Meeqqaat ikiorpiuk Jehovamik qinerseqqullugu?

„BIIBILIMIK atuaqqissaarneq nuanniigalugulu qasunarisarsimaqaara. Isertortumik qamuuna uummatikkut aalajangersimavunga inersimasunngoruma Jehovamut nalunaajaasunngorniarnanga,“ angut inuusuttoq nassuerpoq. Naak ilaqutariinni kristumiuni meeqqat amerlanersaasa Jehovamut aalajaattuaannarnissaat neriunaraluartoq taamaattoq inuusuttut taassumatut ittut Jehovamik Guutimissut qinersinissartik ajornartorsiutigisarpaat.

Angajoqqaat meeqqatik qanoq ilillutik sunniuteqarnerpaamik unnersuutissanerlugit ilaannikkut nalornissutigisarpaat. Assut imminut killisiorsinnaasarput, soorlu ataataq ima oqartoq taamaassimasoq: „Ilumoorlunga oqassaguma meeqqakka sinittut pakatsinerup pianik suli qiannisut isigisarsimavakka eqqarsarlungalu sukanninnginnerulaartariaqaraluarnerlunga.“ Taassuma erneri marluk ineriartorsimapput Jehovamullu kiffartornissartik qinersimallugu.

Inuusuttulli ilaasa Jehova tunussimavaat ilagiillu kristumiut qimallugit Satanip silarsuaa qinersimallugu. Taamaattumik angajoqqaat qanoq iliorlutik meeqqatik Jehovamik qinersisinnaaqqullugit ikiorniarneranni iluatsitsisinnaappat? Apeqqutip tamatuma akinnginnerani sammeqqaariartigu sooq inuusuttut Jehova tunuttaraat naak angajoqqaamik ilungersorlutik uninngaannaqqugaluaraatik.

Sooq inuusuttut ilaasa Jehova tunuttaraat

Pissutaasut nalinginnaanerusut ilagaat inuusuttut ilaasa Jehova imaluunniit taassuma aqqutigeqqusai ilisimallualinngisaannarsimammatigik. Naak naalungiarsuunerminniilli kristumiut ataatsimiittarnerinut ilaasaraluartik ilumoorutilinngisaannarsimavaat, Jehovalu ilumoorlutik ujartulinngisaannarsimallugu. (Jesaja 55:6; apustilit suliait 17:27) Nukappiaqqap qulaani taaneqartup kristumiut ataatsimiinneri nuannarisimanngilai oqaluttarfimmit oqaatigineqartut paasineq ajorsimagamigit.

Sallusuissutip naatsiiassartai meeqqat ilaannut ikkunneqarsimagaluarput, Satanilli silarsuaani inooriaaseq isumakuluuteqarpasinngitsoq pigisanillu ingasattumik pingaartitsisoq uummatimikkut kajungeriartuaarsimavaat. Ilaasa peqatiminnik ilaqarnissamik taakkunatulli innissamik assut kissaateqarnertik nakkaannarfigisimavaat. — 1 Israelikkut 28:9; Lúkarse 8:12-14; 1 Korintumiut 15:33.

Nunarsuarli tamakkerlugu ilaqutariinni kristumiuni meerarpassuit Jehovamut aalajaattuaannarnissartik qinersimavaat. Angajoqqaavisa iliuuserisimasaat sunniuteqarluarsimasut ilinniarfigineqarsinnaappat?

Aallartiaarit

Meeqqatit Jehovamik qinersinissaannut ikiussagukkit aallartiaarnissat pingaartorujussuuvoq. Amerlanertigut uummatip manngertinnginnerani sunnertianeranilu malugisat ilinniakkallu ataavarnerpaasarput. (Ussatit 22:6) Taamaattumik aallartiaarit meeqqatit oqaluttuuttarlugit Jehovap ajunngissusianik, asannissusianik ataqqinassusianillu, uummatiminni Jehovamik asanninnermik Jehovallu taakkununga iliuuserisimasaanik pingaartitsinermik ineriartortitsinissaat ilungersuutigalugu. Tamanna siunertaralugu angajoqqaarpassuit Napasuliaq Alapernaarsuiffiup naqitigaataani ilanngutassiarpassuit Jehovap pinngortitaanut tunngasut iluatsittumik atortarsimavaat.

