Ataasinngoritsi asanninnikkut

’Ataasinngoritsi asanninnikkut.’ — KULORSAMIUT 2:2.

1, 2. Sunniineq avissaartuutsisoq suna ingammik ullumikkut atuuppa?

TAA! Nipituumik qilammit ima oqartoqarpallappoq: ’Eqqanaq nuna imarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’ (sarĸúmersitat 12:12) Tusarliussaq tamanna ukiut ingerlatillugit nunarsuup inuinut aarlerinarsiartuinnarpoq.

² Jehovamut akerlilersuisorsuaq assortuisutut (Satan) aamma mamarliisutut (Diaavulu) sivisuumik ilisimaneqarsimavoq. Salloqittaasorli taanna maanna suli ajornerulersimavoq — tassaalersimavoq guuti kamattorsuaq! Sooq? 1914-imi qilammi sorsuunnermi Mikaelimit inngiliinillu qilammit iginneqarsimagami. (sarĸúmersitat 12:7-9) Diaavulup nalunngilaa unammillerluni inuit tamaasa Guutimik pallorfiginnikkunnaarsissinnaaneraasimanerminik uppernarsaaniarnissaminut piffissaarutilerluni. (Job 1:11; 2:4, 5) Qimaariarfissaqarani inngilipilunilu allaanngillat igutsappassuit kamaqalutik inuiannut eqqissiveqanngitsunut saassussisut. — Jesaja 57:20.

3. Nalitsinni Satanip ajortunngorluinnarsimanera qanoq kinguneqarsimava?

³ Pisimasut tamakku inunnut takussaanngitsut nassuiaatissaapput sooq ullumikkut inuiaat akornanni taama ileqqussatigut nakkaassimaneqartigineranut. Aamma tamanna nassuiaatissaavoq sooq inuit inuiaat aaqqiagiillutik inuusinnaanngivissut avissaartuunnerat aaqqinniaraluarlugu ilungersoraluarnerminni iluatsitsineq ajornerannut. Naggueqatigiit assigiinngitsut imminnut sorsuuttarput inuit millionilikkuutaat angerlarsimaffeerunnerannik qimaatitaanerannillu kinguneqartumik. Taamaattumik tupinnanngilaq inatsisaatsuliornerit aatsaat taama ingasatsigilersimammata! Jesusip siulittuisimaneratut ’inatsisaatsuliornerit amerlisimapput asanninneq amerlasuuni nillertunngorsimalluni’. Sumut tamaanga qiviaruit aaqqiagiinngissuseq asanninngissuserlu ullumikkut inuiaat eqqissiveqanngitsut ilisarnaatigisaat takusinnaavatit. — Matîuse 24:12.

4. Sooq ingammik Guutip innuttai navianartorsiorpat?

⁴ Silarsuarmi pissutsit eqqarsaatigalugit Jesusip ajoqersukkaminut qinnussisimanera maanna itinerusumik isumaqalersimavoq: ’Qinnutinngilakka silarsuarmit peerseqqullugit, kisianni ajortumut sernigeqqullugit. Silarsuup inuisa ilaginngilaat, soorlu uangattaaq silarsuup inuisa ilaginngikkaannga.’ (Juánase 17:15, 16) Ullumikkut ’ajortup’ kamannini ingammik ’Guutip inassutaanik maleruaasunut Jesusillu nalunaajaataanik piginnittunut’ saatsissimavaa. (sarĸúmersitat 12:17) Jehovap paarsilluarluni asannillunilu isumassunngikkaluarpatik nalunaajaasui aalajaatsut nungunneqarsimassagaluarput. Anersaakkut isumannaassuserput ajunngitsumillu ingerlanissarput eqqarsaatigalugit Guutip iluaqutissiaanik atorluaanerput inuuinnarnissatsinnut aalajangiisuussaaq. Tamatumunnga ilaavoq Guutip pissaanera Kristus aqqutigalugu sunniuttartoq naapertorlugu assoruulluta suliniarnissarput, soorlu apustili Kulorsamiut 1:29-mi kajumissaarisoq.

5, 6. Apustilip Paulusip Kolossami kristumiut qanoq misigiffigisimavai, soorlu 1995-imut allassimaffik taama naleqqutsigaa?

