Jobip akissarsiaa — neriuutissiisoq
„[Jehovap] Job ukiuni inuuffigisaani kingullerni siornagornit suli annerusumik pilluaatissippaa.“ — JOB 42:12.
1. Jehova innuttaminut qanoq iliortarpa, ingammik sakkortuumik misilinneqarneranni?
JEHOVAP ’ujarlersini akilertarpai’. (Eprîarit 11:6) Aamma innuttani imminut tunniulluinnarsimasut sapiillutik nalunaajaanissaannut killittarpai, misilinneqarnerminni toqungasutut sanngiissuseqalersimagaluaraangataluunniit. (Job 26:5; sarĸúmersitat 11:3, 7, 11) Jobip naalliunneratigut tamanna uppernarsineqarsinnaavoq. Naak tuppallersaaniartuusaartunit pingasunit ajoquserniarneqaraluarluni inunnut siooranermik nipangersinneqanngilaq, nakimaatsumilli nalunaajaateqarluni.
2. Jehovap nalunaajaasui qinugisaanermit naalliuutinillu qanoq sunnerneqarsimappat?
2 Nalitsinni Jehovap nalunaajaasuisa ilarpassui ima sakkortutigisumik qinugisaallutillu atugarluiortitaagisimapput allaat toqumut qanillisimagaluartik. (2 Korintumiut 11:23) Jobitulli iliorlutik Guutimut asanninnermik ersersitsisimapput eqqortumillu iliorsimallutik. (Hesekiel 14:14, 20) Aamma misilinneqarnertik qaangersimavaat Jehovap iluarisaanik iliornissartik aalajangiusimallugu, nakimaatsumik nalunaajaanissamut nukissaqalersimallutik neriuummillu piviusumik ulikkaarlutik.
Job nakimaatsumik nalunaajaateqarpoq
3. Job naggataarutaasumik oqalunnermini qanoq nalunaajaateqarpa?
3 Naggataarutaasumik oqalunnermini Job aatsaat taama nalunaajaateqartigaaq. Tuppallersaaniartuusaartini oqaasissaarutsilluinnarpai. Mitallerpaluttumik tusangiasaarilluni oqarpoq: „Ila ikiorluarsimaqaat angut nukillaangasoq najummisimallugulu nukeeruttoq!“ (Job 26:2) Jehova, nunarsuarmi nivingaffeqanngitsumi nuissanilu imermik ulikkaartuni nunarsuup qulaaniittuni ersittumik pissaanilik, nersorpaa. (Job 26:7-9) Soorluli Job oqartoq tamakku Jehovap ’suliaasa ilaminiinnaraat’. — Job 26:14.
4. Assuarnaassuseq pillugu Job qanoq oqarpa, soorlu taamatut oqarsinnaasimava?
4 Pinngitsuunini qularutiginagu Job nalunaarpoq: ’Anerningerserlunga assuarnaassusera uannit saqitsissanngilara.’ (Job 27:5, nutsigaq pisoqaq.) Unnerluussissutaasuni tamani pinngitsuuvoq, taamaattumillu naalliuutini nammineq pisuussutiginngilai. Nalunngilaa tunussisut qinnutaat Jehovap tusarneq ajorai, assuarnaassutsiminnilli attassiinnartut akilertarai. Tamatuma eqqaasissavaatigut ungasinngitsukkut Harmagedonimi ajortut pissaaneerutsitaasussaasut Guutillu assaanit pissaasumit aniguinavianngitsut. Tamatuma pinnginnerani Jehovap innuttai assuarnaallutik inuusariaqarput. — Job 27:11-23.
5. Ilisimassut piviusoq Jobip qanoq nassuiarpaa?
5 Takorloorsinnaavarput silamiutut ilisimasut qanoq tusarnaartut Job oqalummat inuup kuultimik, siilvimik erlinnartunillu allanik nunarsuarmi immamilu ujarlernermini piginnaanerminik atuinera pillugu. Taamaattorli oqarpoq ’ilisimassut pigiuminarnerusoq sapanngarissuninngarnit“. (Job 28:18) Jobimik tuppallersaaniartuusaartut ilisimassut piviusoq pisiarisinnaasimanngilaat. Ilisimassut piviusoq anorip, siallup, qaamarnup kallerullu Pinngortitsisaanik pilerfeqarpoq. Tassami „ilisimassut piviusoq tassa [Jehovamik] mianerinninneq, siuneqassuseq piviusoq tassa ajortumik iliornaveersaarneq. — Job 28:28.
