Guutip kiffai — inuiaat aaqqissuussaasut pilluartullu

„Pilluarput inuiaat [Jehovamik] Guuteqartut!“ — TUSSIAAT 144:15.

1, 2. (a) Sooq Jehova kiffaminut najoqqutassiornissaminut pisussaava? (b) Jehovap ilisarnaataasa ilaat marluk suut ingammik ilaarniartariaqarpavut?

JEHOVA qilammi nunamilu kisimi oqartussaavoq, Guutiuvoq ajugaqanngitsoq, Pinngortitsisoq. (1 Moses 1:1; Tussiaat 100:3) Kiffami qanoq ileqqoqarnissaannut najoqqutassiornissamut pisussaavoq, taakkununnga suna pitsaanerpaasoq nalunnginnamiuk. (Tussiaat 143:8) Innuttaminut tassaavoq Maligassaq Annerpaaq taakkua ilaartariaqagaannik pissusilik. ’Guuti qitornatut asanartutut malinniarsiuk,’ apustili taama allassimavoq. — Evfisumiut 5:1.

² Guutip ilisarnaataasa ilaat ilaartariaqagarput aaqqissuussaanermut tunngavoq. Taannami ’ularussinermut Guutiunngilaq’. (1 Korintumiut 14:33) Guutip pinngortitarsui qimerlooqqissaaraangatsigik pinngitsoorata isummertariaqartarpugut taanna tassaasoq qilammi nunamilu aaqqissuussaatitsinerpaaq. Guutip ilisarnaataa alla kiffaasa ilaartariaqagaat tassa pilluarneq, ’Guutiuvormi pilluartoq’. (1 Timûtiuse 1:11) Taamaattumik aaqqissuusseriaasia pilluarnermik ilaqarpoq. Pissusii tamarmik oqimaaqatigiilluinnartuupput.

3. Qilammi ulloriarpassuit Guutip aaqqissuussisinnaassusianik qanoq takutitsippat?

³ Jehovap tassaanera aaqqissuussaanerup Guutia piliaani tamani, annerpaanit minnerpaanut, takuneqarsinnaavoq. Avataarsua takussaasoq eqqarsaatigisinnaavarput. Millionilippassuarnik ulloriaqarpoq. Piumasaannarmilli inissitsitigaanngillat. Ullorissanik ilisimatuup George Greensteinip malugisimavaa ’ullorissat aaqqissuussaanerat najoqqutaqartoq’. Ulloriaqatigiippassuakkuutaarput aaqqissuussaasunik galaksenik taaneqartartunik, ilaat hundredemillionilippassuakkuutaarlutik. Isumaqartoqarporlu millionilikkuutaanik galakseqartoq! Galaksit aamma aaqqissuussaapput, ilaat (ikittunnguaniit arlalinnik tuusintilinnut) galakserpassuaqatigiikkuutaaniillutik. Isumaqartoqarporlu galakserpassuaqatigiikkuutaat ataatsimooqatigiinnut suli annernut ilaasut. — Tussiaat 19:2; Jesaja 40:25, 26.

4, 5. Nunarsuarmi uumassusilinni aaqqissuussaaneq pillugu asersuuteqarit.

⁴ Guutip pinngortitaasa aaqqissuulluagaalluinnarnerat sumi tamaani takussutissaqarpoq, qilammi takussaasuniinnaanngitsoq aammali nunarsuarmi uumassusilippassuarni. Tamakkorpassuit tamaasa eqqarsaatigalugit fysikkimi professori Paul Davies allassimavoq „silarsuarmi takussaasumi tupinnaannartumik aaqqissuussaalluinnassuserlu paasiuminaatsoq“ paasiniaasartut ’tupigusuutigeqigaat’. — Tussiaat 104:24.