⁵ Naak qularnanngitsumik Paulusip Kolossami qatanngutini takusimanngisaannaraluarlugit asavai, imami allaffigisimavai: „Paasiteqqunaraluaqaasi ilissi pillusi qanoq isumakuluuteqartigisunga.“ (Kulorsamiut 2:1, The New Testament in Modern English, J. B. Phillipsimit) Jesusip malinnittai silarsuarmut ilaanngimmata qatanngutigiittut ataasiussusiat ’ajortup’ aserorniarsariuassavaa silarsuup anersaavanik siaruarteriffiginiarsarinerisigut. Nutaarsiassat Epafrasip Kolossamit tikiussaasa ersersippaat tamaani ilaatigut taamatut pisoqarsimasoq.

⁶ Paulusip kristumiunut qatanngutiminut atatillugu pinngaartitaa ataatsimut ima oqaatigineqarsinnaavoq: ’Ataasinngoritsi asanninnikkut.’ Oqaasii taakku ingammik ullumikkut, silarsuarmi avissaartuuffioqisumi asannissuseqanngiffiusumilu, pingaaruteqaqaat. Paulusip unnersuussutaa ilumoorluta maleruarutsigu Jehovap isumassuinera misigissavarput. Aamma inuunitsinni anersaava misigissavarput, silarsuarmit tatineqarnernut akiuunnitsinni iluaqutigisassallugu. Unnersuussut tamanna silatoqaaq! Taamaattumillu Kulorsamiut 2:2 1995-imut allassimaffissatut qinersimavarput.

7. Aaqqiagiinneq qanoq ittoq kristumiut ilumoortut akornanni atuuttussaava?

⁷ Siusinnerusukkut Korinthimiunut allakkamini apustilip Paulusip inuup timaa assersuutitut atorpaa. Allappoq ilagiinni kristumiuni tanitaasuni ’assuariissoqartussaanngitsoq’ kisianni ’avatit assigiissumik isumaqatigiissasut’. (1 Korintumiut 12:12, 24, 25) Assersuut pitsak! Avativut tamarmik ataqatigiipput, immikkoorlutik atasinnaanngillat, tamarmik timitsinnut atapput. Taamatuttaaq nunarsuaq tamakkerlugu qatanngutigiittut ippugut, ilavut tanitaasut ilavullu nunarsuarmi paratiisiusumi inuunissamik neriugisaqartut. Kristumiunit timitut ittunit ilaaffigisatsinnit immikkoornianngisaannarta! Kristus Jesus aqqutigalugu Guutip anersaavata qatanngutitsinnik peqateqarnitsinni annertunerusumik najussavaatigut.

Aaqqiagiinneq ilisimasaqarnermut atavoq

8, 9. (a) Ilagiinni ataasiussutsimut ilasaasinnaassagutta suna pisariaqarpa? (b) Qanoq ilillutit Kristus pillugu ilisimasaqalersimavit?

⁸ Paulusip pingaarnertut taakkartugaa tassaavoq kristumiut aaqqiagiinnerat ilisimasaqarnermut atasuusoq, ingammik Kristus pillugu ilisimasaqarnermut. Taanna allassimavoq kristumiut ’ataasiusariaqartut asanninnikkut, sianissutsillu nakimajunnaarsup pisuussusia tamaat pigeqqullugu, tassa anngigisaq Guutip pia, Kristus ilisareqqullugu’. (Kulorsamiut 2:2) Gutip oqaasia atuaqqissaaleratsigu ilisimassuteqalersimavugut Biibilillu immikkuualuttortaasa ilarpassui ilikkarsimallugit. Paasisimavarput immikkuualuttut tamakku ilarpassui qanoq ilillutik Guutip siunertaanut naapertuuttuusut, paasivarpullu Jesus tamatumunnga atatillugu qanoq pingaaruteqartoq. ’Taassumani pequutit ilisimassutsip ilisarsissutsillu pii tamarmik isertugaapput.’ — Kulorsamiut 2:3.

⁹ Jesus Guutillu siunertaani taassuma inissisimanera taamatut isigivigit? Kristumiuunerartut ilarpassui Jesusilerisaqaat, upperinerarlugu annaanneqarsimanerarlutillu. Ilumulli Jesus nalunngilaat? Taamaannavianngilaq, amerlanersaasami ataasiullunilu pingasuussuseq Biibilimik tunngaveqanngitsoq upperaat. Illilli tamanna pillugu sallusuissut nalunngilat, aammalu qularnanngitsumik Jesusip oqaaserisimasai iliuuserisimasaalu ilisimalluarlugit. Millionilikkuutaat ikiorneqarsimapput tamatuminnga ilisimasaqalersinneqarlutik atuagaq Inuk inuit inuusimasut pingaarnerpaartaat ikiortigalugu. Taamaakkaluartorli uagut Jesus taassumalu pissusii pillugit ilisimasavut annertusiartortinniartuartariaqarpavut.