6. Sooq Jobip inuunini eqqartorpaa?
6 Job naalliukkaluaqaluni Jehovamik kiffartuussiunnaanngilaq. Qutsinnerussaartoq qimannagu angutip taassuma assuarnaatsup ’Guutip ikinngutiginninnera’ maqaasigaa. (Job 29:4) Job pingaarniarluni oqalunngilaq ’inukulunnguamik annaassisarsimanini, naapertuilluarnermik qallersaateqarsimanini piitsunullu ataatatut issisimanini’ oqaluttuarigamigit. (Job 29:12-16) Aalajaalluni Jehovamut kiffartorluni inuunini oqaluttuariinnarpaa. Illit taamatut ajunngitsumik oqaluttuassartaqarpit? Soorunami aamma salloqittaasut pingasut unnerluussutaasa eqqunngitsuunerat qulaarpaa.
7. Job qanoq ittuusimava?
7 Job imminit nukarlernit, ’ataataat suutinngingaaramigit isigiumanerluunniit ajukkani qimmitut savanik paarsisutut’, illaatigiinnartarneqarsimavoq. Maajugisaallunilu qitserarneqartarsimavoq. Naak Job atugarliortitaagaluaqaluni naakkinninnermik ersersitsivigineqarsimanngilaq. (Job 30:1, 10, 30) Jehovamut tunniusimalluinnarnini pissutigalugu ilerasuuteqanngilaq imalu oqarsinnaalluni: „Oqimaalutaavinni eqqortuni Guutip uuttoriannguarlinga, taava paasissagaluarpaa assuarnaateqanngitsunga.“ (Job 31:6) Job allasiorneq ajorpoq peqqusersiorajuttuunanilu, ikiorneqartariaqartumillu ikiuinngitsuunngisaannarsimalluni. Naak pisuujusimagaluarluni pigisat tunaartarinngisaannarsimavai. Aamma toqungasunik, soorlu qaammammik, guutisiornermut peqataanngisaannarsimavoq. (Job 31:26-28) Guutimik tunaarinninnermigut assuarnaattuaannarnikkut maligassiuisimavoq. Naak atugarliuuteqaraluaqaluni tuppallersaaniartuusaartunillu eqqaminiittoqaraluarluni imminut illersorluarpoq nalunaajaalluaqalunilu. Tassunga Jobip oqaasii naapput, Jehova Guutilu eqqartuussisumisut akissarsisitsisumisullu isumalluarfigaa. — Job 31:35-40.
Elihup oqalunnera
8. Elihu kinaava, qanorlu ililluni ataqqinninnermik sapiissutsimillu ersersitsiva?
8 Qanittumiippoq angut inuusuttoq, Elihu, Nahorip Buzip ernerata kinguaava taamaalillunilu Jehovap ikinngutaanut Abrahamimut qanittumik ilaqutaasoq. (Jesaja 41:8) Elihu utoqqarnut ataqqinninnermik ersersitsivoq oqqattut illua’tungeriit marluk tamaasa tusarnaarnerisigut. Sapiillunili oqaasiisa eqqunngitsortaat saqqummiuppai. Assersuutigalugu, Job kamaappaa „imminut pinnani Guuti pisuutimmagu“. Ingammik tuppallersaaniartuusaartut kamaappai. Nassuiaataat Guutimik nersuerpalaarniartuugaluarput, iluamilli oqaatigalu akerleriinnermi Satanimut illiunnermikkut Guutimik avoqqaarinnipput. ’Oqaasissaminik ulikkaarluni’ anersaamillu illernartumit killinneqarluni Elihu Jehovamut nalunaajaasutut nakerisarsiunngitsutut iliorpoq. — Job 32:2, 18, 21.
