Issumit pigaluarluta aalajaattuarpugut
„Nalunngilaami qanoq pinngortitaasugut, eqqaamavaa pujualaannaasugut.“ — TUSSIAAT 103:14.
1. Biibili ilumoorpa oqarami inuit issumit pisut? Nassuiaruk.
TIMIKKUT pujualaavugut, imaluunniit issumit pinngortitaavugut. „Taava Guuti [Jehova] inuliorpoq issumit, sorluisigullu anersaarnermik uumassutaasumik sulluarlugu.“ (1 Moses 2:7) Oqaatsit tamakku oqaannarnerorpalukkaluarput, ilisimatuussutsikkulli paasisimasanut ilumoortunut naapertuupput. Pinngoqqaatit inuup timaaniittut 90-init amerlanerusut tamarmik „issumi“ nassaassaapput. Kemiimik ilisimatooq oqarsimavoq inersimasup timaata 65 procentia iltiusoq, 18 procentia kulstoffiulluni, 10 procentia brintiulluni, 3 procentia kvælstoffiulluni, 1,5 procentia kalciumiulluni 1 procentialu fosforiusoq, sinneralu pinngoqqaatinik allanik annikitsualunnik piulluni. Missiliuussinerup tamatuma qanoq eqqorluartiginera paasissallugu pingaarnerunngilaq, piviusorli mannaavoq: ’Issumit pivugut’!
2. Guutip uagutsinnik qanoq ililluni pinngortitsisimaneranik ilisimanninnerput qanoq uagutsinnut sunniuteqarpa, sooq?
2 Kina alla Jehovaanngitsoq pujualaannarmit, imaluunniit issuinnarmit, taama tupinnartigisumik pinngortitsisinnaava? Guutip piliai naammalluinnartuupput kukkuneqaratillu, taamaattumik taamatut periaaseqarluni inummik pinngortitsisimanera isorineqarsinnaanngilaq. Pinngortitsisorsuup nunamit taama tupinnartigisumik nuannertigisumillu inuliorsimanera Taassuma pissaaneranik killeqanngitsumik, piginnaaneqassusianik ilisimatussusianillu pingaartitsinerulissutigaarput. — 5 Moses 32:4; Tussiaat 139:14.
Pissutsit allanngornerat
3, 4. (a) Inuk issumit pinngortikkamiuk Guutip suna siunertarisimanngilaa? (b) Tussiaat 103:14-imi Davidip sunaana innersuussutigigaa, ataqatigisaalu tunngavigalugit qanoq tunngavilersorsinnaavarput?
3 Issumit pinngortitat killissaqartitaapput. Guutilli siunertarinngisaannarsimavaa artorsillugit ingasattumik killilersuiffiginissaat. Killissaqartitaanerili inuit nikallornissaat pilluaatsunngornissaalluunniit pillugu pilersitaanngillat. Taamaakkaluartorli soorlu Tussiaat 103-mi tamarmi ersertoq uagut inuit nikallortarlutalu pilluaattarpugut killissarititaasut, imaluunniit piginnaanitta killeqarnerat, pissutigalugit. Adamip Evallu Guutimut naalannginnerat kinguaassaannut kingunertuumik sunniuteqarsimavoq. Taamaalimmat ’issumit pinngortitaanerput’ allatut isumaqalerpoq.a
4 Taamaattumik Davidip eqqartugai tassaanngillat killissat pissusissamisoortut allaat inuup naammalluinnartup pigisai, tassaallutilli inuttut sanngiissutsit naammalluinnanngissutsimik kingornussaasumik pissuteqartut. Taamaanngippammi Jehova pillugu ima oqarsimanavianngikkaluarpoq: „Taassuma isumakkeerfigaatit ajortuliannik tamanik, nappaatitillu tamaasa katsorsarlugit. Taassuma inuunerit ilivermit iperagaatippaa . . . Iliorfiginngilaatigut ajortuliatta nalissaannik, iluaatsuliatsinnillu akiniaaviginata.“ (Tussiaat 103:2-4, 10) Adam Evalu aalajaattuaannarsimagaluarunik issumit pinngortitaagaluarlutik ajortuliunngisaannarsimassagaluarput, taamalu isumakkeerfigineqarnissartik pisariaqartissanngikkaluarlugu. Aamma nappaateqartalersimassanngikkaluarput ajorunnaarsinneqaatigisariaqakkaminnik. Tamanillu pingaarnerutillugu, toqunngisaannarsimassagaluarput ilivermullu, aatsaat makititaanikkut qimanneqarsinnaasumut, pinngisaannarsimassagaluarlutik.
