Isumakuluutitit tamaasa Jehovamut pisittakkit
’Nikanartinniaritsi Guutip assai pissarsuit atangerlugit, taassumunnga taamaaliffissami akitsiseqqullusi. Isumakuluutisilu tamaasa taassumunnga pisissigik, isumassormasi.’ — 1 PÎTRUSE 5:6, 7.
1. Isumakuluutit qanoq sunnersinnaavaatigut, tamannalu sumut assersuunneqarsinnaava?
ISUMAKULUUTIT inuunitsinnut sunniutipiloqarsinnaapput. Isumakuluutit radiomi nipilersukkamik nuannersumik appisimaartoqarnerani silaannarmi akornusersuinernut assersuunneqarsinnaapput. Akornusersuineqanngitsuuppat nipilersugaq tusarnersoq tusarnaartumut nuannaarutaassaaq eqqissisaasinnaallunilu. Nipilli qoqianngunartup nipilersugaq nuannernerpaarluunniit qalleqattaaleraangagu uumitsaqqajaanarsisarpoq. Taamatuttaaq isumakuluutit isumakkut eqqissisimanermut nuanniitsumik sunniuteqarsinnaapput. Isumakuluutit ima naqisimatigilersinnaavaatigut pisussaaffitsinnik pingaaruteqartunik isumaginnissinnaajunnaarluta, ’isumakuluuteqarnerummi inuk artorsaatissittarpaa’. — Ussatit 12:25.
2. ’Inuunermi isumakuluutit’ pillugit Jesus Kristus qanoq oqarsimava?
2 Jesus Kristusip ingasattumik isumakulunnerup navianaataa eqqartorsimavaa. Ullussat kingulliit pillugit siulittuutimini ima oqaaqqissaarivoq: ’Mianersoritsi uummatisi putumanermut imerajunnermullu inuunerullu matuma piinik isumakulunnermut nanertorteqqunagit; ullup taassuma tassanngaannaq tikeqinavaasi; nigatummi nunap tamarmi qaani ineqartunut tamanut nalliukkumaarpoq. Eqqumattuinnaritsilu qinullusi tamakkuninnga piumaartussanik tamanik qimarratiginnissinnaaqqullusi inuullu ernerata saani atasinnaaqqullusi.’ (Lúkarse 21:34-36) Soorlu nerivallaarneq imerpallaarnerlu isumakkut kajumiitsunngortitsisinnaasut taamatut ’inuunerup matuma piinik isumakuluutiginninneq’ siunnerfimmit allamut saatitsisinnaavoq, ajortorujussuarmik kingunilimmik.
Isumakulunneq suusoq
3. „Isumakulunneq“ qanoq nassuiarneqarsimava, isumakuluutinullu pissutaasut ilaat suuppat?
3 „Isumakulunneq“ tassaanerarneqarsimavoq „ajunaariataarnissamuunerusoq siooraneq annernartoq“. Isumaaluttoq „ersisarpoq ilimasupiluallaartarlunilu, amerlanertigut timikkut malunnaateqarluni (kiagulluni, nukini sukallugit tillerulullunilu). Isumakuluttup ersissutigisani qularisarpai nammineq sapertutut misigaluni.“ (Webster’s Ninth New Collegiate Dictionary) Tassa isumakulunneq ajornartorsiutaasinnaavoq annertoorujussuaq. Isumakulunnermut pissutaasorpassuit ilagaat napparsimaneq, utoqqalilerneq, pinerluffigineqarnissamut siooraneq, suliffissaaruteriataarsinnaaneq ilaquttallu inuulluarnissaannik isumaginninneq.
4. (a) Inuit isumakuluutaallu pillugit suna eqqaamassallugu pitsaassava? (b) Isumakuluuteqaraanni qanoq iliortoqarsinnaava?