9. Elihup qanoq ililluni Job ajorunnaarnissamik neriuutissippaa?
9 Jobip imminut illersornissani, Guutip illersornissaa pinnagu, eqqarsaatiginerusimavaa. Iluamik oqaatigalugu Guutimut akiuussimavoq. Toqoqqajaalerlunili Job ajorunnaarnissaminik neriuutissinneqarpoq. Qanoq ililluni? Elihu killinneqarpoq Jehova sinnerlugu Job pillugu oqarnissaminut ima: „Ilivermut aqqarnissaa pinngitsoortiguk utertitaanissaanut akiliutissanik uanga pissarsissukkakku. Taava timaa inuusukkallarneranisut nukittorumaarpoq inuusunnermi ulluinisut ileqqilluni.“ — Job 33:24, 25.
10. Jobip misilinneqarneri qanoq annertutigilertussaasimappat, kisianni 1 Korintumiut 10:13-imi sumik neriorsoqqissaarneqarpugut?
10 Elihup Job naqqippaa oqarmat assuarnaattuaannarnikkut Guutimut iluaritinneq iluaqutaanngitsoq. Elihu oqarpoq: „Guuti ajortumik iliunngisaannarpoq, Ajugaqanngitsoq eqqunngitsumik iliorneq ajorpoq. Inuk akiniartarpaa suliai naapertorlugit.“ Nammineq naapertuilluassutsini erseqqissaatigalugu Job isumaalliorluni iliuuseqarpoq, taamaaliorporli naammattumik ilisimasaqannginnami. Taamaattumik Elihu oqarpoq: „Qanortoq taava Job anusinngorsaammik misilinneqarli pinerluttuliortutut akissuteqartarami. (Job 34:10, 11, 35, 36) Taamatuttaaq uagut uppernerput assuarnaassuserpullu tamakkiisumik uppernarsineqarsinnaavoq aatsaat arlaatigut ’anusinngorsaammik misilinneqartarutta’. Taamaattorli Ataatatta qilammiusup asannittup sapikkatsinnik misilinneqarnissarput akuerinavianngilaa. — 1 Korintumiut 10:13.
11. Sakkortoorujussuarmik misilinneqaraangatta suna eqqaamasariaqarparput?
11 Elihup erserseqqissaqqippaa Jobip nammineq naapertuilluassutsini pingaartippallaarsimagaa. Pinngortitsisorsuarput malunnartinniartussaagaluarpaa. (Job 35:2, 6, 10) Guutip „guutiitsut inuutiinnarneq ajorpai, ikiortissaqanngitsulli naapertuilluarnermik pineqartittarpai,“ Elihu oqarpoq. (Job 36:6) Kialuunniit Guuti iliuusii pillugit nassueqqusinnaanngilaa oqarluni naapertuilluanngitsumik iliorsimasoq. Ilisimasatsinnit qutsinerujussuuvoq, ukiuilu kisissaanngillat. (Job 36:22-26) Sakkortuumik misilinneqaraangatta eqqaamasariaqarparput Guuti naassaanngitsuusoq naapertuilluartuusorlu, namminerlu nersornaatissaminut aalajaalluta suliavut pillugit akilerumaaraatigut.
12. Elihup naggataamik oqaaseqarnerani Guutip guutiitsunik eqqartuussinissaa pillugu suna ersersinneqarpa?
12 Elihu oqalutsillugu silarlernialerpoq. Silarlussaq aggertillugu uummamminik kassuttuulerpoq sajulerlunilu. Jehovap suliai angingaartut eqqartorpai, oqarlunilu: „Oqaatsit tamakku tusaakkit, Job, unillutit Guutip tupinnartuliai maluginiakkit.“ Jobitut Guutip tupinnartuliai ataqqinangaarsusialu eqqarsaatigeqqissaartariaqarpavut. „Ajugaqanngitsoq paasisinnaanngilarput,“ Elihu oqarpoq. „Pissarsuuvoq iluassuseqangaarlunilu, tamatigullu naapertuilluartumik iliortarpoq. Taamaattumik inunnut mianernangaarpoq.“ (Job 37:1, 14, 23, 24) Elihup naggataarutaasumik oqaasiisa eqqaasippaatigut qanittukkut Guutip guutiitsut eqqartuutilerunigit iluarneq naapertuilluarnerlu suusupaginavianngikkai, mianerinnitsinilu imminullu ataqqinnillutik pallorfiginnittut annaakkumaarai. Assuarnaassutsiminnik attassiinnartut Jehovamillu kisimi oqartussaasusutut akuerinnittut akornanniinneq immikkut pisinnaatitaaffiuvoq angisooq! Jobitut qasujuinniarit, Diaavulullu ilinnik assuarnaatsut pilluartut pilluaqqusaasullu taakku akornanniikkunnaarsitsiniaanera nakkaannarfiginngisaannaruk!