Jehovamut naalanneq ataqqinninnerlu aammalu taassuminnga pallorfiginninnermut ataqqinninneq aamma inuunermi siusissukkut pigiliunneqartariaqarput. Nuanneqaaq takullugit meeqqat suli atualinngitsut kristumiut ataatsimiinnerini allattuersuataartut Biibiliminnilu quppeeqattaartut, imaluunniit uernaleraangamik angajoqqaatik ilagalugit anartarfimmukarlutik nillertumik ermikkiartortut eqeerniassagamik. Tamakku immaqa suunngitsutut issinnaagaluarput, pingaartorujussuuppulli meeqqap isumamigut pigiliutissappagu naalanneq ataqqinninnerlu Jehovamut ersersinneqartariaqartut!

Aamma meeqqanik ataasiakkaanik ilumoorullugu Biibilimik ilitsersuussineq aallartiaartariaqarpoq. Aappariit ataatsit nukappiaraatitik marlunnik ukioqartut Ajoqersuisorsuaq tusarnaarparput-mik atuaqatigisalersimavaat.a Kingorna nukappiaqqat atualereersimalermata ullut tamaasa ullaaralaannguaq makittarput anaanartillu ilagalugu Biibilimik oqaluttuaatikka aamma pâratisime nuname nâgssáungitsumik inûsinauvutit atuaqqissaartalerlugit.b Taava ullaakkorsiuleraangamik ullormut allassimaffik ataataminnit aqunneqartoq peqataaffigisinnaasarpaat. Angajoqqaat ilungersornerat qanittukkut pilluaqqusaangaarpoq ernerisa Jehovamut kiffartornissartik qinermassuk, nukappiaqqat aappaa qulinik aappaalu aqqaneq-marlunnik ukioqarlutik tunniulluinnarsimanertik ersersillugu imermi kuisimmata.

Angut inuusuttoq takujuminartoq Napasuliaq Alapernaarsuiffiup Peqatigiiffiata Japanimi immikkoortortaqarfiani kiffartortoq oqaluttuarpoq mikisunnguunerminiilli Jehovamut attaveqarnermik ineriartortitsinissaminik anaanami ikiorsimagaani innaleraangami saniminiilluni qinunermini ikiortarnermigut. Ilikkakkani puiuikkiussimava — tassa sumiikkaluaruni imaluunniit sulerigaluaruni Jehovap qanittuassagaani ikiornissaminullu piareersimajuassalluni.

Meeqqat eqqunngitsulioriartarneri naammalluinnanngissutsimik kingornussaasumik pissuteqartut paasinissaat angajoqqaat iluatsitsisut ilikkartarpaat, eqqunngitsulioriartarnerillu tamakku akiornissaannut meeqqatik siusissukkut ikiulertarlugit. (Ussatit 22:15) Namminissarsioriartarneq, utereeriartarneq, pingaarniaqqajaaneq allanillu isornartorsiueqqajaaneq siusissukkut iliuuseqarfigisariaqarput. Taamaaliunngikkaanni pissutsit taama ittut kingorna Guutimik aqqutigeqqusaanillu malinnikkunnaarnermik kinguneqarsinnaapput. Assersuutigalugu, angajoqqaat ajunngitsussamik siunertaqaraluartik nakkaannajavallaartut meeqqaminni imminuinnaq eqqarsaatigivallaassutsimik ineriartortitseqataasarput. Meeqqat taama pineqartut angajoqqaaminnik Jehovamilluunniit ataqqinnissuseqarneq ajorput, Biibilimi oqaatigineqartutut ’sorraalliortunngortarlutillu naalaalliortunngortarlutik. (Ussatit 29:21) Meeqqalli angerlarsimaffimmi pisussaaffeqartitaasut allallu pisariaqartitaannik eqqumaffiginninnissaminnik ilinniartinneqarsimasut angajoqqaaminnut Jehovamullu qujamasunnerusarput.

