissaapput. — Job 1:8-11; 2:3-5; Ussatit 27:11.
14. ’Ilisimassut isertugaagaluaq’ Paulusip eqqartugaa sunaava?
14 Nutaarsiassamik nuannersumik oqaluussinermut tunngatillugu Guutip ilisimassusianut ersiutaasoq alla tassaavoq Naalagaaffimmik neriorsuut. Apustili Paulus allassimavoq: ’Ilisimassulli inersimasuni oqaluutigaarput, massali ilisimassut silap matuma naalagaasaluunniit suujunnaarsussat piginngisaat; kisianni ilisimassut Guutip pia oqaluutigaarput anngigisaq isertugaagaluaq Guutip uatsinnut ulloqanngikkallarmat naalannaatissamaartitaa.’ ’Ilisimassut isertugaagaluaq’ tamanna tassaavoq Guutip ilisimassuseqangaarluni pikititsisimanermut Edenimi pisimasumut aaqqiissutissaa. Anngigisamut illernartumut tamatumunnga tunngatillugu ilisimassuseq Jesus Kristusikkut, Guutip naalagaaffia pillugu nutaarsiassami nuannersumi pingaartumik inissisimaffeqartukkut, saqqummersinneqarsimavoq.a — 1 Korintumiut 2:6, 7; Kulorsamiut 1:26-28.
Nutaarsiassaq nuannersoq Guutillu naapertuilluassusia
15. Qanoq ililluta nalunngilarput Jehova Guutiusoq naapertuilluartoq? (5 Moses 32:4; Tussiaat 33:5)
15 Ingammik Guutip naapertuilluassusia eqqarsaatigalugu paasivarput Mákorse 13:10-mi oqaatsip ’oqaluussissutigineqarallassasoq’-p pingaaruteqarnera. Jehova naapertuilluassutsip Guutigaa, naapertuilluassusiali ilumoortumik tunniusimaneranik nalimmassarneqarpoq. Pruffiitini Jeremias aqqutigalugu ima oqarsimavoq: „Kisianni usorsitsaarumasup usorsitsaatigiliuk ima silaqassuseqarami uanga ilisarisinnaallunga, uanga [Jehova] tassaasunga nunamilu unneqqarissoq innarluitsorlu naapertuilluartumillu iliortoq, tamakku iluarigakkit, oqarpoq [Jehova].“ — Jeremia 9:23.
16. Naapertuilluartumik iliussagaanni mianersoqquseqqaartariaqartoq qanoq assersuutigineqarsinnaava?
16 Nutaarsiassamik nuannersumik oqaluussinermut tunngatillugu Jehovap naapertuilluassusia qanoq erserpa? Manna assersuutigeriartigu: Anaanaasoq mamartumik sukkulaatitalimmik kaagiliorpoq pulaartoqartussaammat. Meeqqani oqarfiginagit qaqugu nerineqartussaasoq kaagi nerrivimmut iliinnarpagu, meeqqat qanoq iliornissaat eqqoriarluarneqarsinnaavoq. Tamatta meeraasimavugut! Meeqqat kaagi attunngitsoornavianngikkaluarpaat! Anaanaasup meeqqat mianersoqqusilluni oqarfigisimanngikkunigit avoqqaarisinnaanngilai. Akerlianilli ersarissumik oqarsimaguni kaagi aatsaat pulaartut aggerpata nerineqartussaasoq taamaattumillu attorneqassanngikkallartoq, paatsuugassaanngitsumik mianersoqqusissaaq. Meeqqallu naalanngippanni naveernissaannut pissutissaqarluassaaq. — Ussatit 29:15.
17. Jehovap 1919-imiilli qanoq ililluni naapertuilluassutsini immikkut ittumik takutissimavaa?
17 Jehova naapertuilluartuugami pissutsit aaqqissuussaanerat manna ajortoq eqqartuullugu iliuuseqarumaarpoq aatsaat pisariaqartumik mianersoqqusereeruni. Taamaattumik, ingammik 1919-imiilli sorsunnersuup siulliup kingorna ’eqqanaarnartoqalermat’, Jehovap nalunaajaasuni nunarsuaq tamakkerlugu nutaarsiassamik nuannersumik ilungersuussillutik oqaluussiartoqqusimavai. (Matîuse 24:7, 8, 14) Taamaattumik mianersoqqussut immikkut ittoq tamanna inuiaat tusarsimannginnerarsinnaanngilaat.
Silarsuaq qanoq annertutigisumik oqaluussiffigineqarsimava?
18. (a) Nalunaajaasut avinngarusimasuni oqaluussisarnerannut suna ersiutaava? (b) Tamatumunnga ersiutit allat taasinnaavigit?
