Inuit naalliuutaat sooq guutip ilaginnarallarsimavai?

INUIAAT oqaluttuarisaanerata aallartinnerani aliasunnerup anniarnerulluunniit pianik qianeq atuutinngilaq. Inunnut naalliunnartoqanngilaq. Inuit ajunngilluinnartumik aallartinneqarput. „Guutillu pinngortitani tamaasa isigai, ilumullu ajunngingaarput.“ — 1 Moses 1:31.

Inuilli ilaat oqarniartarput Edenimi Adamimik Evamillu oqaluttuaq oqaluttualiaannaasoq piviusuunngitsoq. Ajoraluartumillu aamma kristumiuunerartuni palasit ilarpassui taamatut oqartarput. Annerpaamilli oqartussaassusilerneqarsimasup, Jesus Kristusip, nammineerluni uppernarsarsimavaa Edenimi pisimasut oqaluttuarisaanikkut pisimasuiusut. (Matîuse 19:4-6) Aammalu sooq Guutip inuit naalliuutaannik ilaginnaagallarsimanera aatsaat paasineqarsinnaavoq inuiaat oqaluttuarisaaneranni siusissukkut pisimasut tamakku misissoqqissaaraanni.

Inuk siulleq, Adam, naatsiivimmik Edenimik paaqqutarinninnissamik nuannersumik suliassinneqarsimavoq. Aamma Guutimit anguniagassinneqarsimavoq naatsiivimmik Edenimik nunarsuaq tamakkerlugu alliartuaartitsinissaminik. (1 Moses 1:28; 2:15) Suliassaq tamanna angeqisoq naammassisinnaaqqullugu Guutip Adam nuliassaanik, Evamik, tunivaa oqarfigalugillu meeqqiorlutik amerliartussasut nunarsuarlu imminnut naalatsigitissagaat. Guutilli nunarsuarmik inunnillu siunertaata iluatsinnissaa qulakkeerniarlugu arlaannik pisariaqartoqarpoq. Guuti assilillugu pinngortitaagami inuk nammineq piumassusiligaalluni pinngortitaavoq; taamaattumik pisariaqarpoq inuit piumasaata Guutip piumasaanut akerliunnginnissaa. Taamaappammi Guutip pinngortitaani tamani ataqatigiinnginneqalissaaq, nunarsuarlu inunnik eqqissinermik nuannarisaqartunik ulikkaarniarlugu Guutip siunertaa piviusunngornaviarnani.

Guutip aqutsineranut naalatsigitinneq nammineq takkunneq ajorpoq. Naalatsigitinneq inuup nammineq piumassusianut asannittumik ersersitsissutaasariaqarpoq. Assersuutigalugu Jesus Kristus sakkortuumik misilinneqarami ima qinusimavoq: ’Ataataq, piumaguit ermuseq una uannit peeruk; uangali peqqusara [piumasara] pinnani illit peqqusat [piumasat] pili.’ — Lúkarse 22:42.

Taamatuttaaq Adamip Evallu Guutip aqutsineranut naalatsigitikkusunnerlutik naalatsigitikkusunnginnerlutilluunniit namminneq uppernarsarniartussavaat. Tamanna siunertaralugu Jehova Guuti annikitsumik misiliinisaminik aaqqissuussivoq. Naatsiivimmi orpiit ilaat ataaseq taaneqarpoq ’orpik ajunngitsumik ajortumillu nalujunnaarutaasoq’. Guutip ileqqussanik eqqortunik najoqqutassiuisussaassusianut orpik assersuutaavoq. Oqaatsit paasiuminartut atorlugit Guutip orpiup immikkut ittup tamatuma paarnaanik nerinissaq inerteqqutigaa. Adam Evalu naalanngikkunik toqumik kinguneqartissavaat. — 1 Moses 2:9, 16, 17.