4 Ersarippoq isumakuluutit annertussusii tamatumunngalu pissutaasut assigiinngitsorujussuusut. Inuit tamarmik immikkut pissutsinut assigiinngitsunut assigiinngitsumik qisuariartarput. Taamaattumik paasisariaqarparput naak arlaat uagutsinnut ajornartorsiutaanngikkaluartoq taamaattoq Jehovamut pallorfiginneqatitsinnut isumakuluutaasinnaammat. Isumakuluutivut ima annertutigilerpata allaat sallusuissutinik Guutip oqaasianiittunik eqqarsaatiginneqqissaarsinnaajunnaarluta, qanoq ilorsinnaavugut? Taavalu ima isumakulutsigilersimagutta allaat Jehovap kisimi oqartussaassusianut kristumiutullu assuarnaassutsitsinnut tunngasut aalajangiussinnaajunnaarlugit? Immaqa pissutsit atukkavut allanngortissinnaanngilavut. Inuunermi ajornartorsiutit annertuut pissutigalugit pissutissaqanngitsumik isumakuluutivut ajugaaffigisinnaajumallugit Biibilimi eqqartorneqartut ikiuutigisinnaasavut misissortariaqarpavut.
Ikiuutissaqarpoq
5. Tussiaat 55:23 naapertorlugu qanoq iliorumassaagut?
5 Kristumiut anersaakkut ikiorneqarnissaminnik pisariaqartitsigaangamik isumakuluutinillu artorsinneqaraangamik Guutip oqaasiani tuppallersaatissarsiorsinnaapput. Biibilimi tutsuiginartunik unnersuussuteqarpoq uppernarsaatissarpassuaqarlunilu Jehovap kiffaasut aalajaatsutut kisimiinnginnitsinnut. Assersuutigalugu tussiaasiortoq David ima erinarsorsimavoq: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ (Tussiaat 55:23) Qanoq iliorutta oqaatsit taakku malissavavut? Ataatatsinnut qilammiusumut asannittumut nanertuugisavut, isumakuluutivut, sioorassutivut pakatsissutivullu tamaasa tunniuttarlugit. Taamaaliortarutta toqqissisimassaagut uummatitsigullu eqqissinermik misigisaqassalluta.
6. Filípimiut 4:6, 7 naapertussagaanni qinuneq qanoq iluaqutaasinnaava?
6 Nanertuutigisavut, isumakuluutivut tamaasa ilanngullugit, Jehovamut tunniussinnaassagutsigik uummammit pisumik aalajangersimasumik qinusarnissaq pisariaqarpoq. Taava ilukkut eqqissinermik misigissaagut, soorlu apustili Paulus allassimasoq: ’Suulluunniit pillugit isumakulunnaveeritsi, nungullugilli kissaatigisasi Guutimut nalunaarsigik torlulallusi qinullusilu qujallusillu; eqqissinerullu Guutip piata sianinernit tamanit annerungaartup uummatisi eqqarsaatisilu sernissigissavai Kristus Jesusimi.’ (Filípimiut 4:6, 7) ’Eqqissineq Guutip pia’ asseqanngitsoq tassaavoq Jehovap kiffaanik pissutsini misilinneqaataanerpaani allaat nalinginnaanngitsumik eqqissisimatitsisartoq. Tamanna Guutimut qanimut inuttut attaveqarnitta nassataraa. Anersaamik illernartumik tamatuminngalu killinneqarluta iliuuseqarnissamik qinugaangatta inuunermi ajornartorsiutinik tamanik piiaaffigineqarneq ajorpugut, anersaalli inerititaanik eqqissinermik nuannaarutissinneqartarluta. (Lúkarse 11:13; Galâsiamiut 5:22, 23) Isumakuluutinit artorsinneqarneq ajorpugut nalunnginnatsigu Jehovap innuttani aalajaatsut tamaasa ’eqqissinartumik qasuersaartittarai’ ataavartumillu ajoqutigisaannik eqqorneqartinnavianngikkai. — Tussiaat 4:9.