⁵ Uumassusilinni ’aaqqissuussaanermut paasiuminaatsumut’ assersuutissaaluit eqqarsaatigeriakkit. Qaratsamik pilattaasartoq Joseph Evans inuup qarasaa qiteraalu pillugit ima oqarsimavoq: „Aaqqissuussaalluassusiat uissuumminaannarporluunniit.“ Cellit uumassusillit mikilluinnartut pillugit bakterianik ilisimatooq H. J. Shaughnessy ima oqarsimavoq: „Uumassusilinni mikingaaramik takuneqarsinnaanngitsuni paasiuminaassutsip torissutsillu nuannersup ilusilersugaaneri ima kusanartigipput Guutip aaqqissuussaanut ilaasutut ilimanarlutik.“ Biologi Michael Denton cellini kingornuttakkat ilisarnaataat (DNA) pillugu ima oqarsimavoq: „Ima piginnaassuseqartigaaq paasissutissat . . . uumassusillit nunarsuatsinni uumasuusimasut tamarmik immikkut pissusersinissaannut pisariaqartut . . . alussaateeqqamiissinnaallutik sulilu paasissutissanut atuakkani allanneqarsimasuni tamaniittunut inissaqassalluni. — Tussiaat 139:16.

6, 7. Pinngortitat anersaajusut akornanni aaqqissuussaaneq qanoq erserpa, taakkulu Pinngortitsisiminnut qujamasunnertik qanoq ilillutik ersersippaat?

⁶ Jehovap pinngortitani takussaasuinnaanngitsut aammali anersaat qilammiittut takussaanngitsut aaqqissuussiffigisimavai. Daniel 7:10-mi oqaatigineqarpoq inngilit ’tuusintilikkuutaat Jehovap saani qeqartut’. Anersaat pissarsuit hundredemillionilikkuutaat kiffartortut, tamarmik suliaani minguitsumi ikiuuttut! Taama amerlatigisunik aaqqissuussiniarnermi pikkorissutsip qanoq atsigisimanissaa eqqarsaatigalugu uissuumminaannarpoq. Naleqquttumik Biibilimi ima allassimavoq: „[Jehova] nersorsiuk, ilissi inngilii, ilissi pissarsuit peqqusaanik naammassisitsisartut oqaasii tusaannaraangassigit. [Jehova] nersorsiuk, katersai tamassi, ilissi kiffai naammassisitsisartut piumasaanik.“ — Tussiaat 103:20, 21; sarĸúmersitat 5:11.

⁷ Pinngortitsisup suliai tupinnaannartumik aaqqissuussaalluarlutillu kinguneqarluartaqaat! Tupinnanngilaq pinngortitat anersaajusut pissarsuit qilammiittut ataqqinnippaloqalutik maniguuppalullutillu ima nillermata: ’Jehova Guuterput, ilinnut pigititassaapput naalannaat ataqqinaallu pissaanerlu illit suut tamaasa pinngortikkakkit, illillu peqqusakkut ipput pinngortitaallutillu.’ — sarĸúmersitat 4:11.

8. Sutigut erserpa Jehovap nunarsuarmi kiffani aaqqissuussaatikkai?

⁸ Jehovap aamma kiffani nunarsuarmiittut aaqqissuussaatippai. Noap nalaani ukiumi 2370-imi u.n.s. ulersuaqartitsimmat Noa allallu arfineq-marluk ilagalugit ilaqutariittut aaqqissuussatut annapput. Ukiumi 1513-imi u.n.s. Jehovap innuttani arlalinnik millionillit Egyptenimit aniguisippai inatsisinillu sukumiisunik, ulluinnarni suliassaminnik pallorfiginninnermillu aaqqissuussinerminni atugassaannik, tunillugit. Kingornalu nunami neriorsuutigisaasumi ilaat arlalinnik tuusintillit naalaffimmi immikkut kiffartuuteqartussatut aaqqissugaapput. (1 Israelikkut 23:4, 5) Ukiuni hundredelinni siullerni ilagiit kristumiut Guutip siulersuineratigut aaqqissuussaapput, soorlu allassimasoq: ’Ilaallu taassuma apustilinngortippai, ilaat pruffiitinngortippai, ilaat iivangkiiliulersaartunngortippai, ilaat paarsisunngortippai ajoqersuisunngortillugillu, iluartut naamattunngoqqullugit, kiffartuutissaq suliareqqullugu.’ — Evfisumiut 4:11, 12.

Ullumikkut kiffai aamma aaqqissuussaapput

9, 10. Nalitsinni innuttani Jehovap qanoq ililluni aaqqissuussiffigisimavai?