Inuit naalliuutaasa aallartiffiat

Ullut ilaanni Guutip ernerisa anersaajusut ilaata innimiilliorluni Guutip aqutseriaasia apeqquserpaa. Pulateriaarsuk aqqutigalugu taassuma Eva ima aperaa: „Ilumununa Guutip naatsiiviup orpiisa arlaannaalluunniit neriffigeqqunngikkaa?“ (1 Moses 3:1) Taamaalilluni Eva qulalersinneqarpoq Guutip aqutseriaasia ilumut eqqortuunersoq.a Eva angerpoq, uimimi taama oqaluttuussimammani. Pinngortitarli anersaajusoq taamaalilluni Guutimut akerliusumik oqaluppoq naalannginnerullu kingunissai pillugit sallulluni, ima oqarluni: „Naamik, toqussanngivippusi. Guutiuna taama oqartoq nalunnginnamiuk neriffigigaluarussiuk isisi uisitaajumaartut Guutisullu ilerumaartusi ajunngitsoq ajortorlu nalujunnaassallugit.“ — 1 Moses 3:4, 5.

Ajoraluartumik Eva salloqittarneqarluni isumaqalersinneqarpoq naalannginneq inuit naalliulernerannik pinnani inuunermilli pitsaanerusumik kinguneqarumaartoq. Paarnaq isigiualeramiuk illigiartuinnalerpaa, nerilerlugulu. Kingorna uini Adam kimigiiserfigiualerpaa nereqqullugu. Ajoraluaqisumik Adamip nuliaminik, Guutimiunngitsoq, iluarusutsitsinissani qinerpaa. — 1 Moses 3:6; 1 Timûtiuse 2:13, 14.

Pikitsitsinissamut kajumissaarinermigut pinngortitaq anersaajusoq taanna imminut Guutimut assortuisunngortippoq. Taamaattumik Satanimik taaneqartalerpoq, oqaaseq hebriiarisooq isumaqartoq „assortuisoq“. Aamma Guuti pillugu salluliorpoq, imminut mamarliisunngortilluni. Taamaattumillu Diaavulumik taaneqartalerpoq, griikerit oqaasiat isumaqartoq „mamarliisoq“. — sarĸúmersitat 12:9.

Taamaalilluni inuit naalliuutaat aallartipput. Guutip pinngortitaasa ilaat pingasut namminneq piumassutsiminnik tunissutisiarisaminnik atornerluipput, Pinngortitsisiminnut assortuisumik namminissarsiortumik inuulernissartik qinerlugu. Maanna apeqqutaalerpoq Guutip qanoq ililluni pikitsitsineq tamanna naapertuilluartumik aaqqinniassaneraa, pinngortitami silassorissuseqartut sinnerinik, ilaatigut inngilinik aalajaatsunik qilammiittunik aammalu Adamip Evallu kinguaarilerumaagassaannik, qularunnaarsitsisumik.

Guutip silatuumik qisuariarnera

Immaqa inuit ilaat isumaqarput pitsaanerusimassagaluartoq Guutip Satan, Adam, Evalu ingerlaannaq suujunnaarsissimasuuppagit. Taamaaliorsimasuuppalli pikitsitsinikkut apeqqutaalersinneqartut akineqarsimanavianngikkaluarput. Guutip aqutseriaasia Satanip apeqqusersimavaa, unnersimallugu inuit Guutimut atanatik pitsaanerusumik inuussasut. Aamma inunnik marlunnik siullernik Guutip aqutsineranit tunussititsilluni iluatsitsinera apeqqutinik allanik pilersitsivoq. Adam Evalu ajortuliormata imaappa Guuti kukkusumik inuliorsimasoq? Nunarsuarmiittunik Guutimut aalajaattuaannartoqarsinnaanerluni? Jehovammi erneri inngiliusut Satanip pikitsitsineranik takunnittut? Taakku Guutip kisimi oqartussaaneranik aalajangiusimanniinnarsinnaassanerpat? Apeqqutit tamakku akineqarnissaannut piffissaq naammattoq pisariaqarsimavoq. Tamannarpiaq pissutigalugu Satanip ulloq manna tikillugu atagallarnissaa Guutip akuerisimavaa.