7. Isumakuluutinit aniguiniarnitsinni utoqqaanertat qanoq ikiuussinnaappat?
7 Taavami naak Biibilimi ilikkakkavut isumaliutigeqqissaartaraluarlugit qinujuaraluarlutalu isumakulunnerput taamaaginnarpat? (Rûmamiut 12:12) Ilagiinni utoqqaanertat toqqakkat aamma Jehovap anersaakkut uagutsinnut ikiuisussiarai. Guutip oqaasia atorlugu tuppallersarlutalu ikiorsinnaavaatigut aamma qinoqatigalutalu qinnuttarsinnaavaatigut. (Jâko 5:13-16) Apustilip Peterip utoqqaanertaqatini kajumissaarsimavai Guutip savaatai kajumillutik, piumassuseqarluarlutik maligassaallutillu paarissagaat. (1 Pîtruse 5:1-4) Angutit taakku uagutsinnut ajunngitsussamik suliniartuupput ikiuerusussuseqarlutillu. Soorunami utoqqaanertat ikiuinerat tamakkiisumik iluaqutigissagutsigu ilagiinnilu anersaakkut ajunngitsumik ingerlassagutta tamatta Peterip kajumissaarutaa manna maleruartariaqarparput: ’Ilissi inuusuttuususi, utoqqaanerit naalassigik, tamassimi ilissinnut nikanartinnermik assuuseritsi, anneruniartut Guutip akerartormagit, nikanartittulli saammaattarlugit.’ — 1 Pîtruse 5:5.
8, 9. 1 Pîtruse 5:6-11 qanoq tuppallersaatissarsiffigisinnaavarput?
8 Peter nangippoq: ’Taamaattumik nikanartinniaritsi Guutip assai pissarsuit atangerlugit, taassumunnga taamaaliffissami akitsiseqqullusi. Isumakuluutisilu tamaasa taassumunnga pisissigik, isumassormasi. Putumatsaalillusilu eqqumagitsi, akerartortersi Diaavulu liivertut uiannisaartutut angalasarmat iisassarsiorluni. Taanna assortorsiuk uppernikkut aalajangerlusi, ilisimagassigik silarsuarmi qatanngutigisasi taamaaqataannik naalliutsitaasartut. Guutilli saammaassingaartup sivikitsumik naalliukkallarsinnartusi qaaqqugamisi naalannarsutsiminut naassaanngitsumik ittuinnartumut Kristus Jesusimi, taassuma nammineq piginnaanngorsarluarlusilu aalajangersillusilu pissatsillusilu tunngavilersussavaasi. Taassuma pissaaneq pigaa naassaanngilluinnartumik. Amen.’ — 1 Pîtruse 5:6-11.
9 Tuppallernaqaaq ilisimallugu ’isumakuluutivut tamaasa Guutimut pisissinnaagivut isumassormatigut’! Isumakuluutittalu ilaat Diaavulup qinugisaatinnitsigut allanillu erloqissutissinnitsigut Jehovamut attaveqarnitsinnik aseruiniarnerata kingunerisarippagit nuanningaannginnerpa nalunagu assuarnaassutsiminnik attassiuaannartunut suut tamarmik pitsaap tungaanut saakkumaartut? Aap, naalliukkallalaareerutta Guutip saammaassingaartup misilinneqarnerput unitsissavaa piginnaanngorsarlutalu nakussatsillutalu.
10. Inuttut pissutsit isumakuluutitta millisinnissaannut iluaqutigisinnaasavut suut 1 Pîtruse 5:6, 7-imi innersuussutigineqarpat?
10 1 Pîtruse 5:6, 7-imi innersuussutigineqarput inuttut pissutsit pingasut isumakuluutitta nammannissaannut iluaqutigisinnaasavut. Ilaat tassa maniguunneq, imaluunniit ’nikanartinneq’. Versip 6-ip naggataani eqqaaneqarpoq ’taamaaliffissaq’, naammagittartariaqarneq innersuussutigineqarluni. Versimi 7-imi ersersinneqarpoq isumakuluutivut tamaasa tatiginnilluta Guutimut pisissinnaagivut ’isumassormatigut’, oqaatsillu taakkua Jehovamik tunaartarinnilluinnarnissamik kajumissaaripput. Taamaattumik misissoriartigu maniguunneq, naammagittassuseq Guutimillu tunaartarinnilluinnarneq qanoq ilillutik isumakuluutitsinnik atoruminarsisitsisinnaasut.