5. Sooq Davidip oqaasii paasiuminaatsinngilavut?
5 Inuttut naammalluinnanngitsutut Davidip eqqartugai tamatta misigereersimavavut. Naammalluinnanngitsuunerput pissutaalluni killissatsinnik eqqaasinneqartuartarpugut. Naammalluinnanngissutsitta Jehovamut qatanngutitsinnullu kristumiunut attaveqarnitsinni ilaatigooriarluni annikilliortileraangatigut aliasuttarpugut. Nikallungasarpugut naammalluinnanngissutsitta Satanillu silarsuaanit tatisinerup ilaannikkut isumatsatsikkaangatigut. Satanimmi naalagaassusiata naggatissaa qanilliartorasuarmat silarsuaa inunnik ingammillu kristumiunik tatisiartuinnarpoq. — sarĸúmersitat 12:12.
6. Sooq kristumiut ilaat nikallorsinnaappat, misigissutsillu taamaattut Satanip qanoq atortarpai?
6 Misigivit kristumiutut inooriaaseqarniarneq artornarsiartuinnartoq? Kristumiut ilaannik oqartoqarsimavoq sallusuissummiinnertik sivitsoriartortillugu naammalluinnannginnerujartuinnarlutik. Imaaginnarporli naammalluinnanngitsuunertik Jehovallu najoqqutassiaanik naammalluinnartunik kissaatigisaraluamissut annertugisumik maleruaasinnaannginnertik malugiartuinnarsimagaat. Tamanna kristumiup ilisimasaqariartuaarnerata Jehovallu piumasaqaataanik naapertuilluartunik tunniusimalluni paasinnikkiartuaarnerata sunniutigaa pissusissamisoortoq. Pingaartorujussuuvorli naammalluinnanngitsuussutsitsinnik maluginnikkiartuinnarnitta nikallussutiginnginnissaa taamalu Diaavulumit ajugaaffigineqannginnissarput. Taassuma ukiuni hundredelikkuutaani Jehovap kiffaani nikallorneq atortarsimavaa pallorfiginninnermit ilumoortumit nigortinniarlugit. Guutimulli asanninneq piviusoq Diaavulumillu ’uumiginninneq asseqanngitsoq’ ikiortigalugit Jehovap kiffaasa amerlanersaat tatineqarnerminni aalajaassimapput. — Tussiaat 139:21, 22; Ussatit 27:11.
7. Sukkut ilaannikkut Jobitut issinnaavugut?
7 Ilaannikkulli Jehovap kiffai ilaannikkut nikallungasinnaasarput. Naammassisanik naammaginninnginneq pissutaasinnaavoq. Timikkut pissutsit ilaqutariinnilu ilatsinnut, ikinngutitsinnut suleqatitsinnulluunniit sukanganartumik attaveqarnerput pissutaaqataasinnaavoq. Job aalajaatsoq ima nikallorsimatigaaq allaat Guutimut ima ilungersorluni qinusimalluni: „Guuti, toqqorsimagaluarummatoq toqusullu inaanni isertorlunga kamannerit qaangiutserlugu! Qanortoq killilimmik utaqqiffissaqarteriarlunga kingumut eqqaaginga!“ Job, ’assuarnaatsuullunilu peqqusersuitsuusoq Guutimillu mianerinnittuulluni ajortumik iliuuseqarnaveersaartuusoq’, nikallornermik eqqorneqarsinnaasimappat tupinnanngilaq aamma uagut taamatut eqqorneqarsinnaagatta. — Job 1:8, 13-19; 2:7-9, 11-13; 14:13.
