Kiserliorneq inuuninnut aseruutaateqinagu

KISERLIORNEQ inuusuttut utoqqaallu inuunerannut aseruutaasinnaavoq. Atuakkiortoq Judith Viorst atuagassiami Redbook-imi ima oqarpoq: „Kiserliorneq ujaqqatut uummammik artorsiisinnaavoq . . . Kiserliorneq imaqanngitsutut misiginermik isumatsannermillu kinguneqartarpoq. Kiserliornerup misigitilertarpaatigut meeqqatut anaanaqanngitsutut, savatut tammarsimasutut, aap, inuaqqatut silarsuarmi angeqisumi nilleqisumilu tammartajaartutut.“ — septembari 1991.

Inuunermi pissutsit assigiinngitsorpassuit kiserliortitsilersinnaapput: ikinngutinit avissaarneq, avatangiisit sungiusimanngisat, avinneq, toqusoorneq ilaqutariinnilu oqaloqatissaqannginneq. Allaammi inuppassuit akornanniikkaluarluni kiserliortorujussuartut misigisoqarsinnaavoq.

Qanoq iliortoqarsinnaava?

Kiserliortutut ikioriarfissaqanngitsutut imminut isigiinnartariaqarpa? Imaluunniit kiserliornerup inuunermik aseruiartuaarnissaralua imaluunniit inoorusukkunnaarsitsiartuaarnissaralua pinngitsoortinniarlugu iliuuseqartoqarsinnaava? Aap, iliuuseqartoqarsinnaavoq. Siunnersuuterpassuit iluaqutaasut nassaassaasut, aammalu unnersuussutit kajumissinartullu Guutip oqaasiani, Biibilimi, nassaassaasut, taakkorpiaasinnaapput kiserliornermut akiuunnermi pisariaqartut. — Matîuse 11:28, 29.

Qularnanngitsumik qiimmaallassaatit arnaq inuusuttoq Rutimik atilik, ukiut 3000-it matuma siorna kangiani qiterlermi inuusimasoq, pillugu atuaruit. Taanna kiserliornermik naalliuuteqarnissaminut pissutissaqarsimavoq. Uini toqummat sakini ilagalugu aallarsimavoq Israelimilu avatangiisini sungiusimanngisamini najugaqalerluni. (Rut 2:11) Ilaquttani ikinngutinilu najorunnaarpai, nunamilu takornakkamini allamiutut inuulerluni. Biibilimi oqaatigineqanngilaq kiserliornerup itinersuanut nakkaannarsimasoq. Taanna pillugu oqaluttuaq Biibilimi Rutimik allakkani atuarneqarsinnaavoq.

Rutitut inuunermut ajunngitsumik isiginninniarsarisariaqarpoq. Pissutsinimmi isiginnittaatsimit kiserliortutut misigineq sakkortusarneqarsinnaasarpoq. Tamanna Annip upernarsarsinnaavaa. Taassuma ataatani perulunnartumik napparsimasoq ukiuni sisamani paaqqutarisimavaa. Toqummat kiserliortutut qimagaasutullu sakkortoorujussuarmik misigilersimavoq. „Imaqanngitsutut atorsinnaanngilluinnartutullu misigaanga. Atorfissaarunneqartutut misigaanga,“ oqaluttuarpoq. „Paasilerparali inuunera allanngorsimasoq, paasivaralu kiserliortutut misiginera annikillisassagukku pissutsit atulikkakka sapinngisamik pitsaanerpaamik atorluarniartariaqalerlugit.“ Pissutsit atukkat tamatigut allanngortinneqarsinnaaneq ajorput, tamakkununngali isiginninneq allanngortinneqarsinnaavoq.

Soorunami naammassisaqarniarluni ulapinnerinnaq kiserliornermik peerluinnartitsisinnaanngilaq, iluaqutaavorli. Irenep tamanna misigisimavaa. Taanna qaammatini arfiniliinnarni katissimareerluni uillarninngorsimavoq, oqarporlu: „Sammisaqarpianngikkaangama kiserliortutut misiginera sakkortunerpaasarpoq. Taamaattumik inuit allat ajornartorsiutaannik ikiorniarlugit ulapputeqarniarsarisarpunga.“ Inunnik allanik ikiuineq nuannaalernarpoq, kristumiullu kiserliortut Naalakkap suliaani sammisassarpassuaqarput. — apustilit suliait 20:35; 1 Korintumiut 15:58.