⁹ Ullumikkuttaaq Jehovap kiffani aaqqissuussimavai nalitsinni suliassarititani kinguneqarluartumik suliariniassammassuk — tassa ullumikkut pissutsit aaqqissuussaanerata ajortup suujunnaarsinnginnerani Naalagaaffimminik nutaarsiassaq nuannersoq oqaluussissutigalugu. (Matîuse 24:14) Eqqarsaatigeriaruk nunarsuaq tamakkerlugu suliaq tamanna qanoq imaqartoq aaqqissuussaalluarnissaalu qanoq pingaartigisoq. Angutit, arnat meeqqallu millionilikkuutaat Biibilip sallusuissutaanik inunnik allanik ilinniartitsinissaminnut sungiusarneqarput. Sungiusaanermut tamatumunnga tapertaritillugu Biibilerpassuit atuagassiarpassuillu Biibililersaarutaasut naqiterneqartarput. Soorlu Napasuliaq Alapernaarsuiffik oqaatsinut 116-inut 16 millioninngorlugu naqiterneqartarpoq, Iteritsi!-lu oqaatsinut 73-inut 13 millioninngorlugu naqiterneqartarluni. Atuagassiat normui tamangajammik ataatsikkut saqqummersinneqartarput Jehovap kiffai paasissutissanik ataatsikkut pisinaaqqullugit.

¹⁰ Aammalu Jehovap nalunaajaasuisa ilagiivi nunarsuaq tamakkerlugu 73.000-init amerlanerusut aaqqissuussaasunik aalajangersimasunik ataatsimiittarput Biibilimik ajoqersorneqarniarlutik. (Eprîarit 10:24, 25) Aamma ukiut tamaasa ataatsimeersuartarput. Nunarsuaq tamakkerlugu Naalagaaffilersaartarfiit, ataatsimeersuartarfiit, angerlarsimaffiit Betelit atuagassianillu Biibililersaarutinik naqiterinermi atortorissaarutit sanaartorneqarlutillu allilerneqartarput.a Kiisalu ajoqersuiartortitanut pioneerinullu atuarfiit ingerlaqqiffiusut assigiinngitsut nunarsuaq tamakkerlugu ingerlanneqarput.

11. Aaqqissuussilluarnermik ullumikkut ilinniarneq siunissami qanoq iluaqutaassava?

¹¹ Jehovap innuttani nunarsuarmiittut ’iivangkiiliulersaartup suliassaanik’ naammassinninnissaannut ilumut aaqqissuulluarsimavai! (2 Timûtiuse 4:5; Eprîarit 1:13, 14; sarĸúmersitat 14:6) Innuttami aaqqissuussaalluarnermik ilitsersuunnerisigut Guuti aamma allamik siunertaqarpoq. Tassa innuttai piareersarluarneqarput pissutsit aaqqissuussaanerata matuma naggatissaani annallutik silarsuassami nutaami inuulerunik aaqqissuussaalluagaareersimassagamik. Taava Jehovap siulersuineratigut aaqqissuulluagaallutik nunarsuaq tamakkerlugu paratiisiliorlutik aallartissapput. Aamma Guutip inuuneq pillugu piumasaqaataasa sukumiisut inunnut milliardilikkuutaanut toqumit makititaasunut ilinniartitsissutiginissaannut piareersagaalluarsimassapput. — Jesaja 11:9; 54:13; apustilit suliait 24:15; sarĸúmersitat 20:12, 13.

Aaqqissuussaasut pilluartut

12, 13. Sooq oqarsinnaavugut Jehovap kissaatigigaa kiffani pilluassasut?

¹² Naak Jehova sulillaqqilluinnartuugaluarluni aaqqissuussillaqqilluinnartuugaluarlunilu misigittaatsuunanilu, sukannersuunanilu qeratasuujunngilaq. Akerlianilli asannilluinnartuuvoq, pilluartuulluni uagut pilluarnissatsinnik kissaateqartoq. ’Isumassorpaasi,’ 1 Peter 5:7-imi allassimavoq. Isumassuinera kiffamilu pilluarnissaannik kissaateqarnera inunnut iliuuserisimasaasigut takuneqarsinnaavoq. Assersuutigalugu Guutip angut arnarlu naammalluinnartut pinngortikkamigit paratiisimut nuannersumut inissisimavai. (1 Moses 26-31; 2:8, 9) Annerpaamik pilluarsinnaaqqullugit pisariaqartitaannik tamanik tunivai. Pikitsitsinermikkulli tamakku tamaasa annaavaat. Taakkua ajortuliornerata kingunerisaanik naammalluinnanngissuseq toqulu uagut kingornussimavavut. — Rûmamiut 3:23; 5:12.