10. Ilisimassut isertugaasoq qanoq ililluni uagutsinnit pissarsiarineqarsinnaava?

¹⁰ Allassimammat ’ilisimassutsip ilisarsissutsillu pii tamarmik Jesusimi isertugaasut’ imaanngilaq paasisinnaanngilluinnarivut. Ilisimassulli tamanna ujaqqanik erlinnartuutinik piiaaffissatut ammaannartutut ippoq. Piiaalluta suminngaanniit aallartiffissatsinnik ujarleqqaartariaqanngilagut, sumiittoq ilisimareeratsigu. Eqqorluartumik ilisimasaqalerumagutta Jesus Kristus pillugu Biibilimi ajoqersuutigineqartut ilinniartariaqarpavut. Jehovap siunertaanik naammassinninnissami Jesusip pingaaruteqarnera paasinerujartuinnartillugu siuneqassusermik ilisimassutsimillu eqqorluartumik erlinnartuutitut ittunik katersukkavut amerliartuinnassapput. Pisariaqartitarput tassa piiakkatta imaluunniit assakkatta itinerujartuinnartinnissaa, erlinnartuutinik imaluunniit paasisanik nuannersunik assaaffigeriikkatsinneersunik amerlanerujartuinnartunik qalluilluta. — Ussatit 2:1-5.

11. Jesusip suliarisimasaasa eqqarsaatigeqqissaarnerisigut ilisimasavut siuneqarsuserpullu qanoq ililluta annertusisissinnaavavut? (Jesusip ajoqersukkami isigaannik uffaasimanera nassuiaruk, allamilluunniit assersuuteqarit.)

¹¹ Assersuutigalugu immaqa nalunngilarput Jesus ajoqersukkami isigaanik uffaasimasoq. (Juánase 13:1-20) Taavami taamaalilluni ilinniagassiissutaa isumalu ersersitaa isumaliutigeqqissaarpavut? Taamaaliorutta pigisarilissavarput ilisimassut erlinnartuutaasoq qatanngutitsinnik angummik arnamilluunniit sivisuumik iluarinngissimasatsinnik ajunngitsumik iliorfiginnilernissatsinnut ajornarunnaarsitsillunilu killiisoq. Imaluunniit nuannarivallaanngisatsinnik suliassinneqarutta Juánase 13:14, 15-imi allassimasut pingaaruteqassusiat tamakkiisumik paasisimagutsigu ajunngitsumik qisuariassaagut. Tassa taamatut ilisimassuseq siuneqassuserlu uagutsinnut sunniuttarput. Kristus pillugu ilikkakkavut naapertorlugit iliuuseqarnerujartornerput qanormitaava allanut sunniuteqassava? Qularnanngitsumik ’savaatit asanninnikkut ataasiunerujartuinnassapput’.a

Allamut saasaarineq ataasiussutsimik ajoqusiisinnaavoq

12. Ilisimassut suna eqqarsaatigalugu mianersortariaqarpugut?

¹² Eqqorluartumik ilisimasaqarneq ’asanninnikkut ataasiulernitsinnik’ kinguneqartarpat taava ’kukkulluni „ilisimassummik“ taaneqartartoq’ qanoq sunniuteqartarpa? Akerlerluinnaanik — saqitsaannermik, aaqqiagiinnginnermik uppissuseerunnermillu. Taamaattumik ilisimassummut kukkusumut taama ittumut mianersortariaqarpugut, soorlu Paulusip Timoteus mianersoqqugaa. (1 Timûtiuse 6:20, 21) Paulus Kolossamiunut ima allassimavoq: ’Taamali oqarpunga oqaatsinik naalakkuminarsakkanik salloqittarteqqunasi. Misissoritsi ilisimaqqissaarniutitigut salloqittaatitigullu piunngitsutigut piiarneqaqqunasi, inunnit maligassarsiat ilinniaqqaagassallu silap pii malillugit pisarmata Kristusilu malinnagu.’ — Kulorsamiut 2:4, 8.