Ikinngutinnit ikiortigit

Atuagassiami The New York Times Magazine-mi meeqqat kiserliortut tassaanerarneqarput ’ikinnguteqannginnertik pissutigalugu aliasuuteqartut’. (28. apriili 1991) Kiserliortorpassuit — inuusuttut utoqqaallu — oqartarput ikinnguteqaratik. Taamaattumik uagut ilagiit kristumiut isumassuiumatuut iluini ikinngutigiinneq piviusoq iluaqutigilluarsinnaaqaarput. Ilagiinni ikinnguteqarnerulerniarlutit iliuuseqarit, ikinngutivillu sapinngisaminnik ikiuerusussuisat ilassiuk. Ikinngutigiinnerummi siunertaanut ilaavoq atoruminaatsuni tapersersortissaqarnissaq. — Ussatit 17:17; 18:24.

Eqqaamasariaqarporli ikinngutit ikiuerusunnerigaluat misigissutsikkut artorsaateqarnerup nassatarisaanik ajornakusoortinneqarsinnaammat. Qanoq ililluni? Atuakkiortoq Jeffrey Young ima oqarpoq: „Kiserliortut ilaasa . . . ikinngutissaagaluatik qimaasisarpaat, oqalungaaramik oqariarsinnaatinneq ajoramikkik, imaluunniit ippinnartunik ajuallannartunilluunniit oqaaseqartaramik. Inuit kiserliortuaannartut inunnut allanut qanimut attaveqarnermik qanorluunniit ilillutik aserueqqajaasarput.“ — U.S.News & World Report 17. septembari 1984-imoortoq.

Inunnit allanit avinngarusimaniarnikkut pissutsit ajornerulersinneqarsinnaasarput. Angutip 50-it sinnerlugit ukiullip Peterimik atillip tamanna misigisimavaa. Nuliani toqummat inunnit allanit tunuarsimaalersimavoq, naak ikiorneqarnissani qamuuna kissaatigigaluarlugu. Ima oqarpoq: „Ullut ilaanni inunnik allanik ilaqarnissara sapertarpara, piffissallu ingerlanerani inunnut allanut attaveqarnaveersaartalerpunga.“ Tamanna navianarsinnaavoq. Soorunami ilaannikkut kisimiilaartarneq iluaqutaasinnaavoq, allanilli immikkoorluinnarniarneq ajoqutaavoq. (Ussatit 18:1) Tamatuma naleqassusia Peterip paasivaa, oqarporlu: „Kiisami qaangerpara. Pissutsit atulikkama akuerinissaat ilikkarpara, ikinngutinnillu ikiorneqarlunga qujanartumik inuunera allanngortippara.“

Isumaqassanngilagut allat uagutsinnik ikiuinissaminnut arlaatigut pisussaaffeqartut. Taamaattumik piumasaqarpallaarnaveeersaartariaqarpugut, inussiarnisaarnerilli suulluunniit ersersinneqartut ilassilluartariaqarlugit iliuuserineqartunillu qujamasunnerput ersersittariaqarlugu. Aamma Ussatit 25:17-imi siunnersuut pitsaasoq eqqaamasariaqarparput: „Ikinngutivit illuanut iseriartukulavallaarniaqinak qatsuteqinammatit uumigilerlutillu.“ Frances isumaqarpoq mianersoqqussutip tamatuma ilumoorunnissaa pingaaruteqartoq. Taanna kiserliortorujussuanngorsimavoq ukiut 35-t aappareereerlutik uini toqummat. „Allat ingasattumik isumalluarfiginiaqinagit,“ oqarpoq, „aamma piumaffigivallaassanngilatit. Tamatigorluinnaq ikiortissarsiortarniaqinak.“

Jehovap isumassorpaatigut

Naak ikinngutivut ilaannikkut pakatsisitsisinnaagaluartut, Jehova Guuti ikinngutigiuaannarparput. Tatigisinnaavarput isumassussagaatigut. Taanna tamatigut tatigilluinnartariaqarparput suluisalu sernissuisut ataannut qimarnguissarsiuaannartariaqarluta. (Tussiaat 27:10; 91:1, 2; Ussatit 3:5, 6) Moabimiu Rut taamaaliorsimavoq pilluaqqusaangaarlunilu. Aap, allaammi Jesus Kristusimut siuaasanngorsimavoq! — Rut 2:12; 4:17; Matîuse 1:5, 16.