Jehovap Job akivaa
13, 14. (a) Jehovap Job qanoq apersorpaa? (b) Guutip Jobimut apeqqutai allat qanoq ilinniarfigisinnaavavut?
13 Jehovap anorersuarmit oqaluutilermani Job tupaallassimassaqaaq. Anorersuaq Guutip pilersitaraa, anorersuarli illumik Jobip meeraasa isersimaffigisaannik uppititsisoq Satanip pilersitaraa. Job akisinnaanngilaq Guutip ima aperimmani: „Taamani uanga nunarsuaq tunngavilerakku sumiippit? . . . Sukai tunngaviusut sumut maggussuunneqarpat, kialu inissippaa ujarak inaarutaasoq ullaap ulloriai tamarmik tussiaqatigiitsillugit Guutillu erneri tamarmik nipertik illugalugu qiimmattartillugit?“ (Job 38:4, 6, 7) Jehovap Job apersortuarpaa imaq, nunarsuup nuiai, ullup qaalernera, toqup isaaffii, taaq ullorissallu pillugit. Job akissutissaqanngilaq ima aperineqarami: „Qilammi ullorissat aaqqissuunneqarnerat nalunngiliuk?“ — Job 38:33.
14 Apeqqutimini tulliuttuni Guutip erseqqissaatigaa inunnit siunnersorneqarnissani imaluunniit ikiorneqarnissani pisariaqartissimanagit taamani aalisakkat, timmissat nunallu uumasui inuit taakkununnga akisussaatinngikkillaramigit isumassuinermini. Aamma apeqqutimini ussik nujuartaq, qatigattuusaq hestilu Jehovap innersuussutigai. Job aperineqarpoq: „Illit tassaavit nattoralimmik peqqusisoq qutsissumukarluni qaqqami pavanersuaq inilioqqullugu?“ (Job 39:30) Soorunami naami! Takorloorsinnaanngilarput Job qanoq qisuariartoq Guutip ima aperimmani: ’Ajugaqanngitsumut saqitsaajumanerpa isorinnittaa?’ Tupinnanngilaq Job ima akimmat: ’Takuarma nikanarpallaartunga; qanormi akissagakkit? Assakka qaninnut ilivakka.’ (Job 39:35-37, nutsigaq pisoqaq.) Jehova tamatigut eqqortumik oqaluttarmat Jehovap unnerluutiginissaanut ussernartorsiuleriataassagaluarutta ’qanerput assatsinnik matusariaqarparput’. Guutip apeqqutaasa aamma ersersippaat angissusia, ataqqinassusia pissaaneralu qanoq ilillutik pinngortitaani ersittut.
Behemot aamma Livjatan
15. Uumasoq suna Behemotimik taaneqartarpa, uumasullu tamatuma suut ilisarnaatigai?
15 Taava Jehovap Behemot, imermiutarsuarmut nalinginnaasumik taaguutaasoq, taavaa. (Job 40:10-19) Ivigartortoq taanna angissutsimigut, oqimaassutsimigut amimigullu akiuussinnaalluartukkut maluginiarnartuuvoq. Ilaatigut siffissamigut aqajammigullu nukittuujuvoq. Nissumini nukii sullulittut kanngussattut nukittutigipput. Sarfarnersuit Behemotip annilaassutigineq ajorpai, aammalu tinittarneq ulittarnerlu akiorlugit nalussinnaalluarluni.
16. (a) Livjatanimik eqqartuineq uumasumut sumut naleqquppa, qanorlu oqaluttuarineqarpa? (b) Behemotip Levjatanillu nakuussusiat Guutimik pinngitsuuisinnaanginnitsinnut tunngasumik sumik ersersitsippat?