Adam Evalu ullormi naalanngiffianni Guutip toqumut eqqartuuppai. Taamaalilluni toqujartortarneq aallartippoq. Kinguaavisa, Adamip Evallu ajortuliornerata kingorna inunngortut, ajorti toqulu angajoqqaaminnit naammalluinnanngitsunit kingornuppaat. — Rûmamiut 5:14.

Satanip pikitsitsinermini inuit marluk siulliit iligileqqaarpai. Imminut piffissarititaasoq atorsimavaa Adamip kinguaavi tamaasa naalagaaffigilerniarlugit suliniuteqarluni. Aamma inngilit amerlasuut pikitsitsinerminut ilaaqqutsinniarneranni iluatsitsisimavoq. Guutilli ernerisa inngiliusut amerlanersaat Jehovap aqutsineranut naapertuilluartumut aalajaattuaannarsimapput. — 1 Moses 6:1, 2; Jûtarse 6; sarĸúmersitat 12:3, 9.

Guutip aqutsineranut Satanip aqutsinera illuatungiliuppoq, tamannalu Jobip ulluisa nalaanni assut malunnarsimavoq. Angutip aalajaatsup taassuma inooriaatsimigut uppernarsarpaa Satanitut attaviitsoorususseq pinnagu Guutip aqutsinera naapertuilluartoq piumanerullugu, soorlu angutit Guutimik mianerinnittut, Abel, Enok, Noa, Abraham, Isak, Jakob Josefilu siunermigut taamaalioreersimasut. Job qilammi Guutip inngiliisa aalajaatsut saavanni oqaloqatigiissutaasimavoq. Aqutsinerminut naapertuilluartumut tapersersuutaasumik Guuti Satanimut oqarpoq: „Kiffara Job arajutsisimagunanngilat. Taanna nunami tamarmi nalissaqanngilaq assuarnaatsuullunilu peqqusersuitsuugami Guutimillu mianerinnittuulluni ajortumik iliuuseqarnaveersaartuugami.“ — Job 1:6-8.

Ajorsarumanani Satan unnerpoq Jobip namminissarsiortumik pissuteqarluni Guuti kiffartuukkaa, Guutip pigisatigut pilluaqqungaarsimammani. Taava Guutimut oqarpoq: „Ataguli assat isatsillugu pigisaanik piiaaffigeriassagit, taava kiinnat toqqavillugu perloqqussagaluarpaatit.“ (Job 1:11) Satanip allaat Guutip pinngortitaasa tamarmik assuarnaassusiat apeqquserpaa, oqarluni: „Inuummi pigisani tamaasa akigeriaannaasarpai inuunini annaajumanagu.“ (Job 2:4) Mamarleerpaluttumik saassusineq tamanna Jobimuinnaq tunnganngilaq, Guutimilli pallorfiginnittunut aalajaatsunut tamanut qilammiittunut nunamiittunullu tunngalluni. Satan oqarniarpoq taakku inuunertik navianartorsiulerpat Jehovamut attaveqarnertik kipitiinnassagaat.

Jobip assuarnaassusia Jehova Guutip tatigilluinnarpaa. Tamatumunnga uppernarsaatissaqarumalluni Satanip Jobimik naalliuutissiinissaa Guutip akueraa. Aalajaannermigut Jobip tusaamanerlugaalersinniarneqarnini piiaannanngilaa, aammali pingaarnerungaartumik, Jehovap kisimi oqartussaanerata eqqortuunera aalajangiusimaannarlugu. Diaavulu sallutuujusoq uppernarsarneqarpoq. — Job 2:10; 42:7.