Jehovamut qinujuartariaqarpugut. (Tussiaat 34:5; 62:8, 9) Margaretip kiserliornermut akiuunnermini qinuneq nakuussutigilluarsimavaa. Taassuma uini siusissukkut toqunissaa tikillugu piffissaq tamaat oqaluussisartooqatigisimavaa. Oqarpoq: „Isumaqartuaannarsimavunga pitsaasuusoq nipituumik qinulluni Jehovap sunik tamanik oqaluttuunnissaa, ilaatigut ersinermik isumakuluutinillu. Kiserliornerup artorsartippallaaleraanganga pissutsit eqqortumik isiginiarnissaannut tamanna iluaqutigisarsimavara. Qinnutikka tamakku qanoq Jehovap akigai takusarpakka, tamannalu tatiginnilissutigaara.“ Apustilip Peterip siunnersuutaanik maleruaanini taassuma assut iluaqutigisimavaa: ’Taamaattumik nikanartinniaritsi Guutip assai pissarsuit atangerlugit, taassumunnga taamaaliffissami akitsiseqqullusi. Isumakuluutisilu tamaasa taassumunnga pisissigik, isumassormasi.’ — 1 Pîtruse 5:6, 7; Tussiaat 55:23.

Jehovamut ajunngitsumik attaveqarutta imminut ataqqiuaannarnissatsinnut iluaqutigissavarput — kisimiittulli imminut ataqqinertik annaakulasarpaat. Tusagassiortup Jeannette Kupfermannip uini kræfterluni toqummat ’nalikitsutut atorsinnaanngitsutullu misiginini’ allaatigisimavai. Oqarpoq: „Sumulluunniit atorsinnaajunnaartutut misiginerup tamatumarpiaap uillarnerpassuit isumatsassimatilertarpai imminoqqajaalersillugit.“

Eqqaamasariaqarparput Jehovap pingaartittorujussuugaatigut. Jehovap isaani atorsinnaanngitsuunngilagut. (Juánase 3:16) Annertoqqusersussavaatigut, soorlu itsaq innuttani Israelikkut annertoqqusersortarsimagai. Taakkununnga ima oqarsimavoq: „Ajattunngisaannassavakkit! Siooraqinak ilagigakkit, erseqinak uangaagama illit Guutit! Assannik annatsitsisumik pissatsippakkit, ikiorpakkit najummillutillu.“ — Jesaja 41:9, 10.

Guuti pisuuteqinagu

Kiserliornitsinnut Guuti pisuutinngisaannartigu. Jehova pisuunngilaq. Taassuma siunertariuaannarsimavaa inuit tamarmik pitsaasumik ineriartornartumillu najortigiinnertik nuannaarutigissagaat. Adam pinngortikkamiuk ima oqarsimavoq: „Iluanngilaq inuk kisimiimmat, ikiortissiussavara taassumunnga tulluartumik.“ (1 Moses 2:18) Guuti taamaaliorpoq Eva, arnaq siulleq, pinngortikkamiuk. Satan pikitsitsisimanngitsuuppat angut arnarlu, meerariligaallu, kiserliornermik misigisaqanngisaannarsimassagaluarput.

Jehovap ajussutsimik ilaginnaagallarsimanera soorunami kiserliornermik naalliuutinillu allanik nassataqarsimavoq. Puiunngisaannassavarpulli naalliuutit tamakku utaqqiisaannaammata. Kiserliornermik misilinneqaatit Guutip silarsuassami nutaami uagutsinnut iliuuseriumaagassai eqqarsaatigalugit isigineqarangaamik artornannginnerusarput. Silarsuassaq nutaaq atuutilertinnagu annertoqqusersortarnissarput tuppallersartarnissarpullu neriorsuutigisimavaa. — Tussiaat 18:3; Filípimiut 4:6, 7.

Tamatuminnga ilisimanninnerput nakuussutigisinnaavarput. Eqqaaneqareersup Francesip uillarninngorami ingammik unnukkut Tussiaat 4:9-mi oqaatsit atuassallugit assut tuppallernarisimavai: „Eqqissillunga innassaanga sinilerlungalu, illit [Jehova] kisivit eqqissinartumik qasuersaartikkamma.“ Oqaatsit taakku Tussiaatinilu oqaatsit allat eqqarsaatigisassallugit iluaqutaassaaq. Isumaliutigisaruk qanoq Guutip isumassortaraatigut, soorlu Tussiaat 23:1-3-mi ersersinneqartoq.