13, 14. (a) Sooq qatanngutit Kolossamiut navianartorsiorsimappat? (b) Sooq ullumikkut isumaqartoqarsinnaava assingusumik aarlerinartoqanngitsoq?

¹³ Kolossami kristumiut ilisimassummit eqqunngitsumik taaneqartumit malunnanngitsumik sunnerneqariartuaarsimapput. Kolossami eqqaanilu inuit griikerit isumaliutersuutaannik assut qummut isiginnissimapput. Aamma judaisteqarsimavoq kristumiut Mosesip Inatsisaanik, nalliuttorsiorfinnik nerisassanillu aalajangersakkanik, maleruaanissaannik kissaateqartunik. (Kulorsamiut 2:11, 16, 17) Paulusip ajorinngilaa qatanngutini ilumoortumik ilisimassuteqalissappata, mianersoqquaali iliuutsiminnut inuunerminnullu inuup isiginneriaasianiinnaq isiginninnissaannik naalakkiiniartunit tammartinneqaqqunagit. Paasissallugu ajornanngilaq ilagiinniittut ilaat paasinnittaatsimik isummamillu Biibilerpalaanngitsunik pigisaqalersimappata ilagiinnut ilaasortaasut akornanni ataasiussutsimut asaqatigiinnermullu aseruutaasinnaasoq.

¹⁴ ’Aap,’ immaqa eqqarsarputit, ’paasisinnaavara Kolossamiunut navianartoqarsimasoq, uangali griikerit isumaliutersuutaannit, soorlu tarnip toqusuitsuunerarneqarneranit imaluunniit ataasiullunilu pingasuussutsimik ajoqersuummit, sunnertinnissannut navianartoqanngilaq; taamatullu eqqunngitsumik upperisarsiortut qimarratigisimasama nalliuttorsiornerinut peqataanissamut pinngitsaalineqarnissannut navianartoqalaanngilaq.’ Sallusuissutip tunngaviusup Jesus aqqutigalugu saqqummersinneqartup Biibilimilu nassaassaasup ilumoortutuaaneranik qularutiginninngilluinnarneq ajunngeqaaq. Taamaakkaluartorli isumaliutersuutinit inuillu isumaannit ullumikkut nuimanerusunit navianartorsiortinneqarsinnaannginnerluta?

15, 16. Inuunermik isiginnittaaseq suna aamma kristumiunik sunniisinnaava?

¹⁵ Isummat taamaattut ilaat sivisuumik atuussimasoq mannaavoq: ’Naammiuna tikiunnissamik unnersuut? Siuaasammi sinippaarmatali kingorna pinngortitat pileqqaarnerannit suut tamarmik taamaaginnarput.’ (2 Pîtruse 3:4) Isuma tamanna immaqa oqaatsit allat atorlugit aamma oqaatigineqarsinnaasarpoq, isumaali taannaaginnassaaq. Assersuutigalugu ima eqqarsartoqarsinnaavoq: ’Ukiut qulikkuutaat matuma siorna sallusuissut ilikkarakku naggatissaq qanittuararsuunerarneqaraluarpoq. Sulili takkutinngilaq, qaqugulu takkutissanersoq kia ilisimavaa?’ Ilumoorpoq naggatissaq qaqugu nalliutissanersoq inummit kimilluunniit ilisimaneqanngimmat. Jesusilli kajumissaarutaa malugeriaruk: ’Misissoritsi, eqqumaniarlusilu qinugitsi, taamaaffissaa qaqugu nalliussasoq nalugassiuk.’ — Mákorse 13:32, 33.

¹⁶ Navianartorujussuuvoq isumaqalissalluni naggatissaq qaqugu takkutissanersoq nalugatsigu inuuneq „pissusissamisoortoq“ tamakkiisumik atorluarniaannassagipput! Taamatut isumaqarneq imatut eqqarsarnikkut ersersinnaavoq: ’Inuunera aaqqissuutiinnaqilara uanga (imaluunniit meeqqama) nuimasumik akissarsiorfiulluartumillu suliffeqalernissarput siunertaralugu, ilorrisimaarnartumik inuulernissara qulakkeerniassavara. Soorunami kristumiut ataatsimiinnerinut najuuttassaanga oqaluusseqataalaartarlungalu, kisianni ilungersorujussuarnissannut annertuumillu pilliuteqarnissannut pissutissaqanngilaq.’ — Matîuse 24:38-42.

17, 18. Qanoq isumaqarnissatsinnik Jesusip apustilillu allat kajumissaarpaatigut?