Maniguunneq qanoq iluaqutaasinnaasoq
11. Isumakuluutitsinnik qaangiiniarnitsinni maniguunneq qanoq iluaqutigisinnaavarput?
11 Maniguukkutta akueriumassavarput Guutip eqqarsaatai uagut eqqarsaatitsinnit annerujussuusut. (Jesaja 55:8, 9) Maniguukkutta nassuerutigiumassavarput eqqarsartaatsikkut piginnaasavut Jehovap ilisimalluinnassusianut naleqqiullugit killilerujussuusut. Soorlu angutikkut naapertuilluartukkut Jobikkut pisimasukut takuneqarsinnaasoq uagut paaqartinngisavut Jehovap ilisimavai. (Job 1:7-12; 2:1-6) ’Guutip assai pissarsuit atangerlugit’ nikanartinnitsigut Ajugaqanngitsumut Kisimi Oqartussaasumut naleqqiulluta mikissuserput nassuerutigissavarput. Taamaalioruttalu pissutsit Jehovap akuerigallagaasa naammagittarluta atornissaannut iluaqutigissavarput. Immaqa uummatitsigut kissaatigisaraluarparput erniinnarluinnaq ikiorneqarnissarput, Jehovalli pissutsini oqimaaqatigiilluinnaqqissaartuummata naluneq ajorpaa qaqugu qanorlu iliorluni iluaqutissatsinnik iliussalluni. Taamaattumik meeraaqqatut maniguulluta Jehova assaasigut pissaasutigut tasiorniartigu, tatigalugu isumakuluutitta nammannissaannut ikiussagaatigut. — Jesaja 41:8-13.
12. Maniguulluta oqaatsit Eprîarit 13:5-imiittut maleruarutsigik pigisanik isumakuluutiginninnerput qanoq sunnerneqassava?
12 Maniguunnerup ilagaa Guutip oqaasianit unnersuussutinik maleruaajumatussuseq, amerlasuutigut isumakuluutinik annikillisitsisartoq. Assersuutigalugu, isumakuluutivut pigisatigut noqqaassutiginnippallaarnermik pissuteqarpata Paulusip siunnersuutaa manna eqqarsaatigeqqissaassallugu iluaqutaassaaq: ’Inuugitsi aningaaserituunasi pigisasi naammagalugit, nammineq oqarmat: „Iperassanngilakkit qimassanatillu.“’ (Eprîarit 13:5) Amerlasuut siunnersuummik tamatuminnga maniguullutik maleruaanermikkut pigisat tungaatigut annertuumik isumakulunnissaraluartik pinngitsoortissinnaasimavaat. Naak aningaasatigut atukkatik pitsanngunngikkaluartut taamaattoq anersaakkut atugarliuutigilersimanngilaat.
Naammagittarnerup pingaaruteqarnera
13, 14. (a) Naammagittarluni qasujuissuseq eqqarsaatigalugu Job qanoq maligassiuisimava? (b) Naammagittarluni Jehovamut utaqqineq qanoq iluaqutaasinnaava?
13 Oqaaseq ’taamaaliffissami’ 1 Pîtruse 5:6-imi atorneqartoq naammagittarluni qasujuinnissamik unnersuussutaavoq. Ajornartorsiut ilaannikkut sivisunaarsinnaasarpoq, tamannalu isumakulunnerulersitsisinnaavoq. Ingammik taamaatsillugu Jehovamut assaanut ilisariaqarparput. Ajoqersugaq Jakob ima allassimavoq: ’Qasujuitsut pilluarneraraavut; Jobip qasujuissusianik tusarsimavusi, Jehovallu aniguiffigititaa ilisimavarsi, Jehova nallittuillunilu isumassuinertoqimmat.’ (Jâko 5:11, NV) Job suutaarutsitaasimavoq, meeqqani qulit toqukkut annaallugit, nappaammik maajunnartumik eqqorneqarluni tuppallersaaniartuusaartunillu eqqunngitsumik nalilerneqarluni. Taamatut atugaqarnermi nanertisimaneq pissusissamisoorpoq.
14 Job naammagittarluni qasujuissutsimigut maligassaavoq. Uppernikkut sakkortuumik misilinneqarutta Jobip iliorsimaneratut oqilisaaffigineqarnissarput utaqqisariaqarparput. Taassuma iluaqutissaanut Guuti iliuuseqarsimavoq, naalliuutaanit aniguisillugu akissarsisingaarlugulu. (Job 42:10-17) Naammagittarluta Jehovamut utaqqinitta qasujuissuserput ineriartortittarpaa taassumunngalu tunniusimanitta qanoq annertutiginera qulaartarlugu. — Jâko 1:2-4.