¹³ Ullumikkut naak naammalluinnanngitsuugaluarluta Guutip iliuuserisimasai suli pilluaatigisinnaavavut. Nuannaarutissarpassuaqarpugut — qaqqarsuit ataqqinarpaluttut; tatsit, kuussuit, immat sissallu kusanartut; naasut assigisaallu qalipaatigissaarlutillu tipigissut; nerisassat mamartut assigiinngitsorpassuit; seqernup tarrilerneri alianaaqisut qatsussinnaanngisavut; qilak ulloriarpassualik unnukkut alutorsaatigisinnaasarput; uumassusillit assigiinngitsorpassuit meeqqallu inequnartut piitaariallaqqissut; nipilersukkat isumassarsinartut; suliassat soqutiginarlutillu siunertaqarluartut; ikinngutit pitsaasut. Ersareqaaq tamakkuninnga tamanik Piliortoq pilluartuusoq allanik nuannaartitsinissaminik nuannarinnittoq.

14. Qanoq oqimaaqatigiissumik ilaassagitsinni Jehovap piumasaraa?

¹⁴ Kinguneqarluartussamilli aaqqissuussinissani Jehovap kissaatigiinnanngilaa, aammali kissaatigaa kiffami immisulli pilluarnissaat. Kissaatiginngilaa pilluarnerannik arsaarisumik ingasattajaartumik aaqqissuussiffiginissaat. Guutip kiffaasa aaqqissuussinermut tunngasut Guutip iliorneratut pilluarnermik ilaqartittariaqarpaat, anersaavatami illernartup pissaanilissuup qulangigai tamarmik nuannaarfiusarput. Soorlumi Galâsiamiut 5:22-mi takutinneqartoq Guutip anersaavata illernartup taassuma innuttaani sunniisup inerititaasa aapparaat tipaatsunneq.

Asanninneq pilluarnermik ineriartortitsisarpoq

15. Sooq pilluarnissatsinnut asanninneq taama pingaaruteqartigaa?

¹⁵ Soqutiginartorujussuuvoq malugissallugu Biibilimi ima allassimasoqarmat: ’Guuti asassutaavoq.’ (1 Juánase 4:8, 16) Ima oqartoqarsimanngisaannarpoq: ’Guuti tassaavoq aaqqissuussaaneq.’ Asanninneq Guutip pissusiisa pingaarnersaraat, asanninneralu tamanna kiffaasa ilaartariaqarpaat. Taamaattuminguna Galâsiamiut 5:22-mi Guutip anersaavata inerititaasa tulleriiaarlugit taagorneqarneranni ’asanninneq’ siulliullugu taaneqarsimasoq, ’tipaatsunneq’ tulliullugu. Asanninneq nuannaarnermik ineriartortitsisarpoq. Inunnut allanut iliuuseqartarnitsinni Jehovap asanninnera ilaartarutsigu pilluarnermik misigisaqartassaagut, inuimmi asannittut inuupput pilluartut.