8. Ilaannikkut nikallortarneq sumut ajunngitsumut ersiutaasinnaava?
8 Tuppallernaqaaq paasillugu Jehova uummatinik takunnittartoq tamatigullu pissutiginiakkat ajunngitsut isiginiartarai! Ilumoorlutik iluarisaminik iliorniartut tunuartinngisaannarpai. Allaammi ilaannikkut nikallungasarnerput ajunngitsumut ersiutaasinnaavoq, tassa Jehovamut kiffartornerput asuleerutinngikkipput. Tassannga isigalugu nikallunganngisaannartoq immaqa sanngiissutiminut allatulli eqqumaffiginnitsiginngilaq. Eqqaamajuk: ’Kinaluunniit qeqartuusorisoq mianersorli orloqqunani.’ — 1 Korintumiut 10:12; 1 Samuel 16:7; 1 Kunngit 8:39; 1 Israelikkut 28:9.
Aamma taakku issumit pipput
9, 10. (a) Kia uppernera kristumiut malittariaqarpaat? (b) Mosesip imminut suliassiissutigineqartoq qanoq qisuariarfigisimavaa?
9 Eprîarinut agdlagkat kapitaliisa 11-anni kristumiussutsip siorna Jehovamut nalunaajaasuusarsimasut uppernermik sakkortuumik ersersitsisarsimasut eqqartorneqarput. Aamma ukiuni hundredelinni siullerni ullumikkullu kristumiut taamatut uppissuseqarput. Taakku nalilerujussuarmik ilinniarfigisinnaavavut. (Naleqqiuguk Eprîarinut agdlagkat 13:7.) Assersuutigalugu: Kristumiut upperneq eqqarsaatigalugu Mosesimit pitsaanerusumik maligassaqarnerpat? Taanna suliassinneqarsimavoq taamanikkut silarsuarmi pissaaneqarnerpaamut, Egyptenimi Faraomut, eqqartuussummik tusarliussat nalunaarutigiartussagai. Ullumikkuttaaq Jehovap nalunaajaasui eqqunngitsumik upperisarsiornermut peqatigiiffinnullu allanut Guutip naalagaaffianut pilersitamut akerliusunut eqqartuussutinik tusarliussisarput. — sarĸúmersitat 16:1-15.
10 Soorlu Mosesimik pisimasup takutikkaa suliassamik taama ittumik naammassinninniarneq oqitsuunngilaq. Taanna ima aperisimavoq: „Kinaagama Faraomukartinniarpinga Israelikkunnik Egyptenimit aniguisitsiartortillunga?“ Takorloorluarsinnaavarput qanoq imminut annikigitigisimassasoq. Aamma nunaqqatimi qanoq qisuariarnissaat ersissutigisimavaa: „Upperinngippanngami naalakkumanangalu?“ Taava Jehovap oqaluttuuppaa nammineq piginnaassuseqartitsinini qanoq ililluni takutissinnaagini. Mosesili aamma allamik ajornartorsiuteqarpoq: „[Jehova], tusaannga-aat. Uanga oqallorissuusimanngisaannarpunga maannalu uannut oqaloreerninni oqallorissinerunngilanga oqalunniarneq eqarisarakku.“ — 2 Moses 3:11; 4:1, 10.
11. Sukkut Mosesitut qisuariarsinnaasarpugut, uppernermilli ersersitsigutta suna tatigisinnaavarput?
11 Ilaannikkut Mosesitut misigisinnaasarpugut. Pisussaaffivut teokratiimik tungaveqartut nalunngilavut, immaqali suliarinissaannut sapersutut misigisarluta. ’Kinaagama inunnut saaffiginnitsinniarpinga, aamma ataqqisaasunut, pigissaartunut imaluunniit ilinniarluarsimasunut, Guutillu tusarliussaanik ilinniartinnissaannik neqeroorfigalugit? Ataatsimiinnerni oqaaseqaraangama imaluunniit teokratiimik ilinniarfimmi pisassannik saqqummiussaqaraangama anersaakkut qatanngutima qanoq isumaqarfigisarpaat? Amigaatikka tamaasa takusannginnerpaat?’ Eqqaamassavat Mosesip uppissusia Jehovap nalusimanngikkaa taamaattumillu suliassiissutiminik naammassinninniarnerani ilagisimagaa nakussatsillugulu. (2 Moses 3:12; 4:2-5, 11, 12) Moses upperneratigut malikkutsigu aamma uagut Jehovap ilagissavaatigut suliassatsinnullu nakussatsilluta.