Misilinneqarnermili aalajaannikkut maligassaanerpaaq tassa Jesus Kristus. Ernerup inngiliusup taassuma inuunera niviarsiap illiaanut Guutip nuussimavaa. Taamaattumik Jesusip ajorti naammalluinnanngissuserlu kingornussimanngilai, inuttulli naammalluinnartutut peroriartorpoq, angut siulleq naammalluinnassutsiminik annaasaqanngikkallarneratut assigilerlugu. Satanip Jesus immikkut piniarsaarisimavaa, amerlaqisunik usserniartarsimallugu naalliuutissittarsimallugulu, naggataatigullu nikanarsaataasumik toqutaatillugu. Assuarnaassusianilli aseruiniaraluarnermini iluatsitsinngilaq. Jesusip Ataatami oqartussaanerata eqqortuunera tamakkiisumik aalajangiusimavaa. Aamma uppernarsarpaa inuk naammalluinnartoq, Adam, Satanip pikitsitsineranut ilaaqqunnerminut patsisissarsiuutissaqanngitsoq. Adam misilinneqarnermini annikinneroqisumi aalajaassimasinnaagaluarpoq.

Aamma suna uppernarsarneqarpa?

Adamip Evallu pikitsitsineraniit ukiut 6000-init amerlanerusut naalliuffiusut ingerlareersimapput. Piffissap tamatuma ingerlanerani Guutip inuiaat akuerisimavai naalakkersueriaatsinik assigiinngitsorpassuarnik misileraanissaannik. Inuit naalliuutaannut takussutissat amiilaarnartut uppernarsarpaat inuit imminnut aqussinnaassuseqanngitsut. Inatsisaassuseq nunarsuarmi sumi tamaani atuuteqaaq. Guutimut attaviitsuussuseq Satanimit aallarnerneqartoq ajortorujussuarmik kinguneqarsimavoq.

Jehovap nammineq pilluni upernarsaanissani pisariaqartinngilaa. Nalunngilaa nammineq aqutseriaatsini eqqortuusoq pinngortitamilu soqutigisaannut pitsaanerpaasoq. Satanilli pikitsitsineratigut apeqqutaalersinneqartut naammaginartumik akineqarsinnaaqqullugit pinngortitani silassorissut nammineq oqartussaassutsiminik naapertuilluartumik qinersinissaannut periarfissinnissaat akuerisimavaa.

Guutimut asanninnermut taassumunngalu aalajaattuaannarnermut akissarsiassat Diaavulup assaani naalliunnartunik atuigallarnermut matussutisseerujussuassapput. Jobimik pisimasukkut tamanna takuneqarsinnaavoq. Jehova Guutip Job nappaataanik Satanip pilersitaanik ajorunnaarsippaa ’siornagornillu suli annerusumik pilluaatissillugu’. Ukiunilu 140-ni inooreersimalluni „Job toquvoq utoqqaalluni ullussanilu naammatsissimallugit“. — Job 42:10-17.

Biibilimik allaqataasup kristumiup Jakobip tamanna innersuussutigaa ima oqarluni: ’Jobip ilalaarsusianik tusarsimavusi, Jehovallu aniguiffigititaa ilisimavarsi, Jehova nallittuillunilu isumassuinertoqimmat.“ — Jâko 5:11.

Maanna Satan silarsuaalu piffissaarutilerput. Inuiaat naalliuuterpassui Satanip pikitsitsinerata nassatarisai Guutip qanittukkut atuukkunnaarsissavai. Allaat toqusimasut makitinneqassapput. (Juánase 11:25) Taava inuit aalajaatsut, ilaatigut Job, nunarsuarmi paratiisiusumi naassaanngitsumik inulernissaminnut periarfissaqalissapput. Pilluaqqussutissat tamakku Guutip kiffaminut kuerarumaagassaasa Guuti kisimi oqartussaasutut ’nallittuillunilu isumassuingaartutut’ naassaanngitsussamut qutsissisissavaat.

[Quppernerup ataani ilanngussaq]

[Qupp. 7-mi assiliartaq]

Nunarsuup paratiiserpalaartunngortinnissaanik Guutip siunertaa piviusunngussaaq!