16. Asanninnerup pingaaruteqassusia Jesusip qanoq ililluni ersersissimavaa?

¹⁶ Guutip asanninnerata ilaarnissaa Jesusip ajoqersuinermini pingaartutut saqqummiussimavaa. Ima oqarsimavoq: ’Soorlu Ataatama ajoqersoraanga taama oqaluppunga.’ (Juánase 8:28) Ingammik sumik Jesus ajoqersorneqarsimava allanut ingerlateqqitaminik? Inassutinik pingaarnerpaanik marlunnik tassaasunik Guutimik asanninnissaq tullermillu asanninnissaq. (Matîuse 22:36-39) Jesus asanninnermik taama ittumik maligassiusimavoq. Ima oqarsimavoq: ’Ataataq asavara.’ Tamannalu uppernarsarsimavaa toqussi tikillugu Guutip piumasaanik iliortuarnermigut. Inunnullu asanninnini ersersissimavaa taakku pillugit toqunermigut. Apustilip Paulusip kristumiut Efesusimiittut ima oqarfigisimavai: ’Kristusip asavaasi imminillu pilluta tunniulluni.’ (Juánase 14:31; Evfisumiut 5:2) Taamaattumik Jesusip malitsini ima oqarfigisimavai: ’Inassutiga tassa asaqatigiissasusi, soorlu uanga asagissi.’ — Juánase 15:12, 13.

17. Paulusip qanoq ersersissimavaa allanut asanninerup pingaarluinnassusia?

¹⁷ Guutimik asanninnerup tamatuma pingaarluinnassusia Paulusip ima oqarluni ersersippaa: ’Inuit inngilillu oqaasiinik oqaluttaraluaruma asannissuseqarnangali, kanngussak sianaartoq avilortunnguarluunniit sianaalasoq taava assigeqqajaqaakka. Pruffiitisullu oqalussinnaagaluarumaluunniit, anngigisallu tamaasa ilisarsissutillu tamaasa ilisimagaluarukkit, uppernerlu tamaat pigigaluarukku qaqqarsuit nutsersinnaagaluarlugit allaat, asannissuseqarnangali, taava suunngeqqajaqaanga. Pikkalu tamaasa tunniukkaluarukkit, timigalu ikikkartikkaluarukku, asannissuseqarnangali, taava iluaqutiginngeqqajaara. . . . Maannali uku pingasut atapput: Upperneq neriunnerlu asanninnerlu; asanninnerli taakkua annersaraat.’ — 1 Korintumiut 13:1-3, 13.

18. Pilluarnitsinnut ilasaataasumik sumik Jehova ilimasuffigisinnaavarput?

¹⁸ Jehovap asanninnera ilaarutsigu qularutigissanngilarput aamma taassuma asagaatigut naak kukkusaraluartugut, tassaavormi „Guuti nallittuisoq, saammaasoq, kamajasuunngitsoq, isumassuingaartoq unneqqaringaartorlu“. (2 Moses 34:6) Kukkugaangatta ilumoorluta peqqissimisarutta Guutip kukkunerput naatsorsuutiginavianngilaa asannillunili isumakkeerfigissalluta. (Tussiaat 103:1-3) Aap, ’Jehova nallittuillunilu isumassuinertoqaaq’. (Jâko 5:11) Tamatuminnga ilisimanninnerput pilluarnitsinnut ilasaataavoq.

Pilluarneq maannakkut angusassaagallartoq

19, 20. (a) Sooq tamakkiisumik pilluarneq ullumikkut anguneqarsinnaangila? (b) Biibilimi qanoq ililluni takutinneqarpa ullumikkut tamakkiisuunngikkaluamik pilluarsinnaasugut?

¹⁹ Ullumikkulli Satanip silarsuaata ulluini kingullerni pinerluffioqisuni, nakuuserfioqisuni kanngunartuliorfioqisunilu, aammalu nappaatit toqullu atuuffigisaanni, inuulluni pilluarnerup angunissaa ajornanngila? Soorunami naatsorsuutigisinnaanngilarput pilluarneq tamakkiisoq Guutip silarsuassaani nutaami atuuttussaq ullumikkut angusinnaallugu, silarsuassami ima allaatigineqartumi: „Nutaanngortissavakka qilak nunalu, pereersut eqqaamaneerutissapput eqqaaqqinneqarnatillu. Kisianni pinngortitakka soraajuitsumik tipaatsuutigineqarlutillu qiimmattaatigineqassapput.“ — Jesaja 65:17, 18.