Kiserliortoq qanoq ikiorneqarsinnaava?

Kiserliortoq pingaarnerpaamik ikiorneqarsinnaavoq asanninnermik ersersitsivigineratigut. Biibilimi Guutip kiffai kajumissaarneqartuarput asanninnermik ersersitsivigeqatigiittarnissaannik, ingammillu taamaattariaqarpoq misilinneqarfinni. Apustili Paulus ima allassimavoq: ’Qatanngutigiissutut asaqatigiigitsi ungagiillusi.’ (Rûmamiut 12:10) Aap, Guutip oqaasii isumassarsiarititaasut ima oqarput: ’Asanninneq soraarnavianngilaq.’ (1 Korintumiut 13:8) Kiserliortut qanoq ililluni asanninnermik ersersitsivigineqarsinnaappat?

Kiserliortut ajattornagit sumiginnarnagilluunniit inuttut ataasiakkaatut isumassuinermik ungaginninnermillu ersersitsivigisinnaavavut periarfissatigut tamatigut ikiortarnerisigut. Jobitut ima oqartutut iliorsinnaavugut: „Inukulunnguaq ikioqqulluni nilliasoq annaattarakku iliarsullu ikiorteqanngitsoq ikiortarlugu. . . . uillarnerillu uummataat qiimmatsittarpakka.“ (Job 29:12, 13) Aamma ilagiinni kristumiuni utoqqaanertat toqqakkat ikinngutillu misiginneqataasut paasineqarnissamik, asaneqarnissamik annertoqqusersorneqarnissamillu inuit pisariaqartitaat tunngaviusut matussutissinniarlugit isumatusaartunik iliuuseqartarsinnaapput. Misiginneqataanermik ersersitsivigisinnaavaat oqaloqateqarnissamillu pisariaqartitaat matussutississinnaallugu. — 1 Pîtruse 3:8.

Ikinngutit iliuusii annikitsunnguugaluit amerlasuutigut qujamasunnarnerpaasarput. Assersuutigalugu uppeqat toqukkut annaasaqarpat ajunngitsorujussuarmik iliortoqarsinnaavoq ilumoortumik ikinngutaanermik iliuutsikkut ersersitsinikkut. Inussiarnernermik ersersitsinerit annikitsut pingaaruteqassusiat suusupageqinagu, soorlu neriartoqqusineq, tusarnaarneq imaluunniit qiimmannartumik oqaloqatigiinnerit. Tamakku kiserliornermut akiuunnermi iluaqutaasorujussuusarput. — Eprîarit 13:16.

Qularnanngitsumik ilaannikkooriarluta kiserliornermik misigisaqartassaagut. Kiserliornerli naalliunnartunngortariaqanngilaq. Inuunerit sammisassanik pingaarutilinnik pitsaasunillu imaqartiguk. Ikinngutivit pisinnaasartik naapertorlugu ikiuerusussusiat ilassiuk. Jehova Guuti tatigiuk. Neriorsuut qiimmannartoq Tussiaat 34:20-miittoq puiunngisaannaruk: „Iluartup perlussiuutai amerlaqaat, [Jehovalli] tamakkunannga tamanit annaattarpaa.“ Jehovamut ikiortissarsiorit kiserliornerlu inuuninnut aseruutaateqinagu.

[Qupp. 29-mi ungalusaq]

KISERLIORNEQ QANOQ AKIORNEQARSINNAASOQ

◼ Jehovamut qanimut attaveqarit

◼ Biibilimik atuarnikkut tuppallersaatissarsiortarit

◼ Isumalluartumik kristumiorpalaartumillu eqqarsarit

◼ Sammisassanik pitsaasunik ulapputeqarit

◼ Ikinngutitit amerlisakkit

◼ Ikinngutivit ikiuinissaat oqilisaruk

◼ Immikkoorniaqinak asanninnerli avammut ammasoq ineriartortiguk

◼ Jehovap ilinnik isumassuinissaa tatigiuk

[Qupp. 29-mi ungalusaq]

KISERLIORTUT QANOQ IKIORNEQARSINNAASUT

◼ Paasinnittuugit, asannittuugit tuppallersaasarillu

◼ Oqaloqateqarnissamik pisariaqartitaat matussutissiguk

◼ Annikitsualunnik iluaqutaasunik iliuuseqartuaannarit

[Qupp. 28-mi assiliartaq]

Naak artornartorsioraluarluni Rutip kiserliorneq inuunerminut aseruutaatinngilaa