Aallartiaassallugu pingaartoq alla tassa teokratiimut tunngasutigut meeqqat angusinnaasaannik anguniagaqartittarnissaat. Tamanna aallartiaarneqarsimanngippat aalajangersimalluinnartumillu pisanngippat inuit allat meeqqat anguniagassaannik allanik isumaanniititaqatilersinnaavaat. Biibili tamaat naallugu atuarnissaq, Napasuliaq Alapernaarsuiffiup naqitigaataanik nammineq atuaqqissaartarnissaq, teokratiimik atuarfimmi ilaalernissaq, nutaarsiassamik nuannersumik oqaluussisartunngornissaq kuisinnissarlu anguniakkanut ilaasariaqarput.

Takafumi oqaluttuarpoq anaanami atuagassianik Napasuliaq Alapernaarsuiffik-mik aamma Iteritsi!-mik atuartarneq ileqquliutsissimagaa apeqqutinik allattuisarnermigut atuarfimmiit angerlaruni akissutisiniagassaanik. Yurip eqqaamavaa ullualunni pioneerinut kristumiutut oqaluussisartunik pisariaqartitsiffiunerusumi kiffartortunik peqateqartarneq, oqaluussiartoqatigisarlugit, mamartunik nerisassiortut isiginnaartarlugit nuannaarnerallu ilungersuussissusialu qimerloorlugit taamatut Jehovamut kiffartornissaminik assut kajumississutigisimallugu. Inuusuttorpassuit allat oqaluttuarput angajoqqaamik Beteliliaqatigisarsimagaatik, tassa Napasuliaq Alapernaarsuiffiup Peqatigiiffiata qullersaqarfiinut immikkoortortaqarfiinullu, tamakkunanilu takusinnaasarsimallugit inuusuttut angutit arnallu nuannaarlutik Jehovamut kiffartortut. Meeraagallamik Betelinut pulaartarsimasut ilarpassui tamakkunani nunarsuarmi sumi tamaaniittuni maannakkut kiffartorput.

Meeqqatik piffissaqarfigikkit

Piffissap meeqqannut atortakkavit annertussusia pitsaassusialu qularnanngitsumik Jehovamut kiffartorusussuseqalernissaannut imaluunniit akerlianut toqqaannartumik sunniuteqarsinnaapput. Erniinnaq paasissavaat Biibilimik atuaqqissaaqatigisarnerannut piffissaq piareersarnerlu qanoq annertutigisut atortaritit. Kingullermik sumut killissimanersi eqqaamasinnaanngikkukku imaluunniit atuaqqisaarnissarsi soorpianngitsut pissutigalugit taamaatikkukku isumaqalersissavatit atuaqqissaarneq pingaartorujussuunngitsoq. Takusinnaagunikkuli angajoqqaatik atuaqqisaarnissaq pillugu pilliuteqartartut, piareersartartut sumilluunniillu akornutissaqaraluaraangamik atuaqqissaarnissaq taamaatitittanngikkaat, akerlerluinnaanik isummissapput. Naak piumasaqaataanngikkaluartoq anaanat ilaat meeqqaminnik atuaqqissaaqateqaleraangamik torersunik atisisarput, soorlu ataatsimiigialeraangamik imaluunniit inunnik allanik Biibilimik atuaqqissaaqatiginnileraangamik taamaaliortartut. Taamaalilluni tqakutinneqartarpoq Jehovamik pallorfiginninneq pingaartorujussuusoq.

Meeqqassi Biibilimik ilinniarnerat nuannersuutikkumallugu uummataallu angujumallugu piffissaq nukiillu annertuut pisariaqarsinnaasarput. Meeraaqqat isiginnaartitsinikkut takusatik puiuikkiunnerusarpaat. Assersuutigalugu ataataasup ataatsip makititsineq meeqqanut takusassiariniarlugu Lazarusip makititaanera taakkununnga isiginnaartitsissutigisimavaa. Sikaavimmut iseriarluni anisimavoq Lazarusiusaarluni makititaasimasoq. — Juánase 11:17-44.