Jehova tunaaralugu
15. Sooq Jehova tunaarilluinnartariaqarparput?
15 Peterip uppeqatini kajumissaarpai ’isumakuluutiminnik tamanik Guutimut pisitsisarnissaannik’. (1 Pîtruse 5:7) Uagut taamaaliorsinnaavugut Jehovamullu tunaarinnilluinnartariaqarluta. Ussatit 3:5, 6-imi allassimavoq: „[Jehova] tunaariuk uummatikkut iluunngarlutit, namminerlu silaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ Inuit isumakuluutiminnik nanertuuteqartut ilaasa misigisimasatik pissutigalugit inoqatiminnik tatiginninnissartik ajornakusoortittarpaat. Pinngortitsisuttali, inuunerup pilerfiata, tatiginissaanut tamatigut pissutissaqarpugut. Allaat pissutsinut aalajangersimasunut qisuariarnerput nalornissutigigaluarlugu tamatigut Jehova tatigisinnaavarput atugarliuutitsinnit aniguisikkumaaraatigut. — Tussiaat 34:19, 20; 36:10; 56:4, 5.
16. Timip piisigut isumakulunneq pillugu Jesus Kristus qanoq oqarsimava?
16 Guutimik tunaarinninnerup ilagaa erneranut, Jesus Kristusimut, Ataataminit ilikkakkaminik ajoqersuisimasumut, naalanneq. (Juánase 7:16) Jesusip ajoqersukkani kajumissaarsimavai Jehovamut kiffartornermikkut ’qilammi pequutinik katersueqqullugit’. Timikkummi pisariaqartitat, soorlu nerisassat, atisat inissarlu? ’Isumakulussanngilasi,’ Jesus siunnersuivoq. Guutip timmissanik nerisaqartitsinera tikkuarpaa. Aamma naasut kusanaqisunik Guutip atisaqartippai. Guutip kiffai inuit tamakkunannga naleqarnerunnginnerpat? Soorunami. Taava Jesus ima oqaaqqissaarivoq: ’Guutip naalagaaffia iluarnerlu taassuma pia piniaqqaarsigik, taava tamakku tamaasa ilanngullugit piumaarpasi.’ Jesus nangippoq: ’Taamaattumik aqagussaq isumakuluutigeqinasiuk, aqagussaq piminik isumakuluutissaqassammat.’ (Matîuse 6:20, 25-34) Aap, nerisassat, imissaq, atisat inissarlu pisariaqartippavut, Jehovali tunaarigutsigu tamakku pisariaqanngitsumik isumakuluutigisariaqassanngilavut.
17. Naalagaaffimmik salliutitsisariaqarnerput sumut assersuunneqarsinnaava?
17 Naalagaaffik salliutissagutsigu Guuti tatigisariaqarparput eqqortumillu tulleriiaarisariaqarluta. Aqqartartoq uiluimmik sapangartalimmik ujarlerniarluni anersaartuuteqarani immap naqqanut aqqartarpoq. Taamaaliorluni ilaquttaminik pilersuisarpoq. Tamannalu assut pingaartippaa. Sunali pingaarnerpaava? Silaannaq! Puani silaannarmik immerniarlugit akuttunngitsumik anersaariartorluni immap qaavanukartariaqartarpoq. Silaannaq pingaarnerpaavoq. Taamatuttaaq uagut pissutsit aaqqissuussaaneranni matumani sulisariaqartarpugut inuunermut pisariaqartut pissarsiariniarlugit. Anersaamulli tunngasut salliutittariaqarpavut inoqutitta inuuinnarnissaannut tamakku aalajangiisuummata. Timip tungaatigut pisariaqanngitsumik isumakuluuteqalissanngikkutta Guuti tatigilluinnartariaqarparput. Aamma ’Naalakkap suliaanik naammassisaqangaartuinnarutta’ isumakuluutivut annikillissapput „Jehovami nuannaarneq“ pallittaalisatut ippoq. — 1 Korintumiut 15:58; Nehemja 8:10.