16 Aamma Guutip Job ima aperaa: „Leviatan oqummersamik akkerlugu amusinnaaviuk aalisaammillu oqaa anillannaveersillugu?“ Uumasumik taassuminnga eqqartuineq kuukkooriarsuarmut naleqquppoq. (Job 40:20–41:25) Eqqissivissioqateqarumaneq ajorpoq, kamassaarnissaanullu sapiisersoqarumaneq ajorpoq. Qarsumit qimaatinneqarsinnaanngilaq, „naaligaallu naakkiussaq illaatigiinnartarlugu“. (Job 41:19, 20) Leviatanip imaluunniit Livjatanip kamakkaangami „itinersuaq igatut qallasertittarpaa“. Jobip nalunngilaa Livjatan Behemotilu imminit nukittunerujussuusut, tamatumalu nikanartippaa. Aamma uagut maniguulluta nassuerutigisariaqarparput suunngitsuunerput aammalu pulateriaarsutoqarsuup, Satanip, toqunartuinit aniguisinnaajumalluta Jehovamullu kiffartornitsinni suliassavut naammassisinnaajumallugit ilisimassummik nukissanillu Guutimeersunik pinngitsoorsinnaannginnerput. — Filípimiut 4:13; sarĸúmersitat 12:9.
17. (a) Jobip qanoq ililluni ’Guuti takuaa’? (b) Apeqqutit Jobip akisinnaanngisaasa suna ersersippaat, tamatumanngalu suna ilikkarparput?
17 Nikanarsagaalluinnarluni Jobip kukkusimanini nassuerutigaa, ilisimassuseqarnanilu oqalussimanini miserratiginagu. Taamaakkaluartoq ’Guuti takjumaarlugu’ uppernini ersersippaa. (Job 19:25-27) Qanoq ililluni taamaattoqarsinnaava, inuk Jehovamik takunnikkuni inuuinnarsinnaanngimmat? (2 Moses 33:20) Jobip takusaa tassaavoq Guutip pissaaneranik ersersitsineq; Guutip oqaasii tusaavai silaqarsutsikkullu isai ammarneqarput Jehova pillugu sallusuissut paasisinnaalerlugu. Taamaattumik ’oqaaserisimasaraluani utertippai peqqissimininilu takutillugu issumi arsanilu issialluni’. (Job 42:1-6) Apeqquterpassuit akisinnaanngisaasa ersersippaat Guuti qanoq qutsitsigisoq uagullu inuit taassumunnga naleqqiulluta qanoq mikitigisugut. Aamma Jobimut kiffamut taama tunniusimatigisumut taamaappoq. Ersersinneqarpoq nammineq soqutigisavut Jehovap aqqata illernarsisinneqarnissaanit kisimilu oqartussaassusiata qutsissisinneqarnissaanit salliusussaanngitsut. (Matîuse 6:9, 10) Jehovamut assuarnaassutsitta attatiinnarnissaa taassumalu aqqanik ataqqinarsisitsinissarput pingaarnerpaamik ulapputigisariaqarparput.
18. Jobimik tuppallersaaniartuusaartut susariaqarsimappat?
18 Tuppallersaaniartuusaartummi ilumuunngitsut qanoq pineqarpat? Jehovap eqqortumik iliorluni Elifaz, Bildad Zofarilu Jobitut iliornatik nammineq pilluni eqqunngitsumik oqalunnerat pillugu toqussinnaasimagaluarpai. Kisianni Guuti ima oqarpoq: „Ussigit arfineq-marluk savallu angutivissat arfineq-marluk nassarlugit kiffara Job ornissiuk taakkulu ikikkagassatut pilliutigalugit ilissinnut saammaannarsissutissatut. Taava kiffama Jobip qinnutissavaasi.“ Pingasut taakku imminnut nikanartittariaqarsimapput Jehovap piumasaatut iliorsinnaajumallutik. Jobip assuarnaatsup qinnuttariaqarsimavai, Jehovalu inussiarnerluni qinnutaanut tusarnaarpoq. (Job 42:7-9) Jobip nulia, taassuminnga Guutimik perloqquseqqusisimasoq toquinnaruni pitsaanerummat, qanoq piva? Guutip naakkinninneratigut saammaanneqarsimannguatsiarpoq.