Misigissutsikkut ajoqqajaanerit, nalorneqqajaanerit ernumassutillu meeqqat inuusuttuaranngoraamik nalaattagaat iliuuseqarfigissagaanni piffissaq pikkorissuserlu suli annerusut pisariaqartarput. Piffissaq angajoqqaat asannittut isumassuisullu immikkoortitaat meeqqat Jehovamik tatiginninnermik ineriartortitsinissaannut pingaaruteqartorujussuuvoq. Ataataq iluatsitsisimasoq sisamanik meeralik oqaluttuarpoq meeqqani assigiinngitsunik ajornartorsiuteqaleraangata Napasuliaq Alapernaarsuiffiup atuagassiaatai ikiortigalugit ajornartorsiutip qaangerluinnarnissaa tikillugu meeqqani oqaloqatigisarsimallugit.

Anaanap pioneeriusup ulapittup marlunnik meerallip malugisimava panini matoqqasunngortoq suliassanillu teokratiimut tunngasunik soqutigisaaruttoq. Taamaattumik aalajangerpoq meeraq atuarfimmiit soraaraangat ualit tamaasa angerlarsimasalerniarluni, tiitoqatigerujoorlugu oqaloqatigisarniarlugu. Anaananilu qanimut oqaloqatigiittarnermikkut niviarsiaqqap pisariaqartitani matussutissippaa. Maanna meeqqat atuarfiat naammassereersimallugu anaanani pioneerioqatigaa. — Ussatit 20:5.

Pitsaasunik ilagisartagaqarneq maligassiuilluarnerlu

Angajoqqaat meeqqaminnut piffissaqarniarnerminnut tapertaritillugu isumagisariaqarpaat meeqqamik ajunngitsunik ilagisartagaqarnissaat. Biibilimi ima ussateqarpoq: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ — Ussatit 13:20.

Angajoqqaarpassuit iluatsitsimasut ussatip tamatuma ilumuussusia uppernarsarsinnaavaat. Ataataq sisamanik meeralik oqarpoq: „Kingumut qiviaraangama eqqarsartarpunga meeqqatta sallusuissummiittunik ikinnguterpassuaqarnerat Jehovamut kiffartorusulernerannut pissutaaqataasimasoq. Kajumissaartarsimavakka ilagiinni ilaaffigisatsinniittunik aammalu ilagiinni allaniittunik ikinngusersornissaannik, ikinngutigiinnernillu tamakkuninnga ineriartortitsinissaannik.“ Kristumiu utoqqaanertaq ukiorpassuarni Betelimi kiffartorsimasoq ima eqqaamasalikkersaarpoq: „Meeraagallarama illumi anginngitsunnguami najugaqarpugut, nakkutilliisulli angalasartup illusitinnissaanut ammajuaannarpoq. Aammalu specialpioneerit ilagiinni ilaaffigisatsinniittut akuttunngitsumik neriartoqqusarpavut. Uagutsinni uffartarput ilagisarlutalu. Misigisalikkersaartarnerat nuannaassusiallu piffissaq tamaat kiffartornermik pingaartitsiartuaassutigisimavara.“

Atoruminaatsorsiortut pitsaasunik ilagisartagaqarneq iluaqutigisinnaavaat. Anaanap ernerminik naalasseriilliulersoorsimasup Jehovap nalunajaasuini angalalluni nakkutilliisoq oqaloqatigisimavaa. Nakkutilliisup siunnersorsimavaa ernini oqaluussiartoqatigisassagaa. „Oqaluussiartoqatigisarukku anersaap tungaatigut allatigullu pitsanngoriartulissaaq,“ nakkutilliisoq oqarsimavoq. Anaanaq oqaluttuarpoq: „Ilagiinni ilaaffigisatsinni unnukkut oqaluussinermik aaqqissuussaqarpoq, meerarpassuit atuartut, nalinginnaasumik pioneerit utoqqasaat arlallit minnerpaamillu utoqqaanertaq ataaseq peqataasarput. Aallaqqaammut ernera oqalussiartornialernerit tamaasa pinaasertarpoq, sivitsunngitsorli oqaluussiartoreeraangami nuannaarluni angerlartalerpoq ilagisaminit ajunngitsunit kajumissisinneqarsimalluni. Meeqqat atuarfianni klassini annerni atuartuutilluni kuisippoq qaammatillu tamaasa ikiorti-pioneeriusarluni, soraarummeereeramilu nalinginnaasumik piorneerinngorpoq.“ Ajunngitsunik ilagisartagaqarneq Jehovap piumasaanik iliornermik ilalik ajunngitsumik kinguneqarpoq.