¹⁷ Kisianni assortorneqarsinnaanngilaq Jesusip apustiliisalu siunnersorsimammatigut inooriaaseqassasugut nutaarsiassap nuannersup oqaluussissutiginissaata nukinginnassusianik paasinnissimanitsinnik ersersitsisumik, ilungersorluta pilliuteqariaannaassuseqarlutalu. Paulus ima allassimavoq: ’Imanna oqarpunga, qatanngutikka: Ullussat sivikipput; kingorna nuliaqaraluartut nuliaqanngitsutut issapput, . . . pisisullu soorlu piginninngitsut, silallu matuma piinik atuisut soorlu atuinngitsut, silap matuma pissusia peerumaarmat.’ — 1 Korintumiut 7:29-31; Lúkarse 13:23, 24; Filípimiut 3:13-15; Kulorsamiut 1:29; 1 Timûtiuse 4:10; 2 Timûtiuse 2:4; sarĸúmersitat 22:20.

¹⁸ Paulusip inuulluataarnissamik anguniagaqarnissarput siunnersuutigeqqajanngilaa isumassarsisitaalluni ima allakkami: ’Sunnguamimmi nassataqarnata silamut matumunnga pigatta, nalunanngilaq sunnguamik nassataqarnata kingumut qimassagipput. Nerisassaqarlutali atisassaqarutta tamakku naammagissavavut. . . . Iluartumik sorsunniarit upperluarlutit; inuuneq naassaanngitsoq tiguuk taassumunnga qaaqquneqaravit, nassuerummillu ajunngitsumik amerlasuut tusaatillugit nassueravit.’ — 1 Timûtiuse 6:7-12.

19. Jesusip inuunermik isiginnittaasigeqqusaanik ilagiinniittut pigisaqaraangata ilagiinnut qanoq sunniuttarpa?

¹⁹ Ilagiit kristumiunik ilungersuussisunik, ’nassuerummik ajunngitsumik amerlasuut tusaatillugit nassuerutiginnittuartartunik’, ilaasortaqarpata ataasiussuseqarluarneqassaaq, isumalu manna nakkaannarfigissanngilaat: ’Ajunngitsuuterpassuarnik ukiorpassuarnut toqqortaqarpunga; qasuersaarniarlanga, nerillungalu imerlungalu nuannaarniarlanga.’ (Lúkarse 12:19) Aap, ataasiussuseqarlutik suleqatigiissapput, suliami uteqqinneqartussaanngitsumi tamatumani sapinngisamik tamakkiisumik peqataajumallutik pilliuteqarnissaminnut piumassuseqarlutik. — Naleqqiuguk Filípimiut 1:27, 28.

Oqaatsit naalakkuminarsakkat sianigisigit

20. Kristumiut aamma sukkut tammartinneqarsinnaappat?

²⁰ Soorunami aamma allatigut kristumiut ’oqaatsinik naalakkuminarsakkanik’ salloqittagaasinnaapput ’asanninnikkut ataasiullutik’ suliniarnerminnut akornusersuutaasumik. Napasuliaq Alapernaarsuiffiup Peqatigiiffiata Tysklandimi immikkoortortaqarfia ima allappoq: „Assortuunnermik pilersoqarsimavoq, nakorsamit passunneqariaatsimik qatanngutip angutip qinersimasaanik illersuillutik akerliullutilluunniit oqaluussisartut allaallu utoqqaanertat akerleriilersimapput.“ Immikkoortortaqarfiup allakkani ima ilavai: „Passusseriaatsit assigiinngitsorpassuit atorneqartut passunneqartussarpassuillu pissutaallutik akerleriinneqarpoq, katsorsaariaatsillu anersaarsiortorpalaartortaqarpata imminut navianartorsiortittoqalersinnaavoq.“ — Evfisumiut 6:12.