12. Ajortit naammalluinnanngissutsillu pissutigalugit nikallungagaangatta Davidip uppernera qanoq qiimmassaatigisinnaavarput?
12 Ajortiminnik naammalluinnanngissutsiminnillu isumatsaatiginnittut imaluunniit nikalluutiginnittut David eqqarsaatigisinnaavaat. Taanna ima oqarsimavoq: „Massami unioqqutitsinikka ilisimavakka, ajortuliaralu takkunniitittuaannarpara.“ Aamma ilungersorluni Jehova ima qinnuigisimavaa: „Kiinnat alartiguk ajortuliannit, pinerluutikka nungullugit piiarigit.“ Jehovamulli kiffartorusussutsini nikallornermik sanngiillisinngisaannarsimavaa. Ima qinusimavoq: „Ilinnit peerseqinanga, anersaallu illernartoq uannit peerseqinagu.“ Nalunanngilaq David ’issumit pisoq’, ’uummammilli peqqissimisumik artorsaateqangaartumillu itigartitsinnginnissaminik’ Jehovap neriorsuutaanut uppernermik ersersitsigami ajattorneqanngilaq. — Tussiaat 38:2-10; 51:5, 11, 13, 19.
13, 14. (a) Sooq inunnik malinnittaasussaanngilagut? (b) Qanoq ililluni erserpa Paulus Peterilu aamma issumit piliaasut?
13 ’Nalunaajaasut eqimasut’ taakku kajumississutigisariaqarpavut ’nikallujuerluta arpalluta assoruunnitsinni uatsinnut siunertarititaasumi’, malugisariaqarparpulli nalunaajaasunut taakkununnga malinnittaasussaanngitsugut. Inunnut naammalluinnanngitsunut malinnittaasussaanngilagut, allaat ukiuni hundredelinni siullerni apustilinut aalajaatsunut, ’uppernermilli aallarniisumut inerititsisumullu Jesusimut’. — Eprîarit 12:1, 2; 1 Pîtruse 2:21.
14 Allaat apustilit Paulus Peterilu, tamarmik ilagiinni kristumiuni sukaasut, ilaannikkut naakkiuttarsimapput. ’Piumasara ajunngitsoq suliarisanngilara, kisianni piumanngisara ajortoq suliarisarpara,’ Paulus allassimavoq. ’Uanga inuukuluusunga!’ (Rûmamiut 7:19, 24) Peterilu pingaarniallatsiartorluni Jesusimut ima oqarsimavoq: ’Tamakkerlutik mamiatsaatigileraluarpatsit, uanga mamiatsaatiginngisaannassavakkit.’ Pingasoriarluni miserratigiumaarini Jesusip siulittuutigimmagu qulanngivilluni Peter ima akerliliivoq: ’Toqoqatigissagaluarukkilluunniit miserratigissanngilakkit.’ Pingasoriarlunili miserratigaa kukkuninilu aliasoqaluni qissatigalugu. Aap, Peter Paulusilu aamma issumit pisimapput. — Matîuse 26:33-35.