Akissarsiassamik neriorsuut neriuutissiivoq
19. Jobimut atatillugu Jehovap qanoq ersersippaa Diaavulumit pissaaneqarnerulluni?
19 Jobip naalliuutini isumakuluutigiunnaarniariarai Guutilu kiffartuutilerlugu Jehova pissutsinut akuliuppoq. Jobip ikinngutini ilumuunngtsiut qinnutereermagit ’atugai Jehovap allanngortippai pigisarisimasaasa marloriaataannik pigisaqalersillugu’. Jehovap Diaavulumit pissaaneqarnerunini takutippaa Job nappaataanik Satanip pilersitaanik tupinnartuliakkut ajorunnaarsikkamiuk. Aamma inngilipiluit Guutip qimaatippai Jobilu inngiliminik paarsisulerneratigut inngilipiluit periarfissaarutsillugit. — Job 42:10; Tussiaat 34:8.
20. Jehovap Job qanoq akissarsitillugulu pilluaqquaa?
20 Jobip qatanngutai angutit arnallu ikinngutigisimasaalu takkupput nereqatigalugulu, misiginneqatiginninnermik ersersitsivigalugu tuppallersarlugulu atugarliuuterpassui Jehovap akuerisimasaasa qaangiunneranni. Tamarmik immikkut aningaasanik assammiunillu guultimik sanaanik tuniorarpaat. Jobip inuunerata immikkoortortaata affaa kingulleq kingullerminnit annerusumik Jehovap pilluaqquaa; 14.000-inik savaateqalerpoq, 6000-inik qatigattuujuteqalerluni, 1000-inik ussiuteqalerluni 1000-inillu arnavissanik siutituujuteqalerluni. Aamma meerarigaluami amerlaqataannik arfineq marlunnik ernertaarpoq pingasunillu panissaarluni. Panii, Jemima, Kezia Keren-Happukilu, nunami arnani pinnernersaapput, qatanngutaasalu angutit akornanni kingornussassaqartippai. (Job 42:11-15) Jobilu suli ukiuni 140-ni inuuvoq kinguaamilu sisamassaat tikillugit angumeralugit. Oqaluttuaq ima naavoq: „Taava Job toquvoq utoqqaalluni ullussanilu naammatsissimallugit.“ (Job 42:16, 17) Tassaana Jehovap tupinnartuliorluni inuunera sivitsorsimagaa.
21. Jobimik oqaluttuamik ilisimanninnerput qanoq iluaqutigaarput, sunalu aalajangiusimasariaqarparput?
21 Job pillugu Biibilimi oqaluttuap Satanip periaasiinik peqqusersuunik eqqaasippaatigut takutillutalu inuit assuarnaassusiat qilammi nunamilu kisimi oqartussaaneq pillugu apeqqummut qanoq ililluni atassuteqartoq. Guutimik asannittut tamarmik Jobitut misilinneqassapput. Jobitulli qasujuissinnaavugut. Taassuma misilinneqarnini anigorpai uppernikkut neriunnikkullu nakussatsissimalluni, naammattorsuarmillu akissarsitinneqarpoq. Ullumikkut Jehovap kiffaasut piviusumik uppissuseqarlutalu neriuuteqarpugut. Neriuullu tupinnangaartoq Akissarsisitsisorsuatta uagutsinnut pissamaartitaraa. Qilammi akissarsiassamik eqqaamajuarneratigut tanitat nunarsuarmi inuutillutik ilumoorlutik Guutimut kiffartortuarnissaminnut nakussatsinneqartarput. Nunarsuarmi inuunermik neriugisallit ilarpassui toqunngisaannartussaapput, toqusortaalli Paratiisimut nunarsuarmiittumut Job ilagalugu makitinneqarumaarput. Neriuut piviusoq tamanna uummammiugalugu eqqarsaatigalugulu Guutimik asannittut tamarmik Jehovap kisimi oqartussaaneranut illersuisutut assuarnaatsut Jehovamut illiuttuarnermikkut uppernarsassavaat Satan sallutuujusoq. (wD 15/11 94)
Qanoq akissavit?
□ Tuppallersaaniartuusaartunut Jobip naggataamik akissutaata suna pingaarnersaraa?
□ Elihup qanoq ililluni ersersippaa tassaalluni Jehovamut nalunaajaasoq nakerisarsiunngitsoq?
□ Guutip Job qanoq apersorpaa, apeqqutaalu Jobimut qanoq sunniuteqarpat?
□ Biibilimi Jobimik oqaluttuaq qanoq pissarsissutigaajuk?
[Qupp. 18-imi assiliartat]
Jehovap Behemotimik Livjatanimillu eqqartuinera Jobimik nikanarsisitsivoq