21. Ullumikkut kristumiup anguniakkani qanoq ililluni puiortoorsinnaavaa?

²¹ Kristumiut Guutimik pallorfiginnissinnaajumallutik inuujuaannarumapput peqqissuujumallutillu. Aaqqissuussaanermili matumani naammalluinnanngissutsip nassatarisaanik allatut ajornartumik utoqqaliartortarlutalu napparsimalertarpugut. Peqqissuunissalli ingasattajaartumik ilungersuutiginissaanut taarsiullugu uagutsinnut allanullu aaqqiissutissaq ataavartussaq siunniusimajuartariaqarparput. (1 Timûtiuse 4:16) Tamatumunnga atatillugu Kristus qitiuvoq, soorlu Paulusip Kolossamiunut unnersuussutaanut atatillugu taamaattoq. Puiussanngilarput Paulusip paasititsissutigimmagu ilaat ’oqaatsinik naalakkuminarsakkanik’ saqqummiussiumaartut Kristusimik eqqarsaatiginnikkunnaarseqqulluta, taarsiullugulu nappaatinik suussusersiiniariaatsit imaluunniit passusseriaatsit imaluunniit nerisat aalajangersimasut pingaarneruteqqullugit. — Kulorsamiut 2:2-4.

22. Ullumikkut nappaatinik suussusersiiniariaatsit passusseriaatsillu amerlaqisut qanoq oqimaaqatigiissumik isumaqarfigisariaqarpavut?

²² Nunarsuarmi sumi tamaani inuit nappaatinik suussusersiiniariaatsinik passusseriaatsinillu takoqqusaarutitigut tusatsiakkatigullu neqeroorfigineqartuartarput. Tamakku ilaat atorneqartorujussuullutillu akuersorneqartorujussuupput; allat assut isornartorsiorneqarsimapput nalorninaateqarlutillu. Soorunami inuup nammineq aalajangigassaraa peqqissutsini qanoq iliuuseqarfigissanerlugu. Paulusilli unnersuussutaanut, Kulorsamiut 2:4, 8-miittumut, tusarnaartut ’oqaatsinik naalakkuminarsakkanik’ imaluunniit ’salloqittaatinik piunngitsunik’, Naalagaaffimmik neriuuteqanngitsorpassuarnik tammartitsisimasunik, tammartitaanermut sernissugaapput. Naak kristumiup qularutiginngivikkaluarlugu passunneqariaaseq aalajangersimasoq imminut iluaqutaasoq, taamaattoq kristumioqatimi akornanni atoqqullugu siunnersuutigisaqattaartariaqanngilaa, oqqannersuarmik akerleriinnernillu kinguneqarsinnaammat. Taamaaliunnginnermigut ersersissavaa ilagiinni ataasiussutsip ataannarnissaa ataqqilluinnarini.

23. Sooq uagut nuannaarnissamut pissutissaqarneruvugut?

²³ Apustilip Paulusip erseqqissaatigaa kristumiutut ataasiussuseq piviusumik nuannaarnissamut tunngaviusoq. Taassuma nalaani ilagiit ullumikkornit ikinneroqaat. Taamaattorli Kolossami ilagiinnut ima allassinnaasimavoq: ’Unnillu uinikkut alisimagaluartunga, taamaattoq anersaakkut najorpassi tipaatsullunga peqqissaarnersi Kristusimullu uppernissi aalajaassusia malugigakku.’ (Kulorsamiut 2:5; aamma takuuk Kulorsamiunut agdlagkat 3:14.) Uagut tipaatsunnissamut pissutissavut suli amerlaneroqaat! Ilagiinni ilaaffigisatsinni ataasiussutsimut, aaqqissuussaalluassusermut uppernikkullu aalajaannermut, nunarsuaq tamakkerlugu Guutip innuttaasa ilisarnaatigisaannut, uppernarsaatissat qularnanngitsumik misigisinnaavavut. Taamaattumik aaqqissuussaanitoqqap matuma ulluini kingullerni sinneruttuminerni ’asanninnikkut ataasiujuarnissarput’ aalajangiusimaniartigu.

[Quppernerup ataani ilanngussaq]

Maluginiarpiuk?

□ Jehovap Nalunaajaasuisa suna 1995-imut allassimaffigaat?

□ Sooq Kolossami kristumiut asanninnikkut ataasiussuseqarnissartik pisariaqartissimavaat, aamma ullumikkut sooq taamaattariaqarpugut?

□ Inuunermik isiginnittaaseq tammarnartoq suna ingammik kristumiut ullumikkut mianersuutigisariaqarpaat?

□ Peqqissuseq nappaatinillu suussusersiiniariaatsit eqqarsaatigalugit oqaatsinik naalakkuminarsakkanik tammartinneqannginnissartik sooq kristumiut mianersuutigisariaqarpaat?

[Qupp. 9-mi assiliartaq]

Siunissamut pilersaarutitit Jesusip najuunneranik tunngaveqarpat?