18 Silarsuaq tamakkerlugu ilinniartitsineq tamanna qanoq annertutigisumik naammassineqareersimasoq atuakkamit Last Places — A Journey in the North-imit (Najugaqarfiit avinngarusimasut — avannaani angalaneq) takuneqarsinnaavoq. Atuakkiortoq oqaluttuarpoq Shetlandip qeqertaasa ilaata Foulap avinngarusimasup eqqaanut immap assingi misissorlugit malugisimallugu tassani „umiiarnikut, ikkarluit, ikkannerit akornutissallu allarpassuit nalunaaqutsersorneqarsimasut“. Nalunaqutsersuinerit tamakku „umiartortunut sapiiserlutik qeqertamut qanilliniartunut mianersoqqussutaapput. Foulap eqqaani imaq qaartartulersugaasutullusooq ippoq tissiataartartunut ulluinnarlutillu umiartortunut, allaallu oqartussaasut aallartitaannut tikikkuminaaqaluni. Jehovalli nalunaajaasuinut taamaassimanngitsoq ullut ikittut tamatuma kingorna paasilerpara.“ Nangilluni ima allassimavoq: „Soorluttaaq illoqarfissuarni piitsoqarfiusuni nunanilu siuarsarniakkani soqutiginnittunik peqqissaartumik ujarlertuartut, aamma Foulami avinngarusimasumi upperisartik pillugu oqaluussisarput.“ Paasivaa tassanimiut ilaat, Andrew, Napasuliaq Alapernaarsuiffik-mik peqartoq, qaammatialuit tamatuma siorna matumini nassaarisimasaminik. Atuakkiortoq aamma ima allassimavoq: „Sapaatip-akunnerata tamatuma kingorna Savalimmiuni atuagassiaq [Iteritsi! qallunaatooq] takuara, qaammatillu marluk qaangiummata Kalaallit Nunaanni Nuummi atugassiaq [Napasuliaq Alapernaarsuiffik qallunaatooq] takullugu.“ Tamanna Jehovap nalunaajaasuisa nunarsuup avannaani eqiasuillutik sulinerannut ersiutaavoq pitsavik!
Nalunaajaasut qanoq ilillutik ingerlajuarsinnaappat?
19, 20. (a) Jehovap nalunaajaasui qanoq ilillutik oqaluussiuarsinnaappat? (b) Tullianik apeqqutit suut akineqassappat?
19 Soorunami illumiit illumut takornartanik oqaluussiffiginninneq suliassaaangilaq oqinnerpaaq, qanorluunniit sivisutigisumik nalunaajaasuusimagaluaraanni. Oqaluussisartut taakku qanoq ilillutik ingerlajuarsinnaappat? Kristumiutut tunniulluinnarsimagamik akisussaasutullu misigigamik. Paulus ima allassimavoq: ’Iivangkiiliumi oqaluutigigakku usorsitsaarsinnaanngilanga, pinnginneq uannut ajornarmat; uannut eqqarnaqqajaqaarluunniit iivangkiiliu oqaluutiginngikkukku.’ Kristumiut ilumoortut tusarliussassartik inuunartuusoq qanoq ilillutik allanut ingerlateqqinnaveersaarsinnaassavaat? Navianartumut mianersoqqusinngitsooraluarunik allat toqunissaannut akisussaaqataassagamik nutaarsiassamik nuannersumik oqaluussinissamut pissutissaqarluarput. — 1 Korintumiut 9:16; Hesekiel 3:17-19.
20 Qanormi ililluni nutaarsiassaq nuannersoq oqaluussissutigineqartarpa? Nalunaajaasut sooq taama iluatsitsitigippat? Kiffartornerat peqatigiiffiallu qanoq ilillutik eqqortumik upperisarsiornermut ilisarnaataappat? Ilanngutassiami tulliuttumi apeqqutit tamakku akineqassapput. (wD 15/8 94)
[Quppernerup ataani ilanngussaq]
a Anngigisamut illernartumut tunngatillugu Guutip ilisimassusianik nassuiaat nassaarineqarsinnaavoq „Hjælp til forståelse af Bibelen“-imi, qupperneq 1366-imi (Napasuliaq Alapernaarsuiffik-p Peqatigiiffianit naqiterneqartoq).
Eqqaamavigit?
□ Jehovap nalunaajaasui qanoq ilillutik palasinit allaanerulluinnarpat?
□ Oqaluussineq qanoq ililluni Guutip asanninneranut, pissaaneranut ilisimassusianullu ersiutaava?
□ Nutaarsiassamik nuannersumik oqaluussineq qanoq ililluni Guutip naapertuilluassusianut ersiutaava?
□ Jehovap nalunaajaasuisa qanoq ilillutik kiffartornertik ingerlattuaannarsinnaavaat?
[Qupp. 15-mi assiliartat]
Inuit qanorluunniit avinngarusimatigisumi najugaqaraluartut Jehovap nalunaajaasuisa oqalussiffigerusuppaat