²⁰ Guutip kiffaasa ullumikkut pilluarneq tamakkiisuunngikkaluartoq angusinnaavaat Guutip piumasaa nalunnginnamikku pilluaqqussutissallu tupinnangaartut silarsuassami nutaami paratiisimi qanittukkut pilerumaartut pillugit eqqorluartumik ilisimasaqaramik. (Juánase 17:3; sarĸúmersitat 21:4) Biibilimimi ima allassimasoqarpoq: „Katersaarsuit [Jehovaat], pilluarpoq inuk tatiginnittoq ilinnik,“ „pilluarpoq [Jehovamik] mianerinnittoq ingerlasorlu aqqutigeqqusaasigut,“ ’pilluarput qanilaartut, nuna pigissagamikku’. (Tussiaat 84:13; 128:1; Matîuse 5:5) Taamaattumik naak ullumikkut pissutsinik ajornakusoortunik akiugassaqartaraluarta pilluarneq annertungaatsiartoq angusinnaavarput. Naak ajortumik eqqorneqaraluaraangatta Jehovamik nalusutut aammalu inuunermik naassaanngitsumik neriugisaqanngitsutut aliasutsigineq ajorpugut. — 1 Tásalûníkamiut 4:13.

21. Sooq imminik tunisineq Jehovap kiffaasa pilluarnerannut ilasaataava?

²¹ Aamma Jehovap kiffaasa pilluarneq misigisarpaat piffissartik, nukitik pigisatillu inunnik allanik, ingammik inunnik Satanip silarsuaani ’maajunnartut pillugit kappialasunik’, Biibilip sallusuissutaanik ilinniartitsinerminnut atortaramikkik. (Hesekiel 9:4) Biibilimi ima allassimavoq: „Pilluarpoq sanngiitsumik isumassuisoq; taanna [Jehovap] annaakkumaarpaa ullormi perlulimmi. [Jehovap] sernigissavaa, inuutillugulu pilluartissavaa nunami, akeraanut tunniutiinnassanngilaa.“ (Tussiaat 41:2, 3) Soorlu Jesus oqarsimasoq: ’Tunisineq tigusinermit pilluarnarneruvoq.’ — apustilit suliait 20:35.

22. (a) Pilluarneq eqqarsaatigalugu Guutip kiffai taassumunnga kiffaanngitsut atugarisaannit allaanerusumik qanoq atugaqarpat? (b) Suna immikkut ittoq pissutigalugu pilluarsinnaavugut?

²² Tassa Guutip kiffaasa ullumikkut pilluarnerup tamakkiisup angunissaa naatsorsuutigisinnaanngikkaluarlugu pilluarneq Guutimut kiffartunngitsut angusinnaanngisaat atorsinnaavaat. Jehova ima oqarsimavoq: „Kiffakka uummammik iluunngaannit qiimmattassapput, ilissili uummatissigut aliatsannermit nilliassaasi nimaarlusilu isumatsannissinni.“ (Jesaja 65:14) Guutimut kiffartortut ullumikkut pilluarsinnaanerat aamma immikkorluinnaq ittumik pissuteqarpoq — anersaaq illernartoq ’Guutip naalatsiminut tunniussaa’ pigaat. (apustilit suliait 5:32) Eqqaamallugulu Guutip anersaavata qulangigaani pilluarneq atuuttarpoq. — Galâsiamiut 5:22.

23. Suna tulliani sammissavarput?

²³ Ullumikkut Guutip kiffaminik peqatigiissortaani utoqqaanertat pingaaruteqarput ilagiinnik siulersuisuullutik, Jehovap innuttaasa pilluarnerannut ilasaasuullutik. (Títuse 1:5) Utoqqaanertat pisussaaffitik anersaakkullu qatanngutiminnut angutinut arnanullu attaveqarnertik qanoq isigisariaqarpaat? Ilanngutassiami tulliuttumi tamanna sammineqassaaq.

[Quppernerup ataani ilanngussaq]

Qanoq akissavit?

□ Jehovap aaqqissuussillaqqissusia pinngortitaasigut qanoq erserpa?

□ Itsaq ullumikkullu Jehovap kiffani qanoq aaqqissuussiffigivai?

□ Suut oqimaaqatigiississagivut Jehovap kissaatigaa?

□ Asanninneq pilluarnitsinnut qanoq pingaaruteqartigaa?

□ Pilluarneq qanoq ittoq ullumikkut angusinnaavarput?

[Qupp. 10-mi suminngaanneernera]

Qulleq: ROE/Anglo-Australian Observatory-p akuersineratigut, assiliisoq: David Malin