15. Naak issumit piliaannaagaluarluta qasusuinnissatsinnut suup kajumissisissinnaavaatigut?
15 Naak sanngiissuteqaraluartik Moses, David, Paulus, Peter allallu taakkunatut ittut misilinneqarnerminnik ajugaaffiginnittarsimapput. Qanoq ilillutik? Jehovamut sakkortuumik uppissuseqarnermikkut tatiginnilluinnarnermikkullu, naallu naakkiuttaraluartik taassumunnga qanimut attaveqartuaannarnermikkut. Tatigisimavaat ’pissaanermik angingaartumik’ tunisassagaatik. Taamaaliortarsimavorlumi, taamaattumillu ajortuliortooreeraangamik ajunngitsumik ingerlaqqilertarsimallutik. Uppernikkut aalajaattuaannarutta qularutigissanngilarput ima nipilimmik eqqartuunneqassalluta: ’Guuti iluaatsuunnginnami sulinersi asanninnersilu aqqa pillugu ileqqorisarsi puiussanngilai.’ — 2 Korintumiut 4:7; Eprîarit 6:10.
Issumit pinerput tamatsinnut ataasiakkaanut qanoq isumaqarpa?
16, 17. Jehova eqqartuussigaangami Galâsiamiunut agdlagkat 6:4-mi najoqqutassiaq qanoq atuutitittarpaa?
16 Angajoqqaarpassuit ilinniartitsisorpassuillu misilittakkatik naapertorlugit nalunngilaat meeqqat atuartullu ataasiakkaatut pisinnaasatik naapertorlugit nalilerneqartussaasut, qatanngutaannullu atuaqataannulluunniit naleqqiunneqartussaanatik. Tamanna Biibilimi najoqqutassiamut kristumiunut maleruaqquneqartumut naapertuuppoq: ’Kialuunniit nammineq suliani misililliuk, taava imminuinnaq usorsitsaatissaqassavoq aapparminullu pinnani.’ — Galâsiamiut 6:4.
17 Najoqqutassaq tamanna naapertorlugu Jehovap kiffani inuttut ataasiakkaatut nalilertarpai tamannalu ilutigalugu innuttamisut ataatsitut iliuuseqarfigisarlugit. Rûmamiunut agdlagkat 14:12-imi ima allassimavoq: ’Taamaattumik nungulluta immitsinnik Guutimut nassuersussaajumaarpugut.’ Jehovap kiffami tamarmik immikkut timikkut kingornuttakkatigut katitigaaneri nalunngilai. Timikkut eqqarsartaatsikkullu ilusilersugaaneri, piginnaasaat, pissusii kingornussat pitsaasut pitsaanngitsullu piginnaasaallu suli atorneqanngitsut nalunngilai. Aamma nalunngilaa kristumiutut inerititaqarniarlutik periarfissaminnik qanoq annertutigisumik iluaqutiginninniarnersut. Uillarneq utoqqasaaq naalaffiup nakkaatitsivianut aningaasannguanik ilisisoq pillugu Jesusip oqaasii, naatsiiassamillu issumut ajunngitsumut siaruarterneqartumik assersuusiaa, kristumiunut imminnut allanut naleqqiuttarnertik pissutigalugu isumatsassimasunut qiimmassaataasinnaapput. — Mákorse 4:20; 12:42-44.
18. (a) Sooq ilisimasariaqarparput issumit piliaanerput inuttut immitsinnut qanoq isumaqartoq? (b) Sooq ilumoorluta immitsinnut misissoraangatta isumatsattassanngilagut?
18 Pisinnaasannguavut naapertorlugit Jehova kiffartuuttariaqarparput, aatsaallu taamaaliorsinnaavugut issumit pinerput inuttut immitsinnut qanoq isumaqarnersoq paasisimagutsigu. (Ussatit 10:4; 12:24; 18:9; Rûmamiut 12:1) Aatsaat inuttut sanngiissutsivut ilisimalluarutsigik pisariaqartitavut siumukarnissatsinnullu periarfissavut eqqumaffigisinnaavavut. Imminullu misissornitsinni puiunngisaannartariaqarparput siumukarnissatsinnut qanoq tupinnartigisumik anersaap illernartup ikiorsinnaagaatigut. Anersaakkut illernartukkut nunarsuaq avataarsualu pinngortinneqarsimapput Biibililu allanneqarsimalluni, silarsuullu toqujartortup qeqqani silarsuassap nutaap inuiaqatigiivi eqqissinermik nuannarisaqartut pilersinneqarsimapput. Taamaattumik Guutip anersaava illernartoq ilisimassummik nakuussummillu aalajaattuaannarnissatsinnut pisariaqartunik qinnutivut tamaasa naammassissallugit pissaaneqarpoq. — Mika 3:8; Rûmamiut 15:13; Evfisumiut 3:16.