Meeqqat ilaat najukkaminni ajunngitsumik sunniisinnaasunik ilagisartagassaqarneq ajorput, meerarpassuilli Jehovamut kiffartornermik qinersisimanerat angajoqqaamik maligassiuinerannik pissuteqarpoq. Meeqqat ilarpassuisa angajoqqaatik nuannaartorisarpaat ilaarusuttarlugillu. Yurip eqqaamavaa anaanani inoroorsaartusoq allanillu isumassuisuusoq, oqarasuaatikkut sianerfigisarlugit napparsimasullu nerisassiuuttarlugit. Tatsuo, sisamanik nukappiaqqanik qatanngutilik ullumikkut tamarmik Jehovamut kiffartortuusunik, ima oqarpoq: „Anaanap aalajangersimasumik atuaqqissaaqatigisinnaasarsimanngilaatigut, ataata uppertuunngimmat qanigisatsinnillu akerlilersorneqaqigami. Sallusuissummullu aalajaannerata Jehovamullu kiffartornerminik nuannaarutiginninnerata assut sunnersimavaanga. Aamma ullaaralaannguaq makikkumasarpoq ajornartorsiutitsinnik ikiorumalluta.“ Angajoqqaat oqaasii silatuut aalajaatsumik suliartaqaraangamik sunniuteqartaqaat. Yoichiro angajoqqaani pillugit ima oqarpoq: „Ilagiinniittunik allanik ajortumik oqallisiginninnerannik eqqaamasaqanngilanga; aamma uagut meeqqat allat kukkunerinik angajoqqaatta mamarleeqquneq ajorpaatigut. — Lúkarse 6:40-42.

Meeqqat Jehovamik qinersinerannik nuannaarutiginninneq

Meeqqavit Jehovamik qinersitinniarlugit ikiuutissannik qularnaalluinnaqqissaartumik nassaassaqanngilaq. Isumakulunnartorpassuaqartassaaq. Soorluli ataataq ernumasoq siusinnerusukkut eqqaaneqartoq oqartoq: „Siunnersuutit Jehovap peqatigiissortaanit takussaasuneersut angajoqqaatut maleruaqqissaarniartuaannarsimavavut. Ajornartorsiutit qaangerniarnerinut tamanna iluaqutaasorujussuusarpoq.“ Ilungersorneri iluatsitsinermik kinguneqarsimapput.

Aap, Biibilimi unnersuussutit sapinngisannik maleruartarukkit, Jehovamik asanninnissamut pissutissanik pitsaasunik meeqqatit oqaluttuuttarlugit, nammineq maligassiuillutit ilumoorlutillu meeqqatit ikorniarlugit ilungersuuteqarlutit, ilungersornitit ajunngitsumik kinguneqarsinnaassapput. Nukappiaqqap Jehovamut nalunaajaasunngorniarnani aalajangersimagaluartup oqaasiisut ittunik tusarsinnaassaatit. Ukiuni ajornartorsiorfimmini anaanami iluatsittumik ikioreeraanilu ima oqarpoq: „Qujanaqaaq nakkaannanngisaannarsimammat!“ — Galâsiamiut 6:9.

[Quppernerup ataani ilanngussat]

[Qupp. 30-mi assiliartaq]

Meeqqanik perorsaasimanerit nuannersunik eqqaamasaqarfigaajuk?