Isumakuluutitit Jehovamut pisittuakkit
18. Isumakuluutinik tamanik Jehovamut pisitsisarnerup ilumut iluaqutaassusianut sunik uppernarsaatissaqarpa?
18 Allamut saaqqajaanata anersaamut tunngasunik ulapputeqartuaannarumagutta isumakuluutivut tamaasa Jehovamut pisittuaannartariaqarpavut. Eqqaamajuaannassavarput kiffani ilumoorluni isumassortuaannarai. Assersuut: Arnaq kristumiu uimi imminut ilumoorfiginninnginnera pissutigalugu ima isumakulutsigilersimavoq allaat sininneq ajulertarluni. (Naleqqiuguk Tussiaat 119:28.) Siniffimminili innangatilluni isumakuluutini tamaasa Jehovamut pisittarpai. Uummammiuni tamaasa Guutimut aniatittarpai, nammineq paneeqqamilu marluk aliasuutitik oqaluttuaralugit. Ikiorneqarnissaminik ilungersoqaluni qinoreeraangami sinilertarpoq, tatigalugu Jehovap nammineq meeqqanilu isumassussagaatik. Ullumikkut arnaq taanna Biibilimut naapertuuttumik avereersimalluni utoqqaanertamik ueqarpoq pilluarluni inooqatigisaminik.
19, 20. (a) Isumakuluutitsinnik qaangiiniarnermi sunik ikiortissaqarpugut? (b) Isumakuluutivut sujuaannartariaqarpavut?
19 Jehovamut innuttaasutut isumakuluutinik aaqqiiniarnermi assigiinngitsunik ikiuutissaqarpugut. Guutip oqaasia ingammik iluaqutaavoq. „Inussiaq aalajaallunilu silatooq“ aqqutigalugu Guutip tunniuttagaanik anersaakkut inuussutissaateqarluarpugut, kiisalu Napasuliaq Alapernaarsuiffik-mi Iteritsi!-milu ilanngutassianik iluaqutaasunik nutaannguallannartunillu pissaqartitaajuarluta. (Matîuse 24:45-47) Guutip anersaava illernartoq ikiortissaraarput. Akuttunngitsumik ilungersortumillu qinusarneq iluaqutigisaqaarput. Kristumiut utoqqaanertat toqqakkat anersaakkut ikiuinissaminnut tupallersaanissaminnullu piareersimajuaannarput piumassuseqarlutillu.
20 Maniguussuserput naammagittassuserpullu isumakuluutinut artorsiisunut iliuuseqarfiginninnermi iluaqutaasorujussuupput. Ingammik pingaartuuvoq Jehovamik tunaarinnilluinnarnissaq, ikiuinerami siulersuineralu misigigaangatsigik uppernikkut nakussatsittarpugut. Guutimullu uppernerup ingasattumik annilaanganissarput pinaveersimatissavaa. (Juánase 14:1) Uppernerup kajumissisissavaatigut Naalagaaffimmik salliutitsinissatsinnut Naalakkallu suliaani ulapputeqarnissatsinnut, tamannalu isumakuluutinik aaqqiiniarnermi iluaqutigisinnaavarput. Iliuutsit taama ittut Guutimik naassaanngitsussamut unnersiutiginnittut akornanni toqqissisimanermik misigitissavaatigut. (Tussiaat 104:33) Taamaattumik isumakuluutivut Jehovamut pisittuaannartigik. (wE 15/11 94)
Qanoq akissavit?
□ Isumakulunneq qanoq nassuiarneqarsimava?
□ Isumakuluutinik aniguiniarnitsinni sunik ikiortissaqarpugut?
□ Maniguunneq naammagittassuserlu isumakulukkunnaaminissamut qanoq iluaqutaasinnaappat?
□ Isumakuluutinik aniguiniarnermi Jehovamik tunaarinnilluinnarnissaq sooq taama pingaarluinnartigaa?
□ Sooq isumakuluutivut Jehovamut pisittuartariaqarpavut?
[Qupp. 24-mi assiliartaq]
Nalunngiliuk sooq Jesus oqarsimasoq: ’Isumakulussanngilasi’?