19. Issumit piliaanerput sumut patsigisiniartussaanngilarput?
19 Tuppallernaqaaq ilisimallugu Jehovap sumit pinerput nalunngikkaa — tassa issumit pinerput! Immitsinnulli isumaqalersinngisaannartariaqarpugut tamanna ilungersuussinnginnissatsinnut imaluunniit allaat ajortuliornissatsinnut patsisigisinnaallugu — taamaattussaanngimmammi! Jehovap issumit pinitsinnik eqqaamanninnera ajunngissutsimut pisassarinngisaraluatsinnut ersiutaavoq. Taamaattumik kissaatigissanngilarput ’iluaatsorsuunissarput Guutitta saammaanneranik kanngunartuliornermut atornerluisut naalakkersuisutuatsinnillu Naalakkatsinnik Jesus Kristusimik miserratiginnittut’. (Jûtarse 4) Issumit piliaanerput iluaatsuliornissamut patsigisassaanngilaq. Kristumiup eqqunngitsulioriartarnerit akiortarpai timini tilluartuarlugu kiffatut naalakkisartillugu, taamaalillunilu Guutip anersaava illernartoq aliasutsinngitsoorlugu. — Evfisumiut 4:30; 1 Korintumiut 9:27.
20. (a) Sutigut marlutsigut ’Naalakkami naammassisassarpassuaqarpugut’? (b) Sooq isumalluarluta siunissamut isigisinnaavugut?
20 Silarsuaq Satanimut atasoq ullussamini kingullerniippoq, taamaattumik ilungersorunnaaminissamut piffissaanngilaq — Naalagaaffimmik oqaluussissutiginninneq Guutillu anersaavata inerititaanik annertunerujartuinnartumik ineriartortitsiniarluta suliniutivut eqqarsaatigalugit. Tamakkunuunatigut suliassaqaqaagut. Piffissaq pissutigalugu aalajaattariaqarpugut, qularutiginagu ’suliniarnivut Naalakkami asuliinnaanngitsut’. (1 Korintumiut 15:58) Jehovap napatissavaatigut, taannami pillugu David ima oqarsimavoq: „Iluartoq patajatinngisaannassavaa.“ (Tussiaat 55:23) Nuannaarutigisariaqarparput Jehovap tamatta immikkut suliamut angingaartumut inunnut naammalluinnanngitsunut suliassiissutigineqarsimasut annerpaartaannut peqataatimmatigut — massa issumit pisugut! (wD 1/9 94)
[Quppernerup ataani ilanngussaq]
a Herders Bibelkommentar-imi (tyskisooq) Guutip isumaa Tussiaat 103:14-imi ersertoq ima oqaatigineqarpoq: „Nalunngilaami inuit nunap pujoralaanit pinngortissimallugit, inuunerminnilu sanngiissusii aserujassusiallu, ajortilinngornermiilli artorsaatigisimasaat, nalunngilai.“ — Uagut allanneri uingasunngortippavut.
Nassuiarsinnaaviuk?
□ Inuup issumit pinera pillugu 1 Moses 2:7-imi aamma Tussiaat 103:14-imi allassimasut qanoq assigiinngissuteqarpat?
□ Ullumikkut kristumiut Eprîarinut agdlagkat kapitaliisa 11-at qanoq ilillutik tuppallersaatigisinnaavaat?
□ Sooq silatusaarnerua najoqqutassaq Galâsiamiut 6:4-miittoq maleruassallugu?
□ Eprîarinut agdlagkat 6:10 aamma Korintumiunut agdlagkat siugdlît 15:58 qanoq ilillutik nikallornissamut illersuutaasinnaappat?
[Qupp. 25-mi assiliartaq]
Kristumiut uppernermikkut imminnut malittarput, uppernikkulli inerititsisuminnut, Jesusimut, malinnittaapput